សហរដ្ឋអាមេរិក ៖ កាលពីថ្ងៃទី២៤ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា ត្រីបាឡែនដ៏កា.ចសាហា.វ ១ក្បាល បានលោតទៅបុកទូករបស់អ្នកនេសាទ២នាក់ នៅកណ្តាលសមុទ្រក្នុងរដ្ឋ New Hampshire សហរដ្ឋអាមេរិក ។ ហេតុការណ៍នេះបណ្តាលឱ្យទូកនេសាទក្រឡាប់ ហើយអ្នកនេសាទទាំង២នាក់បានធ្លាក់ចូលក្នុងសមុទ្រភ្លាមៗ ។

យុវជន២នាក់ទៀតជាបងប្អូននឹងគ្នា ដែលបងមានអាយុ១៩ឆ្នាំ និងប្អូនអាយុ១៦ឆ្នាំ បានថតវីដេអូហេតុការណ៍ត្រីបាឡែនវាយប្រហារទូកនេសាទនេះ និងបង្ហោះក្នុងបណ្តាញសង្គម ក្នុងអំឡុងពេលពួកគេជិះទូក១គ្រឿងទៀតនៅក្បែរនោះ ។ យុវជន២នាក់បងប្អូនប្រាប់ថា ហេតុការណ៍នេះបានកើតឡើងកាលពីថ្ងៃទី២៣ ខែកក្កដា កន្លងមក ។

ក្រោយការបង្ហោះវីដេអូនេះក្នុងបណ្តាញសង្គមឃើញថា អ្នកប្រើប្រាស់បណ្តាញសង្គមយ៉ាងច្រើនចាប់អារម្មណ៍នឹងវីដេអូ ហើយពួកគេបានចែកចាយផងដែរ ។ អ្នកប្រើប្រាស់បណ្តាញសង្គមម្នាក់និយាយថា អាចបណ្តាលមកពីត្រីបាឡែនខឹង ទើបវាវាយប្រហារទូកនេសាទបែបនេះ ។

អ្នកនាំពាក្យឆ្មាំសមុទ្រអាមេរិកនិយាយថា ហេតុការណ៍នេះបានកើតឡើងនៅកណ្តាលសមុទ្រក្នុងទីក្រុង Rye រដ្ឋ New Hampshire ។ រីឯយុវជនទាំង២នាក់បងប្អូន មិនគ្រាន់តែបានថតវីដេអូហេតុការណ៍គួរឱ្យរន្ធត់នេះទេ ប៉ុន្តែពួកគេក៏បានជួយសង្គ្រោះជីវិតអ្នកនេសាទទាំង២នាក់ផងដែរ នាពេលបន្ទាប់ ។ សំណាងល្អ អ្នកនេសាទទាំង២រូបគ្មានរបួសស្នាមអ្វីទេ ប៉ុន្តែទូករបស់ពួកគេខូចខាត ។

យុវជនទាំង២នាក់បងប្អូននិយាយថា ពីដំបូង ពួកគេពុំបារម្ភពីការវាយប្រហាររបស់ត្រីបាឡែនទេ ពីព្រោះមានទូកនេសាទជាច្រើនគ្រឿងទៀតនៅក្បែរនោះ ។ ប៉ុន្តែទីនេះ ជាប្រភពចំណីរបស់ត្រីបាឡែន ហើយមានត្រីបាឡែន១ក្បាលបានលោតទៅបុកទូកនេសាទមួយទំហឹងបណ្តាលឱ្យទូកក្រឡាប់ភ្លាមៗ ខណៈអ្នកនេសាផ្សេងទៀតភ្ញាក់ផ្អើលយ៉ាងខ្លាំង ។

