នេះជាលើកដំបូងហើយក្នុងរយៈពេល ១០០ ឆ្នាំដែលទីក្រុងប៉ារីសរបស់ប្រទេសបារាំង បានទទួលសិទ្ធរៀបចំព្រឹត្តិការណ៍កីឡាអូឡាំពិករដូវក្តៅឆ្នាំ ២០២៤។ កន្លងទៅប្រទេសបារាំងធ្លាប់បានរៀបចំព្រិត្តិការណ៍នេះចំនួន ២ ដងរួចមកហើយ ដោយលើកដំបូងនៅឆ្នាំ ១៩០០ ហើយលើកទីពីរនៅឆ្នាំ ១៩២៤។ ប៉ុន្តែមួយសតវត្សរ៍ក្រោយមក ទើបប្រទេសបារាំងមានឱកាសធ្វើជាម្ចាស់ផ្ទះរៀបចំព្រឹត្តិការណ៍កីឡាពិភពលោកនេះជាថ្មីម្តងទៀត។ ដូច្នេះសរុបមកដល់ពេលនេះបារាំងបានក្លាយជាម្ចាស់ព្រឹត្តិការណ៍កីឡាអូឡាំពិកចំនួន ៣ ដងហើយ។

ព្រឹត្តិការណ៍កីឡាអូឡាំពិកបានចាប់ផ្តើមសម្ពោធជាផ្លូវការកាលពីល្ងាចថ្ងៃទី ២៦ ខែកក្កដា ឆ្នាំ២០២៤ នៅដងទន្លេ Seine ដែលជាបេះដូងនៃទីក្រុងប៉ារីសប្រទេសបារាំង។ នេះក៏ជាលើកដំបូងដែរ ដែលកម្មវិធីបើកសម្ពោធផ្លូវការ ត្រូវបានរៀបចំនៅបរិវេណខាងក្រៅពហុកីឡាដ្ឋាន។ ពិធីនេះមានរយៈពេលជិត ៤ ម៉ោង ដោយនឹងចាប់ផ្តើមដើរក្បួនពីស្ពាន Austerlitz ទៅកាន់ស្ពាន Iena ដែលជាកន្លែងទីលាន Trocadero ដ៏ធំបំផុតមួយ។ នៅតាមដងទន្លេកន្លែងអមសងខាង មានរៀបចំឆាកពិធីសម្តែងសិល្បៈ និងកន្លែងអង្គុយសម្រាប់ទស្សនិកជននិងថ្នាក់ដឹកនាំ។

ក្នុងនោះមានសិល្បករជាង ២ ពាន់នាក់ចូលរួមសម្តែង រួមទាំងមានតារាចម្រៀងលំដាប់ពិពភលោកជាច្រើននាក់ចូលរួមផងដែរដូចជា Céline Dion និង Lady Gaga ជាដើម។ កម្មពិធីនេះប្រព្រឹត្តិទៅយ៉ាងរលូន និងយ៉ាងមហាឱឡារិក អមដោយភ្លើងរំលេចពណ៌ប្លែកៗយ៉ាងប្រណិត នឹងត្រូវបាញ់បញ្ចាំងឡើងយ៉ាងច្រើនសន្ធឹកសន្ធាប់។ ព្រឹត្តិការណ៍អូឡាំពិកទីក្រុងប៉ារីសឆ្នាំ ២០២៤ នឹងប្រព្រឹត្តទៅចាប់ពីថ្ងៃទី ២៦ ខែកក្កដានេះតទៅរហូតដល់ថ្ងៃទី១១ សីហា ដោយមានអត្តពលិកចំនួន ១០,៥០០ នាក់ និងមានគណៈកម្មាធិការជាតិអូឡាំពិក ២០៦ នាក់ចូលរួម ក្នុងនោះមាន ៣២ មុខវិជ្ជា និង ៣២៩ វិញ្ញាសារ។ ក្នុងនោះកម្ពុជាយើងគឺមានអត្តពលិក ៣ នាក់ប៉ុណ្ណោះ ដែលចូលរួមព្រឹត្តិការណ៍កីឡាអូឡាំពិកនៅទីក្រុងប៉ារីស។

