ប្រទេសជប៉ុន ៖ កាលពីថ្ងៃទី៣០ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា ថៅកែហាងទំនើបមួយកន្លែងនៅប្រទេសជប៉ុន បានប្រកាសសូមទោសជាសាធារណៈ ក្រោយពីមានអតិថិជនម្នាក់ស្លា.ប់ និងអតិថិជន១៤៧នាក់ទៀតឈឺចូលមន្ទីរពេទ្យ ដោយសារពួកគេបរិភោគអន្ទង់អាំងក្នុងហាងទំនើបនេះ កាលពីសប្តាហ៍ទី៤ ខែកក្កដា ។

ក្រុមហ៊ុន Keikyu Department Store បានប្រកាសកាលពីថ្ងៃទី២៩ ខែកក្កដា ថា អតិថិជនបានជូនដំណឹងមកកាន់ក្រុមហ៊ុន អំពីការទិញអន្ទង់អាំងនៅភោជនីយដ្ឋានឈ្មោះ Nihonbashi Unagi Isesada ស្ថិតក្នុងហាងទំនើប Keikyu Department Store នៅទីក្រុងយ៉ូកូហាម៉ា កាលពីសប្តាហ៍ទី៤ ខែកក្កដា ។ ប៉ុន្តែស្រាប់តែពួកគេមានអាការៈក្អួតចង្អោរ, ចុកពោះ និងមិនស្រួលខ្លួនភ្លាមៗ បន្ទាប់ពីបរិភោគអន្ទង់អាំងរួច ។

មជ្ឈមណ្ឌលសុខភាពសាធារណៈក្នុងទីក្រុងយ៉ូកូហាម៉ា ឱ្យដឹងថា មានអតិថិជនម្នាក់ស្លាប់ និងអតិថិជន១៤៧នាក់ទៀតមានអាការៈខុសប្រក្រតី បន្ទាប់ពីពួកគេបរិភោគអន្ទង់អាំងរបស់ភោជនីយដ្ឋានខាងលើ ។ អតិថិជនដែលស្លាប់នេះ គឺជាស្ត្រីអាយុ៩០ឆ្នាំ មានជំងឺប្រចាំកាយ ហើយមូលហេតុនៃការស្លាប់ពិតប្រាកដកំពុងតែស្ថិតក្រោមការស៊ើបអង្កេត ។ រីឯអតិថិជន២នាក់ទៀតកំពុងសម្រាកនៅមន្ទីរពេទ្យ ខណៈអតិថិជនផ្សេងទៀតមានអាការៈខុសប្រក្រតីតិចតួច ។

ក្រោយពីកើតហេតុការណ៍អតិថិជនស្លាប់ និងឈឺដោយសារការបរិភោគអន្ទង់អាំង ភោជនីយដ្ឋាន Nihonbashi Unagi Isesada ក៏បានបិទទ្វារផ្អាកដំណើរការ កាលពីថ្ងៃទី២៩ ខែកក្កដា កន្លងមក ។ បន្ទាប់ពីការពិនិត្យលាមករបស់អ្នកជំងឺចំនួន៥នាក់ គ្រូពេទ្យឃើញបាក់តេរីឈ្មោះ Staphylococcus aureus ដែលបាក់តេរីប្រភេទនេះភាគច្រើនស្ថិតនៅលើស្បែក ។

លោក Shinji Kaneko ប្រធានក្រុមហ៊ុន Keikyu Department Store និងអ្នកតំណាងភោជនីយដ្ឋាន បានរួមគ្នាធ្វើសន្និសីទសារព័ត៌មានអំពីហេតុការណ៍នេះ ។ លោក លោក Shinji បានសូមទោស និងបង្ហាញការសោកស្តាយយ៉ាងខ្លាំងដល់ក្រុមគ្រួសារសាកសព ព្រមទាំងបួងសួងឱ្យអ្នកជំងឺទាំងអស់ឆាប់ជាសះស្បើយឡើងវិញ ។ ក្រៅពីនេះ លោកក៏បានសូមទោសអតិថិជន និងអ្នកពាក់ព័ន្ធទាំងអស់ ដែលទទួលការក្តៅក្រហាយដោយសារករណីនេះ ។

