ប្រទេសចិន ៖ សារព័ត៌មានស៊ីនហួររាយការណ៍ថា ទីក្រុងសៀងហៃ ស្ថិតនៅភាគខាងកើតប្រទេសចិន ទទួលបានភ្ញៀវទេសចរបរទេសកើនឡើងនៅត្រីមាសទី១ ឆ្នាំ២០២៤ (ចាប់ពីខែមករា ដល់ខែមីនា) ដោយសារការងើបឡើងវិញនៃទីផ្សារទេសចរណ៍ និងការប្រឹងប្រែងរបស់ប្រទេសចិន ក្នុងការផ្តល់ភាពងាយស្រួលដល់ការធ្វើដំណើរឆ្លងកាត់ព្រំដែនរបស់ភ្ញៀវទេសចរ ។

កាលពីថ្ងៃទី២៣ ខែមេសា ឆ្នាំ២០២៤ មន្ត្រីការិយាល័យរដ្ឋបាលវប្បធម៌ និងទេសចរណ៍ប្រចាំទីក្រុងសៀងហៃឱ្យដឹងថា ចំនួនភ្ញៀវទេសចរដែលបានធ្វើដំណើរមកទីក្រុងសៀងហៃ នៅត្រីមាសទី១ ឆ្នាំ២០២៤ គឺស្មើជាង១លាន២សែន៧ម៉ឺននាក់ កើនឡើង២៤៩,៦៧% បើប្រៀបធៀបប្រចាំឆ្នាំ ។

ទីក្រុងសៀងហៃ គឺជាគោលដៅទេសចរណ៍ឈានមុខគេរបស់ប្រទេសចិន ដែលបានទាក់ទាញភ្ញៀវទេសចរបរទេសមកកម្សាន្តយ៉ាងច្រើនក្នុង១ឆ្នាំៗ ។ ពេលមកកម្សាន្តនៅទីក្រុងសៀងហៃ ភ្ញៀវទេសចរបរទេសបានទស្សនាទេសភាព, ទៅកាន់មជ្ឈមណ្ឌលពាណិជ្ជកម្ម និងកន្លែងស្នាក់នៅ ខណៈការតាំងពិព័រណ៍បានកើនឡើងជាបន្តបន្ទាប់ ក្រោយពីការស្ទុះងើបឡើងវិញនៃទីផ្សារទេសចរណ៍ ។

នាពេលថ្មីៗនេះ នាវាកម្សាន្ត១គ្រឿងបានដឹកភ្ញៀវទេសចរបរទេសមកពីប្រទេសជាច្រើន ក្នុងនោះភ្ញៀវទេសចរអាល្លឺម៉ង់បានមកកម្សាន្តនៅទីក្រុងសៀងហៃ ស្មើជាង២.០០០នាក់ ។ ភ្ញៀវទេសចរបរទេសភាគច្រើនបានទៅទស្សនាអគារប្រវត្តិសាស្ត្រ, ឈ្វេងយល់អំពីវប្បធម៌-ប្រពៃណី និងទទួលបាននូវបទពិសោធន៍ពីរបៀបរស់នៅរបស់ពលរដ្ឋក្នុងតំបន់ ។

កម្មវិធីតាំងពិព័រណ៍ឧស្សាហកម្មទេសចរណ៍ «Tourism Plus Shanghai» ប្រចាំឆ្នាំ២០២៤ បានទាក់ទាញអ្នកតាំងពិព័រណ៍មកពី៣០ប្រទេស និងតំបន់ ឱ្យមកចូលរួមក្នុងកម្មវិធីនេះ គឺស្មើជាង៥.០០០នាក់ ។ លើសពីនេះ មានភ្ញៀវទេសចរបរទេសមកចូលរួមក្នុងកម្មវិធីតាំងពិព័រណ៍នេះ ស្មើជាង១៥.៧០០នាក់ ផងដែរ ។

បច្ចុប្បន្ន អាជ្ញាធរក្រុងសៀងហៃ បានរៀបចំគម្រោង «Visit Shanghai» ដើម្បីលើកកម្ពស់វិស័យទេសចរណ៍ និងបានសហការជាមួយស្ថាប័នផ្សេងៗ ដូចជា ៖ ស្ថាប័នបរទេសប្រចាំក្រុងសៀងហៃ, មជ្ឈមណ្ឌលវប្បធម៌បរទេស និងក្រុមការងារវប្បធម៌ និងទេសចរណ៍ ៕