គួរបញ្ជាក់ដែរថា កីឡាអូឡាំពិកគឺជាប្រភេទកីឡាអន្តរជាតិចម្រុះដែលត្រូវបានបែងចែកជាពីរព្រឹត្តិការណ៍គឺ ព្រឹត្តិការណ៍កីឡាអូឡាំពិករដូវក្តៅ និងព្រឹត្តិការណ៍កីឡាអូឡាំពិករដូវរងារ។ ព្រឹតិ្តការណ៍ទាំងពីរនេះត្រូវបានប្រារព្ធឡើងជារៀងរាល់បួនឆ្នាំម្តង ប៉ុន្តែក្រោយមកវាក៏ត្រូវផ្លាស់ប្តូរមកត្រឹម ២ ឆ្នាំម្តងវិញ។ កាលពីឆ្នាំ ២០២០ ទីក្រុងតូក្យូរបស់ប្រទេសជប៉ុនគឺជាម្ចាស់ព្រឹត្តិការណ៍កីឡាអូឡាំពិក ហើយនៅឆ្នាំ ២០២២ ទីក្រុងប៉េកាំងរបស់ប្រទេសចិនគឺជាម្ចាស់ព្រឹត្តិការណ៍កីឡាអូឡាំពិកនេះ។ កីឡាអូឡាំពិកត្រូវបានកត់ត្រាទុកដំបូងក្នុងឆ្នាំ ៧៧៦ មុនគ.ស ក្នុងទីក្រុងអូឡាំព្យ៉ានៃប្រទេសក្រិច ហើយត្រូវបានបង្កើតជាផ្លូវការនៅឆ្នាំ ១៨៩៦ ដូច្នេះប្រទេសក្រិកគឺជាប្រភពកំណើតដើមរបស់កីឡាអូឡាំពិកនេះ៕

ប្រទេសឥណ្ឌា ៖ បុរសឥណ្ឌាម្នាក់ស្ទើរតែក្លាយជាចំណីរបស់ពស់ថ្លាន់យក្ស ដោយសារវារឹតខ្លួន និងកបុរសរូបនេះយ៉ាងណែន ពេលកំពុងអង្គុយដោះទុក្ខសត្វពុំទាន់រួចរាល់ ។ ប៉ុន្តែសំណាងល្អ មានមនុស្សម្នាឃើញហេតុការណ៍នេះ និងនាំគ្នាជួយសង្គ្រោះជីវិតជនរងគ្រោះទាន់ពេលវេលា ។

កាលពីថ្ងៃទី២៦ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា មានហេតុការណ៍គួរឱ្យរន្ធត់មួយកើតឡើងនៅទីក្រុងចាបាលប៉ូ រដ្ឋម៉ាត់ថាយៈប្រាថេត ប្រទេសឥណ្ឌា គឺពស់ថ្លាន់យក្ស១ក្បាលព្យាយាមលេបបុរសម្នាក់ជាចំណី ។ វាព្យាយាមរឹតជុំវិញខ្លួនបុរសរូបនេះយ៉ាងណែន ខណៈពេលកំពុងអង្គុយដោះទុក្ខសត្វក្នុងព្រៃ ។

អ្នកភូមិរៀបរាប់ថា នៅថ្ងៃកើតហេតុ បុរសខាងលើបានមកធ្វើស្រែ ស្រាប់តែចុកពោះភ្លាមៗ ទើបចូលបន្ទោរបង់ក្នុងព្រៃ ។ ប៉ុន្តែពេលលោកបម្រុងអង្គុយចុះ និងស្រាតខោពុំទាន់រួចផង ស្រាប់តែមានពស់ថ្លាន់យក្ស១ក្បាលមករឹតខ្លួន និងក ។

