បវរកញ្ញា អ៊ិន លក្ខិណា Miss Cosmo Cambodia 2024 បានបង្ហាញដំរួយកាន់តែច្បាស់បន្ថែមទៀតដែលនឹងធ្វើឱ្យអ្នកគាំទ្រមានមោទនភាពចំពោះនាងម្តងទៀត។ ឈានដល់១០នាក់ចុងក្រោយនៅលើឆាកអន្តរជាតិកន្លងមក អ៊ិន លក្ខិណា កាន់តែមានឈ្មោះបោះសំឡេងលើវិស័យនេះនិងចេញទៅបំពេញការងារញឹកញាប់នៅប្រទេសវៀតណាម។
នៅរសៀលថ្ងៃទី៨ ខែឧសភា ឆ្នាំ២០២៦ អ៊ិន លក្ខិណា បានបង្ហោះវីដេអូអំឡុងពេលប្រកាសលទ្ធផលដែលនាងប្រកួតនៅលើឆាក Miss Cosmo 2024 ដោយភ្ជាប់មកជាមួយនឹងចំណងជើងថា «មោទនភាពនេះនឹងកើតមានឡើងម្ដងទៀត» ដោយភ្ជាប់មកជាមួយនឹងរូបទង់ជាតិកម្ពុជា។ កន្លងមកមានពាក្យចចាមអារ៉ាមចរាចរនៅលើបណ្តាញសង្គមថា អ៊ិន លក្ខិណា នឹងចូលរួមប្រកួតតំណាងប្រទេសកម្ពុជាម្តងទៀតហើយការបង្ហោះខាងលើនេះរបស់នាងកាន់តែធ្វើឱ្យអ្នកគាំទ្រគិតថាមានភាគរយខ្ពស់ដែលនាងនឹងចូលរួមប្រកួតពិតមែន។
ស្ថិតនៅក្នុងពាក្យចចាមអារ៉ាមដែលមានការលើកឡើងច្រើនជាងគេដែល អ៊ិន លក្ខិណា អាចនឹងចូលរួមប្រកួតតំណាងប្រទេសនោះគឺជាកម្មវិធី Miss World ស្របពេលដែលកម្មវិធីក្នុងឆ្នាំ២០២៦ នេះប្រទេសវៀតណាមនឹងធ្វើជាម្ចាស់ផ្ទះ។ អ្នកគាំទ្រជាច្រើនបានបង្ហាញការគាំទ្រចំពោះ លក្ខិណា ក្នុងការតំណាងប្រទេសកម្ពុជាម្តងទៀត ខណៈពួកគេនៅមិនទាន់ភ្លេចនៅឡើយសម្រាប់ការប្រកួតរបស់នាងកន្លងមកនៅលើឆាក Miss Cosmo។
គួរឱ្យដឹងថា អ៊ិន លក្ខិណា គឺមានអ្នកគាំទ្រច្រើននៅប្រទេសវៀតណាមបន្ទាប់ពីការប្រកួតកន្លងមកឈានដល់ TOP10 លក្ខិណា មានការងារជាហូរហែនៅទីនោះ។ លក្ខិណា ក៏ទើបបង្ហើបផងដែរថាប៉ុន្មានថ្ងៃខាងមុខនេះទៀតនេះនាងនឹងចូលរួមកម្មវិធី Fashion Show មួយ។
ប្រសិនជាដំណឹងចចាមអារ៉ាមនេះក្លាយជាការពិតដូច្នេះ អ៊ិន លក្ខិណា នឹងបានប្រកួតតំណាងប្រទេសកម្ពុជាចំនួន៣ដងនៅក្នុងការប្រកួតបវរកញ្ញាបន្ទាប់ពីកម្មវិធី Miss Supranational , Miss Cosmo និងកម្មវិធីចុងក្រោយនេះដែលពុំទាន់មានការបញ្ជាក់ជាផ្លូវការនៅឡើយ៕
