អ្នកណាថាការពហិការរបស់បងប្អូនខ្មែរធ្វើអ្វីថៃមិនកើត? ឥឡូវនេះរដ្ឋាភិបាលថៃកំពុងជំរុញយ៉ាងខ្លាំងក្លាឱ្យប្រទេសវៀតណាមបើកចំហទីផ្សារ និងពង្រីកខ្សែសង្វាក់ផ្គត់ផ្គង់សម្រាប់ទំនិញនាំចូលរបស់ថៃ។ ការណ៍នេះត្រូវបានក្រុមអ្នកវិភាគមើលឃើញយ៉ាងច្បាស់ថា ជាការឆ្លើយតបជាយុទ្ធសាស្ត្ររបស់រដ្ឋាភិបាលថៃ ដើម្បីប៉ះប៉ូវការខាតបង់ និងការថយចុះនៃសេដ្ឋកិច្ចព្រំដែនជាមួយប្រទេសជិតខាង ជាពិសេសបន្ទាប់ពីក្រុមហ៊ុនយក្សថៃជាច្រើនបានរងការវាយប្រហារយ៉ាងដំណំពីចលនាពហិការមិនប្រើប្រាស់ទំនិញថៃរបស់ប្រជាពលរដ្ឋកម្ពុជា។

យោងតាមរបាយការណ៍ផ្លូវការពីទីភ្នាក់ងារសារព័ត៌មានជាតិថៃ (NNT) និងសារព័ត៌មាន The Nation កិច្ចព្រមព្រៀងកម្រិតខ្ពស់នេះត្រូវបានធ្វើឡើងនៅក្នុង «វេទិកាធុរកិច្ចថៃ-វៀតណាម» ក្នុងទីក្រុងបាងកក ក្រោមវត្តមានរបស់មេដឹកនាំកំពូលវៀតណាម លោក To Lam និងនាយករដ្ឋមន្ត្រីថៃ លោក Anutin Charnvirakul ។

នៅក្នុងជំនួបនោះ ភាគីថៃបានស្នើឱ្យវៀតណាមអនុវត្ត «ផែនការសកម្មភាពឆ្នាំ២០២៦–២០៣១» ដើម្បីលុបបំបាត់របាំងពាណិជ្ជកម្ម និងតភ្ជាប់ខ្សែសង្វាក់ផ្គត់ផ្គង់ឧស្សាហកម្មដើមទីរបស់ថៃ ដូចជា គ្រឿងបន្លាស់រថយន្ត គ្រឿងបង្គុំអេឡិចត្រូនិក គ្រាប់ជ័រ និងគីមីភណ្ឌ ចូលទៅក្នុងខ្សែសង្វាក់ផលិតកម្មរបស់វៀតណាម ក្នុងគោលបំណងរុញទំហំពាណិជ្ជកម្មទ្វេភាគីឱ្យសម្រេចបាន ២៥ ពាន់លានដុល្លារអាមេរិកក្នុងមួយឆ្នាំ។

ការងាកទៅពង្រឹងទីផ្សារវៀតណាមយ៉ាងតក់ក្រហល់ពីសំណាក់រដ្ឋាភិបាលថៃ ធ្វើឡើងបន្ទាប់ពីសេដ្ឋកិច្ចនាំចេញរបស់ថៃជួបការរង្គោះរង្គើ ដោយសារវិបត្តិជាមួយប្រទេសជិតខាង។ កាលពីពេលថ្មីៗនេះ ក្រុមហ៊ុនថាមពលយក្សរបស់ថៃ PTT (OR) ទើបតែបានដកថយទាំងជូរចត់ និងទទួលស្គាល់ថាប្រាក់ចំណេញរបស់ខ្លួនបានធ្លាក់ចុះរហូតដល់ ៤៤% ដោយសារតែការលក់នៅកម្ពុជាបាត់បង់អស់ជាងពាក់កណ្តាល ក្រោមឥទ្ធិពលនៃចលនាពហិការរបស់ពលរដ្ឋខ្មែរជុំវិញជម្លោះព្រំដែន។