វីដេអូនេះត្រូវបានថតដោយអ្នកភូមិដែលឃើញហេតុការណ៍ កាលពីថ្ងៃទី២២ ខែកក្កដា ឆ្នាំ២០២៤ ក្រោយពីអ្នកភូមិឮសំឡេងបុរសខាងលើស្រែកឱ្យជួយ ។ ភ្លាមនោះ អ្នកភូមិក៏ជួយគ្នាទាញពស់ចេញពីរាងកាយបុរសរូបនេះ ប៉ុន្តែពស់កាន់តែព្យាយាមរឹតកកាន់តែខ្លាំងជាងមុន ។ ហេតុនេះ ដោយសារពស់រឹតខ្លាំងពេក អ្នកភូមិពុំអាចទាញពស់ចេញពីរាងកាយជនរងគ្រោះបានទេ ទើបអ្នកភូមិម្នាក់យកពូថៅមកកាប់ពស់តែម្តង ។

សារព័ត៌មានឥណ្ឌារាយការណ៍ថា អ្នកភូមិបានកាប់ពស់ថ្លាន់ដាច់ពីគ្នា ប៉ុន្តែវានៅតែពុំព្រមដោះលែងបុរសរូបនេះ ។ សំណាងល្អ អ្នកភូមិក៏អាចជួយបុរសរូបនេះបាននាពេលបន្ទាប់ និងបញ្ជូនទៅព្យាបាលនៅមន្ទីរពេទ្យ ។ គេចាត់ទុកថា វាជាពស់មានគ្រោះថ្នាក់បំផុតលើពិភពលោក និងអាចសម្លាប់មនុស្សបាន ។

នេះពុំមែនជាលើកដំបូងទេ ដែលពស់បានលេបមនុស្សជាចំណី ។ កាលពីឆ្នាំ២០២២ នៅប្រទេសឥណ្ឌូណេស៊ី ក៏មានពលរដ្ឋម្នាក់បាត់ខ្លួនផងដែរ ក្នុងអំឡុងពេលប្រមូលជ័រកៅស៊ូក្នុងចម្ការកៅស៊ូ ហើយ២ថ្ងៃក្រោយមក អ្នកភូមិក៏បានឃើញពស់ថ្លាន់នៅក្បែរនោះ ក្រោយពីវាលេបមនុស្សរួចរាល់ ។ ពស់ថ្លាន់នោះបានចំណាយពេលរឹតមនុស្សប្រមាណ២ម៉ោង មុនពេលមនុស្សស្លាប់ ។

ហេតុការណ៍មួយទៀតក៏កើតឡើងនៅឥណ្ឌូណេស៊ីដែរ គឺកាលពីថ្ងៃទី៦ ខែមិថុនា ឆ្នាំ២០២៤ ស្ត្រីម្នាក់អាយុ៥០ឆ្នាំ ដែលមានកូន៤នាក់ បានបាត់ខ្លួនពេលដើរក្នុងព្រៃ ។ ក្រោយមក គេបានឃើញសាកសពស្ត្រីរូបនេះនៅក្នុងពោះរបស់ពស់ថ្លាន់យក្សប្រវែង៦ម៉ែត្រ ហើយអ្នកភូមិបានជួយគ្នាវះពោះសត្វពស់ ដើម្បីយកសាកសពចេញ ៕

Mr Bean តារាកំប្លែងក្រមិចក្រមើមជើងចាស់មួយរូប ប្រចាំទូរទស្សន៍អង់គ្លេស ដែលមានឈ្មោះពិតប្រាកដថា Rowan Atkinson។ គាត់កើតនៅថ្ងៃទី ៦ ខែមករា ឆ្នាំ១៩៥៥ ខណៈសព្វថ្ងៃនេះ គាត់កំពុងស្ថិតនៅក្នុងវ័យ ៦៩ឆ្នាំហើយ។ Mr Bean បានចូលសម្តែងនៅលើកញ្ចក់ទូរទស្សន៍ដំបូងអំឡុងឆ្នាំ ១៩៩០ និងទទួលបាននូវភាពល្បីល្បាញតាំងពីពេលនោះមករហូតមកដល់បច្ចុប្បន្ន។

