អាកាសធាតុក្តៅកំពុងឡើងកម្តៅខ្លាំងនៅទូទាំងទ្វីប ស្របពេលដែលឧ.បទ្ទវ.ហេតុអគ្គី.ភ័យឆាបឆេះចេះតែបន្តកើតមានឥតល្ហែរ មិនថាយាន្តជំនិះ លំនៅដ្ឋាន និងសូម្បីតែរោងចក្រធំៗ បើប្រហែសតែបន្តិច នឹងសល់ត្រឹមតែផេះមិនខាន។ កាលពីថ្ងៃទី១ ខែឧសភានេះ ត្រូវនឹងដើមខែថ្មី ទាំងថៃ ទាំងវៀតណាម ជាអកុសលបានជួបនៅហេតុការណ៍ឆាបឆេះនេះដូចគ្នា ហើយនៅតែមិនទាន់រកឃើញមូលហេតុឲ្យបានពិតប្រាកដនៅឡើយនោះទេ។

យោងតាមប្រភពសារព័ត៌មាន Thai PBS បានឲ្យដឹងថាមានករណីអគ្គីភ័យឆាបឆេះរោងចក្រកែច្នៃក្រដាសអេតចាយមួយន្លែងនៅខេត្តសាមុតសាខុនប្រទេសថៃ ដែលឧបទ្ទវហេតុនេះបានកើតឡើងនៅល្ងាចថ្ងៃទី៣០ ខែមេសា និងបន្តឆេះរយៈពេល៣ថ្ងៃ រហូតមកដល់ថ្ងៃទី២ ខែឧសភា បើតាមសេចក្តីរាយការណ៍។

អគ្គីភ័យបាននឹងកំពុងឆាបឆេះរោងចក្រកែច្នៃក្រដាសអេតចាយដ៏ធំមួយរបស់ថៃ ស្ថិតនៅលើផ្ទៃដី ១,៧៦ ហិកតា បើតាមការប៉ាន់ស្មានតម្លៃដែលខូចខាតកាលពីម្សិលមិញនេះបានឲ្យដឹងថា ខាតបង់អស់ប្រាក់ប្រមាណនឹង ១៨០ លានបាត (៤លាន៩សែនដុលា្លរ)។ ខណៈភ្នាក់ងារពន្លត់អគ្គីភ័យបានជួយគ្នាយ៉ាងសស្រាក់សស្រាន ដើម្បីពន្លត់ភ្លើងដែលឆាបឆេះឲ្យបានឆាប់រហ័សបំផុតផងដែរ។

រីឯកាលពីថ្ងៃទី១ ខែឧសភានេះដូចគ្នា សារព័ត៌មានវៀតណាមបានចុះផ្សាយថា ករណីផ្ទុះរោងចក្រឈើមួយកន្លែង នៅភាគខាងត្បូងប្រទេសវៀតណាម បានសម្លាប់មនុស្ស ៦ នាក់ និង ៧ នាក់ទៀតរងរបួស។ ឧបទ្ទវហេតុនេះបានកើតឡើងនៅម៉ោងប្រហែល ៨ ព្រឹកនៅឯក្រុមហ៊ុនផលិតឈើ Binh Minh ក្នុងខេត្ត Dong Nai ដោយប្រព័ន្ធផ្សព្វផ្សាយវៀតណាមបានរាយការណ៍ថាវាបណ្តាលមកពីឡចំហាយដំណើរការខុសប្រក្រតី។ ទោះជាយ៉ាងណា សមត្ថកិច្ចគឺកំពុងតែបន្តការស៊ើបអង្កេតបន្ថែមលើករណីនេះ។