ចំណែកអ្នកតំណាងភោជនីយដ្ឋាននិយាយថា ចាប់ពីថ្ងៃទី២៤ ដល់ថ្ងៃទី២៥ ខែកក្កដា ឆ្នាំ២០២៤ ភោជនីយដ្ឋានបានដាក់លក់អន្ទង់អាំង ចំនួន១.៧៦១ដុំ ព្រមទាំងមានបាយប្រអប់ផងដែរ ។ ក្នុងចំណោមអន្ទង់អាំងជាង១ពាន់ដុំនេះ ក្នុងនោះមានអន្ទង់អាំង ចំនួន៤៥០ដុំ បានបិតស្លាកថ្ងៃផុតសុពលភាពពុំត្រឹមត្រូវ និងពុំបានបញ្ជាក់ពីរោគសញ្ញាផ្សេងៗដែលបណ្តាលមកពីការបរិភោគអន្ទង់ ៕

ប្រទេសចិន៖ ប្រាក់យន់របស់ប្រទេសចិនបានក្លាយជារូបិយប័ណ្ណដែលប្រើប្រាស់ច្រើនជាងគេទីពីរនៅក្នុងទីផ្សារហិរញ្ញវត្ថុពាណិជ្ជកម្មពិភពលោក ដោយទម្លាក់តំណែងប្រាក់អឺរ៉ូចេញពីទីផ្សារ ខណៈកាលពីមុនប្រាក់អឺរ៉ូគឺជាប្រាក់ដែលគេប្រើច្រើនជាងគេទីពីរក្នុងពិភពលោក។
នេះបើយោងតាមការចុះផ្សាយរបស់សមាគមទូរគមនាគមន៍ហិរញ្ញវត្ថុអន្តរធនាគារពិភពលោក (SWIFT) បានឱ្យដឹងថា ចំណែកទីផ្សាររបស់ប្រាក់យន់ក្នុងខែមិថុនា ឆ្នាំ២០២៤ គឺ ៥.៩៩% កើនឡើងខ្លាំងបើធៀបនឹងខែឧសភា ខណៈចំណែកទីផ្សាររបស់ប្រាក់អឺរ៉ូវិញគឺត្រឹមតែ ៥.៩២% ប៉ុណ្ណោះ។

យោងតាមទិន្នន័យ SWIFT នេះមិនមែនជាលើកទីមួយទេដែលប្រាក់យន់បានលើសប្រាក់អឺរ៉ូក្នុងប្រតិបត្តិការហិរញ្ញវត្ថុ។ កាលពីខែវិច្ឆិកា ឆ្នាំ ២០២៣ កន្លងទៅប្រាក់យន់របស់ចិនក៏បានយកឈ្នះប្រាក់អឺរ៉ូផងដែរ។ ទោះជាយ៉ាងណាការកាន់កាប់ចំណែកទីផ្សារដ៏ធំបំផុតនៅក្នុងវិស័យនេះនៅតែជាប្រាក់ដុល្លារ USD ដែលមានច្រើនជាង ៨០%។ ប៉ុន្តែបន្ទាប់ពីប្រាក់ដុល្លារ គឺប្រាក់យន់នេះហើយដែលគេប្រើច្រើនជាងគេទីពីរក្នុងពិភពលោក។

