ប្រទេសឥណ្ឌា ៖ ឥណ្ឌាបាននាំចេញអង្ករច្រើនបំផុតទៅក្រៅប្រទេស ហើយកាលពីឆ្នាំ២០២៣ ឥណ្ឌាបាននាំចេញអង្កររហូតដល់១៦លាន៥សែនតោន និងក្លាយជាប្រទេសនាំចេញអង្ករលំដាប់ទី១ លើពិភពលោក ។ លើសពីនេះ ឥណ្ឌាបានវ៉ាដាច់ប្រទេសថៃ ដែលបាននាំចេញអង្ករត្រឹមតែ៨លាន២សែនតោន និងស្ថិតនៅលំដាប់ទី២ លើពិភពលោក ។

ប៉ុន្តែ Global Hunger Index បានចាត់ចំណាត់ថ្នាក់ប្រទេសមានភាពអត់ឃ្លានខ្លាំងបំផុតលើពិភពលោក ហើយបង្ហាញថា ឥណ្ឌាជាប់ចំណាត់ថ្នាក់ទី១១១ ក្នុងចំណោម១២៥ប្រទេស (បើប្រទេសណាស្ថិតនៅក្រោមគេ គឺប្រទេសនោះកាន់តែមានភាពអត់ឃ្លានខ្លាំងឡើង) ។ ឥណ្ឌាទទួលបានពិន្ទុភាពអត់ឃ្លាន ស្មើនឹង២៨.៧ពិន្ទុ ដែលចាត់ទុកថា ពលរដ្ឋឥណ្ឌាអត់ឃ្លានខ្លាំង ។

ឥណ្ឌាអាចចិញ្ចឹមមនុស្សទូទាំងពិភពលោកបាន ហើយត្រៀមក្លាយជាប្រទេសនាំមុខផ្នែកសេដ្ឋកិច្ច ប៉ុន្តែឥណ្ឌាបែរក្លាយជាប្រទេសមានពលរដ្ឋអត់ឃ្លាន និងខ្វះខាតម្ហូបអាហារច្រើនបំផុតលើពិភពលោក ។ មូលហេតុចម្បង គឺពុំមែនបណ្តាលមកពីភាពក្រីក្រដូចមនុស្សភាគច្រើនគិតទេ ប៉ុន្តែវាបណ្តាលមកពីកត្តាសំខាន់ៗចំនួន២ រួមមាន ៖

១-បញ្ហាផ្នែក Logistics និង Supply ៖
Logistics និង Supply គឺជាបញ្ហាសំខាន់ក្នុងការថែរក្សា និងរក្សាគុណភាពវត្ថុធាតុដើមផ្សេងៗដែលបានផលិត ហើយបើទោះជាឥណ្ឌាអាចផលិតទំនិញ ឬទិន្នផលកសិកម្មបានច្រើនជាងបច្ចុប្បន្នទ្វេដងក្តី ប៉ុន្តែផ្នែក Logistics និង Supply របស់ឥណ្ឌាមិនល្អ ។ ហេតុនេះ ពលរដ្ឋឥណ្ឌានៅតែមានភាពអត់ឃ្លានបន្តទៀត ។

បច្ចុប្បន្ន ប្រទេសឥណ្ឌាបានពឹងផ្អែកលើការដឹកជញ្ជូនទំនិញតាមផ្លូវគោកយ៉ាងខ្លាំង ឬស្មើប្រមាណ៦៥% នៃការដឹកជញ្ជូនសរុប ។ ប៉ុន្តែផ្លូវនានានៅឥណ្ឌាពុំបានកែលម្អទេ ហើយវាអាចបណ្តាលឱ្យរាំងស្ទះដល់ការដឹកជញ្ជូនទំនិញ ឬទិន្នផលកសិកម្ម, ភាពយឺតយ៉ាវ និងធ្វើឱ្យទំនិញខូចខាត ។

