ប្រទេសវៀតណាម ៖ ការិយាល័យគយវៀតណាមរាយការណ៍ថា ប្រាក់ចំណូលបានពីការនាំចេញបន្លែ និងផ្លែឈើរបស់វៀតណាម ក្នុងរយៈពេល៤ខែដំបូង (គិតចាប់ពីខែមករា រហូតដល់ខែមេសា) ឆ្នាំ២០២៤ ស្មើជាង១.៨០០លានដុល្លារអាមេរិក កើនឡើង៣២,៩% បើធៀបនឹងរយៈពេលដូចគ្នាកាលពីឆ្នាំ២០២៣ ។ រីឯចិន, កូរ៉េខាងត្បូង, សហរដ្ឋអាមេរិក និងថៃ គឺជាប្រទេសនាំចូលបន្លែ និងផ្លែឈើពីវៀតណាមច្រើនបំផុត ក្នុងរយៈពេល៤ខែដំបូង ឆ្នាំ២០២៤ ។

ចំណែកប្រាក់ចំណូលដែលប្រទេសវៀតណាមទទួលបានពីការនាំចេញបន្លែ និងផ្លែឈើទៅក្រៅប្រទេស នៅខែមេសា ឆ្នាំ២០២៤ (ត្រឹមរយៈពេល១ខែ) គឺស្មើរហូតដល់ជាង៥៣៩លានដុល្លារអាមេរិក កើនឡើងជិត១៤,៩% បើធៀបនឹងខែមីនា ឆ្នាំ២០២៤ និងកើនឡើង៣៧,៨% បើធៀបនឹងខែមេសា ឆ្នាំ២០២៣ ។

ភ្នាក់ងារពាណិជ្ជកម្មក្រៅប្រទេស ដែលស្ថិតនៅក្រោមក្រសួងឧស្សាហកម្ម និងពាណិជ្ជកម្មរំពឹងថា ការនាំចេញបន្លែ និងផ្លែឈើ រួមទាំងការនាំចេញផ្លែទុរេនវៀតណាម នឹងកើនឡើងបន្ថែមទៀតនៅឆ្នាំ២០២៤នេះ ដោយសារវៀតណាមបានបង្កើនផ្ទៃដីកសិកម្ម និងរោងចក្រវេចខ្ចប់ដែលមានការទទួលស្គាល់គុណភាពពីពិភពលោកកាន់តែច្រើន ។ ហេតុនេះ វាជាកត្តាជួយជំរុញដល់ការនាំចេញទិន្នផលកសិកម្មទៅក្រៅប្រទេស ។

ក្រសួងកសិកម្ម និងអភិវឌ្ឍន៍ជនបទវៀតណាមរំពឹងថា ឧស្សាហកម្មបន្លែ និងផ្លែឈើ នៅតែបន្តបង្កើតកំណត់ត្រាថ្មីនៅឆ្នាំ២០២៤ ហើយប្រាក់ចំណូលដែលវៀតណាមទទួលបានពីការនាំចេញបន្លែ និងផ្លែឈើក្នុងឆ្នាំ២០២៤ ទាំងមូល គឺស្មើប្រមាណពី៦ពាន់លាន ទៅ៦ពាន់៥រយលានដុល្លារអាមេរិក និងកើនឡើងពី១៥% ទៅ២០% បើធៀបនឹងឆ្នាំ២០២៣ ។

គួរបញ្ជាក់ថា កាលពីឆ្នាំ២០២៣ ប្រទេសវៀតណាមបាននាំចេញបន្លែ និងផ្លែឈើក្នុងបរិមាណយ៉ាងច្រើនទៅក្រៅប្រទេស ព្រមទាំងទទួលបានប្រាក់ចំណូលចំនួន៥.៦៩០លានដុល្លារអាមេរិក កើនឡើងជាង៧០% បើប្រៀបធៀបពីមួយឆ្នាំទៅមួយឆ្នាំ ៕

ប្រទេសជប៉ុន៖ ពលរដ្ឋជប៉ុនចំនួន ៤ នាក់ដែលជាជនរងគ្រោះនៃការបោកប្រាស់របស់បណ្តាញសង្គម Facebook និង Instagram បានដាក់ពាក្យបណ្តឹងប្តឹងក្រុមហ៊ុន Meta ដោយទាមទារសំណង ១៤ ម៉ឺនដុល្លារ សម្រាប់ការដំណើរការផ្សាយពាណិជ្ជកម្មក្លែងក្លែងដែលបានក្លែងបន្លំពួកគេចូលទៅក្នុងការវិនិយោគនៅក្នុងគម្រោងដែលពួកគេជឿថាត្រូវបានគាំទ្រដោយសហគ្រិន។

យោងតាម The Asahi កាលពីថ្ងៃទី២៥ ខែមេសា ឆ្នាំ២០២៤ បានឱ្យដឹងថាដើមបណ្តឹងទាំងបួនដែលមានអាយុពី ៤០ ដល់ ៦០ ឆ្នាំបានដាក់ពាក្យបណ្តឹងទៅតុលាការស្រុក Kobe ដោយពួកគេនិយាយថា ពួកគេត្រូវបានបោកបញ្ឆោតឱ្យវិនិយោគតាមរយៈការផ្សាយពាណិជ្ជកម្មតាមអ៊ីនធឺណិតក្លែងក្លាយ ដែលអ្នកបន្លំនោះបានបង្ហាញខ្លួនជាសហគ្រិន Maezawa Yusaku និងអ្នកវិនិយោគដ៏ល្បីៗផ្សេងទៀត ធ្វើឱ្យពួកគេជឿនិងព្រមវិនិយោគប្រាក់យ៉ាងច្រើន។