ដើម្បីដោះស្រាយក្តីបារម្ភលើការធ្លាក់ចុះសេដ្ឋកិច្ចនេះ រដ្ឋាភិបាលថៃគ្មានជម្រើសអ្វីក្រៅពីការស្វែងរកដង្ហើមសេដ្ឋកិច្ចថ្មីនៅក្នុងតំបន់នោះឡើយ។ ការបើកផ្លូវទំនិញកាន់តែធំពីសំណាក់វៀតណាម ត្រូវបានរំពឹងថានឹងក្លាយជាទីផ្សារយុទ្ធសាស្ត្រថ្មីមួយជួយស្រោចស្រង់ឧស្សាហកម្មផលិតកម្មរបស់ថៃ ឱ្យរួចផុតពីវិបត្តិកកស្ទះទំនិញ និងការបាត់បង់ប្រាក់ចំណូលពីទីផ្សារកម្ពុជា និងទីផ្សារព្រំដែនដទៃទៀតដែលកំពុងមានអស្ថិរភាព។

សរុបសេចក្តីមក របត់នៃការប្រែប្រួលទីផ្សាររបស់យក្សសេដ្ឋកិច្ចថៃនៅពេលនេះ បានឆ្លុះបញ្ចាំងយ៉ាងច្បាស់ថា កម្លាំងនៃការគាំទ្ររបស់អតិថិជនពិតជាមានឥទ្ធិពលខ្លាំងក្លាបំផុត។ នេះគឺជាឱកាសមាស និងជាចំណុចរបត់ដ៏សំខាន់សម្រាប់ប្រជាពលរដ្ឋខ្មែរគ្រប់រូប ក្នុងការបន្តរួមរួមកម្លាំងគ្នាងាកមកគាំទ្រ ប្រើប្រាស់ និងលើកកម្ពស់ផលិតផលជាតិឱ្យកាន់តែខ្លាំងក្លាថែមទៀត ដើម្បីពង្រឹងរាជ្យភាពសេដ្ឋកិច្ច និងរួមចំណែកកសាងដង្ហើមសេដ្ឋកិច្ចក្នុងស្រុកឱ្យកាន់តែរឹងមាំប្រកបដោយនិរន្តរភាព៕

តារាសម្តែងចិន Sun Li បានធ្វើឱ្យអ្នកគាំទ្រមានការព្រួយបារម្ភបន្ទាប់ពីបានបង្ហាញថានាងបានរងរបួសសរសៃឈាមក្នុងភ្នែកបន្ទាប់ពីថតឈុតឆាកដ៏តានតឹងមួយក្រោមអាកាសធាតុក្តៅខ្លាំង។

នៅថ្ងៃទី ២៧ ខែឧសភា ពាក្យគន្លឹះទាក់ទងនឹងរបស់ Sun Li បានក្លាយជាប្រធានបទពេញនិយមនៅលើបណ្តាញសង្គមចិនបន្ទាប់ពីតារាស្រីរូបនេះបានចែករំលែកអំពីឧប្បត្តិហេតុមួយដែលនាងបានជួបប្រទះខណៈពេលកំពុងថតរឿងភាគថ្មីមានចំណងជើង «Survive» ។ យោងតាមសម្តីរបស់ Sun Li កាលពីមួយថ្ងៃមុននាងទើបតែបញ្ចប់ការថតឈុតឆាកដែលត្រូវបានចាត់ទុកថាជាឈុតឆាកដ៏ខ្លាំងក្លា និងតានតឹងបំផុតនៅក្នុងផលិតកម្មទាំងមូល។ តួអង្គរបស់នាងត្រូវស្រែកឥតឈប់ឈរ ខឹង និងបង្ហាញអារម្មណ៍ក្នុងកម្រិតខ្ពស់។

