ប្រទេសឥណ្ឌា ៖ គេហទំព័រ Times of India រាយការណ៍ថា អ្នកស្រី Lopamudra Singha ជាអ្នកអានព័ត៌មានប្រចាំស្ថានីយទូរទស្សន៍ DD News នៅប្រទេសឥណ្ឌា បានសន្លប់ភ្លាមៗក្នុងពេលកំពុងរាយការណ៍ព័ត៌មាន ហើយបុគ្គលិកក្នុងបន្ទប់ផ្សាយ ក៏បាននាំគ្នាជួយអ្នកស្រីឱ្យដឹងខ្លួនឡើងវិញ ។ មូលហេតុធ្វើឱ្យអ្នករាយការណ៍ព័ត៌មានរូបនេះសន្លប់នៅមុខកញ្ចក់ទូរទស្សន៍ ដោយសារឥណ្ឌាមានអាកាសធាតុក្តៅខ្លាំងពេក ហើយនៅថ្ងៃកើតហេតុ គឺសីតុណ្ហភាពកើនឡើងរហូតដល់៤០អង្សារសេ ។

អ្នកស្រី Lopamudra Singha ជាអ្នករាយការណ៍ព័ត៌មានបានរៀបរាប់ក្រោយពេលដឹងខ្លួនថា អ្នកស្រីសន្លប់កាលពីថ្ងៃទី១៨ ខែមេសា ឆ្នាំ២០២៤ ដោយសារក្នុងអំឡុងពេលអ្នកស្រីកំពុងតែអានព័ត៌មាននៅថ្ងៃនោះ អាកាសធាតុក្តៅខ្លាំងពេក ទើបធ្វើឱ្យសម្ពាធឈាមធ្លាក់ចុះយ៉ាងខ្លាំង ។ ហេតុនេះ អ្នកស្រីក៏សន្លប់បាត់បង់ស្មារតីនៅមុខកញ្ចក់ទូរទស្សន៍តែម្តង ។

អ្នកស្រីបន្តថា បើទោះជាបន្ទប់អានព័ត៌មានបំពាក់ម៉ាស៊ីនត្រជាក់ក្តី ប៉ុន្តែវាមិនបានជួយអ្វីច្រើនទេ ពីព្រោះថ្ងៃដែលអ្នកស្រីសន្លប់ គឺអាកាសធាតុក្តៅខ្លាំងណាស់ ។ អ្នកស្រីបានធ្វើការជាអ្នករាយការណ៍ព័ត៌មានអស់រយៈពេល២១ឆ្នាំ ហើយអ្នកស្រីពុំសូវដាក់កែវទឹកនៅលើតុធ្វើការទេ ទើបអ្នកស្រីពុំបានផឹកទឹក ។ អ្នកស្រីនិយាយថា ៖ «ថ្ងៃនោះ ខ្ញុំអានព័ត៌មានច្រើន ហើយគ្មានពេលវេលាផឹកទឹកសោះ ទើបបណ្តាលឱ្យកើតហេតុការណ៍នេះឡើង ប៉ុន្តែខ្ញុំសូមអរគុណដល់ក្រុមការងារ និងអ្នកទស្សនាគ្រប់គ្នាផងដែរ ដែលព្រួយបារម្ភពីសុខភាពរបស់ខ្ញុំ» ។

នៅខែមេសា ឆ្នាំ២០២៤ ការិយាល័យឧតុនិយមឥណ្ឌាបានដាស់តឿនឱ្យពលរដ្ឋទាំងអស់យកចិត្តទុកដាក់ថែទាំសុខភាព និងប្រុងប្រយ័ត្នកុំបរិភោគចំណីអាហារផ្តេសផ្តាស ដោយសារនៅតំបន់មួយចំនួនរបស់ឥណ្ឌាមានអាកាសធាតុក្តៅខ្លាំង ហើយសីតុណ្ហភាពកើនឡើងរហូតដល់៤៤អង្សារសេជាប់ៗគ្នាជាច្រើនថ្ងៃ ។

