នាថ្ងៃទី៧ ខែកក្កដា ឆ្នាំ២០២៤ នាយកដ្ឋានធនធានមនុស្ស ក្រសួងទេសចរណ៍ បានធ្វើការបដិសេធ ជុំវិញព័ត៌មានដែលថាមានមន្ត្រីជាច្រើនអ្នកស្នើសុំដករដ្ឋមន្ត្រីក្រសួងទេចរណ៍ លោក សុខ សូកេន។

ការចេញមុខបដិសេធនេះ ក្រោយពីសារព័ត៌មាន The Cambodia Daily បានចេញផ្សាយអត្ថបទមួយដោយលើកឡើងថា៖”មន្ត្រីជាច្រើននាក់ក្នុងក្រសួងទេចរណ៍ ស្នើឱ្យនាយករដ្ឋមន្ត្រី ដកដំណែងរដ្ឋមន្ត្រីក្រសួងទេចរណ៍ លោក សុខ សូកេន ព្រោះតែវិស័យទេសចរណ៍កម្ពុជាអាចដួលរលំ ដោយសាររដ្ឋមន្ត្រីម្នាក់នេះ”។

ពាក់ព័ន្ធនឹងករណីនេះ នាយកដ្ឋានធនធានមនុស្ស ក្រសួងទេសចរណ៍ បានធ្វើការច្រានចោល និងបដិសេធ ជុំវិញការបំផ្លើស និងបំភ្លៃការពិត ដែលមានចេតនាញុះញង់ ធ្វើឱ្យសាធារណជនមានការភាន់ច្រឡំ នាំឱ្យប៉ះពាល់ដល់ការដឹកនាំ៕

កាលពីម្សិលមិញ មនុស្សម្នាជាច្រើនផ្អើលភ្លុកទឹកភ្លុកដីទៅមើលល្ខោនបាសាក់វង់ ភី សុគន្ធី ដែលបានបោះទីតាំងសម្តែងនៅក្នុងផ្សារទំនើប Aeon 3 ខណៈក៏ទទួលបាននូវការសរសើរនិងជាទីចាប់អារម្មណ៍យ៉ាងខ្លាំងក្នុងចំណោមមហាជន ព្រោះថាទិដ្ឋភាពបែបនេះស្ទើរតែមិនធ្លាប់មានពីមុនមកនោះទេ។

កាលពីវេលាម៉ោង ៥:៣០នាទីល្ងាច នាថ្ងៃទី៧ ខែកក្កដា ឆ្នាំ២០២៤នេះ នៅឯផ្សារទំនើបអ៊ីអនមានជ័យ ឬអ៊ីអន៣ គឺមានការសម្តែងល្ខោនបាសាក់វង់ ភី សុគន្ធី ដ៏ល្បីល្បាញបំផុតនៅក្នុងប្រទេសកម្ពុជា។ ខណៈក៏ទទួលបាននូវការគាំទ្រយ៉ាងច្រើនផុសផុលក្នុងចំណោមមហាជនខ្មែរ ផ្អើលភ្លុកទឹកភ្លុកដីទៅរងចាំមើលការសម្តែងល្ខោន ដែលជាសិល្បៈវប្បធម៌ខ្មែរយើង ពេញមួយផ្សារទំនើបតែម្តង។

ដោយសង្កេតឃើញថា មនុស្សម្នានៅទីនោះ មានទំាងក្មេងចាស់ប្រុសស្រីហាក់ជក់ចិត្តដិតអារម្មណ៍យ៉ាងខ្លាំង បើទោះជាទំនៀមទម្លាប់តាំងពីបុរាណកាលមក រោងល្ខោននានាតែងតែប្រព្រឹត្តិទៅតាមរោងបុណ្យឬក៏វត្តអារាមជាដើម។ ប៉ុន្តែលើកនេះ រៀងប្លែកបន្តិច ព្រោះថារោងល្ខោនត្រូវបានបោះទីតាំងនៅចំកណ្តាលផ្សារទំនើបដ៏ធំមួយតែម្តង ប្រកបដោយផាសុខភាព ម៉ាស៊ីនត្រជាក់យ៉ាងត្រជាក់រហឹម ស្របពេលដែលការសម្តែងល្ខោនប្រព្រឹត្តិទៅដោយរលូនទៀត វាប្រៀបដូចនឹងចំណីចក្ខុដ៏វិសេសវិសាល។

