អាជ្ញាធរជាតិអប្សរា បានចេញសេចក្តីប្រកាស ស្នើដល់សាធារណជនដែលចង់ថតរូប ឬវីដេអូផ្សេងៗ ត្រូវសុំសិទ្ធមុនរយៈពេល៥ថ្ងៃទៅ១០ និងតម្រូវឱ្យបង់ប្រាក់ជាមុន។
នៅក្នុងនោះ តម្លៃសេវាសម្រាប់ប្រភេទអាជីវកម្មនានាដែលដាក់ឱ្យអនុវត្តមានចំនួន ៤ជម្រើស។ អ្នកត្រូវការប្រើប្រាស់សេវាអាចជ្រើសរើសយកជម្រើសណាមួយតាមតម្លៃសមរម្យ ដែលចង់បាន ដោយរាល់តម្លៃសេវាទាំងអស់ ត្រូវបង់ផ្ទាល់ទៅក្នុងធនាគារជាតិសាខាខេត្តសៀមរាប។
ចំពោះតម្លៃស្នើសុំសិទ្ធថតនេះ តម្លៃធូរថ្លៃបំផុត៣០ដុល្លារសម្រាប់ភ្ញៀវទេសចរជាតិ ដែលចង់ថតភាពយន្តខ្នាតតូច ខណៈតម្លៃថ្លៃបំផុតដល់៥ពាន់ដុល្លារ សម្រាប់ការថតស្ពតពាណិជ្ជកម្មផលិតផលខ្នាតធំ។
អ្វីដែលគួរឱ្យភ្ញាក់ផ្អើលនោះ ការថតរូបភាព និងវីដេអូផ្សេងៗ ដោយប្រើប្រាស់ដ្រូន អាជ្ញាធរជាតិអប្សរា តម្រូវឱ្យបង់ប្រាក់រហូតដល់ ១០០០ដុល្លារ ដែលតម្លៃនេះហាក់ត្រូវបានអ្នកផលិតមាតិកាមួយចំនួនសម្តែងការមិនពេញចិត្ត។
តែយ៉ាងណាមិញ អាជ្ញាធរជាតិអប្សរា បានបញ្ជាក់ថា តម្លៃសេវាសម្រាប់ប្រភេទអាជីវកម្ម ដែលបានកំណត់ក្នុងសេចក្តីជូនដំណឹងកាលពីថ្ងៃទី០២ ខែសីហា ឆ្នាំ២០២៤ គឺជាតម្លៃនៃសេវាកម្មដែលបានអនុវត្តតាំងពីអំឡុងឆ្នាំ២០១២មកម៉្លេះ និងពុំមានការតម្លើងតម្លៃណាមួយឡើយ៕
