ប្រទេសចិន ៖ កាលពីថ្ងៃទី២៤ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា មានវីដេអូមួយកំពុងល្បីល្បាញយ៉ាងខ្លាំងក្នុងបណ្តាញសង្គមប្រទេសចិន គឺមាននារីមគ្គុទ្ទេសក៍ទេសចរចិនម្នាក់ខឹងសម្បារខ្លាំងពេក ក៏ស្រែកជេ.រ ភ្ញៀវទេសចរចំនួន៥២នាក់នៅលើរថយន្ត ដោយសារភ្ញៀវទេសចរទាំងនេះចំណាយប្រាក់ទិញអីវ៉ាន់តិចពេក ។ បន្ទាប់មក នាងក៏បណ្តេញភ្ញៀវទេសចរឱ្យចុះទៅទិញអីវ៉ាន់បន្ថែមទៀត ។

ក្រោយពីវីដេអូនេះត្រូវបានគេចែកចាយ និងល្បីល្បាញពេញបណ្តាញសង្គម អាជ្ញាធរចិនក៏ប្រញាប់ស៊ើបអង្កេតនារីមគ្គុទ្ទេសក៍ទេសចររូបនេះ ដែលបានប្រើប្រាស់អាកប្បកិរិយាពុំសមរម្យយ៉ាងខ្លាំងដាក់ភ្ញៀវទេសចរ ។

សារព័ត៌មានបរទេសរាយការណ៍ថា ក្រុមហ៊ុនទេសចរណ៍មួយរបស់ចិនបានរៀបចំកម្មវិធីនាំភ្ញៀវទេសចរមកកម្សាន្តនៅទីក្រុងធានជីន ប៉ុន្តែនារីមគ្គុទ្ទេសក៍ទេសចរខាងលើបែរជាខឹងសម្បារយ៉ាងខ្លាំង ហើយស្រែកជេរភ្ញៀវទេសចរចំនួន៥២នាក់ដែលជិះក្នុងរថយន្ត ក្រោយពីនាងនាំភ្ញៀវទេសចរទាំងនេះចុះពីរថយន្តមកទិញអីវ៉ាន់ក្នុងទីក្រុងថៃយួន ប៉ុន្តែភ្ញៀវទេសចរទិញអីវ៉ាន់អស់ប្រាក់ត្រឹមតែ៩០០យាន់ប៉ុណ្ណោះ (ឬស្មើជាង១៥២ដុល្លារអាមេរិក) ។

ហេតុនេះ វាបានធ្វើឱ្យនារីមគ្គុទ្ទេសក៍ទេសចរខឹងយ៉ាងខ្លាំង គ្រប់គ្រងអារម្មណ៍លែងបាន ហើយក៏ស្រែកជេរភ្ញៀវទេសចរមួយចាស់ដៃ ។ នាងនិយាយថា ភ្ញៀវទេសចរនៅលើរថយន្តនេះមានរហូតដល់៥២នាក់ ប៉ុន្តែបែរជាចំណាយប្រាក់សរុបទិញអីវ៉ាន់ ត្រឹមតែជាង១៥២ដុល្លារអាមេរិកប៉ុណ្ណោះ ។

នាងបន្តថា ៖ «ពួកអ្នកសុទ្ធតែជាមនុស្សចាស់ៗ ខ្ញុំពុំដឹងថា ពួកអ្នកមានរឿងអ្វីកើតឡើងទេ ។ ប៉ុន្តែពួកអ្នកធ្វើបែបនេះចាត់ទុកថា ពុំបានផ្តល់កិត្តិយសដល់អ្នករស់នៅទីក្រុងថៃយួនឡើយ វាគួរឱ្យអាម៉ាស់មុខខ្លាំងណាស់» ។

បន្ទាប់មក នាងក៏ដេញឱ្យភ្ញៀវទេសចរដែលពុំទាន់បានទិញអីវ៉ាន់អ្វីសោះជាប់ខ្លួន ឱ្យចុះទៅទិញអីវ៉ាន់មិនក្រោមទឹកប្រាក់២.០០០យាន់ (ឬស្មើជាង២៧៧ដុល្លារអាមេរិក) ។ នាងប្រាប់ថា ពេលភ្ញៀវទេសចរទិញអីវ៉ាន់រួចហើយ ចាំឡើងជិះរថយន្តវិញ ។

