សហរដ្ឋអាមេរិក ៖ យោងតាមលទ្ធផលស្ទង់មតិមួយបង្ហាញថា ពលរដ្ឋអាមេរិកភាគច្រើនជឿថា ប្រទេសចិនប្រើប្រាស់ TikTok ធ្វើជាឧបករណ៍តាមដាន និងមានឥទ្ធិពលលើគំនិតរបស់ពលរដ្ឋអាមេរិក ស្របពេលរដ្ឋាភិបាលអាមេរិកបានព្យាយាមហាមឃាត់ការប្រើប្រាស់កម្មវិធីដ៏ពេញនិយមនេះ ។

លទ្ធផលការស្ទង់មតិធ្វើឡើងដោយ Reuters/Ipsos បង្ហាញថា ពលរដ្ឋអាមេរិកឆ្លើយតបការស្ទង់មតិប្រមាណ៥៨% និយាយថា រដ្ឋាភិបាលចិនបានប្រើប្រាស់ TikTok ដើម្បីបង្កើតឥទ្ធិពលដល់គំនិតពលរដ្ឋអាមេរិក ។ រីឯអ្នកឆ្លើយតប១៣% មិនយល់ស្របនឹងការលើកឡើងនេះ ខណៈអ្នកផ្សេងទៀតមិនប្រាកដចិត្ត ឬពុំបានឆ្លើយតបសំណួរ ។

លទ្ធផលស្ទង់មតិបង្ហាញទៀតថា ពលរដ្ឋអាមេរិក៤៦% និយាយថា ចិនប្រើប្រាស់ TikTok ដើម្បីតាមដានពីជីវិតពលរដ្ឋអាមេរិក ។ វាជាការចោទប្រកាន់មួយ ដែលរដ្ឋាភិបាលចិនបានបដិសេធរហូតមក ។

ក្រុមហ៊ុន TikTok និយាយថា បានវិនិយោគប្រាក់ជាង១.៥០០លានដុល្លារអាមេរិក ដើម្បីធ្វើឱ្យប្រសើរឡើងនូវប្រព័ន្ធសុវត្ថិភាពព័ត៌មាន និងគ្មានការចែកចាយព័ត៌មានរបស់អ្នកប្រើប្រាស់ TikTok នៅអាមេរិក ចំនួន១៧០លាននាក់ទៅឱ្យរដ្ឋាភិបាលចិន ដូចការបារម្ភរបស់អ្នកនយោបាយអាមេរិកទេ ។ នៅឆ្នាំ២០២៣ CEO របស់ក្រុមហ៊ុន TikTok បានបញ្ជាក់ជាមួយរដ្ឋសភាអាមេរិកថា TikTok ពុំធ្លាប់ជំរុញ ឬលុបខ្លឹមសារតាមការបញ្ជារបស់រដ្ឋាភិបាលចិនឡើយ ។

កាលពីចុងខែមេសា ឆ្នាំ២០២៤ ប្រធានាធិបតីអាមេរិក លោក ចូ បៃដិន បានចុះហត្ថលេខាលើច្បាប់បង្ខំឱ្យ ByteDance ជាក្រុមហ៊ុនមេរបស់ TikTok លក់ភាគហ៊ុនទាំងអស់ក្នុងរយៈពេល២៧០ថ្ងៃ បើមិនដូច្នោះទេ TikTok អាចត្រូវហាមប្រើប្រាស់នៅអាមេរិក ។

ចំណែកក្រុមហ៊ុន TikTok ប្រកាសថា នឹងជំទាស់ជាមួយច្បាប់នេះ ព្រោះវាផ្ទុយនឹងរដ្ឋធម្មនុញ្ញអាមេរិក ស្តីពីការការពារសេរីភាព និងការបញ្ចេញមតិ ។ រីឯអ្នកប្រើប្រាស់ TikTok ជាច្រើននាក់គ្រោងអនុវត្តវិធានការតាមច្បាប់ រួមទាំងលើកឡើងពីបញ្ហានេះដើម្បីឱ្យតុលាការកំពូលអាមេរិកកាត់ក្តី ។

