កាលពីថ្ងៃទី៩ ខែកក្កដា ឆ្នាំ២០២៤ ក្រុមហ៊ុន Honda បានប្រកាសបិទរោងចក្ររថយន្តមួយកន្លែងនៅក្នុងប្រទេសថៃបន្ទាប់ពី Suzuki និង Subaru។

យោងតាម Reuters បន្ទាប់ពីក្រុមហ៊ុន Suzuki និង Subaru បានប្រកាសបិទរោងចក្ររថយន្តនៅក្នុងប្រទេសថៃកាលពីខែមិថុនាកន្លងទៅ ក្រុមហ៊ុន Honda ក៏បានប្រកាសបិទរោងចក្ររថយន្តមួយកន្លែងនៅក្នុងប្រទេសថៃដែរ ដោយត្រូវបានគេជឿថា មូលហេតុដែលក្រុមហ៊ុនរថយន្តធំៗជាច្រើនប្រកាសបិទរោងចក្រនៅក្នុងទីផ្សារប្រទេសនេះ គឺដោយសារការលក់ធ្លាក់ចុះខ្លាំង ធ្វើឱ្យក្រុមហ៊ុនរងសម្ពាធ ពិបាកប្រកួតប្រជែងជាមួយម៉ាកយីហោផ្សេងទៀត។

ទោះជាយ៉ាងណាបើយោងតាមរបាយការណ៍ មូលហេតុពិតប្រាកដដែលក្រុមហ៊ុន Honda ប្រកាសបិទរោងចក្រគឺដោយសារតែភាពលើសនៃផលិតកម្ម និងចង់បង្វែរធនធានផ្តោតទៅលើរថយន្តអគ្គិសនីវិញ ដែលកំពុងពេញនិយមនៅក្នុងប្រទេសថៃ។ សម្រាប់មូលហេតុរបស់ក្រុមហ៊ុន Suzuki និង Subaru ក៏ស្រដៀងគ្នាទៅនឹង Honda ដែរ ដោយពួកគេនឹងបិទរោងចក្ររថយន្តសាំងនៅក្នុងប្រទេសថៃ ហើយផ្តោតតែលើការផលិតរថយន្តកូនកាត់ និងអគ្គិសនីប៉ុណ្ណោះ។

ការប្រកាសបិទរោងចក្រនេះ ធ្វើឱ្យក្រុមហ៊ុនធំៗជាច្រើនប្រឈមមុខយ៉ាងខ្លាំងទៅនឹងគូប្រជែងរបស់ខ្លួន ជាពិសេសគឺ BYD របស់ចិនដែលជាក្រុមហ៊ុនរថយន្តអគ្គិសនីពិភពលោក។ ក្នុងរយៈពេល ៤ ឆ្នាំចុងក្រោយនេះ ការលក់រថយន្ត Honda បានមិនដល់ ១០ ម៉ឺនគ្រឿងក្នុង ១ ឆ្នាំៗឡើយ ដោយក្រុមហ៊ុនមិនឃើញមានកំណើននូវការលក់រថយន្តរបស់ខ្លួនតាមការរំពឹងទុក ទើបក្រុមហ៊ុនសម្រេចបិទរោងចក្រនៅក្នុងប្រទេសថៃតែម្តង។

គួរបញ្ជាក់ដែរថា ក្រុមហ៊ុន Honda មានរោងចក្រតែ ២ គត់នៅក្នុងប្រទេសថៃ ដែលមានសមត្ថភាពដំឡើងរថយន្តបាន ២៧ ម៉ឺនគ្រឿង ប៉ុន្តែកាលពីឆ្នាំមុន គឺផលិតបានត្រឹមតែ ១៥ ម៉ឺនប៉ុណ្ណោះ។ ដូច្នេះក្រុមហ៊ុនបានសម្រេចផ្អាករោងចក្រមួយកន្លែងចោលសិន ដែលស្ថិតនៅអាយុធ្យា នៅសល់រោងចក្រមួយកន្លែងទៀត នៅក្នុងខេត្ត Prachin Buri។ សម្រាប់ក្រុមហ៊ុន Subaru វិញនឹងបិទរោងចក្រនៅចុងឆ្នាំនេះ ហើយក្រុមហ៊ុន Suzuki ក៏នឹងបិទរោងចក្រក្នុងប្រទេសថៃ ត្រឹមចុងឆ្នាំ ២០២៥ ដោយផ្តោតលើការនាំចូលរថយន្តចូលមកលក់នៅប្រទេសនេះវិញ៕

