ថ្មីៗនេះ មហាជនជាច្រើនហាក់មានការចាប់អារម្មណ៍យ៉ាងខ្លាំងចំពោះរូបភាពនៅលើបណ្តាញសង្គម ដែលបង្ហាញអំពីអាកប្បកិរិយាទន់ភ្លន់របស់បុគ្គលិកផ្លូវល្បឿនលឿន ព្រោះបានធ្វើការសំពះឱនរំទោន និងផ្តល់នូវសេចក្តីគោរពដ៏ខ្ពង់ខ្ពស់ទៅកាន់ព្រះមហាក្សត្រខ្មែរ។

កាលពីថ្ងៃទី២៦ ខែឧសភា ឆ្នំា២០២៤នេះ យោងតាមការបង្ហោះនៅលើបណ្តាញសង្គមហ្វេសបុក ដោយគណនី Sav Yean និង Hea Fa បានភ្ជាប់មកជាមួយនឹងរូបភាពប៉ុន្មានសន្លឹក អមជាមួយនឹងខ្លឹមសារថា «ជាព្រះមហាកិត្តយសដ៏ខ្ពង់ខ្ពស់ប្រសើរក្រៃលែងក្នុងថ្ងៃនេះដែលខ្ញុំព្រះករុណាបានមកទទួលព្រះរាជដំណើរ ព្រះករុណាព្រះអម្ចាស់ជីវិតតម្កល់លើត្បូង សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា យាងលើផ្លូវល្បឿនលឿន»។

តាមរយៈរូបភាព ព្រះបាទសម្តេចព្រះបរមនាថ នរោត្តម សីហមុនី កំពុងតែប្រថាប់នៅលើព្រះទីនាំងតាមបណ្តាយផ្លូវល្បឿនលឿន ក្នុងព្រះរាជដំណើរយាងជាព្រះរាជាធិបតីដ៏ខ្ពង់ខ្ពស់បំផុត ក្នុងព្រះរាជពិធីច្រត់ព្រះនង្គ័ល នាទីព្រះស្រែក្នុងបរិវេណមន្ទីរអប់រំ យុវជន និងកីឡា ស្ថិតនៅក្រុងច្បារមន ខេត្តកំពង់ស្ពឺ។

ជាមួយគ្នានោះ គេឃើញថារាល់បុគ្គលិកធ្វើការនៅផ្លូវល្បឿនលឿននោះ គឺបានត្រៀមខ្លួនរួចជាស្រេចក្នុងការទទួលព្រះរាជដំណើររបស់ព្រះមហាក្សត្រ។ នៅពេលដែលព្រះមហាក្សត្រយាងមកដល់ភ្លាម ពួកគេទាំងអស់គ្នាក៏នាំគ្នាលុតជង្គង់សំពះស្រុះៗគ្នា ប្រកបដោយអាកប្បកិរិយាទន់ភ្លន់ និងបញ្ជាក់ពីសេចក្តីគោរពខ្ពង់ខ្ពស់ទៅកាន់ព្រះអង្គ។

បន្ទាប់ពីរូបភាពទាំងនោះបានបង្ហោះចែកចាយទៅ មហាជនខ្មែរជាច្រើនក៏បានចូលទៅបញ្ចេញមតិកោតសរសើរព្រាត ដោយអ្នកខ្លះថា«ប្រពៃណាស់ គោរពបានល្អ ទន់ភ្លន់! បុគ្គលិកគំរូ»។ អ្នកខ្លះថា «គំរូល្អដែលប្រជាជនខ្មែរគួរ គោរពទ្រង់បែបនេះ»។ អ្នកខ្លះថា«ការសំពះក្រាបថ្វាយបង្គំ ពិតជាសមស្អាតខ្លាំងណាស់»។ អ្នកខ្លះទៀតថា«ការរៀបចំបែបនេះគឺបានល្អណាស់ប្រពៃថ្លៃថ្លាសម្រាប់ការគោរពក្រាបថ្វាយបង្គំព្រះមហាក្សត្រក្រោមល្អងធូលីព្រះបាទ»។ ចំណែកខ្លះទៀតថា «នេះទើបហៅថាការគោរពចំពោះស្ដេចផែនដី»៕

