ប្រទេសឥណ្ឌា ៖ កាលពីថ្ងៃទី២៦ ខែកក្កដា ឆ្នាំ២០២៤ សារព័ត៌មាន BBC រាយការណ៍ថា បុរសឥណ្ឌាម្នាក់ឈ្មោះ Raju Gound បានធ្វើការក្នុងអណ្តូងរ៉ែអស់រយៈពេលជាង១០ឆ្នាំហើយ ថែមទាំងជំពាក់បំណុលគេជុំទិសទៀតផង ។ ប៉ុន្តែវាសនារបស់លោកបានផ្លាស់ប្តូរភ្លាមៗ ក្រោយពីរកឃើញពេជ្រចំនួន១៩.២២ការ៉ាត់ ក្នុងអណ្តូងរ៉ែនៅរដ្ឋ Madhya Pradesh ភាគកណ្តាលប្រទេសឥណ្ឌា ដែលស្មើទឹកប្រាក់ប្រមាណ៨លានរូពី (ឬស្មើ៩៥.៥៥៧ដុល្លារអាមេរិក) ។

លោក Raju និយាយមកកាន់ប្រព័ន្ធផ្សព្វផ្សាយ BBC ថា លោកបានជួលអណ្តូងរ៉ែក្នុងទីក្រុង Panna អស់រយៈពេលជាង១០ឆ្នាំ ហើយលោកសង្ឃឹមថា នឹងរកឃើញពេជ្រនៅទីក្រុង Panna ដែលល្បីល្បាញថាសម្បូរពេជ្រ ។ លោកបន្តថា មានមនុស្សជាច្រើនទៀតបានជួលអណ្តូងរ៉ែតម្លៃថោកពីរដ្ឋាភិបាល ដើម្បីស្វែងរកត្បូងមានតម្លៃ ។ ក្រៅពីនេះ ក្រុមហ៊ុនអភិវឌ្ឍន៍រ៉ែជាតិរបស់រដ្ឋាភិបាល ក៏បានអនុញ្ញាតឱ្យពលរដ្ឋ និងក្រុមសហគមន៍ជួលអណ្តូងរ៉ែដែរ ថែមទាំងមានឧបករណ៍ឱ្យប្រើប្រាស់ទៀតផង ។

លោកបន្តទៀតថា កាលពី២ខែមុន ឪពុករបស់លោកបានជួលអណ្តូងរ៉ែក្នុងភូមិមួយនៅក្បែរទីក្រុង Panna ។ គ្រួសារលោកតែងតែជួលអណ្តូងរ៉ែនៅរដូវប្រាំង ព្រោះវាជាពេលទំនេរពីការងារកសិកម្ម និងធ្វើឥដ្ឋ ហើយគ្រួសារលោកក្រីក្រខ្លាំងណាស់ គ្មានប្រាក់ចំណូលផ្សេងឡើយ ។ ដូច្នេះ គ្រួសារលោកក៏នាំគ្នាធ្វើការក្នុងអណ្តូងរ៉ែ ដើម្បីមានប្រាក់ចំណូលមកផ្គត់ផ្គង់ជីវភាពគ្រួសារ ។

នៅថ្ងៃទី២៧ ខែកក្កដា លោកបានមកធ្វើការក្នុងអណ្តូងរ៉ែតាមធម្មតា ហើយលោកក៏បានជីកដី និងលើកដុំដីលាយថ្មយកមកលាងក្នុងកញ្ច្រែង ។ បន្ទាប់មក លោកបានពិនិត្យថ្មតូចៗរាប់ពាន់ដុំយ៉ាងប្រុងប្រយ័ត្នដើម្បីរកមើលពេជ្រ ស្រាប់តែឃើញអ្វីម្យ៉ាងស្រដៀងកំទេចកែវ និងមានពន្លឺចែងចាំង ។ លោកដឹងភ្លាមថា វាជាគ្រាប់ពេជ្រ រួចហើយក៏យកពេជ្រនេះទៅឱ្យការិយាល័យត្រួតពិនិត្យពេជ្ររបស់រដ្ឋាភិបាលពិនិត្យ ។