អាកាសធាតុក៏ក្តៅ និងសើមខ្លាំងផងដែរ ដែលបណ្តាលឱ្យទាំងនាង និងតារាសម្តែងផ្សេងទៀតនៅក្នុងឈុតឆាកមានអារម្មណ៍ក្តៅដោយសារពន្លឺព្រះអាទិត្យ។ រឿងភាគនេះកំពុងត្រូវបានថតនៅទីក្រុងសៀមិន ខេត្តហ្វូជាន ជាកន្លែងដែលសីតុណ្ហភាពពេលថ្ងៃត្រូវបានគេរាយការណ៍ថាមានចន្លោះពី ៣៦អង្សាសេ ទៅ ៣៨អង្សាសេ។ បន្ទាប់ពីបញ្ចប់ឈុតឆាក តារាស្រីរូបនេះបានផឹកថ្នាំរុក្ខជាតិមួយដបដើម្បីបំបាត់ភាពមិនស្រួល។ នៅព្រឹកបន្ទាប់ នាងបានរកឃើញស្នាមក្រហមមួយនៅក្នុងភ្នែករបស់នាងដោយសារតែសរសៃឈាមបែក។
នេះមិនមែនជាលើកទីមួយទេដែល Sun Li បានជួបប្រទះនឹងរបួសទាក់ទងនឹងភ្នែក។ កាលពីខែកញ្ញា ឆ្នាំ២០២៥ ពេលកំពុងលេងវាយសី នាងត្រូវបានបាល់បោះល្បឿនលឿនបុកចំភ្នែកខាងឆ្វេង បណ្តាលឱ្យហូរឈាមក្រោមភ្នែក។

គ្រូពេទ្យឯកទេសនិយាយថា ស្ថានភាពរបស់ Sun Li ទំនងជាហូរឈាមក្រោមស្រទាប់ភ្នែក។ នេះជាពេលដែលសរសៃឈាមតូចៗនៅក្រោមស្រទាប់ភ្នែកបែក ដែលបង្កើតជាចំណុចក្រហមគួរឱ្យកត់សម្គាល់នៅលើផ្នែកពណ៌សនៃភ្នែក។ ក្នុងករណីភាគច្រើន វាមិនប៉ះពាល់ដល់ការមើលឃើញទេ ហើយអាចជាសះស្បើយដោយខ្លួនឯងក្នុងរយៈពេលមួយទៅបីសប្តាហ៍។ វេជ្ជបណ្ឌិតបានបញ្ជាក់ថា មិនត្រឹមតែអាកាសធាតុក្តៅប៉ុណ្ណោះតែបរិស្ថានត្រជាក់ ក៏អាចបណ្តាលឱ្យសរសៃឈាមរួមតូចខ្លាំង ទំនងជាបង្កការខូចខាតកាន់តែច្រើន។

អ្នកជំនាញក៏បានណែនាំផងដែរថា ករណីភាគច្រើននៃការហូរឈាមក្រោមស្រទាប់ភ្នែកគឺជាករណីស្រាល ហើយអាចជាសះស្បើយដោយខ្លួនឯង។ ទោះជាយ៉ាងណាក៏ដោយ ប្រសិនបើស្ថានភាពនេះកើតឡើងញឹកញាប់ អមដោយការឈឺភ្នែក ការថយចុះការមើលឃើញ ការភ័យខ្លាចពន្លឺ ឬការហូរឈាមមិនធម្មតានៅផ្នែកផ្សេងទៀតនៃរាងកាយ អ្នកជំងឺគួរតែស្វែងរកការព្យាបាលពីគ្រូពេទ្យដើម្បីពិនិត្យ៕

រដ្ឋាភិបាលសហរដ្ឋអាមេរិក និងក្រសួងរតនាគារ បានរៀបចំផែនការបោះពុម្ពក្រដាសប្រាក់ «២៥០ដុល្លារថ្មី» ដែលមានរូបផ្ទៃមុខរបស់លោកប្រធានាធិបតី Donald Trump នៅលើនោះ ប៉ុន្តែរង់ចាំការអនុម័តច្បាប់ពីរដ្ឋសភាជាមុនសិន ។ គោលបំណងដាក់រូបប្រធានាធិបតីបច្ចុប្បន្នលើក្រដាសប្រាក់ គឺដើម្បីអបអរសាទរខួបលើកទី២៥០ឆ្នាំ នៃការប្រកាសឯករាជ្យរបស់សហរដ្ឋអាមេរិកនៅឆ្នាំ២០២៦ ។

