តារាសម្ដែងចិន Huang Xiaoming អតីតស្វាមី Angelababy បានអបអរសាទរបងប្អូនជីដូនមួយរបស់លោក ដែលជាអត្តពលិក Chen Meng ឈ្នះមេដាយមាសក្នុងកីឡាវាយកូនឃ្លីលើតុនារីក្នុងព្រឹត្តិការណ៍កីឡាអូឡាំពិកទីក្រុងប៉ារីស ដោយផ្ញើអាំងប៉ាវចំនួន ១០០នាក់ទៅកាន់ទំនាក់ទំនងរបស់លោកតាមរយៈប្រព័ន្ធផ្ញើសារ WeChat។

តារាសម្តែងវ័យ ៤៧ឆ្នាំរូបនេះបានសម្តែងនូវក្តីរំភើបរបស់លោកបន្ទាប់ពីកីឡាការិនី Chen Meng មានអាយុ ៣០ឆ្នាំបានយកឈ្នះលើមិត្តរួមក្រុមជនជាតិចិន Sun Yingsha ក្នុងវគ្គផ្តាច់ព្រ័ត្រកាលពីថ្ងៃទី ៣ខែសីហាជាមួយនឹងលទ្ធផល ៤-២។ នេះបើតាមការរាយការណ៍ដោយ The Straits Times ។ រូបថតអេក្រង់ពីការជជែកជាក្រុម WeChat ដែលក្រោយមកបានលេចឡើងនៅលើ Weibo បានបង្ហាញឱ្យឃើញលោក Huang Xiaoming និយាយបែបកំប្លែងថាលោកទទួលបានការអបអរសាទរចំពោះជ័យជម្នះរបស់បងប្អូនជីដូនមួយច្រើនជាងសមិទ្ធផលនៃការសម្ដែងផ្ទាល់ខ្លួនរបស់លោក។

តារាសម្តែងរូបនេះ ក៏បានសម្តែងការកោតសរសើរចំពោះការប្រកួតនៅលើ Weibo ដោយបញ្ជាក់ថា៖ «អរគុណដល់អត្តពលិកទាំងពីរដែលបានផ្តល់ឱ្យយើងនូវការប្រកួតដ៏រំភើបនេះ។ វាបានធ្វើឱ្យខ្ញុំស្រក់ទឹកភ្នែក។ អ្នកទាំងពីរគឺល្អបំផុត» ។ លោកបានបន្ថែមថា “សូមអបអរសាទរចំពោះ Mengmeng [ឈ្មោះហៅក្រៅប្អូនជីដូនមួយលោក] ។ «អ្នកបានគ្រប់គ្រងសម្ពាធទាំងអស់ ហើយម្តងទៀតបានបង្ហាញពីសមត្ថភាពរបស់អ្នក។ អ្នកនឹងក្លាយជាមោទនភាពរបស់យើងជានិច្ច»។

តារាសម្តែង Huang Xiaoming ត្រូវបានគេទទួលស្គាល់ថាជាតារាសម្ដែងដ៏ជោគជ័យ និងមានឥទ្ធិពលបំផុតរបស់ប្រទេសចិន ដោយមានតួនាទីគួរឱ្យកត់សម្គាល់ក្នុងភាពយន្ត និងរឿងភាគជាច្រើនគួរឱ្យកត់សម្គាល់។

កីឡាការិនី Chen Meng បានចូលរួមជាមួយក្រុមខេត្តនៅអាយុ ៩ ឆ្នាំ និងជម្រើសជាតិនៅអាយុ ១៣ ឆ្នាំក្នុងឆ្នាំ ២០០៧។ ការឈ្នះកាលពីពេលថ្មីៗនេះរបស់នាងនៅឯកីឡាអូឡាំពិកទីក្រុងប៉ារីសបានសម្គាល់ថានាងជាស្ត្រីទីបីក្នុងប្រវត្តិសាស្ត្រដែលសម្រេចបានមេដាយមាសអូឡាំពិកត្រឡប់មកវិញក្នុងកីឡាវាយកូនឃ្លីលើតុ បន្ទាប់ពីជោគជ័យពីមុនរបស់នាងនៅអូឡាំពិករដូវក្តៅឆ្នាំ ២០២០ នៅទីក្រុងតូក្យូ ប្រទេសជប៉ុន៕