ប្រទេសជប៉ុន ៖ រឿងរ៉ាវនេះត្រូវបានអ្នកប្រើប្រាស់បណ្តាញសង្គម Twitter (X) នៅជប៉ុនចែកចាយយ៉ាងច្រើនកាលពីឆ្នាំ២០២១ ហើយនៅខែកក្កដា ឆ្នាំ២០២៤ រឿងរ៉ាវនេះ ក៏ត្រូវបានគេយកមកចែកចាយឡើងវិញពេញបណ្តាញសង្គម ដែលនិយាយពីបុរសជប៉ុនម្នាក់សេពគប់ជាមួយស្រីៗរហូតដល់៣៥នាក់ក្នុងពេលជាមួយគ្នា ។

បុរសជនជាតិជប៉ុនរូបនេះឈ្មោះ Takashi Miyagawa អាយុ៣៩ឆ្នាំ បានរៀបរាប់ប្រាប់ប្រព័ន្ធផ្សព្វផ្សាយថា លោកបានសេពគប់មិត្តស្រីរហូតដល់៣៥នាក់ ក្នុងពេលជាមួយគ្នា ប៉ុន្តែលោកពុំបានស្មោះត្រង់ជាមួយពួកនាងទាំងអស់ទេ គឺលោកសម្លឹងឃើញតែផលប្រយោជន៍ប៉ុណ្ណោះ ។

លោក Takashi បន្តថា លោកចាប់ផ្តើមមានទំនាក់ទំនងជាមួយស្រីៗជាច្រើននាក់ ក្នុងអំឡុងពេលលោកធ្វើការជាបុគ្គលិកលក់សម្ភារៈបន្ទប់ទឹក ។ លោកក៏ចង់ស្មោះត្រង់ជាមួយស្រីណាម្នាក់ក្នុងចំណោមស្រីៗទាំងអស់ដែរ ប៉ុន្តែលោកបានកុហកថ្ងៃខែកំណើតរបស់ខ្លួនទៅពួកនាងគ្រប់ៗគ្នា ។

លោកបញ្ជាក់ថា ជាក់ស្តែង លោកបានប្រាប់សង្សារអាយុ៤៧ឆ្នាំ ថា លោកកើតនៅថ្ងៃទី២២ ខែកុម្ភៈ ។ បន្ទាប់មក លោកប្រាប់សង្សារម្នាក់ទៀតអាយុ៤០ឆ្នាំ ថា លោកកើតនៅខែកក្កដា និងប្រាប់សង្សារផ្សេងទៀតអាយុ៣៥ឆ្នាំ ថា លោកកើតនៅខែមេសា ។

សរុបមក លោកបានកុហកថ្ងៃខែកំណើតរបស់ខ្លួនជាមួយពួកនាង ដោយសារលោកចង់បានកាដូថ្ងៃកំណើតពីពួកនាង ។ នៅទីបំផុត លោកក៏ធ្វើបានជោគជ័យមែន ដោយសារលោកទទួលបានកាដូសរុបស្មើទឹកប្រាក់រហូតដល់១សែនយេន (ឬស្មើប្រមាណជិត៧០០ដុល្លារអាមេរិក) ព្រមទាំងទទួលបានសម្លៀកបំពាក់មានតម្លៃថ្លៃៗទៀតផង ។

នារីជាសង្សារម្នាក់របស់លោក Takashi បានប្រាប់សារព័ត៌មានជប៉ុនថា លោកព្យាយាមថើបនាងនៅថ្ងៃទី២ ដែលលោកជួបនាង ។ ពេលនោះ នាងក៏ប្រាប់ទៅលោក Takashi ថា ៖ «ខ្ញុំមិនចង់ធ្វើបែបនេះទេ លើកលែងតែលោកនឹងរៀបការ និងរស់នៅជាមួយខ្ញុំពិតប្រាកដ នាថ្ងៃអនាគត» ។ លោក Takashi ឆ្លើយតបថា លោកស្រឡាញ់ខ្ញុំពិតប្រាកដ ហើយនឹងរស់នៅជាមួយខ្ញុំអស់មួយជីវិត ។

