យោងតាមការស្រាវជ្រាវថ្មីបង្ហាញថា សត្វដំរីអាចដាក់ឈ្មោះឱ្យគ្នា និងហៅឈ្មោះគ្នាទៅវិញទៅមកសម្រាប់ទំនាក់ទំនង ។ លក្ខណៈពិសេសនេះបានធ្វើឱ្យដំរីក្លាយជាសត្វដំបូងគេបន្ទាប់ពីមនុស្ស ដែលអាចហៅឈ្មោះកូនៗ និងមិត្តរបស់វា ។ វាបានស្រែកហៅគ្នានៅកន្លែងឆ្ងាយៗ ឬដំរីចាស់ហៅឈ្មោះកូនដំរី ទើបគេសន្និដ្ឋានថា ដំរីអាចចំណាយពេលជាច្រើនឆ្នាំក្នុងការវិវឌ្ឍសមត្ថកិច្ចពិសេស ។

ការស្រាវជ្រាវនេះបញ្ជាក់ថា ដំរីបានតាមរកគ្នាដោយការហៅឈ្មោះរបស់ដំរីនីមួយៗ ដែលពួកវាបានដាក់ឈ្មោះទាំងនេះដោយខ្លួនឯងសម្រាប់កូនៗ និងមិត្តរបស់វា ។ ម្យ៉ាងទៀត ដំរីមានភាពខុសប្លែកពីសត្វផ្សេងៗ ដូចជា ៖ ត្រី Dolphin និងសត្វសេក ដែលអាចនិយាយត្រាប់តាមមនុស្សតែប៉ុណ្ណោះ ។

ក្រុមអ្នកស្រាវជ្រាវអន្តរជាតិបានប្រើប្រាស់បច្ចេកវិទ្យា AI ដើម្បីវិភាគសំឡេងដំរីអាហ្វ្រិកចំនួន២ហ្វូង នៅប្រទេសកេនយ៉ា ហើយលទ្ធផលបង្ហាញថា វាអាចដឹង និងឆ្លើយតបទៅកាន់សំឡេង ហើយវាពុំចាប់អារម្មណ៍នឹងការហៅឈ្មោះដំរីផ្សេងទេ ។ លោក Michael Pardo អ្នកស្រាវជ្រាវផ្នែកបរិស្ថានមកពីសាកលវិទ្យាល័យ Colorado State សហរដ្ឋអាមេរិក និយាយថា ៖ «ការស្រាវជ្រាវបង្ហាញថា ដំរីដឹងថា តើសំឡេងទាំងនេះហៅឈ្មោះរបស់វាដែរឬទេ» ។

អ្នកស្រាវជ្រាវបញ្ជាក់ថា បច្ចេកវិទ្យា AI បានជួយឱ្យពួកគេដឹងថា ដំរីមានសំឡេងខុសៗគ្នារហូតដល់៤៦៩ប្រភេទ ក្នុងនោះដំរី១០១ក្បាលបានបញ្ចេញសំឡេងហៅមិត្តរបស់វា ហើយដំរី១១៧ក្បាលទៀតបានឆ្លើយតប ។ ហេតុនេះ ដំរីអាចបញ្ចេញសំឡេងបានច្រើន ដូចជា ៖ សំឡេងខ្លាំងដូចត្រែ និងសំឡេងតិចរហូតដល់មនុស្សស្តាប់ពុំឮ ។

ការស្រាវជ្រាវមួយចុះផ្សាយក្នុងទស្សនាវដ្តី Nature Ecology and Evolution បញ្ជាក់ថា ការហៅរកគ្នាជាញឹកញាប់បំផុតរបស់ដំរី គឺសំឡេងបែបប្រេកង់កម្រិតទាបសម្រាប់ទំនាក់ទំនងគ្នា ។ លើសពីនេះ ពេលអ្នកស្រាវជ្រាវថតសំឡេងដំរី និងចាក់ឡើងវិញ ធ្វើឱ្យដំរីរំភើបពេលបានឮសំឡេងមិត្ត ឬកូនៗរបស់វា ។

