វៀតណាម៖ ព្យុះផ្គររន្ទះ និងភ្លៀងធ្លាក់ខ្លាំងជាបន្តបន្ទាប់ក្នុងរយៈពេល ៣ ថ្ងៃកន្លងមកនេះ បានបណ្តាលឱ្យផ្ទះជាង ៥,៣០០ ខ្នង និងសាលារៀនចំនួន ៣០ នៅក្នុងខេត្តភាគខាងជើងនៃតំបន់ភ្នំប្រទេសវៀតណាមត្រូវបានដួលរលំ និងរងការខូចខាតយ៉ាងធ្ងន់ធ្ងរបំផុត នេះបើយោងតាមសារព័ត៌មានបរទេស ដែលបានចុះផ្សាយនៅថ្ងៃទី២០ ខែមេសា ឆ្នាំ២០២៤។

យោងតាមការិយាល័យនៃគណៈកម្មាធិការជាតិដឹកនាំការពារគ្រោះមហន្តរាយធម្មជាតិ Cao Bang បានឱ្យដឹងថា ឥទ្ធិពលនៃខ្យល់ព្យុះដែលបក់បោកពីប្រទេសឡាវទៅប្រទេសវៀតណាមក្នុងរយៈកម្ពស់ជាង ៥,០០០ ម៉ែត្ររយៈពេល ៣ ថ្ងៃកន្លងមកនេះគឺចាប់ពីថ្ងៃទី១៧ ដល់ថ្ងៃទី១៩ ខែមេសា បានឆ្លងកាត់ខេត្ត Lai Chau, Son La, Tuyen Quang, Cao Bang និង Bac Kan បណ្តាលឱ្យមានផ្គររន្ទះ និងភ្លៀងធ្លាក់ឥតឈប់ឈរ ធ្វើឱ្យផ្ទះរាប់ពាន់ក្នុងតំបន់ត្រូវបានជន់លិច និងរងការខូចខាតយ៉ាងធ្ងន់ធ្ងរបំផុត ដោយផ្ទះជិត ២.៥០០ ខ្នងត្រូវបានបំផ្លិចបំផ្លាញ និងផ្ទះជាង ១,៧០០ ខ្នងទៀតក្នុងខេត្ត Ha Giang ក៏ត្រូវរងការខូចខាតផងដែរ។

ព្យុះដ៏កំណាចនេះក៏បានបំផ្លិចបំផ្លាញផ្ទះជាង ៦០០ ខ្នងក្នុងខេត្ត Bac Kan និង ១៥០ ខ្នងទៀតក្នុងខេត្ត Lao Cai។ លើសពីនេះសាលារៀនចំនួន ៣០ បានរលំដំបូល និងខូចខាត ដោយប្រមូលផ្តុំនៅក្នុងស្រុក Ha Giang មាន ១៧ សាលា Lao Cai និង Cao Bang មាន ៤ សាលា ក៏ដូចជា Lai Chau មាន ២ សាលា។ ខ្យល់ព្យុះក៏បានបំផ្លាញដំណាំកសិកម្មជាង ១.៥០០ ហិកតា និងព្រៃឈើជិត ៣០០ ហិកតានៅស្រុក Ha Giang ។ រីឯខេត្ត Cao Bang បានបាត់បង់ព្រៃឈើជិត ៨០០ ហិកតា និងខេត្ត Tuyen Quang ជិត ៣០០ ហិកតា Bac Kan និង Lao Cai នីមួយៗច្រើន ឬតិចជាង ២០០ ហិកតា។

បន្ថែមពីលើនេះ នៅរសៀលថ្ងៃទី១៧ ខែមេសា មនុស្ស ៥ នាក់ដែលចែវទូកនៅលើបឹងវារីអគ្គិសនី Son La ក្នុងស្រុក Sin Ho ទៅស្រុក Lai Chau ក៏បានក្រឡាប់ដែលបណ្តាលឱ្យមនុស្សពីរនាក់បាត់ខ្លួន និងមនុស្សបីនាក់ទៀតអាចតោងជាប់នឹងកំប៉ុងប្លាស្ទិក ហើយត្រូវបានជួយសង្គ្រោះទាន់ពេល។ ដូច្នេះគិតត្រឹមរយៈពេល ៣ ថ្ងៃមកនេះឥទ្ធិពលខ្យល់ព្យុះដ៏ធំនេះបានធ្វើឱ្យខូចខាតផ្នែកសេដ្ឋកិច្ចជាង ៨ ពាន់លានដុង (ប្រមាណជាង ៣១ ម៉ឺនដុល្លារអាមេរិក)៕

ប្រទេសចិន ៖ ប្រាក់ឈ្នួលដែលគ្រោងផ្តល់ជូននិយោជិតនៅប្រទេសចិន បានកើនឡើងនៅខែមេសា ឆ្នាំ២០២៤ ក្រោយពីប្រាក់ឈ្នួលធ្លាក់ចុះជាបន្តបន្ទាប់ក្នុងរយៈពេល៣ខែកន្លងមកនេះ ។ វាបានបង្ហាញពីការល្អប្រសើរឡើងក្នុងទីផ្សារការងារ និងជំរុញការចាយវាយប្រចាំថ្ងៃរបស់ពលរដ្ឋ ដែលរស់នៅប្រទេសមានសេដ្ឋកិច្ចធំលំដាប់ទី២ លើពិភពលោក ។