ប៉ុន្តែក្រោយមក សង្សារ២នាក់ទៀតរបស់លោក Takashi បានដឹងរឿងនេះ ហើយពួកនាងក៏ប្រមូលសង្សារទាំង៣៥នាក់របស់លោក Takashi ទៅប្តឹងសមត្ថកិច្ច ។ ក្រោយពីសង្សារទាំងអស់រៀបរាប់រឿងរ៉ាវប្រាប់សមត្ថកិច្ចអស់ហើយ សមត្ថកិច្ចក៏ចាប់ខ្លួនលោកពីបទបោកប្រាស់ស្រីៗនាពេលបន្ទាប់ ។

នៅឆ្នាំ២០២៤នេះ សារព័ត៌មាន TheThaiger បានព្យាយាមត្រួតពិនិត្យបន្ថែមថា រយៈពេលជាច្រើនឆ្នាំកន្លងមក តើហេតុការណ៍ខាងលើក្លាយទៅជាយ៉ាងណា? ប៉ុន្តែសារព័ត៌មានពុំទទួលបានព័ត៌មានបន្ថែមពាក់ព័ន្ធនឹងជោគវាសនាបច្ចុប្បន្នរបស់បុរសខាងលើទេ ៕

ប្រទេសស្កុតឡេន ៖ មន្ត្រីអង្គការការពារ និងថែទាំសត្វសមុទ្ររបស់ប្រទេសអង់គ្លេស (British Divers Marine Life Rescue) លើកឡើងថា បានទទួលសេចក្តីរាយការណ៍ថា មានត្រីបាឡែនព្រុយវែងជាច្រើនក្បាលត្រូវបានទឹករលកបោកបក់មកកាន់ឆ្នេរសមុទ្រមួយកន្លែងនៅប្រជុំកោះ Orkney ប្រទេសស្កុតឡេន កាលពីថ្ងៃទី១១ ខែកក្កដា ឆ្នាំ២០២៤ ។

អាជ្ញាធរស្កុតឡេននិយាយថា ត្រីបាឡែនដែលត្រូវទឹករលកបោកបក់មកកាន់ឆ្នេរខ្សាច់នេះ សរុបទាំងអស់ស្មើនឹង៧៧ក្បាល ហើយពេលអាជ្ញាធរមកដល់ឆ្នេរសមុទ្រ គឺមានត្រីបាឡែនត្រឹមតែ១២ក្បាលប៉ុណ្ណោះ នៅមានជីវិត ។ ប៉ុន្តែទីបំផុត អាជ្ញាធរក៏សម្រេចចិត្តចាក់ថ្នាំសម្លាប់ត្រីបាឡែនទាំងអស់ ដោយសារពួកវារងរបួសធ្ងន់ធ្ងរ និងពុំអាចហែលទឹកទៅសមុទ្រវិញ ។ ទោះយ៉ាងណា អាជ្ញាធរពុំទាន់ជ្រាបពីមូលហេតុដែលបណ្តាលឱ្យកើតហេតុការណ៍នេះទេ ។

ហេតុការណ៍នេះស្រដៀងគ្នានឹងឆ្នាំ២០២៣ ដែរ គឺពេលនោះ មានត្រីបាឡែនពូជដូចគ្នាចំនួន៥៥ក្បាល ត្រូវបានទឹករលកបោកបក់មកកាន់ឆ្នេរខ្សាច់ ហើយវាកើតឡើងក្នុងពេលវេលាដូចគ្នា ។ ត្រីបាឡែនទាំង៥៥ក្បាល បានដេកស្ងៀមនៅលើឆ្នេរខ្សាច់កោះ Isle of Lewis ហើយមានជីវិតតែ១ក្បាលប៉ុណ្ណោះ ។

