Cristiano Ronaldo ដែលជាកីឡាករបាល់ទាត់ដ៏មានឥទ្ធិពលម្នាក់របស់ពិភពលោក មិនត្រូវបានអនុញ្ញាតឱ្យបង្កើត Channel YouTube ឬគណនី TikTok ទេឡើយ ដោយសារហេតុផលទាំងនេះ។
ប្រិយមិត្តដែលជាអ្នកគាំទ្របាល់ទាត់ប្រាកដជាបានដឹងហើយថា កាលពីពេលថ្មីៗនេះខ្សែប្រយុទ្ធវ័យ ៣៩ ឆ្នាំរបស់ព័រទុយហ្គាល់ ទើបតែធ្លាក់ចេញពីពាន Euro 2024 ដោយបាល់កាត់សេចក្ដី ១១ ម៉ែត្រក្នុងលទ្ធផល ៥ ទល់នឹង ៣ ដែលនេះគឺជាការបង្ហាញខ្លួនលើកចុងក្រោយរបស់លោកនៅក្នុងអាជីព។

ថ្វីត្បិតតែ Cristiano Ronaldo ជិតបញ្ចប់អាជីពរបស់លោកក៏ដោយ ប៉ុន្តែកេរ្តិ៍ឈ្មោះដ៏អស្ចារ្យដែលលោកបានសាងកំឡុងពេលអាជីពជាកីឡាកររបស់លោកមិនថមថយឡើយ។ អស់រយៈពេលជាច្រើនឆ្នាំមកនេះ Ronaldo នៅតែស្ថិតក្នុងបញ្ជីមានអ្នកតាមដានច្រើនជាងគេបំផុតនៅក្នុងបណ្តាញសង្គម ដោយមាន ៦៣៤ លាននាក់នៅលើ Instagram, និង ១៧០ លាននាក់នៅលើ Facebook រួមទាំង ១១២ លាននាក់នៅលើបណ្តាញសង្គម X ។

បើយោងតាម CNN ប្រសិនបើកីឡាកររូបនេះបង្កើត Channel YouTube ឬគណនី TikTok នោះវីដេអូលោកនឹងទាក់ទាញអ្នកជាវ ក៏ដូចជាមានអ្នកមើលច្រើនជាងគេ ដែលជាមូលហេតុអាចប៉ះពាល់ដល់ហិរញ្ញវត្ថុរបស់វេទិកា។ គួររំលឹកដែរថា កាលពីឆ្នាំ ២០២៣ Ronaldo បានបើកគណនី TikTok ហើយភ្លាមៗនោះ មានអ្នកតាមដានរាប់លាននាក់ ដោយវីដេអូរបស់លោកនីមួយៗ ត្រូវបានគេមើលរាប់លានដងឯណោះ។ ទោះជាយ៉ាងណានៅទីបំផុត TikTok ក៏បាន “ហាមឃាត់” គណនីរបស់លោកដោយមិនបានប្រកាសជាសាធារណៈអំពីមូលហេតុនោះទេ។

ប៉ុន្តែប្រភពជាច្រើននៅក្នុងពិភពកីឡាបាននិយាយថា ប្រជាប្រិយភាពរបស់ខ្សែប្រយុទ្ធវ័យ ៣៩ ឆ្នាំរូបនេះគឺអាចធ្វើឱ្យមានភាពតានតឹងដល់ហិរញ្ញវត្ថុរបស់ TikTok ។ ដូច្នេះដោយសារមូលហេតុទាំងនេះហើយ ទើបវេទិកា YouTube និង TikTok ហាមឃាត់ Cristiano Ronaldo មិនឱ្យបង្កើត Channel YouTube ឬគណនី TikTok ឡើយ នេះបើយោងតាមការចុះផ្សាយរបស់ CNN កាលពីដើមខែកក្កដា ឆ្នាំ២០២៤៕