គួរបញ្ជាក់ថា រយៈពេលប៉ុន្មានឆ្នាំចុងក្រោយនេះ ឥណ្ឌាបានប្រឈមនឹងអាកាសធាតុក្តៅខ្លាំង និងបណ្តាលឱ្យពលរដ្ឋស្លាប់អស់រាប់រយនាក់ ។ កាលពីខែមិថុនា ឆ្នាំ២០២៣ សារព័ត៌មានឥណ្ឌារាយការណ៍ថា ពលរដ្ឋឥណ្ឌានៅទូទាំងប្រទេសបានស្លាប់ជិត១០០នាក់ ដោយសារអាកាសធាតុក្តៅខ្លាំង និងមានសីតុណ្ហភាពខ្ពស់រហូតដល់៤៤អង្សារសេ ខណៈពលរដ្ឋផ្សេងទៀតកើតជំងឺគ្រុនក្តៅ, ជំងឺផ្លូវដង្ហើម និងមានបញ្ហាសុខភាព ។

អាកាសធាតុក្តៅខ្លាំង មិនមែនកើតឡើងតែនៅឥណ្ឌាមួយទេ ប៉ុន្តែប្រទេសផ្សេងៗនៅតំបន់អាស៊ីអាគ្នេយ៍ ក៏ប្រឈមនឹងអាកាសធាតុក្តៅខ្លាំងដែរ ហើយរដ្ឋាភិបាល និងស្ថាប័នពាក់ព័ន្ធក្នុងប្រទេសនីមួយៗបានកំណត់វិធានការផ្សេងៗដើម្បីដោះស្រាយបញ្ហានេះ ។ កាលពីថ្ងៃទី៣ ខែមេសា ឆ្នាំ២០២៤ មន្ត្រីក្រសួងអប់រំហ្វីលីពីនបានស្នើឱ្យសាលារៀននៅទូទាំងប្រទេស ចំនួន៣.៩៥៤កន្លែង បង្រៀនសិស្សតាមអនឡាញ ដោយសារបារម្ភពីផលប៉ះពាល់សុខភាពសិស្សពេលអាកាសធាតុក្តៅខ្លាំង ៕

ប្រទេស៖ វិមាន Potala ដែលជារាជវាំងខ្ពស់ជាងគេបំផុតលើលោកស្ថិតក្នុងប្រទេសចិន ត្រូវបានគេប៉ាន់ស្មានថាសាងសង់ដោយមាសសុទ្ធជាង ៣០ តោនដើម្បីតុបតែងព្រះរាជវាំងនេះឱ្យមើលទៅមានភាពអស្ចារ្យជាងគេ។
វិមាន Potala ស្ថិតនៅលើកំពូលភ្នំក្រហម ដែលអាចមើលឃើញជ្រលងភ្នំ Lhasa ក្នុងតំបន់ស្វយ័តទីបេ ភាគខាងលិចនៃប្រទេសចិន។ វិមាននេះស្ថិតនៅរយៈកម្ពស់ ៣៧០០ ម៉ែត្រពីនីវ៉ូទឹកសមុទ្រ ដែលនេះត្រូវបានគេចាត់ទុកថាជារាជវាំងខ្ពស់ជាងគេក្នុងពិភពលោក។ វិមាន Potala ត្រូវបានសាងសង់ឡើងដោយស្តេច Songtsen Gampo ប្រហែលសតវត្សទី ៧ ដែលជាការសម្គាល់អាពាហ៍ពិពាហ៍ការទូតរបស់ស្តេចជាមួយព្រះនាង Wencheng នៃរាជវង្សថាង។

