SpoGomi គឺជាកីឡាមួយប្រភេទដែលប្រកួតប្រជែងរាប់ពិន្ទុតាមចំនួន និងប្រភេទសំរាម ហើយកីឡានេះបានបង្កើតឡើងនៅប្រទេសជប៉ុន កាលពីឆ្នាំ២០០៨ ។ បច្ចុប្បន្ន កីឡានេះបានទទួលការពេញនិយមយ៉ាងខ្លាំងនៅពាសពេញពិភពលោក ហើយប្រទេសមួយចំនួននៅតំបន់អាស៊ីអាគ្នេយ៍ ក៏បានរៀបចំប្រកួតកីឡានេះដែរ ដើម្បីជំរុញឱ្យមនុស្សលើពិភពលោក ចេះស្រឡាញ់បរិស្ថាន និងបោះចោលសំរាមត្រឹមត្រូវ ។

គេពុំអាចបដិសេធបានថា បច្ចុប្បន្ន កីឡាចាប់ផ្តើមមានទំនាក់ទំនងជាមួយបរិស្ថានខ្លាំងឡើង ដូចជា ៖ ការកាត់បន្ថយសំរាមផ្លាស្ទិកនៅកីឡដ្ឋាន ឬការផលិតរង្វាន់មេដាយពីវត្ថុកែច្នៃពីសំរាម ។ ក្រៅពីការប្រឹងប្រែងសម្របខ្លួននៃសកម្មភាពទាក់ទងនឹងកីឡា ប្រទេសជប៉ុនក៏បានបង្កើតព្រឹត្តិការណ៍ប្រកួតកីឡាដើម្បីជួយបរិស្ថានពិភពលោកដោយផ្ទាល់ ហើយបង្កើតកីឡាឈ្មោះថា «SpoGomi» ។

SpoGomi បានមកពីពាក្យ «Sport» និង «Gomi» ដែលភាសាជប៉ុន មានន័យថា សំរាម ។ ប្រទេសជប៉ុនបានបង្កើតកីឡា SpoGomi កាលពីឆ្នាំ២០០៨ ដើម្បីជំរុញការប្រមូលសំរាម និងថែរក្សាបរិស្ថាន ព្រមទាំងបង្ហាញពីបញ្ហាវិបត្តិអាកាសធាតុឱ្យមនុស្សលើពិភពលោកយល់ដឹងផងដែរ ។ កីឡា SpoGomi បានកំណត់ឱ្យកីឡាករដែលចូលរួមប្រកួតត្រូវប្រមូលសំរាមក្នុងរយៈពេល និងតំបន់ដែលគេកំណត់ ។ ហេតុនេះ កីឡាករចូលរួមប្រកួតទាំងអស់នឹងបានហាត់ប្រាណ, ចូលរួមកែលម្អសហគមន៍របស់ខ្លួន និងកាត់បន្ថយជាតិពុលលើបរិយាកាស ។

ការប្រកួតកីឡានេះ គឺលើសពីការប្រមូលសំរាមទៅទៀត ដោយសារមានលក្ខខណ្ឌប្រកួតច្បាស់លាស់ ប៉ុន្តែលក្ខខណ្ឌការប្រកួតនឹងមានភាពបត់បែនអាស្រ័យលើតំបន់ និងសំរាមត្រូវប្រមូល ។ ជាទូទៅ ក្នុង១ក្រុមនឹងមានសមាជិកចាប់ពី៣នាក់ ទៅ៥នាក់ ហើយពួកគេត្រូវប្រមូលសំរាមឱ្យបានច្រើនបំផុតក្នុងរយៈពេល និងតំបន់ដែលគេកំណត់ ។

ការប្រកួតភាគច្រើន គេនឹងកំណត់ពេលចំនួន១ម៉ោង និងបន្ថែមពេល២០នាទីទៀត សម្រាប់បែងចែកសំរាមតាមប្រភេទ ។ ក្រៅពីនេះ សំរាមនីមួយៗដែលប្រមូលបាននឹងទទួលបានពិន្ទុខុសៗគ្នា គឺសំរាមខ្លះបានបង្កផលប៉ះពាល់ខ្លាំងដល់បរិស្ថាន នឹងទទួលបានពិន្ទុច្រើនជាងសំរាមផ្សេងទៀត ប៉ុន្តែគេពុំបានឃើញសំរាមនេះញឹកញាប់ទេ ។