មន្ត្រីការិយាល័យត្រួតពិនិត្យពេជ្របានយកគ្រាប់ពេជ្រនេះមកថ្លឹងបានចំនួន១៩.២២ការ៉ាត់ ដែលស្មើទឹកប្រាក់ប្រមាណ៨លានរូពី (ឬស្មើ៩៥.៥៥៧ដុល្លារអាមេរិក) ។ លោកសង្ឃឹមថា នឹងយកប្រាក់បានពីការលក់ពេជ្រយកទៅសាងសង់ផ្ទះឱ្យគ្រួសារលោករស់នៅ និងបង់ថ្លៃសាលាឱ្យកូនៗ ។ បន្ទាប់មក លោកយកប្រាក់ទៅសងបំណុលគេ ស្មើជាង៥សែនរូពី (ឬជាង៦ពាន់ដុល្លារអាមេរិក) ។

លោកមិនខ្លាចគេដឹងថា លោករកឃើញគ្រាប់ពេជ្រទេ ហើយលោកតាំងចិត្តថា នឹងបែងចែកប្រាក់ដែលបានមកនេះ ទៅឱ្យសាច់ញាតិរបស់លោកចំនួន១៩នាក់ផងដែរ ។ លើសពីនេះ លោកនឹងទៅស្វែងរកពេជ្រនៅអណ្តូងរ៉ែបន្តទៀត ។

ចំណែកមន្ត្រីការិយាល័យពេជ្ររដ្ឋាភិបាលឥណ្ឌាបាននិយាយមកកាន់ BBC ថា បើពលរដ្ឋរកឃើញត្បូង ត្រូវប្រគល់វាទៅឱ្យការិយាល័យពេជ្ររបស់រដ្ឋាភិបាល ដើម្បីវាយតម្លៃបន្តទៀត ។ អណ្តូងរ៉ែទាំងនេះមានតម្លៃជួល ចាប់ពី២០០រូពី ទៅ២៥០រូពី និងអាស្រ័យតាមពេលវេលាកំណត់ ។ កាលពីឆ្នាំ២០១៨ អ្នកធ្វើការក្នុងអណ្តូងរ៉ែក្នុងទីក្រុង Panna បានរកឃើញពេជ្រស្មើទឹកប្រាក់១៥លានរូពី ប៉ុន្តែការរកឃើញពេជ្រនេះកម្រកើតឡើងណាស់ ៕

កូរ៉េខាងជើង៖ សេដ្ឋកិច្ចរបស់កូរ៉េខាងជើងបច្ចុប្បន្នគឺមានការកើនឡើងខ្លាំងមិនគួរឱ្យជឿរហូតដល់ ៣.១% ដែលចំនួននេះគឺខ្ពស់បំផុតចាប់តាំងពីឆ្នាំ ២០១២។
បើយោងតាមការប៉ាន់ស្មានរបស់ធនាគារកណ្តាលកូរ៉េ (BOK) បានឱ្យដឹងថា បន្ទាប់ពីការធ្លាក់ចុះរយៈពេលបីឆ្នាំជាប់ៗគ្នា សេដ្ឋកិច្ចរបស់ប្រទេសកូរ៉េខាងជើងក៏បានកើនឡើងយ៉ាងខ្លាំងម្តងទៀតកាលពីឆ្នាំមុនរហូតមកដល់ឆ្នាំនេះ ដោយសារការកើនឡើងនៃពាណិជ្ជកម្មជាមួយប្រទេសចិន បន្ទាប់ពីវិធានការត្រួតពិនិត្យព្រំដែនក្នុងអំឡុងពេលជំងឺរាតត្បាតត្រូវបានបន្ធូរបន្ថយ។

យោងតាម Reuters ការប៉ាន់ស្មានរបស់ BOK គឺជាសូចនាករដ៏គួរឱ្យទុកចិត្តបំផុតមួយនៃសកម្មភាពសេដ្ឋកិច្ចនៅក្នុងប្រទេសកូរ៉េខាងជើង។ មន្ត្រី BOK បាននិយាយថា ទោះបីជាការដាក់ទណ្ឌកម្មនៅតែមាន ប៉ុន្តែសេដ្ឋកិច្ចរបស់ប្រទេសនេះគឺនៅតែកើនឡើងខ្លាំងដោយសារតែការបន្ធូរបន្ថយការរឹតបន្តឹងទាក់ទងនឹង Covid រួមទាំងការកើនឡើងពាណិជ្ជកម្មជាមួយប្រទេសចិន និងលក្ខខណ្ឌអាកាសធាតុអំណោយផល។ ក្នុងឆ្នាំ ២០២៣ ទំហំពាណិជ្ជកម្មរបស់កូរ៉េខាងជើងកើនឡើង ៧៤,៦% ដល់ ២,៧៧ ពាន់លានដុល្លារ ដែលក្នុងនោះពាណិជ្ជកម្មទ្វេភាគីរវាងកូរ៉េខាងជើង និងចិនមានការកើនឡើងរហូតដល់ ៩៨,៣%។