បរទេស៖ ព្រឹត្តិការណ៍អូឡាំពិកដែលធ្វើឡើងនៅទីក្រុងប៉ារីសប្រទេសបារាំងហាក់មានការរិះ.គន់យ៉ាងខ្លាំង បន្ទាប់ពីអត្តពលិកតាមបណ្តាប្រទេសមួយចំនួនជួបប្រទះនូវផលលំបាកដូចជាកង្វះម៉ាស៊ីនត្រជាក់ ពុលអាហារ ខណៈអត្តពលិកខ្លះគេងនៅលើដី ឬកៅអីជាដើម។
នេះបើយោងតាមសារព័ត៌មានអូស្ត្រាលី SBS ដែលបានចុះផ្សាយកាលពីថ្ងៃទី៦ ខែសីហា ឆ្នាំ២០២៤ ថាបច្ចុប្បន្នអត្តពលិកអូឡាំពិកជាច្រើនបានកំពុងសម្រាកព្យាបាលនៅមន្ទីរពេទ្យរយៈពេល ៤-៥ ថ្ងៃហើយ ដោយសារឆ្លងបាក់តេរី E.coli ដែលត្រូវបានរកឃើញជាទូទៅនៅក្នុងពោះវៀនខាងក្រោមនៃសារពាង្គកាយដែលមានឈាមក្តៅ។

មេរោគនេះមិនសូវមានគ្រោះថ្នាក់នោះទេ ប៉ុន្តែពេលខ្លះវាក៏អាចបង្កជាជំងឺធ្ងន់ធ្ងរបានផងដែរ។ ដូច្នេះបើយោងតាម SBS ការឆ្លងបាក់តេរី E.coli អាចបណ្តាលឱ្យអ្នកជំងឺឆ្លងមេរោគពោះវៀន, រលាកក្រពេញប្រូស្តាត, រលាកអាងត្រគាក, ការឆ្លងមេរោគថង់ទឹកប្រមាត់, កើតជំងឺរលាកសួត ឬ រលាកស្រោមខួរជាដើម។ ទោះជាយ៉ាងណាបើយោងតាមប្រភពព័ត៌មានដដែរ បានបញ្ជាក់ថា អត្តពលិកអូឡាំពិកជាច្រើនគឺបានឆ្លងមេរោគពោះវៀន ដែលជាជំងឺស្រាលប៉ុណ្ណោះ ហេតុនេះអ្នកជំងឺនឹងជាសះស្បើយឡើងវិញក្នុងរយៈពេល ១០ ថ្ងៃ។

យោងតាមអង្គការសុខភាពពិភពលោក មូលហេតុនៃការឆ្លងបាក់តេរី E.coli គឺដោយសារការប៉ះពាល់រួមមានអាហារកខ្វក់ ទឹក និងការប៉ះពាល់ពីមនុស្សម្នាក់ទៅមនុស្សម្នាក់ទៀត។ អាហារដែលអាចបង្កមេរោគរួមមាន៖ សាច់, ទឹកដោះគោស្រស់, បន្លែ និងផ្លែឈើស្រស់ ដោយសារការលាងមិនបានស្អាតល្អ ធ្វើឱ្យបាក់តេរី E. coli មានឱកាសជ្រៀតចូលក្នុងអាហារទាំងនេះ។ រីឯប្រភពទឹកវិញដូចជាស្ទឹង ទន្លេ បឹង និងទឹកដែលប្រើសម្រាប់ប្រព័ន្ធធារាសាស្រ្តគឺមានការបំពុលខ្លាំង ដោយសារលាមកមនុស្ស និងសត្វអាចបំពុលប្រភពទឹក។

បច្ចុប្បន្ននេះមិនទាន់មានវ៉ាក់សាំង ឬថ្នាំសម្រាប់ការពារការឆ្លងមេរោគ E.coli នៅឡើយទេ។ ទោះជាយ៉ាងណាក៏ដោយ អ្នកស្រាវជ្រាវកំពុងព្យាយាមរៀបចំវ៉ាក់សាំងដែលមានសក្តានុពល ដើម្បីកាត់បន្ថយការប៉ះពាល់នឹង E.coli ដោយអ្នកជំនាញណែនាំឱ្យជៀសវាងការផឹកទឹកទន្លេ បឹង និងអាងហែលទឹក លាងដៃឱ្យបានញឹកញាប់ ជៀសវាងអាហារដែលមានគ្រោះថ្នាក់ និងយកចិត្តទុកដាក់ចំពោះការចម្លងមេរោគ។ ហេតុនេះដើម្បីបងា្ករការចម្លងរោគ អ្នកត្រូវលាងសម្អាតឧបករណ៍ប្រើប្រាស់ក្នុងផ្ទះបាយ ដូចជាកាំបិត កាជ្រុញឱ្យបានស្អាត ដោយទុកអាហារឆៅ និងឆ្អិននៅកន្លែងដាច់ដោយឡែកពីគ្នាទើបមានសុវត្ថិភាព៕

