បរទេស៖ ប្រជាជននៅក្នុងប្រទេសអឺរ៉ុបដូចជាអេស្ប៉ាញ អ៊ីតាលី និងហូឡង់ បានកំពុងចាត់វិធានការដេញភ្ញៀវទេសចរណ៍ចេញពីស្រុក ដោយសារកំណើនលើសលប់ពេក ធ្វើឱ្យអ្នកស្រុកមានភាពតានតឹង។
យោងតាម CNN កាលពីដើមខែកក្កដា ប្រជាជននៅក្នុងទីក្រុងបាសេឡូណារបស់ប្រទេសអេស្ប៉ាញបានបាញ់ទឹកទៅលើអ្នកទេសចរ ដោយស្រែកឱ្យពួកគេត្រឡប់ទៅផ្ទះវិញ។ ខណៈកាលពីចុងខែកក្កដានៃឆ្នាំ ២០២៤ នេះអ្នកស្រុកនៅទីក្រុង Venice ប្រទេសអ៊ីតាលី និងប្រជាជននៅទីក្រុង Utrecht ប្រទេសហូឡង់ក៏បានដំឡើងថ្លៃសណ្ឋាគារ ផ្ទះសំណាក់ ភោជនីយដ្ឋាន និងហាងលក់ទំនិញផ្សេងៗទ្វេរដង ក្នុងគោលបំណងឱ្យភ្ញៀវទេសចរត្រឡប់ទៅប្រទេសកំណើតវិញ។

ការឡើងថ្លៃនៃទំនិញផ្សេងៗក៏ដូចជាដំឡើងថ្លៃសណ្ឋាគារ ផ្ទះសំណាក់ ភោជនីយដ្ឋានមិនមែនជាហេតុផលដើម្បីដេញភ្ញៀវទេសចរបានទេ វាក៏បូករួមជាមួយនឹងអាកប្បកិរិយាមិនគោរពរបស់ប្រជាជនទៅលើភ្ញៀវទេសចរផងដែរ។ ហេតុនេះសម្រាប់ភ្ញៀវដែលមានបំណងចង់ទៅទស្សនាក្នុងប្រទេសអឺរ៉ុបទាំងបីនេះគួរតែគិតមើលម្តងទៀត ព្រោះប្រទេសអឺរ៉ុបដូចជាអេស្ប៉ាញ អ៊ីតាលី និងហូឡង់ បានកំពុងចាត់វិធានការដេញភ្ញៀវទេសចរណ៍ចេញពីស្រុក ដោយសារកំណើនលើសលប់ពេក ធ្វើឱ្យអ្នកស្រុកមានភាពតានតឹង។

ក្រៅពីមូលហេតុកំណើនភ្ញៀវទេសចរលើសលប់ពេក ក៏ដោយសារមូលហេតុចម្បងផ្សេងទៀតដែរដូចជាភ្ញៀវភាគច្រើនមិនគោរព និងមិនឱ្យតម្លៃអ្នកស្រុក ប្រើអាកប្បកិរិយាមិនគួរសមទៅលើម្ចាស់ផ្ទះ។ ជាឧទាហរណ៍កាលពីឆ្នាំ ២០២៣ ភ្ញៀវម្នាក់ត្រូវបានចោទប្រកាន់ពីបទបំផ្លាញរូបសំណាកបុរាណមួយនៅឯប្រភពទឹក Neptune សតវត្សទី ១៦ របស់ Florence។ នៅឆ្នាំដដែលនោះ នៅឯគោលដៅមួយទៀតក្នុងប្រទេសអ៊ីតាលី ក្រុមអ្នកទេសចរមួយក្រុមក៏បានបំផ្លិចបំផ្លាញរូបសំណាកតម្លៃប្រវត្តិសាស្ត្រ និងវប្បធម៌នៅក្នុងវីឡាដែលពួកគេជួលផងដែរ។