យោងតាមសាក្សីម្នាក់ដែលដកស្រង់ដោយគេហទំព័រព័ត៌មាន VNExpress បាននិយាយថា “មកដល់កន្លែងនោះ ខ្ញុំបានឃើញទិដ្ឋភាពដ៏រន្ធត់មួយ៖ កំទេចកំទីបានរាយប៉ាយនៅគ្រប់ទីកន្លែង ហើយសាកសពជាច្រើនដេកនៅក្នុងទីធ្លា” ។ រូបថតប្រព័ន្ធផ្សព្វផ្សាយរដ្ឋនៃទីតាំង ដែលបុគ្គលិកប្រហែល ៣០ នាក់កំពុងធ្វើការនៅពេលនោះ បានបង្ហាញថាផ្នែកមួយនៃអគារបានដួលរលំ ដោយមានដំបូលដែកជ្រុងបានធ្លាក់មកដី។

តាមរយៈឧបទ្ទវហេតុនេះ អភិបាលខេត្តវៀតណាមបានចូលរួមរំលែកទុក្ខ និងឧបត្ថម្ភថវិកាដល់គ្រួសារជនរងគ្រោះ (២០លានដុង ឬ ៧៨៩ដុល្លារ សម្រាប់អ្នកមរណភាពក្នុងម្នាក់ និង១០លានដុង ឬ៣៩៥ដុល្លារ សម្រាប់អ្នករបួសក្នុងម្នាក់)៕

ប្រទេសឥណ្ឌូណេស៊ី ៖ កាលពីថ្ងៃទី៣០ ខែមេសា ឆ្នាំ២០២៤ ភ្នំភ្លើងនៅប្រទេសឥណ្ឌូណេស៊ីបានផ្ទុះឡើងជាប់ៗគ្នាចំនួន៣លើក ជាហេតុធ្វើឱ្យអាជ្ញាធរជម្លៀសពលរដ្ឋចំនួន១២.០០០នាក់ចេញពីតំបន់ភ្នំភ្លើង និងប្រកាសបិទអាកាសយានដ្ឋាននៅក្បែរនោះចំនួន៧កន្លែង ។ ការផ្ទុះភ្នំភ្លើងជាញឹកញាប់បណ្តាលឱ្យមានផ្សែងភ្លើងហោះទៅដល់ប្រទេសម៉ាឡេស៊ីផងដែរ ។

សារព័ត៌មាន AFP រាយការណ៍ថា ភ្នំភ្លើង Ruang នៅឥណ្ឌូណេស៊ីបានផ្ទុះចំនួន៣លើក ដែលបណ្តាលឱ្យផ្សែងភ្លើងហោះឡើងទៅលើរហូតដល់ជាង៥គីឡូម៉ែត្រ ហើយអាជ្ញាធរបានប្រកាសឱ្យពលរដ្ឋនៅក្បែរតំបន់នេះ ចំនួន១២.០០០នាក់ ប្រញាប់ជម្លៀសចេញជាបន្ទាន់ ។

ភ្នាក់ងារជួយសង្គ្រោះបានជួយពលរដ្ឋរាប់ពាន់នាក់នៅកោះក្បែរនោះ ដូចជា ៖ កោះ Tagulandang ស្ថិតនៅភាគខាងជើង រហូតដល់កោះ Siau ដោយសារកាកសំណល់ឆេះរបស់ភ្នំភ្លើងធ្លាក់ចូលក្នុងទឹកសមុទ្រ ហើយអាជ្ញាធរបារម្ភខ្លាចកើតរលកយក្សស៊ូណាមិ ។

នាយកដ្ឋានឧតុនិយមឥណ្ឌូណេស៊ីឱ្យដឹងថា ផ្សែងភ្លើង និងកំទេចកំទីភ្នំភ្លើងបានហោះឆ្ងាយទៅដល់ភាគខាងកើតប្រទេសម៉ាឡេស៊ី នៅកោះ Borneo ដែលមានផ្ទៃដីខ្លះជារបស់ឥណ្ឌូណេស៊ី និងព្រុយណេ ។