ប្រទេសកូរ៉េខាងត្បូង ៖ នាយកប្រតិបត្តិគ្រប់ផ្នែករបស់ក្រុមហ៊ុន Samsung Electronics នឹងបំពេញការងារចំនួន៦ថ្ងៃក្នុង១សប្តាហ៍ ហើយនឹងអនុវត្តចាប់ពីចុងខែមេសា ឆ្នាំ២០២៤ តទៅ ស្របតាមការកំណត់វិធានបន្ទាន់របស់ក្រុមហ៊ុន ។ ការកំណត់វិធានការនេះកើតឡើងក្រោយពីតម្លៃប្រាក់វ៉ុនរបស់កូរ៉េខាងត្បូងធ្លាក់ថ្លៃយ៉ាងឆាប់រហ័ស, តម្លៃប្រេងឥន្ធនៈកើនឡើង និងការចំណាយដើមទុនខ្ពស់បានពីការខ្ចីប្រាក់ធនាគារ ដែលធ្វើឱ្យការប្រកបអាជីវកម្មមានភាពមិនច្បាស់លាស់ ហើយការប្រតិបត្តិការរបស់ក្រុមហ៊ុនកាលពីឆ្នាំ២០២៣ ធ្លាក់ចុះខុសពីគោលដៅ ។

នាយកប្រតិបត្តិក្រុមហ៊ុន Samsung Electronics នៅក្នុងផ្នែកផលិត និងផ្នែកលក់ នឹងបំពេញការងារនៅថ្ងៃសៅរ៍ ឬថ្ងៃអាទិត្យ បន្ថែមពីលើការបំពេញការងារតាមថ្ងៃធម្មតា ចំនួន១ថ្ងៃ ។ ក្រុមហ៊ុន Samsung នឹងពិនិត្យមើលយុទ្ធសាស្ត្រអាជីវកម្ម ហើយអាចផ្លាស់ប្តូរយុទ្ធសាស្ត្រមួយចំនួន ដើម្បីសម្របខ្លួននឹងបរិយាកាសអាជីវកម្មដែលកំពុងតែផ្លាស់ប្តូរ ស្របពេលកំណើនហានិភ័យភូមិសាស្ត្រនយោបាយ ដោយសារសង្គ្រាមរវាងប្រទេសរុស្ស៊ី និងអ៊ុយក្រែនអូសបន្លាយរយៈពេលយូរ ។ ក្រៅពីនេះ ក៏មានភាពតានតឹងកាន់តែខ្លាំងឡើងក្នុងតំបន់មជ្ឈិមបូព៌ាផងដែរ ។

កាលពីឆ្នាំ២០២៣ ក្រុមហ៊ុន Samsung Electronics បានកត់ត្រាពីការខាតបង់ដើមទុនស្មើនឹង១៥លានលានវ៉ុន សម្រាប់អាជីវកម្មស្នូល Semiconductor ផ្នែក Device Solutions ដែលទទួលខុសត្រូវលើអាជីវកម្ម Semiconductor មានសមាមាត្រខ្ពស់ស្មើប្រមាណ៨០% នៃប្រាក់ចំណូលរបស់ Samsung ។ ទោះយ៉ាងណា Samsung ជាក្រុមហ៊ុនផលិតបន្ទះឈីបដ៏ធំនៅលើពិភពលោក បានចាប់ផ្តើមបង្ហាញពីសញ្ញាធ្លាក់ចុះនៃទីផ្សារឈីប កាលពីដើមខែមេសា ឆ្នាំ២០២៤ ក្រោយរបាយការណ៍ប្រាក់ចំណេញបានពីការប្រតិបត្តិការ នៅត្រីមាសទី១ ឆ្នាំ២០២៤ កើនឡើងជាង១០ដង ។

ក្រៅពីនេះ Samsung ក៏បានព្យាយាមយកឈ្នះគូប្រជែងនៅប្រទេសកូរ៉េខាងត្បូងផងដែរ គឺក្រុមហ៊ុន SK Hynix Inc. ក្នុងទីផ្សារ High Bandwidth Memory (HBM) ដែលបានកើនឡើងជាបន្តបន្ទាប់ ហើយត្រូវបានគេប្រើប្រាស់យ៉ាងទូលំទូលាយក្នុងកម្មវិធីបច្ចេកវិទ្យា AI ផ្សេងៗ ។ រីឯការផលិតឈីបវិញ Samsung ក៏ប្រឈមមុខជាមួយក្រុមហ៊ុន Intel Corp. ផងដែរ ខណៈក្រុមហ៊ុននេះកំណត់ផែនការផលិតឈីបឱ្យក្រុមហ៊ុនរចនា និងអភិវឌ្ឍន៍បន្ទះឈីប និងព្យាយាមយកឈ្នះក្រុមហ៊ុនឈានមុខក្នុងទីផ្សារ គឺ TSMC ៕