ជាក់ស្តែង បើឥណ្ឌាអាចផលិតអង្ករបានជាង៣០លានតោន ប៉ុន្តែឥណ្ឌាខ្វះខាតការកែលម្អផ្នែក Logistics និង Supply វានឹងធ្វើឱ្យអង្ករជាង៣០លានតោននេះខូចគុណភាពក្នុងពេលដឹកជញ្ជូន និងការវេចខ្ចប់គ្មានស្តង់ដារ ។

២-ផលប៉ះពាល់ដោយសារកំណើនពលរដ្ឋមានជីវភាពមធ្យម ៖
នៅឆ្នាំ២០២៤ ពលរដ្ឋឥណ្ឌាមានជីវភាពមធ្យម ស្មើនឹង៣១% នៃចំនួនពលរដ្ឋសរុប ហើយឥណ្ឌារំពឹងថា រយៈពេល៧ឆ្នាំទៀត ពលរដ្ឋមានជីវភាពមធ្យមនឹងកើនឡើងដល់៣៨% ។ ហេតុនេះ កំណើនពលរដ្ឋមានជីវភាពមធ្យមនឹងធ្វើឱ្យប៉ះពាល់ដល់ការបរិភោគអង្ករក្នុងប្រទេស ខណៈពលរដ្ឋមានជីវភាពធូរធាត្រូវការទំនិញមានគុណភាពល្អ ។

តម្រូវការអាហារកើនឡើងពីពលរដ្ឋមានជីវភាពធូរធា គឺវាផ្ទុយគ្នានឹងអាហារដែលឥណ្ឌាមានសម្រាប់ផ្គត់ផ្គង់ពលរដ្ឋ ទើបធ្វើឱ្យប៉ះពាល់អាហារជារួមរបស់ឥណ្ឌា ។ បើពលរដ្ឋមានជីវភាពធូរធាមានតម្រូវការអាហារកាន់តែច្រើន ប៉ុន្តែអាហារស្តុកទុករបស់ឥណ្ឌាមានបរិមាណដូចមុន (បើទោះជាឥណ្ឌាបានផលិតអង្ករកើនឡើង ប៉ុន្តែការដឹកជញ្ជូនមិនល្អ) វានឹងធ្វើឱ្យឥណ្ឌាពុំអាចផ្គត់ផ្គង់អាហារគ្រប់គ្រាន់ដល់ពលរដ្ឋ ។

សរុបមក កត្តាសំខាន់ទាំង២នេះ នឹងប៉ះពាល់ដល់កង្វះខាតអាហាររបស់ឥណ្ឌាយ៉ាងខ្លាំង ។ ការដោះស្រាយបញ្ហា គឺពុំអាចចាប់ផ្តើមពីរដ្ឋាភិបាលតែមួយទេ ប៉ុន្តែត្រូវមានភាគីផ្សេងៗចូលរួមចំណែកដែរ ដូចជា ៖ ក្រុមហ៊ុនឯកជន និងសហគមន៍ ។ ភាគីទាំងអស់នឹងសហការគ្នាដោះស្រាយបញ្ហាខ្វះខាតអាហារក្នុងប្រទេស ហើយបច្ចុប្បន្ន រដ្ឋាភិបាលឥណ្ឌាក៏បានព្យាយាមចេញគោលនយោបាយជាច្រើន ដើម្បីដោះស្រាយបញ្ហាទាំងនេះ ៕