រដ្ឋមន្ត្រីក្រសួងរតនាគារ លោក Scott Bessent បញ្ជាក់ថា ខាងរតនាគារបានរៀបចំរចនាក្រដាសប្រាក់រួចរាល់ហើយ ប៉ុន្តែរង់ចាំការអនុម័តច្បាប់ពីរដ្ឋសភាជាមុន ទើបអាចបោះពុម្ពចរាចរណ៍លើទីផ្សារបាន ។ ខាងរតនាគារមិនទាន់ច្បាស់ទេថា តើអាចបោះពុម្ពក្រដាសប្រាក់ថ្មីនេះឱ្យទាន់ខួបលើកទី២៥០ឆ្នាំ នៃការប្រកាសឯករាជ្យរបស់សហរដ្ឋអាមេរិក នៅថ្ងៃទី៤ ខែកក្កដា ឬក៏យ៉ាងណា ។ នេះបើតាមការចុះផ្សាយរបស់សារព័ត៌មាន BBC កាលពីថ្ងៃទី២៨ ខែឧសភា ឆ្នាំ២០២៦ ។

សំណើដាក់រូបលោក Trump លើក្រដាសប្រាក់ «២៥០ដុល្លារថ្មី» ទទួលបានគាំទ្រយ៉ាងច្រើនពីសំណាក់អ្នកនយោបាយគណបក្សសាធារណរដ្ឋ (Republican) និងអ្នកគាំទ្រ ថាវាជាក្រដាសប្រាក់ដ៏មានតម្លៃបំផុតសម្រាប់ប្រធានាធិបតី ពីព្រោះបានខិតខំប្រឹងប្រែងជំរុញសេដ្ឋកិច្ចជាតិ ហើយពលរដ្ឋមិនចាំបាច់កាន់ក្រដាសប្រាក់រាយច្រើន ។ ប៉ុន្តែក៏រងនូវការរិះគន់ និងប្រឆាំងយ៉ាងដាច់ខាតពីអ្នកនយោបាយគណបក្សប្រជាធិបតេយ្យ (Democrat) ផងដែរថា លោក Trump ផ្តោតតែលើការលើកតម្កើងខ្លួនឯង ពេលពលរដ្ឋកំពុងតែលំបាកដោយសារទំនិញឡើងថ្លៃ ។

យោងតាមច្បាប់របស់សហរដ្ឋអាមេរិក គឺហាមដាច់ខាតការបោះពុម្ពក្រដាសប្រាក់ដែលប្រើប្រាស់រូបភាពមនុស្សនៅរស់មានជីវិត ដើម្បីទប់ស្កាត់ការលើកតម្កើងបុគ្គលណាម្នាក់ ប៉ុន្តែសមាជិកសភាមកពីគណបក្សសាធារណរដ្ឋ ដែលគាំទ្រលោក Trump បានដាក់សំណើច្បាប់ដើម្បីស្នើសុំការលើកលែងនេះ ។

បើតាមមតិមហាជន ទោះជាសមាជិករដ្ឋសភាយល់ព្រមអនុម័តច្បាប់ឱ្យដាក់រូបលោក Trump នៅលើក្រដាសប្រាក់ «២៥០ដុល្លារថ្មី» ក៏ដោយ ប៉ុន្តែពិបាកនឹងទទួលការយល់ព្រមពីព្រឹទ្ធសភាណាស់ ពីព្រោះត្រូវការសំឡេងគាំទ្រភាគច្រើន ក្នុងនោះសមាជិកសភាមកពីគណបក្សប្រជាធិបតេយ្យបានជំទាស់រួចទៅហើយថា ពុំអាចទទួលយកបានឡើយ ៕