ដូចគ្នានេះ ត្រឹមតែរយៈពេល១ខែ (គឺខែកក្កដា ឆ្នាំ២០២៣) មានត្រីបាឡែនចំនួន១.០០០ក្បាលទៀត បានដេកងាប់នៅលើឆ្នេរសមុទ្រប្រទេសនូវែលសេឡង់ និងអូស្ត្រាលី ។ រីឯអង្គការអភិរក្ស និងជួយសង្គ្រោះត្រីបាឡែន និងផ្សោត (Project Jonah New Zealand) និយាយថា វាគួរឱ្យសោកស្តាយណាស់ ដែលមានហេតុការណ៍បែបនេះកើតឡើងនៅប្រជុំកោះ Chatham ប្រទេសនូវែលសេឡង់ ។

គួរបញ្ជាក់ថា ត្រីបាឡែនទាំងនេះ គឺជាពូជ Pilot Whales ដែលពួកវាចូលចិត្តរស់នៅជាក្រុម ឬហែលទឹកជាក្រុម ។ ហេតុនេះ បើក្នុងហ្វូងពួកវាមានត្រីបាឡែនណាមួយរងរបួស ឬមានជំងឺ រហូតដល់ហែលទឹកខុសទិសដៅបណ្តាលឱ្យជាប់នៅលើឆ្នេរខ្សាច់ គឺសមាជិកក្នុងហ្វូងផ្សេងទៀតនឹងហែលទឹកតាមដែរ ហើយទីបំផុត ត្រីបាឡែនទាំងអស់ក្នុងហ្វូងត្រូវបានទឹករលករុញមកកាន់ឆ្នេរខ្សាច់ ៕

ធនាគារស្វីសគឺជាជម្រើសកំពូលសម្រាប់អ្នកជំនួញធំៗដែលចង់បើកគណនីអាជីវកម្មនៅបរទេស ហើយត្រូវបានគេស្គាល់ថាជា “ធនាគារដែលមានសុវត្ថិភាពបំផុតក្នុងពិភពលោក”។ ដូច្នេះហើយ តើហេតុអ្វីបានជាគេចាត់ទុកថាធនាគារស្វីសមានសុវត្ថិភាពបំផុតក្នុងលោក?
សម្រាប់មូលហេតុនោះគឺ៖
១.ធានាការសម្ងាត់អតិបរមា៖ អស់រយៈពេលជាយូរមក ធនាគារស្វីសត្រូវបានអតិថិជនជឿទុកចិត្តយ៉ាងខ្លាំង ដោយសារការអនុវត្តច្បាប់តឹងរឹង ដែលរក្សាការសម្ងាត់គណនីធនាគាររបស់អ្នកដាក់ប្រាក់បញ្ញើ។ ដូច្នោះហើយ អតិថិជនដែលប្រើប្រាស់សេវាធនាគារស្វីសនឹងមានលេខកូដប្រាក់បញ្ញើដាច់ដោយឡែក។ លេខកូដរបស់អតិថិជនបរទេសគឺខុសពីអ្នករស់នៅស្វីស។ ដូច្នេះមានតែបុគ្គលិកធនាគារម្នាក់ប៉ុណ្ណោះដែលដឹងលេខកូដអតិថិជន ហើយមានតែមេដឹកនាំជាន់ខ្ពស់ ៣ នាក់ប៉ុណ្ណោះដែលស្គាល់ឈ្មោះអតិថិជនប្រតិបត្តិការ។

២.នីតិវិធីបើកគណនីតឹងរឹង៖ ខណៈពេលដែលធនាគារផ្សេងទៀតអាចបើកគណនីអនឡាញបានយ៉ាងឆាប់រហ័ស និងចំណេញពេលវេលា ជាមួយនឹងធនាគារស្វីស អតិថិជនត្រូវតែមកដោយផ្ទាល់ និងបង្ហាញឯកសារអត្តសញ្ញាណមួយចំនួនដើម្បីបើកគណនីជោគជ័យ។