ប្រាក់ខែជាមធ្យមដែលក្រុមហ៊ុនផ្សេងៗនៅតាមទីក្រុងសំខាន់ៗចំនួន៣៨ របស់ប្រទេសចិនផ្តល់ឱ្យបុគ្គលិកនោះ បានកើនឡើង២,២% បើធៀបនឹងឆ្នាំ២០២៣ ។ តាមទិន្នន័យរបស់កម្មវិធីស្វែងរកការងារតាមអនឡាញឈ្មោះ Zhaopin Ltd. បង្ហាញថា ប្រាក់ឈ្នួលនៅប្រទេសចិនកើនឡើងជាលើកដំបូង ចាប់តាំងពីគេបានកត់ត្រាកាលពីដើមឆ្នាំ២០២៣ ។

បើតាមការស្ទង់មតិជាមួយពលរដ្ឋរស់នៅទីក្រុងសៀងហៃ និងផ្សព្វផ្សាយដោយសាកលវិទ្យាល័យហិរញ្ញវត្ថុ និងសេដ្ឋកិច្ចប្រចាំទីក្រុងសៀងហៃបង្ហាញថា លក្ខខណ្ឌការងារនៅចិនកាន់តែល្អប្រសើរឡើង កាលពីត្រីមាសទី១ ឆ្នាំ២០២៤ ។

Larry Hu ជាប្រធានផ្នែកសេដ្ឋកិច្ចចិនរបស់ Macquarie Group និយាយថា ៖ «ការដំឡើងប្រាក់ឈ្នួលឱ្យបុគ្គលិក និងតម្រូវការបុគ្គលិកបន្ថែម នឹងជួយជំរុញការចាយវាយរបស់ពលរដ្ឋចិន មានន័យថា ទីផ្សារការងារធ្លាក់ចុះ គឺជាមូលហេតុសំខាន់ដែលធ្វើឱ្យទំនុកចិត្តអតិថិជននៅចិនធ្លាក់ចុះ» ។

ដោយឡែក ការិយាល័យស្ថិតិជាតិប្រទេសចិន (NBS) បានរាយការណ៍កាលពីថ្ងៃទី១៥ ខែមេសា ឆ្នាំ២០២៤ ថា ផលិតផលក្នុងស្រុកសរុប (GDP) របស់ប្រទេសចិននៅត្រីមាសទី១ ឆ្នាំ២០២៤ បានកើនឡើង៥,៣% បើប្រៀបធៀបប្រចាំឆ្នាំ ។ ហេតុនេះ វាកើនឡើងលើសចំនួនការស្ទង់មតិរបស់សារព័ត៌មានរ៉យទ័រ ដែលលើកឡើងថា ផលិតផលក្នុងស្រុកសរុប នឹងកើនឡើងត្រឹមតែ៤,៦% ប៉ុណ្ណោះ ។

លើសពីនេះ កំណើនផលិតផលក្នុងស្រុកសរុប ស្មើនឹង៥,៣% គឺកើនឡើងលើសផលិតផលក្នុងស្រុកសរុបនៅត្រីមាសទី៤ ឆ្នាំ២០២៣ ដែលកើនឡើងត្រឹមតែ៥,២% ហើយបើប្រៀបធៀបប្រចាំត្រីមាសវិញ តួលេខផលិតផលក្នុងស្រុកសរុបនៅត្រីមាសទី១ ឆ្នាំ២០២៤ កើនឡើង១,៦% គឺខ្ពស់ជាងតួលេខរបស់អ្នកវិភាគរំពឹងទុកត្រឹមតែ១,៤% និងកើនឡើងលើសត្រីមាសទី៤ ឆ្នាំ២០២៣ ដែលកើនឡើង១,២% ។

កំណើនផលិតផលក្នុងស្រុកសរុបនៅត្រីមាសទី១ ឆ្នាំ២០២៤ របស់ចិន គឺដោយសារការងើបឡើងវិញនៃសកម្មភាពផលិតកម្ម ។ ការិយាល័យស្ថិតិជាតិប្រទេសចិន (NBS) រាយការណ៍ថា សន្ទស្សន៍គ្រប់គ្រងការទិញ (PMI) ផ្នែកផលិតរបស់ចិន បានកើនឡើងក្នុងកម្រិត៥០.៨ នៅខែមីនា ឆ្នាំ២០២៤ គឺកើនឡើងពីកម្រិត៤៩.១ នៅខែកុម្ភៈ ឆ្នាំ២០២៤ ។

កំណើនសន្ទស្សន៍គ្រប់គ្រងការទិញ (PMI) ស្មើនឹង៥០.៨ នៅខែមីនា ឆ្នាំ២០២៤ គឺខ្ពស់ជាងការរំពឹងទុករបស់អ្នកវិភាគថា នឹងស្មើត្រឹមកម្រិត៤៩.៩ ។ ក្រៅពីនេះ កំណើនសន្ទស្សន៍គ្រប់គ្រងការទិញមានកម្រិតលើសពី៥០ បញ្ជាក់ថា ផ្នែកផលិតរបស់ចិនបានកើនឡើង និងជាការកើនឡើងលើកដំបូងក្នុងរយៈពេល៦ខែ ។

រដ្ឋាភិបាលចិនបានកំណត់គោលដៅកំណើនប្រចាំឆ្នាំរបស់ផលិតផលក្នុងស្រុកសរុប នៅឆ្នាំ២០២៤ ស្មើប្រមាណ៥% ។ នេះបង្ហាញពីទំនុកចិត្តលើទិសដៅសេដ្ឋកិច្ចរបស់ចិន បើទោះជាអ្នកវិភាគជាច្រើនបារម្ភថា ប្រទេសចិនពុំអាចសម្រេចតាមគោលដៅនេះទេ ដោយសារការប្រើប្រាស់ និងទំនុកចិត្តអាជីវកម្មនៅតែទន់ខ្សោយ ខណៈវិស័យអចលនទ្រព្យនឹងធ្លាក់ចុះរយៈពេលយូរ ៕