ប្រសិនបើលោកអ្នកមានបំណងចង់ទៅទស្សនាតំបន់ទេសចរណ៍នានាក្នុងប្រទេសកូរ៉េខាងជើង យើងសូមណែនាំឱ្យមកន្លែងទាំងនេះដោយសារវាជាកន្លែងទាក់ទាញការចាប់អារម្មណ៍បំផុតពីសំណាកភ្ញៀវទេសចរអន្តរជាតិ ដែលកន្លែងនោះមានឈ្មោះថា ជំរុំរដូវក្តៅ Songdowon។ ជំរុំរដូវក្តៅ Songdowon គឺមានកន្លែងកម្សាន្តជាច្រើនដូចជា ឆ្នេរខ្សាច់ សួនទឹកដ៏ត្រជាក់ត្រឈឹម បន្ទប់វីដេអូហ្គេម អាងចិញ្ចឹមត្រីគ្រប់្រភេទ ទីលានបាល់ទាត់ដ៏ធំល្វឹងល្វើយ កន្លែងហាត់បាល់បោះ បាញ់ធ្នូ និងការឡើងភ្នំក្នុងផ្ទះ រួមទាំងមានវិចិត្រសាលនៃគំរូសត្វពាហនៈផងដែរ ជាពិសេសគឺគំរូសត្វស្ទាំងខាងជើង ដែលជាបក្សីតំណាងជាតិរបស់ប្រទេសកូរ៉េខាងជើង។

លើសពីនេះនៅខាងក្នុងជំរុំក៏មានវត្ថុបុរាណប្រវត្តិសាស្ត្រដាក់តាំងផងដែរ ដូចជាតង់ដែលធ្លាប់បានទៅលេងដោយមេដឹកនាំគីម ជុងអ៊ីល នៅពេលលោកមកជំរុំរដូវក្តៅក្នុងឆ្នាំ ២០០៨ ហើយក៏ជាកន្លែងសម្រាប់ស្វាគមន៍ក្រុមកុមារអន្តរជាតិជាច្រើនមកកាន់ប្រទេសកូរ៉េខាងជើងផងដែរ។ ជំរុំរដូវក្តៅអន្តរជាតិ Songdowon ស្ថិតក្នុងខេត្ត Kangwon ប្រទេសកូរ៉េខាងជើង ធ្លាប់ស្វាគមន៍កុមារបរទេសជាច្រើន។ កន្លែងនេះត្រូវបានបើកដំបូងនៅឆ្នាំ ១៩៦០ ដើម្បីលើកកម្ពស់ទំនាក់ទំនងរបស់កូរ៉េខាងជើងជាមួយបរទេស តាមរយៈការរៀបចំជំរុំរដូវក្តៅសម្រាប់កុមារ។

យោងតាម RIA Novosti កុមារមួយចំនួននៅក្នុងប្រទេសរុស្ស៊ីនឹងចូលរួមជំរុំរដូវក្តៅនេះក្នុងខែកក្កដានៃឆ្នាំ ២០២៤។ លោក Rowan Beard អ្នកគ្រប់គ្រងទេសចរណ៍នៃ Young Pioneer Tours ដែលជាអង្គភាពមានបទពិសោធន៍ជាង ១០ ឆ្នាំនាំអ្នកទេសចរទៅកាន់ប្រទេសកូរ៉េខាងជើងបាននិយាយថា បច្ចុប្បន្នជំរុំរដូវក្តៅរបស់ប្រទេសនេះគឺបានស្វាគមន៍និស្សិតមកពីប្រទេសជាច្រើនដូចជា រុស្ស៊ី ចិន ថៃ វៀតណាម ម៉ុងហ្គោលី ម៉ិកស៊ិក និងបណ្តាប្រទេសមួយចំនួនទៀត។ ទោះជាយ៉ាងណា ភ្ញៀវទេសចរដែលចូលរួមបោះជំរុំត្រូវតែគោរពវិញ្ញាណក្ខន្ធដល់អតីតមេដឹកនាំកូរ៉េខាងជើងដូចជា ការច្រៀងបទភ្លេងជាតិ ឬការលើករូបចម្លាក់ជាដើម។