ដើមបណ្តឹងនិយាយថា Meta មានកាតព្វកិច្ចពិនិត្យមើលខ្លឹមសារនៃការផ្សាយពាណិជ្ជកម្មតាមប្រព័ន្ធផ្សព្វផ្សាយសង្គមរបស់ខ្លួន ដើម្បីការពារការខូចខាតដែលមិននឹកស្មានដល់ត្រូវបានវាយប្រហារលើអ្នកប្រើប្រាស់វេទិកា ដោយពួកគេអះអាងថា ក្រុមហ៊ុននេះធ្វេសប្រហែស។ អ្នកទាំងបួនកំពុងស្វែងរកប្រាក់សរុបចំនួន ២៣ លានយ៉េន ឬប្រហែល ១៤៨,០០០ ដុល្លារ ជាសំណងពីអង្គភាព Meta’s Japan, Facebook Japan ។ ការប្ដឹងនេះកើតឡើងខណៈករណីក្លែងបន្លំដោយអ្នកក្លែងបន្លំតារាល្បីៗលើការផ្សាយពាណិជ្ជកម្មតាមប្រព័ន្ធផ្សព្វផ្សាយសង្គមកំពុងកើនឡើង។

ដូច្នេះហើយនេះជារឿងមិនធម្មតាសម្រាប់ប្រជាជនជប៉ុនក្នុងការទៅតុលាការដើម្បីស្វែងរកសំណងពីប្រតិបត្តិករប្រព័ន្ធផ្សព្វផ្សាយសង្គមចំពោះការក្លែងបន្លំដែលបានអនុវត្តតាមប្រព័ន្ធរបស់ពួកគេ។ មេធាវីសម្រាប់ដើមបណ្តឹងនិយាយថា បណ្តឹងនេះហាក់ដូចជាដំបូងគេនៅក្នុងប្រទេសជប៉ុនដែលប៉ុនប៉ងឱ្យប្រតិបត្តិករវេទិកាទទួលខុសត្រូវលើការឆបោកបែបនេះ។ ប្រធានមេធាវីលោក Kokufu Yasumichi បានប្រាប់អ្នកយកព័ត៌មានថា ពួកគេនឹងត្រួតពិនិត្យកម្មវិធីឡើងវិញ ហើយនឹងគូសបញ្ជាក់ពីតម្រូវការសម្រាប់បទប្បញ្ញត្តិរបស់រដ្ឋាភិបាលដើម្បីការពារការក្លែងបន្លំបែបនេះ៕

អ្នកស្រាវជ្រាវនៅប្រទេសប៉េរូ និយាយថា ដើមឈើមួយប្រភេទឈ្មោះ «Socratea Exorrhiza» ឬគេស្គាល់ជាទូទៅថា «ដើមដូងប្រេងនៅតំបន់ត្រូពិក» ដែលដុះក្នុងបរិវេណព្រៃនៅអាមេរិកកណ្តាល និងខាងត្បូង អាចដើរបានចម្ងាយចាប់ពី២សង់ទីម៉ែត្រ ទៅ៣សង់ទីម៉ែត្រក្នុង១ថ្ងៃ ហើយក្នុង១ឆ្នាំ វាអាចដើរបានរហូតដល់ជាង២០ម៉ែត្រឯណោះ ។ បើតាមការរៀបរាប់នេះ គឺវាមានលក្ខណៈស្រដៀងគ្នានឹងដើមឈើម្យ៉ាងឈ្មោះ អេន ក្នុងភាពយន្ត «The Lord of the Rings» ។

ការលើកឡើងថា ដើមឈើអាចដើរបាន ពុំមែនគ្មានមូលដ្ឋាននោះទេ ពីព្រោះកាលពីឆ្នាំ១៩៨០ អ្នកស្រាវជ្រាវម្នាក់ឈ្មោះ John H. Bodley និងម្នាក់ទៀតឈ្មោះ Foley C. Benson បានបង្ហាញរបាយការណ៍វិទ្យាសាស្ត្រមួយថា នៅព្រៃអាម៉ាហ្សូន ប្រទេសប៉េរូ មានដើមឈើមួយប្រភេទបានដើរចេញពីម្លប់ទៅរកកន្លែងមានពន្លឺថ្ងៃ ហើយវាក៏បានដុះឫសថ្មីជាបន្តបន្ទាប់ និងទុកឱ្យឫសចាស់ស្អុយរលួយ ។ ដូច្នេះ ព័ត៌មានដើមឈើអាចបម្លាស់ទី បានក្លាយជាទិន្នន័យមួយដែលបណ្តាមគ្គុទ្ទេសក៍ទេសចរនៅអាមេរិករៀបរាប់ឱ្យភ្ញៀវទេសចរស្តាប់រហូតដល់បច្ចុប្បន្ននេះ ។

តើការលើកឡើងថា ដើមឈើឈ្មោះ Socratea Exorrhiza អាចដើរបាន និងមានលក្ខណៈខុសប្លែកពីរុក្ខជាតិផ្សេងទៀត គឺជាការពិតដែរឬទេ? ប៉ុន្តែអ្នកវិទ្យាសាស្ត្រជាច្រើននាក់ប្រាប់ថា វាមិនមែនជាការពិតទេ ។