លទ្ធផលស្ទង់មតិរបស់ Reuters/Ipsos បង្ហាញថា ពលរដ្ឋអាមេរិក៥០% គាំទ្រការហាមឃាត់ប្រើប្រាស់ TikTok ខណៈ៣២% មិនយល់ស្រប ។ ទោះយ៉ាងណា លទ្ធផលស្ទង់មតិនេះបានសាកសួរពលរដ្ឋអាមេរិកស្មើជាង១.០០០នាក់ប៉ុណ្ណោះ (មិនមែនយុវជន) ហើយវាមិនអាចឆ្លុះបញ្ចាំងពីគំនិតរបស់យុវជនអាមេរិកមានអាយុក្រោម១៨ឆ្នាំទេ ដែលជាក្រុមប្រើប្រាស់ TikTok ច្រើនជាងគេ ។

ច្បាប់ដែលលោក ចូ បៃដិន ចុះហត្ថលេខានេះ បានផ្តល់ពេលវេលាឱ្យក្រុមហ៊ុន ByteDance ត្រឹមថ្ងៃទី១៩ ខែមករា ឆ្នាំ២០២៥ ក្នុងការលក់ភាគហ៊ុនរបស់ TikTok ។ ប៉ុន្តែការកំណត់រយៈពេលនេះ អាចពន្យារពេល៣ខែទៀត បើរដ្ឋាភិបាលអាមេរិកយល់ឃើញថា TikTok ចង់លក់កម្មវិធីដ៏ពេញនិយមឱ្យអាមេរិក ៕

បច្ចេកវិទ្យាទំនើប AI នាពេលបច្ចុប្បន្នបានផ្តល់នូវប្រយោជន៍យ៉ាងច្រើនសម្រាប់មនុស្ស ប៉ុន្តែវាក៏អាចផ្តល់ផលប៉ះពាល់ដល់មនុស្សដូចគ្នាដែរ បើជនខិលខូចយកបច្ចេកវិទ្យានេះទៅប្រើប្រាស់ក្នុងផ្លូវខុស ។ ជាក់ស្តែង ករណីបោកប្រា.ស់ មួយបានកើតឡើង គឺមានហាងលក់កូនរុក្ខជាតិ និងពូជផ្កាផ្សេងៗនៅប្រទេសចិនបានប្រើប្រាស់បច្ចេកវិទ្យា AI បង្កើតជារុក្ខជាតិគ្មានរូបរាងពិតប្រាកដលើផែនដី មកលក់តាមអនឡាញឱ្យអតិថិជនដែលចូលចិត្តរុក្ខជាតិប្លែកៗ ។

ពូជរុក្ខជាតិពេញនិយមដែលហាងផ្កាទាំងនេះយកមកលក់ ឈ្មោះថា «ផ្កាមុខឆ្មា/Cat’s Eye Dazzle» ហើយហាងផ្កាបានបង្ហោះរូបផ្កាមុខឆ្មានេះលក់នៅលើគេហទំព័រជាច្រើន ថែមទាំងបង្ហោះលក់លើគេហទំព័រពេញនិយមឈ្មោះ eBay និង Etsy ផងដែរ ។

កាលពីថ្ងៃទី១៧ ខែមេសា ឆ្នាំ២០២៤ អ្នកលេងហ្វេសប៊ុកម្នាក់ឈ្មោះ «StorieSpot» បានបង្ហោះរូបភាពផ្កាមុខឆ្មាក្នុងក្រុមហ្វេសប៊ុកឈ្មោះ «National Geographic Wild Planet» ប៉ុន្តែក្រុមហ្វេសប៊ុកនេះមិនពាក់ព័ន្ធនឹងទស្សនាវដ្តី ឬកម្មវិធី National Geographic ទេ ។ រីឯរូបភាពទាំងនេះមើលទៅដូចមុខឆ្មាបេះបិទ និងគួរឱ្យស្រឡាញ់យ៉ាងខ្លាំង ។