ចំណែកអ្នកប្រើប្រាស់បណ្តាញសង្គមនិយាយថា វាអាចជាហេតុការណ៍ចៃដន្យអាក្រក់របស់អ្នកនេសាទទាំង២រូប ពីព្រោះបើមើលក្នុងវីដេអូឃើញថា ត្រីបាឡែននេះចាប់អារម្មណ៍នឹងហ្វូងត្រីនៅក្បែរទូកនេសាទច្រើនជាង ។ ប៉ុន្តែពេលវាកំពុងតែព្យាយាមស៊ីចំណីនោះ ស្រាប់តែវាលោតទៅបុកទូកនេសាទដោយចៃដន្យ ទើបបណ្តាលឱ្យទូកក្រឡាប់បែបនេះ ។ ដូច្នេះ ត្រីបាឡែនពុំបានវាយប្រហារទូកនេសាទដោយផ្ទាល់ឡើយ ៕

ប្រទេសថៃ ៖ សារព័ត៌មានថៃរាយការណ៍ថា កាលពីថ្ងៃទី២៣ ខែកក្កដា ឆ្នាំ២០២៤ ពលរដ្ឋរស់នៅខេត្តបុរីរ៉ាំ ប្រទេសថៃ (Buriram មានព្រំប្រទល់ជាប់ជាមួយខេត្តឧត្តរមានជ័យ ប្រទេសកម្ពុជា) បានភ្ញាក់ផ្អើលម្តងទៀត ក្រោយពីភ្នាក់ងារឃ្លាំមើលគ្រោះរញ្ជួយដីប្រកាសថា មានគ្រោះធម្មជាតិរញ្ជួយដីកើតឡើងនៅឃុំខូកឡាម ស្រុកឡាំប្លាយម៉ាស ខេត្តបុរីរ៉ាំ ស្មើកម្រិត៣រិចទ័រ និងមានជម្រៅ១គីឡូម៉ែត្រ ។

វាជាគ្រោះធម្មជាតិរញ្ជួយដី លើកទី២ បន្ទាប់ពីនៅថ្ងៃទី២២ ខែកក្កដា កន្លងមក ខេត្តបុរីរ៉ាំ បានកើតរញ្ជួយដីម្តងហើយ ស្ថិតនៅឃុំហ៊ិនខូន ស្រុកឡាំប្លាយម៉ាស ស្មើកម្រិត២.៩រិចទ័រ និងមានជម្រៅ១គីឡូម៉ែត្រ ដូចគ្នា ។ គ្រោះធម្មជាតិរញ្ជួយដី លើកទី១ ពុំបានបង្កការខូចខាតអគារ ឬផ្ទះសម្បែងរបស់ពលរដ្ឋទេ ពីព្រោះស្ថិតនៅតំបន់វាលស្រែ ។

អាជ្ញាធរស្រុកឡាំប្លាយម៉ាស បានបញ្ជូនមន្ត្រីពាក់ព័ន្ធចុះទៅត្រួតពិនិត្យនៅតំបន់កើតហេតុឃើញថា គ្មានអ្វីខូចខាតទេ ប៉ុន្តែបានជំរុញឱ្យមេឃុំ និងមេភូមិ ជួយតាមដានស្ថានការណ៍នេះឱ្យបានដិតដល់ ដោយប្រកាសឱ្យពលរដ្ឋទាំងអស់ប្រុងប្រយ័ត្ន និងចៀសវាងកុំទៅក្បែរចំណុចរញ្ជួយដី ។

អ្នកស្រី វិល័យឡាក់ សេមរ៉ាំ សមាជិកក្រុមប្រឹក្សាខេត្តបុរីរ៉ាំ ប្រចាំស្រុកឡាំប្លាយម៉ាស និយាយថា បើតាមការរាយការណ៍ពីប្រធានសហគមន៍ ជំហានដំបូងឱ្យដឹងថា តំបន់មានគ្រោះរញ្ជួយដីលើកនេះ ស្ថិតនៅភូមិលុងមួង ឃុំខូកឡាម ស្រុកឡាំប្លាយម៉ាស ។ ប៉ុន្តែអ្នកស្រីពុំអាចកំណត់បានថា តើវាបណ្តាលឱ្យមានសំឡេងញ័រកម្រិតណាទេ ពីព្រោះអ្នកស្រីគ្រាន់តែសាកសួរតាមទូរស័ព្ទទៅកាន់ប្រធានសហគមន៍ប៉ុណ្ណោះ ។

