ដើមឈើខាងក្រោមនេះមិនត្រឹមតែងាយស្រួលក្នុងការថែទាំប៉ុណ្ណោះទេ ថែមទាំងជាប្រភេទដើមឈើដ៏ពេញនិយមបំផុតក្នុងការដាំលម្អក្នុងផ្ទះ ដោយសារតម្លៃធូរថ្លៃ បានទាំងស្អាត នាំពណ៌បៃតងជំនួយភ្នែក និងផាសុកភាព ហើយវាក៏ជួយនាំលាភសំណាងចូលក្នុងផ្ទះរបស់អ្នកទៀតផង។ ដូច្នេះខាងក្រោមនេះគឺជាដើមឈើល្អៗចំនួន ៤ ដែលអ្នកអាចដាំក្នុងផ្ទះបានដោយមិនបាច់ថែទាំច្រើន៖

១.ដើមប្រទាលកន្ទុយក្រពើ៖ ប្រទាលកន្ទុយក្រពើគឺជារុក្ខជាតិមួយក្នុងចំណោមរុក្ខជាតិដែលគួរដាំនៅក្នុងផ្ទះ ឬបន្ទប់ដែលមានខ្យល់ចេញចូល។ ក្រៅពីមានគុណសម្បត្តិជាឱសថច្រើនមុខសម្រាប់ព្យាបាលជំងឺផ្សេងៗ វាក៏ផ្តល់សោភ័ណភាពដល់ផ្ទះរបស់យើងផងដែរ។ aloe vera គឺសាកសមបំផុតសម្រាប់អ្នកដែលមិនមានពេលទំនេរច្រើនដើម្បីមើលថែពួកវា ដោយសារវាជារុក្ខជាតិដែលងាយនឹងដុះលូតលាស់លឿន ហើយអ្វីដែលសំខាន់បំផុតនោះគឺវាធន់នឹងគ្រោះរាំងស្ងួត។

២.ដើមឫស្សី៖ វាគឺជារុក្ខជាតិមួយប្រភេទដែលមនុស្សភាគច្រើននិយមដាំក្នុងផ្ទះដោយសារវាងាយស្រួលក្នុងការថែទាំ និងមិនចាំបាច់មើលថែច្រើនដូចរុក្ខជាតិផ្សេងទៀតនោះទេ។ លើសពីនេះដើមឫស្សីក៏ត្រូវបានគេជឿថាពេលដាំវាហើយនឹងធ្វើឱ្យអ្នកក្នុងផ្ទះមានសំណាងល្អ និងមានលុយហូរចូលច្រើនៗ។ ដើម្បីទាក់ទាញលាភសំណាង គេនិយមដាក់វានៅម្លប់ដែលមានពន្លឺព្រះអាទិត្យតិចជាដើម។

៣.ដើមអណ្ដាតនាគ៖ ដើមអណ្ដាតនាគ ជាដើមឈើដ៏ពេញនិយមដែលគេច្រើនដាំនៅក្នុងផ្ទះ ឬកន្លែងធ្វើការ។ វាមានស្លឹករាងមូល ឬរាងសំប៉ែត និងមានពណ៌បៃតងពេញមួយឆ្នាំ ដោយស្លឹកមានទទឹងប្រហែល ៤-៧ សង់ទីម៉ែត្រ និងកំពស់ ៣០-៦០ សង់ទីម៉ែត្រ ធន់នឹងអាកាសធាតុក្តៅ និងស្ងួត រួមទាំងការរីកលូតលាស់ល្អបំផុតក្នុងផ្ទះ ឬនៅខាងក្នុងអគារ ដោយគ្រាន់តែដាក់វាឱ្យត្រូវពន្លឺព្រះអាទិត្យគឺគ្រប់គ្រាន់ហើយ។

៤.ដើមផ្កាអ័រគីដេអ៊ីតាលី៖ នៅក្នុងក្បួនហ្វុងស៊ុយដើមឈើអ័រគីដេ (ត្រូវបានគេស្គាល់ផងដែរ ថាជាមែកឈើ ឬផ្កាពណ៌ស) តំណាងឱ្យសុភមង្គលរបស់ស្ត្រី។ ការដាំដើមឈើប្រភេទនេះ ជួយបំពេញផ្ទះដោយក្តីរីករាយ។ ផ្កាអ័រគីដេអ៊ីតាលីនៅពេលរីកដុះដាលនាំមកនូវភាពថ្លៃថ្នូ មិនត្រឹមតែងាយស្រួលថែទាំនោះទេ ដើមផ្កានេះក៏មានប្រសិទ្ធភាពធ្វើឱ្យមានតុល្យភាពរវាងម៉ាស៊ីនត្រជាក់ស្រូបយកថាមពលដែលមានឥទ្ធិពលនៅក្នុងផ្ទះ ជួយឱ្យម្ចាស់ផ្ទះមានកន្លែងរស់នៅប្រកបដោយសុខដុមរមនា៕