ដោយសង្កេតឃើញថា មនុស្សម្នាភាគច្រើនក៏បានយកកន្ទេលមកសម្រាប់ក្រាលអង្គុយមើលល្ខោនបានយ៉ាងស្រួលខ្លួន ដែលប្រៀបដូចនឹងពេលដែលពួកគេមើលនៅតាមទីអារាមនានាដែរ។ តាមរយៈរូបភាពទាំងនេះ គឺបានឆ្លុះបញ្ចាំងអំពីទឹកចិត្តស្រលាញ់សិល្បៈល្ខោនខ្មែរដែលនៅតែរក្សាទុកក្នុងដួងចិត្តកូនខ្មែរគ្រប់ៗរូប មិនដែលភ្លេចនិងចងចាំជានិច្ច តាំងពីសម័យបុរាណកាលបន្តរហូតមកដល់សម័យទំនើបនាពេលបច្ចុប្បន្ន។

ជាមួយគ្នានោះ បន្ទាប់ពីរូបភាពទាំងនោះបានចែកចាយទៅ អ្នកលេងបណ្តាញសង្គមជាច្រើនក៏បានចូលទៅបញ្ចេញមតិកោតសរសើរព្រោងព្រាតទាំងចំពោះការរៀបចំរបស់ផ្សារទំនើបអ៊ីអន៣ និងវង់ល្ខោនបាសាក់ ដោយមតិមួយបានលើកឡើងថា« Wow មិននឹកស្មានបានឃើញរូបភាពបែបនេះក្នុងពេលបច្ចុប្បន្ន»។ អ្នកខ្លះថា«មើលល្ខោន មានម៉ាស៊ីនត្រជាក់ មិនហត់បក់ដូចមុន that’s amazing»។ អ្នកខ្លះទៀតថា«ខ្ញុំឈរមើលបានមួយភ្លេតដែរ ល្បីដូចគេថាមែន ទាំងតួ ទាំងភ្លេង ទាំងរៀបចំឆាក ល្អម៉ាចប់»។

អ្នកខ្លះថា«ខ្ញុំឃើញចឹងនឹកកាលនៅតូចៗ គេមកលេងល្ខោន ដឹងតែយកកន្ទេលទៅក្រាលចាំមើលហើយ»។ មតិមួយទៀតលើកឡើងថា«គាំទ្រអោយមានការធ្វើបែបនេះអោយច្រើន ទើបហៅថាអភិរក្សពិត»៕

គម្រោងសាងសង់ស្ពានឆ្លងកាត់ទន្លេមេគង្គពីដីឥដ្ឋ តភ្ជាប់ទៅផ្លូវល្បឿនលឿនភ្នំពេញបាវិត ស្ថិតក្នុងដំណាក់កាលសាងសង់ផែបណ្តោះអាសន្ន ដើម្បីរៀបចំឧបករណ៍ខួងគ្រឹះសសរស្ពាន។

ស្ពានឆ្លងកាត់ទន្លេមេគង្គដីឥដ្ឋ-ថ្មគរ ជាប្រភេទស្ពានបេតុងដោយតួស្ពាន និងផ្លូវតភ្ជាប់ក្បាលស្ពានមានប្រវែងសរុប ៣ ៧០០ម៉ែត្រ, តួស្ពានមានប្រវែងសរុប ១ ៦០០ម៉ែត្រ និងទទឹង២៦ម៉ែត្រ ព្រមទាំងសាងសង់ស្ពានអាកាសរំលងផ្លូវជាតិលេខ១ ប្រវែង ១២០ម៉ែត្រ ដោយប្រើប្រាស់ថវិការជាតិអស់២០០លានដុល្លារ និងចំណាយពេល៤៨ខែ។

បើតាមឯកឧត្ដម ស៊ុន ចាន់ថុល បានលើកឡើងថា៖”ក្នុងគម្រោងផ្លូវល្បឿនលឿនភ្នំពេញ-បាវិត នឹងត្រូវសាងសង់ស្ពានមួយកន្លែងនៅតំបន់ឃុំដីឥដ្ឋ ស្រុកកៀនស្វាយ ដើម្បីឆ្លងកាត់ទន្លេមេគង្គ ឆ្ពោះទៅតំបន់ល្វាឯម ខេត្ដកណ្ដាល ដែលក្បែរនឹងផ្លូវក្រវាត់ ក្រុងទី៣។”

