លោក អេ ភូថង គ្រូបង្វឹកកីឡាប្រដាល់គុនខ្មែរ អ្នកស្រី សាំង សុម៉ាលី មន្រ្តីបច្ចេកទេស និងកីឡាការិនី អេ យ៉ានុត ត្រូវរងពិន័យពីសហព័ន្ធកីឡាគុនខ្មែរមិនអនុញ្ញាតឱ្យចូលរួមក្នុងព្រឹត្តិការណ៍កីឡាគុនខ្មែររយៈពេល៦ខែដែលរៀបចំដោយសហព័ន្ធ។ ការសម្រេចចិត្តដាក់ពិន័យនេះធ្វើឡើយបន្ទាប់ពីអ្នកទាំង៣ប្រើឥរិយាបថមិនសមរម្យប្រកែកតវ៉ាពេញសង្វៀនប្រកួតនិងនៅលើបណ្តាញសង្គមនានាក្នុងជំនួបវគ្គផ្តាច់ព្រ័ត្រដណ្តើមខ្សែក្រវាត់រវាងកីឡាករ ម៉ឺន មេឃា និង កីឡាករ ចាន់ ប៊ុនហឿន។ ការសម្រេចដាក់ពិន័យសមាជិកគ្រួសារត្រកូលអេនេះ ទស្សនិកជនជាច្រើនបានបង្ហាញការគាំទ្រចំពោះចំណាត់ការរបស់សហព័ន្ធ។

នៅល្ងាចថ្ងៃទី២២ ខែកក្កដា សហព័ន្ធកីឡាប្រដាល់គុនខ្មែរដែលមានឧត្តមសេនីយ៍ទោ ខូវ ឆាយ ជាប្រធានបានសម្រេចចិត្តដាក់ពិន័យលោក អេ ភូថង គ្រូបង្វឹកកីឡាប្រដាល់គុនខ្មែរ អ្នកស្រីសាំង សុម៉ាលី មន្រ្តីបច្ចេកទេសរបស់សហព័ន្ធកីឡាប្រដាល់គុនខ្មែរត្រូវជាភរិយា រួមជាមួយកីឡាការិនី អេ យ៉ានុត ត្រូវជាកូនស្រី មិនអនុញ្ញាតឱ្យចូលរួមព្រឹត្តិការណ៍ប្រកួតកីឡាប្រដាល់គុនខ្មែរដែលរៀបចំដោយសហព័ន្ធកីឡាប្រដាល់គុនខ្មែររយៈពេល៦ខែ។

ការដាក់ពិន័យនេះធ្វើឡើងដោយសារតែកាលពីល្ងាចថ្ងៃទី២១ ខែកក្កដា កីឡាករ ម៉ឺន មេឃា ត្រូវជាកូនប្រុសរបស់លោក អេ ភូថង និង ចាន់ ប៊ុនហឿន បានប្រកួតដណ្ដើមខ្សែក្រវាត់កំពូលជើងឯកគុនខ្មែរក្នុងប្រភេទទម្ងន់ ៦៣.៥គីឡូក្រាម ដែលរៀបចំឡើងស្ថានីយទូរទស្សន៍ PNN ប៉ុន្តែមានភាពចម្រូងចម្រាសពេញសង្វៀនប្រកួតក្រោយពីអាជ្ញាកណ្តាលសម្រេចចិត្តបញ្ឈប់កីឡាករ ម៉ឺន មេឃា នៅទឹកទី៤ បន្ទាប់ពីភ្លាត់ស្នៀតពីដៃគូប្រកួតក្រោយពីកីឡាករ ចាន់ ប៊ុនហឿន ទាត់ចូលកញ្ចឹងក។ ការផ្លាត់ស្នៀតរបស់ កីឡាករ ម៉ឺន មេឃា បន្ទាប់ពីកីឡាករ ប៊ុនហឿន បានផ្លាស់ប្តូរបច្ចេកទេសវាយម្តងក្រោយពីរូបគេត្រូវបានអជ្ញាកណ្តាលរាប់ចំនួន២ដងទៅហើយស្ទើរតែអស់សង្ឃឹមមិនអាចដណ្តើមខ្សែក្រវាត់បានទេ។

