ប្រទេសចិន ៖ «តើចង់គេចទៅដើរលេងមែន លោកយាយ?» នេះជាសំណួរដែលអ្នកប្រើប្រាស់បណ្តាញសង្គមសួរបែបលេងសើច ក្រោយមានការបង្ហោះវីដេអូពីលោកយាយម្នាក់ អាយុរហូតដល់៩២ឆ្នាំ ប៉ុន្តែនៅតែមានសុខភាពរឹងមាំ ។ ក្នុងវីដេអូ គេបានឃើញយាយផ្លោះរបងមណ្ឌលថែទាំមនុស្សចាស់ ដែលមានកម្ពស់ជាង២ម៉ែត្រ ដោយចំណាយពេលត្រឹមតែ២៤វិនាទីប៉ុណ្ណោះ ។

ហេតុការណ៍នេះបានកើតឡើងកាលពីថ្ងៃទី៤ ខែកក្កដា ឆ្នាំ២០២៤ នៅមណ្ឌលថែទាំមនុស្សចាស់មួយកន្លែងនៅទីក្រុងយៀនតៃ ខេត្តសានដុង ប្រទេសចិន ។ សន្តិសុខមើលការខុសត្រូវមណ្ឌលថែទាំមនុស្សចាស់ និយាយថា បានពិនិត្យមើលក្នុងកាមេរ៉ាសុវត្ថិភាព ហើយក៏ឃើញយាយដើរទៅក្បែររបង ។ បន្ទាប់មក យាយក៏ប្រញាប់ផ្លោះរបងចេញទៅបរិវេណខាងក្រៅយ៉ាងឆាប់រហ័ស ។

ក្រោយមក នាយកមណ្ឌលថែទាំមនុស្សចាស់ ក៏ប្រញាប់បញ្ជូនបុគ្គលិកតាមស្វែងរកយាយត្រឡប់មកវិញ ពីព្រោះគិតថា យាយរត់ពុំបានឆ្ងាយទេ ។ ២៥នាទីក្រោយមក ពួកគេក៏តាមរកយាយឃើញ និងនាំត្រឡប់មកមណ្ឌលវិញ ហើយយាយនឿយហត់តិចតួចប៉ុណ្ណោះ ។

នាយកមណ្ឌលថែទាំមនុស្សចាស់ និយាយថា យាយមានជំងឺ Alzheimer ដែលបណ្តាលឱ្យការគិតចុះខ្សោយ និងភ្លេចរឿងរ៉ាវផ្សេងៗ ហើយយាយចូលចិត្តឡើងលើទ្វារ-បង្អួចជាប្រចាំ ។ មណ្ឌលសន្យាថា នឹងមើលថែទាំយាយជរារូបនេះឱ្យកាន់តែដិតដល់ ដោយការបង្កើនចំនួនបុគ្គលិកបន្ថែម ដើម្បីកុំឱ្យកើតហេតុការណ៍បែបនេះទៀត ។

ក្រោយពីវីដេអូនេះបានចែកចាយក្នុងបណ្តាញសង្គម វាធ្វើឱ្យមហាជនភ្ញាក់ផ្អើលយ៉ាងខ្លាំង និងសរសើរពីសុខភាពរឹងមាំរបស់យាយ ។ អ្នកប្រើប្រាស់បណ្តាញសង្គមម្នាក់និយាយថា ៖ «ពិតជាពូកែណាស់! ពួកយុវជនធ្វើមិនបានដូចយាយទេ» ។

ចំណែកមនុស្សខ្លះទៀតនិយាយថា ៖ «កាលពីក្មេងៗ បែបធ្លាប់គេចរៀនហើយ ទើបពេលចាស់ទៅ គេចពីមណ្ឌលថែទាំមនុស្សចាស់» ។ រីឯមនុស្សខ្លះទៀតថា ៖ «ទោះជារយៈពេល២នាទី ក៏ខ្ញុំផ្លោះរបងពុំរួចដែរ» ៕