ប្រទេសជប៉ុន៖ ក្រុមហ៊ុនជាច្រើននៅក្នុងប្រទេសជប៉ុនកំពុងឈឺក្បាលដោយសារខ្វះបុគ្គលិកវ័យក្មេង ខណៈនិស្សិតជប៉ុនរាប់ពាន់នាក់មិនចាប់អារម្មណ៍ធ្វើការងារនោះទេ ដោយសារប្រាក់ឈ្នួលទាប ធ្វើឱ្យពួកគេសម្រេចចាប់យកអាជីពជា YouTubers វិញ។

យោងតាមសារព័ត៌មាន Japan Time ដែលបានចុះផ្សាយកាលពីពេលថ្មីៗនេះថា បច្ចុប្បន្នជប៉ុនគឺជាប្រទេសមួយក្នុងពិភពលោកដែលមានអាត្រាកំណើតទាប ខណៈពេលដែលក្មេងជំទង់ជាច្រើនហាក់ដូចជាមិនចាប់អារម្មណ៍ក្នុងវិស័យការងារស៊ីវិល និងការងារបច្ចេកវិទ្យាផ្សេងៗទៀត។ លោក Hisashi Yamada សេដ្ឋវិទូនៅវិទ្យាស្ថានស្រាវជ្រាវជប៉ុនបាននិយាយថា នៅពេលដែលនិស្សិតបញ្ចប់ការសិក្សា ពួកគេនឹងជ្រើសរើសក្រុមហ៊ុនល្បីៗ ដែលឪពុកម្តាយពួកគេស្គាល់មួយចំនួនប៉ុណ្ណោះ ខណៈក្រុមហ៊ុនជាច្រើនទៀតមិនសូវមានអ្នកដាក់ពាក្យនោះទេ។

យោងតាម Yamada បានបន្តទៀតថា បច្ចុប្បន្នក្រុមហ៊ុនរាប់លាន កំពុងព្យាយាមជ្រើសរើសបុគ្គលិកវ័យក្មេង ទោះជាយ៉ាងណាដើម្បីទាក់ទាញនិស្សិតវ័យក្មេងមកធ្វើការជាមួយ ត្រូវតែមានប្រាក់ឈ្នួលខ្ពស់។ Hiroaki Miyamoto សាស្ត្រាចារ្យផ្នែកសេដ្ឋកិច្ចនៅសកលវិទ្យាល័យ Hitotsubashi ក៏បាននិយាយដែរថា ជាការពិតណាស់យុវជនជាច្រើនសុទ្ធតែត្រូវការប្រាក់ចំណូលខ្ពស់ ដូច្នេះទីផ្សារការងាររបស់ប្រទេសជប៉ុនបច្ចុប្បន្នត្រូវតែធ្វើការផ្លាស់ប្តូរពីស្ថានភាពដែលមិនអាចបត់បែនបានទៅជាភាពបត់បែនជាងមុន ដើម្បីប្រែក្លាយការផ្លាស់ប្តូរនេះទៅជាម៉ាស៊ីនកំណើនសម្រាប់សេដ្ឋកិច្ចជប៉ុន។

យោងតាមលោក Rengo ដែលជាសហព័ន្ធការងារដ៏ធំបំផុតរបស់ប្រទេសជប៉ុន បាននិយាយថា ប្រាក់ខែជាមធ្យមរបស់សហជីពសមាជិកនៅឆ្នាំនេះបានកើនឡើងជាង ៥% ដែលជាការកើនឡើងដ៏ធំបំផុតក្នុងរយៈពេលបីទសវត្សរ៍។ ហេតុនេះហើយ ប្រាក់ចំណូលពីការងារដែលបានធ្លាក់ចុះជាយូរមកហើយនោះ កំពុងបង្ហាញសញ្ញានៃការកើនឡើង ខណៈដែលក្រុមហ៊ុនជ្រើសរើសបុគ្គលិកកាន់តែច្រើនកំពុងផ្លាស់ប្តូរផែនការដោយបន្ថែមប្រាក់ឈ្នួលខ្ពស់ ដើម្បីងាយស្រួលក្នុងការជ្រើសរើសបុគ្គលិក។ គួររំលឹកដែរថា ក្រុមហ៊ុនចំនួន ៣១៣ ក្នុងរយៈពេល ១២ ខែរហូតដល់ខែមីនានេះ បានប្រកាសក្ស័យធនដោយសារកង្វះកម្លាំងពលកម្ម ដែលនេះច្រើនជាងទ្វេដងធៀបនឹងឆ្នាំមុនៗ។