កាលពីវេលាម៉ោង៨:៤០នាទីយប់ នាថ្ងៃទី៦ ខែកក្កដា ឆ្នាំ២០២៤នេះ មានករណីអគ្គី.ភ័យឆា.បឆេះ.យ៉ាងសន្ធោរ.សន្ធៅមួយបានកើតឡើងនៅ‌សហគមន៍ត្រកផូ ផ្លូវយ៉ាវរ៉ាត់ ដែលត្រូវបានគេស្គាល់ថាជាតំបន់ China Town កណ្តាលទីក្រុងបាំងកក បណ្តាលឲ្យមនុស្ស៥នាក់បានរ.ងរបួស និងមនុស្សប្រហែល ៣០ នាក់ទៀតបានរងផលប៉ះ.ពាល់ដោយសារផ្សែងភ្លើង ខណៈភ្លើ.ងក៏បានឆាប.ឆេះ.ធ្វើឲ្យខូ.ចខាតផ្ទះនិងអគារជាច្រើននៅបរិវេណនោះ។

យោងតាមប្រភពសារព័ត៌មានថៃ The Nation បានឲ្យដឹងថា ដំបូងឡើយ អគ្គីភ័យបានឆាបឆេះនៅផ្តើមចេញពីផ្ទះលេខ១២ នៅសហគមន៍ត្រកផូ ផ្លូវយ៉ាវរ៉ាត់នោះ។ រថយន្តពន្លត់អគ្គីភ័យនិងក្រុមអ្នកសង្រ្គោះក៏បានទៅចុះជួយបាញ់ទឹកពន្លត់ភ្លើង ប៉ុន្តែវាក៏បានឆ្លងចរន្តអគ្គិសនី បណ្តាលឲ្យដាច់ចរន្តអគ្គិសនីថែមមួយតង់ទៀត។

ក្រុមអ្នកពន្លត់អគ្គីភ័យបានព្យាយាមប្រើប្រាស់ទឹកដើម្បីការពារកុំឱ្យអណ្តាតភ្លើងរាលដាលដល់អគារក្បែរនោះ ប៉ុន្តែខ្យល់បក់យ៉ាងខ្លាំងបានរាលដាលយ៉ាងលឿនដល់សណ្ឋាគារ New Empire ដែលនៅជាប់សហគមន៍ ភោជនីយដ្ឋាន Tai Xing Hotpot និង Dim Sum និងទីតាំងនៅជិតៗនោះទៀតក៏បានរងការខូចខាតជាបន្តបន្ទាប់។

យ៉ាងណាមិញ នៅវេលាប្រមាណនឹងម៉ោង១០និង៣០នាទីយប់ថ្ងៃកើតហេតុ ទើបក្រុមពន្លត់អគ្គីភ័យបានពន្លត់ភ្លើងអស់ជាស្ថាពរ ដែលត្រូវចំណាយឡានទឹកប្រមាណនឹង៤០គ្រឿង។ ខណៈមនុស្សប្រមាណ ៣០០នាក់ ត្រូវបានគេជម្លៀសចេញក្នុងអំឡុងពេលនោះ ដើម្បីឆ្ពោះទៅកាន់កន្លែងដែលមានសុវត្ថិភាព ហើយអាជ្ញាធរក្រុងបាំងកកក៏បានប្រកាសបិទផ្លូវ Yaowarat នេះជាបន្តោះអាសន្នសិន ក៏ដូចជាកំពុងធ្វើការវាយតម្លៃការខូចខាតទាំងមូលនៅទីនោះ។

បើយោងតាមសេចក្តីរាយការណ៍បឋម គឺមានផ្ទះប្រជាជនប្រមាណនឹង៦៥ខ្នងហើយបានរងនូវការខូចខាត ខណៈដែលអ្នកចុះឈ្មោះសុំសំណងតាមរយៈហេតុការណ៍នេះ គឺមានប្រមាណនឹង២០០នាក់ផងដែរ៕