កាលពីឆ្នាំ២០០៥ Gerardo Avalos ជាអ្នកវិទ្យាសាស្ត្រតំបន់ក្តៅ និងនាយកមជ្ឈមណ្ឌលសិក្សា និងអភិវឌ្ឍន៍ប្រកបដោយចីរភាពនៅទីក្រុង Atenas ប្រទេសកូស្តារីកា ព្រមទាំងជាអ្នកជំនាញឈានមុខលើពិភពលោក ពាក់ព័ន្ធនឹងដើមឈើ Socratea Exorrhiza ហើយបានបោះពុម្ពការស្រាវជ្រាវក្នុងទស្សនាវដ្តីឈ្មោះ Biotropica លើកឡើងថា ការពិត ដើមឈើ Socratea Exorrhiza ពុំអាចដើរបានទេ ហើយកម្លាំងខ្យល់ខ្លាំងបានវាយប្រហារលើវា ទើបធ្វើឱ្យវាផ្អៀង ។ បន្ទាប់មក វាក៏ដុះឫសថ្មីឡើងដើម្បីឱ្យដើមទាំងមូលមានលំនឹង ហើយផ្នែកខាងលើនៃដើមឈើបានងាកទៅរកពន្លឺថ្ងៃ គឺដូចគ្នានឹងដើមឈើផ្សេងទៀតដែរ ប៉ុន្តែគល់ឈើពុំបានផ្លាស់ទីឡើយ ។

ក្រោយមក នៅឆ្នាំ២០០៧ ការស្រាវជ្រាវមួយទៀតពាក់ព័ន្ធនឹងតួនាទីរបស់ឫសដើមឈើ Socratea Exorrhiza របស់អ្នកជំនាញផ្នែករុក្ខជាតិ ឈ្មោះ Gregory R. Goldsmith ត្រូវបានផ្សព្វផ្សាយជាសាធារណៈ ។ លទ្ធផលនៃការស្រាវជ្រាវនេះ គឺដូចគ្នានឹងការស្រាវជ្រាវរបស់អ្នកជំនាញឈ្មោះ Gerardo Avalos ដែរ គឺដើមឈើនេះពុំអាចដើរបានទេ ។

ទោះយ៉ាងណា នៅតែមានការសង្ស័យថា បើដើមឈើនេះពុំអាចដើរទៅមុខបាន ហេតុអ្វីបានជាឫសរបស់វាដុះខ្ពស់បែបនេះ? កាលពីឆ្នាំ១៩៦០ អ្នកវិទ្យាសាស្ត្រសន្និដ្ឋានថា បានជាដើមឈើ Socratea Exorrhiza ចេញឫសខ្ពស់ៗបែបនេះ គឺដើម្បីការពារដើមរបស់វាពីទឹកជំនន់ ។ ប៉ុន្តែពួកគេគ្មានភស្តុតាងបញ្ជាក់គ្រប់គ្រាន់ទេ ចំពោះការលើកឡើងបែបនេះ ។

រហូតមកដល់ពេលបច្ចុប្បន្ន (ឆ្នាំ២០២៤) អ្នកស្រាវជ្រាវបានប្រកែកគ្នាថា ដើមឈើ Socratea Exorrhiza បានដុះឫសខ្ពស់ៗបែបនេះ ពីព្រោះវាចង់បង្កើនកម្ពស់បន្ថែមទៀត និងចង់ឱ្យដើមរឹងមាំល្អដើម្បីទទួលពន្លឺថ្ងៃកាន់តែច្រើន ។ ដូច្នេះ វានឹងអាចកាត់បន្ថយថាមពលដែលបានផ្គត់ផ្គង់ដើមរបស់វា ។

បើទោះជាអ្នកវិទ្យាសាស្ត្រនៅតែបន្តស្រាវជ្រាវពីដើមឈើប្រភេទនេះនាពេលបច្ចុប្បន្នក្តី ប៉ុន្តែបណ្តាមគ្គុទ្ទេសក៍ទេសចរនៅតែរៀបរាប់ឱ្យភ្ញៀវទេសចរស្តាប់ថា វាជាដើមឈើអាចដើរបាន ហើយក្នុង១ឆ្នាំៗ វាអាចដើរបានក្នុងចម្ងាយជាង២០ម៉ែត្រ ។

វាជារឿងគួរឱ្យចម្លែកណាស់ និងធ្វើឱ្យបណ្តាអ្នកជំនាញប្រកែកគ្នាបន្តទៀត ហើយគេពុំអាចបញ្ជាក់បានថា តើវាពិតជាអាចដើរបានឬក៏អត់? ប៉ុន្តែមិនប្រាកដទេ នៅតំបន់ព្រៃផ្សេងទៀតដែលមនុស្សពុំទាន់ទៅដល់ គឺអាចមានដើមឈើខ្លះចេះដើរក៏ថាបាន ៕

យើងគ្រប់គ្នាដឹងហើយថាប្រទេសចិនគឺជាប្រទេសដែលមានច្បាប់វិន័យតឹងតែងបំផុត គ្រប់តារាទាំងអស់មិនថាតារាជាតិ ឬអន្តរជាតិនោះទេ ត្រូវតែគោរពនឹងបទបញ្ជាផ្ទៃក្នុងរបស់ប្រទេសចិនឱ្យបានត្រឹមត្រូវ បើមិនដូច្នោះទេពួកគេនឹងត្រូវចិនហាមឃាត់មិនឱ្យចូលក្នុងប្រទេសទៀតឡើយ។ ដូច្នេះហើយតើអ្នកដឹងទេថា តារារបស់ពិភពលោករូបណាខ្លះដែលជាប់ឈ្មោះក្នុងបញ្ជីស្បែកខ្មៅនៅក្នុងប្រទេសចិន?

