បរទេស៖ ប្រទេសម៉ាឡេស៊ីបានរៀបចំកម្មវិធីដំណើរទេសចរណ៍ទុរេនចំនួន ៦២ តំបន់ទូទាំងប្រទេស ដែលលាតសន្ធឹងក្នុងរដ្ឋចំនួន ១២ រួមទាំងការទស្សនា ការធ្វើម្ហូប និងបទពិសោធន៍រមណីយដ្ឋានថ្មីៗ ដើម្បីទាក់ទាញភ្ញៀវជាតិ និងអន្តរជាតិ។
នេះបើយោងតាមការចុះផ្សាយរបស់ The Star បានឱ្យដឹងថា កម្មវិធី “ទេសចរណ៍ទុរេន ២០២៤-២០២៥” ត្រូវបានគេស្គាល់ថាជា “ព្រះរាជាណាចក្រនៃផ្លែឈើ” ដែលដំណើរកម្សាន្តទាំងនេះមិនត្រឹមតែផ្តោតទៅលើការរីករាយជាមួយទុរេនប៉ុណ្ណោះទេ ប៉ុន្តែថែមទាំងរួមបញ្ចូលជាមួយសកម្មភាពជាច្រើនដូចជា ពិកនិក សម្រាកលំហែកាយក្នុងព្រៃ ឬការចូលរួមក្នុងសកម្មភាពកម្សាន្តថ្មីៗ និងការរុករកជាដើម។

សម្រាប់កញ្ចប់ដំណើរកម្សាន្តពិសេសមានពីរគឺ៖ ទីមួយដំណើរកម្សាន្តរយៈពេលបីថ្ងៃពីរយប់ និងទីពីរដំណើរកម្សាន្តរយៈពេលពីរថ្ងៃមួយយប់។ សម្រាប់ដំណើរកម្សាន្តទីមួយ នៅពេលថ្ងៃភ្ញៀវអាចទទួលបាននូវបទពិសោធន៍ជាមួយរសជាតិទុរេនក្នុងស្រុក ទឹកឃ្មុំស្រស់ និងអាហារថ្ងៃត្រង់បែបប្រពៃណីម៉ាឡេស៊ីនៅមាត់ទន្លេ រួមទាំងការស្នាក់នៅក្នុងខ្ទមព្រៃទំនើប បូករួមដំណើរកម្សាន្តពេញមួយថ្ងៃទៅកាន់សួនធុរេន Musang King នៅស្រុក Raub រួមផ្សំនឹងការជិះឡានខ្សែកាប Skyway ទៅកាន់ Genting Highlands ។ រីឯដំណើរកម្សាន្តទីពីរវិញភ្ញៀវអាចធ្វើការទស្សនាសត្វឥន្ទ្រី ក៏ដូចជាការជិះទូកតាមដងទន្លេ Firefly River ការមើលឆ្នេរសមុទ្រ Sky Mirror និងការកម្សាន្តទុរេននៅតាមដងផ្លូវ។

លើសពីនេះភ្ញៀវក៏អាចទទួលបានបទពិសោធន៍នៃការញ៉ាំទុរេនស្រស់ៗបែបធម្មជាតិនៅហាងដ៏ល្បីល្បាញ រួមទាំងការជិះទូកនៅមាត់ទន្លេ និងការដើរលេងក្នុងព្រៃជាដើម។ ដូច្នេះសម្រាប់ដំណើរកម្សាន្តគឺមានតម្លៃចាប់ពី ១៥ ទៅ ៤០ ដុល្លារក្នុងមនុស្សម្នាក់ អាស្រ័យលើថ្ងៃ ឬដំណើរកម្សាន្ត ប្រសិនបើភ្ញៀវធ្វើដំណើរជាក្រុមគឺមានតម្លៃចាប់ពី ៨០ ទៅ ២៥៥ ដុល្លារក្នុងមួយក្រុមដែលមានសមាជិកពី ២ ទៅ ៨ នាក់។ លោក Akbal Setia ប្រធានក្រុមប្រឹក្សាផ្សព្វផ្សាយទេសចរណ៍ម៉ាឡេស៊ីបានអត្ថាធិប្បាយថាការចាប់ផ្តើមនៃកញ្ចប់ទេសចរណ៍ទាំងនេះបង្ហាញពីការរីកលូតលាស់យ៉ាងខ្លាំងនៃប្រជាប្រិយភាពរបស់ផ្លែទុរេនម៉ាឡេស៊ី និងទេសចរណ៍ធ្វើម្ហូប។