ប្រទេសកូរ៉េខាងត្បូង ៖ កាលពីថ្ងៃទី៧ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា ភ្នាក់ងារសុវត្ថិភាពចំណីអាហារកូរ៉េខាងត្បូងបានប្រកាសប្រមូលគីមឈីពីផ្សារមកវិញជាបន្ទាន់ ក្រោយពីពលរដ្ឋប្រមាណ១ពាន់នាក់ ត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យ ដោយសារអាការៈពុលចំណីអាហារ ។ អាជ្ញាធរបញ្ជាក់ថា ករណីនេះពាក់ព័ន្ធនឹងការបរិភោគគីមឈី ផ្ទុកមេរោគណូរ៉ូ ។

អាជ្ញាធរទីក្រុង Namwon ស្ថិតនៅភាគនិរតីប្រទេសកូរ៉េខាងត្បូង បានប្រកាសកាលពីព្រឹកថ្ងៃ៥ ខែកក្កដា ថា មានអ្នកពុលចំណីអាហារ ចំនួន៩៩៦នាក់ ។ បន្ទាប់មក នៅរសៀលថ្ងៃទី៦ ខែកក្កដា សារព័ត៌មានកូរ៉េខាងត្បូងរាយការណ៍ថា ចំនួនអ្នកជំងឺបានកើនឡើងរហូតដល់១.០២៤នាក់ ។

អាជ្ញាធរបញ្ជាក់ថា មូលហេតុធ្វើឱ្យមនុស្សជាច្រើនពុលចំណីអាហារ ដោយសារពួកគេបរិភោគគីមឈី ពេលអាហារថ្ងៃត្រង់របស់សាលារៀនមួយក្នុងទីក្រុង ដែលមានកូនសិស្ស និងបុគ្គលិកសាលារៀន ចំនួន២៤កន្លែង មានអាការៈក្អួតចង្អោរ និងឈឺពោះ ។

ណូរ៉ូ គឺជាមេរោគមួយឆាប់ឆ្លងពីមនុស្សម្នាក់ទៅមនុស្សម្នាក់ទៀត ហើយវាអាចឆ្លងតាមរយៈការប៉ះពាល់វត្ថុកខ្វក់ ដូចជា ៖ កន្លែងចុចទឹកបង្គន់ និងការប៉ះពាល់អ្នកឆ្លងមេរោគនេះ ។ បើទោះជាមនុស្សភាគច្រើនបានជាសះស្បើយក្នុងរយៈពេលខ្លី ដោយពុំចាំបាច់ទៅព្យាបាលនៅមន្ទីរពេទ្យក្តី ប៉ុន្តែអ្នកជំងឺខ្លះក៏មានអាការៈធ្ងន់ធ្ងរដែរ ។

អាជ្ញាធរទីក្រុង Namwon បានចាប់ផ្តើមស៊ើបអង្កេតដើម្បីស្វែងរកប្រភពមេរោគ ក្រោយរកឃើញពលរដ្ឋកូរ៉េខាងត្បូងឆ្លងមេរោគនេះយ៉ាងឆាប់រហ័ស គឺពីចំនួន១៥៣នាក់ កាលពីថ្ងៃទី៣ ខែកក្កដា មកស្មើនឹង៧៤៥ នៅថ្ងៃទី៤ ខែកក្កដា ។ បន្ទាប់មក ចំនួនអ្នកឆ្លងមេរោគបានកើនឡើងរហូតដល់ជិត១ពាន់នាក់ នៅថ្ងៃទី៥ ខែកក្កដា ។

លោក ឆវ៉េ ខាយ៉ងស៊ីក អភិបាលក្រុង Namwon បានបង្ហោះក្នុងបណ្តាញសង្គម កាលពីថ្ងៃទី៤ ខែកក្កដា ថា មន្ត្រីសុខាភិបាលក្នុងទីក្រុងបានព្យាយាមការពារការឆ្លងរាតត្បាតនៃមេរោគនេះ និងធានាសុវត្ថិភាពដល់ពលរដ្ឋ ។

ក្រោយពេលអាជ្ញាធរបញ្ជាក់ថា បានប្រទះឃើញមេរោគណូរ៉ូនៅក្នុងគីមឈី ភ្នាក់ងារសុវត្ថិភាពចំណីអាហារកូរ៉ខាងត្បូង ក៏បានស្នើឱ្យក្រុមហ៊ុនផលិតគីមឈី ផ្អាកការលក់ផលិតផលជាបណ្តោះអាសន្ន ព្រមទាំងប្រកាសប្រមូលគីមឈីពីផ្សារមកវិញ ៕