កាលពីថ្ងៃទី២៨ ខែឧសភា ឆ្នាំ២០២៦ អង្គការឧតុនិយមពិភពលោក (WMO) នៃអង្គការសហប្រជាជាតិបានព្រមានកម្រិតអាសន្នខ្ពស់បំផុត បន្ទាប់ពីប្រមូលទិន្នន័យការព្យាករអាកាសធាតុចុងក្រោយបង្អស់ថា ផែនដីនឹងឡើងកំដៅខ្លាំងបំផុតមិនធ្លាប់មានក្នុងប្រវត្តិសាស្ត្រ ចាប់ពីឆ្នាំ២០២៦នេះ រហូតដល់ឆ្នាំ២០៣០ ។ នៅឆ្នាំ២០៣០ គឺជាឆ្នាំដែលផែនដីក្តៅខ្លាំងជាងឆ្នាំណាៗទាំងអស់ ដោយសារបាតុភូត El Nino ។

អង្គការឧតុនិយមពិភពលោក (WMO) សហការជាមួយការិយាល័យឧតុនិយមប្រទេសអង់គ្លេស បានធ្វើរបាយការណ៍ព្យាករអាកាសធាតុប្រចាំឆ្នាំ ដោយការប្រមូលទិន្នន័យពីស្ថាប័នចំនួន១៣ នៅទូទាំងពិភពលោក រួមទាំងមជ្ឈមណ្ឌលចំនួន៤ រួមមាន ៖ Barcelona Supercomputer Centre, Canadian Centre for Climate Modelling and Analysis, Deutscher Wetterdienst និង Met Office ។

របាយការណ៍បញ្ជាក់ថា សីតុណ្ហភាពនៅលើផែនដីនឹងចាប់ផ្តើមកើនឡើងខ្ពស់ចាប់ពីឆ្នាំ២០២៦ ដល់ឆ្នាំ២០៣០ ហើយក្នុងឆ្នាំ២០៣០ ផែនដីនឹងឡើងកំដៅខ្លាំងបំផុតដោយសារបាតុភូត El Nino ដែលកើតឡើងនៅចុងឆ្នាំ២០២៦នេះ ។ រីឯតំបន់រងគ្រោះខ្លាំងជាងគេ រួមមាន ៖

-តំបន់អាកទិក ៖ នឹងឡើងកំដៅឆាប់រហ័សជាងតំបន់ផ្សេងៗរហូតដល់ជាង៣ដង បណ្តាលឱ្យទឹកកករលាយយ៉ាងលឿន
-តំបន់អឺរ៉ុបខាងជើង-ស៊ីបេរី ៖ មានកម្រិតទឹកជំនន់កើនឡើងខ្ពស់ខុសធម្មតា និង
-តំបន់ព្រៃអាម៉ាហ្សូន ៖ នឹងជួបគ្រោះរាំងស្ងួត និងភ្លើងឆេះព្រៃធ្ងន់ធ្ងរ ។

តាមការលើកឡើងរបស់ប្រធានអង្គការ WMO រលកកំដៅនៅអឺរ៉ុប គឺជាសញ្ញាដាស់តឿនពីគ្រោះថ្នាក់ធ្ងន់ធ្ងរនឹងកើតឡើង ជាពិសេស រលកកំដៅនឹងមានផលប៉ះពាល់មកដល់ការរស់នៅរបស់មនុស្ស និងសេដ្ឋកិច្ចប្រទេសជាច្រើន ដូចជា ៖ បណ្តាប្រទេសនៅអាស៊ី រួមទាំងឥណ្ឌា ។ ប្រទេសទាំងអស់នឹងត្រូវការពារជីវិតមនុស្ស អាជីវកម្ម និងសេដ្ឋកិច្ច កុំឱ្យរងផលប៉ះពាល់ពីរលកកំដៅខ្លាំងបណ្តាលមកពីបម្រែបម្រួលអាកាសធាតុ ។