ខណៈពេលដែលប្រទេសនានានៅជុំវិញពិភពលោកកំពុងប្រឈមនឹងគ្រោះរញ្ជួយដី ហើយប្រទេសជិតខាងដូចជាថៃ និងវៀតណាម ឡាវក៏ជួបប្រទះនឹងបញ្ហានេះញឹកញាប់ដែរ ប៉ុន្តែក្រលែកមកមើលប្រទេសកម្ពុជាយើងវិញគឺកម្រជួបប្រទះនឹងគ្រោះរញ្ជួយណាស់។ នេះមានន័យថាអាចនឹងកើតឡើងដែរប៉ុន្តែមិនញឹកញាប់ពេកនោះទេ ហើយបើកើតឡើងក៏មានកម្រិតស្រាលដែរ តើនេះមកពីមូលហេតុអ្វី? ជាការពិតណាស់លោកអ្នកប្រហែលជាធ្លាប់សិក្សារួចមកហើយ ដោយប្រទេសកម្ពុជាយើងមានទីតាំងនៅឆ្ងាយពីគែមនៃបន្ទះប្លាកែតដែលផ្លាស់ទី និងបុកគ្នាយ៉ាងជ្រៅក្រោមផ្ទៃ ដោយមានសណ្ឋានរឹង និងបិទយ៉ាងជិតល្អពីកំសួលចេញពីស្នូលភពផែនដី ជាហេតុធ្វើឱ្យប្រទេសយើងកម្រនឹងជួបគ្រោះមហន្តរាយនានាណាស់។

ដូច្នេះសណ្ឋានដី ឬថ្មបែបនេះ វាប្រៀបីដូចជាកម្រាលយ៉ាងក្រាស់ឃ្មឹក ដែលការពារយើងមិនឱ្យកើតមានរំញ័រដី ឬក៏ទទួលរងឥទ្ធិពលពីរំញ័រនៅតំបន់ក្បែរខាងនោះឡើយ។ លើសពីនេះទៀត បើយោងតាមក្រុមអ្នកអង្កេតផ្នែកភូមិសាស្ត្រ ឬក៏ការកត់ត្រាផ្នែកប្រវត្តិសាស្ត្ររបស់កម្ពុជាផ្ទាល់ បានឱ្យដឹងថា អស់រយៈពេល ១០០ ឆ្នាំកន្លងមកនេះប្រទេសយើងគឺមិនដែលទទួលរងគ្រោះរញ្ជួយដីនោះទេ ដោយសារកម្ពុជាស្ថិតនៅជ្រោយឥណ្ឌូចិន និងកណ្តាលតំបន់អាស៊ីអាគ្នេយ៍។ ទោះជាយ៉ាងណាថ្មីៗនេះរំញ័រដីតិចតួចក៏បានកើតឡើងនៅក្នុងខេត្តរតនគិរីផងដែរ បន្ទាប់ពីមានបាតុភូតរញ្ជួយដីកម្រិត ៥,១ រ៉ិទ័រនៅប្រទេសវៀតណាម។

ទោះបីជាបែបនេះក្តី ការរញ្ជួយដីកម្រិត ៥.១ រ៉ិចទ័រគឺត្រូវបានចាត់ទុកថាជាកម្រិតមធ្យម ឬខ្សោយប៉ុណ្ណោះ បើទោះបីជាកើតមាននៅតំបន់ប្រជុំជន ក៏ទំនងជាមិនអាចបង្កការខូចខាតអ្វីនោះដែរ។ សម្រាប់អន្តរជាតិគ្រោះរញ្ជួយដីចាប់ពីកម្រិត ៦.០ រ៉ិចទ័រឡើងទៅ ទើបមានលទ្ធភាពបង្កគ្រោះមហន្តរាយដូចជាបាក់រលំអគារ និងលំនៅឋាន ព្រមទាំងមានគ្រោះថ្នាក់ដល់ជីវិតមនុស្សជាដើម។ លោក Michael Borgwardt និង Andrew Pike ដែលជាអ្នកស្រាវជ្រាវបានបញ្ជាក់ផងដែរថា ប្រទេសកម្ពុជាគឺមិនអាចទទួលរងគ្រោះរញ្ជួយដី ឬបន្ទុះភ្នំភ្លើងនោះទេ ហើយបើតាមសណ្ឋានដីរបស់ប្រទេសយើង ទោះបីជាប្រទេសជិតខាងមួយចំនួនដូចជាថៃ វៀតណាម ឬឡាវមានគ្រោះរញ្ជួយដីធ្ងន់ធ្ងរក៏ដោយ ក៏វាគ្មានឥទ្ធិពលអ្វីមកដល់ប្រទេសយើងនោះដែរ។