ការសម្រេចចិត្តរបស់ អាជ្ញាកណ្តាល បញ្ឈប់កីឡាករ ម៉ឺន មេឃា ក្រោមហេតុផលកីឡាករបាត់បង់ស្មារតីបានធ្វើឱ្យលោកគ្រូ អេ ភូថង និងអ្នកស្រី សាំង សុម៉ាលី ឡើងប្រកែកតវ៉ាពេញសង្វៀនប្រកួតនិងមានការប្រកែកតវ៉ា live លើបណ្តាញសង្គម មិនពេញចិត្តចំពោះការបញ្ឈប់នេះឡើយ។ ចំពោះកីឡាការិនី អេ យ៉ានុត បានប្រើពាក្យមិនសមរម្យយ៉ាងខ្លាំងទៅកាន់អាជ្ញាកណ្តាលដែលធ្វើឱ្យមានមតិរិះគន់យ៉ាងខ្លាំងពីសាធារណជន។

ក្រោយពីមានមតិរិះគន់ពីសាធារណជនក្រុមគ្រួសាររបស់លោក អេ ភូថង បានចេញសូមទោសមហាជន ខណៈប្រាក់រង្វាន់ពីការប្រកួតបង្វៀរទៅជួយមន្ទីរពេទ្យគន្ធបុផ្ផា និងជួយសម្ភារៈនានាទៅដល់ក្លិបប្រដាល់ដែលខ្វះខាត៕

អារ៉ាប៊ី សាអូឌីត ៖ ឪឡឹក គឺជាដំណាំមួយប្រភេទ ដែលការដាំដុះប្រើប្រាស់រយៈពេលខ្លី ឆាប់ទទួលបានផល និងចេញផ្លែនៅលើដី ។ ជាទូទៅ ឪឡឹកមានផ្លែរាងមូល ឬរាងស៊ីឡាំង ហើយមានសំបករឹង ។ រីឯសាច់របស់វាវិញ គឺពណ៌ក្រហម និងពណ៌លឿង ហើយឪឡឹកខ្លះមានសំបកឆ្នូតៗ និងខ្លះទៀតគ្មានឆ្នូត ។

ចំណែកសាច់ឪឡឹកមានគ្រាប់ពណ៌ខ្មៅនៅខាងក្នុង ហើយពូជឪឡឹកខ្លះទៀត គ្មានគ្រាប់ទេ ។ នៅខែកក្កដា ឆ្នាំ២០២៤ នេះ មានការចែកចាយរូបភាពឪឡឹកនៅអារ៉ាប៊ី សាអូឌីត ហើយវាក៏បានល្បីល្បាញក្នុងបណ្តាញសង្គមនាពេលនេះ ដោយសារតែអ្នកប្រើប្រាស់បណ្តាញសង្គមបានឃើញឪឡឹករបស់អារ៉ាប៊ី សាអូឌីត មានគុណភាពល្អ និងខុសប្លែកពីឪឡឹករបស់ប្រទេសនានា ។ រូបភាពក្នុងបណ្តាញសង្គមបង្ហាញថា ផ្លែឪឡឹកនៅអារ៉ាប៊ី សាអូឌីត មានរាងធំៗ វែងៗ ពណ៌ស្អាតតាមធម្មជាតិ និងគ្មានគ្រាប់ ។