ប្រទេសជប៉ុន ៖ Yonaguni គឺជាវិមានថ្មដ៏ធំនៅក្រោមទឹកសមុទ្រ មានរូបរាងស្រដៀងនឹងប្រាសាទពីរ៉ាមីតកាំជណ្តើរ និងមានទីតាំងនៅឆ្នេរសមុទ្រ Yonaguni ស្ថិតក្នុងខេត្តអូគិណាវ៉ា ប្រទេសជប៉ុន ។ គេបានរកឃើញវិមាននេះលើកដំបូង កាលពីឆ្នាំ១៩៨៥ ប៉ុន្តែវានៅតែជាប្រធានបទមួយ ដែលអ្នកបុរាណវិទ្យារបស់ជប៉ុនជជែកវែកញែកគ្នាពុំដាច់ស្រេចពាក់ព័ន្ធនឹងដើមកំណើតរបស់វិមាននេះ ។

អ្នកបុរាណវិទ្យាជប៉ុនបានជជែកវែកញែកពាក់ព័ន្ធនឹងដើមកំណើតរបស់វិមាននេះថា តើវាកើតឡើងតាមធម្មជាតិ ឬមនុស្សជាអ្នកសាងសង់ឡើង? ក្រៅពីនេះ ក៏មានការលើកឡើងពាក់ព័ន្ធនឹងទីក្រុង Atlantis ដែលបាត់បង់ទៅផងដែរ ។ អ្នកបុរាណវិទ្យាជឿជាក់ថា វិមាន Yonaguni អាចមានអាយុកាលរហូតដល់ជាង១ម៉ឺនឆ្នាំ ។

មនុស្សមួយចំនួនមានជំនឿថា វិមាន Yonaguni សាងសង់ឡើងដោយសារមនុស្ស ហើយពួកគេអះអាងថា វិមាននេះបានបង្ហាញពីអរិយធម៌បុរាណ ដែលមានអាយុកាលប្រមាណ១ពាន់ឆ្នាំ ឬ១ម៉ឺនឆ្នាំ ពីព្រោះក្បូរក្បាច់របស់វិមានស្រដៀងគ្នានឹងការឆ្លាក់ថ្មដែរ ។ ដូច្នេះ វាអាចទៅរួចថា កាលពីមុន វិមាននេះធ្លាប់ស្ថិតនៅលើគោក ហើយបានលិចទៅក្នុងទឹក ។

ចំណែកមនុស្សខ្លះទៀតថា វិមាននេះមានទំនាក់ទំនងជាមួយទ្វីប Mu និង Lemuria គឺជាទ្វីបបុរាណដែលគេជឿថា ធ្លាប់ស្ថិតនៅមហាសមុទ្រឥណ្ឌា ប៉ុន្តែទ្វីបទាំងនេះក៏លិចទឹកនាពេលបន្ទាប់ ។ ប៉ុន្តែការពិត វិមាននេះស្ថិតនៅមហាសមុទ្រប៉ាស៊ីហ្វិក ។

រីឯអ្នកស្រាវជ្រាវជាច្រើននិយាយថា វិមាននេះកើតឡើងតាមធម្មជាតិ វាជាបាតុភូតភូមិសាស្ត្រដែលកើតឡើងនៅបរិវេណស្នាមប្រេះនៃសំបកផែនដី ។ ក្រៅពីនេះ គេក៏បានប្រទះឃើញថ្មមានលក្ខណៈស្រដៀងគ្នានៅតំបន់ក្បែរៗទៀតផង ។

វិមាននៅក្រោមទឹកនេះមានប្រវែងប្រមាណ៩១ម៉ែត្រ, ទទឹង៣០៥ម៉ែត្រ និងមានកម្ពស់២៧ម៉ែត្រ ។ វាមានរូបរាងជាថ្មតម្រៀបពីលើគ្នាច្រើនជាន់ និងមានលក្ខណៈស្រដៀងនឹងផ្លូវព័ទ្ធជុំវិញ ។ នៅទីនេះ បានក្លាយជាការសន្និដ្ឋានដ៏ល្អមួយចំពោះការជជែកវែកញែកផ្នែកបុរាណវិទ្យាថា អរិយធម៌បុរាណកើតឡើងមុនពេលមនុស្សបានស្គាល់ ហើយវានៅតែជារឿងព្រេងដែលមនុស្សឆ្ងល់ថា តើមានពិតប្រាកដ ឬក៏អត់?