រីឯសាស្ត្រាចារ្យម្នាក់បង្រៀននៅសាកលវិទ្យាល័យមួយក្នុងខេត្តនគររាជសីម៉ា និងមានផ្ទះនៅភូមិលុងមួង ឃុំខូកឡាម ស្រុកឡាំប្លាយម៉ាស និយាយថា ទោះជាវាគ្មានសំឡេងញ័រក្តី ប៉ុន្តែរញ្ជួយដីបានកើតឡើងរហូតដល់២លើក និងស្ថិតនៅក្បែរគ្នា គឺធ្វើឱ្យពលរដ្ឋខ្លាចថា រញ្ជួយដីនឹងកើតឡើងទៀត ។ កន្លងមក មានរញ្ជួយដីនៅស្រុកម៉េសាយ ខេត្តឈៀងរ៉ាយ ម្តងហើយ ប៉ុន្តែខេត្តបុរីរ៉ាំ ពុំធ្លាប់មានរញ្ជួយដីឡើយ ។ ដូច្នេះ សូមឱ្យអាជ្ញាធរចុះមកពិនិត្យមើលឱ្យច្បាស់លាស់ ដើម្បីឱ្យពលរដ្ឋសប្បាយចិត្ត និងមានសុវត្ថិភាព ។

ចំណែកពលរដ្ឋជាច្រើននាក់ទៀតនិយាយថា រញ្ជួយដីលើកនេះគ្មានសំឡេងញ័រ និងពុំប៉ះពាល់ផ្ទះសម្បែងរបស់ពលរដ្ឋ ឬសំណង់អ្វីឡើយ ។ ប៉ុន្តែមានតែនារីម្នាក់គត់បានបញ្ចេញមតិក្នុងបណ្តាញសង្គមថា មានសំឡេងញ័រក្នុងអំឡុងពេលនាងចូលបន្ទប់ទឹក ។

គួរបញ្ជាក់ថា គ្រោះធម្មជាតិរញ្ជួយដីលើកទី១ បានកើតឡើងនៅឃុំហ៊ិនខូន ស្រុកឡាំប្លាយម៉ាស ខេត្តបុរីរ៉ាំ ដែលបណ្តាលឱ្យពលរដ្ឋរស់នៅក្បែរតំបន់ភ្ញាក់ផ្អើលយ៉ាងខ្លាំង និងភ័យខ្លាច ពីព្រោះវាជាលើកដំបូងក្នុងប្រវត្តិសាស្ត្រ ដែលមានគ្រោះរញ្ជួយដីនៅខេត្តនេះ ។ រីឯរញ្ជួយដីលើកទី២ កើតឡើងនៅឃុំខូកឡាម ស្ថិតក្នុងស្រុកជាមួយគ្នា និងមានកម្រិតខ្លាំងជាងលើកទី១ ហើយតំបន់រញ្ជួយដីទាំងពីរស្ថិតនៅឆ្ងាយពីគ្នាប្រមាណ២គីឡូម៉ែត្រប៉ុណ្ណោះ ៕

វៀតណាម៖ ទុរេនមួយផ្លែដែលមានទំហំធំមហិមារកំពុងផ្ទុះការចាប់អារម្មណ៍យ៉ាងខ្លាំងពេញបណ្តាញសង្គមនៅក្នុងប្រទេសវៀតណាម ខណៈមានមនុស្សជាច្រើនចោតសួរថា “តើនេះជាទុរេនពូជអ្វី ហេតុអ្វីបានជាធំយ៉ាងនេះ”?
យោងតាមការបង្ហោះវីដេអូឃ្លីបផ្លែទុរេនយក្ស ដែលម្ចាស់គណនី @cuugia.review បង្ហោះលើបណ្ដាញសង្គម TikTok បានបង្កឱ្យអ្នកនិយមអ្នកលេងអ៊ីនធឺណិតវៀតណាមជាច្រើនមានការភ្ញាក់ផ្អើលយ៉ាងខ្លាំងចំពោះផ្លែទុរេនយក្សនេះ ដែលឃ្លីបទាំងនេះទទួលបានការចូលមើលរាប់លានដងឯណោះ។