ផ្ទុយទៅវិញ ពេលអ្នកស្រាវជ្រាវហៅឈ្មោះដំរីផ្សេងទៀតឃើញថា វាខុសគ្នាពីត្រី Dolphin និងសត្វសេក ដែលតែងតែនិយាយត្រាប់តាម ប៉ុន្តែដំរីពុំបានបញ្ចេញសំឡេងត្រាប់តាមទេ ។ ដូច្នេះ មានតែដំរី និងមនុស្សប៉ុណ្ណោះ ដែលចេះដាក់ឈ្មោះឱ្យគ្នា ។ ប៉ុន្តែអ្នកស្រាវជ្រាវនឹងស្រាវជ្រាវបន្ថែមទៀតពាក់ព័ន្ធនឹងការវិវឌ្ឍសមត្ថភាពពិសេស ។

លោក Frank Pope នាយកផ្នែកអភិរក្សសត្វដំរី (Save The Elephants) និយាយថា ៖ «បើទោះជាមនុស្ស និងដំរីមានភាពខុសប្លែកគ្នាក្តី ប៉ុន្តែមានលក្ខណៈស្រដៀងគ្នាច្រើន ដូចជា ៖ ការពង្រីកក្រុមគ្រួសារក្នុងសង្គមតាមរយៈការវិវឌ្ឍសមត្ថភាពខួរក្បាល ។ ដំរីអាចហៅឈ្មោះដំរីដូចគ្នាបាន គឺគ្រាន់តែជាចំណុចចាប់ផ្តើមពីជីវិតរបស់ពួកវា» ៕

សហរដ្ឋអាមេរិក ៖ បើតាមសារព័ត៌មានបរទេសឱ្យដឹងថា លោក Elon Musk ជាមហាសេដ្ឋីលំដាប់ពិភពលោក និងជាម្ចាស់ក្រុមហ៊ុនល្បីៗបានឆ្លើយតបភ្លាមៗ ក្រោយពីក្រុមហ៊ុន Apple ប្រកាសថា នឹងសហការជាមួយ Open AI ដើម្បីអភិវឌ្ឍន៍បច្ចេកវិទ្យាលើឧបករណ៍អេឡិចត្រូនិក ។ តើលោក Elon Musk និយាយបែបណាខ្លះទៅកាន់ Apple?

លោក Elon Musk ជាស្ថាបនិកបណ្តាញសង្គម X និងជានាយកក្រុមហ៊ុន Tesla លើកឡើងថា លោកនឹងហាមឃាត់ការប្រើប្រាស់ iPhone របស់ក្រុមហ៊ុន Apple ទាំងអស់ក្នុងក្រុមហ៊ុនរបស់លោក ក្រោយពីក្រុមហ៊ុន Apple ប្រកាសថា នឹងសហការជាមួយ Open AI ព្រមទាំងបង្ហាញបច្ចេកវិទ្យា AI ថ្មីឈ្មោះ «Apple Intelligence» ។

សារព័ត៌មាន AFP បានរាយការណ៍ពីទីក្រុងសាន់ហ្វ្រាន់ស៊ីស្កូ សហរដ្ឋអាមេរិក កាលពីថ្ងៃទី១១ ខែមិថុនា ឆ្នាំ២០២៤ ថា Apple បានប្រកាសពីកិច្ចសហការជាមួយក្រុមហ៊ុន Open AI ក្នុងកិច្ចប្រជុំប្រចាំឆ្នាំរបស់អ្នកអភិវឌ្ឍលំដាប់ពិភពលោក នៅស្នាក់ការធំរបស់ក្រុមហ៊ុនក្នុងទីក្រុងឃូព័រទីណូ រដ្ឋកាលីហ្វ័រញ៉ា ។ លើសពីនេះ ពួកគេនឹងបង្ហាញបច្ចេកវិទ្យា AI ថ្មីឈ្មោះ «Apple Intelligence» ដែលនឹងដាក់បញ្ចូលជាមួយឧបករណ៍ផ្សេងៗ ដូចជា ៖ iPhone, iPad និង Mac ។

ក្រុមហ៊ុន Apple បញ្ជាក់ថា កម្មវិធី Apple Intelligence នឹងដាក់បន្ថែមជាមួយ Version ថ្មីក្នុងឧបករណ៍របស់ក្រុមហ៊ុន ។ កម្មវិធីនេះជួយការពារភាពឯកជនរបស់ Apple Intelligence ព្រមទាំងធ្វើឱ្យកម្មវិធីផ្សេងៗកាន់តែទំនើប ខណៈទិន្នន័យអ្នកប្រើប្រាស់ពុំត្រូវបានគេលួច ។ លើសពីនេះ កម្មវិធី GPT Chat នឹងត្រូវដាក់បញ្ចូលក្នុងឧបករណ៍របស់ Apple នាចុងឆ្នាំ២០២៤ ផងដែរ ។