មនុស្សមួយចំនួននៅតែមិនទាន់ជ្រាបទេថា តើ Introvert គឺជាអ្វី? តើគេអាចសម្មត់ថានរណាម្នាក់មានចរឹតលក្ខណៈជាមនុស្ស Introvert ដោយរបៀបណា? ខាងក្រោមនេះ គឺជាសញ្ញាសម្គាល់មួយចំនួន ដែលអ្នកត្រូវតែស្វែងយល់អំពីមនុស្សប្រភេទនេះ៖

មនុស្ស Introvert ភាគច្រើនតែងចូលចិត្តនៅកន្លែងស្ងាត់ៗ ព្រោះពួកគេតែងមានអារម្មណ៍ថាហត់នឿយឬក៏ធុញថប់អំឡុងពេលស្ថិតនៅក្នុងហ្វូងមនុស្សច្រើន។ ទោះជាយ៉ាងណា នេះមិនមានន័យថា introverts ជៀសវាងការចូលរួមក្នុងសង្គមទាំងស្រុងនោះទេ។ Introverts ច្រើនចូលចិត្តចំណាយពេលជាមួយនឹងអ្នកដែលទុកចិត្ត ពិសេសគឺមិត្តភក្តិជិតស្និទ្ធច្រើនជាង។ មនុស្ស introverts ចូលចិត្តរក្សាទំនាក់ទំនងដ៏ស៊ីជម្រៅ និងយូរអង្វែងពិសេសគឺបង្កើនភាពស្និទ្ធស្នាលជាមួយមនុស្សដែលយល់ចិត្តតែប៉ុណ្ណោះ។

អ្នកក៏កត់សម្គាល់ផងដែរថា សម្រាប់មនុស្ស Introvert ផ្សេងទៀតអាចរស់នៅជាមួយភាពឯកកោបានយ៉ាងរីករាយបំផុត។ ដោយពួកគេតែងតែធ្វើតាមចំណង់ចំណូលចិត្តរបស់ខ្លួនឯងតាមរយៈសកម្មភាពម្នាក់ៗឯង ដូចជាសញ្ជឹងគិត អានសៀវភៅ ស្តាប់ចម្រៀង រីករាយជាមួយធម្មជាតិជាដើម ធ្វើឲ្យពួកគេហាក់ដូចជាបាននឹងកំពុងទទួលថាមពលពិសេសអ្វីបែបនេះដែរ។ លើសពីនេះ ពួកគេគឺជាមនុស្សដែលស្គាល់ខ្លួនឯងច្បាស់បំផុត ព្រោះជារឿយៗតែងតែធ្វើការសិក្សាស្វែងយល់ពីខ្លួនឯង និងមានគំនិតច្នៃប្រឌិតខ្ពស់ផងដែរ។

ម៉្យាងវិញទៀត មនុស្ស Introvert គឺវាពិបាកណាស់សម្រាប់ឲ្យអ្នកដទៃស្គាល់ពួកគេបានយ៉ាងងាយ។ Introverts ជារឿយៗត្រូវបានពិពណ៌នាថាជាមនុស្សស្ងប់ស្ងាត់ កក់ក្ដៅ និងស្លូតបូត ហើយជួនកាលត្រូវបានគេយល់ច្រឡំថាខ្មាស់អៀន ខណៈពេលដែល introverts មួយចំនួនពិតជាខ្មាស់អៀន។ យ៉ាងណាមិញ បុគ្គលិកលក្ខណៈមនុស្សប្រភេទនេះតែងមានការប្រុងប្រយ័ត្នខ្ពស់ និងមិនខ្ជះខ្ជាយពេលវេលាលើការជជែកកំសាន្តដោយមិនចាំបាច់នោះទេ។

បន្ថែមពីលើនេះ មនុស្ស Introvert នឹងមានទំនោរទៅរកការងារដែលមានភាពឯករាជ្យ ព្រោះថា ពួកគេមិនចូលចិត្តកន្លែងអ៊ូអរដែលមានមនុស្សចេញចូលច្រើនទេ ដូច្នេះហើយអាជីពដែលល្អបំផុតសម្រាប់ពួកគេអាចជាអ្នកនិពន្ធ គណនេយ្យករ អ្នកសរសេរកម្មវិធីកុំព្យូទ័រ អ្នករចនាក្រាហ្វិក ឱសថការីជាដើម។