បច្ចុប្បន្ន កីឡា SpoGomi ស្ថិតនៅក្រោមការគ្រប់គ្រងរបស់មូលនិធិ The Nippon Foundation ដែលមានគោលដៅកាត់បន្ថយបរិមាណសំរាមហូរចូលមហាសមុទ្រ និងជំរុញឱ្យពលរដ្ឋយល់ដឹងពីបញ្ហាសំរាមក្នុងសមុទ្រ ដោយសារសំរាមក្នុងសមុទ្រចាប់ផ្តើមប៉ះពាល់បរិស្ថានពិភពលោកកាន់តែខ្លាំង ។

ការប្រកួតកីឡា SpoGomi មិនបានប្រកួតតែនៅប្រទេសជប៉ុនមួយទេ ពីព្រោះកីឡានេះបានទទួលការចាប់អារម្មណ៍ពីប្រទេសផ្សេងៗផងដែរ ហើយប្រទេសជាច្រើនធ្លាប់រៀបចំការប្រកួតកីឡានេះរួចហើយ ដូចជា ៖ ឥណ្ឌូណេស៊ី, កូរ៉េខាងត្បូង, មីយ៉ាន់ម៉ា, អ៊ីតាលី, វៀតណាម និងថៃ ។ ប្រទេសថៃបានរៀបចំប្រកួតកីឡានេះលើកចុងក្រោយ នៅថ្ងៃទី២ ខែកក្កដា ឆ្នាំ២០២៣ នៅ Siam Paragon ។

កាលពីឆ្នាំ២០២៣ ប្រទេសជប៉ុនបានធ្វើជាម្ចាស់ផ្ទះប្រកួតកីឡា «SpoGomi World Cup 2023» គឺជាការប្រកួតប្រមូលសំរាមលំដាប់ពិភពលោកលើកដំបូង ដែលមានក្រុមកីឡាករ-កីឡាការិនីមកចូលរួមប្រកួត ចំនួន២០ប្រទេស ៕

ប្រទេសអាហ្វ្រិក ៖ ជារៀងរាល់ឆ្នាំ នៅពេលរដូវភ្លៀងធ្លាក់ចូលមកដល់ម្តងៗ សត្វមូស និងរុយនៅបរិវេណបឹង Victoria (ដែលបឹងនេះគ្របដណ្តប់លើផ្ទៃដីចំនួន៣ប្រទេស គឺកេនយ៉ា, តង់ហ្សានី និងអ៊ូហ្គង់ដា) នឹងចេញពីជម្រករបស់ពួកវា ពេលនោះហើយ គឺជាឱកាសល្អរបស់ពួកកុលសម្ព័ន្ធមួយក្រុមនៅប្រទេសអាហ្វ្រិក ដែលពួកគេរស់នៅក្បែរបឹងនេះ ។

សត្វមូស និងរុយនឹងចេញពីជម្រករបស់វាក្នុងពេលដំណាលគ្នាយ៉ាងច្រើនសន្ធឹកសន្ធាប់ គឺចាប់ពី១ពាន់ក្បាល ទៅ១ម៉ឺនក្បាលឯណោះ ។ នេះចាត់ទុកថា ជាចំនួនមួយច្រើនចំផុត ហើយយើងពុំដឹងថា នឹងចាត់ការសត្វល្អិតទាំងនេះដោយរបៀបណាទេ ។ ប៉ុន្តែសម្រាប់ពួកកុលសម្ព័ន្ធរស់នៅប្រទេសអាហ្វ្រិក ពួកគេមានវិធីចាត់ការជាមួយសត្វល្អិតទាំងនេះល្អបំផុត គឺការប្រើប្រាស់ឆ្នាំង និងខ្ទះ ។