អ្នកប្រើប្រាស់បណ្តាញសង្គមនិយាយថា អារ៉ាប៊ី សាអូឌីត អាចដាំឪឡឹកបានធំៗល្អជាងប្រទេសផ្សេង ហើយពួកគេចង់បានពូជឪឡឹកនេះមកដាំនៅប្រទេសរបស់ខ្លួន ។ ពលរដ្ឋនៅប្រទេសនានានិយមទិញឪឡឹកមកបរិភោគនៅរដូវក្តៅដើម្បីបំបាត់ការស្រេកទឹក ដោយសារឪឡឹកបានផ្តល់នូវសារៈប្រយោជន៍ជាច្រើនដល់សុខភាព ។ ដូច្នេះ ពួកគេចាប់អារម្មណ៍នឹងឪឡឹកនៅអារ៉ាប៊ី សាអូឌីត យ៉ាងខ្លាំង និងចង់ដឹងពីវិធីដាំដុះ ។

បើតាមការស្រាវជ្រាវផ្នែកវិទ្យាសាស្ត្របង្ហាញថា ឪឡឹកមានគុណសម្បត្តិអាចជួយព្យាបាល និងការពារការកើតជំងឺផ្សេងៗ ព្រមទាំងជួយកាត់បន្ថយការខ្វះខាតជាតិទឹកក្នុងរាងកាយផងដែរ ដោយសារផ្លែឪឡឹកនីមួយៗផ្ទុកនូវជាតិទឹកយ៉ាងច្រើន គឺស្មើរហូតដល់៩០% ។

ជាក់ស្តែង ឪឡឹកទុំ ស្មើចំនួន១០០ក្រាម វាមានជាតិទឹកចំនួន៩១.៤មីលីលីត្រ ។ ហេតុនេះ ការបរិភោគឪឡឹកលមានជាតិទឹកច្រើន វានឹងជួយឱ្យរាងកាយមានសំណើម និងធ្វើឱ្យប្រព័ន្ធផ្សេងៗរបស់រាងកាយដំណើរការបានល្អ ។ ក្រៅពីនេះ ការបរិភោគឪឡឹក ក៏អាចជួយកាត់បន្ថយការកើតជំងឺមហារីក, ជួយថែរក្សាស្បែក និងផ្តល់នូវវីតាមីន C ផងដែរ ៕

វីដេអូចែកចាយពីបណ្តាញសង្គមយ៉ាងច្រើនពោរពាស ដែលបង្ហាញឲ្យឃើញពីទឹកចិត្តស្រលាញ់សម្បត្តិវប្បធម៌អរិយធម៌ខ្មែរក្នុងចំណោមជនបរទេសគ្រប់ៗរូប បានមកលេងកម្សាន្តនៅលើដែនដីនៃប្រទេសកម្ពុជាប្រកបស្នាមញញឹម និងភាពសប្បាយរីករាយ បង្កើតបាននូវអនុស្សាវរីយល្អៗ ខណៈក៏បានធ្វើឲ្យមហាជនខ្មែរមួយប្រទេសមានមោទនភាពនិងថ្លែងអំណរគុណជាពន់ពេក។

តាមរយៈវីដេអូនៅលើបណ្តាញសង្គម កាលពីពេលកន្លងទៅនេះ គូរស្នេហ៍ជនបរទេសចម្រុះជាតិសាសន៍ជាច្រើនគូរ បានយកប្រាសាទអង្គរវត្តរបស់ខ្មែរ ធ្វើជាសាក្សីផ្តើមស្នេហ៍។ ខេត្តសៀមរាបជាដែនដីបុរាណ ពោរពេញដោយស្នាមញញឹម ដែលគូរស្នេហ៍ជាច្រើនរាប់ភ្លេច បានបំពាក់ចិញ្ជៀនឲ្យគ្នា នៅចំពីមុខប្រាសាទដ៏សាកសិទ្ធរបស់ខ្មែរគឺប្រាសាទអង្គរវត្ត ដែលឆ្លុះបញ្ចាំងពីសេចក្តីស្នេហាឋិតឋេរគង់វង្សនិងអមតៈដូចទៅនឹងប្រាសាទអច្ឆរិយៈខ្មែរមួយនេះ ដែលមានអាយុកាលស្ទើរតែជិតមួយ១០០០ ឆ្នាំទៅហើយ។