បើយោងតាម Insider នៅទីនេះក៏មានការប្រកួតហែលទឹកផងដែរ។ ដូច្នេះក្នុងជំរុំរដូវក្តៅនេះគឺមានសួនទឹកដ៏ធំល្វឹងល្វើយដែលមានហ្គេមដូចជាស្លាយទឹក និងបឹងទូកជាដើម ហើយអ្នកបោះជំរុំក៏ត្រូវរៀនពីរបៀបចំអិនម្ហូបបែបប្រពៃណីកូរ៉េខាងជើងនៅទីនេះផងដែរ។ ទោះជាយ៉ាងណាក៏ដោយ អ្នកខ្លះបានចែករំលែកថា អាហារខ្លះគឺមិនសូវមានរសជាតិនោះទេ ពួកគេអាចញ៉ាំបានតែបាយ នំបុ័ង ហើយរង់ចាំអាហារសមុទ្រម្តងក្នុងមួយសប្តាហ៍។ ហេតុនេះសម្រាប់តម្លៃចូលរួមបោះជំរុំនៅ Songdowon ភ្ញៀវទេសចរត្រូវចំណាយត្រឹមតែ ៣០០ ទៅ ៤០០ ដុល្លារអាមេរិកប៉ុណ្ណោះ៕

ថ្មីៗនេះ រូបភាពចែកចាយពីបណ្តាញសង្គម បានបង្ហាញឲ្យឃើញពីសកម្មភាពរុះរើស្លាក.ស្រា.បៀរគ្រប់ប្រភេទនៅទូទាំងខេត្តតាកែវ ដែលបណ្តាលឲ្យមហាជនជាច្រើនបានសម្តែងនូវការពេញចិត្តយ៉ាងខ្លាំង ក៏ដូចជាសូមសំណូមពរដល់ខេត្តផ្សេងៗយកគំរូតាមខេត្តនេះដែរ។

កាលពីថ្ងៃទី៧ ខែកក្កដា ឆ្នាំ២០២៤នេះ យោងតាមការបង្ហោះដោយគេហទំព័រមួយដែលមានឈ្មោះថា «រដ្ឋបាលឃុំបឹងត្រាញ់ខាងជើង ស្រុកសំរោងខេត្តតាកែវ» បានបង្ហាញពីសកម្មភាពក្រុមការងារកំពុងញាប់ដៃញាប់ជើង រុះរើស្លាកស្រាបៀរគ្រប់ប្រភេទដែលដាក់តាំងបង្ហាញនៅមុខតូបលក់ទំនិញក៏ដូចជាហាងនានា ស្ថិតនៅតាមបណ្តោយផ្លូវជាតិលេខ៣ ឃុំបឹងត្រាញ់ខាងជើង ស្រុកសំរោង ខេត្តតាកែវ។

មិនត្រឹមតែប៉ុណ្ណោះ ចំពោះនៅស្រុកផ្សេងៗទៀតក្នុងខេត្តតាកែវនេះ ក៏បានធ្វើការរុះរើស្លាកស្រាបៀរនេះចោលផងដែរ តួយ៉ាងដូចជាស្រុកគិរីវង្ស ក៏បានធ្វើការទម្លាក់ផ្លាកប៉ាណូធំៗនៅតាមដងផ្លូវជាបន្តបន្ទាប់ហើយ នេះបើយោងតាមការបង្ហោះដោយគណនីមួយមានឈ្មោះថា Pheak Kampuchea។

គួរបញ្ជាក់ថា ការចុះរុះរើស្លាកស្រាបៀរទាំងធំទាំងតូចនៅទូទាំងខេត្តតាកែវនេះ គឺធ្វើឡើងបន្ទាប់ពីអភិបាលថ្មីខេត្តតាកែវ លោកវ៉ី សំណាង កាលពីពេលកន្លងទៅនេះ បានដាក់ចេញនូវបទបញ្ជាឲ្យមន្រ្តីជំនាញពាក់ព័ន្ធ ត្រូវតែរុះរើផ្ទាំងផ្សព្វផ្សាយពាណិជ្ជកម្មស្រាបៀរគ្រប់ប្រភេទចេញទាំងអស់ឲ្យតែស្ថិតនៅក្នុងភូមិសាស្រ្តខេត្តតាកែវ ដើម្បីចូលរួមលើកកម្ពស់សុខមាលភាពរបស់ប្រជាពលរដ្ឋ។