មនុស្សភាគច្រើនតែងទម្លាប់បង្ហោះរូបដោយដាក់ Check-in រាល់ពេលដែលពួកគេបានទៅដល់ទីតាំងជាក់លាក់ណាមួយដូចជាអាកាសយានដ្ឋាន ភោជនីយដ្ឋាន អាហារដ្ឋាន ឬកន្លែងទេសចរណ៍នានា។ ទោះជាយ៉ាងណាក៏ដោយ សកម្មភាពនេះអាចបង្កគ្រោះថ្នាក់ដោយអចេតនា នៅពេលដែលមនុស្សអាក្រក់ទទួលបានព័ត៌មានផ្ទាល់ខ្លួន និងកាលវិភាគធ្វើដំណើររបស់អ្នក ជាពិសេសសម្រាប់ភ្ញៀវស្រី ឬអ្នកដែលធ្វើដំណើរតែម្នាក់ឯងគឺអាចប្រឈមនឹងហានិភ័យខ្ពស់បំផុត។

ដូច្នេះអ្នកមិនគួរបង្ហោះរូបដោយដាក់ Check-in ទេដើម្បីការពារសុវត្ថិភាពរបស់អ្នកពីមនុស្សអាក្រក់។ នៅពេលដែលអ្នកស្ថិតនៅកន្លែងឯកជនណាមួយ ត្រូវប្រាកដថាអ្នកមិនបង្ហោះរូបថតដែលបង្ហាញពីទីតាំងច្បាស់លាស់របស់អ្នកទេ។ វាជាការល្អប្រសិនបើអ្នកបង្ហោះរូបនៅទីតាំងនោះបន្ទាប់ពីអ្នកចាកចេញទៅកន្លែងផ្សេងទៀត។ ទោះជាយ៉ាងណាខាងក្រោមនេះគឺជាទម្លាប់មួយចំនួនដែលអ្នកមិនគួរបង្ហោះរូបភាពនេះជាសារធារណៈ៖

១.បង្ហោះរូបថតសំបុត្រយន្តហោះ៖ អ្នកជំនាញសន្តិសុខជាច្រើនបានព្រមានថា ការបង្ហោះរូបភាពសំបុត្រយន្តហោះអាចបង្ហាញព័ត៌មានផ្ទាល់ខ្លួនរបស់អ្នក ទោះបីជាអ្នកលាក់ឈ្មោះ និងលេខកូដកក់របស់អ្នកក៏ដោយ វាមិនមានន័យថាអ្នកមានសុវត្ថិភាពនោះទេ។ ការបង្ហោះបែបនេះ អាចធ្វើឱ្យជនខិលខូចមួយចំនួនដែលមានជំនាញក្នុងការអានបាកូដ អាចផ្លាស់ប្តូរការចូលគណនីរបស់អ្នកនៅលើគេហទំព័រក្រុមហ៊ុនអាកាសចរណ៍ និងផ្លាស់ប្តូរកៅអី កាលវិភាគហោះហើរ ឬសូម្បីតែលុបចោលជើងហោះហើររបស់អ្នកក៏មានដែរ។

ទោះយ៉ាងណាក៏ដោយ ក្នុងករណីខ្លះអ្នកចង់បង្ហោះរូបថតសំបុត្រយន្តហោះ សូមយកចិត្តទុកដាក់៖
• លាក់ឈ្មោះ និងភេទទាំងស្រុង
• បិទបាំង Barcode និងលេខកូដរបស់សំបុត្រ
•លាក់លេខកូដកក់
•លាក់លេខជើងហោះហើរ និងពេលវេលា ដោយគ្រាន់តែបង្ហាញទីតាំងចេញដំណើរ និងការមកដល់ប៉ុណ្ណោះ។