បើតាមភស្តុតាងនាពេលបច្ចុប្បន្នបង្ហាញថា អរិយធម៌មនុស្សដែលមានការទទួលស្គាល់ គឺបានចាប់ផ្តើមកើតឡើងកាលពីប្រមាណ៦.០០០ឆ្នាំមុន ។ ប៉ុន្តែវាគួរឱ្យចម្លែកណាស់ ពីព្រោះវិមាន Yonaguni មានលក្ខណៈស្រដៀងគ្នាខ្លាំងជាមួយវិមានផ្សេងៗនៅអាមេរិកខាងត្បូង ។ មនុស្សមួយចំនួនហៅវិមាននេះថា «ពីរ៉ាមីតក្រោមសមុទ្រនៅអាស៊ី» ។

ប៉ុន្តែមានមតិខ្លះទៀតអះអាងថា វិមាននេះជាប់ពាក់ព័ន្ធនឹងមនុស្សនៅក្រៅភព ។ ចុះលោកអ្នកវិញយល់ឃើញយ៉ាងណាដែរ? តើវិមាននេះសាងសង់ឡើងដោយមនុស្សបុរាណ ឬមនុស្សក្រៅភព ឬវាកើតឡើងដោយខ្លួនឯងតាមធម្មជាតិ?

ប្រទេសចិន ៖ ប្រសិនបើលោកអ្នកកំពុងស្ថិតក្នុងយានអវកាសតូចមួយតែម្នាក់ឯងនៅលើលំហអាកាសដ៏សែនស្ងប់ស្ងាត់ ប៉ុន្តែស្រាប់តែមានសំឡេងគោះយានអវកាសខ្លាំងៗ តើលោកអ្នកនឹងគិតថា វាជាសំឡេងអ្វីឱ្យប្រាកដ? ពាក់ព័ន្ធនឹងសំឡេងអាថ៌កំបាំងនេះមានការបកស្រាយខុសៗគ្នា ខ្លះថា វាជាសំឡេងតន្ត្រីអវកាស ខណៈខ្លះទៀតថា ជាសំឡេងវិទ្យុទាក់ទង ។

ហេតុការណ៍នេះបានកើតឡើងចំពោះលោក Yang Liwei គឺជាអវកាសយានិកដំបូងគេ (First Chinese Astronaut in Space) របស់ប្រទេសចិន ដែលអង្គការអវកាសចិនបានបញ្ជូនលោកទៅបំពេញភារកិច្ចលើលំហអវកាសតែម្នាក់ឯង កាលពីឆ្នាំ២០០៣ ។

លោក Yang Liwei ពុំធ្លាប់ប្រាប់ហេតុការណ៍នេះទៅកាន់អ្នកណាម្នាក់ឡើយ ។ ប៉ុន្តែរយៈពេល១៣ឆ្នាំក្រោយមក លោកក៏និយាយជាសាធារណៈថា ដូចជាមានអ្នកណាម្នាក់យកឈើមកគោះយានអវកាសរបស់លោក ហើយសំឡេងនេះពុំបានឮពីផ្នែកខាងក្រៅ ឬខាងក្នុងយានអវកាសទេ ។ ពេលនោះ លោកបារម្ភបន្តិចបន្តួចដែរ ហើយលោកក៏បានមើលតាមបង្អួចយានអវកាស ប៉ុន្តែពុំឃើញមានអ្វីពាក់ព័ន្ធនឹងសំឡេងគួរឱ្យព្រឺសម្បុរនេះទេ ។