ពួកកុលសម្ព័ន្ធនៅប្រទេសអាហ្រ្វិកចាត់ទុកថា សត្វល្អិតសម្បូរទៅដោយប្រូតេអ៊ីនល្អបំផុត និងពិបាករកសត្វល្អិតមកបរិភោគខ្លាំងណាស់នៅប្រទេសរបស់ពួកគេ ។ ពួកគេបានធ្វើវិធីងាយៗបំផុត គឺប្រមូលសត្វមូស និងរុយទាំងអស់មកចម្អិនជាអាហារយ៉ាងឆ្ងាញ់ មិនចាញ់អាហារប្រទេសផ្សេងទៀតទេ គឺហេមបឺហ្គ័រ (Hamburger) សាច់មូស និងរុយ ។

ចំណែកការចាប់មូស និងរុយមកធ្វើហេមបឺហ្គ័ររបស់ពួកគេគ្មានអ្វីពិបាកទេ គឺមុនពេលចេញទៅចាប់មូស និងរុយក្នុងព្រៃ ពួកគេបានដាក់ប្រេង Sholom ចូលក្នុងឆ្នាំង ។ រីឯមូស និងរុយ ពេលវាធុំក្លិនប្រេង Sholom វានឹងហើរចូលក្នុងឆ្នាំង បន្ទាប់មក វាក៏ជាប់ជាមួយប្រេង Sholom នេះ ។ នៅពេលពួកគេទទួលបានសត្វល្អិតទាំងនេះហើយ ពួកគេនឹងយកសត្វល្អិតទាំងអស់ដែលស្អិតជាប់ប្រេង Sholom មកសូនជាដុំៗប៉ុនហេមបឺហ្គ័រ បន្ទាប់មក ដាក់ចៀនក្នុងខ្ទះ ដូចការចម្អិនហេមបឺហ្គ័រទូទៅដែរ ។

ការចម្អិនហេមបឺហ្គ័រពីសាច់មូស និងរុញឱ្យគ្រប់គ្រាន់សម្រាប់ក្រុមគ្រួសារបរិភោគ គឺត្រូវការមូសស្មើជាង៥សែនក្បាលឯណោះ ហើយពួកគេនឹងចម្អិនហេមបឺហ្គ័ររហូតដល់គ្រប់គ្រាន់ទុកបរិភោគ ។ ក្រៅពីនេះ បើពួកគេបរិភោគពុំអស់ទេ គឺអាចយកហេមបឺហ្គ័រទៅហាលក្តៅទុកបរិភោគពេលក្រោយទៀត ។

បើនិយាយពីគោលការណ៍អាហារូបត្ថម្ភរបស់ពួកកុលសម្ព័ន្ធនៅប្រទេសអាហ្វ្រិក ពួកគេចាត់ទុកថា ហេមបឺហ្គ័រសាច់មូស១ដុំ បានផ្តល់ប្រូតេអ៊ីនច្រើនជាងហេមបឺហ្គ័រលក់នៅតាមហាង Junk Food រហូតដល់៧ដងឯណោះ ។

ប្រសិនបើមិត្តណាចង់សាកល្បងធ្វើហេមបឺហ្គ័រសាច់មូសតាមពួកគេ ដោយសារគិតថា សម្បូរមូសច្រើននៅជុំវិញផ្ទះរបស់ខ្លួន គឺកុំធ្វើអីល្អជាង ពីព្រោះមូសដែលពួកកុលសម្ព័ន្ធនៅប្រទេសអាហ្វ្រិកចាប់យកមកធ្វើហេមបឺហ្គ័រនោះ សុទ្ធតែជាមូសស៊ីលម្អងផ្កា មិនមែនមូសស៊ីឈាមមនុស្សទេ ៕

កាលពីថ្ងៃទី២៤ ខែឧសភា ឆ្នាំ២០២៤ សារព័ត៌មាន Bloomberg រាយការណ៍ថា តម្លៃប្រេងឆៅលើពិភពលោកបានធ្លាក់ចុះទាបបំផុតក្នុងរយៈពេល៣ខែ បើទោះជាតម្រូវការទិញប្រេងនៅអាមេរិកកើនឡើងវិញក៏ដោយ ។ តម្លៃប្រេងឆៅបានធ្លាក់ចុះមុនពេលពលរដ្ឋអាមេរិកមានតម្រូវការប្រើប្រាស់ប្រេងច្រើនសម្រាប់ធ្វើដំណើរក្នុងថ្ងៃ Memorial Day ហើយនេះបញ្ជាក់ថា វាជាសញ្ញាទន់ខ្សោយផ្នែកទីផ្សារ ។