បន្ថែមពីនេះ ក៏នៅមានវីដេអូ ដែលបង្ហាញឲ្យឃើញពីសកម្មភាពជនបរទេសចំនួន ២រូប បានរាំលេងកម្សាន្តតាមចង្វាក់កន្ទឹ្រមខ្មែរ នៅលើទឹកដីនៃខេត្តសៀមរាបបានយ៉ាងសប្បាយរីករាយទាក់ចិត្តប្រជាជនខ្មែរគ្រប់ៗរូបអត់សរសើរមិនបានផងដែរ។

លើសពីនេះ ការទស្សនាប្រាសាទបុរាណខ្មែរ នាជំនោរវស្សានេះទៀតសោត បង្កើតបានទិដ្ឋភាពដ៏ស្រស់ត្រកាល និងអនុស្សាវរីយដែលមិនអាចបំភ្លេចបាន ទើបវីដេអូមួយទៀតបានលេចឡើងមក បង្ហាញឲ្យឃើញពីសកម្មភាពជនបរទេសស្រីចំនួន៣នាក់ បានលេងទឹកភ្លៀងយ៉ាងសប្បាយរីករាយ នៅម្តុំបរិវេណប្រាសាទក្នុងខេត្តសៀមរាប អមជាមួយនឹងទេសភាពព្រៃប្រឹក្សាដ៏ខៀវស្រងាត់នៅទីនោះ។

យ៉ាងណាមិញ វីដេអូទាំងនោះបានចែកចាយទៅក៏ទទួលបាននូវការចាប់អារម្មណ៍ជុំវិញពិភពលោក និងមានអ្នកទស្សនារហូតដល់ទៅរាប់លានដងឯណ្ណោះ ដែលទាំងនេះហើយគឺជាការផ្តល់ពិន្ទុពិតៗពីជនបរទេស តាមរយៈទឹកមុខនិងស្នាមញញឹមរបស់ពួកគេ ពេលបានមកកម្សាន្តនៅលើទឹកដីនៃប្រទេសកម្ពុជាផងដែរ៕

លោកឧកញ៉ាសឺន គុយ ដែលត្រូវបានប្រជាជនខ្មែរគ្រប់ជំនាន់គោរព លើកតម្កើន ជាវីរបុរសជាតិខ្មែរមួយរូប ព្រោះលោកបានលះបង់ជី.វិតដើម្បីប្តូរនឹងការថែរក្សា ប្រពៃណី សិល្បៈ អក្សរសាស្រ្ត វប្បធម៌ និងព្រះពុទ្ធសាសនា សម្រាប់ជនជាតិដើមខ្មែរក្រោមទាំងមូល នៅក្នុងទឹកដីកម្ពុជាក្រោម។ ខណៈ ទីនោះបានបន្សល់ទុកដើមឈើបញ្ច្រាស់ចុងមួយដើមអាយុកាលជិត២០០ ឆ្នាំ ជានិមិត្តរូបរបស់លោកឧកញ៉ា។

ឧកញ៉ា សឺន គុយ ជាចៅហ្វាយខេត្តព្រះត្រពាំង បានសុខចិត្តឲ្យអណ្ណាមកាត់ក្បាល កាលពីឆ្នាំ ១៨៤១ ជាថ្នូរនឹងការរក្សាទំនៀមទម្លាប់ខ្មែរ និងព្រះពុទ្ធសាសនាថេរវាទខ្មែរឲ្យបានគង់វង្សសម្រាប់ពលរដ្ឋខ្មែរក្រោមនៅដែនដីកម្ពុជាក្រោមប្រតិបត្តិរហូតមកដល់សព្វថ្ងៃ ។