នៅពេលនោះ ព្រះរាជវាំងធំត្រូវបានសាងសង់ឡើងជាមួយនឹងបន្ទប់ចំនួន ៩៩៩ រួមជាមួយនឹងអគារធំ និងតូចចំនួន ១,០០០ នៅជុំវិញភ្នំ ដែលក្រោយមកត្រូវបានខូចខាតយ៉ាងធ្ងន់ធ្ងរដោយសាររន្ទះ និងសង្រ្គាម។ បន្ទាប់មកនៅសតវត្សទី ១៧ សម្តេចសង្ឃដាឡៃឡាម៉ាទី ៥ បានស្ដារព្រះរាជវាំង និងសាងសង់វិមាននេះឡើងវិញ ក៏ដូចជាបន្ថែមបន្ទាយ និងបន្ទប់មាសចំនួនប្រាំ រួមទាំងអគារជំនួយមួយចំនួនផ្សេងទៀត។ ដូច្នេះហើយសម្រាប់ដំណើរការនៃការជួសជុល និងការសាងសង់ថ្មីទាំងមូលបានចំណាយពេលរហូតដល់ ៥០ ឆ្នាំដើម្បីបញ្ចប់ ហើយក៏ត្រូវបានគេថែរក្សារហូតមកដល់សព្វថ្ងៃនេះ។

ព្រះបរមរាជវាំង Potala ត្រូវបានចាត់ទុកថាជាព្រះរាជវាំងដ៏ធំបំផុតមួយក្នុងពិភពលោក ដែលមានផ្ទៃដីសាងសង់ ១៣០,០០០ ម៉ែត្រការ៉េ នៅលើផ្ទៃដី ៣៦០,០០០ ម៉ែត្រការ៉េ។ រីឯអគារធំជាងគេមានកម្ពស់ ១១៧ ម៉ែត្រ និងមាន ១៣ ជាន់រួមមាន វាំង វត្ត ទីសក្ការៈបូជា ទីធ្លា និងបន្ទប់ព្រះសង្ឃជាដើម។ល។ ចំណែកតំបន់វាំងវិញគឺជាចំណុចកណ្តាលនៃវាំងដែលរួមមានវាំងសំខាន់ពីរគឺវាំងស និងវាំងក្រហម។ វិមានស គឺជាកន្លែងដែលសម្តេចសង្ឃដាឡៃឡាម៉ារស់នៅ។ សម្រាប់ព្រះបរមរាជវាំងក្រហមវិញរួមមានសាលព្រះពុទ្ធសាសនាដែលមានចេតិយពិសិដ្ឋ គឺជាកន្លែងតម្កល់សពសម្តេចសង្ឃដាឡៃ ឡាម៉ា នៅពេលទ្រង់សោយទិវង្គត។

ហេតុនេះហើយតាមការប៉ាន់ស្មានថាមាសជាង ៣០ តោនត្រូវបានគេយកមកប្រើប្រាស់សម្រាប់សាងសង់និងតុបតែងវិមានដ៏អស្ចារ្យនេះ។ ការឡើងទៅលើវិមាន Potala ភ្ញៀវទេសចរមិនត្រឹមតែអាចឃើញទិដ្ឋភាពបែប Panoramic នៃទីក្រុង Lhasa ទាំងមូលប៉ុណ្ណោះទេ ប៉ុន្តែថែមទាំងមានអារម្មណ៍ថាវាពិតជាមានសារៈសំខាន់នៃសាសនាដ៏ជ្រាលជ្រៅ និងប្រវត្តិសាស្រ្តវប្បធម៌ដ៏យូរអង្វែងផងដែរ៕

ប្រទេសឥណ្ឌូណេស៊ី ៖ លោក Haris Setiawan ជាឯកអគ្គរដ្ឋទូតឥណ្ឌូណេស៊ីប្រចាំទីក្រុងកង់បេរ៉ា ប្រទេសអូស្ត្រាលី បានប្រឹងប្រែងចរចាជាមួយអូស្ត្រាលី ដើម្បីនាំចេញផ្លែឈើពីឥណ្ឌូណេស៊ី រួមទាំងផ្លែមង្ឃុតផងដែរទៅកាន់ទីផ្សារអូស្ត្រាលី ។ គំនិតផ្តួចផ្តើមនេះបានសហការជាមួយក្រុមហ៊ុន PT Energi Sterila Higiena ដែលបានស្នើសុំការអនុញ្ញាតពីរដ្ឋាភិបាលអូស្ត្រាលី ក្នុងការត្រួតពិនិត្យគុណភាពទិន្នផលកសិកម្មរបស់ឥណ្ឌូណេស៊ី ។