១.Miley Cyrus៖ Miley Cyrus ដែលជាតារាស្រីស៊ិចស៊ីមួយរូបជនជាតិអាមេរិក ត្រូបានប្រទេសចិនចាត់ចូលក្នុងបញ្ជីស្បែកខ្មៅ ដោយសារនាងបានបង្ហោះរូបភាពងើយភ្នែកឡើងលើ ហើយធ្វើភ្នែកតូចៗជាមួយក្រុមមិត្តភក្តិរបស់នាង ដែលមើលទៅហាក់ដូចជាកំពុងចំអកឱ្យប្រជាជនចិន ខណៈដែលជនជាតិចិនភាគច្រើនសុទ្ធតែមានភ្នែកតូចៗ។ នៅពេលដែលរូបថតនោះត្រូវបានបង្ហោះ អ្នកគាំទ្រជនជាតិចិនជាច្រើនបានប្រតិកម្មទៅលើរូបថតនេះ ដោយចាត់ទុកថាជាការប្រមាទយ៉ាងធ្ងន់ធ្ងរ និងជាការរើសអើងពូជសាស្ត្រ ហើយទាមទារឱ្យតារាស្រីអាមេរិករូបនេះធ្វើការសុំទោសជាសារធារណៈ។

មិនយូរប៉ុន្មាន Miley Cyrus ក៏បានចេញមុខបកស្រាយថា រូបថតទាំងនេះគ្រាន់តែជាស្ទាយរបស់ខ្ញុំតែប៉ុណ្ណោះ មិនមានចេតនានិយាយលេងសើចនឹងជាតិសាសន៍ណាមួយទេ! ទោះជាយ៉ាងណាក្រសួងការបរទេសនៃសាធារណៈរដ្ឋប្រជាមានិតចិនបានប្រកាសពីការរារាំងមិនឱ្យ Miley Cyrus ចូលប្រទេសជារៀងរហូត។ រដ្ឋាភិបាលក៏បានហាមឃាត់ការផ្សាយកម្មវិធីទូរទស្សន៍ ភាពយន្ត និងការលក់ទំនិញណាមួយរបស់នាងទៀតផង។

២.Katy Perry៖ តារាចម្រៀងដ៏ល្បីល្បាញរូបនេះក៏ត្រូវបានប្រទេសចិនហាមឃាត់ផងដែរ ដោយសារតែនាងបានធ្វើខុសគោលការណ៍ ដោយនាងបានលើកទង់ជាតិតៃវ៉ាន់ និងពាក់អាវផ្កាឈូករ័ត្នដែលតំណាងឱ្យកោះតៃវ៉ាន់ អំឡុងពេលការប្រគុំតន្ត្រីមួយរបស់នាងក្នុងឆ្នាំ ២០១៥ នៅប្រទេសចិន។

៣.Lady Gaga៖ តារាចម្រៀងវ័យ ៣៨ ឆ្នាំរូបនេះក៏ធ្លាប់ត្រូវបានហាមឃាត់នៅក្នុងសាធារណៈរដ្ឋប្រជាមានិតចិន ជាពិសេសក្រសួងវប្បធម៌ ដោយសារតែតន្ត្រីរបស់នាងត្រូវបានគេមើលឃើញថាមានអត្ថន័យស៊ីជម្រៅខ្លាំងពេកដែលពាក់ពន្ធ័នឹងការរួមភេទ បង្កឱ្យមានភាពច្របូកច្របល់នៅក្នុងឆាកតន្ត្រីតាមអ៊ីនធឺណិត និងធ្វើឱ្យប៉ះពាល់ដល់សន្តិសុខជាតិរបស់ប្រទេស។ ដូច្នេះបទចម្រៀងក្នុងអាល់ប៊ុមរបស់នាង ‘Born This Way’ ត្រូវបានដាក់ក្នុងបញ្ជីខ្មៅរួមមាន “The Edge of Glory” “Hair” “Marry the Night” “Americano” “Judas” និង “Bloody Mary” ។ ទោះជាយ៉ាងណាការហាមប្រាមនេះត្រូវបានដកចេញបន្ទាប់ពីរយៈពេលបីឆ្នាំ ហើយអាល់ប៊ុមថ្មីៗដែលមានអត្ថន័យល្អ នឹងត្រូវបានដាក់លក់ដោយស្របច្បាប់នៅក្នុងប្រទេសចិន ទោះបីជាមានការរឹតបន្តឹងជាច្រើនក៏ដោយ។

