មនុស្សភាគច្រើនមានចម្ងល់ថា បើមានមនុស្សក្រៅភពពិតមែន ហេតុអ្វីពួកគេធ្វើដំណើរមកផែនដីរបស់យើង? រីឯចម្លើយបានលើកឡើងខុសៗគ្នាថា ពួកគេអាចមកតាមដានការរីកចម្រើនរបស់ផែនដី, អាចមកធ្វើកិច្ចព្រមព្រៀងជាមួយប្រទេសអភិវឌ្ឍ ឬមានគម្រោងគ្រប់គ្រងផែនដីនាថ្ងៃអនាគត ដោយសារមនុស្សក្រៅភពចង់រកភពថ្មីទៀតដើម្បីរស់នៅ ។

ខាងក្រោមនេះ គឺជាមូលហេតុធ្វើឱ្យមនុស្សក្រៅភពធ្វើដំណើរមកផែនដី រួមមាន ៖

១-មនុស្សក្រៅភពបានតាមដានការរីកចម្រើនរបស់ផែនដី ៖
មនុស្សក្រៅភពអាចធ្វើដំណើរមកផែនដីបាន ដោយសារពួកគេមានបច្ចេកវិទ្យារីកចម្រើនជាងមនុស្សយ៉ាងខ្លាំង ហើយមនុស្សយើងអាចត្រឹមតែជាមនុស្សព្រៃក្នុងក្រសែភ្នែកពួកគេ ។ ហេតុនេះ ពួកគេគ្រាន់តែចង់តាមដានយើងពីចម្ងាយដើម្បីដឹងថា តើផែនដីនឹងរីកចម្រើនដល់កម្រិតណា?

២-មនុស្សក្រៅភពមកស្រាវជ្រាវពីផែនដី ៖
ពួកគេអាចមិនត្រឹមតែសង្កេតមើលមនុស្សយើងតែម្យ៉ាងទេ ប៉ុន្តែពួកគេចង់ស្រាវជ្រាវពីយើងផងដែរ ។ កន្លងមក មានការចុះផ្សាយជាញឹកញាប់អំពីមនុស្សក្រៅភពចាប់មនុស្សពីផែនដី ឬស្មើរាប់ពាន់ករណី ហើយករណីនេះនៅតែគ្មានការបកស្រាយរហូតដល់បច្ចុប្បន្ន ។

ករណីមួយគួរឱ្យចាប់អារម្មណ៍បំផុត គឺបានកើតឡើងចំពោះប្រធានាធិបតីអាមេរិក លោក Dwight D. Eisenhower ពេលលោកកំពុងសម្រាកលំហែកាយនៅរដ្ឋកាលីហ្វ័រញ៉ា កាលពីឆ្នាំ១៩៥៤ ។ រឿងរ៉ាវនេះត្រូវបានគេនិយាយអស់រយៈពេលជាច្រើនឆ្នាំថា តើមនុស្សក្រៅភពនាំខ្លួនលោកទៅធ្វើអ្វី? ឬពួកគេត្រូវការធ្វើព្រមព្រៀងអ្វីម្យ៉ាងជាមួយអាមេរិកដើម្បីរក្សាពូជមនុស្ស ប៉ុន្តែត្រូវមានលក្ខខណ្ឌឱ្យពួកគេគ្រប់គ្រងដែនអាកាសរបស់អាមេរិក ។ វាជាកន្លែងដែលពួកគេអាចចាប់យកមនុស្សណាម្នាក់ទៅភពរបស់ពួកគេបាន ដើម្បីយកទៅសាកល្បងអ្វីម្យ៉ាង ។ ប៉ុន្តែមនុស្សទាំងនេះនឹងត្រូវលុបការចងចាំទាំងអស់ ក្រោយពេលមនុស្សក្រៅភពចាប់ខ្លួនយកទៅ ។