បច្ចុប្បន្នទេសចរណ៍ទុរេនមានកំណើនខ្លាំងក្នុងប្រទេសម៉ាឡេស៊ី ជាពិសេសក្នុងរដូវច្រូតកាត់ពីចុងខែឧសភាដល់ខែសីហា។ លោក Setia ក៏បានបន្តទៀតថា “ជាមួយនឹងកញ្ចប់ដំណើរទេសចរណ៍ថ្មី ប្រទេសនេះបានផ្តល់ឱ្យអ្នកធ្វើដំណើរនូវឱកាសពិសេសមួយដើម្បីជ្រមុជខ្លួននៅក្នុងប្រពៃណីរបស់ខ្លួន”។ ទុរេនដែលមានក្លិនក្រអូបប្លែក និងសំបកមានស្នាមជ្រីវជ្រួញ ជាកន្លែងពិសេសមួយក្នុងវប្បធម៌ម៉ាឡេស៊ី ជាមួយនឹងដំណើរទេសចរណ៍ដែលបានប្រកាសកាលពីពេលថ្មីៗនេះ ម៉ាឡេស៊ីបានអញ្ជើញអ្នកទេសចរឱ្យចូលរួមក្នុងរលកថ្មីនៃទេសចរណ៍វប្បធម៌ និងធ្វើម្ហូប។

ឧស្សាហកម្មទេសចរណ៍របស់ប្រទេសនេះគ្រោងនឹងលក់ទុរេនទេសចរណ៍ប្រហែល ២ លានប្រភេទខុសៗគ្នាក្នុងឆ្នាំ ២០២៤ និង ២០២៥ ជាមួយនឹងតម្លៃទាបបំផុតចាប់ពី ១៥ ដុល្លារ ដោយសង្កត់ធ្ងន់លើប្រជាប្រិយភាព និងគុណភាពនៃកញ្ចប់ទេសចរណ៍ទាំងនេះ។ ដូច្នេះប្រសិនបើភ្ញៀវទេសចរចង់ស្វែងរកព័ត៌មានលម្អិតអំពីផលិតផលទេសចរណ៍ទុរេន អាចចូលទៅកាន់គេហទំព័ររបស់នាយកដ្ឋានផ្សព្វផ្សាយទេសចរណ៍ម៉ាឡេស៊ី៕

បន្ទាប់ពី EV ដែលជារថយន្តអគ្គិសនីបានវ៉ាដាច់រថយន្តសាំង ធ្វើឱ្យរថយន្តសាំងប្រឈមមុខនឹងការធ្លាក់ចុះយ៉ាងខ្លាំងនៅក្នុងទីផ្សារពិភពលោក Hybrid ដែលជាប្រភេទរថយន្តកូនកាត់កាលពីពេលថ្មីនេះ ក៏បានវ៉ាដាច់រថយន្តអគ្គិសនីវិញម្តង ដែលធ្វើឱ្យរថយន្តអគ្គិសនីបច្ចុប្បន្នជួបប្រទះនឹងការប្រកួតប្រជែងយ៉ាងធ្ងន់ធ្ងរបំផុត។ ទោះបីជា EV មានការពេញនិយមខ្លាំងយ៉ាងណាក៏ដោយ ក៏ Hybrid នៅតែមានប្រជាប្រិយភាពជាង ដោយសារវាមានគុណសម្បត្តិច្រើន សក្តិសមសម្រាប់អ្នកដែលចង់សន្សំសំចៃ។

នៅក្នុងទីផ្សារសកល ការលក់រថយន្តកូនកាត់កំពុងទទួលបានភាពជោគជ័យខ្លាំង ខណៈការលក់រថយន្តអគ្គិសនីវិញបច្ចុប្បន្នគឺមានការធ្លាក់ចុះ។ លក្ខណៈពិសេសដែលមនុស្សភាគច្រើនសម្រេចជ្រើសរើស Hybrid ជំនួសឱ្យ EV គឺដោយសារហេតុផលដូចជាតម្លៃសមរម្យ ងាយស្រួលប្រើប្រាស់ មិនចាំបាច់បារម្ភអំពីស្ថានីយ៍សាក ព្រោះរថយន្ត Hybrid ត្រូវបានគេចាត់ទុកថាជារថយន្តកូនកាត់រវាងរថយន្តចំហេះ និងរថយន្តអគ្គិសនី ពោលគឺវាមានអត្រាប្រើប្រាស់ទាបជាងរថយន្តចំហេះសុទ្ធ។

ដូច្នេះក្នុងពេលជាមួយគ្នានេះ អ្នកប្រើប្រាស់មិនចាំបាច់ព្រួយបារម្ភអំពីការស្វែងរកកន្លែងសាកថ្មដូចរថយន្ត EV នោះទេ ព្រោះវាអាចបង្កើតការសាកថ្មដោយខ្លួនឯងបាន។ លើសពីនេះអ្នកក៏មិនចាំបាច់រង់ចាំការបញ្ចូលថ្មដែរ ខណៈរថយន្តអគ្គិសនីត្រូវការរង់ចាំរយៈពេលមួយម៉ោង។ ប៉ុន្តែរថយន្តកូនកាត់វិញមិនតម្រូវឱ្យអ្នកខ្ជះខ្ជាយពេលវេលារង់ចាំឡើយ ដោយសារវាមានថាមពលថ្មគ្រប់គ្រាន់ដើម្បីទៅដល់គោលដៅ ខណៈដែលរថយន្តកូនកាត់គ្រាន់តែត្រូវការបន្ថែមហ្គាស មិនខុសពីរថយន្តចំហេះធម្មតាទេ។

