សារព័ត៌មាន AFP រាយការណ៍ថា ពលរដ្ឋចិនចំនួន១៦នាក់ត្រូវបានរ.ន្ទះបា.ញ់ ក្នុងពេលតែមួយក្រោយពីមេឃធ្លាក់ភ្លៀងយ៉ាងខ្លាំង កាលពីថ្ងៃទី១១ ខែសីហា ឆ្នាំ២០២៤ ហើយពួកគេក៏រត់ទៅជ្រកភ្លៀងក្នុងខ្ទមចម្ការ ។ ហេតុការណ៍គួរឱ្យតក់ស្លុ.ត នេះបានកើតឡើងនៅទីក្រុង Changzhou ខេត្ត Jiangsu ស្ថិតនៅភាគខាងកើតប្រទេសចិន ។

អាជ្ញាធរនិយាយថា ដំបូលខ្ទមបានបាក់ធ្លាក់សង្កត់លើមនុស្សទាំងអស់ដែលកំពុងជ្រកភ្លៀងក្រោយពេលរន្ទះបាញ់ភ្លាម ហើយអាជ្ញាធរបានបញ្ជូនអ្នករងរបួសទៅកាន់មន្ទីរពេទ្យ ។ មនុស្សរងរបួសធ្ងន់ធ្ងរក្នុងហេតុការណ៍នេះស្មើនឹង៦នាក់ ហើយពួកគេបានស្លាប់នាពេលបន្ទាប់ រីឯមនុស្ស១០នាក់ទៀតរួចផុតពីគ្រោះថ្នាក់ ខណៈគ្រូពេទ្យកំពុងតែព្យាបាលយ៉ាងដិតដល់ ។

ក្រៅពីនេះ អាជ្ញាធរបានដាស់តឿនឱ្យពលរដ្ឋទាំងអស់ប្រុងប្រយ័ត្នខ្លួន ដោយសារបច្ចុប្បន្ន ប្រទេសចិនបានប្រឈមនឹងអាកាសធាតុប្រែប្រួលនៅរដូវក្តៅ និងមានភ្លៀងធ្លាក់ខ្លាំងនៅតំបន់ភាគខាងកើត និងខាងត្បូង ។ រីឯតំបន់ជាច្រើននៅភាគខាងជើងប្រទេសចិនមានអាកាសធាតុក្តៅខ្លាំង ដោយសារសីតុណ្ហភាពកើនឡើងខ្ពស់ជាបន្តបន្ទាប់ ។

គួរបញ្ជាក់ថា កាលពីខែកក្កដា ឆ្នាំ២០២៤ មានភ្លៀងធ្លាក់យ៉ាងខ្លាំងនៅតំបន់ភាគខាងជើងខេត្ត Shanxi ប្រទេសចិន ដែលបណ្តាលឱ្យបាក់ស្ពាន និងមានមនុស្សស្លាប់រហូតដល់៣៨នាក់ផងដែរ ។

ដោយឡែក សារព័ត៌មាន AFP រាយការណ៍ថា មានរន្ទះបាញ់ភ្ញៀវទេសចរនៅឆ្នេរសមុទ្រក្បែរទីក្រុងទេសចរណ៍ Alba Adriatica ខេត្ត Teramo ភាគកណ្តាលប្រទេសអ៊ីតាលី កាលពីថ្ងៃទី៣ ខែសីហា កន្លងមក ដែលបណ្តាលឱ្យភ្ញៀវទេសចររងរបួស៣នាក់ ក្នុងនោះម្នាក់រងរបួសធ្ងន់ ។

រីឯសារព័ត៌មានអ៊ីតាលីរាយការណ៍ថា អ្នករងរបួសធ្ងន់ម្នាក់ត្រូវបានបញ្ជូនតាមឧទ្ធម្ភាគចក្រទៅកាន់មន្ទីរនៅក្បែរនេះ ។ ភ្នាក់ងារការពារជនស៊ីវិលរបស់អ៊ីតាលីបានជូនដំណឹងអំពីស្ថានភាពអាកាសធាតុនៅតំបន់កណ្តាលប្រទេស ព្រមទាំងដាស់តឿនឱ្យពលរដ្ឋប្រយ័ត្នគ្រោះថ្នាក់ដែលបណ្តាលមកពីភ្លៀងធ្លាក់ខ្លាំង និងផ្គររន្ទះ ៕