ចំណែកអ្វីដែលរដ្ឋាភិបាលអាមេរិកបានទទួល គឺអាចប្រើប្រាស់បច្ចេកវិទ្យារបស់មនុស្សក្រៅភព ហើយលក្ខខណ្ឌ១ក្នុងចំណោមកិច្ចព្រមព្រៀងជាមួយមនុស្សក្រៅភព គឺពួកគេចង់ឱ្យយើងបោះបង់អាវុធនុយក្លេអ៊ែរ និងបញ្ឈប់ការសម្លាប់គ្នាឯង ។ ប៉ុន្តែអាមេរិកពុំសូវពេញចិត្តនឹងលក្ខខណ្ឌមួយនេះប៉ុន្មានទេ ប៉ុន្តែគ្មានអ្នកណាដឹងរឿងនេះលម្អិតដូចប្រធានាធិបតីអាមេរិកទេ ។ លើសពីនេះ ការចាប់ខ្លួនប្រធានាធិបតីអាមេរិករបស់មនុស្សក្រៅភព ក៏មានមនុស្សជាច្រើននាក់បានឃើញហេតុការណ៍ដែលកត់ត្រាក្នុងប្រវត្តិសាស្ត្រនេះដែរ ។

៣-មនុស្សក្រៅភពអាចមកស្វែងរកធនធានធម្មជាតិនៅលើផែនដី ៖
វាដូចនឹងខ្សែភាពយន្តដែលបង្ហាញពីមនុស្សក្រៅភពមកស្វែងរកធនធានធម្មជាតិនៅលើផែនដី ដូចជា ៖ ធនធានរ៉ែជាច្រើនរបស់មនុស្ស ឬឧស្ម័នធម្មជាតិ ឬសារធាតុគីមី ឬធនធានមនុស្ស ។ មានភស្តុតាងជាច្រើនបង្ហាញពីការប្រទះឃើញ UFO នៅតាមកន្លែងផ្សេងៗ ដូចជា ៖ នៅកណ្តាលមហាសមុទ្រ និងលើជ្រលងភ្នំឆ្ងាយៗ ។ ហេតុនេះ គេសន្និដ្ឋានថា មនុស្សក្រៅភពកំពុងស្រាវជ្រាវពីធនធានលើផែនដី ។

៤-មនុស្សក្រៅភពចង់មកផែនដីដើម្បីផ្លាស់ប្តូរចំណេះដឹង ៖
មតិជាច្រើនលើកឡើងថា មនុស្សក្រៅភពកំពុងទំនាក់ទំនងជាមួយរដ្ឋាភិបាលអាមេរិកយ៉ាងសម្ងាត់ ដែលមនុស្សទូទៅពុំធ្លាប់ដឹងពីមុន ។ វាអាចជាការយល់ព្រមផ្លាស់ប្តូរអ្វីម្យ៉ាង ដូចជា ៖ ចំណេះដឹងផ្នែកវិទ្យាសាស្ត្រ, បច្ចេកវិទ្យា និងវប្បធម៌ផ្សេងៗរបស់មនុស្ស ។ ករណីនេះដូចគ្នានឹងការធ្វើដំណើរទៅក្រៅប្រទេស គឺភ្ញៀវទេសចរតែងតែដើរមើលស្រុកទេស, ម្ហូបអាហារ និងរៀនសូត្រវប្បធម៌របស់ពលរដ្ឋប្រទេសនោះ ។ យើងនឹងរំភើបខ្លាំងប៉ុនណា បើមានឱកាសធ្វើដំណើរទៅក្រៅភព គឺយើងចង់និយាយជាមួយពួកគេ ឬចង់ដឹងពីបច្ចេកវិទ្យានៅទីនោះ ។

៥-មនុស្សក្រៅភពមានគម្រោងគ្រប់គ្រងពិភពលោក ៖
យើងបានមើលឃើញពិភពលោកក្នុងផ្លូវវិជ្ជមាន ប៉ុន្តែចុះបើមនុស្សក្រៅភពមកគ្រប់គ្រងពិភពលោកវិញ ហើយពួកគេជាពួកចិត្តអាក្រក់ តើពិភពលោកនឹងក្លាយជាយ៉ាងណា? វាអាចទៅរួច ដែលមនុស្សក្រៅភពកំពុងស្រាវជ្រាវពីយើងដើម្បីគ្រប់គ្រងពិភពលោក នាថ្ងៃអនាគត ។