ការនាំចេញក៏បានកើនឡើង ១០៤.៥% ដែលនាំមុខដោយស្បែកជើង មួក និងសក់ពាក់ ខណៈដែលការនាំចូលកើនឡើង ៧១.៣% ជាមួយនឹងតម្រូវការជីកើនឡើង។ នៅឆ្នាំដដែលឧស្សាហកម្មមាន ៣០.៧% នៃរចនាសម្ព័ន្ធសេដ្ឋកិច្ចរបស់ប្រទេសកូរ៉េខាងជើង ខណៈដែលវិស័យកសិកម្ម និងសំណង់មានចំនួន ២២% និង ១១% រៀងគ្នា។ ទិន្នផលឧស្សាហកម្មបានកើនឡើង ៤.៩% ដែលជាល្បឿនលឿនបំផុតក្នុងរយៈពេលប្រាំពីរឆ្នាំ ដែលដឹកនាំដោយការផលិតទំនិញដែក និងសក់ពាក់។ វិស័យសំណង់ក៏បានកើនឡើង ៨.២% ដែលជាល្បឿនលឿនបំផុតចាប់តាំងពីឆ្នាំ ២០០២ ដោយសារគម្រោងលំនៅដ្ឋានជាច្រើនដែលកំពុងត្រូវបានអនុវត្ត។

ហេតុនេះប្រាក់ចំណូលបន្ទាប់បន្សំរបស់កូរ៉េខាងជើងសម្រាប់មនុស្សម្នាក់ក្នុងឆ្នាំ ២០២៣ ត្រូវបានគេប៉ាន់ប្រមាណថាមានចំនួន ១.៥៩ លានវ៉ុន (ប្រមាណជាង ១ ពាន់ដុល្លារអាមេរិក) ។ កន្លងទៅសេដ្ឋកិច្ចរបស់ប្រទេសកូរ៉េខាងជើងបានធ្លាក់ចុះ ០.២% ក្នុងឆ្នាំ ២០២២, និង ០.១% ក្នុងឆ្នាំ ២០២១ ក៏ដូចជា ៤.៥% ក្នុងឆ្នាំ ២០២០ ចំពេលមានការរឹតបន្តឹងទាក់ទងនឹង Covid-19 និងការដាក់ទណ្ឌកម្មរបស់អង្គការសហប្រជាជាតិ។ ទោះជាយ៉ាងណាបើយោងតាម BOK បានវាយតម្លៃថានៅឆ្នាំ ២០២៤ នេះសេដ្ឋកិច្ចរបស់ប្រទេសកូរ៉េខាងជើងគឺបានកើនឡើង ដោយសារការស្ទុះងើបឡើងវិញនៅឆ្នាំ ២០២៣ ក៏ដូចជាលទ្ធភាពនៃកំណើនបន្ថែមទៀតនៅក្នុងពាណិជ្ជកម្មជាមួយប្រទេសចិន និងការពង្រីកកិច្ចសហប្រតិបត្តិការសេដ្ឋកិច្ចជាមួយរុស្ស៊ី៕

កាលពីថ្ងៃទី២៦ ខែកក្កដា ឆ្នាំ២០២៤ ភ្នាក់ងារឧតុនិយមជប៉ុនប្រកាសថា មានភ្លៀងធ្លាក់ខ្លាំងនៅតំបន់ Tohoku ជាពិសេស នៅខេត្តអាគីតាក់ និងខេត្តយ៉ាម៉ាកាតាក់ ។ ភ្លៀងធ្លាក់ខ្លាំងនេះ ដោយសារអាកាសធាតុប្រែប្រួលនៅរដូវវស្សា ហើយធ្វើឱ្យប្រទេសជប៉ុនមានភ្លៀងធ្លាក់ខ្លាំង រហូតដល់ថ្ងៃទី២៨ ខែកក្កដា ។