នៅក្នុងឃ្លីបវីដេអូនោះបានបង្ហាញឱ្យឃើញថា បុរសដែលជាម្ចាស់គណនី @cuugia.review កំពុងរុញរទេះដឹកទុរេនយក្សដោយនិយាយថា៖ «អ្នកទិញទុរេនហូបត្រូវតែទិញទុរេនធំបែបនេះ»។ វីដេអូរយៈពេល ១១ វិនាទី ធ្វើឱ្យអ្នកទស្សនាសឹងមិនជឿផ្ទាល់នឹងភ្នែក ដោយឆ្ងល់ថា តើទុរេនយក្សបែបនេះពិតជាមានមែនឬ? នៅពេលឃ្លីបនេះមានអ្នកចូលមើលជាង ២០ លានដង ក៏មានអ្នកបញ្ចេញមតិជាង ២ ម៉ឺនដែលកំពុងជជែកវែកញែកយ៉ាងក្តៅកកុកពេញបណ្តាញសង្គម។

អ្នកនិយមលេងអ៊ីនធឺណិតជាច្រើនឆ្ងល់ថា ជាធម្មតាទុរេនធំបំផុតគឺមានទម្ងន់ត្រឹមតែ ២០ គីឡូក្រាមប៉ុណ្ណោះ ហេតុអ្វីបានជាទុរេនក្នុងឃ្លីបនេះធំខ្លាំងមិនគួរឱ្យជឿបែបនេះ? អ្នកខ្លះក៏និយាយថា តើនេះជាទុរេនពូជអ្វី? ហើយមកពីប្រទេសណា? តើទុរេននេះជ័រ ឬក៏ពិត? អ្នកខ្លះទៀតក៏ថា បើផ្លែទុរេនធំយ៉ាងនេះ តើដើមរបស់វាត្រូវធំប៉ុនណាទៅ? អ្នកខ្លះទៀតក៏ខំមិនថា បើមានផ្លែទុរេនធំដូចនេះ ត្រូវបន្តពូជឱ្យប្រជាពលរដ្ឋដាំដើម្បីអភិវឌ្ឍន៍សេដ្ឋកិច្ច ការដាំផ្លែទុរេនក្នុងមួយឆ្នាំក៏មិនសូវពិបាកដែរ។

ទោះជាយ៉ាងណាជុំវិញចម្ងល់ខាងលើ ម្ចាស់គណនី @cuugia.review ក៏បានបកស្រាយថា តាមពិតទៅទុរេនយក្សនេះគឺជាទុរេន AI ទេ។ ទោះបីជាត្រូវបាន “បោកប្រាស់” ដោយបច្ចេកវិទ្យាក៏ដោយ ក៏អ្នកនិយមលេងអ៊ីនធឺណិតភាគច្រើននៅតែសប្បាយចិត្ត ហើយចាត់ទុកថា វីដេអូឃ្លីបផ្លែទុរេនយក្សនេះគឺគួរឱ្យចាប់អារម្មណ៍បំផុត។ ខណៈដែលកាលពីពេលថ្មីៗនេះ វីដេអូឃ្លីបរបស់ផ្លែទុរេនដ៏ធំសម្បើមមួយប្រភេទនេះ នៅតែត្រូវបានផ្សព្វផ្សាយយ៉ាងទូលំទូលាយ ធ្វើឱ្យអ្នកទស្សនាជាច្រើនទទួលបានវីដេអូប្លែកៗជារៀងរាល់ថ្ងៃ៕

បរទេស៖ ព្យុះទីហ្វុង Gaemi បាននឹងកំពុងបង្កផលប៉ះពាល់យ៉ាងធ្ងន់ធ្ងរលើប្រទេសហ្វីលីពីន កាលពីថ្ងៃទី២៤ ខែកក្កដា ឆ្នាំ២០២៤ ថ្មីៗនេះ។
យោងតាម CNN ឥទ្ធិពលនៃព្យុះទីហ្វុងបណ្តាលឱ្យមានទឹកជំនន់នៅកន្លែងជាច្រើនក្នុងរដ្ឋធានីម៉ានីលរបស់ប្រទេសហ្វីលីពីន ហើយក៏បានសម្លា.ប់មនុស្សយ៉ាងហោចណាស់ ៤ នាក់ផងដែរ។ រដ្ឋធានីម៉ានីលលាតសន្ធឹងលើទីក្រុងចំនួន ១៦ និងមានប្រជាជនប្រមាណ ១៣ លាននាក់។