ប្រទេសចិន ៖ កាលពីខែមិថុនា ឆ្នាំ២០២៤ ប្រព័ន្ធផ្សព្វផ្សាយបរទេសបានចុះផ្សាយពីការរកឃើញផ្នូរអធិរាជចិនកាលពី៥០ឆ្នាំមុន និងចាត់ទុកថា គឺជាការរកឃើញដ៏អស្ចារ្យបំផុតមួយលើពិភពលោក និងជាការរកឃើញដោយចៃដន្យ ។ នៅទីនេះ មានទាហាន និងស្រីស្នំធ្វើពីដីឥដ្ឋនៅហែរហម ព្រមទាំងមានទ្រព្យសម្បត្តិយ៉ាងច្រើនធ្វើពីមាសពណ៌លឿង ។

កាលពីឆ្នាំ១៩៧៤ មានក្រុមកសិកររស់នៅជើងភ្នំលីសាន ស្ថិតក្នុងភូមិស៊ីយ៉ាង ស្រុកលីនតុង ខេត្តសានស៊ី បានជីកអណ្តូងទឹកដើម្បីយកទឹកមកស្រោចដំណាំ ។ ប៉ុន្តែពេលពួកគេជីកដីបានជម្រៅប្រមាណ៤ម៉ែត្រ ស្រាប់តែប្រទះឃើញកំទេចកំទីរបស់ទាហានដីឥដ្ឋ ព្រមទាំងដងធ្នូ និងព្រួញធ្នូ ធ្វើមកពីមាសពណ៌លឿង ។ បន្ទាប់មក រដ្ឋាភិបាលចិនបានមកត្រួតពិនិត្យបរិវេណនេះ រួចហើយក៏ចាប់ផ្តើមជីកដីជាទ្រង់ទ្រាយធំ ចាប់ពីឆ្នាំ១៩៧៦ រហូតមក ។

អ្នកបុរាណវិទ្យាសន្និដ្ឋានថា នេះជាផ្នូររបស់អធិរាជចិន ព្រះនាម ជីនស៊ី (Emperor Qin Shi Huang – First Emperor of China) ក្នុងសម័យរាជវង្សឈីន ដែលមានអាយុកាលជាង២.២០០ឆ្នាំ ។ ផ្នូររបស់អធិរាជចិន ត្រូវបានកសាងឡើងក្នុងអំឡុងឆ្នាំ២៤៦ ដល់ឆ្នាំ២០៨ មុនគ្រឹស្តសករាជ ហើយផ្នូរនេះលាតសន្ធឹងនៅក្រោមដីយ៉ាងធំទូលាយ និងចំណាយពេលសាងសង់រហូតដល់៣៨ឆ្នាំ ។

ចំណែកផ្នែកខាងក្នុងផ្នូរ គឺជាកន្លែងបញ្ចុះសាកសពរបស់អធិរាជចិន, ព្រមទាំងមានទ្រព្យសម្បត្តិផ្សេងៗ, មានទាហាន, ស្រីស្នំ និងរទេះសេះយ៉ាងច្រើនធ្វើពីដីឥដ្ឋនៅហែរហមសាកសពស្តេច ដើម្បីតាមបម្រើស្តេចពេលសោយទីវង្គតទៅកាន់លោកខាងមុខ ។

អ្វីដែលធ្វើឱ្យមនុស្សទូទាំងពិភពលោក ភ្ញាក់ផ្អើលខ្លាំងបំផុតនោះ គឺពួកទាហានដីឥដ្ឋជាង១ម៉ឺននាក់នេះ មានទំហំធំៗប៉ុនមនុស្ស ហើយចំណុចពិសេសមួយទៀត គឺទាហាននីមួយៗមានរូបរាង និងមុខមាត់ខុសៗគ្នាទាំងអស់ ។ ក្រៅពីនេះ ក៏មានវត្ថុបុរាណ, អាវុធ, រទេះសេះ និងសេះចម្បាំង រហូតដល់ជាង៧.៤០០គ្រឿង និងមានអាវុធធ្វើពីមាសពណ៌លឿងពាសពេញ ។

គួរបញ្ជាក់ថា អធិរាជចិន ព្រះនាម ជីនស៊ី បានបញ្ជាឱ្យអ្នកក្រោមបង្គាប់កសាងផ្នូរនៅក្រោមដីនេះ កាលពីព្រះអង្គឡើងគ្រងរាជ ពេលមានព្រះជន្មត្រឹមតែ១៣វស្សា ។ ប៉ុន្តែពេលព្រះអង្គសោយទីវង្គត ការសាងសង់ផ្នូរនេះពុំទាន់រួចរាល់ទេ ហើយផ្នូរនេះបានសាងសង់រួចរាល់នៅសម័យបុត្រាព្រះអង្គឡើងគ្រងរាជ ។ រីឯពួកទាហានដីឥដ្ឋជាច្រើន រួមទាំងរទេះសេះ និងសេះចម្បាំង គឺដើម្បីទៅតាមបម្រើព្រះអង្គនៅលោកខាងមុខ ។