ភ្ញៀវទេសចរម្នាក់ដែលជិះក្នុងរថយន្តនេះប្រាប់ថា ពេលជិះរថយន្តមកដល់តំបន់ទេសចរណ៍ រថយន្តក៏បានចតឱ្យភ្ញៀវទេសចរទិញអីវ៉ាន់ ប៉ុន្តែភ្ញៀវទេសចរទាំងអស់គ្រាន់តែដើរមើលអីវ៉ាន់ប៉ុណ្ណោះ ពីព្រោះគ្មានអ្វីចាប់អារម្មណ៍ចង់ទិញទេ ។ ហេតុនេះ ពួកយើងបានទិញអីវ៉ាន់ម្នាក់បន្តិចៗ ទើបធ្វើឱ្យមគ្គុទ្ទេសក៍ទេសចរខឹងខ្លាំង ហើយក៏ស្រែកជេរ ដូចមហាជនបានឃើញក្នុងវីដេអូ ។

ការិយាល័យវប្បធម៌ និងវប្បធម៌ប្រចាំតំបន់ ក៏បានចុះមកស៊ើបអង្កេតករណីនេះឃើញថា នារីមគ្គុទ្ទេសក៍ទេសចររូបនេះគ្មានលិខិតអនុញ្ញាតឱ្យធ្វើការងារផ្នែកទេសចរណ៍ទេ ។ ហេតុនេះ នាងនឹងត្រូវបង់ប្រាក់ពិន័យរហូតដល់៣ម៉ឺនយាន់ (ឬស្មើជាង៤ពាន់ដុល្លារអាមេរិក) ៕

ទីក្រុងឌូបៃ៖ ទោះបីជាមជ្ឈមណ្ឌលផ្សារទំនើប Dubai Mall បច្ចុប្បន្នមានទំហំបំផុតនៅលើពិភពលោកក៏ដោយ ក៏រដ្ឋាភិបាលគ្រោងចំណាយ ៦០០ លានដុល្លារអាមេរិកដើម្បីពង្រីកបន្ថែមទៀត នេះបើយោងតាមការចុះផ្សាយរបស់ CNN កាលពីថ្ងៃទី២៥ ខែកក្កដា ឆ្នាំ២០២៤។
ឌូបៃគឺជាទីក្រុងដែលមានហេដ្ឋារចនាសម្ព័ន្ធល្អបំផុតក្នុងលោក ដោយអាគារនីមួយរបស់ទីក្រុងនេះសុទ្ធតែជាអាគារលំដាប់ពិភពលោក ជាឧទាហរណ៍ដូចជា Burj Khalifa គឺជាអគារខ្ពស់ជាងគេបំផុតក្នុងលោក ហើយទីក្រុងដែលវែងជាងគេ សួនទឹកដ៏ធំបំផុត ក៏ដូចជាផ្សារទំនើបធំបំផុត និងផ្ទះដែលធំជាងគេបំផុតនៅលើពិភពលោក សុទ្ធតែស្ថិតក្នុងទីក្រុងឌូបៃទាំងអស់។

ទោះបីជាយ៉ាងនេះក្តី រដ្ឋាភិបាលរបស់ទីក្រុងឌូបៃនៅតែមានបំណងចង់ពង្រីកមជ្ឈមណ្ឌលផ្សារទំនើបរបស់ខ្លួនឱ្យកាន់តែធំជាងនេះ ដោយវិនិយោគិនបានចាក់បន្ថែម ៦០០ លានដុល្លារអាមេរិក ដើម្បីពង្រីកតំបន់ផ្សារទំនើបបន្ថែមទៀត។ កាលពីឆ្នាំ២០២៣ Dubai Mall បានស្វាគមន៍ភ្ញៀវទេសចររហូតដល់ ១០៥ លាននាក់កើនឡើង ១៩% បើធៀបនឹងឆ្នាំ ២០២២ ក្លាយជា “កន្លែងដែលមានអ្នកទស្សនាច្រើនបំផុតនៅលើផែនដី”។ មជ្ឈមណ្ឌលផ្សារទំនើប Dubai Mall បានបើកដំណើរការដំបូងក្នុងខែវិច្ឆិកា ឆ្នាំ ២០០៨ មានផ្ទៃដី ១,២ លានម៉ែត្រការ៉េ ដែលមានហាងលក់រាយជាង ១២០០ និងភោជនីយដ្ឋានជាង ២០០។ ដូច្នេះគម្រោងពង្រីកនឹងបន្ថែមជម្រើសការលក់រាយ និងអាហារប្រណីតថ្មីចំនួន ២៤០ ផ្សេងទៀតទៅក្នុងអគារនេះ។