តាមការប្រកាសរបស់ AirNav Indonesia ភ្នាក់ងារគ្រប់គ្រងចរាចរណ៍ផ្លូវអាកាសឥណ្ឌូណេស៊ីបញ្ជាក់ថា ផ្សែងភ្លើង និងកំទេចកំទីដែលហោះសាយភាយពេញអាកាសនេះ បានធ្វើឱ្យឥណ្ឌូណេស៊ីប្រកាសបិទអាកាសយានដ្ឋាន៧កន្លែងនៅក្បែរគ្នា រួមទាំងអាកាសយានដ្ឋានធំបំផុតនៅទីក្រុង Manado និងទីក្រុង Gorontalo ។

Julius Ramopoli ជាប្រធានឃ្លាំមើលភ្នំភ្លើង Ruang និយាយថា ភ្នំភ្លើងនៅតែបញ្ចេញផ្សែងភ្លើងយ៉ាងច្រើន កាលពីថ្ងៃទី១ ខែឧសភា ហើយផ្សែងភ្លើងទាំងនេះបានហោះឡើងលើចាប់ពី៥០០ម៉ែត្រ ទៅ៦០០ម៉ែត្រ ។

ប្រធានឃ្លាំមើលភ្នំភ្លើង Ruang បញ្ជាក់ថា ការប្រកាសអាសន្ននៅតែស្ថិតក្នុងកម្រិតខ្ពស់ គឺកម្រិតទី៤ ហើយសូមពលរដ្ឋនៅឱ្យឆ្ងាយពីតំបន់កើតហេតុ យ៉ាងហោចណាស់៧គីឡូម៉ែត្រ ។ កន្លងមក ឥណ្ឌូណេស៊ីតែងតែជួបបញ្ហាគ្រោះរញ្ជួយដី និងភ្នំភ្លើងផ្ទុះជាច្រើនលើក ដោយសារប្រទេសនេះស្ថិតនៅលើខ្សែបន្ទាត់ភ្នំភ្លើង ៕

បរទេស៖ យោងតាមការវិភាគថ្មីមួយដោយ Rhodium Group បានឱ្យដឹងថា សហភាពអឺរ៉ុបនឹងដំឡើងពន្ធរហូតដល់ ៥៥% លើរថយន្តអគ្គិសនីរបស់ចិន ដើម្បីទប់ស្កាត់ការនាំចូលរបស់ពួកគេ ដោយសារ BYD បានផ្តួលក្រុមហ៊ុនជាច្រើននៅអឺរ៉ុបធ្វើឱ្យមានការខាតបង់ច្រើន។
យោងតាម CNBC ដែលបានចេញផ្សាយកាលពីថ្ងៃទី១ ខែឧសភា ឆ្នាំ២០២៤ ថាដំបូងឡើយសហភាពអឺរ៉ុបគ្រោងនឹងដំឡើងពន្ធត្រឹមតែ ១៥% ទៅ ៣០% ប៉ុណ្ណោះលើរថយន្ត EV របស់ចិន ប៉ុន្តែក្រុមហ៊ុន Rhodium Group បាននិយាយថា អត្រាពន្ធនេះមិនគ្រប់គ្រាន់ដើម្បីគ្រប់គ្រងការប្រកួតប្រជែងពីប្រទេសចិននោះទេ។ របាយការណ៍បានបន្តថា៖ «បើទោះជាពន្ធត្រូវបានអនុវត្តនៅក្នុងខែនេះក៏ដោយ ក៏អ្នកផលិតចិនមួយចំនួននៅតែអាចនាំចេញរថយន្តទៅអឺរ៉ុបបានយ៉ាងស្រួលដោយសារគុណប្រយោជន៍តម្លៃដ៏សំខាន់របស់ពួកគេ ធ្វើឱ្យពួកគេរកប្រាក់ចំណេញបានកាន់តែច្រើន»។