ការប្រឹងប្រែងចរចាជាមួយរដ្ឋាភិបាលអូស្ត្រាលី គឺជាផ្នែកមួយក្នុងការប្តេជ្ញាចិត្តពង្រឹងទំនាក់ទំនងផ្នែកសេដ្ឋកិច្ចរវាងឥណ្ឌូណេស៊ី និងអូស្ត្រាលី តាមរយៈការប្រើប្រាស់ផលប្រយោជន៍ពីកិច្ចព្រមព្រៀងភាពជាដៃគូសេដ្ឋកិច្ចរវាងប្រទេសទាំងពីរ ដែលបានអនុវត្តចាប់តាំងពីឆ្នាំ២០២០ ។ កាលពីឆ្នាំ២០២២ ឥណ្ឌូណេស៊ីបានទទួលប្រាក់ចំណូលពីការនាំចេញផ្លែមង្ឃុត ស្មើប្រមាណ៧៥លានដុល្លារអាមេរិក ប៉ុន្តែវិធានការរឹតបន្តឹងលើការត្រួតពិនិត្យគុណភាពផ្លែឈើរបស់អូស្ត្រាលី បានធ្វើឱ្យឥណ្ឌូណេស៊ីត្រូវប្រឈមនឹងបញ្ហាមួយចំនួន ។

ទោះយ៉ាងណា ប្រទេសឥណ្ឌូណេស៊ីនឹងជម្នះរាល់ឧបសគ្គនានាក្នុងការនាំចេញផ្លែឈើទៅក្រៅប្រទេស និងបង្កើនសមត្ថភាពប្រកួតប្រជែងលើការនាំចេញទិន្នផលកសិកម្មផងដែរ ខណៈក្រុមហ៊ុន PT Energi Sterila Higiena រំពឹងថា រដ្ឋាភិបាលអូស្ត្រាលីនឹងទទួលស្គាល់គុណភាពផ្លែឈើឥណ្ឌូណេស៊ី ក្រោយពីបញ្ចប់ការវាយតម្លៃ ។ ផ្លែមង្ឃុតឥណ្ឌូណេស៊ីមានរសជាតិផ្អែមខ្លាំង, ក្លិនក្រអូប, គ្រាប់តូច, សាច់ពណ៌សថ្លា និងមានលក្ខណៈខុសប្លែកពីមង្ឃុតដែលដាំដុះក្នុងប្រទេសនានានៅតំបន់អាស៊ីអាគ្នេយ៍ ។

ឯកអគ្គរដ្ឋទូតឥណ្ឌូណេស៊ីប្រចាំទីក្រុងកង់បេរ៉ា លោក Haris Setiawan និយាយថា លោកបានខិតខំជំរុញការនាំចេញផ្លែឈើរបស់ឥណ្ឌូណេស៊ី ដើម្បីចូលទៅក្នុងទីផ្សារអូស្ត្រាលី ហើយរដ្ឋាភិបាលកំពុងសហការជាមួយក្រុមហ៊ុន PT Energi Sterila Higiena ។ ក្រុមហ៊ុននេះបានដាក់ពាក្យសុំការយល់ព្រមពីរដ្ឋាភិបាលអូស្ត្រាលី ដើម្បីត្រួតពិនិត្យគុណភាពទិន្នផលកសិកម្មឥណ្ឌូណេស៊ីដែលត្រូវនាំចេញ ខណៈមង្ឃុតទទួលបានការពេញនិយមយ៉ាងខ្លាំងនៅលើទីផ្សារអន្តរជាតិ ។

អគ្គកុងស៊ុលអូស្ត្រាលីប្រចាំនៅទីក្រុង Surabaya លោក Fiona Hoggart បញ្ជាក់ថា គំនិតផ្តួចផ្តើមនេះ បានផ្តល់ឱកាសថ្មីសម្រាប់កសិករ និងក្រុមហ៊ុនឥណ្ឌូណេស៊ី ដើម្បីជ្រៀតចូលក្នុងទីផ្សារអូស្ត្រាលី និងទីផ្សារប្រទេសផ្សេងទៀត ។