ក្រៅពីតំបន់ និងភាពអស្ចារ្យនៃការវិនិយោគ ផ្សារទំនើបឌូបៃ ក៏មានភាពល្បីល្បាញសម្រាប់សេវាកម្មដែលអតិថិជនស្ទើរតែរកមិនឃើញនៅក្នុងមជ្ឈមណ្ឌលផ្សារទំនើបផ្សេងទៀត។ មួយក្នុងចំនោមពួកគេគឺជាអាងចិញ្ចឹមត្រីដ៏ធំដែលមានទឹក ១០ លានលីត្រ ខណៈអ្នកទស្សនាអាចដើរក្នុងផ្លូវរូងក្រោមដីតាមរយៈធុងធំ។ អ្នកទស្សនាក៏អាចរីករាយនៅទីលានទឹកកកនៅក្នុងអគារផងដែរ។ លើសពីនេះមជ្ឈមណ្ឌលលក់ទំនិញក៏មានសួនកម្សាន្តនិម្មិត គ្រោងឆ្អឹងដាយណូស័រអាយុ ១៥៥ លានឆ្នាំ និងរោងកុន ២៦ អេក្រង់ទៀតផង។

លោក Mohamed Alabbar ស្ថាបនិកក្រុមហ៊ុន Emaar Properties ដែលជាអ្នកអភិវឌ្ឍន៍អចលនទ្រព្យ UAE ដ៏លេចធ្លោមួយរូបបាននិយាយថា ការពង្រីកទីតាំងរបស់មជ្ឈមណ្ឌលនេះគឺជា “ការបន្ថែមដ៏អស្ចារ្យ” ទៅកាន់ទីតាំងមួយក្នុងចំណោមទីតាំងដែលបានទស្សនាច្រើនបំផុតរបស់ពិភពលោក។ ផែនការពង្រីកបានឆ្លុះបញ្ចាំងពីចក្ខុវិស័យដ៏មហិច្ឆតារបស់ទីក្រុងឌូបៃ ដើម្បីដឹកនាំការច្នៃប្រឌិតជាសកល ដោយពង្រឹងទីតាំងរបស់ទីក្រុងជាគោលដៅឈានមុខគេរបស់ពិភពលោក។ ទោះយ៉ាងណាភាគីគ្រប់គ្រងមិនបានប្រកាសជាផ្លូវការអំពីកាលបរិច្ឆេទចាប់ផ្តើម និងបញ្ចប់គម្រោងនេះទេ៕

វៀតណាម៖ អត្តពលិកវៀតណាមដែលឈ្នះមេដាយមាសនៅក្នុងព្រឹត្តិការណ៍អូឡាំពិកទីក្រុងប៉ារីស នឹងទទួលបានប្រាក់រង្វាន់រហូតដល់ ១ លានដុល្លារអាមេរិក ពីមូលនិធិយុទ្ធសាស្ត្រកីឡាអន្តរជាតិ (ISF) រួមទាំងប្រាក់រង្វាន់ជាច្រើនផ្សេងទៀតពីរដ្ឋាភិបាល នេះបើយោងតាមការចុះផ្សាយរបស់ Vnexpress កាលពីថ្ងៃទី២៥ ខែកក្កដា ឆ្នាំ២០២៤។

ដូច្នេះសម្រាប់អត្តពលិកវៀតណាមដែលឈ្នះមេដាយមាសអូឡាំពិក នឹងត្រូវបានផ្តល់ប្រាក់រង្វាន់ចំនួន ១ លានដុល្លារអាមេរិក ហើយម្ចាស់មេដាយប្រាក់ និងសំរឹទ្ធក៏នឹងទទួលបាន ៥០ ម៉ឺនដុល្លារ និង ២០ ម៉ឺនដុល្លាររៀងគ្នាផងដែរ។ លើសពីនេះរដ្ឋាភិបាលវៀតណាមក៏បានប្រកាសថា អត្តពលិករបស់ខ្លួនដែលឈ្នះមេដាយមាសអូឡាំពិកក៏នឹងទទួលបាន ១៣,៨០០ ដុល្លារបន្ថែមទៀត ខណៈមេដាយប្រាក់នឹងទទួលបាន ៨,៧០០ ដុល្លារ ក៏ដូចជាមេដាយសំរឹទ្ធទទួលបាន ៥,៥០០ ដុល្លារអាមេរិក។