សរុបសេចក្តីមក ប្រទេសកម្ពុជានឹងមិនអាចកើតមានគ្រោះរញ្ជួយដី ឬមួយក៏រលកយក្សស៊ូណាមិ និងបន្ទុះភ្នំភ្លើងបាននោះឡើយ ទាំងពេលនេះ និងទៅអនាគត ព្រោះយើងស្ថិតនៅក្នុងតំបន់ទ្រនរទ្វីបចាស់ ដែលមានអាយុកាលរាប់ពាន់លានឆ្នាំ ដោយវាក៏មានបញ្ជាក់យ៉ាងច្បាស់នៅក្នុងកម្មវិធីសិក្សារួចអស់ទៅហើយ ហេតុនេះប្រសិនបើមានក៏មានតិចតួចដែរ ហើយវាក៏មិនអាចកើតឡើងក្នុងកម្រិតធ្ងន់ធ្ងរដូចប្រទេសជិតខាងដែរ៕

ព្រែកស្រមោច ជាព្រែកជីកបុរាណមួយនៅកម្ពុជា ដែលមានប្រភពចាប់ពីភ្នំគូលែនចុះមកដល់កំពង់ឃ្លាំង ជាប់មាត់ទន្លេសាប។ ព្រែកបុរាណនេះត្រូវបានមន្រ្តីជំនាញអាជ្ញាធរជាតិអប្សរាសន្និដ្ឋានថា មានប្រវត្តិតាំងពីមុនសម័យព្រះបាទជ័យវរ្ម័នទី៧ ទៅទៀត ប៉ុន្តែអ្វីដែលជាការកត់សម្គាល់ កាលពីសម័យបុរាណគឺគ្មានប្រព័ន្ធធារាសាស្រ្ត ឬវិស្វកម្មនៅឡើយនោះទេ ទើបចម្ងល់ជាច្រើនបានលើកឡើងថា តើព្រែកស្រមោចនេះត្រូវបានលេចចេញជារូបរាងដោយរបៀបណា? និងមានតួនាទីពិសេសអ្វី?

លោក ទិន ទីណា អនុប្រធាននាយកដ្ឋានស្រាវជ្រាវ បណ្តុះបណ្តាល និងផ្សព្វផ្សាយអាជ្ញាធរ ជាតិអប្សរាដែលជាប្រធានគម្រោងបានគូសបញ្ជាក់ថា ក្រុមស្រាវជ្រាវបានប្រើប្រាស់រូបថតពីលើអាកាសដែលបោះពុម្ពក្នុងឆ្នាំ១៩៤១ និងរូបភាពពីលើអាកាសតាមរយៈ Google Earth បានបង្ហាញថា ព្រែកស្រមោចសណ្ដូកតាមទិសខាងជើងទៅត្បូងចេញពីភូមិសាស្ត្រឃុំកំពង់ឃ្លាំង ជាប់មាត់ទន្លេសាប កាត់តាមផ្លូវជាតិលេខ៦ ត្រង់ភូមិថ្នល់ចែក ឃុំដំដែក ឡើងទៅដល់ភូមិសំរោង ឃុំសំរោង ស្រុកសូទ្រនិគម ។

ការស្រាវជ្រាវនៅដំណាក់កាលទី១ បានបង្ហាញថា ព្រែកជីកនេះមានប្រវែងសរុប២៣គីឡូម៉ែត្រ កន្លែងខ្លះមានទទឹងពី៣០០ម៉ែត្រ កន្លែងខ្លះមានទទឹង១៥០ម៉ែត្រ និងមានកម្ពស់ជាង៤ម៉ែត្រ។ ក្រុមអ្នកស្រាវជ្រាវសន្និដ្ឋានថា ប្រភពទឹកហូរចូលព្រែកនេះអាចមានប្រភព២ សំខាន់ៗ៖ ទី១ ប្រភពទឹកពីភ្នំគូលែនស្ថិតនៅខាងជើងវាលរាបអង្គរ រួចហូរចូលព្រែកជីកនេះ និងទី២ ប្រហែលទឹកឡើងមកពីទន្លេសាប ច្រាលចូលក្នុងព្រែក។