ប្រទេសកាណាដា ៖ ចង្កឹះឈើប្រើប្រាស់រួចបានក្លាយជាសំរាមរហូតដល់ជាង១សែនចង្កឹះនៅទីក្រុង Vancouver ប្រទេសកាណាដា ទើបធ្វើឱ្យវិស្វករម្នាក់ដែលរស់នៅទីក្រុងមើលឃើញពីបញ្ហានេះ និងប្រមូលចង្កឹះឈើមកផលិតជាគ្រឿងសង្ហារិមប្រណីត ។ គំនិតថ្មីនេះបានក្លាយជាជម្រើសល្អមួយក្នុងការប្រើប្រាស់ធនធានដែលមិនបំផ្លាញបរិស្ថាន ។

វិស្វករអាល្លឺម៉ង់រស់នៅប្រទេសកាណាដា បានប្រមូលចង្កឹះឈើដែលប្រើប្រាស់រួចហើយមកផលិតជាគ្រឿងសង្ហារិមមិនប៉ះពាល់បរិស្ថាន និយាយថា ៖ «ក្នុងនាមខ្ញុំជាវិស្វករ ខ្ញុំចង់ពិសោធន៍ឱ្យមនុស្សគ្រប់គ្នាឃើញថា វត្ថុគ្មានតម្លៃដូចជាសំរាម ក៏អាចយកវាមកផលិតជាសម្ភារៈមានតម្លៃបានដែរ» ។

លោក Felix Bock ជាវិស្វករអាល្លឺម៉ង់រស់នៅទីក្រុង Vancouver មានគំនិតថ្មីមួយ គឺការប្រមូលចង្កឹះឈើប្រើប្រាស់រួចនៅតាមភោជនីយដ្ឋានផ្សេងៗក្នុងទីក្រុង ដែលស្មើនឹងជាង១សែនចង្កឹះក្នុង១ថ្ងៃ ដើម្បីផលិតជាគ្រឿងសង្ហារិមយ៉ាងស្រស់ស្អាត ។

ហេតុនេះ លោកក៏ចាប់ផ្តើមប្រមូលចង្កឹះឈើនៅតាមភោជនីយដ្ឋានផ្សេងៗជារៀងរាល់សប្តាហ៍ និងជំហានដំបូង លោកបានសាកល្បងយកវាមកផលិតជាទ្រនាប់កែវ និងជ្រុញ ។ នេះជាចំណុចចាប់ផ្តើមរបស់ ChopValue ជាក្រុមហ៊ុនផលិតគ្រឿងសង្ហារិមឈើប្រណីត ។

រយៈពេល៦០ឆ្នាំកន្លងមក តម្រូវការប្រើប្រាស់ចង្កឹះឈើបានកើនឡើងរហូតដល់៦០% នៅទូទាំងពិភពលោក ដែលធ្វើឱ្យការកាប់ដើមឈើកើនឡើង ស្របពេលតម្រូវការប្រើប្រាស់ចង្កឹះកើនឡើង ។ ដូច្នេះ ក្រុមហ៊ុនជាច្រើនបានជ្រើសរើសដើមឫស្សីមកផលិតជាចង្កឹះប្រើប្រាស់រួចបោះចោល ពីព្រោះវាជារុក្ខជាតិដុះលូតលាស់លឿន និងរឹងមាំ ប៉ុន្តែចង្កឹះឈើទាំងនេះ ក៏ក្លាយជាសំរាមពាសពេញពិភពលោក ។

លោក Felix Bock និយាយថា វត្ថុថ្មីដែលផលិតនេះមានភាពស្រស់ស្អាតដូចឈើនៅតំបន់ក្តៅ ហើយលោកសង្ឃឹមថា គ្រឿងសង្ហារិមប្រណីតផលិតពីចង្កឹះទាំងនេះ នឹងជួយលើកទឹកចិត្តដល់ជាងឈើផ្សេងៗឱ្យពិចារណាយកជម្រើសមាននិរន្តរភាព ចៀសវាងប្រើប្រាស់ធនធានធម្មជាតិព្រៃឈើមកផលិតជាគ្រឿងសង្ហារិមប៉ះពាល់បរិស្ថាន ។

ក្រុមហ៊ុន ChopValue បានយកសំរាមចង្ហឹះជាង១៥០លានចង្កឹះមកកែច្នៃឡើងវិញ ព្រមទាំងកាត់បន្ថយការបញ្ចេញកាបូនឌីអុកស៊ីតទៅលើបរិយាកាសយ៉ាងច្រើន ។ ជាមួយគ្នានេះ ក្រុមហ៊ុនក៏មានរោងចក្រផលិតគ្រឿងសង្ហារិមមិនប៉ះពាល់បរិស្ថាននៅប្រទេសចំនួន៩ ទៀតផង ។