លោកពុំយល់ថា តើវាជាសំឡេងអ្វីឱ្យប្រាកដ? ក្រោយមក លោកក៏ព្យាយាមបង្កើតសំឡេងឡើងមក ដើម្បីឱ្យអ្នកជំនាញជួយបញ្ជាក់អំពីប្រភពសំឡេង ប៉ុន្តែពុំទទួលបានលទ្ធផលឡើយ ។ អ្វីគួរឱ្យចាប់អារម្មណ៍ គឺមានអវកាសយានិកចិនជំនាន់ក្រោយប្រាប់ថា ពួកគេក៏បានឮសំឡេងប្លែកៗនៅលើលំហអាកាសដូចគ្នាដែរ គឺក្នុងពេលពួកគេបំពេញភារកិច្ច នៅឆ្នាំ២០០៥ និងឆ្នាំ២០០៨ ។

បើទោះជាពុំអាចបកស្រាយពីប្រភពសំឡេងនេះក្តី ប៉ុន្តែអវកាសយានិកចិនគ្រប់រូបព្យាយាមយល់ថា វាជាហេតុការណ៍កើតឡើងធម្មតានៅលើលំហអាកាស ។ បច្ចុប្បន្ននេះ ក៏គ្មានការបកស្រាយច្បាស់លាស់ថា តើវាជាសំឡេងអ្វី? ការពិត ការឮសំឡេងលើអវកាសនេះ ពុំមែនជារឿងចម្លែកឡើយ ។

កាលពីឆ្នាំ១៩៦៩ ក្នុងការសាកល្បងបំពេញភារកិច្ចចុះចតនៅឋានព្រះចន្ទ គឺពេលយានអវកាសហោះទៅក្បែរៗឋានព្រះចន្ទ ស្រាប់តែការទំនាក់ទំនងតាមវិទ្យុជាមួយផែនដីត្រូវបានកាត់ផ្តាច់ ។ ពេលនោះ អវកាសយានិកបានឮសូរសំឡេងប្លែកៗដែលពួកគេពុំអាចបកស្រាយបាន ហើយពួកគេក៏និយាយថា វាដូចជាសំឡេងតន្ត្រីអវកាស ។ ប៉ុន្តែការលើកឡើងនេះត្រូវគេចាត់ទុកថា ជារឿងអាថ៌កំបាំង រហូតដល់សំឡេងប្លែកលើអវកាសដែលបានថតទុក ត្រូវបានបង្ហាញសាធារណជន នៅឆ្នាំ២០១៦ ។

ចំណែកអង្គការ NASA បកស្រាយថា វាអាចជាសំឡេងរំខានពីវិទ្យុទាក់ទង ហើយវាពុំមែនជាសំឡេងតន្ត្រីរបស់ក្រុមមនុស្សរស់នៅក្រៅភពទេ ។ ក្រោយមកទៀត យានអវកាសជូណូ ដែលបានបើកបរជុំវិញភពព្រហស្បតិ៍ ក៏បានថតសំឡេងចម្លែកនេះទុក ។ ចុះលោកអ្នកវិញយល់ឃើញយ៉ាងណាដែរ? តើសំឡេងគោះយានអវកាសយ៉ាងអាថ៌កំបាំងក្នុងលំហ គឺជាសំឡេងអ្វីឱ្យប្រាកដ?

បរទេស៖ Mukesh Ambani ដែលជាមហាសេដ្ឋីឥណ្ឌាលំដាប់អាស៊ី បានឧបត្ថម្ភកម្មវិធីអាពាហ៍ពិពាហ៍ជាក្រុម ហើយបានបរិច្ចាគមាស និងមូលប្បទានប័ត្រដល់គូស្វាមីភរិយាថ្មីថ្មោងចំនួន ៥០ គូក្នុងស្ថានភាពលំបាក។
មហាសេដ្ឋីឥណ្ឌា Mukesh Ambani ម្ចាស់ក្រុមឧស្សាហកម្ម Reliance និងភរិយារបស់លោក រួមទាំងសកម្មជនស្ម័គ្រចិត្តរបស់ Nita Ambani កាលពីសប្តាហ៍មុនបានរៀបចំពិធីមង្គលការជាក្រុមសម្រាប់គូស្វាមីភរិយាប្រហែល ៥០ គូមកពីសាវតាក្រីក្រក្នុងទីក្រុង Palghar នៃរដ្ឋ Maharashtra។