៤.Selena Gomez៖ ក្នុងឆ្នាំ ២០១៤ រូបភាពមួយសន្លឹករបស់ Selena រួមជាមួយព្រះសង្ឃ Dalai Lama បានរីករាលដាលពេញអ៊ីនធឺណិត។ វាបានធ្វើឱ្យរដ្ឋាភិបាលចិនមានការខឹងសម្បារយ៉ាងខ្លាំងដែលបានបញ្ចប់ការបិទដំណើរទេសចរណ៍របស់ Selena នៅក្នុងប្រទេសរបស់ពួកគេ ហើយថែមទាំងលុបចោលការប្រគុំតន្ត្រីនៅក្នុងតំបន់ជាច្រើននៅក្នុងប្រទេសចិនផងដែរ។ មូលហេតុគឺដោយសាររដ្ឋាភិបាលចិនចាត់ទុកថាព្រះសង្ឃ Dalai Lama ជាចចកលាក់មុខព្យាយាមបំផ្លាញអធិបតេយ្យភាពរបស់ប្រទេសដោយការជំរុញឱ្យមានឯករាជ្យ។ ប៉ុន្តែសម្តេចសង្ឃ ដាឡៃ ឡាម៉ា អះអាងថាព្រះអង្គមិនតស៊ូមតិទាមទារឯករាជ្យទេ ប៉ុន្តែចង់បានស្វ័យភាព ដែលអាចឱ្យជនជាតិទីបេរក្សាបាននូវវប្បធម៌ ភាសា និងសាសនា នៅក្រោមការគ្រប់គ្រងរបស់ប្រទេសចិនប៉ុណ្ណោះ៕

រយៈពេលប៉ុន្មានថ្ងៃកន្លងមកនេះ ការព្រួយបារម្ភថ្មីមួយបានលេចឡើងក្នុងចំណោមរដ្ឋាភិបាលថៃអំពីបញ្ហាអាកាសធាតុកំពុងឡើងកម្តៅខ្លាំង ខណៈដែលមនុស្សប្រមាណ ៣០នាក់ ហើយបានបាត់បង់ជី.វិតដោយសារតែជំងឺដាច់សរសៃឈាមខួរក្បាល ព្រោះតែស្ថិតនៅក្រោមកម្តៅថ្ងៃរយៈពេលយូរម៉ោងពេក ។

អាជ្ញាធរទីក្រុងបាងកកបានព្រមានអំពីរលកកំដៅកំពុងតែរីកដុះដាលខ្លាំង ខណៈដែលសន្ទស្សន៍កំដៅត្រូវបានគេរំពឹងថានឹងកើនឡើងជាបន្តបបន្ទាប់លើសពី ៥២ អង្សាសេ។ ស្របពេលសីតុណ្ហភាពនៅក្នុងទីក្រុងបាំងកក រយៈពេល២ថ្ងៃចុងក្រោយនេះ គឺកាលពីថ្ងៃទី២៤ និង២៥ ខែមេសា បានឡើងដល់៤០,១អង្សាសេ។ ចំណែកបណ្តាខេត្តនានានៃប្រទេសថៃ កម្តៅបានគឺមានការកើនឡើងកាន់តែខ្លាំង ពិសេសខេត្តឡាំប៉ាងភាគខាងជើងប្រទេសថៃ មានសីតុណ្ហភាពរហូតដល់ ៤៤,២ អង្សារសេឯណ្ណោះ។

ក្រសួងសុខាភិបាលថៃបាននិយាយកាលពីថ្ងៃទី២៤ខែមេសានេះថា គិតចាប់ពីថ្ងៃទី១ ខែមករាដល់ថ្ងៃទី១៧ ខែខែមេសាឆ្នាំ ២០២៤នេះ ប្រជាពលរដ្ឋខ្លួនប្រមាណ ៣០ នាក់បានបាត់បង់ជីវិត ដោយសារជំងឺដាច់សរសៃឈាមខួរក្បាល ខណៈដែលក្រុមមនុស្សគោលដៅនៃការប្រឈមនឹងជំងឺនេះខ្លាំងបំផុតគឺមនុស្សចាស់និងកុមារ សូម្បីតែមនុស្សមានសុខភាពធម្មតា ប្រសិនបើជារឿយៗត្រូវស្ថិតនៅក្រោមកម្តៅថ្ងៃរយៈពេលយូរម៉ោងពេក និងផឹកទឹកមិនបានគ្រប់គ្រាន់។

គួរបញ្ជាក់ថា រលកនៃអាកាសធាតុក្តៅខ្លាំងបានបោកបក់ផ្នែកខ្លះនៃអាស៊ីខាងត្បូង និងអាស៊ីអាគ្នេយ៍ក្នុងសប្តាហ៍នេះ ដោយជំរុញឱ្យសាលារៀនទូទាំងប្រទេសហ្វីលីពីនប្រកាសបិទសាលា ជំនួសដោយថ្នាក់អនឡាញ ខណៈប្រទេសកាន់អបីយជំនឿផ្សេងៗ រៀបចំពិធីបូជាបួងសួងសុំទឹកភ្លៀងជាហូហែរផងដែរ៕

ប្រទេសសិង្ហបុរី ៖ កាលពីថ្ងៃទី២៤ ខែមេសា ឆ្នាំ២០២៤ គេហទំព័ររបស់សិង្ហបុរីឈ្មោះ The Straits Times បានរាយការណ៍ពីការដំណើរការគម្រោង «Climate Friendly Households Programme» ដែលផ្តល់សិទ្ធិដល់ពលរដ្ឋរស់នៅក្នុងលំនៅឋានរបស់គណៈកម្មការលំនៅឋាន និងការអភិវឌ្ឍសិង្ហបុរី អាចទិញសម្ភារៈអគ្គិសនី និងទឹកសន្សំសំចៃថាមពល និងមិនប៉ះពាល់បរិស្ថាន ។