មនុស្សភាគច្រើនឆ្ងល់ថា ហេតុអ្វីត្រូវដាក់អំបិលនៅតាមចំណុចផ្សេងៗក្នុងផ្ទះ ឬដាក់អំបិលនៅហាងលក់ដូរ? តើវាអាចជួយអ្វីបានខ្លះ? ជំនឿពាក់ព័ន្ធនឹងអំបិលនេះ គឺមានជំនឿផ្សេងៗគ្នា និងជាជំនឿផ្ទាល់ខ្លួនរបស់បុគ្គលម្នាក់ៗតែប៉ុណ្ណោះ ។

កាលពីសម័យមុន ចាស់ៗជឿថា ប្រសិនបើអ្នកណាម្នាក់បានទៅចូលរួមពិធីបុណ្យសព ហើយពេលត្រឡប់មកផ្ទះរបស់ខ្លួនវិញ ត្រូវតែយកអំបិលមករោយនៅបរិវេណផ្លូវចូលផ្ទះជាមុនសិន ទើបអ្នកនោះអាចឈានជើងចូលក្នុងផ្ទះបាន ដើម្បីបណ្តេញហេតុការណ៍អាក្រក់កុំឱ្យចូលផ្ទះ ។

ក្រៅពីគេជឿថា អំបិលអាចបណ្តេញហេតុការណ៍អាក្រក់ឱ្យចេញពីផ្ទះ ក៏មានជំនឿថា អំបិលក៏អាចដាក់បណ្តាសាមនុស្សណាម្នាក់ផងដែរ ហើយគេនឹងជ្រើសរើសថ្ងៃអាក្រក់បំផុតសម្រាប់អ្នកដែលគេចង់ដាក់បណ្តាសា ដោយការធ្វើពិធីដុតអំបិល-ម្ទេស ប៉ុន្តែត្រូវតែដឹងថ្ងៃខែឆ្នាំកំណើតរបស់អ្នកនោះ ។ ដូច្នេះហើយ ទើបចាស់ៗបុរាណពុំសូវប្រាប់ថ្ងៃខែឆ្នាំកំណើតឱ្យគេដឹងប៉ុន្មានទេ ។

បើការដាក់បណ្តាសានេះមិនត្រូវអ្នកដែលគេស្អប់ទេ ដោយសារអ្នកនោះបានធ្វើអំពើល្អ ឬមានបុណ្យច្រើនសម្រាប់ការពារខ្លួនពីផ្លូវងងឹត វានឹងធ្វើឱ្យពាក្យបណ្តាសាទាំងអស់ធ្លាក់ទៅលើអ្នកដាក់បណ្តាសាគេ ។ ហេតុនេះ ព្រះពុទ្ធសាសនាតែងតែអប់រំមនុស្សឱ្យចេះអភ័យទោស អត់ឱនឱ្យគ្នាទៅវិញទៅមក និងមិនសងសឹកគ្នា ពីព្រោះអ្នកដែលដាក់បណ្តាសាគេ ច្រើនតែធ្លាក់មកលើខ្លួនឯងទាំងអស់ ។

បើតាមជំនឿហុងស៊ុយ គេជឿថា ប្រសិនបើយើងទិញផ្ទះ ឬទិញរថយន្តជជុះ គឺត្រូវយកអំបិលមករោយនៅជុំវិញផ្ទះ និងរថយន្តជាមុនសិន ដើម្បីលាងជម្រះរឿងរ៉ាវអាក្រក់ និងដោះបណ្តាសា ។ គេអាចរោយអំបិល១យប់សិន មុនពេលប្រមូលអំបិលទាំងនេះដាក់ក្នុងក្រណាត់ពណ៌ស រួចយកទៅទុកនៅវត្ត ឬទុកនៅគល់ដើមឈើធំ ។ ក្រៅពីនេះ គេបានឃើញអាជីវករលក់ដូរមួយចំនួននាំគ្នាយកអំបិលមកដាក់នៅតាមចំណុចផ្សេងៗក្នុងហាង ដោយសារពួកគេជឿថា វានឹងជួយរក្សាទ្រព្យសម្បត្តិឱ្យនៅគង់វង្ស ។

សរុបមក ជំនឿផ្សេងៗពាក់ព័ន្ធនឹងអំបិល រួមមាន ៖
១-ជំនឿពាក់ព័ន្ធនឹងពិធីបុណ្យសព គឺរោយអំបិលនៅមុខផ្ទះដើម្បីបណ្តេញហេតុការណ៍អាក្រក់ មុនពេលដើរចូលផ្ទះ
២-ជំនឿពាក់ព័ន្ធនឹងហេតុការណ៍អាក្រក់ គឺការដាក់បណ្តាសាអ្នកណាម្នាក់ តាមរយៈការដុតអំបិល-ម្ទេស
៣-ជំនឿពាក់ព័ន្ធនឹងការលក់ដូរទំនិញ គឺរោយអំបិលនៅមុខហាងលក់ដូរដើម្បីទាក់ទាញថាមពលវិជ្ជមាន
៤-ជំនឿពាក់ព័ន្ធនឹងការបណ្តេញរឿងរ៉ាវអាក្រក់ គឺយកអំបិលមកលាយជាមួយទឹកដើម្បីងូតលាងជម្រះរឿងរ៉ាវអាក្រក់ ៕