យោងតាមការសិក្សាស្រាវជ្រាវ មនុស្ស Introvert ត្រូវបានចែកចេញជា ៤ ប្រភេទធំៗដូចខាងក្រោម៖
– Social Introvert ៖ ជាប្រភេទមនុស្សដែលចូលចិត្តសំងំនៅផ្ទះម្នាក់ឯង ជាពិសេសគឺពេលយប់ស្ងាត់
-Thinking Introvert៖ ជាប្រភេទមនុស្សដែលចំណាយពេលច្រើនក្នុងការគិតពិចារណា ប៉ុន្តែប្រកបដោយគំនិតច្នៃប្រឌិតខ្ពស់
-Anxious Introvert៖ ជាប្រភេទមនុស្សដែលមានការថប់បារម្ភច្រើន ពិសេសពួកគេតែងមានអារម្មណ៍មិនស្ងប់ឬភ័យអំឡុងពេលស្ថិតនៅក្នុងហ្វូងមនុស្សឬមានទំនាក់ទំនងសង្គម
-Inhibited introverts៖ ជាប្រភេទមនុស្សដែលមានទំនោរទៅរកការគិតច្រើនខ្លាំងបំផុត ដោយចំណាយពេលច្រើនក្នុងការពិចារណាលើការសម្រេចចិត្តមុននឹងធ្វើអ្វីមួយ៕

សហរដ្ឋអាមេរិក៖ កាលពីពេលថ្មីៗនេះ នៅថ្ងៃទី១៩ ខែមេសា ឆ្នាំ២០២៤ យោងតាមអង្គការសុខភាពពិភពលោក (WHO) បានឱ្យដឹងថា ជំងឺគ្រុនផ្តាសាយប្រភេទ A H5N1 កំពុងក្លាយជាជំងឺរាតត្បាតសត្វពាសពេញពិភពលោក ដោយអង្គការបានព្រមានអំពីការកើនឡើងនៃចំនួនសត្វ និងមនុស្សដែលកំពុងឆ្លងមេរោគផ្តាសាយបក្សី H5N1។

បើយោងតាមលោកវេជ្ជបណ្ឌិត Jeremy Farrar ដែលជាប្រធានអ្នកវិទ្យាសាស្ត្រនៅអង្គការសុខភាពពិភពលោកបាននិយាយថា មេរោគគ្រុនផ្តាសាយបក្សីបណ្តាលឱ្យមានអត្រាមរណភាព “ខ្ពស់ខ្លាំង” ក្នុងចំណោមអ្នកដែលបានឆ្លងជំងឺនេះរហូតមកដល់បច្ចុប្បន្ននេះ។ លោកវេជ្ជបណ្ឌិតបានបន្តទៀតថា នេះគឺជាក្តីបារម្ភដ៏ធំមួយ ព្រោះថាបន្ទាប់ពីឆ្លងទៅសត្វបក្សី រួចរាលដាលដល់ថនិកសត្វ ពេលនេះមេរោគកំពុងវិវឌ្ឍ និងអភិវឌ្ឍសមត្ថភាពឆ្លងដល់មនុស្ស ហើយអាចឆ្លងបន្តិចម្តងៗពីមនុស្សម្នាក់ទៅមនុស្សម្នាក់ទៀត។

ទោះបីជាមិនទាន់មានការកត់ត្រាករណីនៃការឆ្លងពីមនុស្សម្នាក់ទៅមនុស្សម្នាក់នៃមេរោគ H5N1 ក៏ដោយ លោកវេជ្ជបណ្ឌិត Jeremy Farrar បាននិយាយថា H5N1 គឺជាប្រភេទជំងឺផ្តាសាយ ដែលភាគច្រើនចាប់ផ្តើមនៅក្នុងបសុបក្សី និងទា ហើយបានរីករាលដាលយ៉ាងឆាប់រហ័សនៅទូទាំងពិភពលោកក្នុងរយៈពេល ១ ឬ ២ ឆ្នាំកន្លងមកនេះ ដែលវាបានក្លាយទៅជាជំងឺរាតត្បាតសកល ខណៈបច្ចុប្បន្ននេះមេរោគនោះបានកំពុងវិវត្ត និងអភិវឌ្ឍសមត្ថភាពឆ្លងពីមនុស្ស ដែលគ្រោះថ្នាក់ជាងសមត្ថភាពចម្លងពីសត្វទៅមនុស្សទៅទៀត។