ខ្សែភាពយន្តរបស់គាត់ជាច្រើនក៏បានលេចចេញមក ទាំងសម្តែងដោយគាត់ផ្ទាល់ ក៏ដូចជាចម្លងចេញជាភាពយន្តគំនូជីវចល Mr Bean ជាហូរហែរផងដែរ។ ជាមួយនឹងភាពលេចធ្លោរបស់គាត់ សម្ភារៈផ្សេងៗជាអត្តសញ្ញាណរបស់ Mr Bean ក៏បានដាក់លក់នៅលើទីផ្សារ ក៏ទទួលបាននូវការគាំទ្រព្រោងព្រាត មានដូចជាអាវរូប Mr Bean ,របស់របរប្រើប្រាស់,សៀវភៅ, និងតុក្ខតា Teddy របស់គាត់ជាដើម។

រូបភាពចែកចាយពីបណ្តាញសង្គមនិងកំពុងតែល្បីល្បាញយ៉ាងខ្លាំងក្នុងអំឡុងពេលនេះ គឺ Mr Bean ត្រូវបានគេប្រទះឃើញថាកំពុងដេកនៅគ្រែ និងមានសភាពធ្ងន់ធ្ងរយ៉ាងខ្លាំង ទើបបណ្តាលឲ្យមហាជនភាគច្រើនបានសម្តែងនៅការព្រួយបារម្ភពីបញ្ហាសុខភាពរបស់គាត់។

ជាការឆ្លើយតបរហ័ស ក្រុមអ្នកពិនិត្យក៏បានបើកការស៊ើបសង្កេតបានឲ្យដឹងថា រូបភាពមួយនេះ តាមពិតទៅគឺជារូបភាព AI ទេ និងជាព័ត៌មានក្លែងក្លាយ ព្រោះថាបច្ចុប្បន្ននេះ Mr Bean នៅមានសុខភាពល្អជាធម្មតា។

គួរបញ្ជាក់ដែរថា កាលពីថ្ងៃទី ១០ ខែកក្កដា ឆ្នាំ២០២៤នេះ លោក Atkinson ឬ Mr Bean ត្រូវបានគេប្រទះឃើញនៅក្នុងបទសម្ភាសន៍មួយ ដែលលោកបានបង្ហាញខ្លួននៅក្នុងព្រឹត្តិការណ៍ប្រណាំងរថយន្ត Formula One ហើយមើលទៅលោកពិតជាមានសុខភាពល្អ ស្មារតីរឹងមាំ និងមិនមានរោគសញ្ញាបញ្ជាក់ថាលោកកំពុងតែឈឺឡើយ៕

សហរដ្ឋអាមេរិក ៖ នៅពេលក្រុមហ៊ុនកម្ចា.ត់ សត្វល្អិតសុំលែងសត្វល្អិតចំនួន១០០ក្បាលចូលក្នុងផ្ទះរបស់អ្នក ហើយពួកគេនឹងផ្តល់ប្រាក់ចំនួន២ពាន់ដុល្លារអាមេរិកឱ្យម្ចាស់ផ្ទះ តើអ្នកយល់ព្រមដែរឬទេ? The Pest Informer គឹជាក្រុមហ៊ុនកម្ចា.ត់ សត្វល្អិតនៅរដ្ឋ North Carolina សហរដ្ឋអាមេរិក និយាយថា ពួកគេនឹងផ្តល់ប្រាក់ឱ្យម្ចាស់ផ្ទះចំនួន២ពាន់ដុល្លារអាមេរិក ដើម្បីឱ្យពួកគេអាចលែងកន្លាតចំនួន១០០ក្បាលចូលក្នុងផ្ទះ ។

ការលែងកន្លាតជាច្រើនក្បាលនេះ គឺក្រុមហ៊ុនចង់សាកល្បងបច្ចេកទេសកម្ចាត់សត្វល្អិតតាមវិធីសាស្ត្រថ្មីបំផុត ពីព្រោះក្រុមហ៊ុនចង់សាកល្បងកម្ចាត់សត្វល្អិតនៅកន្លែងរស់នៅជាក់ស្តែង ហើយក្រុមហ៊ុនសន្យាថា នឹងព្យាយាមកម្ចាត់ពួកវាទាំងអស់ពីផ្ទះក្នុងរយៈពេលត្រឹមតែ៣០ថ្ងៃ ។ លើសពីនេះ ម្ចាស់ផ្ទះត្រូវអនុញ្ញាតឱ្យក្រុមការងារបច្ចេកទេសថតរូប ឬថតវីដេអូពីការសាកល្បងទាំងអស់ផងដែរ ។

