ប្រទេសប៉ាគីស្ថាន ៖ នេះជាទូរដាក់ប្រាក់ ATM ដែលមានទីតាំងនៅចំណុចខ្ពស់បំផុតលើពិភពលោក និងខ្ពស់ជាងកម្រិតទឹកសមុទ្រ រហូតដល់៤.៦៩៣ម៉ែត្រ ។ រយៈពេលជាច្រើនឆ្នាំមកនេះ ទូរ ATM បានក្លាយជាបច្ចេកវិទ្យាមួយក្នុងចំណោមបច្ចេកវិទ្យាទំនើប ដែលបានប្រើប្រាស់ច្រើនបំផុតលើពិភពលោក ។ ប៉ុន្តែមនុស្សភាគច្រើនពុំធ្លាប់ឃើញទូរ ATM មានទីតាំងនៅតំបន់ព្រៃក្រាស់ ឬនៅលើភ្នំខ្ពស់គ្របដណ្តប់ដោយព្រិលបែបនេះទេ ។

បើលោកអ្នកធ្វើដំណើរឆ្លងកាត់តំបន់គុនចារ៉ាប់ ខេត្តគៀវគីប បាន់ឌីស្ថាន ស្ថិតនៅភាគខាងជើងប្រទេសប៉ាគីស្ថាន លោកអ្នកនឹងបានឃើញទូរ ATM មួយកន្លែងអាចប្រើប្រាស់បាន ហើយវាស្ថិតនៅទីតាំងខ្ពស់បំផុតលើពិភពលោកផងដែរ ។

ទូរ ATM នេះត្រូវបានដំឡើងនៅឆ្នាំ២០១៦ ដែលអនុញ្ញាតឱ្យអ្នកដំណើរឆ្លងកាត់ទីនេះអាចដកជាប្រាក់សុទ្ធ ។ វាដំណើរការដោយកម្លាំងថាមពលព្រះអាទិត្យ និងកម្លាំងខ្យល់ ហើយវាជាកម្មសិទ្ធិរបស់ធនាគារជាតិប៉ាគីស្ថាន (National Bank of Pakistan-NBP) ។ អ្នកដំណើរឆ្លងកាត់ទីនេះភ្ញាក់ផ្អើលយ៉ាងខ្លាំង និងពុំនឹកស្មានថា នៅលើភ្នំទឹកកកដ៏ខ្ពស់បែបនេះ បែរជាមានទូរ ATM ដូចក្នុងទីក្រុងដែរ ។

ការដំឡើងទូរ ATM នៅទីតាំងខ្ពស់បំផុតលើពិភពលោក គឺមានការទទួលស្គាល់ពី Guinness World Records ។ ធនាគារប៉ាគីស្ថានបានចំណាយពេលរហូតដល់៤ខែ ទើបអាចដំឡើងទូរ ATM នៅទីនេះរួចរាល់ ហើយធនាគារត្រូវថែទាំ និងដាក់ប្រាក់ក្នុងទូរនេះជាប្រចាំ ។ វាជាការព្យាយាមមួយយ៉ាងខ្លាំង ដោយសារសាខាធនាគារ NBP នៅជិតបំផុតនៅឆ្ងាយពីនេះចំនួន៨២គីឡូម៉ែត្រ ។

នាយកគ្រប់គ្រងសាខាធនាគារ NBP នៅក្បែរនេះ បានបើករថយន្តទៅកាន់ទីតាំងទូរ ATM ស្ថិតនៅទីតាំងដ៏ខ្ពស់បំផុតជាញឹកញាប់ ដោយធ្វើដំណើរឆ្លងកាត់ខ្យល់បក់ខ្លាំង, ខ្យល់ព្យុះ និងធ្វើដំណើរឡើងភ្នំដ៏គ្រោះថ្នាក់ ដើម្បីទៅត្រួតពិនិត្យថា តើទូរនេះអាចប្រើប្រាស់បានឬអត់? ។ វាជាការផ្តល់ភាពងាយស្រួលដល់ពលរដ្ឋរស់នៅក្បែរនេះ ពុំចាំបាច់លំបាកទៅដកប្រាក់នៅទូរផ្សេង ។