គួររំលឹកដែរថា កាលពីកន្លងទៅក្រុមហ៊ុនចិន BYD បានវ៉ាដាច់ Tesla ដើម្បីក្លាយជាក្រុមហ៊ុនផលិតរថយន្តអគ្គិសនីដ៏ធំបំផុតរបស់ពិភពលោក ហើយអាចលក់រថយន្តក្នុងអត្រាខ្ពស់ជាងនៅក្នុងតំបន់អឺរ៉ុប ទោះបីជាពួកគេត្រូវបង់ពន្ធ ១០% ក៏ដោយ។ បច្ចុប្បន្ននេះ ក្រុមហ៊ុនផលិតរថយន្តអគ្គិសនីរបស់ចិនកំពុងចូលរួមក្នុងសង្គ្រាមតម្លៃដ៏ខ្លាំងក្លានៅទីផ្សារអឺរ៉ុប។ យោងតាមក្រុមហ៊ុន Rhodium Group ម៉ូដែល Seal U របស់ BYD ដែលលក់ក្នុងតម្លៃ ២០,៥០០ ដុល្លារនៅក្នុងប្រទេសចិន និង ៤២,០០០ ដុល្លារនៅសហភាពអឺរ៉ុប ត្រូវបានគេប៉ាន់ប្រមាណថានឹងនាំមកនូវប្រាក់ចំណេញចំនួន ១,៣០០ ដុល្លារក្នុងមួយផលិតផលនៅក្នុងទីផ្សារក្នុងស្រុក បើធៀបនឹង ១៤,៣០០ ដុល្លារនៅអឺរ៉ុប។ សូម្បីតែបន្ទាប់ពីដាក់ពន្ធ ៣០% ក្រុមហ៊ុនដូចជា BYD នឹងនៅតែទទួលបានប្រាក់ចំណេញខ្ពស់ជាងនៅក្នុងទីផ្សារសហភាពអឺរ៉ុប។

ដូច្នេះបើយោងតាមក្រុមហ៊ុន Rhodium Group ការអនុវត្តអត្រាពន្ធខ្ពស់ប្រហែល ៤៥% ឬ ៥៥% គឺអាចប្រកួតប្រជែងនឹងទីផ្សារចិនបានយ៉ាងងាយ ដោយសារអត្រាពន្ធខ្ពស់ក្រុមហ៊ុនចិននឹងកាត់បន្ថយការនាំចូលផលិតផលរបស់ខ្លួនទៅអឺរ៉ុប ធ្វើឱ្យទីផ្សារអឺរ៉ុបអាចដំណើរការល្អឡើងវិញ។ ហេតុនេះហើយ ប្រសិនបើអឺរ៉ុបដំឡើងពន្ធ ៥៥% ពិតមែនរថយន្តអគ្គិសនីរបស់ក្រុមហ៊ុនចិនត្រូវបានគេរំពឹងថានឹងមានចំនួនត្រឹមតែ ១១% នៃចំណែកទីផ្សារសហភាពអឺរ៉ុបក្នុងឆ្នាំ ២០២៤ ប៉ុណ្ណោះ នេះបើយោងតាមការវិភាគរបស់សហព័ន្ធដឹកជញ្ជូន និងបរិស្ថានអឺរ៉ុប។

ទោះជាយ៉ាងណា ដើម្បីទប់ទល់នឹងហានិភ័យគោលនយោបាយអឺរ៉ុប ក្រុមហ៊ុនផលិតរថយន្តអគ្គិសនីបច្ចុប្បន្នកំពុងខិតខំប្រឹងប្រែងដើម្បីផ្លាស់ទីផលិតកម្មទៅអឺរ៉ុប ដោយ BYD គ្រោងនឹងសាងសង់រោងចក្រនៅប្រទេសហុងគ្រី។ ទោះជាយ៉ាងណាក៏ដោយ ក្រុមហ៊ុន Rhodium Group បានបន្ថែមថា សហភាពអឺរ៉ុបអាចប្រើប្រាស់មធ្យោបាយផ្សេងៗដើម្បីការពារឧស្សាហកម្មរថយន្តអគ្គិសនីរបស់អឺរ៉ុប ដូចជាការដាក់កម្រិតលើការនាំចូលពីប្រទេសចិនសម្រាប់ហេតុផលសន្តិសុខជាតិ ឬការបង្កើនប្រាក់ឧបត្ថម្ភសម្រាប់អ្នកប្រើប្រាស់ក្នុងការជ្រើសរើសរថយន្តដែលផលិតនៅក្នុងសហភាពអឺរ៉ុប៕