ប្រធានគម្រោងស្រាវជ្រាវព្រែកជីកស្រមោចបានឲ្យដឹងទៀតថា យើងពុំដឹងថាព្រែកជីកដ៏ធំនេះកសាងនៅសម័យណាទេ តែគេអាចសន្និដ្ឋានថា អាចកើតមុនរាជ្យព្រះបាទជ័យវរ្ម័នទី៧ ឬប្រហែលអាចជាមុននោះយូរផង។ បន្ទាប់មកប្រហែលជាព្រែកជីកនេះមានដំណើរការ រអាក់រអួល និងខូចខាតដោយអន្លើ ទើបក្នុងរាជ្យព្រះបាទជ័យវរ្ម័នទី៧ បានធ្វើផ្លូវ មានទាំងស្ពានមួយចំនួនដែលសព្វថ្ងៃនេះក្លាយមកជាផ្លូវជាតិលេខ៦ កាត់ព្រែកជីកឲ្យដាច់ជាពីរផ្នែកនៅត្រង់ចំណុច “ថ្នល់ចែក” ម្តុំភូមិថ្នល់ចែក ឃុំដុំដែក ស្រុកសូទ្រនិគម។

បើយោងតាមសម្តីអ្នកស្រុកមួយចំនួនបានដំណាលតៗគ្នាមកថា ព្រែកស្រមោចគឺជាផ្លូវទឹកបុរាណមួយដែលមានសំពៅចរាចរជាប្រចាំ ចុះឡើងចន្លោះពីទន្លេសាបទៅដល់ភ្នំគូលែន និងជាផ្លូវដឹកជញ្ជូនថ្មទៅសាងសង់ប្រាសាទនៅអង្គរដែរ។

គួរបញ្ជាក់ថា នៅក្នុងឆ្នាំ២០២៤នេះ ក្រុមការងារស្រាវជ្រាវនៃអាជ្ញាធរជាតិអប្សរាបានបន្តធ្វើកំណាយនៅម្តុំនោះ ហើយក៏ទទួលបានតម្រុយខ្លះៗ ដោយបានរកឃើញកុលាលភាជន៍ខ្លះៗ ដូចជាកុលាលភាជផុយ ភាជន៍មានលាបទឹកថ្នាំពណ៌ក្រហម ជាភាជន៍ផលិតនៅចុងសម័យមុនអង្គរ ឬដើមសម័យអង្គរផងដែរ៕

បច្ចុប្បន្នអាកាសធាតុពិភពលោកគឺមានការប្រែប្រួលញឹកញាប់ ទោះជាយ៉ាងណាប្រសិនបើមានគ្រោះមហន្តរាយសកល ដូចជាផលប៉ះពាល់អាចម៍ផ្កាយ ឬការផ្ទុះជំងឺរាតត្បាតធ្ងន់ធ្ងរផ្សេងៗអត្រានៃការបំផ្លាញជីវិតមនុស្ស និងប្រភេទសត្វនៅលើផែនដីគឺមានភាគរយច្រើននៃការបាត់បង់ជីវិត។ នេះបើយោងតាមអ្នកជំនាញ Eleanor Higgs ដែលបានបញ្ចប់ការសិក្សានៅសាកលវិទ្យាល័យ Reading ចក្រភពអង់គ្លេសបានឱ្យដឹងថា នៅពេលដែលពិភពលោកជួបគ្រោះមហន្តរាយមានតែសត្វទាំងនេះប៉ុណ្ណោះ ដែលមានឱកាសរស់រានមានជីវិតខ្ពស់ក្នុងករណីគ្រោះមហន្តរាយបែបនេះកើតឡើង។ ដូច្នេះសត្វទាំងនោះរួមមាន៖ ខ្លាឃ្មុំទឹក, សត្វកន្លាត, សត្វត្មាត, ត្រីឆ្លាម Greenland និងសត្វភេនឃ្វីន។