មនុស្សគ្រប់គ្នាដែលបានឃើញរូបទាំងនេះហើយសរសើរមិនដាច់ពីមាត់ថា ផ្កាមុខឆ្មាពិតជាស្រស់ស្អាតណាស់ រហូតដល់ពួកគេពុំចាប់អារម្មណ៍ត្រួតពិនិត្យថា តើវាមានរូបរាងពិតប្រាកដនៅលើផែនដីដែរឬទេ? ហើយហេតុអ្វីពុំមានអ្នកណាម្នាក់ធ្លាប់បានឃើញផ្កាប្រភេទនេះពីមុន ។ រូបភាពខាងលើមានអ្នកប្រើប្រាស់ហ្វេសប៊ុកចុច Like រហូតដល់ជាង៨ម៉ឺនលើក និងមានអ្នក Share រូបភាពរាប់ពាន់នាក់ ។ ក្រៅពីនេះ អ្នកប្រើប្រាស់ហ្វេសប៊ុកយ៉ាងច្រើនចាប់អារម្មណ៍ចង់ទិញពូជផ្កាមុខឆ្មាយកទៅដាំទៀតផង ។

តាមការត្រួតពិនិត្យបង្ហាញថា ហាងផ្កាបានលក់ពូជផ្កាមុខឆ្មាឱ្យអតិថិជននៅលើគេហទំព័រគួរឱ្យទុកចិត្តជាច្រើន គឺក្នុងតម្លៃចាប់ពី១៥ដុល្លារ ទៅ៣០ដុល្លារអាមេរិកក្នុង១គុម្ព ។ ប៉ុន្តែពូជផ្កាប្រភេទនេះ គ្មានដុះនៅកន្លែងណាទេលើផែនដី គឺវាគ្រាន់តែជារូបភាពបង្កើតឡើងដោយបច្ចេកវិទ្យា AI ប៉ុណ្ណោះ ។

គេហទំព័រមួយឈ្មោះ Snopes ធ្វើការផ្នែកស្រាវជ្រាវព័ត៌មានក្លែងក្លាយបញ្ជាក់ថា ដើមផ្កាមុខឆ្មា ឬ Cat’s Eye Dazzle ដែលបានបង្ហោះលើគេហទំព័រជាច្រើនថា មានច្រើនពូជនោះគ្មានភស្តុតាងបញ្ជាក់ថា វាជារុក្ខជាតិមានពិតប្រាកដលើផែនដីទេ ។ រីឯរូបភាពដើមផ្កាមុខឆ្មាក្នុងគេហទំព័រដែលគ្រប់គ្នានាំគ្នាចែកចាយនោះមើលទៅ ដូចឆ្មាខ្លាំងណាស់ ហើយមិនគួរជឿថា វាជាដើមផ្កាពិតប្រាកដទេ ។

ក្រោយមក មហាជនសន្និដ្ឋានថា ផ្កាមុខឆ្មាទាំងនេះជារូបភាពបង្កើតឡើងដោយបច្ចេកវិទ្យា AI ដើម្បីបោកប្រាស់លក់ឱ្យអតិថិជន ហើយហាងលក់ផ្កាទាំងនេះភាគច្រើនជាហាងនៅប្រទេសចិន ។ អតិថិជនម្នាក់បានចំណាយប្រាក់ទិញពូជផ្កាមុខឆ្មាយកមកដាំប្រាប់ថា ខ្លួនបានកុម្ម៉ង់ផ្កាចម្លែកនេះ ហើយហាងផ្កាក៏បានបញ្ជូនគ្រាប់ផ្កាមកឱ្យខ្លួន ប៉ុន្តែវាបែរជាចេញផ្កាផ្សេងទៅវិញ ។