លើសពីនេះ យោងតាមអ្នកជំនាញ មធ្យោបាយដ៏ល្អបំផុតដើម្បីដោះស្រាយសំបុត្រយន្តហោះ នៅពេលដែលពួកគេលែងប្រើប្រាស់ គឺត្រូវហែកវាជាបំណែកៗ ហើយបំផ្លាញវាចោល។ ដាច់ខាតកុំបោះសំបុត្រយន្តហោះចោលក្នុងធុងសំរាម ព្រោះថាបើធ្លាក់ក្នុងដៃជនខិលខូចនោះ ព័ត៌មានទាំងនោះនឹងនៅតែអាចប្រើប្រាស់បាន។

២.បង្ហោះរូបថតលិខិតឆ្លងដែន និងទិដ្ឋាការ៖ ការលាតត្រដាងព័ត៌មានលិខិតឆ្លងដែន និងទិដ្ឋាការគឺមានគ្រោះថ្នាក់ខ្លាំងជាងការបង្ហាញសំបុត្រយន្តហោះទៅទៀត។ មនុស្សអាក្រក់អាចពឹងផ្អែកលើព័ត៌មានសំខាន់ៗដែលមាននៅក្នុងនោះដើម្បីប្រើប្រាស់វាដោយចេតនាលួច បន្លំ ឯកសារក្លែងបន្លំជាដើម។ល។ ហើយថែមទាំងអាចតាមដានពាក្យសម្ងាត់គណនីធនាគារ និងអ៊ីមែលសម្រាប់មនុស្សជាច្រើនដែលមានទម្លាប់ប្រើប្រាស់ព័ត៌មាននេះដើម្បីកំណត់ពាក្យសម្ងាត់ទៀតផង។ ដូច្នេះ ដំបូន្មានគឺធ្វើឱ្យព្រិលព័ត៌មានទាំងអស់មុនពេលបង្ហោះតាមអ៊ីនធឺណិត។ ក្នុងករណីដែលអ្នកត្រូវការថតរូបឯកសារជាមួយទូរស័ព្ទរបស់អ្នក បន្ទាប់ពីប្រើរួច អ្នកក៏គួរតែលុបវាចោលផងដែរ ដើម្បីការពារទូរស័ព្ទរបស់អ្នកពីការលួច និងព័ត៌មានដែលត្រូវបែកធ្លាយ៕

បរទេស៖ បន្ទាប់ពីមានការឈ្លានពានទឹកដីដ៏ធំបំផុតនៅអឺរ៉ុបរវាងរុស្ស៊ីនិងអ៊ុយក្រែនរយៈពេល ២ ឆ្នាំកន្លងមកនេះ ស្រាប់តែប្រធានាធិបតី ពូទីន ថ្មីៗនេះបាននិយាយថា ខ្លួនគ្រោងនឹងបញ្ចប់សង្គ្រាមនៅអ៊ុយក្រែននាពេលខាងមុខ នេះបើយោងតាមការចុះផ្សាយរបស់ Reuters កាលថ្ងៃទី២៥ ឧសភា ២០២៤។

ទីភ្នាក់ងារសារព័ត៌មានរ៉យទ័របានដកស្រង់ប្រភពព័ត៌មានផ្លូវការរបស់រុស្ស៊ីចំនួនបួន ដែលនិយាយថា លោកពូទីនបានត្រៀមខ្លួនរួចជាស្រេចដើម្បីបញ្ឈប់សង្គ្រាមនៅអ៊ុយក្រែនជាមួយនឹងបទឈប់បាញ់។ យោងតាមប្រភពដដែលបានឱ្យដឹងទៀតថា លោកពូទីនបានសម្តែងទៅកាន់ទីប្រឹក្សាក្រុមតូចមួយនូវការខកចិត្តចំពោះកិច្ចខិតខំប្រឹងប្រែងរបស់លោកខាងលិចក្នុងការរារាំងការចរចាក៏ដូចជាការសម្រេចចិត្តរបស់ប្រធានាធិបតីអ៊ុយក្រែនលោក Volodymyr Zelensky ក្នុងការមិនចរចាជាមួយរុស្ស៊ី។

