យុវតី លី មួយលាង Miss Teen Cambodia 2023 ជាបេក្ខភាពតំណាងឲ្យកម្ពុជា ចូលរួមនៅក្នុងកម្មវិធីប្រកួតសម្រស់លំដាប់ថ្នាក់អន្តរជាតិ Miss Teen International 2024 ខណៈនាងមានឆន្ទៈដ៏មុះមុតក្នុងការដណ្តើមមកុដមកជូនជាតិមាតុភូមិរហូតបានសម្រេច ក្លាយជាបវរកញ្ញាកម្ពុជាដំបូងគេបំផុត ដែលទទួលបានម្កុដពីកម្មវិធីខាងលើ។
កាលពីរាត្រីថ្ងៃទី៧ ខែកក្កដា ឆ្នាំ២០២៤នេះ ជាវគ្គផ្តាច់ព្រ័ត្រនៃកម្មវិធី Miss Teen International 2024 ដែលបានប្រព្រឹត្តិទៅនៅឯប្រទេសឥណ្ឌា និងមានបេក្ខភាពមកពី២៨ប្រទេសចូលរួម។ យ៉ាងណាមិញ ឆ្លងកាត់វិញ្ញាសានៃការប្រកួតពីមួយវគ្គទៅវគ្គ, រាត្រីនៃវគ្គផ្តាច់ព្រ័ត្រក៏បានមកដល់មួយរំពេច។ ហើយអ្វីដែលស្ទើរតែនឹកស្មានមិនដល់នោះគឺការប្រកាសម្ចាស់ជ័យលាភី ជាអ្នកគ្រងមកុដប្រចាំឆ្នាំ២០២៤ បានទៅលើគ្រាប់ពេជ្រកម្ពុជា យុវតី លី មួយលាង។ ស្របពេលដែលអ្នកគាំទ្រវិស័យបវរកញ្ញានៅកម្ពុជាជាច្រើនបានសម្តែងនូវការរំភើបចិត្តជាសឹងតែស្រក់ទឹកភ្នែកគ្រប់គ្នាផងដែរ។
បើក្រឡេកមើលពីសមត្ថភាពរបស់បេក្ខភាពបវរកម្ពុជារូបនេះវិញ ត្រូវបានអ្នកគាំទ្រវិស័យបវរកញ្ញាជាច្រើនជឿជាក់យ៉ាងមុតមាំតាំងពីដើមថា នាងគឺជាម្ចាស់មកុដពីកម្មវិធីនេះយ៉ាងពិតប្រាកដ បើមើលទៅលើរូបរាង សមត្ថភាព ចំណេះដឹងទូលំទូលាយ កម្រិតភាសាអង់គ្លេសបានយ៉ាងស្ទាត់ជំនាញ ការតុបតែងខ្លួននិងសម្លៀកបំពាក់ ការដើរម៉ូត និងសកម្មភាពប្រចាំថ្ងៃផ្សេងៗ គឺនាងតែងតែមានភាពលេចធ្លោក្នុងចំណោមបេក្ខភាពដទៃ។ 
អ្វីដែលកាន់តែពិសេសគឺឈុតតំណាងជាតិខ្មែរដែលយុវតី លី មួយលាង បានគ្រងពិតជាអស្ចារ្យទាក់ភ្នែកគណៈកម្មការនិងទស្សនិកជន ខណៈដែលវគ្គឆ្លើយសំណួរទៀតសោតគឺនាងឆ្លើយបានយ៉ាងល្អផងដែរ។ ទាំងនេះហើយគឺជាភាពខ្លាំងរបស់បវរកម្ពុជារូបនេះរហូតទទួលបានម្កុដពីកម្មវិធី និងជាមោទនភាពរបស់ប្រជាជនខ្មែរគ្រប់ៗរូប ដែលកូនខ្មែរមួយរូបនេះបានលើកតម្កើនមុខមាត់ប្រទេសជាតិនៅលើឆាកអន្តរជាតិ៕