កន្លងមក ជនខិលខូចធ្លាប់បានប្រើប្រាស់កម្មវិធីបច្ចេកវិទ្យាបោកប្រាស់អ្នកចូលចិត្តរុក្ខជាតិឱ្យទិញផ្កា ឬកូនរុក្ខជាតិគ្មានពិតប្រាកដ ។ ប៉ុន្តែបច្ចុប្បន្ន ពេលបច្ចេកវិទ្យា AI បានប្រើប្រាស់ទូលំទូលាយ វាធ្វើឱ្យមានការបង្កើតរូបភាពក្លែងក្លាយបោកប្រាស់កាន់តែច្រើន ៕

សហរដ្ឋអាមេរិក ៖ បុរសចំណាស់ម្នាក់ អាយុ៧០ឆ្នាំ រស់នៅសហរដ្ឋអាមេរិក សុខចិត្តចំណាយប្រាក់ប្រមាណជាង៤០០ដុល្លារអាមេរិកក្នុង១សប្តាហ៍ ដើម្បីជួលផ្ទាំងប៉ាណូនៅតាមផ្លូវប្រកាសស្វែងរកគូស្រករ ។ លោកបញ្ជាក់ថា លោករស់នៅម្នាក់ឯងយូរឆ្នាំហើយ លោកចង់ស្វែងរកនារីល្អម្នាក់ចេះយល់ចិត្ត យល់ថ្លើម និងពុំសម្លឹងមើលទ្រព្យសម្បត្តិ ។

សារព័ត៌មានបរទេស nypost រាយការណ៍ថា បុរសចំណាស់ខាងលើឈ្មោះ Al Gilberti អាយុ៧០ឆ្នាំ ជាបុរសពោះម៉ាយកូន១ រស់នៅរដ្ឋតិចសាស់ សហរដ្ឋអាមេរិក បានចំណាយប្រាក់ជាង៤០០ដុល្លារអាមេរិកក្នុង១សប្តាហ៍ ដើម្បីជួលផ្ទាំងប៉ាណូនៅតាមផ្លូវឱ្យផ្សព្វផ្សាយពីខ្លួនលោក ។

ការចំណាយប្រាក់ជួលផ្ទាំងប៉ាណូនេះ ទទួលបានការចាប់អារម្មណ៍យ៉ាងខ្លាំងពីសំណាក់មហាជន ហើយតាំងពីលោកផ្សព្វផ្សាយពីខ្លួនលោកនៅលើផ្ទាំងប៉ាណូមក លោកបានទទួលទូរស័ព្ទរហូតដល់ជាង៤០០លើក និងអ៊ីម៉ែល៥០លើក ក្នុងរយៈពេលត្រឹមតែ២សប្តាហ៍ប៉ុណ្ណោះ ។ មនុស្សភាគច្រើនដែលទូរស័ព្ទមករកលោក គឺពួកគេប្រាថ្នាចង់បានទ្រព្យសម្បត្តិ និងផលប្រយោជន៍ផ្សេងៗ ប៉ុន្តែលោកនៅតែសង្ឃឹមថា នឹងបានជួបនារីល្អណាម្នាក់នាពេលឆាប់ៗនេះ ។

លោក Al Gilberti និយាយថា លោកចង់បាននារីម្នាក់មានភាពស្មោះត្រង់ និងច្បាស់លាស់ចង់រស់នៅជាមួយលោក ហើយលោកនឹងផ្លាស់ទីលំនៅទៅកន្លែងណាក៏បាននៅអាមេរិក ដើម្បីស្វែងរកនារីក្នុងក្តីសុបិន ។ លើសពីនេះ លោកអាចធ្វើដំណើរទៅប្រទេសអង់គ្លេសផងដែរ បើលោករកឃើញស្នេហ៍ពិត ។