គម្រោង «Climate Friendly Households Programme» បានដំណើរការនៅដំណាក់កាលទី១ ក្នុងខែវិច្ឆិកា ឆ្នាំ២០២០ ដោយសារតែតម្លៃហ្គាស និងអគ្គិសនីកើនឡើងខ្ពស់នាពេលនោះ ហើយរដ្ឋាភិបាលសិង្ហបុរីមានគោលបំណងជំរុញការសន្សំសំចៃថាមពល និងថែរក្សាបរិស្ថាន ។

ការដំណើរការគម្រោងនេះក្នុងដំណាក់កាលទី១ បានកំណត់លក្ខខណ្ឌថា នឹងចែកគូប៉ុងមានទឹកប្រាក់ចំនួន២២៥ដុល្លារសិង្ហបុរី ដល់អ្នករស់នៅក្នុងផ្ទះល្វែងរបស់គណៈកម្មការលំនៅឋាន និងការអភិវឌ្ឍសិង្ហបុរី ។ ប៉ុន្តែអ្នកមានសិទ្ធិទទួលបានគូប៉ូងនេះ អាចទិញបានតែទូរទឹកកក, អំពូលភ្លើង LED និងក្បាលរ៉ូប៊ីណេផ្កាឈូកប៉ុណ្ណោះ ។

ការកំណត់លក្ខខណ្ឌទិញសម្ភារៈបែបនេះ ទើបធ្វើឱ្យគម្រោង «Climate Friendly Households Programme» នៅដំណាក់កាលទី១ មានពលរដ្ឋចុះឈ្មោះត្រឹមតែ១៤៥.៨០០គ្រួសារប៉ុណ្ណោះ (ជាង១សែន) ក្នុងចំណោមពលរដ្ឋមានសិទ្ធិសរុបចំនួន៣សែនគ្រួសារ ។ រីឯអ្នកប្រើប្រាស់គូប៉ុងទិញសម្ភារៈជាក់ស្តែងមានត្រឹមតែ៦២.៨០០គ្រួសារប៉ុណ្ណោះ ។

ហេតុនេះ ការអនុវត្តគម្រោងនៅដំណាក់កាលទី២ ឆ្នាំ២០២៤ រដ្ឋាភិបាលសិង្ហបុរីបានអនុញ្ញាតឱ្យអ្នកមានសិទ្ធិអាចទិញសម្ភារៈអគ្គិសនី និងទឹក បានច្រើនប្រភេទជាងមុន ។ លើសពីនេះ រដ្ឋាភិបាលបានបង្កើនចំនួនគ្រួសារដែលទទួលសិទ្ធិ ស្មើរហូតដល់១លាន១សែនគ្រួសារ ព្រមទាំងបង្កើនចំនួនប្រាក់រហូតដល់៣០០ដុល្លារសិង្ហបុរី ផងដែរ ។

ចំណែកសម្ភារៈអគ្គិសនី និងទឹក ដែលអ្នកទទួលបានសិទ្ធិក្នុងគម្រោងដំណាក់កាលទី២ អាចទិញបានរួមមាន ៖ ទូរទឹកកក, ម៉ាស៊ីនត្រជាក់, អំពូលភ្លើង LED, កង្ហារ, ម៉ាស៊ីនបោកគក់, ក្បាលរ៉ូប៊ីណេផ្កាឈូក, ចានបង្គន់ និងសម្ភារៈមួយចំនួនទៀត ។ ប៉ុន្តែសម្ភារៈទាំងនេះត្រូវតែមានស្លាកសញ្ញាសម្គាល់ច្បាស់លាស់ ឬទទួលបានការធានាគុណភាព និងប្រសិទ្ធភាពជាផលិតផលសន្សំសំចៃថាមពល ។

ពលរដ្ឋដែលបានចុះឈ្មោះដើម្បីទទួលបានសិទ្ធិទិញសម្ភារៈសន្សំសំចៃថាមពលទាំងនេះ នឹងអាចប្រើប្រាស់គូប៉ុងទិញសម្ភារៈអគ្គិសនីនៅតាមហាងលក់ទំនិញចំនួន១៤កន្លែង រហូតដល់ចុងឆ្នាំ២០២៧ ហើយរដ្ឋាភិបាលសង្ឃឹមថា នឹងមានហាងលក់ទំនិញផ្សេងទៀតចូលរួមក្នុងគម្រោងនេះនាថ្ងៃអនាគត ៕

រូបភាព Meme គឺជារូបភាពបែបកំប្លែងដែលមនុស្សជាច្រើននៅជុំវិញពិភពលោកតែងតែយកទៅផុស Troll ដើម្បីឱ្យមនុស្សពេលឃើញរូបភាពនេះហើយមានភាពសប្បាយរីករាយ បំបាត់ទុក បំបាត់ស្រ្តេស។ ទោះជាយ៉ាងណា ប្រិយមិត្តប្រហែលជាមិនបានដឹងទេថា ការពិតនៅពីក្រោយរូបភាពដ៏គួរឱ្យអស់សំណើចទាំងនេះ គឺសុទ្ធតែបង្កប់អត្ថន័យដែលមនុស្សជាច្រើនមិនធ្លាប់ដឹងពីមុនមក។ ដូច្នេះអត្ថបទនេះយើងនឹងប្រាប់ពីអត្ថន័យនៅពីក្រោយរូបភាព Meme ដ៏ល្បីល្បាញមួយចំនួនរបស់ពិភពលោក។