តាមធម្មតា ទូរ ATM នេះគ្មានមនុស្សប្រើប្រាស់ច្រើនទេ ហើយភាគច្រើនសម្រាប់ឱ្យអាជ្ញាធរការពារព្រំដែនមកដកប្រាក់ខែរបស់ពួកគេ ។ ក្រៅពីនេះ ក៏មានពលរដ្ឋរស់នៅក្បែរនេះ និងអ្នកឆ្លងដែនបានមកដកប្រាក់នៅទីនេះដែរ ។ នៅរៀងរាល់២សប្តាហ៍ មានអ្នកមកដកប្រាក់នៅទូរនេះ ចាប់ពី៤លាន ទៅ៥លានរ៉ូពី ។

អ្នកនាំពាក្យរបស់ធនាគារជាតិប៉ាគីស្ថាននិយាយថា យើងត្រូវចំណាយពេលចាប់ពី២ម៉ោង ទៅ២ម៉ោងកន្លះ ដើម្បីធ្វើដំណើរទៅដល់ទីតាំងទូរ ATM ដ៏ខ្ពស់បំផុតលើពិភពលោក ពេលត្រូវការជួសជុលទូរជាបន្ទាន់ ។ បើទោះជាមានការដកប្រាក់តិចតួច ប៉ុន្តែខាងធនាគារបានផ្តល់ភាពសំខាន់លើទូរដកប្រាក់នេះ ដោយសារមានអ្នកចេញ-ចូលដកប្រាក់នៅទីនេះជាហូរហែ ។

អ្នកនាំពាក្យធនាគារជាតិប៉ាគីស្ថានបន្តថា ពួកគេពុំអាចដកប្រាក់នៅទូរនេះច្រើនទេ ។ ការរស់នៅតំបន់នេះជួបការលំបាក ពីព្រោះគ្មានភ្នាក់ងារកណ្តាលណាមួយទទួលផ្ទេរប្រាក់ទៅឱ្យមនុស្សជាទីស្រឡាញ់ ឬគ្រួសាររបស់ពលរដ្ឋរស់នៅទីនេះឡើយ ៕

ប្រទេសជប៉ុន ៖ មនុស្សមួយចំនួនបានទទួលផ្ទះ និងដីធ្លីជាមរតកបន្សល់ទុកពីឪពុក-ម្តាយ ឬជីដូន-ជីតាចែកឱ្យ ដែលធ្វើឱ្យគេមានចិត្តស្រឡាញ់ផ្ទះមួយនេះយ៉ាងខ្លាំង និងពុំព្រមទៅរស់នៅកន្លែងផ្សេងឡើយ ។ ចុះលោកអ្នកវិញ បើមានអ្នកណាម្នាក់ចង់ទិញផ្ទះក្នុងតម្លៃខ្ពស់ តើលោកអ្នកយល់ព្រមរើទីលំនៅចេញពីទីនេះដែរឬទេ?

លោក ថាខាអុ ឈិតុ ជាកសិកររស់នៅប្រទេសជប៉ុនបានស្រឡាញ់ផ្ទះ និងកសិដ្ឋានរបស់លោកយ៉ាងខ្លាំង រហូតដល់លោកពុំព្រមលក់ផ្ទះទៅឱ្យអ្នកផ្សេងទេ ។ ក្រុមគ្រួសាររបស់លោកបានដាំបន្លែបង្ការក្នុងកសិដ្ឋានជុំវិញផ្ទះតាំងពីជំនាន់ឪពុក-ម្តាយមកម៉្លេះ រហូតដល់ថ្ងៃមួយ ផ្ទៃដីនៅក្បែរៗបានលក់ឱ្យអាជ្ញាធរធ្វើអាកាសយានដ្ឋាន ប៉ុន្តែឪពុករបស់លោក ឈិតុ ពុំព្រមលក់ដីរបស់ខ្លួនដាច់ខាត ។