ការប្រកាសពីកិច្ចសហការរវាងក្រុមហ៊ុន Apple និង Open AI បានធ្វើឱ្យលោក Elon Musk ឆ្លើយតបភ្លាមៗនៅលើបណ្តាញសង្គម X ថា ៖ «បើ Apple សហការជាមួយ Open AI ខ្ញុំនឹងហាមឃាត់ការប្រើប្រាស់ iPhone របស់ Apple ក្នុងក្រុមហ៊ុនរបស់ខ្ញុំ ពីព្រោះវាល្មើសសុវត្ថិភាព និងពុំអាចទទួលយកបាន ។ បើ Apple អភិវឌ្ឍកម្មវិធីជាមួយ Open AI ក្រុមហ៊ុនផ្សេងៗដែលមករក Apple នាថ្ងៃអនាគត នឹងត្រូវរក្សាទុកឧបករណ៍ Apple មួយកន្លែង» ៕

ប្រទេសអូទ្រីស ៖ សារព័ត៌មាន CNN រាយការណ៍ថា កាលពីថ្ងៃទី៩ ខែមិថុនា ឆ្នាំ២០២៤ យន្តហោះរបស់ក្រុមហ៊ុនអាកាសចរណ៍ Austrian Airlines ដែលដឹកអ្នកដំណើរចំនួន១៧៣នាក់ និងបុគ្គលិកអាកាសចរណ៍ចំនួន៦នាក់ បានជួបហេតុការណ៍នឹកស្មានពុំដល់បណ្តាលឱ្យកញ្ចក់បង្អួចមុខរបស់បន្ទប់អាកាសយានិក និងផ្នែកខាងមុខយន្តហោះខូចខាតធ្ងន់ធ្ងរ ។ ហេតុនេះ អាកាសយានិកព្យាយាមគ្រប់គ្រងស្ថានការណ៍ ដើម្បីឱ្យកុំអ្នកដំណើរមានគ្រោះថ្នា.ក់ ។

ហេតុការណ៍នេះបានកើតឡើងពេលយន្តហោះធ្វើដំណើរចាកចេញពីទីក្រុង Palma ប្រទេសអេស្ប៉ាញ ទៅកាន់ទីក្រុង Vienna ប្រទេសអូទ្រីស ក្រោយពេលជើងហោះហើរ OS434 ប្រភេទ Airbus A320 ជួបខ្យល់ព្យុះខ្លាំង ។ សំណាងល្អ អាកាសយានិកអាចបើកយន្តហោះចុះចតនៅអាកាសយានដ្ឋានទីក្រុង Vienna ដោយសុវត្ថិភាព និងគ្មានអ្នកដំណើរណាម្នាក់រងរបួសក្នុងហេតុការណ៍នេះទេ បើទោះជាមានការផ្តល់សញ្ញាអាសន្នក្នុងអំឡុងពេលហោះហើរក្តី ។

ព្រិលធ្លាក់ខ្លាំងពេកធ្វើឱ្យកញ្ចក់បង្អួចមុខរបស់បន្ទប់អាកាសយានិក និងផ្នែកខាងមុខយន្តហោះខូចខាតយ៉ាងធ្ងន់ធ្ងរ ។ ហេតុនេះ អាកាសយានិកក៏សម្រេចចិត្តបើកយន្តហោះឆ្លងកាត់ខ្យល់ព្យុះដោយមើលពុំឃើញផ្លូវ ដូចគ្នានឹងមនុស្សពិការភ្នែកដែរ ។ នៅទីបំផុត ពួកគេក៏អាចចុះចតយន្តហោះនៅអាកាសយានដ្ឋានដោយសុវត្ថិភាព ដោយប្រើប្រាស់ប្រព័ន្ធបញ្ជា និងឧបករណ៍ជំនួយ ។

ក្រុមហ៊ុន Austrian Airlines បានបញ្ជាក់ក្នុងសេចក្តីថ្លែងការណ៍ថា យន្តហោះ Airbus A320 ជើងហោះហើរ OS434 ខូចខាតធ្ងន់ធ្ងរដោយសារព្រិលធ្លាក់លើក្នុងពេលធ្វើដំណើរចេញពីទីក្រុង Palma ទៅទីក្រុង Vienna ។ ហេតុការណ៍នេះកើតឡើងក្រោយយន្តហោះជួបខ្យល់ព្យុះ ខណៈហោះជិតដល់ទីក្រុង Vienna ហើយអាកាសយានិកបញ្ជាក់ថា មើលពុំឃើញផ្លូវក្នុងរ៉ាដាទេ ។