បើយោងទៅតាមវីដេអូគេបានឃើញថា នៅតាមដងផ្លូវ ផ្ទះ សាលារៀន និងមន្ទីរពេទ្យនៃរដ្ឋធានីនេះគឺមានការលិចទឹកយ៉ាងខ្លាំង ដោយបង្ខំឱ្យមនុស្សរាប់ម៉ឺននាក់ត្រូវជម្លៀសទៅកាន់ទីសុវត្ថិភាពជាបណ្តោះអាសន្ន។ រូបភាពដែលបានបង្ហោះនៅលើបណ្តាញសង្គម និងប្រព័ន្ធផ្សព្វផ្សាយក្នុងស្រុកក៏បានបង្ហាញពីទឹកជំនន់គ្របដណ្តប់លើផ្លូវសំខាន់ៗ និងផ្លូវតូចៗនៅទូទាំងរដ្ឋធានីម៉ានីលតែម្តង។ ខណៈមនុស្សជាច្រើនបានកាន់ឆ័ត្រ ដើរកាត់ផ្លូវលិចទឹក ព្រោះមិនអាចធ្វើដំណើរដោយរថយន្តបានឡើយ។

នេះបើតាមរបាយការណ៍ក៏បានឱ្យដឹងដែរថា ទន្លេ និងព្រែកជាច្រើនត្រូវបានបាក់ ដោយបង្ខំឱ្យអ្នករស់នៅជុំវិញនោះឡើងទៅលើជាន់ទីពីរ ឬឡើងលើដំបូលផ្ទះរបស់ពួកគេ។ អ្នកស្រី Jeanie Sandoval អភិបាលក្រុង Malabon ក្នុងទីក្រុង Metro Manila បាននិយាយថា ទឹកជំនន់បានលិចចូលទីក្រុងជាច្រើនក្នុងរដ្ឋធានីម៉ានីល។ អ្នកស្រីបានបន្តទៀតថា យ៉ាងហោចណាស់មនុស្ស ៤ នាក់បានបាត់បង់ជីវិតក្នុងនោះស្ត្រីមានផ្ទៃពោះ ១ នាក់ និងកុមារ ៣ នាក់ ដែលនាំឱ្យចំនួនអ្នកស្លាប់ដោយសារភ្លៀងធ្លាក់ខ្លាំងក្នុងរយៈពេល ២ សប្តាហ៍ចុងក្រោយនេះនៅក្នុងប្រទេសហ្វីលីពីនកើនឡើងដល់ ១២ ករណី។

ស្ថិតក្នុងស្ថានភាពធ្ងន់ធ្ងរបែបនេះ ប្រធានាធិបតីហ្វីលីពីន Ferdinand Marcos Jr ក៏បានបញ្ជាឱ្យភ្នាក់ងារពាក់ព័ន្ធទាំងអស់ ផ្តល់ជំនួយភ្លាមៗ ដល់អ្នកដែលរងផលប៉ះពាល់ទាំងអស់។ រដ្ឋាភិបាលហ្វីលីពីនក៏បានប្រកាសដាក់ប្រទេសក្នុងភាពអាសន្នសម្រាប់តំបន់ទីប្រជុំជនដ៏ធំនៃរដ្ឋធានីម៉ានីលផងដែរ។ ការលិចលង់យ៉ាងទូលំទូលាយនៅក្នុងតំបន់ទីប្រជុំជនទីក្រុងម៉ានីលនេះ គឺជាការរំឮកដល់គ្រោះមហន្តរាយដ៏ធំមួយដែលបានកើតឡើងបន្ទាប់ពីព្យុះទីហ្វុង Ketsana ក្នុងខែកញ្ញា ឆ្នាំ ២០០៩ ដែលបានសម្លាប់មនុស្សចំនួន ៤៦៤ នាក់៕