១.Disaster Girl៖ រូបភាពក្មេងស្រីញញឹមឈរនៅមុខផ្ទះដែលកំពុងឆេះ គឺត្រូវបានថតនៅឆ្នាំ ២០០៥ ក្នុងទីក្រុង Mebane រដ្ឋ North Carolina សហរដ្ឋអាមេរិក។ ខណៈដែលនៅពេលនោះមានផ្ទះមួយត្រូវបានឆាបឆេះយ៉ាងសន្ធោសន្ធៅធ្វើឱ្យអ្នកជិតខាង និងឪពុកម្តាយរបស់ Zoe Roth ដែលជាក្មេងស្រីល្បីល្បាញក្នុងរូបភាព Meme បានទៅជួយពន្លត់ ហើយក្នុងពេលជាមួយគ្នានេះ Zoe Roth គឺនាងមានអាយុត្រឹមតែ ៤ ឆ្នាំទេហើយនាងពិតជាចង់ទៅមើលហេតុការណ៍នេះខ្លាំងណាស់ ប៉ុន្តែឪពុកម្តាយរបស់នាងមិនឱ្យចេញទៅមើលនោះទេ។

មិនយូរប៉ុន្មានអ្នកពន្លត់អគ្គីភ័យក៏បានអនុញ្ញាតឱ្យក្មេងៗ ប្តូរវេនកាន់ទុយោដើម្បីជួយពន្លត់ពីចម្ងាយ ដោយចិត្តត្រេកអរ Zoe Roth ក៏ញញឹមហើយក៏ត្រូវបានឪពុករបសនាងថតដោយចៃដន្យ។ បន្ទាប់មកនៅឆ្នាំ ២០០៧ Dave Roth ដែលជាឪពុករបស់ Zoë ក៏បានបញ្ចូលរូបភាពនេះនៅក្នុងការប្រកួតរូបថតពិភពលោក ហើយក៏បានឈ្នះនិងត្រូវបានកែសម្រួលដោយដាក់ឈ្មោះថា Disaster Girl ចាប់ពីពេលនោះមករូបភាពនេះក៏មានភាពល្បីល្បាញខ្លាំងរហូតមកដល់សព្វថ្ងៃនេះ។ ដូច្នេះបច្ចុប្បន្ន Zoë Roth រកប្រាក់បាន ៥០០,០០០ ដុល្លារពីរូបភាព Meme នេះជារៀងរាល់ឆ្នាំ។

២.Distracted Boyfriend៖ រូបភាពបុរសកំពុងដើរជាមួយមិត្តស្រីរបស់ខ្លួន ប៉ុន្តែស្រាប់តែងាកមើលនារីដទៃទៀត ត្រូវបានគេចាត់ទុកថាជារូបភាព Meme ដ៏ល្បីល្បាញមួយរបស់ពិភពលោក។ ប៉ុន្តែនៅពីក្រោយរូបភាពនេះគឺបានបង្កភាពចលាចលខ្លាំង នៅពេលដែលរូបភាពនេះត្រូវបានគ្រប់គ្រងដោយអ្នកឃ្លាំមើលការផ្សាយពាណិជ្ជកម្មស៊ុយអែត។ អ្នកផ្តល់សេវាអ៊ីនធឺណេតស៊ុយអែត Bahnhof បានប្រើប្រាស់រូបភាពនេះសម្រាប់ការផ្សាយពាណិជ្ជកម្មជ្រើសរើសបុគ្គលិកដែលបង្ហាញថានារីដ៏ស្រស់ស្អាតនោះគឺជាកន្លែងការងារថ្មី ហើយមិត្តស្រីរបស់បុរសនោះគឺជាកន្លែងការងារចាស់ មានន័យថា បើមនុស្សប្រុសចង់បានមិត្តស្រីថ្មីត្រូវតែផ្លាស់ប្តូរការងារថ្មី ដែលនេះធ្វើឱ្យនារីជាច្រើនមិនពេញចិត្ត ហាក់ដូចជាការផ្សាយពាណិជ្ជកម្មនេះមិនឱ្យតម្លៃទៅលើស្ត្រី ហើយមនុស្សជាច្រើននៅក្នុងប្រទេសស៊ុយអែតក៏បានចាត់ទុកថារូបនេះមិនល្អ និងមិនត្រូវបានផ្សព្វផ្សាយនៅក្នុងប្រទេសនេះទៀតឡើយ៕

សហរដ្ឋអាមេរិក ៖ ក្រុមអ្នករកសំឡេងឆ្នោតរបស់ប្រធានាធិបតីអាមេរិក លោក ចូ បៃដិន បញ្ជាក់ថា ពួកគេនឹងប្រើប្រាស់ TikTok ដើម្បីរកសំឡេងឆ្នោតពីយុវជនបន្តទៀត ក្រោយពីថ្ងៃទី២៤ ខែមេសា ឆ្នាំ២០២៤ មេដឹកនាំអាមេរិកទើបតែចុះហត្ថលេខាហាមឃាត់ការប្រើប្រាស់ TikTok បើក្រុមហ៊ុនចិន ByteDance មិនព្រមលក់ភាគហ៊ុនក្នុងរយៈពេល១ឆ្នាំទេនោះ ។