ការផ្ទុះឡើងនៃជំងឺផ្តាសាយបក្សីនាពេលបច្ចុប្បន្ននេះបានចាប់ផ្តើមនៅឆ្នាំ ២០២០ ហើយបានសម្លាប់សត្វបក្សីរាប់លានក្បាល ដោយមិនគិតពីសត្វស្លាបព្រៃ និងថនិកសត្វដទៃទៀត។ កាលពីខែមុន ការរកឃើញករណីជំងឺគ្រុនផ្តាសាយបក្សីលើសត្វគោ និងពពែបានធ្វើឱ្យអ្នកជំនាញភ្ញាក់ផ្អើល ដោយសារតែសត្វទាំងនេះជាសត្វដែលគេគិតថាមិនងាយឆ្លងជំងឺផ្តាសាយបក្សីឡើយ។ WHO បាននិយាយថា ទោះបីជាបច្ចុប្បន្នមិនមានភស្តុតាងគ្រប់គ្រាន់ដែលបង្ហាញថា H5N1 ឆ្លងរវាងមនុស្សក៏ដោយ ក៏ករណីរាប់រយករណីរបស់មនុស្សដោយសារតែការប៉ះពាល់ជាមួយសត្វ ត្រូវបានគេរកឃើញ ជាមួយនឹងអត្រាមរណភាពខ្ពស់ខុសពីធម្មតា។

ហេតុនេះហើយអង្គការសុខភាពពិភពលោកបានសង្កត់ធ្ងន់ថា ខណៈពេលដែលកិច្ចខិតខំប្រឹងប្រែងដើម្បីបង្កើតវ៉ាក់សាំង និងការព្យាបាលសម្រាប់ជំងឺគ្រុនផ្តាសាយបក្សីនៅតែបន្ត មន្ត្រីសុខាភិបាលនៅតាមបណ្តាប្រទេសនានាត្រូវតែធានាថាពួកគេមានសមត្ថភាពវិនិច្ឆ័យគ្រប់គ្រាន់ ក្នុងករណីដែលស្ថានភាពនៃការចម្លងមេរោគកើតឡើងពីមនុស្សទៅមនុស្ស ហើយពិភពលោកក៏នឹងត្រៀមខ្លួនរួចជាស្រេចក្នុងការឆ្លើយតបផងដែរ៕

ប្រទេសថៃ ៖ កាលពីថ្ងៃទី១៣ ខែមេសា ឆ្នាំ២០២៤ សារព័ត៌មានថៃរាយការណ៍ថា ការប្រយុទ្ធគ្នាដ៏ខ្លាំងក្លាជាថ្មីនៅខែមេសា ឆ្នាំ២០២៤ រវាងទាហានមីយ៉ាន់ម៉ាជាមួយក្រុម Karen នៅទីក្រុងជាយដែនឈ្មោះ Myawaddy បានធ្វើឱ្យពលរដ្ឋមីយ៉ាន់ម៉ារស់នៅក្នុងតំបន់នាំគ្នាធ្វើដំណើរចូលមកប្រទេសថៃជាបន្តបន្ទាប់ ដើម្បីគេចពីអំពើ ហិ.ង្សា ។

សារព័ត៌មានថៃរាយការណ៍ពីស្រុកម៉ែស៊ត ខេត្តតាក កាលពីថ្ងៃទី១៣ ខែមេសា ថា ស្ត្រីមីយ៉ាន់ម៉ាឈ្មោះ Mo Mo Thet San ដែលមានផ្ទះសម្បែងនៅទីក្រុង Myawaddy រដ្ឋ Karen ស្ថិតនៅតំបន់ខាងកើតប្រទេសមីយ៉ាន់ម៉ា និងមានព្រំដែនជាប់ជាមួយស្រុកម៉ែស៊ត ខេត្តតាក ប្រទេសថៃ បាននិយាយក្នុងអំឡុងពេលនាងកំពុងឈរតម្រង់ជួរជាមួយកូនប្រុស ដើម្បីរង់ចាំការត្រួតពិនិត្យឯកសារពីអាជ្ញាធរថៃ ថា នាងបានសម្រេចចិត្តធ្វើដំណើរមកប្រទេសថៃសិនដើម្បីគេចពីអំពើហិង្សា ពីព្រោះនាងជឿថា ប្រទេសថៃមានសុវត្ថិភាព ។