យ៉ាងណាមិញ បន្ទាប់អាជ្ញាធរបានអនុវត្តតាមបទបញ្ញាត្តិនេះកាលពីពេលថ្មីៗហើយ ដោយសង្កេតឃើញថា ប្រជាពលរដ្ឋភាគច្រើនហាក់សម្តែងនូវការពេញចិត្ត ដោយបញ្ចេញមតិថាគាំទ្រយ៉ាងពេញទំហឹងគ្រប់ៗគ្នា រហូតដល់មានការសំណូមពរទៀតថា ខេត្តផ្សេងៗទៀតក៏គូរតែយកគំរូតាមខេត្តតាកែវផងដែរ៕

ប្រទេសចិន៖ ការងារនៅក្នុងវិស័យ AI ដូចជាអ្នកបង្កើតកម្មវិធី AI ជំនាន់ថ្មី, អ្នកផលិតមនុស្សយន្ត AI និងវិស្វករ AI ផ្សេងទៀត អាចទទួលបានប្រាក់ខែ ១,៨០០ ដុល្លារអាមេរិកឡើងទៅ ក្លាយជាឧស្សាហកម្មដែលរកចំណូលបានច្រើនជាងគេបំផុតនៅក្នុងប្រទេសចិននាពេលបច្ចុប្បន្ននេះ។

យោងតាមការចុះផ្សាយរបស់ South China Morning Post កាលពីថ្ងៃទី៨ ខែកក្កដា បានឱ្យដឹងថា ស្ថិតិប្រាក់ខែសម្រាប់ត្រីមាសទី ២ នៃឆ្នាំ ២០២៤ ចេញផ្សាយដោយវេទិកាជ្រើសរើសបុគ្គលិកឈានមុខគេនៅក្នុងប្រទេសចិន Zhilian Zhaopin បានបង្ហាញថាការងារនៅក្នុងវិស័យ AI គឺបានឃើញកំណើនប្រាក់ខែប្រចាំខែ ៥.៣% បើប្រៀបធៀបទៅនឹងត្រីមាសមុនដល់ទៅ ១,៨៧០ ដុល្លារអាមេរិក។

លទ្ធផលខាងលើបានធ្វើឱ្យ AI លើសពីឧស្សាហកម្មហិរញ្ញវត្ថុផ្សេងទៀតដែលមានប្រាក់ខែប្រចាំខែត្រឹមតែ ១,៦០០ ទៅ ១,៨០០ ដុល្លារអាមេរិកប៉ុណ្ណោះ។ នេះគឺជាលើកទីមួយហើយដែល AI ត្រូវបានចាត់ថ្នាក់ជាផ្នែកដាច់ដោយឡែកមួយនៅក្នុងរបាយការណ៍នេះ ជំនួសឱ្យការដាក់ជាក្រុមទៅក្នុងវិស័យបច្ចេកវិទ្យាដូចពីមុន។ ដូច្នេះសម្រាប់វិស្វករ AI ប្រាក់ខែជាមធ្យមប្រចាំខែគឺច្រើនជាង ៣,០០០ ដុល្លារអាមេរិក នាំមុខគេ ២០ ការងារដែលអាជីពនេះគឺមានប្រាក់ខែខ្ពស់បំផុតនៅក្នុងប្រទេសនាពេលបច្ចុប្បន្ន។ ទន្ទឹមនឹងនេះវិស្វករ AI នឹងអាចទទួលបានប្រាក់ខែកាន់តែច្រើន ប្រសិនបើពួកគេមានការអប់រំ បទពិសោធន៍ខ្ពស់ ឬមុខតំណែងក្នុងចក្ខុវិស័យកុំព្យូទ័រស្ទាត់ជំនាញ។