កាលពីមុន ផ្ទៃដីនៅបរិវេណនេះ គឺជាភូមិមួយមានកសិកររស់នៅចំនួន២៨គ្រួសារ ខណៈភូមិនៅក្បែរគ្នាមានកសិកររស់នៅ៦៦គ្រួសារទៀត ។ ក្រោយមក នៅឆ្នាំ១៩៦០ រដ្ឋាភិបាលជប៉ុនបានសម្រេចចិត្តកសាងអាកាសយានដ្ឋានអន្តរជាតិតូក្យូថ្មី នៅទីក្រុង Sanrizuka (បច្ចុប្បន្ន គឺទីក្រុង Narita ហើយអាកាសយានដ្ឋានក៏ត្រូវបានប្តូរឈ្មោះជាអាកាសយានដ្ឋានអន្តរជាតិ Narita (ឬ Narita International Airport) ។

ពេលនោះហើយ គឺមានជម្លោះកើតឡើងយ៉ាងខ្លាំងរវាងពលរដ្ឋ និងរដ្ឋាភិបាលជប៉ុន រហូតដល់គេដាក់ឈ្មោះថា «ជម្លោះនៅ Sanrizuka» ហើយមានពលរដ្ឋជំទាស់នឹងការសាងសង់អាកាសយានដ្ឋាន រហូតដល់១៧.៥០០នាក់ ។ វាបណ្តាលឱ្យមានហេតុការណ៍ចលាចលកើតឡើងយ៉ាងច្រើន និងមានការប៉ះទង្គិចគ្នាដោយអំពើហិង្សារហូតដល់អាកាសយានដ្ឋានត្រូវបានបំផ្លាញ១០លើក តាំងពីពេលបើកដំណើរការអាកាសយានដ្ឋាន រហូតដល់បច្ចុប្បន្ន ។

ទោះជារដ្ឋាភិបាលព្យាយាមចៀសវាងការដកហូតដីធ្លី ប៉ុន្តែរដ្ឋាភិបាលបានប្រើប្រាស់វិធីផ្សេងៗដើម្បីយកដីជាច្រើនពីពលរដ្ឋ ។ រីឯពលរដ្ឋរស់នៅភូមិរបស់លោក ឈិតុ បាននាំគ្នាជម្លៀសចេញពីភូមិជាបន្តបន្ទាប់ និងទទួលយកប្រាក់យ៉ាងច្រើនពីអាជ្ញាធរ លើកលែងតែឪពុករបស់លោក ឈិតុ បដិសេធពុំទទួលយកប្រាក់ចំនួន១៨០លានយេន ខណៈប្រាក់នេះមានតម្លៃខ្ពស់ស្មើនឹងការដាំបន្លែលក់ក្នុងកសិដ្នាន រហូតដល់១៥០ឆ្នាំឯណោះ ។ សមាជិកគ្រួសារនេះពុំចាប់អារម្មណ៍នឹងប្រាក់ឡើយ ប៉ុន្តែពួកគេត្រូវការដាំបន្លែក្នុងកសិដ្ឋានបន្តទៀត ។

ក្រោយពីឪពុករបស់លោក ឈិតុ បានស្លាប់ពេលអាយុ៨៤ឆ្នាំ លោក ឈិតុ ក៏បានលាឈប់ពីការងារក្នុងភោជនីយដ្ឋាន ដើម្បីមកថែទាំកសិដ្ឋានបន្លែរបស់គ្រួសារ ។ លោកនិយាយថា ៖ «ដីនៅទីនេះមានគុណភាពល្អ ហើយគ្រួសារលោកបានប្រមូលផលកសិកម្មលើដីនេះអស់ជាង១០០ឆ្នាំហើយ តាំងពីជំនាន់ឪពុកលោក ។ ការដាំបន្លែ, ការប្រមូលផល និងដឹកជញ្ជូនទិន្នផលកសិកម្មមានគុណភាពល្អធ្វើឱ្យអតិថិជនពេញចិត្ត ហើយធ្វើឱ្យខ្ញុំមានក្តីសុខ» ។