ក្រៅពីនេះ ភ្នាក់ងារឧតុនិយមជប៉ុនក៏បានប្រកាសឱ្យពលរដ្ឋរស់នៅក្នុងតំបន់នេះប្រុងប្រយ័ត្នគ្រោះថ្នាក់ដោយសារការបាក់ដី, ទឹកជំនន់ក្នុងតំបន់ទំនាប និងកម្រិតទន្លេកើនឡើងខ្ពស់ ដោយសារភ្លៀងធ្លាក់ជាបន្តបន្ទាប់ផងដែរ ។

កន្លងមក កាលពីថ្ងៃទី១២ ខែកក្កដា អាកាសធាតុមិនល្អបានធ្វើឱ្យភាគខាងលិចប្រទេសជប៉ុនប្រឈមនឹងភ្លៀងធ្លាក់ខ្លាំងជាបន្តបន្ទាប់ ដែលបណ្តាលឱ្យមានទឹកជំនន់ និងបាក់ដី ។ អាជ្ញាធរជប៉ុននិយាយថា ហេតុការណ៍នេះធ្វើឱ្យមនុស្សបាត់ខ្លួនចំនួន៣នាក់ ។

អាជ្ញាធរទីក្រុងម៉ាស៊ិយ៉ាម៉ាក់ ខេត្តអ៊ីហ៊ិមិ របស់ជប៉ុននិយាយថា មានហេតុការណ៍បាក់ដីកើតឡើងបង្កផលប៉ះពាល់ដល់ផ្ទះសម្បែងពលរដ្ឋ និងបណ្តាលឱ្យបំពង់បង្ហូរឧស្ម័នបែក ។ ភ្នាក់ងារឧតុនិយមជប៉ុនប្រកាសថា មានភ្លៀងធ្លាក់ខ្លាំងនៅភាគខាងលិច ព្រមទាំងសំណូមពរឱ្យពលរដ្ឋប្រុងប្រយ័ត្នករណីបាក់ដី និងទឹកជំនន់ ។

ដោយឡែក នៅប្រទេសនេប៉ាល់ ភ្នាក់ងារសង្គ្រោះបានស្វែងរកអ្នកដំណើរបាត់ខ្លួន យ៉ាងហោចណាស់ ៦២នាក់ ក្រោយការបាក់ដីធ្វើឱ្យរថយន្តក្រុង២គ្រឿងធ្លាក់ចូលក្នុងទឹកកំពុងហូរខ្លាំង ។ គេរាយការណ៍ថា មានអ្នកដំណើរតែ៣នាក់ប៉ុណ្ណោះនៅរស់រានមានជីវិត ដោយសារពួកគេបានលោតចុះពីលើរថយន្តក្រុង មុនពេលធ្លាក់ចូលទឹក ។ គ្រោះទឹកជំនន់ និងបាក់ដីនៅនេប៉ាល់ ធ្វើឱ្យមនុស្សស្លាប់យ៉ាងហោចណាស់ ៩១នាក់ គិតចាប់ពីពាក់កណ្តាលខែមិថុនា ឆ្នាំ២០២៤ ។

ចំណែកនៅទីក្រុងដឺកាសឺវីល ស្ថិតនៅភាគកណ្តាលប្រទេសបារាំងឯណោះវិញ ក៏មានភ្លៀងធ្លាក់ខ្លាំង និងទឹកជំនន់ផងដែរ ដោយសារឥទ្ធិពលខ្យល់ព្យុះរដូវក្តៅ ព្រមទាំងមានព្រិលធ្លាក់ក្នុងតំបន់មួយចំនួន ។ វាបណ្តាលឱ្យខូចខាតអគារ និងយានជំនិះអស់ជាច្រើនគ្រឿង ។ បើតាមសេចក្តីរាយការណ៍ថា ចរន្តអគ្គិសនីបានដាច់ក្នុងតំបន់ជាច្រើន និងបណ្តាលឱ្យផ្ទះសម្បែងពលរដ្ឋប្រមាណ៨ពាន់ខ្នងគ្មានអគ្គិសនីប្រើប្រាស់ កាលពីយប់ថ្ងៃទី១១ ខែកក្កដា ឆ្នាំ២០២៤ ។