វិស្វករអាល្លឺម៉ង់បញ្ជាក់ថា ៖ «ខ្ញុំសង្ឃឹមថា ថ្ងៃអនាគត ទីក្រុងទាំងអស់នឹងយកសំរាមមកកែច្នៃឡើងវិញ ជំនួសការដឹកជញ្ជូនសំរាមចេញពីទីក្រុង ពីព្រោះសំរាមមិនរលាយទៅណាទេ ។ ហេតុនេះ បើយើងអាចផលិតវត្ថុថ្មីមិនប៉ះពាល់បរិស្ថាន គឺយើងនឹងអាចផ្លាស់ប្តូរសំរាមឱ្យក្លាយជាធនធានថ្មី ដូចគ្នានឹងការផលិតទំនិញមានគុណភាពខ្ពស់» ៕

ប្រទេសអូស្ត្រាលី ៖ ទីក្រុង Wittenoom ស្ថិតនៅតំបន់ Pibara ភាគខាងលិចប្រទេសអូស្ត្រាលី ត្រូវបានគេចាត់ទុកថា គឺជាតំបន់មួយក្នុងចំណោមតំបន់មានជាតិពុលច្រើន ឬមានបរិយាកាសកខ្វ.ក់ បំផុតលើពិភពលោក ។ ប៉ុន្តែនៅតែមានភ្ញៀវទេសចរជាច្រើននាក់មកលេងទីក្រុងនេះជាបន្តបន្ទាប់ បើទោះជាអាជ្ញាធរបានដាស់តឿនពីគ្រោះថ្នា.ក់ ដល់ជីវិតយ៉ាងណាក្តី ។

ចាប់ពីឆ្នាំ១៩៣០ ដល់ឆ្នាំ១៩៦៦ ទីក្រុង Wittenoom មានពលរដ្ឋរស់នៅប្រមាណ២ម៉ឺននាក់ ហើយពលរដ្ឋភាគច្រើនធ្វើការក្នុងទីក្រុងនេះ ដែលបច្ចុប្បន្ន ត្រូវបានគេបោះបង់ចោល ។ ពួកគេធ្វើការផ្នែកជីកយករ៉ែថ្មធំៗដែលប៉ះពាល់ដល់ជីវិតជារៀងរាល់ថ្ងៃ ហើយបើទោះជាការជីករ៉ែថ្មត្រូវបានផ្អាកអស់ជាច្រើនឆ្នាំក្តី ប៉ុន្តែទីក្រុងនេះ បានគ្របដណ្តប់ទៅដោយរ៉ែថ្មប្រមាណ៣លានតោន និងធ្វើឱ្យអ្នករស់នៅទីក្រុងស្លាប់ដោយសារបរិយាកាសកខ្វក់ ។

ពលរដ្ឋរស់នៅទីក្រុង Wittenoom ត្រូវបានអាជ្ញាធរជម្លៀសឱ្យទៅរស់នៅតំបន់ផ្សេងៗ ហើយមានពលរដ្ឋខ្លះពុំព្រមផ្លាស់ចេញពីទឹកដីកំណើតរបស់ខ្លួនទេ ។ ក្រោយមក នៅឆ្នាំ២០១៨ រដ្ឋាភិបាលអូស្ត្រាលីបានសម្រេចចិត្តទិញទ្រព្យសម្បត្តិរបស់ពលរដ្ឋចំនួន៣នាក់ ដែលរស់នៅទីក្រុងនេះឱ្យប្តូរទីលំនៅដើម្បីសុវត្ថិភាពពួកគេ ។ ប៉ុន្តែមានភ្ញៀវទេសចររាប់ពាន់នាក់បានមកលេងទីក្រុងនេះជារៀងរាល់ឆ្នាំ និងបង្ហោះរូបភាពក្នុងបណ្តាញសង្គមព្រោងព្រាត ។

