ប្រទេសចិន៖ ទម្លាប់នៃការហាលសម្លៀកបំពាក់រញ៉េរញ៉ៃពាសពេញទីក្រុងសៀងហៃក្នុងប្រទេសចិន កំពុងទទួលបានការចាប់អារម្មណ៍យ៉ាងខ្លាំងពីភ្ញៀវទេសចរបរទេសដែលទើបតែមកទស្សនាទីក្រុងនេះថ្មីថ្មោង។
ជាការពិតណាស់ ភ្ញៀវទេសចរគឺមានការភ្ញាក់ផ្អើលយ៉ាងខ្លាំងជាមួយនឹងរបៀបហាលសម្លៀកបំពាក់ពាសពេញទីក្រុងក្នុងប្រទេសចិន ដែលលេចចេញពីអគារផ្ទះល្វែងខ្ពស់ៗ ជាពិសេសគឺអគារផ្ទះល្វែងចាស់ៗតែម្តង។ 
ជាធម្មតាប្រជាជននៅទីក្រុងសៀងហៃតែងមានទម្លាប់ហាលខោអាវពាសវាលពាសកាល ដែលនេះត្រូវបានគេចាត់ទុកថាជាបេតិកភណ្ឌវប្បធម៌អរូបីដែលមិនអាចលុបបំបាត់បាន។ ដូច្នេះភ្ញៀវទេសចរដែលទើបតែមកទស្សនាទីក្រុងនេះថ្មីថ្មោងហាក់ចម្លែកចិត្តបន្តិច ដោយសារតែប្រជាជននៅទីនេះមានទម្លាប់រស់នៅប្លែកៗ និងខុសពីប្រជាជនក្នុងតំបន់ផ្សេងទៀត។ ទោះបីជាយ៉ាងនេះក្តីនៅក្នុងក្រសែភ្នែកប្រជាជនក្នុងតំបន់ ការហាលសម្លៀកបំពាក់បែបនេះគឺប្រៀបបាននឹងទង់ជាតិចម្រុះពណ៌ដែលបក់បោកតាមខ្យល់ប៉ុណ្ណោះ។
ទោះជាយ៉ាងណាក៏ដោយ រដ្ឋាភិបាលក្រុងសៀងហៃជឿថា ការហាលសម្លៀកបំពាក់បែបនេះគឺមិនល្អនោះទេ ដោយសារវាមានភាពរញ៉េរញ៉ៃ និងប៉ះពាល់ដល់អារម្មណ៍ភ្ញៀវទេសចរ ក៏ដូចជាជះឥទ្ធិពលអវិជ្ជមានដល់រូបភាពនៃទីក្រុងដែលត្រូវបានណែនាំថាជាទីក្រុងទំនើប។ ក្នុងឆ្នាំ ២០១០ ក្រុមមន្ត្រីបានប្រកាសហាមប្រជាជនកុំឱ្យហាលសម្លៀកបំពាក់ពាសពេញទីក្រុងបែបនេះ ប៉ុន្តែសម្រាប់ប្រជាជនក្នុងតំបន់ ទម្លាប់ហាលខោអាវបែបនេះនៅតែមិនអាចចោលបាន។ 
ទំនៀមទំលាប់ហាលខោអាវពាសពេញទីក្រុងសៀងហៃរបស់ប្រជាជនចិនបានលេចឡើងក្នុងទសវត្សរ៍ឆ្នាំ ១៩៨០ និង ១៩៩០ នៅពេលមនុស្សប្រើវិធីនេះដើម្បីងាយស្រួលហាលខោអាវឆាប់ស្ងួត ដោយសារតែកន្លែងរស់នៅតូចចង្អៀតពេក ធ្វើឱ្យអ្នករស់នៅខ្វះកន្លែងសម្ងួតសម្លៀកបំពាក់គ្រប់គ្រាន់ ទើបសម្រេចហាលខោអាវក្រៅផ្ទះពាសវាលពាសកាលបែបនេះតែម្តងទៅ៕