គួរបញ្ជាក់ថា ផ្លូវល្បឿនលឿន ជាថវិកាផ្នែកឯកជនគ្រោងចំណាយអស់ប្រហែល ១៤០០លានដុល្លារ ដោយឡែកស្ពានតភ្ជាប់ផ្លូវល្បឿនលឿនជាថវិការរដ្ឋគ្រោងចំណាយប្រហែល ២០០លានដុល្លារ ក្រោយការសាងសង់ ពលរដ្ឋធ្វើដំណើរដោយមិនចាំបាច់បង់ប្រាក់នោះទេ៕

ខ្នងផ្សារ ប្រៀបបានទៅនឹងឋានសួគ៌ក្រោមមេឃ ដែលមានទីតាំងស្ថិតនៅក្នុងភូមិតាំងបំពង់ តំបន់រលាក់កងជើង ឃុំតាសាល ស្រុកឱរ៉ាល់ ខេត្តកំពង់ស្ពឺ ដែលទីនោះគឺជាទីតាំងប្រសព្វគ្នារវាងមុំ៣ ភ្ជាប់ខេត្តបីគឺកំពង់ស្ពឺ កោះកុង និងពោធិ៍សាត់។

ខ្នងផ្សារ នេះគឺជាពាក្យដែលចាស់ៗហៅតាំងពីយូរណាស់រហូតមកដល់សព្វថ្ងៃ ហើយនៅឆ្នាំ១៩៩៣ ឬមុនឆ្នាំ១៩៩៣ សម័យខ្មែរក្រហមនៅទីនេះគឺជាទីតាំងលក់ដូរទំនិញតិចតួចជាលក្ខណៈគ្រួសាររបស់បងប្អូនអ្នកភូមិដែលរស់នៅទីនេះ ទើបគេហៅទីនេះថា ខ្នងផ្សារ ផ្សារនេះគឺជាផ្សារលក់ដូរ មិនមែនឈឺផ្សា ផ្សាដែក ឬខ្នងសា នោះទេ។

នៅពេលដែលភ្ញៀវទេសចរបានឡើងទៅដល់លើកំពូលភ្នំ នឹងអាចគយគន់ពីទិដ្ឋភាពធម្មជាតិដ៏ខៀវស្រងាត់ គ្របដណ្តប់ដោយវាលស្មៅបៃតងខៀវខ្ចី ក៏ដូចជាស្រូបយកនូវជំនោរទឹកសន្សើម និងអ័ព្ទផ្សែង ខ្យល់ត្រជាក់នាព្រឹកព្រលឹមស្រាងៗ ជាពិសេសនៅក្នុងរដូវវស្សារ ធានាថានឹងទទួលបាននូវបរិយាកាសដ៏វិសេសវិសាលបំផុត។ នៅទីនោះគឺវាសាកសមបំផុតសម្រាប់អ្នកដែលស្រលាញ់ដំណើរកម្សាន្តបែបផ្សងព្រេង ព្រៃព្រឹក្សា និងចង់ទទួលបានបទពិសោធន៍ថ្មីៗពីការឡើងភ្នំធានាថាមិនខកបំណងឡើយ។

បើយោងតាមរូបភាពចែកចាយពីបណ្តាញសង្គម នារដូវវស្សារឆ្នាំនេះខ្នងផ្សារហាក់ទទួលបានបាននូវការចាប់អារម្មណ៍យ៉ាងខ្លាំង ដោយសង្កេតឃើញថា ភ្ញៀវទេសចរជាច្រើនបាននាំគ្នាសម្រុកទៅបោះតង់គយគន់ទេសភាពនៅលើខ្នងផ្សារនេះជាជួរៗតែម្តង។ ខណៈក៏បានលើកឡើងជាមតិសរសើរព្រោងព្រាតពីភាពល្អឯកនៅលើកំពូលភ្នំមួយនេះ ដែលបង្កើតជាអនុស្សាវរីយដែលមិនអាចបំភ្លេចបាន ទៅហើយនឹកចង់ទៅម្តងទៀតគ្រប់ៗគ្នា។

