ក្រោយពីត្រូវបានសហព័ន្ធកីឡាប្រដាល់គុនខ្មែរដាក់វិន័យ មិនឱ្យចូលរួមក្នុងព្រឹត្តិការណ៍ប្រកួតកីឡាប្រដាល់គុនខ្មែររយៈពេល៦ខែ ក្រុមគ្រួសារ លោកគ្រូអេភូថង ពេលនេះត្រូវបានសហព័ន្ធប្រដាល់ សម្រេចបន្ធូរបន្ថយពិន័យ។
ក្នុងនោះលោក អេ ភូថង បន្ធូរបន្ថយការពិន័យពីរយៈពេល ៦ខែ មកនៅត្រឹមរយៈពេល ៣ខែ ដោយត្រូវអនុវត្តវិន័យចំនួន ៤សប្តាហ៍ ចំណែកវិន័យដែលនៅសល់ត្រូវបានព្យួរ គិតពីថ្ងៃទី ៣០ ខែកក្កដាតទៅ។
អ្នកស្រី សាំង សុម៉ាលី ជាភរិយាបន្ធូរបន្ថយការវិន័យពីរយៈពេល៦ខែ មកដល់ត្រឹម៣ខែ ហើយកំណត់ឱ្យអនុវត្តការពិន័យនេះត្រឹមរយៈពេល ៦សប្តាហ៍ ចំណែកវិន័យដែលនៅសល់ត្រូវព្យួរ គិតពីថ្ងៃទី ៣០ ខែកក្កដាតទៅ។
កីឡាការិនី អេ យ៉ានុត ដែលជាកូនស្រី គឺសហព័ន្ធកីឡាប្រដាល់គុនខ្មែរ នៅរក្សាការដាក់វិន័យរយៈពេល៦ខែដដែល ប៉ុន្តែកំណត់ឱ្យ យ៉ានុត អនុវត្តការវិន័យនេះត្រឹម៨សប្តាហ៍ទេ ចំណែកការវិន័យដែលនៅសល់ត្រូវព្យួរ គិតពីថ្ងៃទី ៣០ ខែកក្កដា។
គួរបញ្ជាក់ផងដែរថា អ្នកទាំង៣ ត្រូវបានសហព័ន្ធដាក់ពិន័យ ក្រោយប្រតិកម្មដោយកំហឹងទៅលើអាជ្ញាកណ្តាល ជ្រា សុភាព ដែលបានបញ្ឈប់កីឡាករ ម៉ឺន មេឃា ក្នុងទឹកទី៤ សម្រាប់ការប្រកួតការពារខ្សែក្រវាត់ពីការដណ្តើមរបស់កីឡាករ ចាន់ ប៊ុនហឿន នៅលើសង្វៀនប្រដាល់ PNN កាលពីថ្ងៃទី២២ ខែកក្កដា៕