ដូចគ្នានេះ នៅប្រទេសស្លូវ៉ាគី មានភ្ញៀវទេសចរចំនួន២នាក់ស្លាប់ ក្រោយមានទឹកជំនន់ភ្លាមៗនៅតំបន់ភ្នំខ្ពស់ឈ្មោះ ហាយស្តាដ្រា កាលពីថ្ងៃទី១១ ខែកក្កដា ។ ភ្លៀងបានធ្លាក់ខ្លាំងនៅភាគកណ្តាលប្រទេសស្លូវ៉ាគី ធ្វើឱ្យទឹកជន់លិចក្នុងតំបន់ជាច្រើន ។ អាជ្ញាធរស្លូវ៉ាគីនិយាយថា ភ្ញៀវទេសចរ១៦នាក់បានលាក់ខ្លួននៅទីជម្រកបណ្តោះអាសន្ន ប៉ុន្តែត្រូវបានទឹកហូរលិចជម្រកបណ្តោះនេះ ។

ហេតុការណ៍នេះបណ្តាលឱ្យភ្ញៀវទេសចររងរបួស៤នាក់ និង២នាក់ទៀតស្លាប់ ។ ស្ត្រីអ្នកនាំពាក្យរបស់ភ្នាក់ងារសង្គ្រោះ ដែលបានជួយជម្លៀសភ្ញៀវទេសចររងរបួសនៅស្លូវ៉ាគី និយាយថា បានបញ្ជូនអ្នករងរបួសមានមនុស្សចាស់៣នាក់ និងក្មេងម្នាក់ទៅកាន់មន្ទីរពេទ្យក្នុងតំបន់ ។

រីឯនៅភូមិមួយក្នុងរដ្ឋ New Mexico ស្ថិតនៅភាគនិរតីសហរដ្ឋអាមេរិក ក៏មានភ្លៀងធ្លាក់ខ្លាំងកើតទឹកជំនន់ផងដែរ ។ ទឹកជំនន់ហូរពីជួរភ្នំមានសភាពល្អក់យ៉ាងខ្លាំងដូចភក់ ហើយវាហូរឆ្លងកាត់តាមផ្ទះរបស់ពលរដ្ឋជាច្រើនខ្នង ៕

នេះជាលើកដំបូងហើយក្នុងរយៈពេល ១០០ ឆ្នាំដែលទីក្រុងប៉ារីសរបស់ប្រទេសបារាំង បានទទួលសិទ្ធរៀបចំព្រឹត្តិការណ៍កីឡាអូឡាំពិករដូវក្តៅឆ្នាំ ២០២៤។ កន្លងទៅប្រទេសបារាំងធ្លាប់បានរៀបចំព្រិត្តិការណ៍នេះចំនួន ២ ដងរួចមកហើយ ដោយលើកដំបូងនៅឆ្នាំ ១៩០០ ហើយលើកទីពីរនៅឆ្នាំ ១៩២៤។ ប៉ុន្តែមួយសតវត្សរ៍ក្រោយមក ទើបប្រទេសបារាំងមានឱកាសធ្វើជាម្ចាស់ផ្ទះរៀបចំព្រឹត្តិការណ៍កីឡាពិភពលោកនេះជាថ្មីម្តងទៀត។ ដូច្នេះសរុបមកដល់ពេលនេះបារាំងបានក្លាយជាម្ចាស់ព្រឹត្តិការណ៍កីឡាអូឡាំពិកចំនួន ៣ ដងហើយ។