ចំពោះផ្លូវឆ្ពោះទៅកាន់ខ្នងផ្សារនេះវិញ គឺយើងត្រូវធ្វើដំណើរកាត់តាមផ្លូវជាតិលេខ៤ ទៅកាន់ទីរួមខេត្តកំពង់ស្ពឺ បន្ទាប់ពីឆ្លងស្ពានខេត្តកំពង់ស្ពឺប្រមាណជាង ១គីឡូ រួចបត់តាមស្តុប តេលា (ច្បារមន) ទៅស្តាំ ប្រមាណ១គីឡូ យើងនឹងឃើញផ្លូវបត់ឆ្វេងដែលមានស្លាកសញ្ញាប្រាប់ផ្លូវទៅ ឱរ៉ាល់ ។ បត់ចូលតាមច្រកឱរ៉ាល់ (ផ្លូវ៤៤) ប្រហែល ៥០គីឡូ យើងនឹងដល់រង្វង់មូលឱរ៉ាល់ រួចយើងបន្តដំណើរទៅមុខ តាមផ្លូវលំ ប្រមាណ ៣៥គីឡូ ដោយជិះកាត់ តេទឹកពុះ យើងនឹងទៅដល់ ភូមិរលាក់កងជើង ដែលជាភូមិនៃភ្នំខ្នងផ្សារ៕

រូបភាព៖  Everlasting Trip

រមនីយដ្ឋានបុរេប្រវត្តិភ្នំក្បាលរមាស ត្រូវបានគេស្គាល់ថាជា ភ្នំក្បាលរមាស ឬភ្នំនាងសេដាឱន ដែលមានទីតាំងស្ថិតនៅក្នុងភូមិបុះត្របែក ឃុំត្រពាំងព្រីង ស្រុកទឹកឈូ ខេត្តកំពត និងមានចម្ងាយប្រមាណ ៨ គីឡូម៉ែត្រពីរង្វង់មូលធូរេន។

ភ្នំក្បាលរមាស មានអាយុកាលប្រហែលមុនគ្រឹស្កសករាជ ៥០០០ ឆ្នាំមកហើយ និងជាភ្នំដែលមានប្រវត្តិដ៏យូរលង់មួយ យោងទៅតាមការសិក្សាស្រាវជ្រាវអំពីវត្ថុបុរាណដែលនៅទីនោះ។ ផ្អែកតាមគំនូសស្នាមបានបង្ហាញថាប្រាសាទនេះត្រូវបានកសាងក្នុងរូងភ្នំ ហើយប្រជាជនមានជំនឿថាវាជាកន្លែងដ៏សក្ត័សិទ្ធមួយផងដែរ។

នៅទីនោះ ភ្ញៀវទេសចរក៏អាចរីករាយជាមួយនឹងសកម្មភាពជាច្រើនដូចជា ទស្សនារូងភ្នំ ប្រាង្គ ប្រាសាទបាក់បែក ថ្មផូស៊ីល ការឡើងដើរឆ្លងតាមជ្រលងភ្នំដោយខ្សែកាបសុវត្ថិភាព ការសម្រូតខ្លួនចុះពីកំពូលភ្នំ ការឡើងជញ្ជាំងថ្មជាដើម។ បន្ថែមពីនេះ នៅលើកំពូលភ្នំ អ្នកក៏អាច គយគន់ទេសភាពនានាដូចជា ចម្ការម្រេច ភ្នំបូកគោ និងទេសភាពខេត្តកែបផងដែរ។

យ៉ាងណាមិញ បច្ចុប្បន្ននេះ រមនីយដ្ឋានបុរេប្រវត្តិភ្នំក្បាលរមាស កំពុងតែទទួលបាននូវការចាប់អារម្មណ៍កាន់តែខ្លាំងឡើងបន្ថែមទៀត បន្ទាប់ពីកីឡា ទេសចរណ៍ឡើងជញ្ជាំងភ្នំត្រូវបានបង្កើតឡើង។ ខណៈក៏ទទួលបាននូវការគាំទ្រយ៉ាងច្រើនផុសផុលក្នុងចំណោមភ្ញៀវទេសចរទាំងជាតិនិងអន្តជាតិ ដែលចូលចិត្តដំណើរកម្សាន្តបែបផ្សងព្រេងនិងចង់ទទួលបានបទពិសោធន៍ថ្មីៗ។

បើយោងតាមការបញ្ជាក់ពីលោកអ៊ឹម ច័ន្ទសោធន អភិបាលនៃគណៈអភិបាលស្រុកទឹកឈូ ខេត្តកំពត កាលពីពេលថ្មីៗនេះបានឲ្យដឹងថា បច្ចុប្បន្ន ផ្លូវទៅកាន់ភ្នំនេះ កំពុងស្ថាបនាជាផ្លូវបេតុង កៀកនឹងរួចរាល់នៅចុងឆ្នាំនេះហើយ ដែលនឹងបង្កនូវភាពងាយស្រួលដល់បងប្អូនដែលមានបំណងចង់ទៅកម្សាន្តនៅរមនីយដ្ឋាននេះផងដែរ៕