សារព័ត៌មានបរទេសរាយការណ៍ថា ភ្នាក់ងារជំនាញនឹងស៊ើបអង្កេតករណីនេះបន្ថែមទៀតដើម្បីវាយតម្លៃការខូចខាត ។ រីឯអ្នកដំណើរពុំដឹងថា យន្តហោះខូចខាតផ្នែកខាងមុខធ្ងន់ធ្ងរឡើយ ។ ប៉ុន្តែពួកគេដឹងរឿងពេលចុះពីយន្តហោះ គឺឃើញភ្នាក់ងារសង្គ្រោះបន្ទាន់មកចាំទទួល និងឃើញយន្តហោះខូចខាតផ្នែកមុខ ។ អ្នកដំណើរនិយាយថា ក្រុមអាកាសយានិកបានបំពេញតួនាទីយ៉ាងល្អដើម្បីនាំយន្តហោះចុះចត ។

គេចាត់ទុកថា នេះជាសំណាងល្អមួយដែលគ្មានអ្នកដំណើររងរបួស រីឯយន្តហោះនឹងផ្អាកដំណើរការបណ្តោះអាសន្នរយៈពេលច្រើនសប្តាហ៍ ។ ក្រុមហ៊ុនអាកាសចរណ៍ពុំបានប្រកាសច្បាស់លាស់ថា ពួកគេនឹងជួសជុលយន្តហោះនេះឬយ៉ាងណាទេ ប៉ុន្តែបើតាមការសន្និដ្ឋាន គឺការជួសជុលនឹងចំណាយប្រាក់រាប់ម៉ឺនដុល្លារអាមេរិក ៕

ប្រទេសចិន ៖ ពិធីបុណ្យប្រណាំងទូកនាគអន្តរជាតិប្រចាំឆ្នាំរបស់ទីក្រុងហុងកុង បានរៀបចំឡើងកាលពីថ្ងៃទី១០ ខែមិថុនា ឆ្នាំ២០២៤ ។ គេចាត់ទុកថា ពិធីបុណ្យប្រណាំងទូកនាគឆ្នាំនេះរៀបចំអធិកអធមជាងបណ្តាឆ្នាំមុនៗ ដោយសារមានតំបន់ចំនួន២៩ របស់ហុងកុងរៀបចំពិធីនេះ ហើយខេត្តហ៊ូណាន ក៏បានប្រណាំងទូកនាគដូចគ្នាដែរ ។

ការប្រណាំងទូកនាគអន្តរជាតិដែលគ្រប់គ្នាឃើញនេះ បានរៀបចំឡើងនៅតំបន់អាប័រឌីនស្ថិតនៅភាគខាងត្បូងហុងកុង ដែលជាតំបន់មានទំហំធំជាងគេរបស់អ្នកនេសាទ ។ គេឃើញកីឡាករ-កីឡាការិនីរាប់រយនាក់បានចូលរួមប្រណាំងទូកនាគ នៅក្រោមសំឡេងគាំទ្ររបស់អ្នកទស្សនាយ៉ាងសប្បាយរីករាយ ។ អ្នកទស្សនាពិធីប្រណាំងទូកនាគ និយាយថា ពួកគេបានមកលេងពិធីបុណ្យនេះជារៀងរាល់ឆ្នាំ និងមានអារម្មណ៍រីករាយខ្លាំងណាស់ ។

ដោយឡែក ខេត្តហ៊ូណាន ក៏បានរៀបចំពិធីបុណ្យប្រណាំងទូកនាគអន្តរជាតិដូចគ្នាដែរ កាលពីសប្តាហ៍ទី១ ខែមិថុនា ឆ្នាំ២០២៤ ។ កីឡាករ-កីឡាការិនី ដែលមកចូលរួមប្រកួតនៅខេត្តហ៊ូណាន គឺមានអាយុលើសពី៤០ឆ្នាំ និងមានជំនាញអុំទូក ។ ហេតុនេះ កីឡាករមកចូលរួមប្រកួតមានទាំងអ្នកចូលនិវត្តន៍ពីការងារ, ពលករបរទេស និងស្ត្រីមេផ្ទះ ខណៈកីឡាករអាយុច្រើនបំផុត គឺមានអាយុ៥៧ឆ្នាំ និងអាយុតិចបំផុត៤៤ឆ្នាំ ។