យោងតាម National Geographic ខ្លាឃ្មុំទឹកគឺជាសត្វទីមួយនៅក្នុងបញ្ជីដោយសារពួកវាមានសមត្ថភាពរស់រានមានជីវិតស្ទើរតែគ្រប់មជ្ឈដ្ឋានដ៏អាក្រក់ទាំងអស់របស់ផែនដី។ ហេតុនេះវាជាសត្វដែលពិបាកសម្លាប់បំផុតនៅលើផែនដី សម្រាប់មូលហេតុគឺថាប្រូតេអ៊ីនមួយហៅថា Dsup អាចការពារហ្សែននៅក្នុងកោសិកានីមួយៗរបស់ខ្លាឃ្មុំទឹក ឬ tardigrade ដោយបង្កើតជាខែលតូចមួយប្រឆាំងនឹងភាគល្អិតគ្រោះថ្នាក់។ ចំពោះបញ្ហានេះពួកវាគឺអាចរស់បាននូវកម្រិតខ្ពស់នៃវិទ្យុសកម្មដែលសារពាង្គកាយផ្សេងទៀតភាគច្រើនមិនអាចរស់បានដូចវានោះទេ ដោយអ្នកខ្លះថែមទាំងជឿថាពួកវាអាចមានសមត្ថភាពរស់នៅលើឋានព្រះច័ន្ទបានទៀតផង។

ចំពោះសត្វកន្លាតវិញក៏ជាសត្វមានឱកាសរស់រានមានជីវិតខ្ពស់ផងដែរ ប្រសិនបើគ្រោះមហន្តរាយពិភពលោកបន្ទាប់កើតឡើង។ ដោយសារពួកវាធ្លាប់បានរួចរស់ជីវិតពីការប៉ះទង្គិចគ្នារវាងផែនដី និងអាចម៍ផ្កាយ Chicxulub ដែលជាគ្រោះមហន្តរាយដ៏ធំបានបំផ្លាញដាយណូស័រ ដូច្នេះពពួកសត្វនេះក៏កើតជំនាន់ដាយណូស័រដែរ ហើយនៅតែអាចរស់រានមានជីវិតរហូតមកដល់បច្ចុប្បន្នបាន។ រីឯសត្វត្មាតវិញក៏មិនធម្មតាដែរ ក្នុងអំឡុងពេលមានគ្រោះមហន្តរាយជាសាកល សត្វនេះទំនងទទួលបានអត្ថប្រយោជន៍ច្រើន ដោយសារសត្វផ្សេងៗទៀតបានស្លាប់ ធ្វើឱ្យសត្វត្មាតដែលជាសត្វចូលចិត្តស៊ីសាកសពមានឱកាសរីកចម្រើនថែមទៀត។ ក្រៅពីសត្វទាំងបីខាងលើត្រីឆ្លាម Greenland ក៏ជាសត្វដែលមានអត្រារស់រានមានជីវិតខ្ពស់ផងដែរ។

សត្វនេះត្រូវបានគេស្គាល់ថាជាសត្វមានអាយុវែងបំផុតក្នុងលោកដែលពួកវានីមួយៗអាចមានអាយុលើសពី ៤០០ ឆ្នាំទៅទៀតបានរួចរស់ជីវិតទាំងសង្គ្រាមលោក និងការធ្វើតេស្តអាវុធនុយក្លេអ៊ែរ។ ត្រីឆ្លាមមានវត្តមាននៅលើផែនដីតាំងពីមុនពេលមានដើមឈើ និងមុនពេលភពសៅរ៍កើតឡើងទៅទៀត ដូច្នេះវាពិតជាទំនងណាស់ដែលត្រីឆ្លាម Greenland នឹងរួចផុតពីគ្រោះមហន្តរាយពិភពលោក។ ចំណែកអធិរាជភេនឃ្វីនវិញក៏មិនធម្មតាដែរ ដោយសារពួកវាអាចរស់នៅសីតុណ្ហភាពត្រជាក់ខ្លាំងបំផុតនៅតំបន់អង់តាក់ទិក រួមទាំងល្បឿនខ្យល់ ២០០ គីឡូម៉ែត្រក្នុងមួយម៉ោង និងសីតុណ្ហភាព -៥០ អង្សារសេ ដោយមិនចាំបាច់ញ៉ាំអាហារ ថែមទាំងអាចរស់នៅក្នុងតំបន់ដាច់ស្រយាលបំផុតមួយនៅលើភពផែនដីផងដែរ ជាហេតុធ្វើឱ្យពួកវាត្រូវបានចាត់ទុកថាមានឱកាសរស់រានមានជីវិតខ្ពស់ក្នុងករណីគ្រោះមហន្តរាយបែបនេះកើតឡើង៕