ការខ្វះខាតកម្លាំងពលកម្មបានធ្វើឱ្យក្រុមហ៊ុនជាច្រើនផ្លាស់ប្តូរផែនការដោយតម្លើងប្រាក់ខែខ្ពស់ជាងមុន ដើម្បីទាក់ទាញនិស្សិតវ័យក្មេងមកធ្វើការជាមួយ។ ក្នុងខែមីនា កម្មករជាច្រើនបានទទួលការដំឡើងប្រាក់បៀវត្សរ៍ខ្ពស់បន្ទាប់ពីជាង ៣០ ឆ្នាំ។ ក្នុងចំណោមក្រុមហ៊ុនជាង ១០,០០០ ប្រហែល ៦០% បាននិយាយថា ពួកគេមានគម្រោងកែលម្អប្រាក់ឈ្នួលក្នុងឆ្នាំសារពើពន្ធចាប់ពីខែមេសានេះ ដែលជាកំណត់ត្រាខ្ពស់ចាប់តាំងពីការស្ទង់មតិបានចាប់ផ្តើមនៅឆ្នាំ ២០០៦។ វាជាការពិតដែលប្រាក់ឈ្នួលកំពុងកើនឡើង នៅពេលដែលកង្វះកម្លាំងពលកម្មកាន់តែធ្ងន់ធ្ងរ ហើយអតិផរណាដាក់សម្ពាធលើជីវិតកម្មករ។ ទោះយ៉ាងណាក៏ដោយ ការតម្លើងប្រាក់ឈ្នួលខ្ពស់ គឺអាស្រ័យលើឧស្សាហកម្ម ឬទំហំការងារ៕

លោក Elon Musk គឺជា CEO របស់ក្រុមហ៊ុន Tesla បានឆ្លើយតបនឹងសំណួរជាច្រើនរបស់អ្នកវិភាគ ក្រោយពីក្រុមហ៊ុន Tesla រាយការណ៍ពីលទ្ធផលការងារនៅត្រីមាសទី១ ឆ្នាំ២០២៤ ថា ប្រាក់ចំណូល និងប្រាក់ចំណេញរបស់ក្រុមហ៊ុនបានធ្លាក់ចុះ ដោយសារការលក់រថយន្តធ្លាក់ចុះជាលើកដំបូងក្នុងរយៈពេលជាច្រើនឆ្នាំកន្លងមកនេះ ។

លោក Elon Musk បានឆ្លើយតបនឹងសំណួរដែលអ្នកវិភាគយល់ឃើញថា លោកគឺជា CEO របស់ក្រុមហ៊ុនជាច្រើន ដូចជា ៖ ក្រុមហ៊ុន Tesla, SpaceX, xAI និង X/Twitter រហូតដល់លោកពុំអាចបែងចែកពេលវេលាធ្វើការឱ្យក្រុមហ៊ុន Tesla ។ លោកនិយាយថា បច្ចុប្បន្ន លោកបានចំណាយពេលវេលាភាគច្រើនធ្វើការជាមួយ Tesla ហើយលោកស្ទើរតែគ្មានថ្ងៃឈប់សម្រាកឡើយ ពីព្រោះលោកជឿថា Tesla នឹងរីកចម្រើនកាន់តែខ្លាំងជាងនេះ ។

ក្រៅពីនេះ លោកក៏បានឆ្លើយតបសំណួរផ្សេងទៀតរបស់អ្នកវិភាគផងដែរ ហើយលោកជឿជាក់ថា នៅពេលកម្មវិធីបើកបររថយន្តដោយស្វ័យប្រវត្តិ (FSD) ទទួលបានការអនុម័ត នឹងមានរថយន្តតាក់ស៊ីបើកបរដោយស្វ័យប្រវត្តិរបស់ Tesla បើកបរនៅតាមផ្លូវ ស្មើជាង១០លានគ្រឿង ។ បច្ចុប្បន្ន Tesla កំពុងតែចរចាពីការលក់អាជ្ញាប័ណ្ណបើកបររថយន្តដោយស្វ័យប្រវត្តិ (FSD) ឱ្យក្រុមហ៊ុនផលិតរថយន្តមួយ ។