លោក Sebastian Zenker សាស្ត្រាចារ្យផ្នែកទេសចរណ៍នៅសាលាពាណិជ្ជកម្មទីក្រុង Copenhagen បាននិយាយថា ដោយសារតែសកម្មភាពខាងលើរបស់អ្នកទេសចរ ទីក្រុងជាច្រើននៅអឺរ៉ុបក៏ត្រូវដំណើរការកម្មវិធីដើម្បីបង្អាក់វិស័យទេសចរណ៍។ នៅឆ្នាំ ២០២៣ ទីក្រុង Amsterdam ប្រទេសហូឡង់បានប្រកាសយុទ្ធនាការ “Stay Away” ដើម្បីបង្ហាញថាប្រទេសនេះមិនស្វាគមន៍ភ្ញៀវទេសចរដែលស្រវឹង និងរំខានឡើយ។ ប៉ុន្តែ Zenker ក៏ចង្អុលបង្ហាញផងដែរថា ប្រសិនបើប្រទេសទាំងនេះចាត់វិធានការដេញភ្ញៀវទេសចរចេញពីស្រុក នោះចំនួនអ្នកទស្សនានឹងថយចុះ ដែលជាហេតុធ្វើឱ្យសេដ្ឋកិច្ចរបស់ប្រទេសធ្លាក់ចុះខ្លាំង៕

ភ្ញៀវទេសចរអន្តរជាតិតែងតែនិយមធ្វើដំណើរកម្សាន្ត ឬស្នាក់នៅក្នុងប្រទេសថៃរយៈពេលយូរ ដោយសារពួកគេទំនងចង់ទទួលបានបទពិសោធន៍ថ្មីៗ ស្វែងយល់ពីវប្បធម៌របស់ប្រទេស ទំនៀមទំលាប់ ក៏ដូចជារបៀបរស់នៅ ឬចំណាយពេលរៀន Muay Thai ដែលជាសិល្បៈក្បាច់គុនដ៏ល្បីល្បាញលើពិភពលោក។ ទោះជាយ៉ាងណាប្រទេសផ្សេងទៀតនៅអាស៊ីអាគ្នេយ៍ក៏មានសិល្បៈវប្បធម៌ ក្បាច់គុន ប្រវត្តិសាស្ត្រជាច្រើនដែលអាចទាក់ទាញចិត្តភ្ញៀវទេសចរបរទេសបានផងដែរ។

ប៉ុន្តែភាគច្រើននៃភ្ញៀវគឺសម្រេចជ្រើសរើសប្រទេសថៃជាចម្បង ដូច្នេះហើយតើកត្តាអ្វីដែលធ្វើឱ្យភ្ញៀវអន្តរជាតិសម្រេចស្នាក់នៅប្រទេសថៃរយៈពេលយូរ ឬនិយមធ្វើដំណើរកម្សាន្តទៅកាន់ប្រទេសថៃញឹកញាប់បែបនេះ? សម្រាប់ចម្លើយនោះគឺថៃជាប្រទេសដែលងាយស្រួលស្នាក់នៅជាងគេក្នុងចំណោមបណ្តាប្រទេសទាំងអស់នៅអាស៊ីអាគ្នេយ៍។ ដោយសារប្រទេសនេះបានណែនាំទិដ្ឋាការថ្មី អនុញ្ញាតឱ្យភ្ញៀវទេសចរបរទេសទាំងអស់មានសិទ្ធស្នាក់នៅរហូតដល់ ១៨០ ថ្ងៃក្នុងមួយដំណើរទស្សនកិច្ច ដោយផ្អែកលើមូលដ្ឋានចូលច្រើនក្នុងរយៈពេល ៥ ឆ្នាំ (នេះមានន័យថាពួកគេនឹងត្រូវចាកចេញពីប្រទេសនៅពេលដែល ១៨០ ថ្ងៃរបស់ពួកគេផុតកំណត់ ហើយពេលវេលាកំណត់ឡើងវិញនៅពេលដែលពួកគេចូលម្តងទៀត)។