ប្រេងឆៅ Brent បានកើនឡើងតិចតួចមកស្មើនឹងតម្លៃ៨១ដុល្លារអាមេរិកក្នុង១បារ៉ែល ខណៈប្រេងឆៅ West Texas មានតម្លៃក្រោម៧៧ដុល្លារអាមេរិកក្នុង១បារ៉ែល ។ ក្នុងអំឡុងថ្ងៃឈប់សម្រាកចុងសប្តាហ៍ថ្ងៃ Memorial Day របស់អាមេរិក គឺគេចាត់ទុកថា វាជាថ្ងៃចាប់ផ្តើមរដូវកាលធ្វើដំណើរច្រើនបំផុត ហើយវិនិយោគិននឹងចាប់ផ្តោតលើតម្រូវការប្រើប្រាស់ប្រេងឥន្ធនៈក្នុងអំឡុងពេលនេះ ។

បើទោះជាតម្លៃប្រេងឆៅនៅឆ្នាំ២០២៤ ខ្ពស់ជាងឆ្នាំ២០២៣ បន្តិចក្តី ដោយសារការកាត់បន្ថយការផលិតប្រេងរបស់ក្រុមប្រទេស OPEC Plus ប៉ុន្តែតម្លៃប្រេងឆៅបានធ្លាក់ចុះជាបន្តបន្ទាប់ ចាប់ពីពាក់កណ្តាលខែមេសា ឆ្នាំ២០២៤ ។ ភាពខុសគ្នារវាងតម្លៃប្រេងឆៅបានបង្ហាញពីការប្រែប្រួលខ្លាំង ខណៈវិនិយោគិនកាត់បន្ថយប្រាក់ចំណេញ ដោយសារតម្លៃប្រេងឥន្ធនៈកើនឡើង ។

គេរំពឹងថា ក្រុមប្រទេសផលិតប្រេង OPEC Plus នឹងប្រជុំនៅថ្ងៃទី១ ខែមិថុនា ឆ្នាំ២០២៤ ហើយពួកគេនឹងកាត់បន្ថយការផលិតប្រេងនៅឆមាសទី២ ឆ្នាំ២០២៤ ដោយរក្សាការផលិតប្រេងស្មើប្រមាណ២លានបារ៉ែលក្នុង១ថ្ងៃ នៅឆ្នាំ២០២៤ ។

Zhou Mi ជាអ្នកវិភាគមកពី Chaos Research Institute នៅទីក្រុងសៀងហៃ និយាយថា ៖ «ការប្រជុំរបស់ក្រុមប្រទេសផលិតប្រេង OPEC Plus នៅខែមិថុនា ឆ្នាំ២០២៤ នឹងលុបបំបាត់ភាពមិនច្បាស់លាស់នៃការផ្គត់ផ្គង់ ។ តម្រូវការប្រើប្រាស់ប្រេងនៅអាមេរិកកំពុងតែកើនឡើងវិញ ហើយការប្រើប្រាស់ប្រេងនឹងកើនឡើងខ្លាំងក្នុងអំឡុងពេលដំណើរកម្សាន្តរដូវក្តៅនៅអាមេរិក» ។

ចំណែកអ្នកជំនាញបារម្ភថា ធនាគារកណ្តាលអាមេរិកនឹងរក្សាអត្រាការប្រាក់ខ្ពស់ក្នុងរយៈពេលយូរជាងការរំពឹងទុក ហើយវានឹងប៉ះពាល់ដល់តម្រូវការប្រេងនៅលើទីផ្សារ ។ ក្រៅពីនេះ ទីផ្សារប្រេងត្រូវបានដាក់សម្ពាធក្រោយមានសេចក្តីរាយការណ៍ថា ប្រទេសរុស្ស៊ីបានផលិតប្រេងលើសកូតា កាលពីខែមេសា ឆ្នាំ២០២៤ បើទោះជារុស្ស៊ីសន្យាថា នឹងកាត់បន្ថយការផលិតប្រេងជាមួយសមាជិកក្រុមប្រទេសនាំចេញប្រេង OPEC និង OPEC Plus ៕