កាលពីមុន លោក Al Gilberti ធ្លាប់ធ្វើការជាអ្នកផ្សព្វផ្សាយឱ្យក្រុមតន្ត្រីមកពី Burlington នៅរដ្ឋ Vermont ហើយបច្ចុប្បន្ន ការចាយវាយប្រចាំថ្ងៃរបស់លោក គឺបានពីប្រាក់ចូលនិវត្តន៍ ។ រីឯគុណសម្បត្តិវិញ គឺលោកជាមនុស្សមានចិត្តទូលាយ និងជាអ្នកស្តាប់ដ៏ល្អ ។

លោកនិយាយថា ៖ «ខ្ញុំបានទទួលប្រាក់ចូលនិវត្តន៍, មានរូបរាងសង្ហា ហើយខ្ញុំមិនគិតពីអាយុទេ ។ ខ្ញុំជាមនុស្សចិត្តទូលាយ ខណៈមនុស្សចាស់ភាគច្រើនមានចិត្តចង្អៀតចង្អល់ តែខ្ញុំមិនមែនជាមនុស្សបែបនោះទេ ។ ខ្ញុំរស់នៅម្នាក់ឯងតាំងពីឆ្នាំ២០១៥ មកម៉្លេះ ខ្ញុំរីករាយនឹងទទួលយកនារីមានអាយុតិចជាងមកធ្វើជាភរិយា» ៕

ប្រទេសចិន៖ ជាមួយនឹងការងារត្រឹមតែ ២ ម៉ោងនៃគម្រោងធ្វើឱ្យប្រសើរឡើងនូវស្ពាន និងការសម្របសម្រួលពីអ្នកបច្ចេកទេស ៤០ នាក់និងគ្រឿងចក្រទំនើបៗជាច្រើន ប្រអប់ដែកនៅផ្នែកខាងឆ្វេងនៃស្ពានមានប្រវែង ៣២.៩៤ ម៉ែត្រ និងទម្ងន់ ២១៨.៤ តោន ត្រូវបានដាក់ក្នុងទីតាំងរចនាដើមយ៉ាងត្រឹមត្រូវបំផុត។
ស្ពាន Harbin West ត្រូវបានសាងសង់រួចរាល់ហើយកាលពីឆ្នាំ ១៩៨៩ ដែលបម្រើជាស្ពានឆ្លងកាត់ក្រុងដ៏សំខាន់មួយសម្រាប់ផ្លូវដែក Harbin-Suifenhe ដែលមានរចនាសម្ព័ន្ធបីជាន់៖ ខាងលើ ផ្លូវថ្នល់គឺជាផ្លូវចាស់បំផុតនៅភាគខាងលិចនៃទីក្រុង Harbin ដែលត្រូវបានគេស្គាល់ថា “Xidazhi Avenue” ; ខាងក្រោម ខ្សែបូព៌ាជាប្រវត្តិសាស្ត្រនៃផ្លូវដែក Harbin-Suifenhe បានដំណើរការអស់រយៈពេលជាង ១២០ ឆ្នាំមកហើយ។

ក្រោយមកផ្នែកទីមួយនៃខ្សែរថភ្លើង Harbin Metro Line 1 ឆ្លងកាត់ក្រោមស្ពានត្រូវបានខូចខាតដោយសារវាចាស់ពេក ហើយត្រូវបានគេជួសជុលប៉ុន្តែការជួសជុលស្ពានចាស់ឱ្យក្លាយជាស្ពានថ្មីនេះចំណាយពេលត្រឹមតែ ២ ម៉ោងប៉ុណ្ណោះ។ លោក He Ruiping ដែលជាប្រធានអ្នករចនាគម្រោងធ្វើឱ្យប្រសើរឡើងនូវស្ពាន Harbin West Bridge បាននិយាយថា នៅម៉ោង ២ រសៀលនាថ្ងៃទី ២៩ ខែមេសា ឆ្នាំ២០២៤ នេះគម្រោងធ្វើឱ្យប្រសើរឡើងនូវស្ពាន Harbin West ក្នុងប្រទេសចិនបានឈានដល់ដំណាក់កាលជួសជុលដ៏សំខាន់មួយ។ នេះជាផ្នែកមួយនៃផែនការកែលម្អហេដ្ឋារចនាម្ព័ន្ធក្នុងការត្រៀមខ្លួនសម្រាប់ព្រឹត្តិការណ៍ Asian Winter Games ឆ្នាំ ២០២៤ នៅទីក្រុងនេះ។