សហរដ្ឋអាមេរិក៖ កាលពីពេលថ្មីៗនេះយោងតាមការចុះផ្សាយរបស់ Livescience នៅថ្ងៃទី១៩ ខែមេសា ឆ្នាំ២០២៤ បានឱ្យដឹងថា អ្នកវិទ្យាសាស្ត្រអាមេរិកបានរកឃើញបាក់តេរីដ៏កាចសាហាវមួយប្រភេទដែលមានលក្ខណៈស្រដៀងនឹងបិសាចជញ្ជក់ឈាម នៅពេលដែលបាក់តេរីនោះស្ថិតក្នុងរាងកាយមនុស្ស។

ជាការពិតណាស់ជំងឺ Zombie មិនមែនមានតែនៅក្នុងខ្សែភាពយន្តរន្ធត់ប៉ុណ្ណោះទេ ប៉ុន្តែសព្វថ្ងៃពួកវាក៏កំពុងលាក់ខ្លួនដោយសម្ងាត់នៅក្នុងខ្លួនមនុស្សផងដែរ។ នៅក្នុងការស្រាវជ្រាវថ្មី អ្នកវិទ្យាសាស្ត្របានរកឃើញថា បាក់តេរីជាច្រើនកំពុងទទួលខុសត្រូវចំពោះការឆ្លងមេរោគលើចរន្តឈាមដែលគំរាមកំហែងដល់អាយុជីវិតបានចូលទៅក្នុងឈាមរបស់យើង ដោយសារតែឈាមរបស់មនុស្សមានម៉ូលេគុល អាស៊ីតអាមីណូ L-serine ដែលបាក់តេរីអាចប្រើជាអាហារបាន។ ដូច្នេះមនុស្សដែលមានប្រតិកម្មខ្លាចសារធាតុរាវ ឬសេរ៉ូមទំនងជាកំពុងផ្ទុកមេរោគនេះនៅក្នុងខ្លួនដោយស្ងាត់ៗ។

អ្នកស្រាវជ្រាវនៅពីក្រោយការស្រាវជ្រាវបានហៅបាតុភូតនេះថា “បិសាចជញ្ជក់ឈាមដោយបាក់តេរី” ឬជាជំងឺ Zombie។ នៅក្នុងការស្រាវជ្រាវនោះអ្នកវិទ្យាសាស្ត្របានផ្តោតលើបាក់តេរីបីប្រភេទដែលត្រូវបានរកឃើញជាទូទៅនៅក្នុងពោះវៀនរបស់មនុស្សដែលជាកម្មសិទ្ធិរបស់គ្រួសារ Enterobacteriaceae ដែលហៅថា Salmonella enterica, Escherichia coli និង Citrobacter koseri ។ ពួកគេបានរកឃើញថាបាក់តេរីទាំងនោះមានលក្ខណៈដូចបិសាចជញ្ជក់ឈាម ដោយសារពួកវាអាច “ធុំក្លិន” ទីតាំងនៃសេរ៉ូមបានយ៉ាងងាយស្រួល ហើយចូលទៅក្នុងឈាមតាមរយៈការកោសតូចៗនៅក្នុងប្រព័ន្ធរំលាយអាហារ។ ទោះជាយ៉ាងណាក៏ដោយ ការរកឃើញថ្មីនេះបានបង្ហាញពីរបៀបដែលយើងគ្រប់គ្នាគួរតែដឹងនិងការពារឱ្យបានត្រឹមត្រូវ។

បាក់តេររីនៃគ្រួសារ Enterobacteriaceae ត្រូវបានផ្សារភ្ជាប់ជាទូទៅជាមួយនឹងការឆ្លងមេរោគតាមចរន្តឈាម ដែលអាចនាំឱ្យកើតជំងឺ sepsis ឬការពុលឈាម។ បាក់តេរីនេះច្រើនរស់នៅក្នុងពោះវៀន ដូច្នេះមនុស្សដែលកើតជំងឺរលាកពោះវៀនគឺពិតជាមានហានិភ័យខ្ពស់ណាស់ក្នុងការវិវត្តទៅជាការឆ្លងមេរោគតាមចរន្តឈាម។ ប្រសិនបើនរណាម្នាក់មានផ្ទុកជំងឺនេះគឺពួកគេច្រើនតែមានអាការៈខ្លាចសេរ៉ូម និងសារធាតុរាវផ្សេងៗ។ សាស្ត្រាចារ្យ Siena Glenn អ្នកដឹកនាំការសិក្សានៅសាកលវិទ្យាល័យ Washington State បាននិយាយថា បាក់តេរីទាំងនេះអាចរកឃើញប្រភពនៃឈាមនាពេលអនាគត ដូច្នេះបច្ចុប្បន្នយើងកំពុងបង្កើតថ្នាំថ្មីដែលរារាំងសមត្ថភាពនេះ ក៏ដូចជាអាចធ្វើឱ្យប្រសើរឡើងនូវជីវិត និងសុខភាពល្អឡើងវិញរបស់អ្នកដែលមានផ្ទុកនូវជំងឺនេះ៕