នេះអាចនិយាយបានថា វាពិតជាផ្នូរអធិរាជចិនយ៉ាងធំមហាសាល ដែលមានក្រុមទាហានដីឥដ្ឋតាមហែរហមបម្រើព្រះអង្គ និងសាកសមជាផ្នូររបស់អធិរាជចិនមានអំណាច ។ ម្យ៉ាងទៀត ការរកឃើញផ្នូរអធិរាជចិន គឺដូចជាការប្រកាសឱ្យពិភពលោក ដឹងថា អរិយធម៌ជនជាតិចិនពិតជាធំធេង និងអស្ចារ្យខ្លាំងប៉ុនណា ។

អង្គការយូណេស្កូបានចុះបញ្ជីផ្នូរអធិរាជចិន ជាសម្បត្តិបេតិកភណ្ឌពិភពលោក កាលពីឆ្នាំ១៩៨៧ និងជាតំបន់ទេសចរណ៍លំដាប់ទី១ របស់ទីក្រុងស៊ីអាន ផងដែរ ។ ក្រៅពីនេះ គេចាត់ទុកថា ជាកន្លែងអច្ឆរិយៈលំដាប់ទី៨ របស់ពិភពលោក ៕

បរទេស៖ Galaxy Ring របស់ Samsung ត្រូវបានគេចាត់ទុកថាមានផ្នែករឹងដ៏ល្អឥតខ្ចោះ និងមានលក្ខណៈពិសេសជាងឧបករណ៍ Smart Ring ផ្សេងទៀត ដែលនេះគឺផលិតផលដំបូងបង្អស់របស់ក្រុមហ៊ុនទូរស័ព្ទ ដែលបានចូលក្នុងទីផ្សារ Smart Ring ពិភពលោក។
កាលពីថ្ងៃទី ១០ ខែកក្កដាកន្លងទៅ ក្រុមហ៊ុន Samsung បានប្រកាសទូរស័ព្ទជំនាន់ថ្មីរបស់ខ្លួនគឺ Galaxy Z Fold6, Z Flip6 និងឧបករណ៍ពាក់ស៊េរីមួយចំនួនទៀត។ ជាពិសេស Galaxy Ring គឺបានក្លាយជាចំណុចដ៏គួរឱ្យចាប់អារម្មណ៍បំផុត នៅក្នុងព្រឹត្តិការណ៍ Galaxy Unpacked 2024។

Galaxy Ring គឺជាចិញ្ចៀនឆ្លាតវៃដែលវាពិតជាស្រស់ស្អាតណាស់ បើទោះជាវាមិនខុសពីចិញ្ចៀនឆ្លាតវៃផ្សេងទៀតនៅលើទីផ្សារនាពេលបច្ចុប្បន្នក៏ដោយ។ ក៏ផលិតផលនេះមានស៊ុមទីតានីញ៉ូម ស្តើង និងស្រាល ហើយមានអារម្មណ៍ល្អនៅពេលពាក់វា ជាជាង ចិញ្ចៀន Oura។ សម្ភារៈទីតានីញ៉ូមធន់នឹងការកោសកម្រិត ៥ អាចទប់ទល់នឹងផលប៉ះពាល់កំឡុងពេលធ្វើលំហាត់ប្រាណដូចជាការលើកទម្ងន់ និងការកាន់រ៉ាកែត ក៏ដូចជាការការពារទឹក IP68 ផងដែរ។

លើសពីនេះ Samsung ក៏បានយកចិត្តទុកដាក់លើព័ត៌មានលម្អិតតូចៗនៅលើ Galaxy Ring ផងដែរ ដោយក្រុមហ៊ុនបានណែនាំឱ្យពាក់ម្រាមដៃចង្អុលសម្រាប់ការគ្រប់គ្រងកាយវិការកាន់តែច្បាស់លាស់។ មុនពេលទិញ អ្នកប្រើប្រាស់ត្រូវបានផ្តល់ឱ្យនូវឧបករណ៍សម្រាប់វាស់ទំហំចិញ្ចៀនដោយមិនគិតថ្លៃ ហើយត្រូវបានអនុញ្ញាតឱ្យត្រឡប់មកវិញក្នុងរយៈពេល ៣០ ថ្ងៃ ប្រសិនបើពួកគេទិញទំហំខុស។