នៅថ្ងៃទី១ ខែឧសភានេះ ផ្លូវហាយវេមួយស្ថិតនៅភាគខាងត្បូងប្រទេសចិនបានបាក់ស្រុត និងបណ្តាលឱ្យមនុស្សយ៉ាងហោចណាស់ ២៤ នាក់បានបាត់បង់ជី.វិត បន្ទាប់ពីតំបន់នេះបានជួបប្រទះភ្លៀងធ្លាក់ខ្លាំងក្នុងរយៈពេលប៉ុន្មានថ្ងៃថ្មីៗនេះ។

យោងតាមសេចក្តីថ្លែងការណ៍របស់អាជ្ញាធរក្នុងទីក្រុង Meizhou ក្នុងខេត្ត Guangdong ប្រទេសចិន បានឲ្យដឹងថា រថយន្តប្រមាណ ១៨ គ្រឿងបានធ្លាក់ចុះក្រោម បន្ទាប់ពីផ្លូវហាយវេមួយនេះបានបាក់។ សាក្សីនៅកន្លែងកើតហេតុក៏បានផ្តល់នូវកិច្ចសម្ភាសន៍ប្រាប់សារព័ត៌មានក្នុងស្រុកថា ពួកគេបានឮសំឡេងយ៉ាងខ្លាំង ខណៈក្រឡេកទៅបានប្រទះឃើញរថយន្តជាច្រើនគ្រឿងបានធ្លាក់ចុះទៅក្រោមបាត់ទៅហើយ។

វីដេអូ និងរូបថតនៅក្នុងប្រព័ន្ធផ្សព្វផ្សាយក្នុងស្រុកបានបង្ហាញពីផ្សែង និងអណ្តាតភ្លើងនៅកន្លែងកើតហេតុ និងមើលឃើញពីជម្រាលនៃផ្លូវហាយវេនេះបាក់បានយ៉ាងច្បាស់។ ជាមួយគ្នានេះ ក្រុមអ្នកជួយសង្គ្រោះបាននាំមនុស្សប្រមាណ ៣០ នាក់ទៅកាន់មន្ទីរពេទ្យ ខណៈមនុស្ស២៤នាក់ត្រូវបានគេសម្មត់ថាបានបាត់បង់ជីវិតទៅហើយផងដែរ៕

ប្រទេសថៃ ៖ ក្រសួងគមនាគមន៍ថៃឱ្យដឹងថា ស្ពានមិត្តភាពថ្មីរវាងប្រទេសថៃ និងឡាវ គ្រោងដំណើរការនៅខែវិច្ឆិកា ឆ្នាំ២០២៤នេះ សម្រាប់ជាចំណុចឆ្លងដែនថ្មីរវាងប្រទេសទាំងពីរ ។ នៅពេលស្ពាននេះដំណើរការ វានឹងជួយលើកកម្ពស់ផ្នែកសេដ្ឋកិច្ច, ទេសចរណ៍, ពាណិជ្ជកម្មរវាងថៃ ឡាវ វៀតណាម និងចិន ។

លោកស្រី Monphon Charoensri អនុរដ្ឋមន្ត្រីក្រសួងគមនាគមន៍ថៃលើកឡើងថា ស្ពានមិត្តភាពថៃ-ឡាវ នឹងតភ្ជាប់ពីឃុំចំនួន៣ ក្នុងស្រុកបឹងកាន ប្រទេសថៃ ជាមួយទីក្រុងប៉ាកសាន ប្រទេសឡាវ នឹងដំណើរការនៅខែវិច្ឆិកា ឆ្នាំ២០២៤ ។ គម្រោងសាងសង់ស្ពានមិត្តភាពថៃ-ឡាវ មានប្រវែង១,៣៥គីឡូម៉ែត្រឆ្លងកាត់ទន្លេមេគង្គ គឺមានគោលដៅជំរុញប្រព័ន្ធដឹកជញ្ជូនផលិតផលរវាងប្រទេសថៃ និងឡាវ ។