ប្រទេសចិន ៖ សារព័ត៌មានបរទេសរាយការណ៍ថា មហាជនចិនចាប់អារម្មណ៍យ៉ាងខ្លាំងលើការរចនាម៉ូដសំណង់ស្ថានីយរថភ្លើង Nanjing នៅប្រទេសចិន ថា មានរូបរាងដូចគ្នានឹងសំឡីអនាម័.យ យក្ស ខណៈសំណង់ស្ថានីយរថភ្លើងនេះគ្រោងចំណាយទឹកប្រាក់សាងសង់ស្មើជាង២.៧០០លានដុល្លារអាមេរិក ។

បើតាមសេចក្តីរាយការណ៍ឱ្យដឹងថា ការរចនាម៉ូដស្ថានីយរថភ្លើង Nanjing គឺរចនាឡើងតាមផ្កាម្យ៉ាងឈ្មោះ «ផ្កាបួយ» ដែលជាផ្កាល្បីល្បាញប្រចាំទីក្រុង Nanjing ។ ប៉ុន្តែអ្នកលេងបណ្តាញសង្គមចិនភាគច្រើនមិនឯកភាពនឹងការរចនាម៉ូដស្ថានីយរថភ្លើងបែបនេះទេ ហើយពួកគេនិយាយថា ស្ថានីយរថភ្លើងមានរូបរាងដូចសំឡីអនាម័យយក្សច្រើនជាង ។ ពលរដ្ឋចិនម្នាក់និយាយថា ៖ «នេះជាសំឡីអនាម័យយក្សយ៉ាងច្បាស់ក្រឡែត ហើយវាគួរឱ្យខ្មាសអៀនណាស់ដែលប្រាប់ថា ស្ថានីយរថភ្លើងនេះមានរូបរាងដូចផ្កាបួយ» ។

ប្រទេសចិនគ្រោងចំណាយទឹកប្រាក់យ៉ាងច្រើនមហាសាលសម្រាប់សាងសង់ស្ថានីយរថភ្លើង Nanjing នៅទីក្រុង Nanjing ដែលមានពលរដ្ឋរស់នៅប្រមាណ៨លាន៥សែននាក់ ហើយវានឹងក្លាយជាស្ថានីយរថភ្លើងធំបំផុតនៅទីក្រុងនេះផងដែរ ។ ស្ថានីយរថភ្លើង Nanjing នឹងផ្តល់សេវាកម្មដល់អ្នកដំណើរប្រមាណ៣៦លាន៥សែននាក់ក្នុង១ឆ្នាំ ខណៈស្ថានីយនេះគ្រោងចំណាយប្រាក់សាងសង់ស្មើជាង២.៧០០លានដុល្លារអាមេរិក ។

សារព័ត៌មានក្នុងស្រុករាយការណ៍ថា ការរចនាម៉ូដស្ថានីយរថភ្លើង Nanjing គឺទទួលបានការអនុញ្ញាតពីរដ្ឋាភិបាល និងស្ថាប័នផ្លូវដែកប្រទេសចិន ។ ការសាងសង់ស្ថានីយរថភ្លើងនឹងចាប់ផ្តើមនៅឆមាសទី១ ឆ្នាំ២០២៤ ហើយគេរំពឹងថា ស្ថានីយរថភ្លើងនេះនឹងចាប់ផ្តើមផ្តល់សេវាកម្មដល់អ្នកដំណើរនៅដើមឆ្នាំ២០២៨ ។

វាមិនមែនជាគម្រោងសាងសង់ដំបូងគេនៅប្រទេសចិន ដែលបានទាក់ទាញចំណាប់អារម្មណ៍ពីមហាជននោះទេ កាលពីឆ្នាំ២០០៤ សារព័ត៌មាន China Central Television (CCTV) រាយការណ៍ថា មហាជនបានរិះគន់ការរចនាម៉ូដអគារមួយកន្លែងថា មានរូបរាងដូចខោខ្លីមនុស្សប្រុស ។

បើទោះជាមនុស្សមួយចំនួនសរសើរថា អគារនោះជាគម្រោងសំណង់ដ៏ល្អប្រណីតក្តី ប៉ុន្តែមនុស្សខ្លះទៀតនិយាយថា វាមានរូបរាងដូចគ្នានឹងខោខ្លីពណ៌ខ្មៅរបស់មនុស្សប្រុស ។ ហេតុនេះ ពលរដ្ឋចិនរស់នៅក្បែរអគារខាងលើនាំគ្នាហៅថា «អគារខោខ្លីយក្ស» ៕

ប្រទេសជប៉ុន៖ Lion Cafe គឺហាងកាហ្វេតែមួយគត់នៅក្នុងប្រទេសជប៉ុនដែលហាមប្រាមការប្រើប្រាស់ទូរស័ព្ទដៃ ដោយសារកន្លែងនេះគឺរក្សាភាពស្ងប់ស្ងាត់និងរ៉ូមែនទិកបំផុត ដែលស្ថិតនៅតំបន់ Shibuya នៃទីក្រុងតូក្យូ ប្រទេសជប៉ុន។
ហាងកាហ្វេនេះបានបើកដំណើរការជិតមួយសតវត្សមកហើយ និងជាកន្លែងចុងក្រោយបង្អស់នៃប្រភេទ meikyoku Kissa ដែលជាហាងកាហ្វេតន្ត្រីបុរាណនៅទីក្រុងតូក្យូ ត្រូវបានចាត់ទុកថាជារូបតំណាងវប្បធម៌នៃទីក្រុង និងបានក្លាយជានិមិត្តរូបនៃវប្បធម៌ជាតិផងដែរ។ លោក Naoya Yamadera ម្ចាស់ហាងកាហ្វេបាននិយាយថា “ហាងកាហ្វេតន្ត្រីបុរាណ” មិនត្រឹមតែជាកន្លែងសម្រាប់រីករាយជាមួយតន្ត្រីប៉ុណ្ណោះទេ ប៉ុន្តែវាក៏ជាកន្លែងសម្រាប់សម្រាក និងរីករាយជាមួយពេលវេលាខ្លះសម្រាប់ខ្លួនអ្នកផងដែរ។