ព្រឹត្តិការណ៍កីឡាអូឡាំពិកបានចាប់ផ្តើមសម្ពោធជាផ្លូវការកាលពីល្ងាចថ្ងៃទី ២៦ ខែកក្កដា ឆ្នាំ២០២៤ នៅដងទន្លេ Seine ដែលជាបេះដូងនៃទីក្រុងប៉ារីសប្រទេសបារាំង។ នេះក៏ជាលើកដំបូងដែរ ដែលកម្មវិធីបើកសម្ពោធផ្លូវការ ត្រូវបានរៀបចំនៅបរិវេណខាងក្រៅពហុកីឡាដ្ឋាន។ ពិធីនេះមានរយៈពេលជិត ៤ ម៉ោង ដោយនឹងចាប់ផ្តើមដើរក្បួនពីស្ពាន Austerlitz ទៅកាន់ស្ពាន Iena ដែលជាកន្លែងទីលាន Trocadero ដ៏ធំបំផុតមួយ។ នៅតាមដងទន្លេកន្លែងអមសងខាង មានរៀបចំឆាកពិធីសម្តែងសិល្បៈ និងកន្លែងអង្គុយសម្រាប់ទស្សនិកជននិងថ្នាក់ដឹកនាំ។

ក្នុងនោះមានសិល្បករជាង ២ ពាន់នាក់ចូលរួមសម្តែង រួមទាំងមានតារាចម្រៀងលំដាប់ពិពភលោកជាច្រើននាក់ចូលរួមផងដែរដូចជា Céline Dion និង Lady Gaga ជាដើម។ កម្មពិធីនេះប្រព្រឹត្តិទៅយ៉ាងរលូន និងយ៉ាងមហាឱឡារិក អមដោយភ្លើងរំលេចពណ៌ប្លែកៗយ៉ាងប្រណិត នឹងត្រូវបាញ់បញ្ចាំងឡើងយ៉ាងច្រើនសន្ធឹកសន្ធាប់។ ព្រឹត្តិការណ៍អូឡាំពិកទីក្រុងប៉ារីសឆ្នាំ ២០២៤ នឹងប្រព្រឹត្តទៅចាប់ពីថ្ងៃទី ២៦ ខែកក្កដានេះតទៅរហូតដល់ថ្ងៃទី១១ សីហា ដោយមានអត្តពលិកចំនួន ១០,៥០០ នាក់ និងមានគណៈកម្មាធិការជាតិអូឡាំពិក ២០៦ នាក់ចូលរួម ក្នុងនោះមាន ៣២ មុខវិជ្ជា និង ៣២៩ វិញ្ញាសារ។ ក្នុងនោះកម្ពុជាយើងគឺមានអត្តពលិក ៣ នាក់ប៉ុណ្ណោះ ដែលចូលរួមព្រឹត្តិការណ៍កីឡាអូឡាំពិកនៅទីក្រុងប៉ារីស។

គួរបញ្ជាក់ដែរថា កីឡាអូឡាំពិកគឺជាប្រភេទកីឡាអន្តរជាតិចម្រុះដែលត្រូវបានបែងចែកជាពីរព្រឹត្តិការណ៍គឺ ព្រឹត្តិការណ៍កីឡាអូឡាំពិករដូវក្តៅ និងព្រឹត្តិការណ៍កីឡាអូឡាំពិករដូវរងារ។ ព្រឹតិ្តការណ៍ទាំងពីរនេះត្រូវបានប្រារព្ធឡើងជារៀងរាល់បួនឆ្នាំម្តង ប៉ុន្តែក្រោយមកវាក៏ត្រូវផ្លាស់ប្តូរមកត្រឹម ២ ឆ្នាំម្តងវិញ។ កាលពីឆ្នាំ ២០២០ ទីក្រុងតូក្យូរបស់ប្រទេសជប៉ុនគឺជាម្ចាស់ព្រឹត្តិការណ៍កីឡាអូឡាំពិក ហើយនៅឆ្នាំ ២០២២ ទីក្រុងប៉េកាំងរបស់ប្រទេសចិនគឺជាម្ចាស់ព្រឹត្តិការណ៍កីឡាអូឡាំពិកនេះ។ កីឡាអូឡាំពិកត្រូវបានកត់ត្រាទុកដំបូងក្នុងឆ្នាំ ៧៧៦ មុនគ.ស ក្នុងទីក្រុងអូឡាំព្យ៉ានៃប្រទេសក្រិច ហើយត្រូវបានបង្កើតជាផ្លូវការនៅឆ្នាំ ១៨៩៦ ដូច្នេះប្រទេសក្រិកគឺជាប្រភពកំណើតដើមរបស់កីឡាអូឡាំពិកនេះ៕