បើយោងតាម Global times បានប៉ាន់ប្រមាណថា ប្រាក់បៀវត្សរ៍ខ្ពស់នៃធនធានមនុស្ស AI បានមកពីការកើនឡើងភ្លាមៗនៃតម្រូវការពីក្រុមហ៊ុនចិន ដើម្បីអភិវឌ្ឍកម្មវិធី AI បន្ថែមទៀត។ ហេតុនេះក្រុមហ៊ុនបច្ចេកវិទ្យាយក្សដូចជា ByteDance, Huawei និង Tencent នឹងប្រកួតប្រជែងគ្នាដើម្បីទាក់ទាញទេពកោសល្យកំពូលដើម្បីសម្រេចបាននូវគោលដៅរបស់ពួកគេក្នុងការឈានទៅដល់ពិភពលោក។

បើយោងតាមគេហទំព័រនេះក៏បានដកស្រង់ផងដែរថា អ្នកជំនាញ AI ដ៏កំពូលនឹងអាចទទួលបានប្រាក់ខែខ្ពស់ជាង ១ លានយន់ (ប្រមាណ ១៣ ម៉ឺនដុល្លារអាមេរិក)។ Liu Gang ប្រធានសេដ្ឋវិទូនៅវិទ្យាស្ថានយុទ្ធសាស្ត្រអភិវឌ្ឍន៍ AI ជំនាន់ថ្មីរបស់ប្រទេសចិន បាននិយាយថា បច្ចុប្បន្នប្រទេសនេះកំពុងប្រកាសជ្រើសរើសវិស្វករ AI ជាបន្តបន្ទាប់បន្ថែមទៀត ដោយសារ AI មានរបកគំហើញ និងមានឥទ្ធិពលលើគ្រប់វិស័យ។

គួរបញ្ជាក់ដែរថា បច្ចុប្បន្នប្រទេសចិនមានក្រុមហ៊ុន AI ជាង ៤,៥០០ កន្លែងនៅគ្រប់ទីតាំង។ ឧស្សាហកម្មបញ្ញាសិប្បនិមិត្តក្នុងប្រទេសនេះត្រូវបានប៉ាន់ប្រមាណថានឹងឈានដល់ទំហំជាង ៨១ ពាន់លានដុល្លារនៅឆ្នាំ ២០២៤ ដែលកើនឡើង ១៣.៩% បើធៀបនឹងឆ្នាំមុន។ ទោះជាយ៉ាងណាក៏ដោយ ពួកគេក៏កំពុងប្រឈមមុខនឹងបញ្ហាប្រឈមមួយចំនួនផងដែរ ដូចជាការរក្សាបាននូវទេពកោសល្យ ភាពមិនស៊ីសង្វាក់គ្នាក្នុងការផ្គត់ផ្គង់ និងតម្រូវការសម្រាប់អ្នកជំនាញដែលមានជំនាញ ក៏ដូចជាតម្រូវការសម្រាប់ប្រព័ន្ធបណ្តុះបណ្តាលទេពកោសល្យ៕

ប្រទេសជប៉ុន ៖ កាលពីថ្ងៃទី៦ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា ក្រុមហ៊ុនអាកាសចរណ៍ជប៉ុនឈ្មោះ Japan Airlines បានសហការជាមួយក្រុមហ៊ុន Toppan សាកល្បងប្រើប្រាស់កញ្ចក់បកប្រែភាសានៅអាកាសយានដ្ឋាន ។ កញ្ចក់នេះអាចបកប្រែរហូតដល់១៣ភាសា ដើម្បីជួយសម្រួលដល់ភ្នាក់ងារអាកាសយានដ្ឋានងាយស្រួលទំនាក់ទំនងជាមួយភ្ញៀវទេសចរបរទេសបន្ថែមទៀត ។

កញ្ចក់បកប្រែភាសានេះមានឈ្មោះថា «VoiceBiz UCDisplay» ដែលមានផ្ទៃភ្លឺថ្លា ហើយភ្នាក់ងារអាកាសយានដ្ឋានជប៉ុននឹងអាចទំនាក់ទំនងជាមួយភ្ញៀវទេសចរបរទេសដោយឃើញមុខគ្នាតាមកញ្ចក់ ។ រីឯការប្រើប្រាស់កញ្ចក់បំពាក់បច្ចេកវិទ្យាទំនើបនេះ នឹងចាប់ផ្តើមនៅអាកាសយានដ្ឋាន Haneda ក្នុងទីក្រុងអូតា មុនគេ ។