ពិធីមង្គលការនេះបានធ្វើឡើងកាលពីថ្ងៃទី ២ ខែកក្កដា ឆ្នាំ២០២៤ នៅសួន Reliance Group ក្នុងទីក្រុង Thane រដ្ឋ Maharashtra ភាគឦសាននៃទីក្រុង Mumbai ដោយមានអ្នកចូលរួមប្រហែល ៨០០ នាក់ រួមទាំងគូស្នេហ៍ និងសាច់ញាតិផងដែរ។ ក្រុមគ្រួសាររបស់កូនច្បងពីរនាក់របស់មហាសេដ្ឋី Mukesh រួមទាំងកូនប្រុសច្បង Akash និងកូនស្រី Isha ក៏បានចូលរួមក្នុងព្រឹត្តិការណ៍នេះដែរ។

ពួកគេមិនត្រឹមតែរ៉ាប់រងរាល់ការចំណាយក្នុងពិធីមង្គលការប៉ុណ្ណោះទេ គ្រួសារអ្នកមានបំផុតរបស់ប្រទេសឥណ្ឌាក៏បានផ្តល់គ្រឿងអលង្ការមាសសុទ្ធដល់គូស្នេហ៍នីមួយៗ រួមមានខ្សែក mangalsutra ចិញ្ចៀនអាពាហ៍ពិពាហ៍ និងចិញ្ចៀនច្រមុះដែលធ្វើពីមាស និងកជើងប្រាក់ជាច្រើនប្រភេទ។ លើសពីនេះកូនក្រមុំម្នាក់ៗត្រូវបានផ្តល់មូលប្បទានប័ត្របន្ថែមដែលមានតម្លៃ ១០១,០០០ រូពី (ប្រហែល ១,២០០ ដុល្លារអាមេរិក) ជាថ្លៃបណ្ណាការផងដែរ។

មហាសេដ្ឋី Ambani ក៏បានសន្យាថានឹងផ្គត់ផ្គង់គូស្វាមីភរិយាក្រីក្រទាំងអស់សម្រាប់ពេញមួយឆ្នាំ រួមជាមួយនឹងរបស់របរប្រើប្រាស់ក្នុងផ្ទះដូចជា ចាន ចង្ក្រានហ្គាស កង្ហារ ភួយ និងខ្នើយទៀតផង។ គួរបញ្ជាក់ដែរថា Mukesh Ambani គឺជាមហាសេដ្ឋីដែលមានជាងគេនៅអាស៊ី និងជាប់ចំណាត់ថ្នាក់ទី ១១ នៅលើពិភពលោក ជាមួយនឹងទ្រព្យសម្បត្តិ ១១៨ ពាន់លានដុល្លារអាមេរិក នេះបើយោងតាម Bloomberg។

លោកនិងភរិយារបស់លោកមានកូន ៣ នាក់ក្នុងនោះកូនភ្លោះ Isha និង Akash អាយុ ៣៣ ឆ្នាំ និងកូនប្រុសពៅ Anant អាយុ ២៩ ឆ្នាំ។ Anant Ambani ដែលជាកូនប្រុសពៅរបស់គ្រួសារនេះនឹងចាប់ផ្តើមប្រារព្ធពិធីមង្គលការរយៈពេល ៣ ថ្ងៃនៅថ្ងៃទី១២ ដល់ ១៤ ខែកក្កដា ឆ្នាំ២០២៤ ដោយបានអញ្ជើញភ្ញៀវចំនួន ១,២០០ នាក់ រួមទាំងមហាសេដ្ឋីកំពូលៗជាច្រើនរូប និងអតីតអ្នកនយោបាយជុំវិញពិភពលោកផងដែរ៕