នៅក្នុងឆ្នាំ ១៨៤១ រាជបញ្ជាមួយពីស្ដេចអណ្ណាម ឲ្យរំលាយជាតិខ្មែរឲ្យក្លាយទៅជាជនជាតិអណ្ណាម ក៏ដូចជាបង្កឲ្យមានការធ្វើទុក្ខបុកម្និញទៅកាន់ជនជាតិខ្មែរគ្រប់រូបនៅទីលើទឹកដីកម្ពុជាក្រោម។ ដោយសារទ្រាំពុំបាននឹងការឈ្លានពាន និងការរំលាយជាតិសាសន៍ខ្មែរ ទើបពលរដ្ឋខ្មែរក្រោមបានក្រោកបះបោរប្រឆាំងនៅគ្រប់ទីកន្លែងទូទាំងដែនដីកម្ពុជាក្រោម ។ ខេត្តព្រះត្រពាំង ក្រោមការដឹកនាំរបស់ ឧកញ៉ា សឺន គុយ ពលរដ្ឋខ្មែរក្រោមបាន ក្រោកឡើងតស៊ូច្បាំងជាមួយទ័ពអណ្ណាមយ៉ាងក្លាហាន ។

ដោយសារតែគ្មានទ័ពជំនួយពីស្ដេចខ្មែរ នៅប្រទេសកម្ពុជា ទើបនៅទីបំផុតចលនាតស៊ូ របស់ឧកញ៉ា សឺន គុយ ក៏បានថមថយ ហើយ ឧកញ៉ាក៏សម្រេចចិត្តប្រើនយោបាយការទូតចរចាជាមួយមេទ័ពវៀតណាម ដើម្បីជាថ្នូរនឹងការរក្សាជាតិ និងសាសនាឲ្យបានគង់វង្សសម្រាប់ពលរដ្ឋខ្មែរ នៅកម្ពុជាក្រោមប្រតិបត្តិវិញ ។ ទីបំផុត លោកឧកញ៉ាក៏ត្រូវបានបាត់បង់ជីវិត ដោយការក្បាល។

បើយោងតាមឯកសារជាច្រើនបានបញ្ជាក់ថា នៅពេលដែលអណ្ណាមប្រហារជីវិតលោកឧកញ៉ា សឺន គុយ ប្រជារាស្ត្រនិងព្រះសង្ឃខ្មែរ បានរៀបម្ហូបអាហារមួយតុក្រាលសំពត់ពណ៌ប្រាក់ រួចអញ្ជើញ ឧកញ៉ា សឺន គុយ ទទួលទានជាលើកចុងក្រោយ ។ ពេលទទួលទានរួច ឧកញ៉ា បានសម្ដែងការសមគួរក៏ដូចជាការសំណេះសំណាលជាលើកចុងក្រោយ ក្នុងជីវិតរបស់លោក ដោយទឹកមុខញញឹមទៅកាន់ព្រះសង្ឃ និងប្រជារាស្ត្រខ្មែរគ្រប់រូបផងដែរ។

គូរបញ្ជាក់ថា កាលពីឆ្នាំ ១៨៤១ មុនពេលដែលលោកឧកញ៉ាបានបាត់បង់ជីវិត លោកបានដាំដើមឈើទាលបញ្ច្រាសចុងមួយដើម (ដាំយកចុងចុះក្រោម គល់ឡើងលើ) នៅឯខេត្តព្រះត្រពាំងឬខេត្តត្រាវិញ។ កាលគ្រានោះ លោកបានផ្សងថា«បើជាតិសាសនាខ្មែរនៅគង់វង្ស សូមឱ្យមែកឈើទាលនេះដុះលូតលាស់ឡើង» ។

យ៉ាងណាមិញ ចំណេរកាលកន្លងទៅជិត ២០០ឆ្នាំហើយ ដែលជាអាយុកាលរបស់ដើមឈើទាលមួយដើមនោះ នៅតែបន្តដុះលូតលាស់ បែកមែកសាខាយ៉ាងត្រឈឹងត្រឈៃនៅលើទឹកដីកម្ពុជាក្រោម ដែលមានទំហំប្រមាណ ៧ ឱប និងមានកម្ពស់ ២៥ ម៉ែត្រ ខណៈក៏បានក្លាយជាកន្លែងសាកសិទ្ធ ដែលមនុស្សគ្រប់គ្នាតែងមកធ្វើការបន់ស្រន់ជាហូរហែរផងដែរ៕