កន្លងមក អ្នកវិទ្យាសាស្ត្របានដាស់តឿនពីការកើនឡើងនៃសីតុណ្ហភាពលើសពី១.៥អង្សាសេ ដែលធ្វើឱ្យពិភពលោកធ្លាក់ចូលក្នុងវិបត្តិកាន់តែធ្ងន់ធ្ងរ ទាំងរលកកំដៅ គ្រោះរាំងស្ងួត ខ្យល់ព្យុះ និងទឹកជំនន់ ។ នេះជាការដាស់តឿនថា ពិភពលោកកំពុងតែខិតជិតទៅចំណុចគ្រោះមហន្តរាយធ្ងន់ធ្ងរដែលមិនធ្លាប់កើតឡើងពីមុនមក ប្រសិនបើគ្មានវិធានការដោះស្រាយចាប់ពីពេលនេះទេនោះ ៕

ខេត្តស្រះកែវ៖ ក្រុមអាជីវករថៃនៅតាមបណ្តោយព្រំដែន នៅតែមានក្តីសង្ឃឹមថា ទំនាក់ទំនងរវាងកម្ពុជា និងថៃ នឹងល្អប្រសើរឡើងវិញក្នុងពេលឆាប់ៗខាងមុខ ដើម្បីអាចបើកច្រកព្រំដែនគោកឡើងវិញ និងជួយសង្គ្រោះសេដ្ឋកិច្ចថៃដុនដាប ដែលបានរងផលប៉ះពាល់យ៉ាងធ្ងន់ធ្ងរដោយសារជម្លោះព្រំដែន តាំងពីពាក់កណ្តាលឆ្នាំ២០២៥ កន្លងទៅ។

ក្នុងរយៈពេលជិត ១ឆ្នាំកន្លងមកនេះ ក្រុមអាជីវករថៃដែលធ្លាប់តែពឹងផ្អែកស្ទើរទាំងស្រុងលើការលក់ដូរទំនិញទៅឱ្យភ្ញៀវទេសចរកម្ពុជា និងបរទេស ត្រូវបាត់បង់ប្រាក់ចំណូល និងកំពុងប្រឈមមុខនឹងវិបត្តិជីវភាពយ៉ាងខ្លាំង។ ទោះបីជាព្រំដែនគោករវាងប្រទេសទាំងពីរបន្តបិទរហូតមកដល់ពេលនេះក្តី ប៉ុន្តែអាជីវករនៅក្នុងខេត្តស្រះកែវ និងខេត្តស៊ីសាកេត នៅតែផ្ញើក្តីសង្ឃឹមលើកិច្ចខិតខំប្រឹងប្រែងចរចាការទូតរវាងមេដឹកនាំនៃប្រទេសទាំងពីរ ដើម្បីស្វែងរកដំណោះស្រាយដោយសន្តិវិធី ក្រោមការគាំទ្រពីសហគមន៍អន្តរជាតិ។

ជាមួយគ្នានេះ ក្រុមអាជីវករបានទទូចឱ្យរដ្ឋាភិបាលក្រុងបាងកក បន្ធូរបន្ថយនយោបាយជាតិនិយមជ្រុល ហើយងាកមកបើកកិច្ចសន្ទនាដើម្បីបើកព្រំដែនគោកជាមួយកម្ពុជាឡើងវិញ ព្រោះការបិទច្រកព្រំដែនយូរអង្វែងបែបនេះ មិនមែនជាដំណោះស្រាយល្អនោះទេ។

តាមការលើកឡើងរបស់អាជីវករម្នាក់នៅខេត្តស្រះកែវ កាលពីថ្ងៃទី២៨ ខែឧសភា ឆ្នាំ២០២៦ បានឱ្យដឹងថា ចាប់តាំងពីមានការបិទព្រំដែនមក ការលក់ដូរបានធ្លាក់ចុះរហូតដល់ទៅជាង៨០% ដែលបណ្តាលឱ្យអាជីវកម្មជាច្រើនត្រូវដួលរលំជាបន្តបន្ទាប់ និងធ្លាក់ខ្លួនជំពាក់បំណុលគេយ៉ាងច្រើន។ ប្រភពដដែលបានបន្តថា ទោះជាក្រុមអាជីវករព្យាយាមបង្ហាញជំហរមិនគាំទ្រសង្គ្រាមក្តី ប៉ុន្តែបែរជារងការរិះគន់ពីក្រុមអ្នកជាតិនិយមខ្លះថា «មិនស្រឡាញ់ជាតិ» ទៅវិញ។ បច្ចុប្បន្ន ទោះបីជាស្ថានភាពតានតឹងបានធូរស្រាល ប៉ុន្តែពួកគេនៅតែបន្តបាត់បង់ប្រាក់ចំណូល ខុសស្រឡះពីក្រុមអ្នកញុះញង់ឱ្យមានជម្លោះ។