៣.ការអភិវឌ្ឍន៍ផ្អែកលើសេដ្ឋកិច្ចប្រកបដោយនិរន្តរភាព៖ កត្តាមួយទៀតដែលជួយធនាគារស្វីសទាក់ទាញប្រាក់បញ្ញើរបស់អតិថិជនគឺការអភិវឌ្ឍន៍របស់ពួកគេដោយផ្អែកលើនយោបាយស្ថិរភាព និងការអភិវឌ្ឍន៍សេដ្ឋកិច្ច។ ក្នុងរយៈពេល ២០ ឆ្នាំកន្លងមកនេះ អត្រាអតិផរណារបស់ប្រទេសស្វីសតែងតែមានកម្រិតទាបបំផុត ជាមធ្យម ០.៣២% ហើយមានបរិត្តផរណាច្រើនឆ្នាំ។ នេះជួយរក្សាប្រាក់បញ្ញើនៅក្នុងធនាគារស្វីស បំប្លែងទៅជាហ្វ្រង់ស្វ៊ីស ពីការបាត់បង់តម្លៃតាមពេលវេលា។

៤.គុណភាពសេវាកម្មល្អឥតខ្ចោះ៖ ដោយសារតែវាបម្រើដល់អ្នកមាន ធនាគារស្វីសផ្តោតលើលក្ខណៈសម្បត្តិរបស់បុគ្គលិករបស់ពួកគេតាមរយៈដំណើរការជ្រើសរើសយ៉ាងម៉ត់ចត់បំផុត។ ក្រៅពីជំនាញល្អ បុគ្គលិកធនាគារក៏ត្រូវចេះយ៉ាងហោចណាស់ ៤ ភាសាដែររួមមាន អង់គ្លេស អ៊ីតាលី បារាំង និងអាល្លឺម៉ង់។

៥.ការគ្រប់គ្រងទ្រព្យសម្បត្តិប្រកបដោយប្រសិទ្ធភាព៖ យោងតាមអ្នកជំនាញធនាគារ វិធីសាស្ត្រគ្រប់គ្រងគណនីរបស់ធនាគារស្វីសគឺមានប្រសិទ្ធភាពណាស់។ ធនាគារស្វីសក៏បានទាញយកអត្ថប្រយោជន៍ពីផលប័ត្រអតិថិជនរបស់ខ្លួន ដើម្បីបង្កើនប្រសិទ្ធភាពធនធានវិនិយោគ ដោយភ្ជាប់ទំនាក់ទំនងការងារ និងសកម្មភាពអាជីវកម្មរបស់អតិថិជន។ នេះត្រូវបានគេចាត់ទុកថាជាលក្ខណៈទាក់ទាញមួយដើម្បីទាក់ទាញអតិថិជន និងបង្កើតបណ្តាញអាជីវកម្មសម្ងាត់ដែលមានប្រសិទ្ធភាពខ្ពស់៕

សហរដ្ឋអាមេរិក ៖ អ្នកដំណើរប្រុសម្នាក់បានប្រព្រឹត្រទង្វើពុំសមរម្យ និងដើររំខានអ្នកដំណើរផ្សេងទៀតនៅលើយន្តហោះរបស់ក្រុមហ៊ុនអាកាសចរណ៍ American Airlines ដែលបណ្តាលឱ្យមានភាពរញ៉េរញ៉ៃយ៉ាងខ្លាំង ទើបអាកាសយានិកបង្ខំចិត្តចុះចតយន្តហោះជាបន្ទាន់ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១២ ខែកក្កដា ឆ្នាំ២០២៤ ។

សារព័ត៌មានរាយការណ៍ថា អ្នកដំណើរប្រុសរូបនេះបានផឹកស្រាបៀរ Jack and Cokes មុនពេលឡើងជិះយន្តហោះ និងក្នុងអំឡុងពេលប្តូរជើងយន្តហោះ រួចហើយក៏បង្កចលាចលតែម្តង ។ លើសពីនេះ អ្នកដំណើរប្រុសរូបនេះក៏បាន ស្រា.ត ខោរបស់ខ្លួនបង្ហាញអ្នកដំណើរផ្សេងទៀតពេញយន្តហោះ ហើយថែមទាំងបាញ់នោមលើផ្លូវដើរក្នុងយន្តហោះទៀតផង ។