ក្រៅពីនេះ តំបន់ជាច្រើនទៀតរបស់ប្រទេសចិន ក៏បានរៀបចំពិធីបុណ្យប្រណាំងទូកនាគអន្តរជាតិដូចគ្នាដែរ ។ ចិនបានប្រារព្ធពិធីប្រណាំងទូកនាគអន្តរជាតិអស់រយៈពេលជាង២.០០០ឆ្នាំហើយ ប៉ុន្តែកាលពី៤០ឆ្នាំមុន ហុងកុងបានរៀបចំការប្រណាំងទូកនាគបែបថ្មីឱ្យស្របនឹងស្ថានភាពបច្ចុប្បន្ន ។

ពិធីបុណ្យប្រណាំងទូកនាគ គឺស្រដៀងគ្នានឹងពិធីផ្សេងៗរបស់ចិនដែរ ប៉ុន្តែខុសប្លែកនៅត្រង់ការប្រណាំងទូកនាគ គេនិយមបរិភោគនំប៉ាក់ចាង និងផឹកស្រា ។ នំនេះធ្វើពីអង្ករដំណើបខ្ចប់ស្លឹកឫស្សី និងមានស្នូលខុសៗគ្នា ដូចជា ៖ សណ្តែកក្រហម, ពុទ្រា, សាច់ជ្រូក, ពងទាប្រៃ,ផ្សិត និងសាច់ក្រក បន្ទាប់មក គេយកវាទៅចំហុយ ឬស្ងោរ ។ ក្រៅពីនេះ ពលរដ្ឋចិនភាគច្រើននាំគ្នាទៅមាត់ទន្លេ ឬមាត់បឹង ដើម្បីចូលរួមអបអរ និងទស្សនាការប្រណាំងទូកនាគបុរាណ ។

ការប្រណាំងទូកនាគបានក្លាយជាពិធីល្បីល្បាញមួយនៅចិន គឺដើម្បីរំលឹកពីការធ្វើអត្តឃាតរបស់ Qu Yuan ពីព្រោះការប្រណាំងទូកមានលក្ខណៈស្រដៀងគ្នានឹងអ្នកស្រុកព្យាយាមតាមរកសពរបស់ Qu Yuan ក្នុងទឹកទន្លេ ។ មតិខ្លះទៀតថា ការធ្វើអត្តឃាតរបស់ Qu Yuan គ្រាន់តែជារឿងតំណាលប៉ុណ្ណោះ ពីព្រោះការប្រណាំងទូកនាគមានប្រវត្តិយូរយារហូតដល់២.០០០ឆ្នាំ ។

ចំណែកអ្នកជំនាញជឿថា ពិធីប្រណាំងទូកនាគមានដើមកំណើតពីការថ្វាយបង្គំសត្វនាគ ហើយខេត្តក្វាងទុង ស្ថិតនៅភាគខាងត្បូងប្រទេសចិន បានរៀបចំពិធីនេះមុនគេ ៕

ប្រទេសបេលីស ៖ The Great Blue Hole គឺជារណ្តៅយក្សពណ៌ខៀវក្នុងមហាសមុទ្រ ដែលមានទីតាំងនៅក្រៅឆ្នេរសមុទ្រប្រទេសបេលីស (Belize ជាប្រទេសស្ថិតនៅអាមេរិកកណ្តាល) និងនៅក្បែរចំណុចកណ្តាលកោះផ្កាថ្មឈ្មោះ Lighthouse Reef ។ មាត់រណ្តៅយក្សនេះមានរាងជារង្វង់មូល និងមានជម្រៅចុះទៅក្រោមស្មើនឹង១២៤ម៉ែត្រ (គឺមានកម្ពស់ស្មើអគារ៣៥ជាន់) ។