គេអាចបញ្ចូលអត្ថបទដែលចង់បកប្រែ ដោយការវាយអក្សរនៅលើ Keyboard ឬស្តាប់សំឡេងនិយាយតាមមីក្រូហ្វូន ហើយវានឹងស្គាល់ភាសាអង់គ្លេសមុនគេ ។ កញ្ចក់នេះនឹងបង្ហាញភាសាដើម និងភាសាបកប្រែ ដើម្បីឱ្យភ្នាក់ងារអាកាសយានដ្ឋាន និងភ្ញៀវទេសចរបរទេសងាយស្រួលអាន ។

ក្រុមហ៊ុន Japan Airlines នឹងចាប់ផ្តើមសាកល្បងប្រើប្រាស់កញ្ចក់បកប្រែភាសានេះ នៅអាកាសយានដ្ឋាន Haneda ក្នុងទីក្រុងអូតា ចាប់ពីថ្ងៃទី២ ដល់ថ្ងៃទី៨ ខែកក្កដា ។ បន្ទាប់មក ចាប់ពីថ្ងៃទី២០ ដល់ថ្ងៃទី២៦ ខែសីហា ក្រុមហ៊ុននឹងសាកល្បងនៅអាកាសយានដ្ឋាន Itami ក្នុងទីក្រុងអូសាកា ។

វាជាការយកបច្ចេកវិទ្យាទំនើបមកជួយដោះស្រាយឧបសគ្គផ្នែកភាសា ដើម្បីផ្តល់សេវាកម្មនៅអាកាសយានដ្ឋានឱ្យកាន់តែប្រសើរឡើង ប៉ុន្តែការប្រើប្រាស់បច្ចេកនេះ ពុំទាន់ល្អឥតខ្ចោះទេ ។ បើតាមរូបភាពដែលប្រព័ន្ធផ្សព្វផ្សាយជាច្រើនបង្ហាញឃើញថា ការប្រើប្រាស់បច្ចេកវិទ្យានេះមានបញ្ហាក្នុងការបកប្រែភាសាអង់គ្លេស ឬបកប្រែពុំត្រឹមត្រូវ១០០% ។

នេះជាមូលហេតុធ្វើឱ្យក្រុមហ៊ុន Japan Airlines យកបច្ចេកវិទ្យាបកប្រែភាសាតាមកញ្ចក់មកសាកល្បងជាមុន និងប្រើប្រាស់នៅ Counter ពិសេសក្នុងអគារអ្នកដំណើររបស់អាកាសយានដ្ឋាន Haneda ។ រីឯទិន្នន័យការប្រើប្រាស់កញ្ចក់នេះ ក្រុមហ៊ុននឹងយកទៅកែលម្អបន្ថែមទៀត ដើម្បីឱ្យវាកាន់តែដំណើរការល្អជាងនេះ ៕

តារាចម្រៀងដ៏ល្បីល្បាញរបស់ពិភពលោក Justin Bieber បានចូលរួមប្រគំតន្ត្រីក្នុងពិធីជប់លៀងដ៏ធំមួយនៅឯទីក្រុងបុមបៃ ប្រទេសឥណ្ឌាកាលពេលថ្មីៗនេះ ដែលជាកម្មវិធីជប់លៀងមុនរៀបការរបស់កូនមហាសេដ្ឋី Mukesh Ambani។
ជាការពិតណាស់ កូនប្រុសពៅរបស់មហាសេដ្ឋី Mukesh Ambani គឺលោក Anant Ambani នឹងចាប់ផ្តើមប្រារព្ធពិធីមង្គលការរបស់ខ្លួនរយៈពេល ៣ ថ្ងៃនៅថ្ងៃទី១២ ដល់ថ្ងៃទី ១៤ ខែកក្កដា ឆ្នាំ២០២៤ ជាមួយ Radhika Merchant ដែលជាកូនស្រីរបស់អ្នកជំនួញល្បីល្បាញម្នាក់ ដោយបានអញ្ជើញភ្ញៀវសំខាន់ៗចំនួន ១,២០០ នាក់ រួមទាំងមហាសេដ្ឋីកំពូលៗជាច្រើនរូប និងអតីតអ្នកនយោបាយជុំវិញពិភពលោកផងដែរ។