រីឯនាយកក្រុមហ៊ុន PT Energi Sterila Higiena លោក Dahlan Iskan និយាយថា ៖ «យើងសូមកោតសរសើរក្រសួងពាណិជ្ជកម្ម និងឯកអគ្គរដ្ឋទូតឥណ្ឌូណេស៊ីនៅទីក្រុងកង់បេរ៉ា ដែលបានគាំទ្រដល់កិច្ចខិតខំប្រឹងប្រែងរបស់យើង ដើម្បីបង្កើនការប្រកួតប្រជែងផលិតផលកសិកម្មឥណ្ឌូណេស៊ី» ៕

នៅទ្វីបអាស៊ីមានទន្លេធំៗសរុបចំនួន ៦០ ដូចជាទន្លេមេគង្គ ទន្លេយ៉ាងសេ ទន្លេ Brahmaputra ទន្លេ Irrawaddy និងទន្លេជាច្រើនទៀត។ ទោះជាយ៉ាងណាតើអ្នកដឹងទេថា ទន្លេរបស់ប្រទេសណាដែលវែងជាងគេបំផុតនៅក្នុងទី្វបអាស៊ី? ចម្លើយនោះគឺទន្លេ យ៉ាងសេ (Yangtze) ដែលមានទីតាំងស្ថិតនៅប្រទេសចិនគឺជា ទន្លេដែលមានប្រវែងវែងជាងគេបំផុតប្រចាំទ្វីបអាស៊ី ហើយជាប់លេខចំណាត់ថ្នាក់លេខ ៣ នៅលើពិភពលោក។

ទន្លេនេះមានប្រភពហូរចេញមកពីទឹកកកនៅភ្នំតាំងហ្គូឡា (Tanggula) ក្នុងតំបន់ទីបេ ហើយធ្វើដំណើរប្រហែល ៦,៣០០ គីឡូម៉ែត្រ រហូតហូរចេញទៅក្នុងសមុទ្រខាងកើត ក្បែរទីក្រុងសៀងហៃ។ ទន្លេយ៉ាងសេ ហូរឆ្លងកាត់ព្រំប្រទល់ខេត្តរបស់ចិនសរុបចំនួន១០។ ឈ្មោះ Yangtze នេះជាទូទៅត្រូវបានហៅដោយប្រទេសដទៃប៉ុណ្ណោះ ខណៈនៅក្នុងប្រទេសចិនផ្ទាល់ គេនិយមហៅថា «ទន្លេឆាងជាំង» ដែលមានអត្ថន័យថា «ដងទន្លេដ៏វែង»។

ទឹកទន្លេនេះហូរកាត់តំបន់ ដែលមានសណ្ឋានដីខុសៗគ្នា រួមមានទាំងតំបន់ខ្ពង់រាប ព្រមទាំងតំបន់វាលទំនាប ក៏ប៉ុន្តែភាគច្រើន គឺប្រមាណបីភាគបួននៃការធ្វើដំណើររបស់វា ទន្លេយ៉ាងសេ ហូរឆ្លងកាត់តាមតំបន់ភ្នំ ដែលកន្លែងខ្លះ មានទេសភាពជ្រលងភ្នំជ្រៅៗ យ៉ាងស្រស់ស្អាតនៅអមដងទន្លេ។ ទន្លេយ៉ាងសេមានដៃទន្លេសរុបប្រហែល ៧០០ ក្នុងនោះមានដៃទន្លេធំៗចំនួន ៨។