លោកស្រីបន្តទៀតថា ស្ពានថ្មីនេះនឹងអាចជួយកាត់បន្ថយការចំណាយដើមទុន និងពេលវេលានៃការដឹកជញ្ជូនផលិតផលរវាងប្រទេសទាំងពីរ ។ ក្រៅពីនេះ វានឹងផ្តល់ផលប្រយោជន៍ដល់ផ្នែកភស្តុភារ និងវិស័យទេសចរណ៍ផងដែរ ។

ក្រសួងគមនាគមន៍ថៃរំពឹងថា នឹងមានកំណើនការវិនិយោគ និងឱកាសការងារបន្ថែមទៀត រួមទាំងការពង្រីកទីក្រុងបឹងកាន តាមរយៈការអភិវឌ្ឍ និងតភ្ជាប់ជាមួយប្រទេសវៀតណាម និងតំបន់ភាគខាងត្បូងចិន ។ ក្រោយពីស្ពាននេះសាងសង់រួចរាល់ គម្រោងអភិវឌ្ឍន៍ហេដ្ឋារចនាសម្ព័ន្ធដើម្បីជំរុញកំណើនប្រកបដោយចីរភាពក្នុងខេត្តជាប់ព្រំដែនថៃ-ឡាវ ចំនួន៤ នឹងដំណើរការជាបន្តបន្ទាប់ ។

បច្ចុប្បន្ន គម្រោងសាងសង់ស្ពានថ្មីបានសម្រេចប្រមាណ៨០% ហើយប្រទេសថៃរំពឹងថា ពេលស្ពាននេះដំណើរការ វានឹងក្លាយជាចំណុចឆ្លងកាត់ព្រំដែនថ្មី ព្រមទាំងជំរុញការពង្រីកសេដ្ឋកិច្ច, ពាណិជ្ជកម្ម, ការវិនិយោគ និងវិស័យទេសចរណ៍ថៃ-ឡាវ ក៏ដូចជាការដឹកជញ្ជូនផលិតផលពីថៃទៅកាន់តំបន់ខាងត្បូងប្រទេសចិន ៕

ទំព័រហ្វេសប៊ុករបស់ Office of the Consumer Protection Board ប្រទេសថៃបានសរសេរដាស់តឿនពលរដ្ឋថា ការប្រើប្រាស់កង្ហារព្យួរនៅក មានគ្រោះថ្នា.ក់ខ្លាំង និងសូមកុំទិញយកមកប្រើប្រាស់ ពីព្រោះនៅប្រទេសស៊ុយអែតបានផ្សាយពីគ្រោះថ្នាក់របស់កង្ហារព្យួរនៅក ហើយបានប្រមូលផលិតផលនេះចេញពីទីផ្សារ រួមទាំងទីផ្សារអនឡាញផងដែរ ។ អតិថិជនទិញកង្ហារព្យួរនៅក មកប្រើប្រាស់នឹងប្រឈមជាមួយជំងឺមហារីក ដោយសារវាផលិតឡើងដោយការប្រើប្រាស់ផ្លាស្ទិកច្រើន និងមានសារធាតុសំណ ។