ជាមួយនឹងការងារត្រឹមតែ ២ ម៉ោង និងការសម្របសម្រួលពីអ្នកបច្ចេកទេស ៤០ នាក់ និងគ្រឿងចក្រទំនើបៗ ប្រអប់ដែកនៅផ្នែកខាងឆ្វេងនៃស្ពានមានប្រវែង ៣២.៩៤ ម៉ែត្រ និងទម្ងន់ ២១៨.៤ តោន ត្រូវបានដាក់ក្នុងទីតាំងត្រឹមត្រូវតាមការរចនាដើមជាមួយនឹងភាពជាក់លាក់ដ៏អស្ចារ្យ។ លោក He Ruiping បានបន្តទៀតថា ទោះជាយ៉ាងណាការរចនាដើមនៃស្ពាននេះលែងបំពេញតាមស្តង់ដារ និងលក្ខណៈបច្ចេកទេសបុរាណទៀតហើយ។ ដោយយោងទៅលើស្តង់ដារ និងទិន្នន័យនៃការរចនាស្ពានចាប់ពីឆ្នាំ ១៩៨៥ មក ក្រុមអ្នករចនាបានប្រើប្រាស់ស្តង់ដារ និងបច្ចេកទេសថ្មី ដើម្បីជំនួសស្ពានចាស់យ៉ាងឆាប់រហ័ស ដោយកាត់បន្ថយផលប៉ះពាល់សំណង់លើផ្លូវដែក និងចរាចរណ៍។

នេះជាគំរូជាក់ស្តែងសម្រាប់ការប្រែក្លាយស្ពានផ្លូវរថភ្លើងចាស់ប្រសព្វផ្លូវក្នុងទីក្រុងធំៗរបស់ប្រទេសចិនដែលមានប្រជាជនរាប់លាននាក់។ គួរបញ្ជាក់ដែរថា ស្ពាននេះត្រូវបានគេរំពឹងថានឹងរួចរាល់សម្រាប់ចរាចរណ៍នៅពាក់កណ្តាលខែឧសភា ដែលបង្កើនសមត្ថភាពចរាចរណ៍នៃសរសៃឈាមកណ្តាលទីក្រុងយ៉ាងសំខាន់។ ការអភិវឌ្ឍន៍នេះនឹងផ្តល់នូវលក្ខខណ្ឌធ្វើដំណើរប្រសើរឡើងសម្រាប់ពិព័រណ៍សេដ្ឋកិច្ច និងពាណិជ្ជកម្មអន្តរជាតិ Harbin នាពេលខាងមុខ និងព្រឹត្តិការណ៍ Asian Winter Games ឆ្នាំ ២០២៥៕

ប្រទេសមីយ៉ាន់ម៉ា ៖ កាលពីថ្ងៃទី២ ខែឧសភា ឆ្នាំ២០២៤ សារព័ត៌មានបរទេសរាយការណ៍ថា អាកាសធាតុក្តៅខ្លាំងអស់រយៈពេលជាច្រើនថ្ងៃបានធ្វើឱ្យពលរដ្ឋមីយ៉ាន់ម៉ាស្លា.ប់ រហូតដល់៤០នាក់ក្នុង១ថ្ងៃ ហើយក្នុងខែមេសាមួយប៉ុណ្ណោះ មានពលរដ្ឋស្លា.ប់ សរុបដោយសារអាកាសធាតុក្តៅស្មើនឹង១.៤៧៣នាក់ ។