សហរដ្ឋអាមេរិក ៖ មើលមួយភ្លែត តិចច្រឡំថា ជារូបកាត់ត ឬក៏ជារូបគូរ មិនមានពិតនៅក្នុងលោកយើងឱ្យសោះ ។ ការពិត រូបភាពទាំងអស់នេះ គឺជាទិដ្ឋភាពដ៏ល្អស្រស់ឆើតឆាយនៃបរិយាកាសដែលមានទឹកក្តៅផុសនៅលើកំពូលភ្នំ រំលេចដោយថ្មចម្រុះពណ៌ កំពុងបង្ហាញរូបរាងយ៉ាងស្អាតទាក់ទាញភ្នែកទេសចរនានា ហើយរូបភាពនេះ ហាក់បីដូចជាផ្ទាំងទស្សនីយភាពស្ថិតនៅលើឋានសួគ៌ា ដែលយើងធ្លាប់តែឃើញនៅលើកញ្ចក់ទូរទស្សន៍ ឬក៏ខ្សែភាពយន្តតែប៉ុណ្ណោះ ។ ថ្ងៃនេះ សារព័ត៌មាន KBN សូមនាំអារម្មណ៍លោកអ្នកទៅទស្សនាតំបន់ទេសចរណ៍ដ៏អស្ចារ្យមួយកន្លែងនៅអាមេរិក គឺតំបន់ទឹកក្តៅ Fly Geyser ។

សហរដ្ឋអាមេរិក គឺជាប្រទេសមួយមានផ្ទៃដីលាតសន្ធឹងធំល្វឹងល្វើយ ទើបធ្វើឱ្យតំបន់នីមួយៗមានធម្មជាតិ និងវប្បធម៌ខុសៗគ្នា ។ អាមេរិកមានតំបន់ទេសចរណ៍ដ៏អស្ចារ្យជាច្រើនកន្លែង ដូចជា ៖ ឧទ្យានជាតិ និងទឹកជ្រោះ ហើយការទៅកម្សាន្តនៅអាមេរិកបានក្លាយជាសុបិនរបស់ភ្ញៀវទេសចរនៅទូទាំងពិភពលោក ។

តំបន់ទឹកក្តៅ Fly Geyser ស្ថិតនៅរដ្ឋណេវ៉ាដា សហរដ្ឋអាមេរិក បានក្លាយជាតំបន់មួយល្បីល្បាញយ៉ាងខ្លាំងនៅលើពិភពលោក ដោយសារចំណុចទាក់ទាញ គឺថ្មនៅទីនេះស្រស់ស្អាតទាក់ភ្នែក និងមានពណ៌ឆើតឆាយ ។ រីឯមូលហេតុធ្វើឱ្យវាមានពណ៌ឆើតឆាយ ព្រោះកើតឡើងពីសារធាតុរ៉ែជាច្រើនប្រភេទសង្កត់លើគ្នា រហូតបង្កើតឱ្យមានទឹកក្តៅផុសនៅលើកំពូលថ្មបែបនេះ ។

ទឹកក្តៅបានផុសចេញពីក្រោមដីគ្រប់វិនាទីពីមួយថ្ងៃទៅមួយថ្ងៃ ហើយសារធាតុរ៉ែផ្សេងៗបានប្រមូលផ្តុំគ្នារហូតក្លាយជាដុំថ្មពណ៌ស្រស់ស្អាតឆើតឆាយ រួមមាន ៖ ពណ៌ត្នោត, ពណ៌ក្រហម និងពណ៌បៃតង លាយឡំចម្រុះគ្នា ។ ជារៀងរាល់ឆ្នាំ ដុំថ្មមានពណ៌ស្រស់ឆើតឆាយនេះមានកម្ពស់កាន់តែខ្ពស់ឡើងៗ ហើយត្រូវបានមនុស្សទូទៅស្គាល់នាពេលបច្ចុប្បន្នថា «តំបន់ទឹកក្តៅ Fly Geyser» ។