ប្រទេសឥណ្ឌា ៖ បុរសឥណ្ឌាម្នាក់ស្ទើរតែក្លាយជាចំណីរបស់ពស់ថ្លាន់យក្ស ដោយសារវារឹតខ្លួន និងកបុរសរូបនេះយ៉ាងណែន ពេលកំពុងអង្គុយដោះទុក្ខសត្វពុំទាន់រួចរាល់ ។ ប៉ុន្តែសំណាងល្អ មានមនុស្សម្នាឃើញហេតុការណ៍នេះ និងនាំគ្នាជួយសង្គ្រោះជីវិតជនរងគ្រោះទាន់ពេលវេលា ។

កាលពីថ្ងៃទី២៦ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា មានហេតុការណ៍គួរឱ្យរន្ធត់មួយកើតឡើងនៅទីក្រុងចាបាលប៉ូ រដ្ឋម៉ាត់ថាយៈប្រាថេត ប្រទេសឥណ្ឌា គឺពស់ថ្លាន់យក្ស១ក្បាលព្យាយាមលេបបុរសម្នាក់ជាចំណី ។ វាព្យាយាមរឹតជុំវិញខ្លួនបុរសរូបនេះយ៉ាងណែន ខណៈពេលកំពុងអង្គុយដោះទុក្ខសត្វក្នុងព្រៃ ។

អ្នកភូមិរៀបរាប់ថា នៅថ្ងៃកើតហេតុ បុរសខាងលើបានមកធ្វើស្រែ ស្រាប់តែចុកពោះភ្លាមៗ ទើបចូលបន្ទោរបង់ក្នុងព្រៃ ។ ប៉ុន្តែពេលលោកបម្រុងអង្គុយចុះ និងស្រាតខោពុំទាន់រួចផង ស្រាប់តែមានពស់ថ្លាន់យក្ស១ក្បាលមករឹតខ្លួន និងក ។

វីដេអូនេះត្រូវបានថតដោយអ្នកភូមិដែលឃើញហេតុការណ៍ កាលពីថ្ងៃទី២២ ខែកក្កដា ឆ្នាំ២០២៤ ក្រោយពីអ្នកភូមិឮសំឡេងបុរសខាងលើស្រែកឱ្យជួយ ។ ភ្លាមនោះ អ្នកភូមិក៏ជួយគ្នាទាញពស់ចេញពីរាងកាយបុរសរូបនេះ ប៉ុន្តែពស់កាន់តែព្យាយាមរឹតកកាន់តែខ្លាំងជាងមុន ។ ហេតុនេះ ដោយសារពស់រឹតខ្លាំងពេក អ្នកភូមិពុំអាចទាញពស់ចេញពីរាងកាយជនរងគ្រោះបានទេ ទើបអ្នកភូមិម្នាក់យកពូថៅមកកាប់ពស់តែម្តង ។

សារព័ត៌មានឥណ្ឌារាយការណ៍ថា អ្នកភូមិបានកាប់ពស់ថ្លាន់ដាច់ពីគ្នា ប៉ុន្តែវានៅតែពុំព្រមដោះលែងបុរសរូបនេះ ។ សំណាងល្អ អ្នកភូមិក៏អាចជួយបុរសរូបនេះបាននាពេលបន្ទាប់ និងបញ្ជូនទៅព្យាបាលនៅមន្ទីរពេទ្យ ។ គេចាត់ទុកថា វាជាពស់មានគ្រោះថ្នាក់បំផុតលើពិភពលោក និងអាចសម្លាប់មនុស្សបាន ។

នេះពុំមែនជាលើកដំបូងទេ ដែលពស់បានលេបមនុស្សជាចំណី ។ កាលពីឆ្នាំ២០២២ នៅប្រទេសឥណ្ឌូណេស៊ី ក៏មានពលរដ្ឋម្នាក់បាត់ខ្លួនផងដែរ ក្នុងអំឡុងពេលប្រមូលជ័រកៅស៊ូក្នុងចម្ការកៅស៊ូ ហើយ២ថ្ងៃក្រោយមក អ្នកភូមិក៏បានឃើញពស់ថ្លាន់នៅក្បែរនោះ ក្រោយពីវាលេបមនុស្សរួចរាល់ ។ ពស់ថ្លាន់នោះបានចំណាយពេលរឹតមនុស្សប្រមាណ២ម៉ោង មុនពេលមនុស្សស្លាប់ ។