គួរបញ្ជាក់ដែរថា ទន្លេយ៉ាងសេដើរតួនាទីយ៉ាងសំខាន់ក្នុងវិស័យកសិកម្ម ឧស្សាហកម្ម និងការធ្វើដំណើរនៅក្នុងប្រទេសចិន។ វាជាផ្លូវទឹកស្នូលរបស់ចិន ហើយជិតមួយភាគបីនៃប្រជាជនចិនសរុប រស់នៅក្នុងតំបន់អាងទន្លេនេះ ដែលជាទីតាំងគ្របដណ្តប់លើផ្ទៃដី ប្រមាណជាង ១៨០ លានហិកតា។ ពីដើមមកទន្លេយ៉ាងសេ ត្រូវបានគេចាត់ទុកជា ខ្សែបន្ទាត់ខណ្ឌចែករវាងភាគខាងជើង និងភាគខាងត្បូងប្រទេសចិន ប៉ុន្តែក្រុមអ្នកជំនាញតំបន់ភូមិសាស្រ្ត ចាត់ទុកខ្សែបន្ទាត់ពិតប្រាកដ គឺជាទន្លេឈីងលីង-ហ័រអាយ (Qinling-Huai) ឯណោះទៅវិញទេ៕

ប្រទេសថៃ ៖ យោងតាមមន្ត្រីនាំពាក្យទីស្តីការនាយករដ្ឋមន្ត្រីថៃឱ្យដឹងថា នៅត្រីមាសទី១ ឆ្នាំ២០២៤ វិនិយោគិនបរទេសបានចាប់អារម្មណ៍វិនិយោគលើផ្នែកមួយចំនួននៅប្រទេសថៃ ដោយសាររដ្ឋាភិបាលមានវិធានការជំរុញការវិនិយោគជាច្រើន ដើម្បីឱ្យថៃអាចប្រកួតប្រជែងជាមួយប្រទេសក្នុងតំបន់អាស៊ាន និងពិភពលោក ។ រីឯប្រទេសដែលបានមកវិនិយោគនៅថៃច្រើនជាងគេ រួមមាន ៖ ជប៉ុន, សិង្ហបុរី, អាមេរិក, ចិន និងហុងកុង ។

បើតាមទិន្នន័យរបស់នាយកដ្ឋានអភិវឌ្ឍន៍អាជីវកម្មនៃក្រសួងពាណិជ្ជកម្មបង្ហាញថា ការវិនិយោគពីបរទេសនៅត្រីមាសទី១ ឆ្នាំ២០២៤ មានទឹកប្រាក់វិនិយោគស្មើជាង៣ម៉ឺន៥ពាន់លានបាត ហើយការវិនិយោគភាគច្រើនពាក់ព័ន្ធនឹងផ្នែកសេវាកម្ម, ផលិតអគ្គិសនីពីថាមពលពន្លឺព្រះអាទិត្យ, ការលក់ឧបករណ៍អេឡិចត្រូនិក និងកុំព្យូទ័រ, អាជីវកម្មលោហៈ និងការអភិវឌ្ឍកម្មវិធី Software ព្រមទាំងការផលិតគ្រឿងបន្លាស់រថយន្ត និងឧបករណ៍អាលុយមីញ៉ូម ។

លោក Srettha Thavisin នាយករដ្ឋមន្ត្រីថៃ និងជារដ្ឋមន្ត្រីក្រសួងហិរញ្ញវត្ថុបានណែនាំឱ្យស្ថាប័នពាក់ព័ន្ធជំរុញឱ្យមានការវិនិយោគពីបរទេសបន្ថែមទៀត ដើម្បីឱ្យពលរដ្ឋថៃមានការងារធ្វើក្នុងស្រុក ពីព្រោះលោកជឿជាក់ថា វានឹងជួយជំរុញសេដ្ឋកិច្ចជាតិ ។ នេះបើតាមការអះអាងរបស់លោក ឆ័យ វ៉ាត់ឆារ៉ុង មន្ត្រីនាំពាក្យទីស្តីការនាយករដ្ឋមន្ត្រី នៅថ្ងៃទី២៥ ខែមេសា ឆ្នាំ២០២៤ ។