ដូច្នេះទិដ្ឋាការនេះគឺបើកចំហសម្រាប់ប្រភេទជាច្រើននៃកម្មករដាច់ស្រយាល រួមទាំងអ្នកដំណើរតាមឌីជីថល និងភ្ញៀវទេសចរឯករាជ្យផ្សេងទៀត។ វាមានគោលបំណងចំពោះអ្នកដែលចង់ទៅលេងដើម្បីចូលរួមក្នុងសកម្មភាពដូចជាការបណ្តុះបណ្តាល Muay Thai ឬសិក្សាពីជំនាញធ្វើម្ហូបថៃ ឬមកសម្រាប់ការព្យាបាលវេជ្ជសាស្រ្តបន្ថែម។ ហេតុនេះដើម្បីដាក់ពាក្យ អ្នកដំណើរត្រូវបង្ហាញភស្តុតាងដែលថាពួកគេមានថវិកាយ៉ាងតិច ៥០០,០០០ បាត (ប្រហែល ១៣,៨០០ ដុល្លារអាមេរិក) ក៏ដូចជាឯកសារដើម្បីគាំទ្រគោលបំណងនៃដំណើរទស្សនកិច្ចរបស់ពួកគេ ដូចជាសំបុត្រពីមជ្ឈមណ្ឌលវេជ្ជសាស្ត្រ ឬភស្តុតាងនៃការងារផ្សេងៗជាដើម។

យោងតាមរដ្ឋាភិបាលថៃបានពង្រីកបញ្ជីលើកលែងទិដ្ឋាការ ដោយបង្កើនពី ៥៧ ទៅ ៩៣ ប្រទេស និងពង្រីករយៈពេលស្នាក់នៅពី ៣០ ទៅ ៦០ ថ្ងៃ។ នេះបើតាមទិន្នន័យរបស់រដ្ឋាភិបាលក៏បានបង្ហាញដែរថាប្រទេសថៃបានស្វាគមន៍ភ្ញៀវអន្តរជាតិចំនួន ១៧.៥ លាននាក់នៅក្នុងឆមាសទីមួយនៃឆ្នាំនេះ កើនឡើង ៣៥% ធៀបនឹងរយៈពេលដូចគ្នាកាលពីឆ្នាំមុន។ យោងតាមអ្នកជំនាញ កាលពីមុនភ្ញៀវអន្តរជាតិភាគច្រើនមកទីនេះ ស្នាក់នៅក្នុងរយៈពេលខ្លីប៉ុណ្ណោះ។ ទោះជាយ៉ាងណានៅពេលប្រទេសថៃបានរៀបចំគោលនយោបាយបន្ធូរបន្ថយទិដ្ឋាការនេះ ភ្ញៀវទេសចរក៏ងាយស្រួលស្នាក់នៅប្រទេសនេះរយៈពេលយូរជាងមុន ជាហេតុធ្វើឱ្យប្រទេសនេះមានភាពទាក់ទាញជាងគេនៅអាស៊ីអាគ្នេយ៍៕

ប្រទេសវៀតណាម ៖ កាលពីថ្ងៃទី៣១ ខែកក្កដា ឆ្នាំ២០២៤ សារព័ត៌មានបរទេសរាយការណ៍ថា វាធ្វើឱ្យក្រុមគ្រូពេទ្យនៅប្រទេសវៀតណាមភ្ញាក់ផ្អើលយ៉ាងខ្លាំង ក្រោយពីបានវះកាត់ពោះបុរសឥណ្ឌាម្នាក់ ដោយសារចុកពោះខ្លាំងពេក ។ គ្រូពេទ្យបានឃើញសត្វអន្ទង់រស់១ក្បាលមានប្រវែង១ម៉ែត្រជាប់ក្នុងពោះវៀន និងរន្ធគូទអ្នកជំងឺ ហើយអន្ទង់បានខាំពោះវៀនរហូតដល់ធ្លាយ ថែមទាំងមានក្រូចឆ្មារ១ផ្លែទៀតផង ។