នៅពេលស្តាប់មកដល់ចំណុចនេះ មនុស្សភាគច្រើនអាចឆ្ងល់ថា ចុះបើការកម្ចាត់កន្លាតតាមវិធីសាស្ត្រថ្មីរបស់ពួកគេពុំទទួលបានលទ្ធផលនោះ ហើយក្រុមហ៊ុនពុំអាចកម្ចាត់កន្លាតទាំង១០០ក្បាលចេញពីផ្ទះក្នុងរយៈពេលត្រឹម៣០ថ្ងៃតាមការព្រមព្រៀងគ្នា តើគួរធ្វើយ៉ាងណា? គឺក្រុមហ៊ុននឹងប្រើប្រាស់វិធីសាស្ត្រកម្ចាត់កន្លាតយ៉ាងមានប្រសិទ្ធភាព ដើម្បីឱ្យផ្ទះរបស់អ្នកគ្មានកន្លាត ។

ពិតជាពុំគួរឱ្យជឿ ពីព្រោះក្រោយពីក្រុមហ៊ុន The Pest Informer បានប្រកាសពីគម្រោងនេះ ក៏មានម្ចាស់ផ្ទះមកដាក់ពាក្យឱ្យក្រុមហ៊ុនទៅលែងកន្លាតក្នុងផ្ទះរបស់ពួកគេ រហូតដល់ជាង២ពាន់២រយនាក់ឯណោះ ។ ដេវីត ហ្លយ ជាស្ថាបនិកក្រុមហ៊ុន The Pest Informer និយាយថា ក្រុមហ៊ុនយើងធ្វើកិច្ចសន្យាជាមួយម្ចាស់ផ្ទះ ចាប់ពី៥នាក់ ទៅ៧នាក់ ដើម្បីឱ្យយើងអាចលែងកន្លាតពូជអាមេរិក ប្រមាណ១០០ក្បាលចូលក្នុងផ្ទះពួកគេ ព្រមទាំងអនុញ្ញាតឱ្យយើងថតវីដេអូ និងសាកល្បងវិធីកម្ចាត់កន្លាត ។

កាលពីមុន ក្រុមហ៊ុននេះធ្លាប់បានលែងកន្លាតចូលក្នុងផ្ទះរបស់មិត្តភក្តិ និងក្រុមគ្រួសាររបស់បុគ្គលិកក្រុមហ៊ុន ដើម្បីសាកល្បងវិធីកម្ចាត់កន្លាតអស់ជាច្រើនលើក ឃើញថា ផ្ទះពួកគេគ្មានបញ្ហាកន្លាតរំខានទេ ក្រោយការសាកល្បង ។

ចុះលោកអ្នកវិញ បើមានក្រុមហ៊ុនកម្ចាត់សត្វល្អិតបែបនេះនៅប្រទេសកម្ពុជា តើលោកអ្នកយល់ព្រមឱ្យពួកគេលែងកន្លាត១០០ក្បាលចូលក្នុងផ្ទះដែរឬទេ ដើម្បីលោកអ្នកទទួលបានប្រាក់ចំនួន២ពាន់ដុល្លារអាមេរិកពីក្រុមហ៊ុន?