ការសម្រេចចិត្តរបស់សភា Congress បានកើតឡើងស្របពេលយុវជនអាមេរិក និងពួកឆ្វេងនិយមនិយមប្រើប្រាស់ TikTok យ៉ាងទូលំទូលាយ ដោយសារពួកគេមិនពេញចិត្តនឹងដំណោះស្រាយបញ្ហាសង្គ្រាមនៅតំបន់កាហ្សារបស់រដ្ឋាភិបាលលោក ចូ បៃដិន ហើយពួកគេក៏ចាប់ផ្តើមប្រមូលផ្តុំគ្នាតវ៉ាប្រឆាំងនៅតាមសាកលវិទ្យាល័យជាច្រើនទូទាំងអាមេរិក ។

អ្នករកសំឡងឆ្នោតរបស់ប្រធានាធិបតីអាមេរិក ដែលសុំមិនបញ្ចេញឈ្មោះបានផ្តល់សម្ភាសន៍ជាមួយសារព័ត៌មានរ៉យទ័រថា ៖ «ការបែកខ្ញែកនៃប្រព័ន្ធផ្សព្វផ្សាយបានធ្វើឱ្យយើងបង្ហាញខ្លួន និងជួបជាមួយអ្នកមានសិទ្ធិបោះឆ្នោត មិនថាពួកគេនៅទីណា រួមទាំងបណ្តាញសង្គមផងដែរ ។ រីឯ TikTok គឺជាបណ្តាញសង្គមមួយដែលយើងបានប្រើប្រាស់សម្រាប់រកសំឡេងឆ្នោត» ។

អ្នករកសំឡងឆ្នោតរូបនេះបញ្ជាក់ថា ក្រុមរកសំឡេងឆ្នោតបានកំណត់វិធានការសុវត្ថិភាពខ្ពស់នៅពេលប្រើប្រាស់ TikTok ហើយដោយសារក្រុមអ្នករកសំឡេងឆ្នោតគ្មានតួនាទីគ្រប់គ្រងព័ត៌មានសន្តិសុខជាតិ ទើបពួកគេអាចដោនឡូតកម្មវិធី TikTok មកប្រើប្រាស់ក្នុងទូរស័ព្ទដៃបាន ។

បញ្ជី TikTok មួយឈ្មោះ @bidenhq ជារបស់ក្រុមអ្នករកសំឡេងឆ្នោតឱ្យលោក ចូ បៃដិន បានបង្ហោះវីដេអូប្រមាណ១២០ និងមានអ្នកតាមដានជាង៣០៦.០០០នាក់ ។ បច្ចុប្បន្ន បញ្ជី TikTok នេះនៅតែផ្សព្វផ្សាយអំពីលោក ចូ បៃដិន បើទោះជាសេតវិមានចោទប្រកាន់ TikTok ថា ធ្វើឱ្យប៉ះពាល់ដល់សន្តិសុខអាមេរិកក្តី ។

ចំណែក TikTok ត្រៀមដាក់ពាក្យបណ្តឹងទៅកាន់តុលាការដើម្បីប្រឆាំងនឹងច្បាប់អាមេរិក ដែលបង្ខំឱ្យ TikTok លក់ភាគហ៊ុន និងគំរាមផ្សេងៗ ដោយ TikTok អះអាងថា វាជាទង្វើបំពាននឹងវិសោធនកម្មរដ្ឋធម្មនុញ្ញអាមេរិក លើកទី១ (First Amendment) ។ កាលពីថ្ងៃទី២៤ ខែមេសា ឆ្នាំ២០២៤ នាយកប្រតិបត្តិ TikTok និយាយថា ខ្លួនជឿថា ក្រុមហ៊ុននឹងឈ្នះក្តី និងអាចស្នើសុំឱ្យតុលាការរារាំងច្បាប់នេះ ។

TikTok បានប្រឈមនឹងច្បាប់របស់អាមេរិកអស់រយៈពេល៤ឆ្នាំ ដែលជាឧបសគ្គដ៏សំខាន់មួយផ្នែកអ៊ីនធើរណេត និងបច្ចេកវិទ្យារវាងចិន និងអាមេរិក ។ រីឯលោក ដូណាល់ ត្រាំ ជាបេក្ខជនប្រធានាធិបតីមកពីគណបក្ស Republican បានប្រកាសនៅសប្តាហ៍ទី៤ ខែមេសា ឆ្នាំ២០២៤ ថា បើអាមេរិកហាមឃាត់ការប្រើប្រាស់ TikTok ពិតមែន លោកប្រធានាធិបតី ចូ បៃដិន ជាអ្នកទទួលខុសត្រូវ ។

កន្លងមក លោក ដូណាល់ ត្រាំ ក៏ធ្លាប់បានហាមឃាត់ការប្រើប្រាស់ TikTok ផងដែរ ក្នុងពេលលោកកាន់តំណែងជាប្រធានាធិបតីអាមេរិក ដោយសារលោកបារម្ភពីសន្តិសុខអាមេរិកដូចគ្នា ប៉ុន្តែត្រូវបានតុលាការជំទាស់ជាមុន ។

ក្រុមអ្នករកសំឡេងឆ្នោតរបស់លោក ចូ បៃដិន ជឿជាក់ថា ការចេញច្បាប់ប្រឆាំងនឹង TikTok នឹងមិនធ្វើឱ្យមេដឹកនាំអាមេរិកបាត់បង់សំឡេងឆ្នោតរបស់យុវជនទេ ខណៈដំណើរការតាមផ្លូវច្បាប់នឹងត្រូវចំណាយពេលយូរទៀត ។ ហេតុនេះ វាធ្វើឱ្យវិធានការហាមឃាត់ការប្រើប្រាស់ TikTok មិនកើតឡើងងាយៗទេ ៕