បុរសឥណ្ឌារូបនេះ អាយុ៣១ឆ្នាំ រស់នៅប្រទេសវៀតណាម និងបានមកមន្ទីរពេទ្យដោយសារចុកពោះខ្លាំងពេកទ្រាំលែងបាន ។ ក្រោយការវះពោះអ្នកជំងឺរួចហើយ ស្រាប់តែក្រុមគ្រូពេទ្យភ្ញាក់ផ្អើលយ៉ាងខ្លាំង ពីព្រោះឃើញអន្ទង់រស់ប្រវែង១ម៉ែត្រក្នុងពោះ ព្រមទាំងមានក្រូចឆ្មារ១ផ្លែក្នុងរន្ធគូទថែមទៀត ។ ក្រុមគ្រូពេទ្យឆ្ងល់ថា តើអន្ទង់រស់ និងក្រូចឆ្មារនេះអាចចូលទៅក្នុងពោះអ្នកជំងឺដោយរបៀបណា?

សារព័ត៌មានបរទេសរាយការណ៍ថា ករណីនេះបានកើតឡើងក្នុងមន្ទីរពេទ្យមួយកន្លែងនៅទីក្រុងហាណូយ ប្រទេសវៀតណាម កាលពីថ្ងៃទី២៧ ខែកក្កដា ឆ្នាំ២០២៤ ។ នៅពេលអ្នកជំងឺមកដល់មន្ទីរពេទ្យ គ្រូពេទ្យក៏បានថត X-ray ហើយលទ្ធផលបង្ហាញថា ក្នុងពោះអ្នកជំងឺមានអន្ទង់១ក្បាលប្រវែង១ម៉ែត្រ និងរើបម្រះចុះឡើងក្នុងនោះ ។

ក្រោយមក គ្រូពេទ្យក៏បានធ្វើការវះកាត់ដើម្បីយកអន្ទង់ចេញពីពោះអ្នកជំងឺ ហើយក្នុងអំឡុងពេលគ្រូពេទ្យកំពុងតែវះកាត់នោះ គ្រូពេទ្យបានឃើញក្រូចឆ្មារ១ផ្លែមានទំហំ៤សង់ទីម៉ែត្រ នៅជាប់រន្ធគូទអ្នកជំងឺ ។ លើសពីនេះ ពោះវៀនអ្នកជំងឺត្រូវបានអន្ទង់ខាំរហូតដល់ធ្លាយ ហើយគ្រូពេទ្យក៏បានទាញអន្ទង់ចេញក្រៅ និងជួយសង្គ្រោះអ្នកជំងឺឱ្យផុតពីគ្រោះថ្នាក់ ។

ក្រោយការធ្វើរោគវិនិច្ឆ័យបង្ហាញថា អ្នកជំងឺមានបញ្ហារលាកពោះវៀនធ្ងន់ធ្ងរ និងទល់លាមកខ្លាំង ហើយគ្រូពេទ្យក៏បានសួរនាំអ្នកជំងឺលម្អិតពាក់ព័ន្ធនឹងអន្ទង់ ។ អ្នកជំងឺប្រាប់ថា កន្លងមក មានអ្នកជិតខាងប្រាប់ថា ឱ្យខ្លួនចាប់អន្ទង់រស់ញាត់ចូលរន្ធគូទ ដើម្បីដោះស្រាយបញ្ហារលាកពោះវៀនធំ និងទល់លាមកខ្លាំង ។ ដូច្នេះ ខ្លួនក៏ធ្វើតាមអ្នកជិតខាងប្រាប់ ។

