ស្ទឹងត្រែងត្រូវបានគេចាត់ទុកថា ជាខេត្តដែលមានសក្ដានុពលទេសចរណ៍ វប្បធម៌ប្រពៃណីជនជាតិដើមភាគតិច ខ្លាំងជាងគេនៅតំបន់ភាគខាងជើង និងជាខេត្តភូមិភាគឦសានរបស់កម្ពុជា។ ក្នុងខេត្តនេះមានតំបន់ទេសចរណ៍បែបវប្បធម៌ និងធម្មជាតិជាច្រើនដែលភ្ញៀវជាតិ និងអន្តរជាតិ បានមកដល់ហើយ ដឹងតែមិនចង់ត្រលប់ទៅវិញនោះទេ ដោយសារជក់ចិត្តនឹងសម្រស់ធម្មតាមតាមដងទន្លេមេគង្គ និងទន្លេសេកុង ដែលបង្កប់នូវសម្រស់ធម្មជាតិ មិនសរសើរមិនបាន។ ដូច្នេះខាងក្រោមនេះគឺជារមណីយដ្ឋានល្បីៗនៅខេត្តស្ទឹងត្រែងដែលអ្នកមិនគួររំលង៖
១.បូរីអូរស្វាយ៖ បូរីអូរស្វាយស្ថិតក្នុងភូមិអូរស្វាយ ឃុំអូរស្វាយ នៃស្រុកថាឡាបូរិវ៉ាត ខេត្តស្ទឹងត្រែង គឺជារមណីយដ្ឋានមួយ ក្នុងចំណោមរមណីយដ្ឋាន ដែលពេញនិយមបំផុតពីសំណាក់ភ្ញៀវទេសចរជាតិ និងអន្តរជាតិ។ តំបន់នេះគឺជាផ្នែកមួយ នៃរាជធានីអាណាចក្រខ្មែរនាសម័យបុរាណ និងរាប់បញ្ចូលទាំងតំបន់រុំាសា ត្រូវបានគេស្គាល់ថាតំបន់អភិរក្សលិចទឹក ដែលមានសត្វផ្សោតជាច្រើនរស់នៅតាមបណ្តោយទន្លេមេគង្គ រួមទាំងមានសត្វបក្សាបក្សី និងសត្វព្រៃជាច្រើនរស់នៅតំបន់ព្រៃឈើអភិរក្សនោះ។
លើសពីនេះកន្លែងនេះក៏មានហេដ្ឋារចនាសម្ពន្ធផ្លូវថ្នល់ ស្ពានយោល វត្តអារាម ដោយរាប់បញ្ចូលទាំងផ្ទះសំណាក់សាធារណៈ មជ្ឈមណ្ឌលព័ត៌មាន និងកំពង់ផែទូកសម្រាប់ភ្ញៀវទេសចរផងដែរ។ រមណីដ្ឋានបូរីអូរស្វាយ ប្រៀបបាននឹងត្បូងពេជ្រដ៏មានតម្លៃដែលបានផុសឡើងនៅក្នុងទ្រូងព្រៃ ត្រូពិចពណ៌បៃតង ដែលលាតសន្ធឹងតាមបណ្តោយទន្លេមេគង្គ។ វាបានផ្តល់នូវសម្បត្តិព្រៃឈើដ៏ប្រសើរ ដែលជាជម្រកដ៏ប្រសើរសម្រាប់សត្វព្រៃ ជាពិសេស ហ្វូងបក្សាបក្សី និងជាជម្រកត្រីដ៏ប្រសើរ ក្នុងរដូវវស្សា ហើយមានត្រីផ្សោតដ៏ច្រើនទៀតផង។ នៅរដូវប្រាំងពេលទឹកស្រក ទីនេះក៏បានរំលេចឱ្យឃើញនូវឆ្នេខ្សាច់ពណ៌សដ៏ស្រស់ស្អាត ដែលលាតសន្ធឹងតាមបណ្តោយដងទន្លេ គួរឱ្យចង់ដើរលេងកំសាន្ត។