បច្ចុប្បន្ន តំបន់ទឹកក្តៅ Fly Geyser មានទឹកក្តៅផុសនៅលើកំពូលថ្មចម្រុះពណ៌គ្រប់ពេលវេលា ព្រមទាំងបញ្ចេញចំហាយក្តៅផងដែរ ។ លើសពីនេះ ទឹកក្តៅក៏បានហូរទៅកាន់បរិវេណនៅក្បែរៗក្លាយជាស្រះទឹកតូច-ធំ ឆ្លាស់គ្នាជាមួយស្រទាប់ថ្មដ៏ស្រស់ស្អាត ។

កាលពីឆ្នាំ១៩៦៤ ក្រុមហ៊ុនផ្នែកស្រាវជ្រាវថាមពលក្រោមដីបានធ្វើការចោះដីនៅបរិវេណនេះ ប៉ុន្តែការសាកល្បងរបស់ក្រុមហ៊ុននាពេលនោះ ពុំបានរកឃើញអ្វីដែលពួកគេត្រូវការទេ ។ ចៃដន្យ ពួកគេបានរកឃើញអ្វីមួយផ្សេងទៀតមិនគួរឱ្យជឿ គឺមានទឹកក្តៅផុសចេញពីក្រោមដីនៅបរិវេណនេះ ផ្សំជាមួយសារធាតុរ៉ែកាល់ស្យូមកាបូណាត និងសារធាតុរ៉ែផ្សេងៗ ។

ហេតុនេះ តំបន់ទឹកក្តៅ Fly Geyser ពុំបានកើតឡើងតាមធម្មជាតិទេ គឺវាកើតឡើងដោយសារការព្យាយាមចោះដីនៅបរិវេណនេះឱ្យក្លាយជាប្រភពទឹក ប៉ុន្តែដោយសារការចោះដីពុំសម្រេច ទើបធ្វើឱ្យតំបន់នេះមានទឹកក្តៅផុសចេញពីក្រោមដីជាច្រើនឆ្នាំ និងបង្កើតបានជាថ្មចម្រុះពណ៌ ។

ទោះយ៉ាងណា តំបន់ទឹកក្តៅនៅពុំទាន់បើកឱ្យភ្ញៀវទេសចរចូលទស្សនាជាសាធារណៈទេ ហើយភ្ញៀវទេសចរដែលមកកម្សាន្តនៅទីនេះ លុះត្រាតែទទួលបានការអនុញ្ញាតពីម្ចាស់តំបន់ជាមុនសិន ។ ម្ចាស់តំបន់ពុំចង់អភិវឌ្ឍន៍ទីនេះធ្វើជាតំបន់ទេសចរណ៍ទេ បើទោះជាអាជ្ញាធរសុំទិញតំបន់នេះសម្រាប់ធ្វើជាតំបន់ទេសចរណ៍សាធារណៈក្តី ប៉ុន្តែម្ចាស់តំបន់ពុំព្រមលក់ ៕

ប្រទេសប៉ាគីស្ថាន ៖ កាលពីថ្ងៃទី២៤ ខែឧសភា ឆ្នាំ២០២៤ សារព័ត៌មានបរទេសរាយការណ៍ថា ប្រទេសប៉ាគីស្ថានមានសីតុណ្ហភាពកើនឡើងខ្ពស់រហូតដល់៥៥អង្សារសេ ហើយអាជ្ញាធរបារម្ភថា អាចនឹងមានគ្រោះទឹកជំនន់កើតឡើង ដោយសារផ្ទាំងទឹកកករលាយឆាប់រហ័សពេក ។ អាកាសធាតុក្តៅខ្លាំងបានធ្វើឱ្យពលរដ្ឋប៉ាគីស្ថានរាប់រយនាក់ឈឺជាបន្តបន្ទាប់ ជាពិសេស គឺជំងឺដាច់សរសៃឈាមខួរក្បាល ។