ក្រោយពេលយន្តហោះចុះចត សមត្ថកិច្ចបានចាប់ខ្លួនលោក Neil McCarthy អាយុ២៥ឆ្នាំ មកពីរដ្ឋ Oregon សហរដ្ឋអាមេរិក ពីបទករណីប្រព្រឹត្តទង្វើពុំសមរម្យនៅលើយន្តហោះ American Eagle 3921 ដែលហោះហើរពីទីក្រុង Chicago សហរដ្ឋអាមេរិក ទៅកាន់ទីក្រុង Manchester ប្រទេសអង់គ្លេស ។ ប៉ុន្តែយន្តហោះនេះត្រូវបង្ខំឱ្យផ្លាស់ប្តូរគោលដៅទៅកាន់ទីក្រុង Buffalo រដ្ឋញូវយ៉ក ។ នេះបើតាមការបញ្ជាក់ពីអ្នកនាំពាក្យក្រុមហ៊ុនអាកាសចរណ៍ American Airlines ។

លោក Neil McCarthy បានសារភាពប្រាប់សមត្ថកិច្ចថា លោកចូលចិត្តផឹកស្រាបៀរ Jack and Cokes ហើយលោកបានផឹកអស់ជាច្រើនកែវ មុនពេលឡើងលើយន្តហោះនៅទីក្រុង Portland រដ្ឋ Oregon សហរដ្ឋអាមេរិក ។ បន្ទាប់មក លោកក៏បានផឹកស្រាអស់ជាច្រើនកែវទៀត ក្នុងអំឡុងពេលប្តូរជើងយន្តហោះនៅទីក្រុង Chicago ។

ចំណែកសមត្ថកិច្ចនិយាយថា អ្នកដំណើរផ្សេងទៀតបានយកទូរស័ព្ទដៃថតរូបភាពលោក Neil McCarthy ផ្ញើមកសមត្ថកិច្ច ហើយក្នុងរូបភាពនេះ គេឃើញលោកស្រាតខោរបស់ខ្លួនចេញ និងឈរបាញ់នោមនៅលើយន្តហោះ ។ ក្រៅពីនេះ សមត្ថកិច្ចក៏ទទួលបានសេចក្តីរាយការណ៍ពីភ្នាក់ងារសន្តិសុខ និងបុគ្គលិកអាកាសចរណ៍ផងដែរ ។

ក្រុមហ៊ុនអាកាសចរណ៍ American Airlines បញ្ជាក់ថា យន្តហោះនេះត្រូវបានអាជ្ញាធរបញ្ជាឱ្យផ្លាស់ប្តូរគោលដៅភ្លាមៗ ដោយសារមានការរំខានពីអ្នកដំណើរ ។ សមត្ថកិច្ចបានចោទប្រកាន់លោក Neil McCarthy ពីបទបង្ហាញអវៈយវៈភេទរបស់ខ្លួននៅលើយន្តហោះ ហើយលោកនឹងជាប់ពន្ធនាគាររយៈពេល៦ខែ និងបង់ប្រាក់ពិន័យចំនួន៥.០០០ដុល្លារអាមេរិក ៕

បរទេស៖ អាតាកាម៉ាដែលជាវាលខ្សាច់គ្មានប៉ូលក្តៅបំផុតនៅលើភពផែនដី ស្ថិតក្នុងប្រទេសឈីលី ត្រូវបានគ្របដណ្តប់ដោយផ្កាពណ៌ស្វាយដ៏កម្រដែលរីកនៅពាក់កណ្តាលរដូវរងារ បានកំពុងទាក់ទាញការចាប់អារម្មណ៍យ៉ាងខ្លាំងពីភ្ញៀវទេសចរជុំវិញពិភពលោក។
យោងតាម IFL Science ដែលបានចុះផ្សាយកាលពីថ្ងៃទី១១ ខែកក្កដា ឆ្នាំ២០២៤ ថាអាកាសធាតុនៅទីនេះគឺមិនធម្មតានោះទេ ដោយសារតែវាលខ្សាច់គឺក្តៅបំផុតនៅលើផែនដី ធ្វើឱ្យផ្កានានាពិបាកនឹងរីកដុះដាលខ្លាំងណាស់ ទោះជាយ៉ាងណាវាហាក់ដូចជាចម្លែកដែលរុក្ខជាតិអាចរីកដុះដាលនៅកន្លែងដ៏អាក្រក់បែបនេះបាន។