លោកបន្តថា ៖ «រៀងរាល់ឆ្នាំ ពួកយើងបានដាំការ៉ុត, ខ្ទឹមបារាំង, ខ្ទឹមស និងស្លឹកខ្ទឹម បើសរុប គឺយើងដាំបន្លែតាមធម្មជាតិជាង១០ប្រភេទ ។ ការដាំបន្លែជាការងារធ្ងន់មួយ រហូតដល់ខ្ញុំមិនសូវមានពេលទំនេរច្រើន តែខ្ញុំឆ្លៀតពេលទៅច្រៀងខារ៉ាអូខេ និងហូបអីខ្លះៗ» ។

ចំណែកផលប៉ះពាល់ពេលជំងឺកូវីដ-១៩ ឆ្លងរាតត្បាត លោកនិយាយថា វាគ្មានផលប៉ះពាល់ទេ សូម្បីតែបន្តិច ប៉ុន្តែខ្យល់អាកាសកាន់តែបរិសុទ្ធ ។ ផ្ទះរបស់លោកក៏ស្ងប់ស្ងាត់ជាងមុន ពីព្រោះមានការធ្វើចរាចរលើអាកាសតិចតួច ។ ប៉ុន្តែក្តីសុខរបស់លោក និងគ្រួសារមិនស្ថិតស្ថេរទេ ពីព្រោះកាលពីខែធ្នូ ឆ្នាំ២០១៨ តុលាការខេត្តស៊ីប៉ាក់ បានសម្រេចឱ្យគេយកដីរបស់លោកធ្វើជា Runway ទី២ របស់អាកាសយានដ្ឋាន Narita ។

ក្រោយមក តុលាការក្នុងតំបន់មួយទៀតបានសម្រេចឱ្យផ្អាកការសាងសង់ Runway និងរង់ចាំការកាត់ក្តីរបស់តុលាការឧទ្ទរណ៍នៅទីក្រុងតូក្យូ នាឆ្នាំបន្ទាប់ ។ បច្ចុប្បន្ន លោក និងគ្រួសារបានក្លាយជាអ្នកតំណាងផ្នែកតស៊ូមតិដើម្បីសិទ្ធិពលរដ្ឋ ដោយមានអ្នកស្ម័គ្រចិត្ត និងសកម្មជនជាច្រើនគាំទ្រលោកជានិច្ច ក្នុងរយៈពេលជាច្រើនឆ្នាំមកនេះ ។

លោក និងគ្រួសារបានបន្តរស់នៅកណ្តាលអាកាសយានដ្ឋាន Narita និងមានយន្តហោះ ហោះលើដំបូលផ្ទះរបស់លោក ២៤ម៉ោង ។ វិធីមួយដើម្បីឱ្យលោកអាចចេញ-ចូលក្នុងកសិដ្ឋានដាំបន្លែបាន គឺត្រូវឆ្លងកាត់ផ្លូវរូងក្រោមដី ។ បើទោះជាលំបាកក្តី ប៉ុន្តែលោកបានរស់នៅលើទឹកដីកំណើតយ៉ាងមានក្តីសុខ ៕

ប្រទេសឡាវ៖ ប្រទេសឡាវគ្រោងបង្កើត Bullion Bank ដែលជាធនាគារមាស ដើម្បីពង្រឹងស្ថិរភាពហិរញ្ញវត្ថុ និងពង្រឹងប្រាក់គីបឡាវ ត្រូវបានគេរំពឹងថានឹងចាប់ផ្តើមប្រតិបត្តិការនៅថ្ងៃទី១ ខែកញ្ញា ឆ្នាំ២០២៤ ខាងមុខនេះ។
យោងតាមការចុះផ្សាយរបស់ Laotian Times បានឱ្យដឹងថា ការបង្កើតធនាគារមាសនឹងរួមចំណែកក្នុងការអភិវឌ្ឍន៍គម្រោងយុទ្ធសាស្ត្រ ក៏ដូចជាលើកកំពស់ជំហរហិរញ្ញវត្ថុរបស់ប្រទេសឡាវនៅលើឆាកពិភពលោក ស្របតាមចក្ខុវិស័យរបស់រដ្ឋាភិបាលសម្រាប់ឯករាជ្យភាព និងស្ថិរភាពសេដ្ឋកិច្ច។