២.រមណីដ្ឋានអូរឬស្សីកណ្តាល៖ រមណីយដ្ឋានសហគមន៍អេកូទេសចរណ៍អូរឫស្សីកណ្តាល ដែលស្ថិតនៅក្នុងភូមិអូរឫស្សីកណ្តាល ឃុំអូរឫស្សីកណ្តាល ស្រុកសៀមបូក ខេត្តស្ទឹងត្រែង ចម្ងាយប្រហែលជិត ៣០ គីឡូម៉ែត្រ ភាគខាងត្បូង ពីទីរួមខេត្តស្ទឹងត្រែង។ នៅពេលទៅដល់ភ្ញៀវទេសចរអាចធ្វើដំណើរទៅកម្សាន្តរមណីយដ្ឋានកណ្តាលព្រៃធម្មជាតិ ដ៏ស្រស់ស្អាត អាចងូតទឹកត្រជាក់ និងស្តាប់សំឡេងសត្វយំ មានអារម្មណ៍ស្រស់ស្រាយបាត់ទុក្ខកង្វល់ក្នុងចិត្តទាំងអស់។
៣.កោះខ្សាច់សេកុង៖ រមណីយដ្ឋានកោះខ្សាច់សេកុង ដែលផុសនៅកណ្ដាលទន្លេសេកុងមានសភាពដូចរមណីយដ្ឋានឆ្នេរខ្សាច់កោះប៉ែននៅខេត្តកំពង់ចាមដែរ។ រមណីយដ្ឋាននេះ មានទីតាំងស្ថិតនៅភូមិស្រែពោធិ៍ សង្កាត់ស្រះឫស្សី ក្រុងស្ទឹងត្រែង ខេត្តស្ទឹងត្រែង និងមានចម្ងាយប្រហែល ៤ គីឡូម៉ែត្រពីរង្វង់មូលថ្មី។ នៅទីនេះមានកោះ និងទេសចរណ៍ធម្មជាតិជាច្រើនរួមមាន៖ កន្លែងហែលទឹក ឬលេងទឹក, មានអាហារឆ្ងាញ់, អាចជិះទូកស្រូបយកខ្យល់អាកាស, ទស្សនាឆ្នេរខ្សាច់, គយគន់ថ្ងៃលិច, គយគន់ថ្ងៃរះ និងចំណុចសំខាន់ផ្សេងៗទៀត។ 
៤.ល្អាងភ្នំប្រាក់៖ ល្អាងភ្នំប្រាក់ ស្ថិតនៅភូមិវើនសៀន ប៉ែកខាងត្បូងក្នុងដែលដីរដ្ឋបាលឃុំអូរស្វាយ ស្រុកបូរីអូរស្វាយសែនជ័យ ខេត្តស្ទឹងត្រែង។ នៅទីនោះគឺជាតំបន់អេកូទេសចរណ៍ដ៏គួរឱ្យទាក់ទាញ ហើយបច្ចុប្បន្នគឺមានភ្ញៀវទេសចរណ៍ជាច្រើនមកទស្សនាឥតឈប់ឈរ។ ដើម្បីទៅដល់ល្អាងភ្នំមួយនេះ ភ្ញៀវទេសចរត្រូវធ្វើដំណើរដោយជិះទូកតាមដៃទន្លេមេគង្គ រយៈពេលប្រហែល ១ ម៉ោង ទើបដល់ភូមិវឿនសៀន រួចបន្តធ្វើដំណើរដោយថ្មើរជើង ឬជិះគោយន្តចូលទៅព្រៃ ៣ គីឡូម៉ែត្រទៀត។ វាស្ថិតនៅតំបន់ភ្នំដែលមានទាំងរូងថ្ម និងព្រៃឈើរាប់សិបហិចតាដែលអាចក្លាយជាកន្លែងបោះជំរំដ៏អស្ចារ្យបំផុតសម្រាប់អ្នកចូលចិត្តផ្សងព្រេង៕