ការវិនិយោគពីបរទេសបានជួយឱ្យពលរដ្ឋក្នុងស្រុកមានការងារធ្វើ និងមានប្រាក់ចំណូលសម្រាប់ដោះស្រាយជីវភាព ។ ក្រៅពីនេះ វាក៏បានផ្ទេរចំណេះដឹងផ្នែកឧស្សាហកម្មដល់កម្លាំងពលកម្មក្នុងស្រុកផងដែរ ដើម្បីអភិវឌ្ឍន៍សមត្ថភាពប្រកួតប្រជែងជាមួយប្រទេសនានាលើពិភពលោក ។

ខាងក្រោមនេះជាប្រទេសមកវិនិយោគនៅថៃ រួមមាន ៖
១-ជប៉ុន មានទឹកប្រាក់វិនិយោគ ស្មើ១៩.០០៦លានបាត ក្នុងផ្នែកផ្សាយពាណិជ្ជកម្ម និងផលិតអគ្គិសនីពីថាមពលពន្លឺព្រះអាទិត្យ
២-សិង្ហបុរី មានទឹកប្រាក់វិនិយោគ ស្មើ៣.២៩៤លានបាត ក្នុងផ្នែកស្តារនីតិសម្បទា និងពាណិជ្ជកម្មអេឡិចត្រូនិក (E-Commerce)
៣-អាមេរិក មានទឹកប្រាក់វិនិយោគ ស្មើ១.០៤៨លានបាត ក្នុងផ្នែកវិស្វកម្ម, អាជីវកម្មឈ្មួញកណ្តាល និងការលក់ឧបករណ៍អេឡិចត្រូនិក និងកុំព្យូទ័រ
៤-ចិន មានទឹកប្រាក់វិនិយោគ ស្មើ២.៨៨៦លានបាត ក្នុងផ្នែកអាជីវកម្មលោហៈ និងការអភិវឌ្ឍកម្មវិធី Software
៥-ហុងកុង មានទឹកប្រាក់វិនិយោគ ស្មើ១.០១៧លានបាត ក្នុងផ្នែកផលិតគ្រឿងបន្លាស់រថយន្ត និងឧបករណ៍អាលុយមីញ៉ូម

លោក ឆ័យ វ៉ាត់ឆារ៉ុង មន្ត្រីនាំពាក្យទីស្តីការនាយករដ្ឋមន្ត្រីបន្តថា ៖ «លោកនាយករដ្ឋមន្ត្រីជឿជាក់ថា ការវិនិយោគពីបរទេសក្នុងផ្នែកសេវាកម្ម នៅត្រីមាសទី១ ឆ្នាំ២០២៤ បានបង្ហាញពីភាពជោគជ័យក្នុងការបំពេញការងាររបស់រដ្ឋាភិបាលនាពេលកន្លងមក ដូចជា ៖ គោលនយោបាយការទូត, សេដ្ឋកិច្ច, ការផ្តល់ភាពងាយស្រួលសម្រាប់ការប្រកបអាជីវកម្ម និងការផ្តល់អត្ថប្រយោជន៍ដល់វិនិយោគិន» ៕

សហរដ្ឋអាមេរិក៖ ក្រុមហ៊ុន Meta បាននិយាយថាបច្ចុប្បន្នមានមនុស្សប្រហែល ៣.២៤ ពាន់លាននាក់សុទ្ធតែប្រើប្រាស់ Facebook, Instagram, WhatsApp, និង Threads ជារៀងរាល់ថ្ងៃ ដែលស្មើនឹង ៤០% នៃចំនួនប្រជាជនពិភពលោក។

នៅក្នុងរបាយការណ៍ហិរញ្ញវត្ថុត្រីមាសទី១ ឆ្នាំ២០២៤ ចុះថ្ងៃទី ២៤ ខែមេសា នាយកប្រតិបត្តិ Meta បាននិយាយថា ចំនួនអ្នកប្រើប្រាស់កម្មវិធីរបស់ខ្លួននៅឆ្នាំនេះបានកើនឡើងរហូតដល់ ៧% ប្រមាណ ៣.២៤ ពាន់លាននាក់គិតត្រឹមដំណាច់ខែមីនា បើធៀបនឹង ៣.១៩ ពាន់លានក្នុងខែធ្នូ ឆ្នាំ ២០២៣។ ទន្ទឹមនឹងនេះដែរ ប្រជាជនទាំងអស់ទូទាំងពិភពលោកបច្ចុប្បន្នមានចំនួន ៨.១ ពាន់លាននាក់។