ប្រសិនបើគណនាការទូទាត់ជាសកល ប្រាក់យន់បច្ចុប្បន្នជារូបិយប័ណ្ណដែលប្រើប្រាស់ច្រើនបំផុតទី ២ នេះជាខែទី ៨ ជាប់ៗគ្នាដែលប្រាក់យន់បានកាន់កាប់តំណែងនេះ ជាមួយនឹងចំណែកទីផ្សារ ៥.៩៩% នៅក្នុងខែមិថុនា ទិន្នន័យនេះបានកើនឡើងបន្តិចធៀបនឹង ៥.០៨% នៅក្នុងខែឧសភា។ ដូច្នេះរូបិយប័ណ្ណដែលប្រើប្រាស់ច្រើនជាងគេបំផុតក្នុងការទូទាត់ជាសាកលបច្ចុប្បន្នគឺ USD, យន់, អឺរ៉ូ, ផោន, និងយ៉េន។ គួរបញ្ជាក់ដែរថា ក្នុងរយៈពេលមួយទសវត្សរ៍កន្លងមកនេះ ប្រទេសចិនបានធ្វើអន្តរកម្មយ៉ាងសកម្មនូវ RMB។

ពួកគេខិតខំកសាងហេដ្ឋារចនាសម្ព័ន្ធហិរញ្ញវត្ថុសម្រាប់ការទូទាត់ឆ្លងប្រទេសនៃរូបិយប័ណ្ណនេះ។ ជាឧទាហរណ៍ ប្រទេសនេះបានបង្កើតធនាគារទូទាត់ប្រាក់យន់ក្នុងទីផ្សារបរទេស ហើយពួកគេក៏បានពង្រីកប្រព័ន្ធទូទាត់អន្តរធនាគារឆ្លងព្រំដែន (CIPS) ផងដែរ។ ក្នុងប៉ុន្មានឆ្នាំថ្មីៗនេះ ប្រទេសមួយចំនួនដូចជារុស្ស៊ី និងប្រេស៊ីលក៏បានបង្កើនការប្រើប្រាស់ប្រាក់យន់ក្នុងបរិបទនៃការខ្វះខាតប្រាក់ដុល្លារផងដែរ។ ទន្ទឹមនឹងនេះប្រទេសចិនកាលពីឆ្នាំមុនក៏បានចុះហត្ថលេខាលើកិច្ចព្រមព្រៀងប្តូររូបិយប័ណ្ណជាមួយអាហ្សង់ទីនទៀតផង៕

ប្រទេសថៃ ៖ វាបានធ្វើឱ្យមហាជននៅប្រទេសថៃមានចម្ងល់យ៉ាងខ្លាំងថា តើជាហេតុការណ៍ពិតប្រាកដ ឬការបង្កើតមាតិកា? នៅពេលឃើញរថយន្តទំនើប១គ្រឿងបើកបរតាមផ្លូវ ប៉ុន្តែដាក់ស្លាកនៅគូទរថយន្តថា «រថយន្តប្រមូលសំរាម» ថែមទាំងចងអំបោសតម្រៀបគ្នាចំនួន៤ នៅគូទរថយន្តទៀតផង ។ ចុងក្រោយ ម្ចាស់រថយន្តទំនើបបកស្រាយថា វាពុំមែនជាការបង្កើតមាតិកាទេ ប៉ុន្តែការធ្វើបែបនេះ គឺចង់ឱ្យបុគ្គលិកលក់រថយន្ត កុំមើលងា.យ មនុស្សតែសំបកខាងក្រៅ ។

បើតាមវីដេអូចែកចាយក្នុងបណ្តាញសង្គមថៃឃើញថា វាជារថយន្តទំនើបមានតម្លៃថ្លៃខ្លាំង ប៉ុន្តែបែរជាមានអំបោសបោសផ្ទះដាក់នៅគូទរថយន្ត ដែលធ្វើឱ្យអ្នកដំណើរតាមផ្លូវសួរថា ហេតុអ្វីទើបធ្វើបែបនេះ? ក្រោយពីវីដេអូនេះល្បីល្បាញក្នុងបណ្តាញសង្គម ម្ចាស់រថយន្តទំនើបក៏បកស្រាយពីមូលហេតុដែលខ្លួនធ្វើបែបនេះ ។