នារសៀលថ្ងៃទី២៣ ខែកក្កដា ឆ្នាំ២០២៤ ក្នុងការថ្លែងការណ៍ពិសេសរបស់ សម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជា បានអះអាងថា ប្រទេសកម្ពុជាក្រោមការដឹកនាំរបស់សម្ដេច មិនបានចុះកិច្ចព្រមព្រៀងណាមួយ ដែលបញ្ចូល ឬលក់ដែនដីកម្ពុជា ទៅក្នុងដែនដីរបស់ប្រទេសវៀតណាមនោះទេ។

សម្ដេចតេជោ សង្កត់ធ្ងន់ថា៖” នឹងមិនអនុញ្ញាតឱ្យអ្នកដែលចោទប្រកាន់សម្តេចនិងសម្តេចធិបតីថាបានលក់ខេត្ត៤ទៅឱ្យប្រទេសវៀតណាមនោះឡើយ ហើយក៏គ្មានការបន្ធូរបន្ធយទោសឱ្យដែរព្រោះទង្វើដែលអ្នកទាំងនោះបានធ្វើជារឿងដែលមិនអាចលើកលែងឱ្យបាន។ ខណៈ មកដល់ពេលនេះ មនុស្សចំនួន៣នាក់ ត្រូវបានចាប់ខ្លួនពាក់ព័ន្ធនឹងព័ត៌មានមួលបង្កាច់រឿងតំបន់អភិវឌ្ឍន៍ត្រីកោណកម្ពុជា-ឡាវ-វៀតណាម”។

គួរបញ្ជាក់ថា តំបន់ត្រីកោណអភិវឌ្ឍន៍ CLV (កម្ពុជា-ឡាវ-វៀតណាម) បានបង្កើតឡើងនៅឆ្នាំ១៩៩៩ ដោយសម្តេចតេជោ ហ៊ុន សែន បានផ្តួចផ្តើមឡើង។

CLV ជាត្រីវិស័យនៃការនាំផ្លូវមួយ ដើម្បីប្រែក្លាយតំបន់ព្រំដែន ទៅជាតំបន់អភិវឌ្ឍន៍ និងសុខដុមនីយកម្ម នៃការតភ្ជាប់ប្រជាជន និងប្រជាជននៃប្រទេសទាំងបី នៅលើដងវិថីនៃសន្តិភាព សន្តិសហវិជ្ជមាន និងវិបុលភាពរួមគ្នា៕

មនុស្សគ្រប់រូបសុទ្ធតែប្រាថ្នាចង់ក្លាយជាអ្នកមាន ប៉ុន្តែមិនសូវចេះពីវិធីសាស្ត្រដើម្បីក្លាយជាអ្នកមាននោះទេ ដោយពួកគេគិតថាទាល់តែមានលុយច្រើនចាប់ពី ១ម៉ឺនទៅ ២ម៉ឺនដុល្លារឡើងទៅទើបអាចមានឱកាសក្លាយជាអ្នកមានបាន។ ទោះជាយ៉ាងណាក៏ដោយ អ្នកដែលប្រាក់ខែមធ្យមចាប់ពី ៤០០ ដុល្លារឡើងទៅ ក៏មានភាគរយខ្ពស់ក្លាយជាអ្នកមានបានដែរ។ នេះបើយោងតាមលោក Daniel Meursing ដែលជានាយកប្រតិបត្តិ និងជាស្ថាបនិកនៃក្រុមហ៊ុន Premier Staff នៅទីក្រុង Los Angeles សហរដ្ឋអាមេរិក បានចែករំលែកថា ទោះបីជាអ្នកមានប្រាក់ខែមធ្យមក៏ដោយ ក៏អាចក្លាយជាអ្នកមានយ៉ាងឆាប់រហ័សផងដែរ ដោយគ្រាន់អនុវត្តគោលការណ៍ទាំងនេះ៖