ស៊ីហ្វិន ហ័គីង ជាអ្នកវិទ្យាសាស្ត្រដែលមនុស្សទូទាំងពិភពលោកស្គាល់ ធ្លាប់និយាយថា បើមនុស្សក្រៅភពមានពិតមែន ពួកគេអាចពុំមែនជាអ្នកជិតខាងល្អរបស់យើងទេ ពីព្រោះពួកគេកំពុងស្វែងរកភពថ្មីណាមួយរស់នៅ ។ ពួកគេនឹងគ្រប់គ្រងពិភពលោក, ដណ្តើមយកធនធានធម្មជាតិ និងបង្កើតយានអវកាសឱ្យបានច្រើន ហើយគ្មានអ្នកណាដឹងពីគំនិតពួកគេទេ ។

យើងសាកស្រមៃថា បើមនុស្សក្រៅភពប្រើប្រាស់ធនធានធម្មជាតិរបស់ខ្លួនរហូតដល់អស់ និងពុំអាចរស់នៅលើភពពួកគេបន្តទៀត គឺពួកគេមានយានអវកាសធំៗដើម្បីជម្លៀសមនុស្សក្រៅភពយ៉ាងច្រើន និងស្វែងរកភពថ្មីទៀតរស់នៅ ហើយគ្មានកន្លែងណាល្អដូចផែនដីទេ ដែលពួកគេអាចរស់នៅបាន ។ ផែនដីស្រស់ស្អាត និងគួរឱ្យរស់នៅបំផុត ហើយពួកគេអាចមានបច្ចេកវិទ្យា និងអរិយធម៌ជឿនលឿនជាងយើងរាប់លានឆ្នាំ ។ តើពួកគេមានកម្លាំងខ្លាំងកម្រិតណា ហើយយើងគ្មានតម្លៃអ្វីលើសពួកគេទេ ។

ការលើកឡើងរបស់អ្នកវិទ្យាសាស្ត្ររូបនេះ គឺពុំលើសពីការពិតខ្លាំងពេកទេ ព្រោះបើយើងងាកទៅមើលប្រវត្តិសាស្ត្រកន្លងមកឃើញថា ជនជាតិដើមបានបាត់បង់ទឹកដីរបស់ខ្លួនទៅឱ្យអាមេរិក និងអូស្ត្រាលី ។ ដូច្នេះ ការលើកឡើងនេះជាមូលហេតុដែលអ្នកវិទ្យាសាស្ត្រជាច្រើន ពុំគាំទ្រឱ្យមនុស្សយើងតាមស្វែងរកមនុស្សក្រៅភពក្នុងចក្រវាឡ ជាពិសេស ការបញ្ជូនសេវាវិទ្យុពីផែនដី ដើម្បីកុំឱ្យមនុស្សក្រៅភពដឹងពីសេវាផ្កាយរណបរបស់យើង ហើយវាជាកំហុសឆ្គងមួយដែលយើងធ្លាប់ធ្វើកន្លងមក ៕

ប្រទេសអៀរឡង់ ៖ សត្វឆ្មាចាប់ផ្តើមមានផែនការឱ្យមនុស្សចិញ្ចឹមថែទាំពួកវា តាំងពីប្រមាណ១ម៉ឺនឆ្នាំមុន មកម៉្លេះ ។ នេះជាការលើកឡើងរបស់អ្នកជំនាញផ្នែកអាកប្បកិរិយាសត្វ និងរបៀបរស់នៅរបស់សត្វ ស្តីពី «ទំនាក់ទំនងរវាងមនុស្ស និងឆ្មា» មកពីសាកលវិទ្យាល័យ Queen’s University Belfast ប្រទេសអៀរឡង់ ។

អ្នកជំនាញនិយាយថា កាលពីមុន ឆ្មា គឺជាសត្វមានចិត្តសណ្តោសប្រណី និងជាសត្វប្រមាញ់ក្នុងព្រៃតែឯង ច្រើនជាងរស់នៅជាហ្វូង ។ លើសពីនេះ ពួកវាស្ទើរតែពុំបានយំ ឬស្រែកដាក់គ្នាទេ ។ រីឯការយំរបស់ឆ្មា គឺជាការអភិវឌ្ឍផ្នែកទំនាក់ទំនងថ្មីរបស់វាសម្រាប់ការឆ្លើយតប ឬបង្ហាញអាកប្បកិរិយាជាមួយមនុស្ស ។