ប្រវត្តិរបស់ Lion Cafe មានទំនាក់ទំនងយ៉ាងជិតស្និទ្ធជាមួយគ្រួសារ Yamadera ។ ឪពុករបស់លោក Yanosuke Yamadera បានសាងសង់ហាងកាហ្វេនេះក្នុងឆ្នាំ ១៩២៦ បន្ទាប់មកវាត្រូវបានដុតបំផ្លាញនៅក្នុងការវាយឆ្មក់តាមអាកាសនៃសង្គ្រាមលោកលើកទី ២។ ក្រោយមក Lion Cafe ក៏ត្រូវបានសាងសង់ឡើងវិញ និងពង្រីកនៅក្នុងទសវត្សរ៍ឆ្នាំ ១៩៥០ ជាមួយនឹងការរចនាដែលត្រូវបានបំផុសគំនិតដោយរចនាប័ទ្មភូមិដ៏ចម្លែករបស់អឺរ៉ុបដើម។ ទោះជាយ៉ាងណាក៏ដោយ ចំនុចពិសេសបំផុតរបស់ Lion Cafe មិនមែនជាស្ថាបត្យកម្ម ឬប្រវត្តិសាស្រ្តរបស់វានោះទេ ប៉ុន្តែវាផ្តោតលើបទពិសោធន៍តន្ត្រី ដែលខុសប្លែកពីហាងកាហ្វេធម្មតា ដូច្នេះការទំនាក់ទំនងសង្គមត្រូវបានបង្អាក់នៅទីនេះ ហើយការប្រើប្រាស់ទូរស័ព្ទដៃត្រូវបានហាមឃាត់ទាំងស្រុង។

Lion Cafe ក៏ល្បីល្បាញសម្រាប់ប្រព័ន្ធសំឡេងដែលបង្កើតឡើងយ៉ាងពិសេសក្នុងឆ្នាំ ១៩៥០ ជាមួយនឹងតន្ត្រីបុរាណ និងស៊ីឌីជាង ១០.០០០ ប្រភេទនៅក្នុងការប្រមូលរបស់វា។ អតិថិជនមិនត្រឹមតែអាចរីករាយនឹងស្នាដៃបុរាណពីការប្រមូលរបស់ហាងប៉ុណ្ណោះទេ ប៉ុន្តែពួកគេក៏អាចស្នើសុំតន្ត្រីដែលពួកគេចូលចិត្តបានផងដែរ។ ទោះយ៉ាងណាប្រសិនបើបទចម្រៀងស្ថិតនៅក្នុងបញ្ជីចាក់ដែលបានរៀបចំទុកជាមុន សំណើនឹងមិនត្រូវបានទទួលយកទេ។ ថ្វីត្បិតតែវាមានរយៈពេលជាច្រើនទសវត្សរ៍មកហើយក៏ដោយ ក៏ការទាក់ទាញរបស់ Lion Cafe នៅតែដដែល។

លោក Yamadera បានចែករំលែកនូវមោទនភាពរបស់គាត់ នៅពេលដែលគាត់បានឃើញអតិថិជនជាច្រើនត្រលប់មកវិញបន្ទាប់ពីជាច្រើនឆ្នាំ ដោយនាំយកនូវអនុស្សាវរីយ៍ និងអារម្មណ៍ពិសេសៗមកជាមួយ។ លើសពីនេះ Lion Cafe មិនត្រឹមតែទាក់ទាញអតិថិជនក្នុងស្រុកប៉ុណ្ណោះទេ ថែមទាំងទាក់ទាញភ្ញៀវទេសចរណ៍អន្តរជាតិទៀតផង។ អតិថិជនរបស់ហាងនេះភាគច្រើនមកពីប្រទេសឆ្ងាយៗ ដូចជាសហរដ្ឋអាមេរិក និងអឺរ៉ុបជាដើម។ ជាមួយនឹងបរិយាកាសតន្ត្រីបុរាណ និងភាពទាក់ទាញពិសេសរបស់វា Lion Cafe នៅតែបន្តជាគោលដៅដែលមិនគួររំលងសម្រាប់អ្នកចូលចិត្តតន្ត្រី និងអ្នកដែលកំពុងស្វែងរកកន្លែងស្ងប់ស្ងាត់ដើម្បីសម្រាក និងរីករាយ៕

ប្រទេសវៀតណាម ៖ ការិយាល័យពាណិជ្ជកម្មបរទេសរបស់វៀតណាមបង្ហាញថា ការវិនិយោគផ្ទាល់ពីបរទេស (Foreign Direct Investment: FDI) មកកាន់ប្រទេសវៀតណាម បានកើនឡើងចាប់ពីខែមករា ដល់ខែកុម្ភៈ ឆ្នាំ២០២៤ ស្មើទឹកប្រាក់ជាង៤.២៩០លានដុល្លារអាមេរិក ។ នេះចាត់ទុកថា វាមានកំណើនយ៉ាងខ្លាំង ស្មើនឹង៣៨,៦% បើធៀបនឹងឆ្នាំ២០២៣ ។