១.ត្រូវចាប់ផ្តើមរៀនសន្សំសំចៃ៖ លោក Daniel Meursing បាននិយាយថា ជំហានដំបូងអ្នកត្រូវប្រកាន់យករបៀបរស់នៅសន្សំសំចៃយ៉ាងតឹងរ៉ឹង ដូចជារស់នៅក្នុងបន្ទប់តូចមួយ ញ៉ាំអាហារថោកៗ និងប្រើប្រាស់អ៊ីវ៉ាន់ដែលមានតម្លៃសមរម្យបានហើយ ដែលទម្លាប់នេះជួយសន្សំសំចៃ ៥០% នៃប្រាក់ចំណូលរបស់អ្នក។

២.ពិចារណាការវិនិយោគជាផ្នែកមួយនៃជីវិត៖ Daniel បានចែករំលែកថា៖ «រាល់ប្រាក់ដែលអ្នកបានសន្សំទុកគឺត្រូវយកទៅវិនិយោគលើអ្វីមួយសម្រាប់ថ្ងៃអនាគត»។ យោងតាមសេដ្ឋីវ័យក្មេងរូបនេះ ការវិនិយោគគឺជាអព្ភូតហេតុមួយដែលផ្លាស់ប្តូរជីវិតរបស់មនុស្ស បន្ទាប់ពីការងារប្រចាំថ្ងៃជាចម្បង អ្នកក៏ត្រូវសន្សំលុយដើម្បីទុកវិនិយោគលើគម្រោងណាមួយដែលអ្នកពេញចិត្ត។

៣.ឆ្លៀតធ្វើការក្រៅម៉ោង៖ នាយកប្រតិបត្តិ និងជាស្ថាបនិកនៃក្រុមហ៊ុន Premier Staff កាលពីមុនលោកគឺជាមន្រ្តីឥណទានដែលធ្វើការពីម៉ោង ៩ ព្រឹកដល់ម៉ោង ៥ ល្ងាច ហើយនៅម៉ោង ៦ ល្ងាចដល់ម៉ោង ១០ យប់គឺលោកធ្វើការជាអ្នករត់តុ។ យោងតាមលោក ការងារច្រើនក្នុងពេលតែមួយមិនត្រឹមតែជួយបង្កើនប្រាក់ចំណូលប៉ុណ្ណោះទេ ថែមទាំងនាំមកនូវទំនាក់ទំនងថ្មីៗជាច្រើនទៀតផង។ មិនថាអ្នកធ្វើការងារអ្វីក៏ដោយ ត្រូវខិតខំឱ្យអស់ពីសមត្ថភាព ព្រោះជំនាញការងាររបស់អ្នកនឹងអាចគ្រប់គ្រងគម្រោងធំៗ នាពេលអនាគត។

៤.ចាប់យករាល់ឱកាស៖ ឱកាសមិនមែនចេះតែមាននោះទេ ដូច្នេះនៅពេលអ្នកមានឱកាសបានជជែក ឬពិភាក្សាជាមួយបុគ្គលខ្ពង់ខ្ពស់ណាម្នាក់ អ្នកគួរតែព្យាយាមទំនាក់ទំនងឬក្តោបឱកាសនោះឱ្យជាប់។

៥.ត្រូវរៀនជំនាញថ្មីៗជានិច្ច៖ ការរៀនជំនាញគឺជាការបណ្តុះបណ្តាលសមត្ថភាពឱ្យអ្នកកាន់តែខ្លាំង មិនថាជំនាញនិយាយភាសាបរទេស ជំនាញរាំ ច្រៀង គូគំនូរ ឬជំនាញផ្សេងៗទៀតសុទ្ធតែល្អ ដែលជំនាញទាំងនេះគឺមានភាគរយខ្ពស់ស្វែងរកឱកាសថ្មីៗជាច្រើន ក៏ដូចជាស្គាល់មនុស្សតូចធំជាច្រើន ដែលធ្វើឱ្យអ្នកអាចទទួលបានភាពជោគជ័យនៅថ្ងៃអនាគត៕