នេះគឺជាបាតុភូតដ៏កម្រមួយដែលធ្លាប់បានកើតឡើងរៀងរាល់ពីរបីឆ្នាំម្តង។ កន្លែងដែលមានអាកាសធាតុដ៏អាក្រក់ និងមិនសូវមានអ្នកស្គាល់ ស្រាប់តែក្លាយទៅជាកន្លែងដែលមានផ្ការីកយ៉ាងស្រស់ស្អាត និងជាវាលខ្សាច់មួយដែលទាក់ទាញភ្ញៀវទេសចរបំផុត។ វាលខ្សាច់ដ៏ក្តៅនេះបានប្រែក្លាយទៅជាសួនផ្កា ២០០ ប្រភេទដែលលាតសន្ធឹងរាប់រយគីឡូម៉ែត្រ ដោយលក្ខខណ្ឌអាកាសធាតុនាពេលថ្មីៗនេះ ហាក់ដូចជាសមស្របជាចម្បងសម្រាប់ “ផ្កាពណ៌ស្វាយ” ខ្លាំងណាស់។

ការរីកដុះដាលរុក្ខជាតិនៅលើវាលខ្សាច់ជាធម្មតាកើតឡើងនៅខែកញ្ញាដល់ខែវិច្ឆិកា នៅពេលដែលភ្លៀង កំដៅ និងពន្លឺព្រះអាទិត្យរួមបញ្ចូលគ្នា។ ទោះជាយ៉ាងណាក៏ដោយ ការរីកដុះដាលនេះបានកើតឡើងខុសពីធម្មតា ហើយទំនងជា El Nino គឺជាមូលហេតុ។ El Nino គឺជាការប្រែប្រួលនៃសីតុណ្ហភាពទឹកនៅក្នុងមហាសមុទ្រប៉ាស៊ីហ្វិក មានឥទ្ធិពលលើពិភពលោក ចាប់ពីខ្យល់ សីតុណ្ហភាព ទឹកភ្លៀង រហូតដល់ឥទ្ធិពលព្យុះត្រូវបានប៉ះពាល់។ នៅពេល El Nino និង ENSO ប៉ះគ្នាសីតុណ្ហភាពផ្ទៃមហាសមុទ្រនឹងកើនឡើងនៅតំបន់ត្រូពិចកណ្តាល និងខាងកើតប៉ាស៊ីហ្វិក។ នេះបានបណ្តាលឱ្យមានភ្លៀងធ្លាក់កើនឡើងខ្លាំងនៅក្នុងតំបន់មួយចំនួន ហើយនាពេលថ្មីៗនេះភ្លៀងនៅវាលខ្សាច់ Atacama ក៏បានបង្កើតលក្ខខណ្ឌសម្រាប់ផ្ការីកខុសធម្មតាបែបនេះតែម្តង។

យោងតាមលោក Cesar Pizarro ប្រធានផ្នែកអភិរក្សជីវចម្រុះនៅមូលនិធិព្រៃឈើប្រទេសឈីលី (CONAF) បានឱ្យដឹងថា ភ្លៀងធ្លាក់ពី ១១ ទៅ ១២ មិល្លីម៉ែត្រក្នុងខែមេសា រួមផ្សំជាមួយនឹងពពកទាបក្រាស់ដែលគ្របដណ្ដប់លើដីជារៀងរាល់យប់។ ខណៈពេលដែលវាលខ្សាច់ក្តៅជាធម្មតាគ្របដណ្តប់លើផ្ទៃដី ១៥,០០០ គីឡូម៉ែត្រការ៉េ ផ្ការដូវរងានេះគ្របដណ្តប់ត្រឹមតែពីរបីរយគីឡូម៉ែត្រការ៉េប៉ុណ្ណោះ។ ទោះជាយ៉ាងណាក៏ដោយ ជាមួយនឹងភ្លៀងដែលរំពឹងថានឹងបន្តធ្លាក់ចុះ ផ្កាទំនងជារីកដុះដាលបន្ថែមទៀត៕