សារព័ត៌មាន AFP រាយការណ៍ថា នៅខែឧសភា ឆ្នាំ២០២៤ សីតុណ្ហភាពនៅប៉ាគីស្ថានបានកើនឡើងរហូតដល់៥៥អង្សារសេ ហើយវាខ្ពស់ជាងសីតុណ្ហភាពជាមធ្យមនៅខែឧសភា ឆ្នាំ២០២៣ រហូតដល់៨អង្សារសេ និងខ្ពស់ជាងសីតុណ្ហភាពក្នុងរយៈពេល២០ឆ្នាំកន្លងមក ។ ហេតុនេះ អ្វីដែលធ្វើឱ្យអាជ្ញាធរប៉ាគីស្ថានព្រួយបារម្ភបំផុតនោះ គឺអាកាសធាតុកាន់តែក្តៅ នឹងធ្វើឱ្យផ្ទាំងទឹកកករលាយយ៉ាងឆាប់រហ័ស និងបណ្តាលឱ្យកើតទឹកជំនន់នៅភាគពាយ័ព្យប្រទេសប៉ាគីស្ថាន ។

តាមរយៈការព្យាករអាកាសធាតុរបស់ប៉ាគីស្ថានបញ្ជាក់ថា ពលរដ្ឋនឹងប្រឈមជាមួយអាកាសធាតុក្តៅខ្លាំងបែបនេះបន្តទៀត យ៉ាងហោចណាស់ ក៏១សប្តាហ៍ដែរ ។ សីតុណ្ហភាពនៅប៉ាគីស្ថានបានកើនឡើងខ្ពស់បំផុតស្មើនឹង៤៩អង្សារសេ កាលពីថ្ងៃទី២២ ខែឧសភា ឆ្នាំ២០២៤ នៅទីក្រុង Mohenjo-daro ដែលជាទីក្រុងបុរាណដ៏ល្បីល្បាញមួយនៅខេត្ត Sind ។

បន្ទាប់មក នៅថ្ងៃទី២៣ ខែឧសភា ពលរដ្ឋប៉ាគីស្ថានរាប់រយនាក់ដែលរស់នៅតាមទីក្រុងនានាបានកើតជំងឺគ្រុនក្តៅ និងជំងឺដាច់សរសៃឈាមខួរក្បាល ហើយត្រូវបានគេបញ្ជូនទៅព្យាបាលនៅមន្ទីរពេទ្យទូទាំងប្រទេស ។ អាជ្ញាធរប៉ាគីស្ថានបានបង្កើតមជ្ឈមណ្ឌលសង្គ្រោះបន្ទាន់នៅតាមមន្ទីរពេទ្យផ្សេងៗ ដើម្បីទទួលព្យាបាលអ្នកជំងឺដោយសារអាកាសធាតុក្តៅ ។

ជំងឺដាច់សរសៃឈាមខួរក្បាល (Heatstroke) គឺជាជំងឺធ្ងន់ធ្ងរដែលកើតឡើងដោយសារសីតុណ្ហភាពរាងកាយកើនឡើងលឿនពេក រហូតធ្វើឱ្យអ្នកជំងឺបាត់បង់ស្មារតី ហើយបើអាការៈកាន់តែធ្ងន់ធ្ងរ វាអាចធ្វើឱ្យអ្នកជំងឺពិការ ឬស្លាប់បាន ។

ការិយាល័យការពារជនស៊ីលបានជូនដំណឹងទៅពលរដ្ឋថា សូមកុំយកធុងហ្គាសមកដាក់នៅក្រោមកំដៅថ្ងៃ រីឯពលរដ្ឋដែលមានលំនៅឋាននៅក្បែរវាលស្រែ ចូរប្រយ័ត្នសត្វពស់ ឬខ្យាដំរីចូលផ្ទះ ពីព្រោះវាចូលចិត្តចូលក្នុងផ្ទះបាយដើម្បីគេចពីកំដៅថ្ងៃ ។ លើសពីនេះ ពលរដ្ឋមិនត្រូវចេញក្រៅផ្ទះដាច់ខាតបើពុំចាំបាច់ ហើយកុំឱ្យរាងកាយខ្វះជាតិទឹកឱ្យសោះ ៕