អ្នកគាំទ្រ Queen of Tears ស្រមៃថាពិធីមង្គលការក្នុងរឿងរបស់ Kim Soo Hyun និង Kim Ji Won នឹងក្លាយជាពិធីមង្គលការជីវិតពិត

ជឿជាក់ថាអ្នកតាមដានវិស័យរឿងភាគមួយចំនួនធំធ្លាប់ប្រាថ្នាចង់ឱ្យតួឯកនៅក្នុងរឿងដូចទៅក្នុងជីវិតពិតរបស់ពួកគេជាពិសេសអ្នកគាំទ្ររឿងភាគកូរ៉េតែម្តង។ ជាក់ស្តែង តារាសម្តែងKim Soo Hyun និង Kim Ji Won កាន់តែមានប្រជាប្រិយភាពខ្លាំងបន្ទាប់ពីសម្តែងជាមួយគ្នាខណៈអ្នកគាំទ្រជាច្រើនប្រាថ្នាថាពួកគេនឹងជួបគ្នាក្នុងជីវិតពិតដូចជា Hyun Bin និង Son Ye Jin បន្ទាប់ពីសម្តែងរឿង Crash Landing On You ខណៈរឿងទាំងពីរត្រូវបានសរសេរដោយអ្នកនិពន្ធតែមួយគឺ Park Ji-eun ។

តួសម្តែង និងក្រុមការងាររបស់ Queen of Tears បានប្រមូលផ្តុំគ្នានៅឯកន្លែងសាច់អាំងកូរ៉េរួមគ្នាកាលពីថ្ងៃសៅរ៍ (២៧ មេសា) ដើម្បីអបអរសាទរភាពជោគជ័យរឿងរបស់ពួកគេ និងដើម្បីទស្សនាភាគទី ១៥ របស់រឿង។ តារាសម្តែង Jang Yoon Ju បានបង្ហោះរូបភាពក្នុងការជួបជុំនេះហើយនៅក្នុងនោះ Kim Soo Hyun និង Kim Ji Won ត្រូវបានគេឃើញកំពុងកាត់នំខេកជាមួយគ្នា។ អ្នកនិយមលេងអ៊ីនធឺណិតជាច្រើននិយាយថាពួកគេកំពុងស្រមៃយកនំខេកទៅជា “នំអាពាហ៍ពិពាហ៍ពិត” របស់តួឯកទាំងពីរផងដែរ។

Queen of Tears ឥឡូវនេះគឺជារឿងដែលមានការវាយតម្លៃខ្ពស់បំផុតរបស់ tvN ដោយបានយកឈ្នះលើការវាយតម្លៃរបស់អ្នកទស្សនានៃរឿងភាគដែលល្បីខ្លាំងផ្សេងទៀតរួមទាំង Crash Landing on You (២០១៩) និង Goblin (២០១៦)។

Kim Soo Hyun មានអាយុ៣៦ឆ្នាំបានបង្ហាញខ្លួនជាលើកដំបូងលើកញ្ចក់ទូរទស្សន៍ក្នុងឆ្នាំ ២០០៧ ហើយចាប់តាំងពីពេលនោះមកបានក្លាយជាតួអង្គលេចធ្លោតាមរយៈរឿងភាគជោគជ័យដូចជា «Dream High», ,«My Love from the Star» «It’s Okay to Not Be Okay» និងរឿងចុងក្រោយនេះ «Queen of Tears»។ បច្ចុប្បន្ននេះ Kim Soo Hyun បានក្លាយជាតារាសម្តែងដែលរកចំណូលបានច្រើនជាងគេនៅក្នុងប្រទេសកូរ៉េខាងត្បូង ដោយរក្សាបានប្រាក់ឈ្នួលជាមធ្យមខ្ពស់បំផុតក្នុងមួយវគ្គក្នុងចំណោមតារាសម្ដែងអស់រយៈពេលជាច្រើនឆ្នាំ ជាមួយនឹងអត្រាដ៏គួរឱ្យចាប់អារម្មណ៍ចំនួន ១៦៥,០០០ ដុល្លារអាម៉េរិកក្នុងមួយភាគ។ តារាសម្តែងរូបនេះមានទ្រព្យសម្បត្តិសរុបប្រមាណ ១១៧ លានដុល្លារអាម៉េរិក ដែលរួមមានការកាន់កាប់អចលនទ្រព្យចម្រុះ រថយន្តទំនើប និងភាគហ៊ុននៅក្នុងក្រុមហ៊ុនផ្សេងៗ។

Kim Ji Won មានអាយុ ៣២ ឆ្នាំបានចូលប្រឡូកក្នុងវិស័យកម្សាន្តក្នុងឆ្នាំ ២០១៨ ហើយបានឡើងល្បីល្បាញយ៉ាងឆាប់រហ័សតាមរយៈការសម្តែងរបស់នាងនៅក្នុងរឿងភាគទូរទស្សន៍មួយចំនួនជាពិសេសចុងក្រោយនេះបានគ្រងតំណែងជាតួឯកស្រីក្នុងរឿង «Queen of Tears»។ តារាស្រីរូបនេះត្រូវបានសាទរចំពោះកេរ្តិ៍ឈ្មោះគំរូរបស់នាង ការលះបង់ និងកំណត់ត្រាដែលមិនចេះរីងស្ងួត និងគ្មានភាពចម្រូងចម្រាស៕