ហេតុនេះរដ្ឋាភិបាលវៀតណាម និងមូលនិធិយុទ្ធសាស្ត្រកីឡាអន្តរជាតិ (ISF) បានសន្យាថានឹងផ្តល់ប្រាក់រង្វាន់នេះជូនដល់អត្តពលិកខ្លួន ប្រសិនបើពួកគេឈ្នះមេដាយមាស ប្រាក់ និងសំរិទ្ធនៅក្នុងព្រឹត្តិការណ៍អូឡាំពិកទីក្រុងប៉ារីសពិតមែន។ ហើយក្រុមហ៊ុនមួយផ្សេងទៀតក៏បានសន្យាថានឹងផ្តល់រង្វាន់ទូរទស្សន៍ដល់អត្តពលិកដែលឈ្នះមេដាយទាំងបីនេះផងដែរ។ ទោះជាយ៉ាងណាក៏ដោយ ឱកាសសម្រាប់អត្តពលិកវៀតណាមដណ្តើមបានមេដាយក្នុងព្រឹត្តិការណ៍អូឡាំពិកនេះគឺមានភាគរយតិចតួចណាស់។

ក្នុងព្រឹត្តិការណ៍កីឡាអូឡាំពិកទីក្រុងតូក្យូឆ្នាំកាលពីឆ្នាំ ២០២០ អត្តពលិកវៀតណាមមិនមាននរណាម្នាក់ឈ្នះមេដាយបានមួយឡើយ។ ប្រសិនបើឆ្នាំនេះ មានអ្នកឈ្នះមេដាយអត្តពលិកនឹងមានឱកាសទទួលបានរង្វាន់រួមបញ្ចូលគ្នាយ៉ាងច្រើន ដែលជួយឱ្យអត្តពលិកអាចផ្លាស់ប្តូរជីវិតរបស់ពួកគេ។ គួរបញ្ជាក់ដែរថា ព្រឹត្តិការណ៍អូឡាំពិកទីក្រុងប៉ារីសឆ្នាំ ២០២៤ នឹងប្រព្រឹត្តទៅចាប់ពីថ្ងៃទី ២៦ ខែកក្កដានេះតទៅរហូតដល់ថ្ងៃទី១១ ខែសីហា៕

ប្រទេសដាណឺម៉ាក ៖ អ្នកជំនាញបានរកឃើញវិធីផលិតស្រាបៀ.រ គ្មានជាតិស្រវឹង ប៉ុន្តែមានក្លិន និងរសជាតិដូចស្រាបៀ.រ ពិតប្រាកដ ។ យើងឃើញថា ស្រាបៀ.រ ទទួលបានការពេញនិយមនៅទូទាំងពិភពលោក ប៉ុន្តែមានមនុស្សជាច្រើននាក់ពុំអាចលេបស្រាបៀ.រ ចូលមាត់អស់ ដោយសារឥទ្ធិពលជាតិអាល់កុលដែលបណ្តាលឱ្យបាត់បង់ស្មារតី និងបង្កបញ្ហាផ្សេងៗតាមក្រោយ ។ ប្រសិនបើពិភពលោកនេះ ផលិតស្រាបៀ.រ គ្មានជាតិស្រវឹង ប៉ុន្តែមានក្លិន និងរសជាតិដូចមុន តើល្អដែរឬទេ?