ការិយាល័យពាណិជ្ជកម្មបរទេសបញ្ជាក់ថា ចាប់ពីខែមករា ដល់ខែកុម្ភៈ ឆ្នាំ២០២៤ ប្រទេសវៀតណាមបានផ្តល់អាជ្ញាប័ណ្ណវិនិយោគថ្មីប្រមាណ៤០៥គម្រោង ដែលមានទឹកប្រាក់វិនិយោគចុះបញ្ជីរួចហើយ ចំនួន៣.៦០០លានដុល្លារអាមេរិក ។ វាបានកើនឡើង៥៥,៥% ផ្នែកបរិមាណ និងទឹកប្រាក់វិនិយោគកើនឡើងទ្វេដង បើធៀបនឹងរយៈពេលដូចគ្នានៅឆ្នាំ២០២៣ ។

ខេត្ត-ក្រុង ដែលទាក់ទាញការវិនិយោគផ្ទាល់ពីបរទេសច្រើនបំផុតនៅវៀតណាម រួមមាន ៖ ហាណូយ, ក្វាងនិញ, ថាង៉េង្វៀន, បាសៀ វុងតាវ, ប៊ិកនីន, ដុងណាយ, ប៊ុកសាង, ហូជីមិញ, ហៃផុង និងហឿងអៀន ។ ការវិនិយោគនៅខេត្ត-ក្រុងទាំងនេះ ស្មើនឹង៨១,៧% នៃការវិនិយោគផ្ទាល់ពីបរទេសសរុប ចាប់ពីខែមករា ដល់ខែកុម្ភៈ ឆ្នាំ២០២៤ ក្នុងនោះទីក្រុងហាណូយទទួលបានការវិនិយោគផ្ទាល់ពីបរទេស ជិតស្មើ៩១៤លាន៤សែនដុល្លារអាមេរិក កើនឡើង២៤,៤ដង បើធៀបនឹងរយៈពេលដូចគ្នាកាលពីឆ្នាំ២០២៣ ។

ក្រៅពីនេះ ក្នុងរយៈពេល២ខែដំបូងនៃឆ្នាំ២០២៤ ប្រទេសដែលបានវិនិយោគនៅវៀតណាមច្រើនជាងគេ រួមមាន ៖ សិង្ហបុរី, ហុងកុង, ជប៉ុន និងចិន ក្នុងចំណោម៤៨ប្រទេស និងតំបន់សេដ្ឋកិច្ចផ្សេងៗដែលបានមកវិនិយោគនៅវៀតណាម ។ រីឯឆ្នាំ២០២៣ ប្រទេសចូលមកវិនិយោគនៅវៀតណាមច្រើនជាងគេ រួមមាន ៖ សិង្ហបុរី, ជប៉ុន, ហុងកុង, ចិន និងកូរ៉េខាងត្បូង ។

នៅឆ្នាំ២០២៤ វិនិយោគិនបរទេសបានវិនិយោគក្នុងផ្នែកឧស្សាហកម្មជាច្រើននៅវៀតណាម ដូចជា ៖ ឧស្សាហកម្មកែច្នៃ និងផលិត ។ វាជាទិន្នន័យដូចគ្នានឹងទិន្នន័យនៅឆ្នាំ២០២៣ ដែលបញ្ជាក់ថា ឧស្សាហកម្មកែច្នៃ និងផលិត គឺជាឧស្សាហកម្មនាំមុខសម្រាប់ការវិនិយោគ ដែលមានទឹកប្រាក់វិនិយោគស្មើជាង២៣.៥០០លានដុល្លារអាមេរិក ស្មើនឹង៦៤,២% នៃការវិនិយោគសរុប និងកើនឡើង៣៩,៩% បើធៀបនឹងឆ្នាំ២០២២ ។

ចំណែកឧស្សាហកម្មផ្សេងទៀតដែលវិនិយោគិនបរទេសបានវិនិយោគនៅវៀតណាម រួមមាន ៖ ឧស្សាហកម្មបច្ចេកវិទ្យា ដែលទទួលបានការច្នៃប្រឌិតថ្មីៗ និងការប្រើប្រាស់បច្ចេកវិទ្យាដើម្បីផ្លាស់ប្តូរវិធីធ្វើការ ឬអាជីវកម្ម ។ រីឯឧស្សាហកម្មថាមពលកកើតឡើងវិញ ក៏ទទួលបានការចាប់អារម្មណ៍ផងដែរ ជាពិសេស ថាមពលស្អាត ដូចជា ៖ ថាមពលពន្លឺព្រះអាទិត្យ និងថាមពលខ្យល់ ដែលជំរុញធនធានថាមពលវៀតណាមប្រកបដោយនិរន្តរភាព ៕

អ្នកលេងបណ្តាញសង្គមនៅកម្ពុជាបានចែកចាយវីដេអូរបស់ YouTuber ជនជាតិថៃម្នាក់ឈ្មោះ «BACKPAEGER แบกเป้เกอร์» ដែលបានមកថតវីដេអូនៅខេត្តសៀមរាប ប្រទេសកម្ពុជា ប៉ុន្តែបែរជានិយាយប្រៀបធៀបសង្ក្រាន្តកម្ពុជា និងសង្ក្រាន្តថៃ ហើយថា កម្ពុជាពុំបានត្រៀមខ្លួនសម្រាប់ពិធីបុណ្យសង្ក្រាន្ត ។ YouTuber ថៃរូបនេះថែមទាំងនិយាយថា នៅខេត្តសៀមរាបគ្មានភ្ញៀវទេសចរ និងគ្មានអ្នកលេងទឹក ប៉ុន្តែពេល YouTuber នេះទៅថតវីដេអូនោះ គឺថតខុសពេលវេលា ។