មនុស្ស និងឆ្មា បានជួបគ្នាជាលើកដំបូងកាលពីប្រមាណ១ម៉ឺនឆ្នាំមុន គឺក្នុងអំឡុងពេលមនុស្សចាប់ផ្តើមបង្កើតកន្លែងរស់នៅជាអចិន្ត្រៃយ៍ ។ ក្រោយពីមនុស្សមានផ្ទះស្នាក់នៅហើយ ក៏ចាប់ផ្តើមមានសត្វកកេរផ្សេងៗចូលមករស់នៅជាមួយមនុស្ស ដោយសារមនុស្សសម្បូរចំណីអាហារឱ្យពួកវាស៊ី ។

លើសពីនេះ ឆ្មាក៏ចាប់ផ្តើមមករស់នៅជាមួយមនុស្សដែរ ពីព្រោះមនុស្សសម្បូរអាហារឱ្យពួកវាស៊ីដូចគ្នា ។ ពេលឆ្មាមករស់នៅក្បែរមនុស្សកាន់តែច្រើន ពួកវាក៏ចាប់ផ្តើមស្និទ្ធស្នាលជាមួយមនុស្សកាន់តែខ្លាំង ហើយមិនមែនមានតែមនុស្សទេ ដែលព្យាយាមសិ្នទ្ធស្នាលជាមួយឆ្មា ប៉ុន្តែឆ្មាក៏ព្យាយាមស្និទ្ធស្នាលជាមួយមនុស្សដូចគ្នា ។ ឆ្មាបានសម្របខ្លួនខ្លាំងឡើង ពីព្រោះពួកវាអាចមើលថែខ្លួនឯងបាន ហើយពុំចាំបាច់ស្តាប់បង្គាប់មនុស្ស ។

តាមការស្រាវជ្រាវកាលពីឆ្នាំ២០០៩ ទៅលើអាកប្បកិរិយាសត្វ បង្ហាញថា សំឡេងយំរបស់ឆ្មាពេលពួកវាកំពុងស្រេកឃ្លាន និងពេលពួកវាឆ្អែត គឺមានកម្រិតសំឡេងខុសគ្នា ។ អ្នកចិញ្ចឹមឆ្មានិយាយថា ពេលវាឃ្លានចំណី វានឹងស្រែកយំខ្លាំងៗពេលដំបូង និងរំខានមនុស្ស ហើយអាកប្បកិរិយាប្រើប្រាស់កម្រិតសំឡេងនេះ មិនមែនកើតឡើងតែលើឆ្មាមួយទេ ប៉ុន្តែមនុស្សក៏ធ្វើបែបនេះដែរ ។

អ្នកស្រាវជ្រាវកត់សម្គាល់ថា ការពិត ឆ្មាបានសង្កេត និងធ្វើត្រាប់តាមមនុស្ស តាមរយៈការប្រើប្រាស់សំឡេង ដើម្បីឱ្យមនុស្សយកចិត្តទុកដាក់ជាមួយវា ទើបធ្វើឱ្យឆ្មាមានប្រៀបផ្នែកទំនាក់ទំនង ។ ហេតុនេះ ឆ្មាបានសម្របខ្លួនដើម្បីទទួលបាននូវការថែទាំ និងការចាប់អារម្មណ៍ពីមនុស្ស ហើយធ្វើឱ្យម្ចាស់ឆ្មាជាច្រើនពុំអាចនៅស្ងៀមទេ ពេលឮឆ្មាយំ ៕

ប្រទេសចិន៖ ការកើនឡើងនៃបច្ចេកវិទ្យា Robotaxi ដែលជារថយន្តបើកបរដោយខ្លួនឯង កំពុងបង្កើនការរំពឹងទុកជាច្រើនអំពីអនាគតនៃការដឹកជញ្ជូនដ៏ឆ្លាតវៃ និងងាយស្រួល ដែលនេះបានបង្កបញ្ហាប្រឈមជាច្រើនដល់មនុស្ស ជាពិសេសបណ្តាលឱ្យបាត់បង់ការងារសម្រាប់អ្នកបើកបររាប់លាននាក់នៅជុំវិញពិភពលោក។