នេះបើតាមប្រភពបានឱ្យដឹងទៀតថា ការបង្កើតធនាគារ Bullion Bank ក្នុងស្រុកក៏ជួយប្រទេសឡាវដោះស្រាយការរំខានផ្នែកសេដ្ឋកិច្ច និងហិរញ្ញវត្ថុ ដើម្បីជម្នះបញ្ហាប្រឈមសេដ្ឋកិច្ចនាពេលបច្ចុប្បន្ន រួមទាំងសម្រួលដល់ការរៃអង្គាសថវិកា និងកែលម្អសាច់ប្រាក់ងាយស្រួលផងដែរ។ លើសពីនេះធនាគារមាសក៏នឹងរក្សាប្រភពដែលមានស្រាប់ក្នុងប្រទេស ដែលនឹងធ្វើឱ្យប្រទេសឡាវមានសេដ្ឋកិច្ចនិរន្តរភាពដោយខ្លួនឯង រួមជាមួយនឹងការអាចបំពេញតាមស្តង់ដារទីផ្សារក្នុងតំបន់ និងពិភពលោក។

ដូច្នេះនៅខែក្រោយនេះ ធនាគារត្រូវបានគេរំពឹងថានឹងបើកដំណើរការជាដំណាក់កាលទី ១ ហើយនៅចុងខែវិច្ឆិកាឆ្នាំនេះ ធនាគារនឹងបើកដំណើរការសេវាកម្មពេញលេញតែម្តង។ នេះបើយោងតាមលោក Chanthone Sitthixay ប្រធាន និងជាស្ថាបនិកនៃក្រុមហ៊ុន PTL Holding Co., Ltd. ធនាគារមាស Bullion នឹងអនុញ្ញាតឱ្យទាំងបុគ្គល និងនីតិបុគ្គលដាក់ប្រាក់មាសរបស់ពួកគេ និងប្រើប្រាស់សេវាហិរញ្ញវត្ថុផ្សេងទៀតដែលផ្តល់ដោយធនាគារ ដោយបង្កើនតួនាទីរបស់ខ្លួនជាស្ថាប័នកណ្តាលនៅក្នុងទីផ្សារមាស។

បន្ថែមពីនេះធនាគារក៏នឹងធ្វើស្ដង់ដារការធ្វើពាណិជ្ជកម្ម និងការវិនិយោគមាស ដោយទាក់ទាញភាគីពាក់ព័ន្ធទាំងក្នុងនិងក្រៅប្រទេសផងដែរ។ គួរបញ្ជាក់ដែរថា ក្រសួងហិរញ្ញវត្ថុរបស់ប្រទេសឡាវបានចុះហត្ថលេខាលើកិច្ចព្រមព្រៀងជាមួយក្រុមហ៊ុន PTL Holding Co., Ltd. នៅថ្ងៃទី ៧ ខែសីហា ឆ្នាំ២០២៤ ដើម្បីបង្កើតធនាគារមាស Bullion ក្នុងគោលបំណងបង្កើតទុនបម្រុងមាស ពង្រឹងស្ថិរភាពហិរញ្ញវត្ថុ និងពង្រឹងប្រាក់គីបឡាវ៕

ប្រទេសអ៊ីតាលី ៖ មនុស្សភាគច្រើនគិតថា ការរស់នៅប្រទេសរបស់ខ្លួនគឺសប្បាយចិត្តបំផុត ប៉ុន្តែបើមានអ្នកណាម្នាក់ផ្តល់ឱកាសឱ្យយើងប្តូរទីលំនៅទៅរស់នៅលើកោះដ៏ស្រស់ស្អាតមួយ ដែលពោរពេញទៅដោយទេសភាពបែបធម្មជាតិ ខ្យល់អាកាសបរិសុទ្ធ ថែមទាំងផ្តល់ប្រាក់ឱ្យយ៉ាងច្រើន តើយើងយល់ព្រមដែរឬទេ?