ទោះជាយ៉ាងណា កាលពីល្ងាចថ្ងៃទី ៥ ខែកក្កដាកន្លងទៅនេះ កូនប្រុសពៅ Anant Ambani គឺបានរៀបចំកម្មវិធីជប់លៀងដ៏ធំមួយមុនថ្ងៃរៀបការ នៅឯមជ្ឈមណ្ឌលវប្បធម៌ Nita Mukesh Ambani ដោយនៅក្នុងកម្មវិធីនោះក៏មានវត្តមានតារាល្បីៗរបស់ពិភពលោកជាច្រើនដួង រួមទាំងវត្តមានតារាចម្រៀងសញ្ជាតិកាណាដា Justin Bieber ចូលរួមប្រគំតន្ត្រីផងដែរ។ នេះគឺជាពិធីមុនអាពាហ៍ពិពាហ៍បែបប្រពៃណី ដែលគ្រួសារទាំងពីរត្រូវជួបជុំគ្នា ច្រៀងរាំជាមួយគ្នាយ៉ាងសប្បាយ។

នៅក្នុងកម្មវិធីនោះគេឃើញថា តារាចម្រៀងប្រុស Justin Bieber បានតុបតែងខ្លួន ដោយពាក់អាវពណ៌ស ស្លៀកខោពណ៌ខ្មៅ បង្ហាញក្បាច់រាំដ៏ស៊ីចស៊ី និងទាក់ទាញបំផុត ក៏ដូចជាបានសម្តែងជាមួយតារាបូលីវូតជាច្រើនដួងទៀតផង។ តារាប្រុសរូបនេះត្រូវបានគេដឹងថា ទទួលបានប្រាក់ចំណូលរហូតដល់ ១០ លានដុល្លារអាមេរិកឯណោះ ពីការប្រគំតន្ត្រីក្នុងពិធីជប់លៀងរបស់កូនមហាសេដ្ឋីអាស៊ី ដែលនេះត្រូវបានគេចាត់ទុកថា ប្រាក់ជួលរបស់ Justin Bieber គឺខ្ពស់ជាង Rihanna ទៅទៀត។

គួរបញ្ជាក់ដែរថា ពិធីមង្គលការរបស់កូនប្រុសពៅមហាសេដ្ឋី Mukesh Ambani នៅពេលខាងមុខនេះ នឹងប្រព្រឹត្តទៅយ៉ាងមហាឱឡារឹក នៅឯមជ្ឈមណ្ឌលព្រឹត្តិការណ៍ Jio World ក្នុងទីក្រុង Mumbai ប្រទេសឥណ្ឌា ដែលកន្លែងនេះគឺមានសមត្ថភាពផ្ទុកមនុស្សបានរហូតដល់ ១៦,០០០ នាក់ឯណោះ ដោយចំណាយលុយប្រហែល ១០០ លានដុល្លារអាមេរិក។ បន្ទាប់ពីប្រារព្ធពិធីអាពាហ៍ពិពាហ៍ ៣ ថ្ងៃក្នុងប្រទេសឥណ្ឌារួច កូនកំលោះ Anant និងកូនក្រំ Radhika ក៏បានរៀបចំពិធីជប់លៀងស្និទ្ធស្នាលចំនួនពីរផ្សេងទៀតជាមួយមិត្តភ័ក្តិ រួមទាំងព្រឹត្តិការណ៍មួយនៅលើទូកទេសចរណ៍រយៈពេលបីថ្ងៃពីប្រទេសអ៊ីតាលីទៅកាន់ប្រទេសបារាំងផងដែរ៕