លោកបន្តថា រីឯការចំណាយដើមទុនក្នុងការផលិតថ្មរថយន្តអគ្គិសនីបានធ្លាក់ចុះជាបន្តបន្ទាប់ ហើយ Tesla នឹងផលិតរថយន្តមានតម្លៃថោក ប៉ុន្តែលោកពុំទាន់បានកំណត់ពេលវេលាជាក់លាក់ទេ ។ រីឯបញ្ហាកាត់បន្ថយបុគ្គលិកវិញ លោកនិយាយថា នៅពេលក្រុមហ៊ុនរបស់លោករីកចម្រើន គឺត្រូវមានការផ្លាស់ប្តូរតាមពេលវេលា ហើយក្រុមហ៊ុនមិនអាចរក្សាទុករចនាសម្ព័ន្ធដដែលជារៀងរហូតឡើយ ។

ចុងក្រោយ លោកបញ្ជាក់ថា បណ្តាវិនិយោគិនតែងតែមានចម្ងល់អំពីតម្លៃភាគហ៊ុន ហើយក្រុមហ៊ុន Tesla ណែនាំឱ្យពួកគេសាកល្បងប្រើប្រាស់រថយន្តបើកបរដោយស្វ័យប្រវត្តិ (FSD) ។ ហេតុនេះ ពួកគេនឹងកាន់តែយល់ច្បាស់អំពីក្រុមហ៊ុន Tesla ៕

យោងតាមរបាយការណ៍ថ្មីមួយដែលបានចេញផ្សាយដោយអង្គការឧតុនិយមពិភពលោក (WMO) កាលពីថ្ងៃទី ២៣ ខែមេសា ឆ្នាំ២០២៤ ថាទ្វីបអាស៊ីនៅតែបន្តជាតំបន់ដែលមានគ្រោះមហន្តរាយធម្មជាតិច្រើនជាងគេនៅលើពិភពលោក។ បើយោងតាម WMO បានឱ្យដឹងទៀតថា គ្រោះមហន្តរាយសរុបចំនួន ៧៩ ដែលពាក់ព័ន្ធនឹងបាតុភូតធម្មជាតិត្រូវបានគេរាយការណ៍នៅអាស៊ីកាលពីឆ្នាំមុន។ ដោយក្នុងចំណោមនោះជាង ៨០% ជាប់ទាក់ទងនឹងទឹកជំនន់ រួមទាំងខ្យល់ព្យុះ ដែលបានសម្លា.ប់មនុស្សជាង ២,០០០ នាក់ និងប៉ះពាល់ដល់មនុស្សជាង ៩ លាននាក់។ បន្ថែមពីនេះឥទ្ធិពលនៃរលកកំដៅក៏កាន់តែធ្ងន់ធ្ងរ ប៉ុន្តែមិនទាន់ត្រូវបានគេវាយតម្លៃពេញលេញនៅឡើយទេ។

អគ្គលេខាធិការ WMO លោក Celeste Saulo បាននិយាយថា បណ្តាប្រទេសអាស៊ីជាច្រើនបានជួបប្រទះនឹងឆ្នាំដ៏ក្តៅគគុកតាំងពីឆ្នាំ ២០២៣ ដល់ឆ្នាំ ២០២៤ អមដោយលក្ខខណ្ឌធ្ងន់ធ្ងរជាបន្តបន្ទាប់ ពីគ្រោះរាំងស្ងួត និងរលកកំដៅរហូតដល់ទឹកជំនន់ និងព្យុះ។ បម្រែបម្រួលអាកាសធាតុ ធ្វើឱ្យគ្រោះមហន្តរាយធម្មជាតិកាន់តែកើតមានញឹកញាប់ និងធ្ងន់ធ្ងរ ដែលធ្វើឱ្យប៉ះពាល់ដល់សង្គម សេដ្ឋកិច្ច និងសំខាន់បំផុតគឺជីវិតមនុស្ស និងបរិស្ថានរស់នៅ។ ចាប់តាំងពីដើមខែមេសាមកមានគ្រោះធម្មជាតិជាច្រើនបានកើតឡើងជាញឹកញាប់នៅក្នុងទ្វីបអាស៊ី ខណៈដែលបច្ចុប្បន្នប្រទេសចិនកំពុងជួបប្រទះនឹងគ្រោះទឹកជំនន់យ៉ាងធ្ងន់ធ្ងរបំផុតក្នុងប្រវត្តិសាស្ត្ររបស់ខ្លួន ហើយកាលពីកន្លងទៅទីក្រុងឌូបៃក៏ប្រឈមនឹងបញ្ហាគ្រោះទឹកជំនន់ផងដែរ។