លោក Jesada Denduangboriphan សាស្ត្រាចារ្យផ្នែកជីវវិទ្យានៅសាកលវិទ្យាល័យជូឡាឡុងកន ប្រទេសថៃ បានសរសេរក្នុងបណ្តាញសង្គមថា ទំព័រហ្វេសប៊ុករបស់ Office of the Consumer Protection Board បានដាស់តឿនពលរដ្ឋអំពីផលិតផលនេះ គឺសំដៅលើម៉ាកតែមួយប៉ុណ្ណោះ ។ វាធ្វើឱ្យមហាជនភ្ញាក់ផ្អើលយ៉ាងខ្លាំងក្រោយពីទំព័រហ្វេសប៊ុកនេះសរសេរថា កង្ហារព្យួរនៅក មានគ្រោះថ្នាក់បណ្តាលឱ្យកើតជំងឺមហារីក ដោយសារការប្រមូលផ្តុំនូវសារធាតុសំណក្នុងបន្ទះសៀគ្វី និងខ្សែ USB ។

កង្ហារព្យួរនៅក ដែលអាចធ្វើឱ្យអ្នកប្រើប្រាស់កើតជំងឺមហារីកនោះ គឺម៉ាក Instant Cold™ neck fan ម៉ូឌែលផលិតផល 6994319860164 ។ រីឯមូលហេតុធ្វើឱ្យផលិតផលនេះគ្មានសុវត្ថិភាព ព្រោះវាមិនស្របតាមការកំណត់របស់ Directive ដោយសារបានប្រើប្រាស់សារធាតុគ្រោះថ្នាក់មួយចំនួនក្នុងឧបករណ៍អគ្គិសនី និងអេឡិចត្រូនិក ។

វាអាចបង្កគ្រោះថ្នាក់ធ្ងន់ធ្ងរដល់សុខភាព និងប៉ះពាល់ដល់ប្រព័ន្ធបន្តពូជ ហើយបើផលិតផលនេះបានប៉ះពាល់ជាមួយស្បែកមនុស្សរយៈពេលយូរ វានឹងធ្វើឱ្យអ្នកប្រើប្រាស់កើតជំងឺមហារីក ។ ប៉ុន្តែការប្រកាសដាស់តឿនពលរដ្ឋ មិនសំដៅលើកង្ហារព្យួរនៅកគ្រប់ម៉ាកដូចអ្នករាល់គ្នាបារម្ភនោះទេ ។ ដូច្នេះ យើងអាចទិញម៉ាកផ្សេងប្រើប្រាស់បាន ។

តើសារធាតុសំណមានគ្រោះថ្នាក់ដល់រាងកាយដូចម្តេចខ្លះ?
តាមគេហទំព័រ pobpad.com បញ្ជាក់ថា ពេលសារធាតុសំណចូលក្នុងរាងកាយ វានឹងភ្ជាប់ជាមួយកោសិកាឈាមក្រហម ហើយរាលដាលទៅដល់ឆ្អឹង និងសរីរាង្គផ្សេងៗ ដូចជា ៖ ថ្លើម, តម្រងនោម, ខួរឆ្អឹង និងខួរក្បាល ហើយវានឹងប៉ះពាល់ដល់ដំណើរការប្រព័ន្ធប្រសាទ ។

បើកុមារបានទទួលសារធាតុសំណប្រមូលផ្តុំច្រើនក្នុងរាងកាយ វានឹងធ្វើឱ្យកុមារលូតលាស់យឺត, ឈឺចាប់រាងកាយ, មានបញ្ហាផ្នែកប្រាជ្ញា និងការស្តាប់ឮ ជាដើម ។ រីឯមនុស្សចាស់អាចមានរោគសញ្ញាដូចគ្នាជាមួយកុមារដែរ ព្រមទាំងមានភាពខុសប្រក្រតីផ្សេងទៀត គឺការចងចាំ ។

ក្រៅពីនេះ សារធាតុសំណនឹងបង្កគ្រោះថ្នាក់ដល់ស្ត្រីមានផ្ទៃពោះផងដែរ គឺបណ្តាលឱ្យរលូតកូន, សម្រាលកូនមុនកំណត់, ប៉ះពាល់ខួរក្បាល និងការអភិវឌ្ឍសរសៃប្រសាទទារកក្នុងផ្ទៃ ៕