ជាមួយគ្នានេះក្រុមហ៊ុនផលិត Hybrid ជុំវិញពិភពលោកក៏មានប្រព័ន្ធអេកូដែលគ្របដណ្តប់លើការប្រើប្រាស់រថយន្តចាប់ពីថ្ងៃដំបូងរហូតដល់ថ្ងៃចុងក្រោយនៃការប្រើប្រាស់ផងដែរ។ ដូច្នេះជាបញ្ហានៃសេវាកម្មបន្ទាប់ពីការលក់ ការបម្រុងទុកគ្រឿងបន្លាស់ ចំនួនមជ្ឈមណ្ឌលសេវាកម្ម ចំពោះតម្លៃលក់បន្តគឺ មិនគួរឱ្យបារម្ភដូចរថយន្ត EV សព្វថ្ងៃនោះទេ។ គួរបញ្ជាក់ដែរថា រថយន្ត EV បច្ចុប្បន្នកំពុងស្ថិតក្នុងការកាត់បន្ថយតម្លៃ ដែលវាពិតជាមានផលប៉ះពាល់យ៉ាងធ្ងន់ធ្ងរទៅលើតម្លៃលក់បន្ត ដោយសារការលក់បន្តត្រូវបានកំណត់ចំពោះអ្នកទិញដែលមានចំនួនប្រាក់ច្រើន៕

ប្រទេសថៃ៖ រថភ្លើងបុរាណដែលគេបោះបង់ចោលត្រូវបានស្ដារឡើងវិញទៅជាសណ្ឋាគារដោយមានបន្ទប់ចំនួន ៤៥ និងមានភោជនីយដ្ឋានប្រណីតជាច្រើននៅក្នុងនោះ បានកំពុងទាក់ទាញការចាប់អារម្មណ៍យ៉ាងខ្លាំងពីសំណាក់ភ្ញៀវទេសចរបរទេស។
សណ្ឋាគាររថភ្លើងមានឈ្មោះថា InterContinental Khao Yai Resort ដែលមានទីតាំងនៅខេត្តនគររាជសីមា គឺជាមជ្ឈមណ្ឌលផ្លូវដែកដ៏សំខាន់មួយរបស់ប្រទេសថៃ។ សណ្ឋាគារនេះបានទាក់ទាញភ្ញៀវទេសចរជាតិ និងអន្តរជាតិរាប់សែននាក់ជារៀងរាល់ឆ្នាំ ឱ្យមកទស្សនានូវភាពសម្បូរបែប ប្លែកៗ និងភាពល្អប្រណីតនៅទីនោះ។

InterContinental Khao Yai Resort មានបន្ទប់សណ្ឋាគារ ភោជនីយដ្ឋាន បណ្ណាល័យសៀវភៅ សារៈមន្ទីដាក់តាំងនូវវត្ថុបុរាណ អាងហែលពណ៌ខៀវទឹកថ្លាឈ្វង់នៅទីធ្លាខាងក្រៅ គ្របដណ្តប់ដោយរុក្ខជាតិបៃតងអមសងខាង ខ្យល់អាកាសបរិសុទ្ធ និងមានរចនាសម្ព័ន្ធបែបទាន់សម័យ។ បន្ទប់សណ្ឋាគាររថភ្លើងនេះក៏មានរចនាបទបែបខ្មែរយើងផងដែរ ជាមួយនឹងពិដានដែលមានលំនាំយ៉ាងប្រណីត បន្ទប់ទឹកធ្វើពីមាស និងក្បាលក្តារដែលមានរាងដូចប៉មអង្គរវត្ត។

បន្ទប់នីមួយៗមានគ្រែពីរទាំងលើទាំងក្រោម សម្រាប់តម្លៃក្នុងមួយយប់ រួមទាំងអាហារពេលព្រឹកគឺជិត ៣០០ ដុល្លារអាមេរិក។ នៅទីនោះក្រៅពីម្ហូបថៃ ក៏មានម្ហូបបែបអឺរ៉ុបផងដែរ ហើយនៅជាប់ភោជនីយដ្ឋានក៏មានបន្ទប់ស្ប៉ាព្យាបាលដោយការម៉ាស្សាពិសេសមួយទៀតផង។ ក្រៅពីនេះក៏មានរថភ្លើងផ្សេងទៀត ដែលរចនាឡើងជាកន្លែងលេងរបស់កុមារ កន្លែងសម្រាប់រីករាយជាមួយការផឹកតែពេលរសៀល និងបារស្រាក្រឡុក។

នៅខាងក្រៅសណ្ឋាគាររថភ្លើងនេះគឺមានឧទ្យានជាតិដ៏ធំល្វឹងល្វើយ ដែលជាឧទ្យានចំណាស់ជាងគេរបស់ប្រទេសថៃ។ សម្រាប់អ្នកដែលចូលចិត្តភាពស្ងប់ស្ងាត់ ប្លែកៗ និងប្រវត្តិសាស្ត្រ អាចមកទស្សនានៅទីនេះ ព្រោះវាបានផ្តល់នូវបទពិសោធន៍ដ៏ល្អមួយ និងគួរឱ្យចាប់អារម្មណ៍បំផុត៕