បរទេស៖ សិង្ហបុរីបានអនុញ្ញាតឱ្យលក់អាហារដែលផលិតពីសត្វល្អិតដូចជា ចង្រិត ដុកដឿ អាពីង និងកណ្តូបនៅក្នុងប្រទេសរបស់ខ្លួនជាលើកដំបូង ខណៈកាលពីមុនប្រទេសនេះហាមឃាត់មិនឱ្យលក់អាហារដែលផលិតពីសត្វល្អិតឡើយ។
ទោះជាយ៉ាងណាបើយោងតាមការចុះផ្សាយរបស់ Food-Safety អាជ្ញាធរស្បៀងអាហារសិង្ហបុរី (SFA) ថ្មីៗនេះបានប្រកាសថា ខ្លួននឹងអនុម័តសត្វល្អិតចំនួន ១៦ ប្រភេទដែលត្រូវបានអនុញ្ញាតឱ្យលក់ និងប្រើប្រាស់ក្នុងស្រុកជាផ្លូវការចាប់ពីដើមខែសីហា ឆ្នាំ២០២៤ នេះតទៅ។ ដូច្នេះភ្ញៀវទេសចរដែលទៅកាន់ប្រទេសសិង្ហបុរី គឺអាចរីករាយជាមួយមុខម្ហូបដែលផលិតពីសត្វល្អិតបានដោយសេរី។

យោងតាមប្រភពដដែល បានឱ្យដឹងទៀតថា អាជ្ញាធរស្បៀងអាហារសិង្ហបុរី បានអនុម័តឱ្យមានលក់សត្វល្អិតដូចជា អង្គ្រង ដុកដឿ អាពីង កណ្តូប ចង្រិត និងសត្វល្អិតជាច្រើនប្រភេទទៀត ដោយពួកវាត្រូវបានចិញ្ចឹមនៅក្នុងកន្លែងដែលគ្រប់គ្រងដោយអាជ្ញាធរមានសមត្ថកិច្ចឃ្លាំមើលត្រឹមត្រូវ ជាជាងចាប់នៅក្នុងព្រៃ ដើម្បីធានាសុវត្ថិភាពរបស់អ្នកទទួលទាន។ ហេតុនេះបច្ចុប្បន្នមេចុងភៅ ភោជនីយដ្ឋាន និងក្រុមហ៊ុនអាហារក្នុងស្រុកកំពុងធ្វើការពិសោធន៍ជាមួយវិធីផ្សេងៗដើម្បីរៀបចំសត្វល្អិតដោយសុវត្ថិភាព។

អ្នកទេសចរជាច្រើនកំពុងទន្ទឹងរង់ចាំអាហារ Nasi lemak ដែលជាប្រភេទអង្ករទឹកដោះគោដូងបម្រើជាមួយស៊ុត សណ្ដែកដី និងទឹកម្ទេស អាចត្រូវបានបម្រើជាមួយចង្រិតបំពង ឬកណ្ដូបបន្ថែមទៀតដើម្បីបង្កើនរសជាតិ។ ដូច្នេះការទទួលទានសត្វល្អិតនៅក្នុងប្រទេសសិង្ហបុរីអាចជារឿងថ្មីមួយ ដោយសារប្រទេសនេះកន្លងមកមិនមានការលក់សត្វល្អិតឡើយ។ សត្វល្អិតគឺជាប្រភេទសត្វដែលមានបរិមាណវីតាមីន និងសារធាតុរ៉ែសំខាន់ៗជាច្រើន ដែលផ្តល់ជាប្រភពប្រូតេអ៊ីនខ្ពស់សម្រាប់មនុស្ស។

យោងតាមរបាយការណ៍ឆ្នាំ ២០២២ របស់វេទិកាសេដ្ឋកិច្ចពិភពលោកបានចង្អុលបង្ហាញថា សត្វល្អិតគឺជាប្រភពប្រូតេអ៊ីនដែលមិនគួរមើលរំលង ដោយការទទួលទានសត្វល្អិតអាចទទួលបានអត្ថប្រយោជន៍យ៉ាងច្រើនចំពោះសុខភាព។ នៅអាស៊ីអាគ្នេយ៍យើងនេះ សត្វល្អិតគឺជាមុខម្ហូបដ៏ពេញនិយមបំផុត ជាពិសេសនៅប្រទេសកម្ពុជាយើងតែម្តង ដែលប្រភេទសត្វល្អិតដូចជាចង្រិត និងអាពីង គឺជាអាហារល្បីបំផុត៕