យុវជនជាម្ចាស់រថយន្តនិយាយថា កាលពីថ្ងៃទី២១ ខែកក្កដា ឆ្នាំ២០២៤ លោកបានចូលក្នុងហាងលក់រថយន្តទំនើបមួយកន្លែងនៅតំបន់ឡាតប្រាវ ទីក្រុងបាងកក ដោយសារលោកមានគម្រោងប្តូរមកប្រើប្រាស់រថយន្តអគ្គិសនី ។ ប៉ុន្តែពេលលោកដើរចូលក្នុងហាងនេះ គ្មានបុគ្គលិកលក់រថយន្តណាម្នាក់ចាប់អារម្មណ៍បង្ហាញរថយន្តថ្មីប្រាប់លោកឡើយ ហើយពួកគេបែរជាជជែកគ្នា បើទោះជាលោកស្រែកហៅក្តី ក៏ពួកគេមិនដើរមករកលោកឡើយ ។

ពេលនោះ លោកក៏មានអារម្មណ៍អន់ចិត្ត ហើយនិយាយថា ៖ «បើបុគ្គលិកផ្នែកលក់រថយន្តពុំមកនិយាយជាមួយខ្ញុំទេ ខ្ញុំមិនទិញរថយន្តនេះក៏បានដែរ» ។ ប៉ុន្តែបុគ្គលិកលក់រថយយន្តបែរជាសើចចំអកនឹងពាក្យសម្តីរបស់លោក ។ បន្ទាប់មក លោកនិយាយទៀតថា ៖ «ខ្ញុំជាអតិថិជន» ។

បន្តិចក្រោយមក ក៏មានបុគ្គលិកលក់រថយន្តម្នាក់ទៀតរត់មករកលោក និងរៀបចំឯកសារទិញ-លក់រថយន្តជូនលោក ។ លោកមានអារម្មណ៍ខឹងខ្លាំងណាស់ ហើយការធ្វើបែបនេះ ដោយសារចង់ឱ្យបុគ្គលិកទាំងនេះសូមទោសអតិថិជន ។ លោកចង់ប្រាប់ពួកគេថា ទោះជាអតិថិជនចូលក្នុងហាងលក់រថយន្តទំនើប ទិញរថយន្ត ឬពុំទិញក្តី អ្នកលក់ត្រូវមានតួនាទីបង្ហាញផលិតផលទៅអតិថិជន និងកុំមើលងាយការស្លៀកពាក់ ពីព្រោះអតិថិជនមានសិទ្ធិស្មើៗគ្នា គ្មានអ្នកណាខ្ពង់ខ្ពស់ជាងអ្នកណាទេ ។

ម្ចាស់រថយន្តទំនើបរៀបរាប់ថា ៖ «ខ្ញុំឈរនៅហាងរថយន្តអស់មួយសន្ទុះ ហើយមើលឆ្វេង-ស្តាំ គ្មានបុគ្គលិកមករាក់ទាក់អតិថិជនសោះ ។ ដូច្នេះ ខ្ញុំក៏សួរថា តើមានបុគ្គលិកផ្នែក Sell ទេ? ស្រាប់តែបុគ្គលិកលក់រថយន្តមើលមកខ្ញុំបែបមើលងាយ ហើយខ្ញុំក៏និយាយបន្តថា បើគ្មានផ្នែក Sell ទេ ខ្ញុំពុំទិញរថយន្តទេ» ។ ភ្លាមនោះ សង្សាររបស់ខ្ញុំបានឮបុគ្គលិកលក់រថយន្តនិយាយត្រាប់តាមពាក្យខ្ញុំទៀតផង ។ ខ្ញុំចង់ឱ្យពួកគេសូមទោស ខ្ញុំពុំត្រូវការអ្វីទេ ព្រោះពេលនោះ ខ្ញុំខ្មាស់គេខ្លាំងណាស់» ។

