ប្រទេសវៀតណាម ៖ កាលពីចុងខែកញ្ញា ឆ្នាំ២០២៤ រដ្ឋាភិបាលវៀតណាមលើកឡើងថា Samsung Display គឺជាក្រុមហ៊ុនផលិតឧបករណ៍អេឡិចត្រូនិករបស់កូរ៉េខាងត្បូងមានគម្រោងវិនិយោគស្មើទឹកប្រាក់១.៨០០លានដុល្លារអាមេរិកនៅឆ្នាំ២០២៤ ដើម្បីសាងសង់រោងចក្រថ្មីស្ថិតនៅភាគខាងជើងប្រទេសវៀតណាម ។ ការសាងសង់រោងចក្រថ្មីបានធ្វើឱ្យវៀតណាមកាន់តែលេចធ្លោបន្ថែមទៀតក្នុងចំណោមបណ្តាប្រទេសអាស៊ីអាគ្នេយ៍ ។.png)
សារព័ត៌មានរ៉យទ័ររាយការណ៍ថា រោងចក្រថ្មីនេះនឹងមានទីតាំងនៅសួនឧស្សាហកម្ម Yen Phong ក្នុងខេត្តបាក់និញ និងនៅជិតរោងចក្រចាស់របស់ក្រុមហ៊ុន Samsung ហើយរោងចក្រថ្មីនឹងផលិតអេក្រង់ OLED សម្រាប់រថយន្ត និងឧបករណ៍បច្ចេកវិទ្យា ។ ការវិនិយោគនេះនឹងបង្កើនតម្លៃវិនិយោគសរុបរបស់ក្រុមហ៊ុនផ្នែក Samsung Group ក្នុងខេត្តបាក់និញ កើនឡើងពី៦.៥០០លានដុល្លារអាមេរិកនាពេលបច្ចុប្បន្ន មកស្មើនឹង៨.៣០០លានដុល្លារអាមេរិក ។.png)
នាយកគ្រប់គ្រងក្រុមហ៊ុន Samsung ឱ្យដឹងថា បច្ចុប្បន្ន Samsung មានរោងចក្រផលិត ចំនួន៦កន្លែង, មជ្ឈមណ្ឌលស្រាវជ្រាវ និងអភិវឌ្ឍន៍ ១កន្លែង ព្រមទាំងមជ្ឈមណ្ឌលលក់ទំនិញ ១កន្លែងនៅប្រទេសវៀតណាម ដែលមានទឹកប្រាក់វិនិយោគសរុប ស្មើនឹង២២.៤០០លានដុល្លារអាមេរិក ។
ក្រៅពីនេះ រដ្ឋាភិបាលវៀតណាមមានគោលដៅធ្វើឱ្យខេត្តបាក់និញ ក្លាយជាមជ្ឈមណ្ឌលសេដ្ឋកិច្ច និងវប្បធម៌ ហើយរដ្ឋាភិបាលវៀតណាមរំពឹងថា នៅឆ្នាំ២០៥០ បាក់និញ នឹងក្លាយជាខេត្តមួយក្នុងចំណោមខេត្តមានសេដ្ឋកិច្ចរីកចម្រើនខ្លាំងរបស់វៀតណាម ។ ក្រៅពីនេះ បាក់និញនឹងក្លាយជាមជ្ឈមណ្ឌលឧស្សាហកម្មបច្ចេកវិទ្យាខ្ពស់ ព្រមទាំងការស្រាវជ្រាវ និងអភិវឌ្ឍន៍លំដាប់ពិភពលោកផងដែរ ។
ការប្រកាសសាងសង់រោងចក្រថ្មីនៅវៀតណាមបានកើតឡើងក្រោយពីកិច្ចប្រជុំរវាងនាយករដ្ឋមន្ត្រីវៀតណាម លោក Pham Minh Chinh និងនាយកគ្រប់គ្រងជាន់ខ្ពស់របស់ក្រុមហ៊ុន Samsung ប្រចាំវៀតណាម កាលពីថ្ងៃទី២២ ខែកញ្ញា ឆ្នាំ២០២៤ ។ លោកនាយករដ្ឋមន្ត្រីវៀតណាមបានចុះកិច្ចព្រមព្រៀង MOU ជាផ្លូវការនៅខេត្តបាក់និញ ជាមួយ Samsung ។
គួរបញ្ជាក់ថា រយៈពេល១០ឆ្នាំកន្លងមកនេះ វៀតណាមបានក្លាយជាប្រទេសលេចធ្លោមួយនៅតំបន់អាស៊ីអាគ្នេយ៍ និងក្លាយជាមជ្ឈមណ្ឌលផលិតទំនិញគួរឱ្យចាប់អារម្មណ៍បំផុតសម្រាប់បណ្តាក្រុមហ៊ុនអេឡិចត្រូនិកមកពីបរទេស ៕