កាលពីឆ្នាំ២០២២ លោក Sotirios Campranis សាស្ត្រាចារ្យមកពីសាកលវិទ្យាល័យ Copenhagen ប្រទេសដាណឺម៉ាក បានកែប្រែហ្សែនរបស់ផ្សិតមួយប្រភេទឈ្មោះថា «Saccharomyces Cerevisiae» ដែលជួយផលិតម៉ូលេគុលនៅក្នុង Hops ។ Hops គឺជារុក្ខជាតិវល្លិមួយប្រភេទ ដែលគេនិយមយកមកហាលថ្ងៃសម្រាប់ធ្វើជាគ្រឿងផ្សំផលិតស្រាបៀរ ដើម្បីបង្កើតក្លិន និងរសជាតិល្វីងក្នុងស្រាបៀរ ។

ការផលិតស្រាបៀរគ្មានជាតិស្រវឹង មិនថាស្រាបៀរនេះគ្មានជាតិក្តៅ ឬមានអាល់កុលតិចតួចបំផុត ប៉ុន្តែអ្វីដែលបាត់បង់ទៅ គឺជាក្លិនក្រអូបតែមួយគត់របស់ Hops និងធ្វើឱ្យស្រាបៀរគ្មានអាល់កុល ។ ហេតុនេះ វាមានក្លិន និងរសជាតិខុសគ្នាពីស្រាបៀរទូទៅ ។

លោកសាស្ត្រាចារ្យ Sotirios និយាយថា ៖ «ពេលអ្នកយកជាតិអាល់កុលចេញពីស្រាបៀរ មានន័យថា ក្លិនក្រអូបចេញពី Hops ក៏បាត់បង់ដែរ ។ វិធីផ្សេងទៀត ដូចជា ការកាត់បន្ថយជាតិអាល់កុលឱ្យនៅបរិមាណតិចតួច ក៏ពុំអាចធ្វើឱ្យស្រាបៀរមានក្លិន និងរសជាតិដូចមុនទេ ដោយសារអាល់កុលចាំបាច់សម្រាប់ Hops ក្នុងការបញ្ជូនរសជាតិឱ្យស្រាបៀរ» ។

លោកបន្តថា ៖ «ក្រោយពីការស្រាវជ្រាវអស់រយៈពេលជាច្រើនឆ្នាំ យើងបានរកឃើញវិធីផលិតក្រុមម៉ូលេគុលទំហំតូច ហៅថា Monoterpenoid ដែលអាចបង្កើតរសជាតិរបស់ Hops ។ ការបន្ថែមម៉ូលេគុលតូចៗក្នុងស្រាបៀរបន្ទាប់ពីបញ្ចប់ដំណើរការផលិត នឹងធ្វើឱ្យរសជាតិរបស់ស្រាបៀរដែលបាត់បង់ទៅត្រឡប់មកវិញ ហើយគ្មានអ្នកណាអាចធ្វើបែបនេះបានពីមុនទេ ។ ដូច្នេះ វានឹងអាចផ្លាស់ប្តូរឱ្យស្រាបៀរគ្មានជាតិអាល់កុលទាំងស្រុង» ។

ចំណែកវិធីបង្កើតក្លិនក្រអូបរបស់ Hops ជាថ្មី ដោយប្រើប្រាស់ Monoterpenoid បានសាកល្បងអនុវត្តនៅរោងចក្រស្រាបៀរទូទាំងប្រទេសដាណឺម៉ាក ។ ពេលម៉ូលេគុលរបស់ Hops បានមកពីផ្សិត Saccharomyces Cerevisiae យើងនឹងប្រមូលផ្តុំវា រួចហើយដាក់ក្នុងស្រាបៀរ ដើម្បីឱ្យស្រាបៀរគ្មានអាល់កុលមានរសជាតិដូចគ្នាជាមួយស្រាបៀរដែលយើងធ្លាប់ផឹក ។ ដូច្នេះ ការរកឃើញវិធីផលិតស្រាបៀរគ្មានជាតិអាល់កុល អាចធ្វើឱ្យអ្នកមិនផឹកគ្រឿងស្រវឹងអាចមកអង្គុយរួមតុជាមួយអ្នកផឹកគ្រឿងស្រវឹងបាន ៕

ប្រទេសបារាំង ៖ កាលពីថ្ងៃទី២៥ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា ការប្រកួតកីឡាអូឡាំពិក ឆ្នាំ២០២៤ នៅប្រទេសបារាំង គ្មានការបំពាក់ម៉ាស៊ីនត្រជាក់ក្នុងរថយន្តក្រុងសម្រាប់ដឹកក្រុមកីឡាករ-កីឡាការិនីទេ ហើយធ្វើឱ្យក្រុមកីឡាករក្តៅស្អុះស្អាប់យ៉ាងខ្លាំង ។ លើសពីនេះ នៅពេលកីឡាករធ្វើដំណើរមកដល់បន្ទប់ស្នាក់នៅ ឃើញថា គ្មានម៉ាស៊ីនត្រជាក់ដូចគ្នា ។