កាលពីថ្ងៃទី៣ ខែមេសាកោះតៃវ៉ាន់ក៏បានជួបប្រទះនឹងការរញ្ជួយដីដ៏ធំមួយ ដែលធ្វើឱ្យប្រទេសជប៉ុន និងហ្វីលីពីនបានប្រកាសអាសន្នអំពីរលកយក្សស៊ូណាមិ។ សម្រាប់ប្រទេសដែលនៅអាស៊ីអាគ្នេយ៍វិញដូចជា ប្រទេសវៀតណាម និងថៃ កាលពីពេលថ្មីៗនេះក៏កំពុងប្រឈមនឹងបញ្ហាគ្រោះទឹកជំនន់ផងដែរ។ នៅថ្ងៃទី២៥ ខែមេសា ឆ្នាំ២០២៤ នេះកំដៅដ៏ធ្ងន់ធ្ងរក៏បានឆាបឆេះប្រទេសហ្វីលីពីន ដែលបណ្តាលឱ្យអាជ្ញាធរព្រមានប្រជាជនឱ្យកំណត់សកម្មភាពក្រៅផ្ទះ និងសាលារៀនជាច្រើនឱ្យផ្អាកការបង្រៀនដោយផ្ទាល់ជាបណ្តោះអាសន្ន។ អាជ្ញាធរហ្វីលីពីនបាននិយាយថា កំដៅនៅឆ្នាំនេះកាន់តែធ្ងន់ធ្ងរដោយសារតែឥទ្ធិពលនៃបាតុភូត El Nino ។

ទីភ្នាក់ងារព្យាករណ៍អាកាសធាតុហ្វីលីពីនពីមុនបានព្រមានថាសន្ទស្សន៍កំដៅនឹងកើនឡើងដល់កម្រិតគ្រោះថ្នាក់បំផុតចាប់ពី ៤២ អង្សាសេ ឬខ្ពស់ជាងនេះនៅក្នុងទីក្រុង និងទីប្រជុំជនយ៉ាងហោចណាស់ ៣០ នៅទូទាំងប្រទេស។ ហេតុនេះហើយគិតត្រឹមថ្ងៃទី២៥ ខែមេសា ឆ្នាំ២០២៤ ប្រទេសជាច្រើននៅក្នុងទ្វីបអាស៊ីកំពុងប្រឈមនឹងគ្រោះធម្មជាតិច្រើនជាងទ្វីបអឺរ៉ុប។ បើយោងតាមអង្គការឧតុនិយមពិភពលោក (WMO) បានឱ្យដឹងថា ទ្វីបអាស៊ីនៅតែបន្តជាតំបន់ដែលមានគ្រោះមហន្តរាយធម្មជាតិច្រើនជាងគេនៅលើពិភពលោកសម្រាប់ឆ្នាំ ២០២៤៕

ប្រទេសថៃ ៖ កាលពីថ្ងៃទី២៤ ខែមេសា ឆ្នាំ២០២៤ សារព័ត៌មានថៃឈ្មោះ Thairath រាយការណ៍ថា ពិធីបុណ្យចូលឆ្នាំថ្មីរយៈពេល២១ថ្ងៃ ប្រទេសថៃទទួលបានចំណូលពីវិស័យទេសចរណ៍ ស្មើជាង១សែន៤ម៉ឺនលានបាត ដែលខ្ពស់ជាងតួលេខការរំពឹងទុក ។ រីឯចំនួនភ្ញៀវទេសចរបរទេសក្នុងរយៈពេល២១ថ្ងៃនេះ ស្មើជាង១លាន៩សែន២ម៉ឺននាក់ កើនឡើង៣៧,៥៤% ក្នុងនោះថៃទទួលបានភ្ញៀវទេសចរចិនច្រើនជាងគេ ស្មើនឹង៣៩៥.៨៣០នាក់ កើនឡើង៨៩,១៦% ។

លោកស្រី Sudawan Wangsuphakitkoson រដ្ឋមន្ត្រីក្រសួងទេសចរណ៍ និងកីឡាលើកឡើងថា ក្រុមការងារសេដ្ឋកិច្ចផ្នែកទេសចរណ៍ និងកីឡាបានសរុបទិន្នន័យចុងក្រោយនៃការដើរកម្សាន្តរបស់ភ្ញៀវទេសចរថៃ និងបរទេស ក្នុងអំឡុងពិធីបុណ្យចូលឆ្នាំថ្មី ចាប់ពីថ្ងៃទី១ ដល់ថ្ងៃទី២១ ខែមេសា ឆ្នាំ២០២៤ គឺប្រទេសថៃទទួលបានចំណូលសរុបចំនួន១៤០.៣៣៥លានបាត (ឬស្មើជាង១សែន៤ម៉ឺនលានបាត) ។ តួលេខនេះខ្ពស់ជាងការរំពឹងទុកនាពេលកន្លងមក គឺថៃរំពឹងថា រយៈពេល២១ថ្ងៃនេះ ថៃនឹងទទួលបានចំណូលសរុប ចំនួន១៣២.០០០លានបាត ។