បើយោងតាម CNBC គំនិតនៃ “រថយន្តបើកបរដោយខ្លួនឯង” មិនមែនជារឿងចម្លែកនោះទេ ដោយបច្ចុប្បន្នវាកំពុងទាក់ទាញការចាប់អារម្មណ៍ពីទីផ្សារកាន់តែខ្លាំងឡើងៗ។ ភស្តុតាងច្បាស់លាស់គឺការរីកចម្រើនយ៉ាងខ្លាំងនៃក្រុមហ៊ុនដែលប្រតិបត្តិការក្នុងវិស័យនេះ។ ជាធម្មតាភាគហ៊ុនរបស់ក្រុមហ៊ុនបច្ចេកវិទ្យា Baidu នៅក្នុងទីក្រុងហុងកុង គឺបានកើនឡើង ១០.១៤% ដោយសារសញ្ញាវិជ្ជមានពី Apollo Go ដែលជាវេទិកាសេវាកម្មដឹកជញ្ជូនបើកបរដោយខ្លួនឯងរបស់ក្រុមហ៊ុន។

មិនត្រឹមតែក្រុមហ៊ុន Baidu ប៉ុណ្ណោះទេ អ្នកជំនួញធំៗជាច្រើននាក់ទៀតក៏ចូលទីផ្សារដ៏មានសក្ដានុពលនេះដែរ។ ឧទាហរណ៍ ក្រុមហ៊ុន Pony.ai ដែលជាក្រុមហ៊ុនចាប់ផ្តើមរថយន្តបើកបរដោយខ្លួនឯង អះអាងថាបានស្ទាត់ជំនាញកម្រិត 4 (L4) បច្ចេកវិទ្យារថយន្តបើកបរដោយខ្លួនឯង មានលក្ខណៈសម្បត្តិគ្រប់គ្រាន់ក្នុងការដាក់ពង្រាយសេវាកម្ម Robotaxi ខ្នាតធំ។ ទន្ទឹមនឹងនេះដែរ Didi Chuxing ដែលជាកម្មវិធីជិះឡានធំជាងគេរបស់ប្រទេសចិន ក៏កំពុងសាកល្បងសេវាកម្ម Robotaxi នៅក្នុងទីក្រុងមួយចំនួនផងដែរ។

កំណើនដ៏លេចធ្លោនេះគឺដោយសារគោលនយោបាយគាំទ្រខ្លាំងពីរដ្ឋាភិបាលចិន។ នៅក្នុងទីក្រុងប៉េកាំង រដ្ឋាភិបាលទីក្រុងកំពុងធ្វើសេចក្តីព្រាងច្បាប់ស្តីពីយានយន្តបើកបរដោយខ្លួនឯង ដែលនឹងអនុញ្ញាតឱ្យរថយន្តបើកបរដោយខ្លួនឯងចូលរួមក្នុងសេវាកម្មដឹកជញ្ជូនសាធារណៈដូចជារថយន្តក្រុង តាក់ស៊ី និងរថយន្តជួល។ ទន្ទឹមនឹងនេះ នៅទីក្រុងសៀងហៃ អាជីវកម្មចំនួនបួនក៏ត្រូវបានផ្តល់អាជ្ញាប័ណ្ណដើម្បីសាកល្បងរថយន្តបើកបរដោយខ្លួនឯងដែលមិនមានអ្នកបើកបរជាលើកដំបូងនៅក្នុងក្របខ័ណ្ឌនៃសន្និសីទបញ្ញាសិប្បនិម្មិតពិភពលោកឆ្នាំ ២០២៤ ផងដែរ។

ហេតុនេះការអភិវឌ្ឍន៍ខ្លាំងនៃរថយន្តបើកបរដោយខ្លួនឯងគឺកំពុងបង្កបញ្ហាប្រឈមជាច្រើនដល់មនុស្ស ជាពិសេសគឺអាចបណ្តាលឱ្យបាត់បង់ការងារសម្រាប់អ្នកបើកបររាប់លាននាក់នៅជុំវិញពិភពលោក។ ទោះជាយ៉ាងណាអ្នកជំនាញជាច្រើនជឿថា ទោះបីជាមានការរីកចម្រើនខ្លាំងក៏ដោយ ក៏បច្ចេកវិទ្យារថយន្តបើកបរដោយខ្លួនឯងនៅតែត្រូវការពេលវេលាបន្ថែមទៀតដើម្បីពង្រឹងវាឱ្យល្អឥតខ្ចោះ ជាពិសេសសមត្ថភាពក្នុងការដោះស្រាយស្ថានការណ៍ស្មុគស្មាញនៅលើផ្លូវ និងក្នុងលក្ខខណ្ឌអាកាសធាតុមិនល្អ៕