ទោះជាយ៉ាងណា Galaxy Ring គឺមានភាពស្រដៀងគ្នាទៅនឹងផលិតផលផ្សេងទៀតនៅលើទីផ្សារដែរ ដោយសារវាត្រូវបានបំពាក់ដោយឧបករណ៍ចាប់សញ្ញាតាមដានសុខភាពដូចជា វាស់ចង្វាក់បេះដូង ការគេង កម្រិតអុកស៊ីសែនក្នុងឈាម (SpO2) និងសកម្មភាពរាងកាយមួយចំនួន។ សកម្មភាពទាំងអស់ត្រូវបានគ្រប់គ្រងតាមរយៈ Galaxy AI ហើយបង្ហាញនៅលើកម្មវិធី Galaxy Health ។ ដូច្នេះលក្ខណៈពិសេសរបស់ Galaxy Ring គឺមាន Galaxy AI ដែលចិញ្ចៀនឆ្លាតវៃផ្សេងទៀតមិនមាន។

Galaxy AI គឺមានតួនាទីជួយអ្នកប្រើប្រាស់យល់កាន់តែច្បាស់អំពីរបៀបដែលសុខភាពប៉ះពាល់ដល់ជីវិតប្រចាំថ្ងៃរបស់ពួកគេ ដោយផ្តល់នូវការណែនាំផ្ទាល់ខ្លួន ផ្អែកលើស្ថានភាពរាងកាយបច្ចុប្បន្ន ជួយឱ្យពួកគេធ្វើការសម្រេចចិត្តបានល្អប្រសើរជារៀងរាល់ថ្ងៃ។ បើយោងតាមក្រុមហ៊ុន Samsung បាននិយាយថា Galaxy Ring គឺអាចប្រើប្រាស់បានល្អបំផុតជាមួយទូរស័ព្ទរបស់ខ្លួនប៉ុណ្ណោះ។ ហេតុនេះសម្រាប់អ្នកប្រើ iPhone គឺមិនអាចប្រើវាបានទេ ខណៈដែលឧបករណ៍ Android របស់ម៉ាកយីហោផ្សេងទៀតត្រូវដំឡើងកម្មវិធី Samsung Health ហើយក៏មានមុខងារមានកម្រិតដែរ។ ដូច្នេះបច្ចុប្បន្នចិញ្ចៀនឆ្លាតវៃ Galaxy AI របស់ Samsung ត្រូវបានដាក់លក់ក្នុងតម្លៃ ៣៩៩ ដុល្លារអាមេរិក៕

ប្រទេសវៀតណាម ៖ វីដេអូមួយបានល្បីល្បាញក្នុងបណ្តាញសង្គមប្រទេសវៀតណាម និងមានអ្នកមើលរាប់ពាន់នាក់ នៅពេលភ្ញៀវទេសចរបរទេស១គ្រួសារ ត្រូវបានបុរសជាម្ចាស់ហាងកាហ្វេនៅទីក្រុងហាណូយបណ្តេញចេញពីហាង ក្រោយពេលដឹងថា ពួកគេជាជនជាតិជ្វីហ្វ ។ ម្ចាស់ហាងកាហ្វេនេះនិយាយថា ខ្លួនគាំទ្រពលរដ្ឋប៉ាឡេស្ទីន ហើយពុំទទួលស្វាគមន៍ភ្ញៀវជនជាតិជ្វីហ្វ ទេ ។

គ្រួសារជនជាតិជ្វីហ្វនេះរស់នៅប្រទេសអូស្ត្រាលី ដែលមានស្វាមីឈ្មោះ ដេនៀល ភរិយា និងកូនតូចម្នាក់ បានធ្វើដំណើរមកដើរលេងនៅបរិវេណផ្លូវរថភ្លើងដ៏ល្បីក្នុងទីក្រុងហាណូយ រួចហើយពួកគេក៏ចូលមកអង្គុយក្នុងហាងកាហ្វេនេះ ។ ប៉ុន្តែពួកគេក៏ស្រឡាំងកាំងយ៉ាងខ្លាំង នៅពេលបុរសជាម្ចាស់ហាងបណ្តេញពួកគេចេញពីហាងភ្លាមៗ ។