កន្លងមក ក្រុមអ្នកស្រាវជ្រាវបានយកថ្មពីបាតរណ្តៅទៅវិភាគឃើញថា រណ្តៅដ៏ធំក្នុងសមុទ្រនេះបានកើតឡើងរាប់ពាន់ឆ្នាំមកហើយ គឺមុនពេលវាក្លាយជារណ្តៅយ៉ាងជ្រៅបែបនេះ គឺវាធ្លាប់ជាល្អាងថ្មស្ថិតនៅលើកោះផ្កាថ្មពីមុន ។ ប៉ុន្តែពេលកម្រិតទឹកសមុទ្រកើនឡើងកាន់តែខ្លាំង ល្អាងថ្មនៅលើកោះក៏ត្រូវបានទឹកសមុទ្រជន់លិចទាំងស្រុង និងធ្វើឱ្យវាក្លាយជារណ្តៅមានជម្រៅយ៉ាងជ្រៅក្នុងទឹកសមុទ្រនាពេលបច្ចុប្បន្ន ។

រណ្តៅយក្ស The Great Blue Hole គឺជាផ្នែកមួយស្ថិតក្នុងការអភិរក្សផ្កាថ្មប្រភេទ Belize Barrier Reef Reserve System ដែលមានទំហំធំ និងត្រូវបានអង្គការយូណេស្កូចុះបញ្ជីជាសម្បត្តិបេតិកភណ្ឌពិភពលោក ។ រណ្តៅយក្សនេះ គឺជាតំបន់ទេសចរណ៍ដ៏ពេញនិយមសម្រាប់ភ្ញៀវទេសចរជ្រមុជទឹករាក់ និងទឹកជ្រៅ ខណៈបាតរណ្តៅជាជម្រករស់នៅរបស់សត្វសមុទ្រជាច្រើនប្រភេទ រួមទាំងត្រីឆ្លាមផងដែរ ។

សម្រាប់អ្នកជ្រមុជទឹកវិញចាត់ទុកថា រណ្តៅយក្សជាកន្លែងស្រាវជ្រាវនៅក្រោមទឹកយ៉ាងពិសេសមួយ ។ បើពួកគេចុះទៅក្នុងរណ្តៅកាន់តែជ្រៅ ពួកគេនឹងបានឃើញថ្មបុរាណជាច្រើនប្រភេទ ដែលថ្មទាំងនេះបានកើតឡើងតាំងពីសម័យរណ្តៅនៅជាល្អាងថ្មលើកោះមកម៉្លេះ ។ លើសពីនេះ ទឹកសមុទ្រក្នុងបរិវេណនេះមានសភាពថ្លាខ្លាំង ទើបធ្វើឱ្យអ្នកជ្រមុជទឹកអាចមើលឃើញសត្វសមុទ្រជាច្រើន ព្រមទាំងផ្កាថ្មមានសភាពរស់រវើក ។

ការចុះទៅក្នុងបាតរណ្តៅយក្ស គឺជាដំណើរផ្សងព្រេងមួយដែលធ្វើឱ្យគេភ្ញាក់ផ្អើលនឹងសម្រស់ដ៏ស្រស់ស្អាតរបស់ធម្មជាតិ និងភាពស្មុគស្មាញនៅបាតរណ្តៅ ។ ជារៀងរាល់ឆ្នាំ ភ្ញៀវទេសចរនិយមមកកម្សាន្តនៅទីនេះភាគច្រើន គឺចាប់ពីខែមេសា ដល់ខែមិថុនា ។

ភ្ញៀវទេសចរដែលចង់មកជ្រមុជទឹកក្នុងរណ្តៅនេះ ពួកគេត្រូវតែមានវិញ្ញាបនបត្របញ្ជាក់ថា ធ្លាប់ឆ្លងកាត់វគ្គបណ្តុះបណ្តាលជ្រមុជទឹក និងមានបទពិសោធន៍ ពីព្រោះមានតែអ្នកមានជំនាញខ្ពស់ប៉ុណ្ណោះ ទើបអាចជ្រមុជទឹកក្នុងរណ្តៅបាន ។ ក្រៅពីនេះ មុនពេលជ្រមុជទឹក ពួកគេក៏ត្រូវសង្កេតមើលអាកាសធាតុ និងជ្រើសរើសពេលវេលាល្អបំផុត ។

បើអ្នកជ្រមុជទឹកពុំចង់ពិបាកច្រើន គឺពួកគេអាចទំនាក់ទំនងក្រុមហ៊ុនទេសចរណ៍ជាច្រើនដែលផ្តល់សេវាកម្មផ្នែកនេះ ឬទំនាក់ទំនងជាមួយមគ្គុទ្ទេសក៍ទេសចរមានបទពិសោធន៍ ៕