លោកស្រីបញ្ជាក់ថា ក្នុងរយៈពេល២១ថ្ងៃនៃពិធីបុណ្យចូលឆ្នាំថ្មី មានភ្ញៀវទេសចរបរទេសយ៉ាងច្រើនសន្ធឹកសន្ធាប់មកកម្សាន្តនៅប្រទេសថៃ ខណៈពលរដ្ឋថៃក៏បានដើរកម្សាន្ត និងលេងជះទឹកយ៉ាងសប្បាយរីករាយផងដែរ ដោយសារថៃបានរៀបចំកម្មវិធីកម្សាន្តផ្សេងៗនៅទូទាំងប្រទេស ។

លោកស្រី Sudawan Wangsuphakitkoson បន្តថា រីឯការរៀបចំកម្មវិធី «Ma ha Songkran World Water Festival 2024» នៅ Sanam Luang មានមនុស្សម្នាមកចូលរួមយ៉ាងច្រើនកុះករ ដែលកម្មវិធីបានរៀបចំឡើងយ៉ាងល្អ និងផ្សព្វផ្សាយទៅកាន់ពិភពលោក ។ ហេតុនេះ វាបានក្លាយជាគោលដៅទាក់ទាញចំណាប់អារម្មណ៍ពីភ្ញៀវទេសចរបរទេស និងជាការប្រកាសឱ្យពិភពលោកទទួលស្គាល់ជាផ្លូវការថា ប្រទេសថៃមានប្រពៃណីសង្ក្រាន្តជា «World Class Event» និងស្របតាមអង្គការយូណេស្កូបានចុះបញ្ជីប្រពៃណីសង្ក្រាន្តជាបេតិកភណ្ឌវប្បធម៌ ។

ចំណែកភ្ញៀវទេសចរថៃ និងបរទេសបានមកចូលរួមកម្សាន្តជាមួយកម្មវិធីផ្សេងៗ ដែលរៀបចំឡើងនៅ Sanam Luang សរុបស្មើនឹង៧៨៤.៨៨៣នាក់ ហើយអ្នកមកចូលរួមទាំងនេះសប្បាយរីករាយបំផុត និងចង់ឱ្យរៀបចំកម្មវិធីកម្សាន្តឱ្យបានច្រើនបន្ថែមទៀត ។ រីឯប្រាក់ចំណូលដែលថៃទទួលបានពីការរៀបចំកម្មវិធីផ្សេងៗនៅ Sanam Luang គឺស្មើជាង២.៨៨៦លានបាត ។

រដ្ឋមន្ត្រីក្រសួងទេសចរណ៍ និងកីឡាបន្ថែមថា ក្នុងរយៈពេល២១ថ្ងៃ គិតចាប់ពីថ្ងៃទី១ ដល់ថ្ងៃទី២១ ខែមេសា ឆ្នាំ២០២៤ ប្រទេសថៃទទួលបានភ្ញៀវទេសចរបរទេសចំនួន១.៩២៦.៤៤៣នាក់ (ឬស្មើជាង១លាន៩សែន២ម៉ឺននាក់) និងទទួលបានចំណូលពីភ្ញៀវទេសចរបរទេស ចំនួន៩០.២០៨លានបាត ។ រីឯភ្ញៀវទេសចរថៃក្នុងរយៈពេល២១ថ្ងៃនេះ ស្មើនឹង១៣.៨៩៧.៩៨៨នាក់ និងទទួលបានចំណូលពីភ្ញៀវទេសចរថៃ ស្មើនឹង៥០.១២៧លានបាត ។

ដោយឡែក ចាប់ពីថ្ងៃទី១២ ដល់ថ្ងៃទី១៦ ខែមេសា ឆ្នាំ២០២៤ មានភ្ញៀវទេសចរបរទេសមកប្រទេសថៃ ចំនួន៤៦១.៥០៩នាក់ ហើយថៃទទួលបានប្រាក់ចំណូលពីភ្ញៀវទេសចរបរទេសក្នុងអំឡុងពេលនេះ ចំនួន២១.៥៤៦លានបាត ។ រីឯភ្ញៀវទេសចរថៃចាប់ពីថ្ងៃទី១២ ដល់ថ្ងៃទី១៦ ខែមេសា ស្មើនឹង៤.៣៣៧.៨៤៨នាក់ ហើយប្រាក់ចំណូលពីភ្ញៀវទេសចរថៃក្នុងអំឡុងពេលនេះ ស្មើនឹង១៦.៤៨៨លានបាត ។ ដូច្នេះ ប្រទេសថៃទទួលបានប្រាក់ចំណូលសរុបពីភ្ញៀវទេសចរបរទេស និងភ្ញៀវទេសចរថៃ ចាប់ពីថ្ងៃទី១២ ដល់ថ្ងៃទី១៦ ខែមេសា ស្មើនឹង៣៨.០៣៤លានបាត ។