ក្នុងវីដេអូ គេឃើញបុរសជាម្ចាស់ហាងកាហ្វេវៀតណាមនិយាយថា ៖ «ចេញពីហាងរបស់ខ្ញុំទៅ! ចេញទៅ! កុំមកអង្គុយនៅត្រង់នេះ» ។ ភ្លាមនោះ លោក ដេនៀល ជាភ្ញៀវទេសចរសួរថា ៖ «ហេតុអ្វី?» ហើយម្ចាស់ហាងកាហ្វេឆ្លើយថា ៖ «ខ្ញុំពុំទទួលស្វាគមន៍អតិថិជនមកពីប្រទេសអ្នកទេ» ។ បន្ទាប់មក លោក ដេនៀល សួរទៀតថា ៖ «ពីព្រោះពួកយើងជាជនជាតិជ្វីហ្វ មែនទេ? អូហូ! តើអ្នកកំពុងតែបណ្តេញភរិយា និងកូនរបស់ខ្ញុំ មែនទេ?» ។

ក្រោយមក ភ្ញៀវទេសចរជនជាតិជ្វីហ្វ ក៏បានសរសេរក្នុងបណ្តាញសង្គមរបស់ខ្លួនឈ្មោះ @ThatJewishFamily ថា ៖ «ពេលនោះ ពួកយើងកំពុងតែរីករាយជាមួយការថតរូបនៅតាមផ្លូវរថភ្លើងដ៏ល្បីក្នុងទីក្រុងហាណូយ ស្រាប់តែ ម្ចាស់ហាងដែលគាំទ្រពួកប៉ាឡេស្ទីន ចាប់ផ្តើមគំរាមកូនប្រុសពួកយើង ពេលម្ចាស់ហាងឃើញកូនយើងពាក់មួក» ។

លោក ដេនៀល និយាយថា ពួកយើងស្រឡាញ់ប្រទេសវៀតណាម និងពលរដ្ឋវៀតណាមខ្លាំងណាស់ ហើយពួកយើងសង្ឃឹមថា ហេតុការណ៍នៅហាងកាហ្វេបែបនេះ នឹងកើតឡើងតែម្តងប៉ុណ្ណោះ ។

ក្រោយមក ក្រុមសារព័ត៌មាន BBC Thai បានទំនាក់ទំនងទៅកាន់ហាងកាហ្វេនៅស្ថានីយរថភ្លើង (Railway Tuan Café) ដើម្បីសាកសួរពីរឿងរ៉ាវនេះ ប៉ុន្តែគ្មានការឆ្លើយតប ។ បច្ចុប្បន្ន រថភ្លើងនឹងរត់លើផ្លូវដែកតាមផ្លូវតូចចង្អៀតនៅទីក្រុងហាណូយ ដែលផ្លូវដែកនេះស្ថិតនៅឆ្ងាយពីផ្ទះអ្នកស្រុកតែបន្តិចប៉ុណ្ណោះ ហើយភ្ញៀវទេសចរជាច្រើននាក់នាំគ្នាមកទីនេះ ដើម្បីថតរូប និងផឹកកាហ្វេក្នុងហាងសងខាងផ្លូវដែក ។

តាំងពីកើតសង្គ្រាមរវាងប្រទេសអ៊ីស្រាអែល និងតំបន់កាហ្សា នៅខែតុលា ឆ្នាំ២០២៣ មក នៅប្រទេសផ្សេងៗ ដូចជា ៖ អង់គ្លេស និងអាមេរិក ក៏មានការប្រឆាំងជាមួយជនជាតិជ្វីហ្វ និងមូស្លីម កាន់តែច្រើន ។ រីឯមួកតូចដែលលោក ដេនៀល និងកូនប្រុសពាក់ចូលក្នុងហាងកាហ្វេវៀតណាមនោះ ហៅថា ឃីបប៉ា ហើយមួកនេះពុំគ្របក្បាលទាំងមូលទេ គឺសម្រាប់ឱ្យបុរសជនជាតិជ្វីហ្វពាក់បង្ហាញពីអត្តសញ្ញាណជនជាតិជ្វីហ្វ ៕