ស្ត្រីមីយ៉ាន់ម៉ាឈ្មោះ Mo Mo Thet San អាយុ៣៩ឆ្នាំ បន្តថា ការប្រយុទ្ធគ្នានៅទីក្រុង Myawaddy ដែលមានការវាយប្រហារតាមអាកាសយ៉ាងធ្ងន់ធ្ងរ បានធ្វើឱ្យនាង និងក្រុមគ្រួសារភ័យខ្លាចយ៉ាងខ្លាំង ប៉ុន្តែនៅពេលនាងភៀសខ្លួនមកប្រទេសថៃ នាងជឿថា ទាហានមីយ៉ាន់ម៉ា និងកងកម្លាំងសម្ព័ន្ធជាតិ Karen (KNU) មិនទម្លាក់គ្រាប់បែកលើទឹកដីថៃទេ ។

យោងតាមព័ត៌មានពីមន្ត្រីថៃនៅច្រកព្រំដែនម៉ែស៊ត បញ្ជាក់ថា ជាធម្មតា ស្ថិតិឆ្លងដែនរបស់ពលរដ្ឋមីយ៉ាន់ម៉ាមកកាន់ទឹកដីថៃ ស្មើប្រមាណ២.០០០នាក់ក្នុង១ថ្ងៃ ប៉ុន្តែចាប់តាំងពីមានការប្រយុទ្ធគ្នាខ្លាំងក្លានៅដើមខែមេសា ឆ្នាំ២០២៤ មានអ្នកធ្វើដំណើរឆ្លងដែនពីទីក្រុង Myawaddy កើនឡើងជិតស្មើ៤.០០០នាក់ក្នុង១ថ្ងៃ ។

លោក Panpree Phitthanukorn ឧបនាយករដ្ឋមន្ត្រី និងរដ្ឋមន្ត្រីក្រសួងការបរទេសថៃនិយាយថា រដ្ឋាភិបាលថៃមានផែនការទប់ស្កាត់ការហូរចូលរបស់ពលរដ្ឋមីយ៉ាន់ម៉ាមកកាន់ទឹកដីថៃ ដើម្បីគេចពីការប្រយុទ្ធគ្នានៅទីក្រុង Myawaddy ។ ប៉ុន្តែខាងថៃសូមអំពាវនាវឱ្យភាគីទាំងសងខាងបញ្ឈប់ការប្រើអំពើហិង្សា ថៃចង់ឱ្យមានការចរចាគ្នា ហើយថៃរីករាយ ប្រសិនបើមីយ៉ាន់ម៉ាចង់ឱ្យរដ្ឋាភិបាលថៃធ្វើជាអ្នកសម្រុះសម្រួល ។

ជុំវិញព័ត៌មានពាក់ព័ន្ធនឹងទាហានមីយ៉ាន់ម៉ាប្រមាណ២០០នាក់ បានដកថយកម្លាំងពីទីក្រុង Myawaddy និងធ្វើដំណើរទៅកាន់បរិវេណស្ពានមិត្តភាពថៃ-មីយ៉ាន់ម៉ា ស្ពានទី១ និងមានចម្ងាយប្រមាណ២គីឡូម៉ែត្រពីស្រុកម៉ែស៊ត ខេត្តតាក លោក Panpree Phitthanukorn និយាយថា ពុំទាន់មានការទំនាក់ទំនងគ្នាទេ ពាក់ព័ន្ធនឹងការស្នើសុំឆ្លងដែនចូលប្រទេសថៃរបស់ទាហានទាំងនេះ ។

ទោះយ៉ាងណា ប្រសិនបើមានការទាក់ទងមកខាងថៃ ទាហានមីយ៉ាន់ម៉ាគ្រប់រូបត្រូវតែទម្លាក់អាវុធចុះ និងដោះសម្លៀកបំពាក់ទាហានមកជាជនស៊ីវិល មុនពេលអាជ្ញាធរថៃអនុញ្ញាតឱ្យពួកគេធ្វើដំណើរចូលប្រទេសថៃ ៕