ប្រភពពីរុស្ស៊ីជាន់ខ្ពស់មួយទៀតក៏បានឱ្យដឹងទៀតថា ប្រធានាធិបតីពូទីនបានកំពុងព្យាយាមសុំការចរចារឡើងវិញជាមួយអ៊ុយក្រែនពីបទឈប់បាញ់ ដោយលោកពូទីនបានត្រៀមខ្លួនរួចជាស្រេចសម្រាប់ការសន្ទនាដើម្បីសម្រេចបាននូវគោលដៅរបស់ខ្លួន ហើយបានអះអាងថា ទីក្រុងមូស្គូមិនចង់បន្ត “សង្រ្គាម” ទៀតទេ។ យោងតាម Reuters ប្រភពពីរនៅទីភ្នាក់ងារនេះបាននិយាយថាប្រធានាធិបតីពូទីនមានទស្សនៈថាអ្វីដែលសម្រេចបាននៅក្នុងសង្គ្រាមរហូតមកដល់ពេលនេះគឺគ្រប់គ្រាន់ហើយដើម្បីប្រកាសជ័យជំនះសម្រាប់ប្រជាជនរុស្ស៊ី។

ទោះជាយ៉ាងណាក៏ដោយ អ្នកជំនាញនិយាយថា បទឈប់បាញ់ ឬសូម្បីតែការចរចាសន្តិភាព គឺនៅឆ្ងាយណាស់ក្នុងបរិបទបច្ចុប្បន្ន នៅពេលដែលប្រធានាធិបតីអ៊ុយក្រែន Volodymyr Zelensky មិនព្រមចរចារ។ យោងតាមលោក Zelensky កាលពីមុនបាននិយាយថា សន្តិភាពដែលស្ថិតលើលក្ខខណ្ឌរបស់ប្រធានាធិបតី ពូទីន គឺមិនអាចទទួលយកបានសម្រាប់អ៊ុយក្រែនទេ។ លោកបានប្ដេជ្ញាថា អ៊ុយក្រែននឹងទាមទារយកមកវិញនូវទឹកដីដែលបាត់បង់ រួមទាំងឧបទ្វីបគ្រីមៀ ដែលរុស្ស៊ីបានបញ្ចូលក្នុងឆ្នាំ ២០១៤។

លោក Zelensky បានចុះហត្ថលេខាលើក្រឹត្យមួយនៅឆ្នាំ ២០២២ ដោយបានច្រានចោលការចរចារទាំងអស់ជាមួយប្រធានាធិបតីពូទីន។ ទន្ទឹមនឹងនោះ ភាគីរុស្ស៊ីបានបញ្ជាក់ថា ទីក្រុងមូស្គូមិនដែលបដិសេធក្នុងការចរចាជាមួយអ៊ុយក្រែនដើម្បីបញ្ចប់ជម្លោះនោះទេ។ គួរបញ្ជាក់ដែរថា បច្ចុប្បន្នរុស្ស៊ីទទួលបានដែនដីថ្មីជាច្រើនពីអ៊ុយក្រែន រួមទាំងតំបន់ Donetsk, Lugansk, Zaporizhzhia និង Kherson ដែលរុស្ស៊ីនឹងប្រកាសដាក់បញ្ចូលជាផ្លូវការក្នុងប្រទេសរបស់ខ្លួននាពេលខាងមុខនេះ៕

បរទេស៖ ថ្មីៗនេះ Elon Musk ដែលជានាយកប្រតិបត្តិក្រុមហ៊ុន Tesla និង SpaceX បានធ្វើការទស្សន៍ទាយដ៏គួរឱ្យចាប់អារម្មណ៍មួយនៅឯសន្និសីទបច្ចេកវិទ្យា VivaTech 2024 ក្នុងទីក្រុងប៉ារីសប្រទេសបារាំងថា នៅពេលអនាគត បញ្ញាសិប្បនិមិត្ត (AI) នឹងជំនួសការងារបច្ចុប្បន្នរបស់មនុស្សភាគច្រើន។
ក្នុងអំឡុងសន្និសីទបច្ចេកវិទ្យាកាលពីថ្ងៃទី២៥ ឧសភា Musk បាននិយាយថា “នៅពេលខាងមុខទៀតប្រហែលជាគ្មាននរណាម្នាក់ក្នុងចំណោមពួកយើងនឹងមានការងារធ្វើទៀតទេ”។ មហាសេដ្ឋីរូបនេះក៏បានពណ៌នាអំពីអនាគតដែលការងារគ្រាន់តែជាជម្រើសផ្ទាល់ខ្លួន ដូចជាចំណង់ចំណូលចិត្តមានន័យថា អ្នកចង់ធ្វើការក៏បាន អ្នកអាចឱ្យ AI ធ្វើការជំនួសក៏បាន។

