ប្រាក់ចំណូលរបស់ BTS លើសពី Taylor Swift និង BLACKPINK

ប្រាក់ចំណូលរបស់ BTS ក្នុងរយៈពេលមួយឆ្នាំកន្លងមកនេះត្រូវបានគេនិយាយថាបានវ៉ាដាច់តារាចម្រៀងលំដាប់ពិភពលោក Taylor Swift និងឈរនៅលំដាប់កំពូលនៃប្រាក់ចំណូលរបស់តារាល្បីៗនៅក្នុងប្រទេសកូរ៉េខាងត្បូង។

នៅក្នុងលក្ខណៈវិនិច្ឆ័យសម្រាប់ចំណាត់ថ្នាក់តារាល្បីៗចំនួន ៤០ រូបដែលមានឥទ្ធិពលបំផុតនៅក្នុងប្រទេសកូរ៉េខាងត្បូងក្នុងឆ្នាំ ២០២៦ ដែលទើបតែចេញផ្សាយថ្មីៗនេះដោយ Forbes Korea ក្រុម BTS ត្រូវបានគេដាក់ឈ្មោះថាជាតារាដែលរកចំណូលបានច្រើនជាងគេនៅក្នុងប្រទេសកូរ៉េខាងត្បូង។ ប្រាក់ចំណូលប៉ាន់ស្មាន (មុនបង់ពន្ធ) សម្រាប់តារាល្បីៗក្នុងឆ្នាំ២០២៥-២០២៦ គឺផ្អែកលើប្រភពចំណូលច្បាស់លាស់ផ្សេងៗដូចជា ការលក់តន្ត្រីឌីជីថល ការប្រគំតន្ត្រី ការបង្ហាញខ្លួននៅក្នុងកម្មវិធីផ្សាយ ការសម្តែងភាពយន្ត និងទូរទស្សន៍ ប្រាក់ខែប្រចាំឆ្នាំ និងសកម្មភាពផ្សាយពាណិជ្ជកម្ម។

BTS ត្រូវបានគេប៉ាន់ស្មានថាមានចំនួន ៣៣៤ ពាន់លានវ៉ុនប្រមាណ២២២លានដុល្លារត្រឹមតែប៉ុន្មានខែប៉ុណ្ណោះ បន្ទាប់ពីក្រុមនេះបានវិលត្រឡប់មកវិញជាផ្លូវការជាមួយសមាជិកទាំង៧នាក់ក្នុងខែមីនា ឆ្នាំ ២០២៦ ជាមួយនឹងអាល់ប៊ុម «Arirang»។ តួលេខនេះរួមបញ្ចូលទាំងការទូទាត់ជាមុនដ៏ច្រើនពីអាល់ប៊ុមថ្មី និងអត្ថប្រយោជន៍បន្ថែមដែលទទួលបានពីការបន្តកិច្ចសន្យាជាមួយដៃគូចែកចាយទូទាំងពិភពលោក។ លើសពីនេះ មានចំណែកប្រាក់ចំណេញសម្រាប់សិល្បករពី ៩យប់ដំបូងនៃការប្រគំតន្រ្តី «BTS World Tour Arirang» ។

ក្រៅពីតន្ត្រី ប្រភពចំណូលដ៏ធំមួយទៀតរបស់ BTS បានមកពីកិច្ចសន្យាផ្សាយពាណិជ្ជកម្មប្រណីតៗ។ សមាជិកទាំង៧នាក់បច្ចុប្បន្នមានកិច្ចសន្យាសរុបចំនួន ៣១ ជាមួយយីហោល្បីៗឈានមុខគេជាមួយនឹងប្រាក់បំណាច់ចាប់ពីរាប់សិបទៅរាប់រយពាន់លានវ៉ុនសម្រាប់កិច្ចសន្យាផ្តាច់មុខនីមួយៗ។ ប្រាក់ចំណូលរបស់ BTS ក៏រួមបញ្ចូលទាំងប្រាក់ចំណូលពីសិទ្ធិផ្សាយផ្ទាល់ទូទាំងពិភពលោក និងខ្សែភាពយន្តឯកសារដើមដែលទទួលបានដោយ Netflix ក៏ដូចជាការចែករំលែកប្រាក់ចំណូលពីការកែសម្រួលការប្រគំតន្ត្រីពីមុនៗផងដែរ។

យោងតាមចំណាត់ថ្នាក់សិល្បករតន្ត្រីដែលរកចំណូលបានខ្ពស់បំផុតឆ្នាំ ២០២៦ របស់ Forbes US សិល្បករដែលរកចំណូលបានខ្ពស់បំផុតរបស់ពិភពលោកបច្ចុប្បន្នគឺ The Weeknd ដែលមានចំណូលប្រហែល ២៩៨ លានដុល្លារ។ យោងតាមទស្សនាវដ្តី Forbes Korea ប្រាក់ចំណូលរបស់ BTS នៅឆ្នាំនេះបានវ៉ាដាច់ Taylor Swift ដែលជាប់ចំណាត់ថ្នាក់លេខពីរជាមួយនឹងប្រាក់ចំណូលប្រហែល ២០២ លានដុល្លារ។ Forbes Korea ព្យាករណ៍ថា នៅពេលដែល BTS បញ្ចប់ដំណើរទេសចរណ៍របស់ពួកគេនៅឆ្នាំ២០២៧ ក្រុមនេះអាចនឹងវ៉ាដាច់ The Weeknd ទៀតផង។

យោងតាម Forbes Korea ដដែលក្រុមចម្រៀងនារី BLACKPINK បានជាប់ចំណាត់ថ្នាក់លេខ២បន្ទាប់ពី BTS ជាមួយនឹងប្រាក់ចំណូលប៉ាន់ស្មានចំនួន ១៥១.៨ ពាន់លានវ៉ុន ប្រហែល១០០.៦ លានដុល្លារដោយបានចូលរួមជាផ្លូវការជាមួយរួមជាមួយតារាល្បីៗលំដាប់ពិភពលោកដូចជា Beyoncé និង Kendrick Lamar៕