ហេតុការណ៍មួយទៀតក៏កើតឡើងនៅឥណ្ឌូណេស៊ីដែរ គឺកាលពីថ្ងៃទី៦ ខែមិថុនា ឆ្នាំ២០២៤ ស្ត្រីម្នាក់អាយុ៥០ឆ្នាំ ដែលមានកូន៤នាក់ បានបាត់ខ្លួនពេលដើរក្នុងព្រៃ ។ ក្រោយមក គេបានឃើញសាកសពស្ត្រីរូបនេះនៅក្នុងពោះរបស់ពស់ថ្លាន់យក្សប្រវែង៦ម៉ែត្រ ហើយអ្នកភូមិបានជួយគ្នាវះពោះសត្វពស់ ដើម្បីយកសាកសពចេញ ៕

Mr Bean តារាកំប្លែងក្រមិចក្រមើមជើងចាស់មួយរូប ប្រចាំទូរទស្សន៍អង់គ្លេស ដែលមានឈ្មោះពិតប្រាកដថា Rowan Atkinson។ គាត់កើតនៅថ្ងៃទី ៦ ខែមករា ឆ្នាំ១៩៥៥ ខណៈសព្វថ្ងៃនេះ គាត់កំពុងស្ថិតនៅក្នុងវ័យ ៦៩ឆ្នាំហើយ។ Mr Bean បានចូលសម្តែងនៅលើកញ្ចក់ទូរទស្សន៍ដំបូងអំឡុងឆ្នាំ ១៩៩០ និងទទួលបាននូវភាពល្បីល្បាញតាំងពីពេលនោះមករហូតមកដល់បច្ចុប្បន្ន។

ខ្សែភាពយន្តរបស់គាត់ជាច្រើនក៏បានលេចចេញមក ទាំងសម្តែងដោយគាត់ផ្ទាល់ ក៏ដូចជាចម្លងចេញជាភាពយន្តគំនូជីវចល Mr Bean ជាហូរហែរផងដែរ។ ជាមួយនឹងភាពលេចធ្លោរបស់គាត់ សម្ភារៈផ្សេងៗជាអត្តសញ្ញាណរបស់ Mr Bean ក៏បានដាក់លក់នៅលើទីផ្សារ ក៏ទទួលបាននូវការគាំទ្រព្រោងព្រាត មានដូចជាអាវរូប Mr Bean ,របស់របរប្រើប្រាស់,សៀវភៅ, និងតុក្ខតា Teddy របស់គាត់ជាដើម។

រូបភាពចែកចាយពីបណ្តាញសង្គមនិងកំពុងតែល្បីល្បាញយ៉ាងខ្លាំងក្នុងអំឡុងពេលនេះ គឺ Mr Bean ត្រូវបានគេប្រទះឃើញថាកំពុងដេកនៅគ្រែ និងមានសភាពធ្ងន់ធ្ងរយ៉ាងខ្លាំង ទើបបណ្តាលឲ្យមហាជនភាគច្រើនបានសម្តែងនៅការព្រួយបារម្ភពីបញ្ហាសុខភាពរបស់គាត់។

ជាការឆ្លើយតបរហ័ស ក្រុមអ្នកពិនិត្យក៏បានបើកការស៊ើបសង្កេតបានឲ្យដឹងថា រូបភាពមួយនេះ តាមពិតទៅគឺជារូបភាព AI ទេ និងជាព័ត៌មានក្លែងក្លាយ ព្រោះថាបច្ចុប្បន្ននេះ Mr Bean នៅមានសុខភាពល្អជាធម្មតា។

គួរបញ្ជាក់ដែរថា កាលពីថ្ងៃទី ១០ ខែកក្កដា ឆ្នាំ២០២៤នេះ លោក Atkinson ឬ Mr Bean ត្រូវបានគេប្រទះឃើញនៅក្នុងបទសម្ភាសន៍មួយ ដែលលោកបានបង្ហាញខ្លួននៅក្នុងព្រឹត្តិការណ៍ប្រណាំងរថយន្ត Formula One ហើយមើលទៅលោកពិតជាមានសុខភាពល្អ ស្មារតីរឹងមាំ និងមិនមានរោគសញ្ញាបញ្ជាក់ថាលោកកំពុងតែឈឺឡើយ៕