ចំនួនភ្ញៀវទេសចរបរទេសក្នុងរយៈពេល២១ថ្ងៃនេះ សរុបស្មើនឹង១.៩២៦.៤៤៣នាក់ (ឬស្មើជាង១លាន៩សែន២ម៉ឺននាក់) កើនឡើង៣៧,៥៤% បើធៀបនឹងរយៈពេលដូចគ្នាក្នុងឆ្នាំ២០២៣ ។ កំណើនភ្ញៀវទេសចរបរទេសនេះ ដោយសាររដ្ឋាភិបាលថៃបានផ្តល់ភាពងាយស្រួលក្នុងការធ្វើដំណើររបស់ជនបរទេស (ឬ Ease of Traveling) រួមមាន៖ ការលើកលែងទិដ្ឋាការ និងការលុបចោលការបំពេញឯកសារ T.M.6 (ជាឯកសាររបស់ប៉ូលិសអន្តោប្រវេសន៍ថៃ) និងការរៀបចំកម្មវិធីជាច្រើន ។

ខាងក្រោមនេះ ជាចំនួនភ្ញៀវទេសចបរទេសមកពី១០ប្រទេសដំបូង ដែលមកចូលរួមក្នុងពិធីបុណ្យចូលឆ្នាំរយៈពេល២១ថ្ងៃ រួមមាន ៖
១-ភ្ញៀវទេសចរចិន ស្មើនឹង៣៩៥.៨៣០នាក់ កើនឡើង៨៩,១៦%
២-ភ្ញៀវទេសចរម៉ាឡេស៊ី ស្មើនឹង២៩៨.២៦៣នាក់ កើនឡើង៤១,៦២%
៣-ភ្ញៀវទេសចរឥណ្ឌា ស្មើនឹង១១៤.៣៣០នាក់ កើនឡើង២៧,៥៣%
៤-ភ្ញៀវទេសចររុស្ស៊ី ស្មើនឹង១០៤.៥៣៨នាក់ កើនឡើង១៩,៦១%
៥-ភ្ញៀវទេសចរកូរ៉េខាងត្បូង ស្មើនឹង៨៤.៥៣៩នាក់ កើនឡើង៣៦,០២%
៦-ភ្ញៀវទេសចរឡាវ ស្មើនឹង៦៦.៣៩៦នាក់ កើនឡើង៤៣,៥៩%
៧-ភ្ញៀវទេសចរអង់គ្លេស ស្មើនឹង៦០.៤៩៥នាក់ កើនឡើង១១,៣១%
៨-ភ្ញៀវទេសចរតៃវ៉ាន់ ស្មើនឹង៦០.១៥៣នាក់ កើនឡើង៥៨,៧៤%
៩-ភ្ញៀវទេសចរអាមេរិក ស្មើនឹង៥៦.០៦៨នាក់ កើនឡើង១០,៤៣% និង
១០-ភ្ញៀវទេសចរឥណ្ឌូណេស៊ី ស្មើនឹង៥៥.៩៦៩នាក់ កើនឡើង៦៤,៥២%

ថៃទទួលបានចំណូលសរុបចំនួន១៤០.៣៣៥លានបាត (ឬស្មើជាង១សែន៤ម៉ឺនលានបាត) ក្នុងអំឡុងពេលចូលឆ្នាំ២១ថ្ងៃ គឺបែងចែកចំណូលតាមផ្នែក ដូចជា ៖
-ថ្លៃបន្ទប់ស្នាក់នៅ ចំនួន៤២.០៦៩លានបាត
-ថ្លៃម្ហូបអាហារ និងភេសជ្ជៈ ចំនួន៣៣.០៦៩លានបាត
-ថ្លៃផលិតផល និងវត្ថអនុស្សាវរីយ៍ ចំនួន២៦.៨៣៩លានបាត
-ថ្លៃធ្វើដំណើរ ចំនួន១៥.៥០៥លានបាត
-ថ្លៃចាយវាយផ្នែកកម្សាន្ត ចំនួន១៤.៧៥៨លានបាត
-សេវាកម្មទេសចរណ៍ ចំនួន៥.៨៦៥លានបាត និង
-ថ្លៃចំណាយផ្សេងៗ ចំនួន២.២៣០លានបាត ៕