បរទេស៖ យោតាមមូលនិធិរូបិយវត្ថុអន្តរជាតិ (IMF) បានព្យាករណ៍ថា GDP របស់រុស្ស៊ីនឹងកើនឡើង ៣.២% នៅឆ្នាំនេះ ដែលខ្ពស់ជាងសហរដ្ឋអាមេរិក ចក្រភពអង់គ្លេស បារាំង និងអាល្លឺម៉ង់ទៅទៀត។
នៅថ្ងៃទី១៦ ខែមេសា ឆ្នាំ២០២៤ IMF បានចេញផ្សាយរបាយការណ៍ទស្សនវិស័យសេដ្ឋកិច្ចសកលរបស់ខ្លួន ដោយទីភ្នាក់ងារនេះបានវាយតម្លៃថាសេដ្ឋកិច្ចពិភពលោកបច្ចុប្បន្ន “មានភាពរស់រវើកគួរឱ្យភ្ញាក់ផ្អើល” ទោះបីជាមានសម្ពាធអតិផរណា និងប្រទេសនានាផ្លាស់ប្តូរគោលនយោបាយរូបិយវត្ថុក៏ដោយ។ ដូច្នេះកំណើនសកលលោកត្រូវបានកើនឡើងដល់ ៣.២% នៅឆ្នាំនេះ ដែលជាការកើនឡើង ០.១% បើធៀបនឹងការព្យាករណ៍ក្នុងខែមករា។

យោងតាមរបាយការណ៍បានឱ្យដឹងទៀតថា ក្នុងឆ្នាំនេះ GDP របស់ប្រទេសរុស្ស៊ីក៏ត្រូវបានគេព្យាករណ៍ថានឹងកើនឡើង ៣.២% ផងដែរ ដែលនេះគឺជាការកើនឡើងខ្ពស់ជាងសហរដ្ឋអាមេរិក ២.៧% ចក្រភពអង់គ្លេស ០.៥% អាល្លឺម៉ង់ ០.២% និងបារាំង ០.៧% ។ IMF បាននិយាយថាមូលហេតុដែលឆ្នាំនេះសេដ្ឋកិច្ចរុស្ស៊ីកើនឡើងគឺដោយសារការនាំចេញប្រេង “ស្ថិរភាព” និង “រក្សាបានខ្ពស់” នូវការចំណាយសាធារណៈ ក៏ដូចជាការប្រើប្រាស់ក្នុងស្រុក និងការវិនិយោគក៏មានភាពរស់រវើកផងដែរ។

ទោះជាយ៉ាងណាការព្យាករណ៍នេះបានប្រឆាំងនឹងគោលដៅរបស់បស្ចិមប្រទេសក្នុងការដោះស្រាយការខូចខាតដល់សេដ្ឋកិច្ចរុស្ស៊ីបន្ទាប់ពីសង្គ្រាមនៅអ៊ុយក្រែន។ រុស្ស៊ីនិយាយថា ការដាក់ទណ្ឌកម្មរបស់លោកខាងលិចលើវិស័យសេដ្ឋកិច្ចសំខាន់ៗរបស់ខ្លួនគ្រាន់តែជួយឱ្យប្រទេសនេះកាន់តែមានទំនុកចិត្តលើខ្លួនឯងប៉ុណ្ណោះ។ ការនាំចេញទំនិញ និងប្រេងឆៅទៅកាន់ប្រទេសដូចជាឥណ្ឌា និងចិន ក្នុងបរិបទនៃតម្លៃប្រេងខ្ពស់ ជួយឱ្យរដ្ឋាភិបាលពូទីនរក្សាប្រាក់ចំណូលបានកាន់តែច្រើន។

គួរបញ្ជាក់ដែរថា ការព្យាករណ៍របស់ IMF គឺខ្ពស់ជាងតួលេខរបស់ក្រសួងសេដ្ឋកិច្ចរុស្ស៊ីទៅទៀត។ នៅដើមខែមេសា ក្រសួងបានប៉ាន់ប្រមាណថា GDP នឹងកើនឡើងត្រឹមតែ ២.៣% ប៉ុណ្ណោះនៅឆ្នាំនេះ ខណៈដែល IMF បានព្យាករណ៍ថាសេដ្ឋកិច្ចរុស្ស៊ីនឹងកើនឡើងរហូតដល់ ៣.២%។ ទោះជាយ៉ាងណាក៏ដោយ មូលនិធិរូបិយវត្ថុអន្តរជាតិជឿជាក់ថា កំណើនសេដ្ឋកិច្ចរបស់ប្រទេសនេះនឹងធ្លាក់ចុះនៅឆ្នាំ ២០២៥ មកនៅត្រឹម ១.៨% វិញហេតុផលគឺថាឥទ្ធិពលមកពីការវិនិយោគខ្លាំងនិងការប្រើប្រាស់បានថយចុះជាបណ្តើរៗ៕