អ្នកប្រើប្រាស់បណ្តាញសង្គមសួរថា តើការពុំបំពាក់ម៉ាស៊ីនត្រជាក់បែបនេះ គឺដើម្បីបង្ហាញពីការស្រឡាញ់បរិស្ថានពិភពលោក មែនទេ? ខណៈមនុស្សនៅលើពិភពលោក ចាប់អារម្មណ៍នឹងការប្រកួតកីឡាអូឡាំពិក លើកទី៣៣ ឆ្នាំ២០២៤ (Olympics Paris 2024) ដែលប្រព្រឹត្តទៅចាប់ពីថ្ងៃទី២៦ ខែកក្កដា រហូតដល់ថ្ងៃទី១១ ខែសីហា ឆ្នាំ២០២៤ នៅទីក្រុងប៉ារីស ប្រទេសបារាំង ។

ប្រទេសបារាំងបានផ្តោតសំខាន់ទៅលើការឡើងកំដៅផែនដី ហើយបានកំណត់គោលដៅបំភាយឧស្ម័នផ្ទះកញ្ចក់ក្នុងអំឡុងពេលប្រកួតកីឡាអូឡាំពិក ឆ្នាំ២០២៤ នៅទីក្រុងប៉ារីស ឱ្យមានបរិមាណតិចជាង៥០% បើធៀបនឹងការប្រកួតកីឡាអូឡាំពិក ឆ្នាំ២០១២ នៅទីក្រុងឡុងដ៍ ប្រទេសអង់គ្លេស ។ ហេតុនេះ បារាំងបានជួសជុលអគារដែលមានស្រាប់ ជំនួសការសាងសង់អគារថ្មី ដើម្បីកាត់បន្ថយបរិមាណកាបូនឌីអុកស៊ីតដែលកើតឡើងដោយសារបរិមាណស៊ីម៉ងត៍របស់ការសាងសង់អគារ ។

ក្រុមកីឡាករ-កីឡាការិនីមកពីបណ្តាប្រទេសនានាបានធ្វើដំណើរមកស្នាក់នៅក្នុងបន្ទប់កីឡាកររួចរាល់ហើយ ប៉ុន្តែបែរជាមានបញ្ហាកើតឡើង ដោយសារក្នុងបន្ទប់ស្នាក់នៅរបស់កីឡាករគ្មានម៉ាស៊ីនត្រជាក់ ។ កីឡាករភាគច្រើនបារម្ភថា អាកាសធាតុកាន់តែក្តៅខ្លាំងនៅទីក្រុងប៉ារីស នឹងធ្វើឱ្យពួកគេឈឺថ្កាត់មុនពេលប្រកួត ។

កីឡាការិនីជនជាតិថៃម្នាក់ផ្នែកវាយកូនបាល់លើតុ បានសរសេរក្នុងបណ្តាញសង្គមថា ៖ «អង្គុយត្រឹមតែ៥នាក់សោះ ក្តៅដល់ថ្នាក់នេះ បើអង្គុយពេញរថយន្តវិញ មុខជាដណ្តើមខ្យល់គ្នាដកដង្ហើមមិនខាន ហើយខ្យល់គរមុនពេលធ្វើដំណើរដល់ទីលានប្រកួត ។ តើមានភ្នាក់ងារណាខ្លះអាចជួយបាន? រថយន្តក្តៅណាស់ ជិះរថយន្តទៅហ្វឹកហាត់រយៈពេល៤៥នាទី យមបាលសួររក» ។

វាធ្វើឱ្យមហាជនរិះគន់ពីការរៀបចំពិធីប្រកួតកីឡាអូឡាំពិកនៅប្រទេសបារាំង ពីព្រោះគិតថា ក្រុមកីឡាករគួរតែទទួលបានបន្ទប់ស្នាក់ ឬការធ្វើដំណើរស្រួលជាងនេះ ខណៈការស្រឡាញ់បរិស្ថានពិភពលោក គឺអាចធ្វើបានច្រើនវិធី ។ បើតាមទិន្នន័យបង្ហាញថា ការបើកម៉ាស៊ីនត្រជាក់ពុំប៉ះពាល់បរិស្ថានពិភពលោក ដល់ថ្នាក់នេះទេ ៕