សីតុណ្ហភាពកើនឡើងខ្ពស់នៅតំបន់អាស៊ីអាគ្នេយ៍ ជាពិសេស ប្រទេសមីយ៉ាន់ម៉ា បានធ្វើឱ្យពលរដ្ឋមីយ៉ាន់ម៉ាស្លាប់ជាមធ្យមចំនួន៤០នាក់ក្នុង១ថ្ងៃ ចាប់ពីពាក់កណ្តាលខែមីនា ឆ្នាំ២០២៤ ។ បើតាមតួលេខរបស់មន្ត្រីសុខាភិបាល និងស្ថាប័នរៀបចំបុណ្យសពបង្ហាញថា នៅខែមេសាមួយប៉ុណ្ណោះ មានមនុស្សស្លាប់ដោយសារអាកាសធាតុក្តៅខ្លាំង យ៉ាងហោចណាស់ ១.៤៧៣នាក់ ។

ក្រុមសេវារថយន្តសង្គ្រោះ និងស្ម័គ្រចិត្ត (M-Rescue Corps) និយាយថា ទីក្រុង Mandalay ស្ថិតនៅភាគកណ្តាលប្រទេសមីយ៉ាន់ម៉ា មានមនុស្សស្លាប់ដោយសារអាកាសធាតុក្តៅខ្លាំងស្មើប្រមាណ៩០០នាក់នៅខែមេសា ឆ្នាំ២០២៤ ក្នុងអំឡុងពេលរលកកំដៅខ្ពស់រយៈពេល២ ទៅ៣ថ្ងៃកន្លងមក ។ ពលរដ្ឋនៅទីក្រុង Mandalay បានស្លាប់ក្នុងអំឡុងពេលដើរ និងបើកបរយានជំនិះនៅតាមផ្លូវ ។

ចំណែកនៅទីក្រុងយ៉ាំងហ្គោន ជាមជ្ឈមណ្ឌលពាណិជ្ជកម្មដ៏ធំរបស់មីយ៉ាន់ម៉ា ភ្នាក់ងាររៀបចំពិធីបុណ្យសពដោយមិនគិតថ្លៃរាយការណ៍ថា មានមនុស្សស្លាប់ដោយសារអាកាសធាតុក្តៅខ្លាំង ចំនួន៤៤១នាក់ នៅខែមេសា ឆ្នាំ២០២៤ គឺខ្ពស់ជាងខែមីនា ដែលស្មើត្រឹមតែ៣៤០នាក់ ។ រីឯនៅតំបន់ Magway អ្នកស្លាប់ភាគច្រើនជាមនុស្សចាស់ ឬមានជំងឺរ៉ាំរ៉ៃ ដូចជា ៖ ជំងឺលើសឈាម និងទឹកនោមផ្អែម ខណៈតំបន់ Sagaing មានយុវជនកើតជំងឺដាច់សរសៃឈាមខួរក្បាល ។

រីឯពលរដ្ឋទូទៅដែលត្រូវចេញទៅបំពេញការងារនៅខាងក្រៅក្នុងពេលអាកាសធាតុក្តៅខ្លាំង ក៏បានប្រឈមនឹងបញ្ហាផ្សេងៗផងដែរ ដូចជា ៖ កំដៅថ្ងៃ, ខ្វះខាតទឹក និង ឈឺពោះ ។ បើទោះជាពលរដ្ឋមីយ៉ាន់ម៉ាស្លាប់ដោយសារអាកាសធាតុក្តៅកើនឡើងក្តី ប៉ុន្តែក្រសួងសុខាភិបាលរបស់រដ្ឋាភិបាលយោធាពុំបានប្រកាសពីចំនួនមនុស្សស្លាប់ពាក់ព័ន្ធនឹងអាកាសធាតុក្តៅខ្លាំង និងពុំឆ្លើយតបសំណួររបស់ក្រុមសារព័ត៌មានទេ ៕