កាលពីឆ្នាំ២០២២ អាជ្ញាធរកោះ Sardinia របស់អ៊ីតាលីបានផ្តល់ប្រាក់រហូតដល់១ម៉ឺន៥ពាន់អឺរ៉ូ (ឬស្មើនឹង១៣.៨៨៨ដុល្លារអាមេរិក) ដើម្បីឱ្យពលរដ្ឋផ្លាស់មករស់នៅលើកោះឋានសួគ៌ដ៏ស្រស់ស្អាតនេះ ។ អាជ្ញាធរសង្ឃឹមថា នឹងមានពលរដ្ឋអ៊ីតាលីសម្រេចចិត្តមករស់នៅលើកោះឆ្ងាយដាច់ស្រយាលនេះ ខណៈចំនួនពលរដ្ឋរស់នៅលើកោះបានធ្លាក់ចុះជាបន្តបន្ទាប់ ។

ប៉ុន្តែប្រាក់ដែលអាជ្ញាធរផ្តល់ឱ្យ គឺពុំអាចយកទៅចំណាយអ្វីផ្តេសផ្តាសទេ គឺពលរដ្ឋត្រូវតែយកប្រាក់នេះទៅទិញផ្ទះ ឬជួសជុលផ្ទះមួយកន្លែងនៅលើកោះ ។ បន្ទាប់មក ផ្ទះរបស់ពួកគេត្រូវស្ថិតនៅទីតាំងដែលមានពលរដ្ឋរស់នៅតិចជាង៣ពាន់នាក់ ហើយត្រូវធ្វើសៀវភៅគ្រួសារលើកោះ Sardinia ក្នុងរយៈពេល១៨ខែ ក្រោយពីពួកគេធ្វើដំណើរមកដល់កោះ ។

គ្រីស្ទាន សូឌីណាស់ ជាអាជ្ញាធរកោះ Sardinia និយាយថា យើងត្រូវតែអរគុណដល់គម្រោងសាងសង់ផ្ទះ ពីព្រោះនេះជាគុណសម្បត្តិដើម្បីឱ្យវាក្លាយជាតំបន់មួយសម្បូរបែបសម្រាប់ពលរដ្ឋណាសម្រេចចិត្តមករស់នៅលើកោះ និងបង្កើតក្រុមគ្រួសារនៅទីនេះ ។ ការរីកចម្រើននឹងពុំកើតឡើងទេ ប្រសិនបើគ្មានការអភិវឌ្ឍតំបន់ជនបទ ដែលជាតំបន់គ្មានឱកាសល្អៗសម្រាប់អ្នករស់នៅ ។

ហេតុនេះ យើងនឹងបង្កើតគោលនយោបាយថ្មីៗសម្រាប់បង្កើនចំនួនពលរដ្ឋរស់នៅលើកោះជាមុនសិន ។ កោះ Sardinia គឺជាតំបន់ស្វយ័តមួយស្ថិតនៅភាគខាងលិចប្រទេសអ៊ីតាលី ហើយវាជាកោះធំលំដាប់ទី២ ក្នុងសមុទ្រមេឌីទែរ៉ាណេ (Mediterranean) និងមានផ្ទៃដីធំទូលាយ (ឬធំជាងទីក្រុងបាងកក ប្រទេសថៃ ចំនួន៣ដង) ។

នៅទីនេះ គឺជាតំបន់ជនបទដែលមានឆ្នេរសមុទ្រដ៏ស្រស់ស្អាត ដែលមានប្រវែងរហូតដល់១.៨៤៩គីឡូម៉ែត្រ ។ បើទោះជាផ្ទៃដីកោះភាគច្រើនសម្បូរទៅដោយច្រាំងថ្មចោទខ្ពស់ៗ ប៉ុន្តែនៅទីនេះ មានទឹកសមុទ្រថ្លា ប្រៀបដូចជាកោះឋានសួគ៌លើដី ៕