កាលពីថ្ងៃទី២៥ ខែកក្កដា ឆ្នាំ២០២៤នេះ ប្រព័ន្ធផ្សព្វផ្សាយចិនបានរាយការណ៍ថា ព្យុះទីហ្វុង Gaemi បានបោកបក់នៅខេត្ត Fujian ភាគអាគ្នេយ៍នៃប្រទេសចិន តាំងពីថ្ងៃទី២៤ ខែកក្កដា បន្ទាប់មកព្យុះនេះក៏បន្តវាយប្រហារទៅកាន់កោះតៃវ៉ាន់ និងប្រទេសហ្វីលីពីន នាំឲ្យមានភ្លៀងធ្លាក់យ៉ាងជោគជាំ ដែលបណ្តាលឱ្យមនុស្សជាង ២០ នាក់បានបាត់បង់ជីវិតនិងលិចកប៉ាល់ចំនួនមួយគ្រឿង។

ប្រភពសារព័ត៌មានចិនបានរាយការណ៍ថា អាជ្ញាធរចិនបានជម្លៀសប្រជាជនរបស់ពួកគេដែលរស់នៅក្នុងខេត្តហ្វូជៀន ប្រមាណ ១៥០០០នាក់ ឲ្យទៅកាន់តំបន់ផ្សេងរួចរាល់ហើយ មុនពេលដែលព្យុះដ៏ខ្លាំងក្លានេះបានមកដល់។

ចំណែកនៅតៃវ៉ាន់វិញ អាជីវកម្ម និងសាលារៀនជាច្រើនត្រូវបានបិទនៅទូទាំងភាគខាងជើងនៃកោះតៃវ៉ាន់ តាំងពីថ្ងៃទី ២៤ ខែកក្កដាមក ខណៈព្យុះដ៏កាចសាហាវនេះ បានបោកបក់ជន់លិចផ្លូវ រអិលបាក់ផ្លូវ ផ្តាច់ចរន្តអគ្គិសនី និងបណ្តាលឱ្យមនុស្ស ៣ នាក់ស្លាប់ និងរាប់រយនាក់ទៀតរងរបួស។ រីឯនៅមហាសមុទ្រតៃវ៉ាន់ ដែលអំឡុងពេលនោះគឺមាននាវាដឹកទំនិញចំនួន ៥ គ្រឿងឆ្លងកាត់ នៅក្នុងចំណោមនោះ មាន១ គ្រឿង បានលិចផងដែរ។

ព្យុះនេះក៏បន្តបោកបក់ទៅកាន់ប្រទេសហ្វីលីពីន ដែលបណ្តាលឲ្យភ្លៀងមូសុងរដូវកាន់តែធ្ងន់ធ្ងរឡើង ដោយទឹកជំនន់ជន់លិយ៉ាងចខ្លាំង ក៏ដូចជាការមានរអិលបាក់ដី ខណៈគិតត្រឹមពេលនេះ របាយការណ៍បឋមនៅថ្ងៃនេះបានឲ្យដឹងថា មនុស្សយ៉ាងហោចណាស់ ២២ នាក់បានបាត់បង់ជីវិតទៅហើយ។ មូលហេតុនៃការស្លាប់ភាគច្រើន គឺដោយសារលង់ទឹក បាក់ដី រលំដើមឈើ និងឆ្លងចរន្តអគ្គិសនី។

ជាមួយគ្នានោះ វីដេអូដែលបានដាក់បង្ហោះនៅលើបណ្តាញសង្គម បានបង្ហាញឲ្យឃើញពីផ្លូវនានាក្នុងរដ្ឋធានីបានប្រែក្លាយទៅជាទន្លេ ដោយមានហាងលក់ទំនិញ ផ្ទះសម្បែងជាច្រើនត្រូវបានជន់លិច ព្រមទាំងលិចរថយន្តជាច្រើនដែលកំពុងចត។ ស្របពេលដែលអ្នកស្រុកហ្វីលីពីនភាគច្រើនបានជម្លៀសទៅកាន់ទីតាំងផ្សេងៗ ដើម្បីរង់ចាំឱ្យទឹកជន់លិចក្នុងតំបន់របស់ពួកគេស្រកចុះសិនផងដែរ៕