Musk បានពន្យល់ថា “ប្រសិនបើអ្នកចង់ធ្វើការងារដោយមិនពឹងផ្អែកលើ AI ក៏បានដែរ នេះជាសិទ្ធរបស់អ្នក ហើយ AI នាពេលខាងមុខនឹងផ្តល់នូវរាល់សេវាកម្មល្អ និងសេវាកម្មរហ័សដែលអ្នកចង់បាន”។ ដូច្នេះពិភពលោកនឹងមិនមានការខ្វះខាតទំនិញឬសេវាកម្មនោះទេនៅពេលអនាគត។ AI បានរីកចម្រើនយ៉ាងឆាប់រហ័សក្នុងរយៈពេលប៉ុន្មានឆ្នាំចុងក្រោយនេះ ដែលនិយតករ អាជីវកម្ម និងអ្នកប្រើប្រាស់នៅតែស្វែងរកវិធីប្រើប្រាស់បច្ចេកវិទ្យាប្រកបដោយការទទួលខុសត្រូវ។ ទោះជាយ៉ាងណាក្តីបារម្ភក៏កំពុងកើនឡើងផងដែរអំពីរបៀបដែលឧស្សាហកម្ម និងការងារនឹងផ្លាស់ប្តូរ នៅពេលដែល AI កាន់តែរីករាលដាលនៅក្នុងទីផ្សារ។

បើយោងតាមរបាយការណ៍ខែមករាពីមន្ទីរពិសោធន៍វិទ្យាសាស្ត្រកុំព្យូទ័រ និងបញ្ញាសិប្បនិមិត្តរបស់ MIT បានរកឃើញថាកន្លែងធ្វើការសព្វថ្ងៃភាគច្រើនកំពុងប្រើប្រាស់ AI យឺតជាងការព្យាករណ៍ និងការភ័យខ្លាចមួយចំនួន។ របាយការណ៍ក៏ចង្អុលបង្ហាញដែរថាការងារភាគច្រើនត្រូវបានចាត់ទុកថាងាយរងគ្រោះដោយសារការជំនួស AI ដោយវាមិននាំមកនូវអត្ថប្រយោជន៍សេដ្ឋកិច្ចដល់និយោជកនៅពេលនោះទេ។ អ្នកជំនាញក៏ជឿដែរថា ការងារជាច្រើនដែលទាមទារភាពវៃឆ្លាតខាងផ្លូវអារម្មណ៍ខ្ពស់ និងអន្តរកម្មរបស់មនុស្ស ដូចជាអ្នកចិត្តសាស្រ្ត មនុស្សច្នៃប្រឌិត និងគ្រូបង្រៀន នឹងមិនចាំបាច់ជំនួសដោយ AI នោះទេ។

Musk ក៏បានសម្តែងការព្រួយបារម្ភម្តងហើយម្តងទៀតអំពី AI ផងដែរ។ នៅក្នុងសុន្ទរកថារបស់លោក លោកបានហៅបច្ចេកវិទ្យានេះថាជាការភ័យខ្លាចដ៏ធំបំផុតរបស់លោក។ លោកក៏បានលើកឡើងពី សៀវភៅ Culture Book Series របស់ Ian Banks ដែលជាស៊េរី Fantasy អំពីសង្គមដែលដំណើរការដោយបច្ចេកវិទ្យាទំនើប ជាចក្ខុវិស័យជាក់ស្តែងបំផុតនៃអនាគត AI ។ ទោះជាយ៉ាងណាក៏ដោយ Musk បានចោទសួរថានៅពេលអនាគតប្រសិនបើ AI នឹងជំនួសរាល់ការងារទាំងអស់របស់មនុស្ស តើមនុស្សអាចប្រឈមនឹងវិបត្តិផ្លូវចិត្តដែរឬទេ?