Threads ដែលជាបណ្តាញសង្គម Meta បានចាប់ផ្តើមដំណើរការកាលពីឆ្នាំមុន គឺជាវេទិកាមួយក្នុងចំណោមវេទិកាដែលរីកលូតលាស់លឿនបំផុត។ ឥឡូវនេះ Threads មានអ្នកប្រើប្រាស់សកម្មប្រចាំថ្ងៃច្រើនជាង ១៥០ លាននាក់ កើនឡើងពី ១៣០ លាននាក់កាលពីត្រីមាសមុន។ ដូច្នេះប្រាក់ចំណូលប្រចាំត្រីមាសទី ១ នៃឆ្នាំ ២០២៤ របស់ក្រុមហ៊ុនបានឈានដល់ ៣៦.៤៦ ពាន់លានដុល្លារអាមេរិក កើនឡើង ២៧% ខណៈដែលប្រាក់ចំណូលសុទ្ធបានកើនឡើង ១១៧% ដល់ ១២.៣៧ ពាន់លានដុល្លារអាមេរិក បើធៀបនឹងរយៈពេលដូចគ្នាកាលពីឆ្នាំមុន ដែលលទ្ធផលនេះគឺលើសពីការរំពឹងទុករបស់ Wall Street ។

ទោះជាយ៉ាងណាក៏ដោយយោងទៅតាម CNBC ភាគហ៊ុន Meta នៅតែធ្លាក់ចុះ ១៥% មូលហេតុគឺថាផ្នែក metaverse ដែលជាផ្នែកទទួលបន្ទុកលើផលិតផលសកលនិម្មិត បានកត់ត្រាការខាតបង់ប្រតិបត្តិការចំនួន ៣.៨៥ ពាន់លានដុល្លារ។ ហើយប្រាក់ចំណូលរបស់ផ្នែកនេះមានត្រឹមតែ ៤៤០ លានដុល្លារប៉ុណ្ណោះ កើនឡើង ៣០% ពី ៣៣៩ លានដុល្លារកាលពីឆ្នាំមុន ស្មើនឹងប្រហែល ១% នៃប្រាក់ចំណូលសរុបរបស់ Meta ។ ក្រៅពីនេះ Meta ក៏បានធ្វើការព្យាករណ៍សម្រាប់ត្រីមាសទី ២ ឆ្នាំ ២០២៤ ថាតួលេខក្រុមហ៊ុនអាចនឹងខ្ពស់ជាងតួលេខអ្នកវិភាគ។

ក្រុមហ៊ុនបាននិយាយថា ខ្លួនអាចសម្រេចបានប្រាក់ចំណូលសរុបក្នុងត្រីមាសទី ២ ក្នុងចន្លោះពី ៣៦.៥-៣៩ ពាន់លានដុល្លារអាមេរិក ដែលស្មើនឹងត្រីមាសទីមួយនៃឆ្នាំ ២០២៤។ លើសពីនេះទៀត ក្រុមហ៊ុនគ្រោងនឹងបង្កើនការចំណាយនៅឆ្នាំ ២០២៤ ដល់ ៣៥-៤០ ពាន់លានដុល្លារ ដែលខ្ពស់ជាងការព្យាករណ៍របស់អ្នកវិភាគ ៣០-៣៧ ពាន់លានដុល្លារ ដែលភាគច្រើននឹងត្រូវប្រើប្រាស់សម្រាប់មហិច្ឆតា AI ។ យោងតាមលោក MarkZuckerberg លទ្ធផលហិរញ្ញវត្ថុខាងលើគឺជា “ការចាប់ផ្តើមដ៏ល្អបំផុត” សម្រាប់ឆ្នាំនេះ៕