ក្រោយពី YouTuber ថៃបានបង្ហោះវីដេអូនៅខេត្តសៀមរាប ធ្វើឱ្យពលរដ្ឋខ្មែរ ក៏ដូចជាជនជាតិថៃរស់នៅប្រទេសកម្ពុជា បង្ហាញការមិនពេញចិត្តចំពោះការនិយាយប្រៀបធៀបរវាងសង្ក្រាន្តកម្ពុជា និងសង្ក្រាន្តថៃ ។ ពួកគេបានសំណូមពរឱ្យ YouTuber រូបនេះព្យាយាមឈ្វេងយល់អំពីវប្បធម៌ ប្រពៃណីកម្ពុជា ហើយកុំនិយាយប្រៀបធៀបគ្នាថា សង្ក្រាន្តកម្ពុជាមិនល្អ ឬសង្ក្រាន្តកម្ពុជាល្អមិនស្មើថៃ ។

អ្នកបណ្តាញសង្គមថៃម្នាក់និយាយថា មិនមែនគ្រប់ប្រទេសសុទ្ធតែរៀបចំកម្មវិធីសង្ក្រាន្តដូចគ្នាទេ ហើយវាអាស្រ័យលើពេលវេលា និងការរៀបចំរបស់ខេត្តនីមួយៗផងដែរ ។ ម្យ៉ាងទៀត ការលេងជះទឹកពុំបានលេងនៅទូទាំងខេត្តទេ ពីព្រោះខេត្តនីមួយៗបានរៀបចំកន្លែងលេងទឹក ចាប់ពី២កន្លែង ទៅ៣កន្លែង ។ ពេលព្រឹក ពលរដ្ឋខ្មែរភាគច្រើនបានចំណាយពេលសប្បាយរីករាយជាមួយគ្រួសារ ឬនាំគ្រួសារទៅធ្វើបុណ្យនៅវត្ត ឬទៅចូលរួមកម្មវិធីតាមទីកន្លែងផ្សេងៗ ដូចជា ៖ លេងទាញព្រ័ត្រ ឬវាយក្អម និងមានការលេងល្បែងប្រជាប្រិយជាច្រើនទៀត ។

ពេលវេលាដែល YouTuber ថៃថតវីដេអូនោះ គឺប្រមាណម៉ោង១០ព្រឹក ហើយនៅចំណុចនេះ ពុំទាន់លេងទឹកនៅឡើយទេ ។ ប៉ុន្តែ YouTuber ថៃនិយាយថា ៖ «ម៉ោង១០ព្រឹក បើនៅប្រទេសថៃវិញនឹងមានមនុស្សម្នាដើរលេង ឬលេងទឹកច្រើន ហើយនៅកម្ពុជាស្ងាត់ឈឹង គ្មានអ្នកណាចេញមកលេងទឹក តើហៅថាសង្ក្រាន្តយ៉ាងម៉េចទៅ? ឬអះអាងថា ខ្លួនជាម្ចាស់សង្ក្រាន្តដោយរបៀបណា?» ។

ដូច្នេះ សូមបញ្ជាក់ទៅកាន់ YouTuber ថៃថា សង្ក្រាន្តកម្ពុជា និងថៃពុំដូចគ្នាទេ ហើយសូមជនជាតិថៃកុំយល់ច្រឡំថា សង្ក្រាន្តប្រទេសទាំងពីរដូចគ្នា ។

កន្លងមក រដ្ឋាភិបាលថៃបានប្រកាសថា នឹងអនុញ្ញាតឱ្យពលរដ្ឋថៃលេងជះទឹក ឬបាញ់ទឹករយៈពេល២១ថ្ងៃ ប៉ុន្តែជាក់ស្តែង គ្មានពលរដ្ឋថៃណាលេងទឹករហូតដល់២១ថ្ងៃទេ ។ មានជនជាតិថៃម្នាក់បានថតវីដេអូនៅខេត្តហួហ៊ីន និងនិយាយថា នៅថ្ងៃទី២ នៃពិធីបុណ្យសង្ក្រាន្ត ពលរដ្ឋនៅខេត្តហួហ៊ិនពុំបានលេងទឹកទេ នៅតាមផ្លូវមានសភាពស្ងាត់ជ្រងំ អ្នកនៅហួហ៊ីនរស់នៅធម្មតា ដូចគ្មានពិធីបុណ្យអ្វីឡើយ ។ ប៉ុន្តែការពិត ជនជាតិថៃរូបនេះថតវីដេអូមិនត្រូវពេលវេលាដែលពលរដ្ឋខេត្តហួហ៊ីនលេងទឹក ។ ដូច្នេះ វាដូចគ្នានឹងខេត្តសៀមរាបដែរ ដែល YouTuber ថៃបានថតវីដេអូខុសពេលវេលា ។

ហេតុនេះ ជនជាតិថៃគ្រប់រូបគួរតែសិក្សាឈ្វេងយល់អំពីវប្បធម៌ និងប្រពៃណីរបស់ប្រទេសកម្ពុជាឱ្យបានច្បាស់លាស់សិន មុននឹងបង្ហោះរូបភាព ឬវីដេអូ ឬរិះគន់អ្វីមួយក្នុងបណ្តាញសង្គម ៕