ប្រទេសជប៉ុន៖ គិតត្រឹមខែឧសភា ឆ្នាំ ២០២៣ រហូតមកដល់ពេលនេះ ចំនួនកុមារបរទេសដែលបានអាហាររូបករណ៍ទៅរៀននៅប្រទេសជប៉ុនក្នុងកម្រិតបឋមសិក្សា មធ្យមសិក្សា និងវិទ្យាល័យគឺបានកើនឡើងខ្លាំងមិនធ្លាប់មាន។
នេះបើយោងតាមលទ្ធផលនៃការស្ទង់មតិរបស់ក្រសួងអប់រំជប៉ុន ដែលធ្វើឡើងជាមួយក្រុមប្រឹក្សាអប់រំនៃទីក្រុងចំនួន ១,៧៤១ នៅទូទាំងប្រទេសបានឱ្យដឹងថា កុមារបរទេសដែលមានសិទ្ធិចូលរៀនថ្នាក់បឋមសិក្សា និងមធ្យមសិក្សាគឺបានកើនឡើងចំនួន ៤១៨ នាក់បើធៀបនឹងឆ្នាំមុន។

ដូច្នេះសរុបមកសិស្សបរទេសដែលបានចុះឈ្មោះសុំអាហាររូបករណ៍ទៅរៀននៅជប៉ុនគឺមានចំនួន ១៥០,៦៩៥ នាក់ កើនឡើង ១៣,៧៧២ បើធៀបនឹងឆ្នាំមុន ដែលក្នុងនោះមានកុមារបឋមសិក្សាមានចំនួន ១០៦,៥៤០ នាក់ ហើយកុមារមធ្យមសិក្សា និងវិទ្យាល័យគឺមានចំនួន ៤៤,១៥៥ នាក់ ។ ដោយសិស្សបរទេសចំនួន ៥៧,៧១៨ នាក់នៅក្នុងសាលាបឋមសិក្សា មធ្យម និងវិទ្យាល័យ ដែលត្រូវការការបង្រៀនភាសាជប៉ុនពិសេសបានកើនឡើង ២១.២% ខ្ពស់ជាងការស្ទង់មតិមុនក្នុងឆ្នាំ ២០២១ ទៅទៀត។

ទោះជាយ៉ាងណាក៏ដោយ ក្នុងចំណោមនោះកុមារបរទេស ៩៧០ នាក់គឺមិនជាប់អាហាររូបករណ៍នោះទេ ខណៈដែល ៧,១៩៩ នាក់ទៀតមិនអាចទាក់ទងបាន និង ៤៣២ នាក់មិនត្រូវបានស្ទង់មតិដោយក្រុមប្រឹក្សាអប់រំ។ យោងតាមរបាយការណ៍របស់ក្រសួងអប់រំបានឱ្យដឹងថា នេះមិនមែនជាលើកទីមួយទេដែលសិស្សបរទេសមិនបានចូលរៀន។ កាលពីឆ្នាំ ២០១៩ គឺមានកុមារបរទេសប្រហែល ២០,០០០ នាក់ក៏មិនបានចូលរៀនដែរ។

ទោះបីជាយ៉ាងនេះក្តី ក្រសួងអប់រំរបស់ប្រទេសជប៉ុនបានបង្ហាញថា នៅឆ្នាំនេះកំណើនកុមារបរទេសដែលបានអាហាររូបករណ៍គឺគួរឱ្យកត់សម្គាល់ មានន័យថាកើនឡើងខ្លាំង ខណៈកាលពីកន្លងទៅសិស្សបរទេសមិនសូវទទួលបានអាហាររូបករណ៍មករៀននៅប្រទេសជប៉ុនឡើយ។ ការកើនឡើងចុងក្រោយនេះ អាចបណ្តាលមកពីការកើនឡើងនៃចំនួនកុមារបរទេសសរុបនៅក្នុងប្រទេសជប៉ុនកាលពីឆ្នាំមុន៕