ចំណែកការយកអំបោសមកដាក់នៅគូទរថយន្តបែបនេះ ម្ចាស់រថយន្តប្រាប់ថា លោកធ្វើតាមព្រះមហាក្សត្រនៅប្រទេសឥណ្ឌា ដែលទ្រង់បានធ្វើដំណើរទៅទីក្រុងឡុងដ៍ ។ ពេលនោះ ព្រះមហាក្សត្រឥណ្ឌាតែងព្រះកាយជាពលរដ្ឋសាមញ្ញ ហើយក៏ដើរចូលក្នុងហាងលក់រថយន្តទំនើបមួយកន្លែងដើម្បីសួរព័ត៌មានលម្អិត ។ ប៉ុន្តែបុគ្គលិកលក់រថយន្តគិតថា ទ្រង់ជាជនជាតិឥណ្ឌាក្រីក្រគ្មានប្រាក់ ហើយពួកគេក៏បណ្តេញព្រះមហាក្សត្រឥណ្ឌាឱ្យចេញក្រៅហាង ៕

ប្រទេសបារាំង ៖ ក្នុងពិធីបើកការប្រកួតកីឡាអូឡាំពិក ឆ្នាំ២០២៤ នៅទីក្រុងប៉ារីស ប្រទេសបារាំង បានសម្តែងកម្មវិធីជាច្រើនទៅកាន់អ្នកចូលរួម ប៉ុន្តែការសម្តែងមួយបែរជាធ្វើឱ្យមហាជនផ្ទុះការរិះគ.ន់ ថា តើវាជាការធ្វើត្រាប់តាមរូបភាព «The Last Supper» របស់សាសនាគ្រិស្ត ឬយ៉ាងណា? ចុងក្រោយ ក្រុមហ៊ុនផ្សេងៗលើពិភពលោក បានសម្រេចចិត្តដកការផ្សាយពាណិជ្ជកម្មចេញពីពិធីប្រកួតកីឡាអូឡាំពិក ។

រូបភាព The Last Supper គឺជាការបង្ហាញពីម្ហូបអាហារចុងក្រោយរបស់ព្រះយេស៊ូ ប៉ុន្តែការសម្តែងមួយក្នុងពិធីបើកការប្រកួតកីឡាអូឡាំពិក បែរជាមានលក្ខណៈស្រដៀងគ្នានឹងរូបភាពម្ហូបអាហារចុងក្រោយរបស់ព្រះយេស៊ូ ។ ពីដំបូង ការបង្ហាញនេះធ្វើឱ្យមហាជនរីករាយ ប៉ុន្តែក្រោយមក វាបានក្លាយជាបញ្ហាធំ ពីព្រោះអ្នកគោរពសាសនាគ្រិស្តឃើញហើយគិតថា តើវាជាការធ្វើត្រាប់តាមសាសនារបស់ពួកគេដែរឬទេ?

វាធ្វើឱ្យពលរដ្ឋលើពិភពលោក រិះគន់ពិធីបើកការប្រកួតកីឡាអូឡាំពិកនៅប្រទេសបារាំងយ៉ាងខ្លាំង រហូតធ្វើឱ្យខាងកីឡាអូឡាំពិកលុបវីដេអូខាងលើចោលវិញ ។ លើសពីនេះ ក្រុមហ៊ុនឧបត្ថម្ភកម្មវិធីមួយចំនួន ក៏បានប្រកាសដកការផ្សព្វផ្សាយពាណិជ្ជកម្មទាំងអស់ចេញពីការប្រកួតអូឡាំពិក ។ តើការរិះគន់នេះចាប់ផ្តើមកើតឡើងយ៉ាងដូចម្តេច?

កាលពីថ្ងៃទី២៦ ខែកក្កដា ឆ្នាំ២០២៤ គឺជាថ្ងៃបើកការប្រកួតកីឡាអូឡាំពិក ឆ្នាំ២០២៤ នៅទីក្រុងប៉ារីស ហើយមានការសម្តែងជាច្រើនក្នុងកម្មវិធី ។ ប៉ុន្តែការសម្តែងមួយបានល្បីល្បាញ និងត្រូវមហាជនរិះគន់ច្រើនបំផុតនោះ គឺក្រោយពីលោក ឡេអូណាដូ ដាវីនឈី ជនជាតិអ៊ីតាលី បានសម្តែងធ្វើត្រាប់តាមរូបភាព The Last Supper ជាម្ហូបអាហារចុងក្រោយរបស់ព្រះយេស៊ូ ។ រូបភាពនេះមានន័យថា ជាការបរិភោគអាហារចុងក្រោយរបស់ព្រះយេស៊ូ មុនពេលព្រះអង្គត្រូវបានគេយកទៅចងឈើឆ្កាង ។