គ្រូពេទ្យបញ្ជាក់ថា ក្នុងអំឡុងពេលត្រួតពិនិត្យរាងកាយអ្នកជំងឺ ស្រាប់តែអាការៈអ្នកជំងឺកាន់តែធ្ងន់ធ្ងរខ្លាំងឡើង ទើបគ្រូពេទ្យសម្រេចចិត្តវះកាត់ជាបន្ទាន់ ។ រីឯការត្រួតពិនិត្យរាងកាយរបស់អ្នកជំងឺ គឺគ្មានឃើញអ្វីខុសប្រក្រតីផ្សេងទៀតទេ ហើយគ្រូពេទ្យបានដេរភ្ជាប់ពោះវៀនធំដែលធ្លាយនេះរួចរាល់ហើយ និងប្រាប់ឱ្យអ្នកជំងឺទៅសម្រាកនៅផ្ទះ ៕

រូបភាពចែកចាយពីបណ្តាញសង្គមបង្ហាញឲ្យឃើញពីទិដ្ឋភាពរបស់សិស្សានុសិស្សដែលជាកុមារតូចៗនៅលើទឹកដីកម្ពុជាក្រោម បានស្វះស្វែងមករៀនអក្សរខ្មែរនៅឯវត្តមួយកន្លែងនៅទីនោះ។

យោងតាមគេហទំព័រ «វប្បធម៌ខ្មែរក្រោម» បានដាក់បង្ហោះរូបភាពជាច្រើនសន្លឹកដោយភ្ជាប់មកជាមួយនឹងខ្លឹមសារថា «កូនខ្មែរក្រោមភូមិអូរត្រាវ ស្រុកកញ្ចោង ខេត្តព្រះត្រពាំង មកវត្តរៀនអក្សរខ្មែរកេរ្តិ៍ម៉ែទុកឱ្យ។ ទំពាំងស្នងឫស្សី កុមារា កុមារី ស្នងមនុស្សចាស់»។

តាមរយៈរូបភាព ដោយសង្កេតឃើញថា សិស្សានុសិស្សដែលជាកុមារតូចៗជាច្រើន ដែលមានទឹកចិត្តស្រលាញ់ចង់ថែរក្សានូវសម្បត្តិវប្បធម៌និងប្រពៃណីខ្មែរ ឲ្យបានគង់វង្សនឹងស្ថិតស្ថេរ ដែលបញ្ជាក់អំពីឈាមជ័រនៃជាតិសាសន៍ខ្មែរពិតប្រាកដ។

គួរបញ្ជាក់ថា ខេត្តព្រះត្រពាំង គឺជាអតីតខេត្តមួយរបស់ខ្មែរ ស្ថិតនៅលើទឹកដីកម្ពុជាក្រោម ដែលបច្ចុប្បន្នខេត្តនេះ គឺបានប្តូរជាមកជាខេត្ត«ត្រាវិញ»តាមភាសាវៀតណាម។ ខេត្តព្រះត្រពាំង គឺជាមូលដ្ឋាននៃការរស់នៅតាំងពីយូរលង់ណាស់ហើយរបស់ជនជាតិដើមខ្មែរក្រោម ដែលបន្សល់ទុកនូវខឿនវប្បធម៌ អត្តសញ្ញាណជាតិខ្មែរជាច្រើនដូចជា ភាសា ,អក្សរ , មុខម្ហូប និងជាពិសេស គឺវត្តអារាមគឺជានិម្មិតរូបដ៏សំខាន់ជាងគេ។

ខេត្តព្រះត្រពាំង ត្រូវបានកូនខ្មែរគ្រប់រូបចងចាំទុក វីរបុរសជាតិខ្មែរមួយរូបគឺ លោកឧកញ៉ា សឺន គុយ ជាចៅហ្វាយខេត្តព្រះត្រពាំងអំឡុងសតវត្សទី១៧ ដែលបានពលីជីវិត ជាថ្នូរនឹងការរក្សាទំនៀមទម្លាប់ប្រពៃណី និងព្រះពុទ្ធសាសនាថេរវាទខ្មែរ ឲ្យបានគង់វង្សសម្រាប់ពលរដ្ឋខ្មែរក្រោម នៅដែនដីកម្ពុជាក្រោមប្រតិបត្តិរហូតមកដល់សព្វថ្ងៃផងដែរ៕