ក្រុមអាជីវករព្រំដែនបន្ថែមថា ក្រុមអ្នកជាតិនិយមជ្រុលមិនដែលយល់ពីទុក្ខលំបាក ឬការបាត់បង់ចំណូលរបស់ប្រជាពលរដ្ឋនៅតាមព្រំដែនឡើយ ដោយអ្នកទាំងនោះតែងតែផ្សព្វផ្សាយព័ត៌មានបំភ្លៃ និងព័ត៌មានក្លែងក្លាយនៅលើបណ្តាញសង្គម ដើម្បីធ្វើឱ្យស្ថានការណ៍ព្រំដែនឡើងកម្តៅមិនឈប់ឈរ និងញុះញង់ឱ្យមានការស្អប់ខ្ពើមគ្នា ដើម្បីតែផលប្រយោជន៍ផ្ទាល់ខ្លួន។ ផ្ទុយទៅវិញ ពលរដ្ឋនៅតាមព្រំដែនចាត់ទុកប្រជាជនកម្ពុជាជា «អ្នកជិតខាងល្អ» មិនមែនជាសត្រូវឡើយ ហើយសង្ឃឹមថា ថ្ងៃណាមួយ ពលរដ្ឋ​ប្រទេសទាំងពីរនឹងអាចត្រឡប់មកលក់ដូរ និងប្រាស្រ័យទាក់ទងគ្នាដូចដើមវិញ។

ពលរដ្ឋនៅខេត្តស្រះកែវ និងខេត្ត្តស៊ីសាកេត បានសំណូមពរទៅកាន់រដ្ឋាភិបាលថៃ ឱ្យងាកមកអភិវឌ្ឍន៍តំបន់ព្រំដែនជាតំបន់សេដ្ឋកិច្ច និងបើកឱកាសឱ្យមានការដោះដូរទំនិញឡើងវិញ បើទោះជាជម្លោះព្រំដែនមិនទាន់ដោះស្រាយរួចរាល់ទាំងស្រុងក្តី។ ពួកគេជឿជាក់ថា រដ្ឋាភិបាលនឹងមិនបណ្តោយឱ្យសេដ្ឋកិច្ចព្រំដែនធ្លាក់ចុះដុនដាបខ្លាំងជាងនេះ ក្រោមហេតុផលសន្តិសុខដែលប្រគល់អំណាចទាំងស្រុងទៅឱ្យកងទ័ពនោះទេ។

គួរបញ្ជាក់ផងដែរថា ការសម្រេចចិត្តបិទព្រំដែនគោកពីសំណាក់កងទ័ពថៃ កន្លងមក បានកាត់ផ្តាច់ដង្ហើមសេដ្ឋកិច្ចរបស់បណ្តាខេត្តថៃជាប់ព្រំដែនយ៉ាងធ្ងន់ធ្ងរ ព្រោះតែប្រទេសថៃជាភាគីនាំចេញទំនិញដ៏ធំមកកាន់ទីផ្សារកម្ពុជា។ ទោះជាយ៉ាងណាក៏ដោយ ជុំវិញបញ្ហានេះ នាយករដ្ឋមន្ត្រីថៃ លោក Anutin Charnvirakul ធ្លាប់បានបញ្ជាក់ជំហរថា ភាគីថៃមិនអាចបើកច្រកព្រំដែនឡើងវិញបានឡើយ លុះត្រាតែកម្ពុជាព្រមទទួលយកលក្ខខណ្ឌដែលកំណត់ដោយរដ្ឋាភិបាលក្រុងបាងកកជាមុនសិន៕