អ្នកទស្សនានិយាយថា គ្រប់កាយវិការរបស់តារាសម្តែងនេះ គឺបានធ្វើត្រាប់តាមសាសនាគ្រិស្ត ហើយវាដូចគ្នានឹងរូបភាព The Last Supper ខ្លាំងណាស់ ។ អ្នកគោរពសាសនាគ្រិស្តជាច្រើននាក់មិនពេញចិត្តនឹងការសម្តែងនេះឡើយ ។

ចំណែកលោក Elon Musk ជាម្ចាស់ក្រុមហ៊ុនរថយន្ត Tesla និងបណ្តាញសង្គម X ក៏បានរិះគន់ផងដែរ ។ លោកនិយាយថា ៖ «នេះជាបង្ហាញថា មិនគោរពអ្នកកាន់សាសនាគ្រិស្តយ៉ាងខ្លាំង ។ បើគ្មានសេចក្តីក្លាហានទទូចរកភាពយុត្តិធម៌ និងភាពត្រឹមត្រូវទេនោះ សាសនាគ្រិស្តនឹងបាត់បង់មិនខាន» ។

រីឯ C Spire ជាក្រុមហ៊ុនទំនាក់ទំនងគ្មានខ្សែរបស់អាមេរិកបានបង្ហោះក្នុងបណ្តាញសង្គមថា ក្រុមហ៊ុនមានអារម្មណ៍ហួសចិត្តយ៉ាងខ្លាំងនឹងការធ្វើត្រាប់តាមអាហារព្រះយេស៊ូ ក្នុងពិធីប្រកួតកីឡាអូឡាំពិកនៅទីក្រុងប៉ារីស ។ ហេតុនេះ ក្រុមហ៊ុនសម្រេចចិត្តដកការផ្សាយពាណិជ្ជកម្មទាំងអស់ចេញពីការប្រកួតកីឡាអូឡាំពិក ឆ្នាំ២០២៤ ។

ចុងក្រោយ ខាងរៀបចំកម្មវិធីប្រកួតកីឡាអូឡាំពិកបានលុបវីដេអូសម្តែងរបស់លោក ឡេអូណាដូ ដាវីនឈី ចេញពីយូធូប ។ បើទោះជាមានការរិះគន់យ៉ាងច្រើនក្តី ប៉ុន្តែក្រុមសម្តែងនិយាយថា វាគ្មានអ្វីគួរឱ្យរីករាយទេ បើគ្មានប្រធានបទប្រកែកគ្នាទេនោះ ។ វាគួរឱ្យធុញទ្រាន់ខ្លាំងណាស់ បើមនុស្សលើពិភពលោកនេះគិតដូចគ្នាទាំងអស់ ។

កាលពីថ្ងៃទី២៨ ខែកក្កដា គណៈកម្មការអូឡាំពិកនិយាយថា ពួកគេគ្មានចេតនាធ្វើត្រាប់តាម ឬមិនគោរពសាសនាណាមួយទេ ។ បើអ្នកណាមិនពេញចិត្តនឹងការសម្តែងនេះ ពួកគេសូមបង្ហាញការសោកស្តាយយ៉ាងខ្លាំង ។

លោក Thomas Jolly នាយកគ្រប់គ្រងការសម្តែងក្នុងពិធីបើកការប្រកួតកីឡាអូឡាំពិកនិយាយថា ការសម្តែងនេះពុំបានធ្វើត្រាប់តាម ឬមើលងាយអ្នកណាម្នាក់ឡើយ ពីព្រោះក្រុមការងារបានសហការគ្នាសម្តែងបើកកម្មវិធីដោយរីករាយ ដើម្បីបង្ហាញពីគុណតម្លៃសេរីភាពជាគោលការណ៍សំខាន់របស់ប្រទេសបារាំង ៕