អ្នកជំនាញដាស់តឿនថា ទោះភ្ញៀវទេសចរមកលេងទីក្រុងនេះរយៈពេលខ្លីក្តី ក៏អាចផ្តល់ផលប៉ះពាល់ធ្ងន់ធ្ងរដល់សុខភាព ហើយការកាន់រ៉ែថ្មតែ១ដុំ ក៏ធ្វើឱ្យភ្ញៀវទេសចរស្លាប់បានដែរ ។ រីឯអាជ្ញាធរបានធ្វើគ្រប់វិធីដើម្បីឱ្យភ្ញៀវទេសចរចាកចេញពីទីក្រុងនេះ ដោយលុបឈ្មោះទីក្រុង Wittenoom ចេញពីផែនទី និងដោះស្លាកឈ្មោះទីក្រុងនៅតាមដងផ្លូវ ។ លើសពីនេះ អាជ្ញាធរក៏បានផ្តាច់ចរន្តអគ្គិសនី និងដាក់ស្លាកសញ្ញាព្រមានផ្សេងៗ ប៉ុន្តែភ្ញៀវទេសចរពុំបានចាប់អារម្មណ៍នឹងការដាស់តឿនទាំងនេះសូម្បីតែបន្តិច ។

បើទោះជារដ្ឋមន្ត្រីក្រសួងកិច្ចការជនជាតិដើមភាគតិចនិយាយថា ស្លាកសញ្ញាដាស់តឿនទាំងនេះ ពុំមែនសម្រាប់តុបតែងទីក្រុង Wittenoom ទេ ហើយសារធាតុពុលទាំងនេះនឹងធ្វើឱ្យប៉ះពាល់សុខភាពភ្ញៀវទេសចរយ៉ាងខ្លាំង ។ ហេតុនេះ ការធ្វើដំណើរមកកាន់ទីក្រុងនេះចាត់ទុកថា ឆោតល្ងង់ខ្លាំងណាស់ ។

ភ្ញៀវទេសចរពុំដឹងថា ការចាប់កាន់រ៉ែទាំងនេះនឹងបង្កគ្រោះថ្នាក់ខ្លាំងដល់សុខភាពពួកគេ ដូចជា ៖ កើតជំងឺមហារីកសួត និងរលាកសួតរ៉ាំរ៉ៃ ដែលជំងឺទាំងនេះនឹងកើតឡើងក្រោយពេលប៉ះពាល់រ៉ែជាច្រើនឆ្នាំ ។ នៅមីនា ឆ្នាំ២០២២ រដ្ឋសភាអូស្ត្រាលីបានធ្វើសេចក្តីព្រាងច្បាប់ដើម្បីបិទទីក្រុង Wittenoom ជាផ្លូវការ ដោយការទិញយកទ្រព្យសម្បត្តិនៅសេសសល់ទាំងអស់ក្នុងទីក្រុង ៕

ការប្រកួតកីឡាអូឡាំពិកឆ្នាំ២០២៤ នៅឯទីក្រុងប៉ារីស ប្រទេសបារាំង ដែលបានប្រព្រឹត្តទៅចាប់ពីថ្ងៃទី ២៦ ខែកក្កដា ដល់ថ្ងៃទី១១ ខែសីហា រួមទាំងការប្រកួតចាប់ពីថ្ងៃទី ២៤ ខែកក្កដា។ជាមួយគ្នានោះ កីឡាជាច្រើនប្រភេទក៏បានលេចឡើងនៅក្នុងព្រឹត្តិការណ៍ដ៏ធំអស្ចារ្យនេះ ក៏ដូចជាមានការអញ្ចើញចូលរួមពីកីឡាករកីឡាការនីមកពីជុំវិញពិភពលោក។

យោងតាមការចុះផ្សាយរបស់ Seasia Stats បានគូសបញ្ជាក់ថា បើនិយាយតែចំពោះតំបន់អាស៊ីអាគ្នេយ៍យើងទាំង ១១ ប្រទេស ក្នុងនោះគឺមានតែ ៥ ប្រទេសប៉ុណ្ណោះ ដែលទទួលបានមេដៃពីកាប្រកួតកីឡាអូឡាំពិកឆ្នាំ២០២៤ នេះ ។

ហ្វីលីពីនបាននាំមុខក្នុងតំបន់អាស៊ីអាគ្នេយ៍ ដោយដណ្តើមបានចំណាត់ថ្នាក់លេខ ៣៥ លើពិភពលោក ហើយទទួលបានមេដៃមាសចំនួន ២ និងមេដៃសំរឹទ្ធចំនួន ២។ តាមពីក្រោយដោយឥណ្ឌូណេស៊ី ជាប់ចំណាត់ថ្នាក់លេខ៣៧ ដោយទទួលបានមេដាយមាស២ និងសំរឹទ្ធ១។ រីឯថៃវិញ ជាប់ចំណាត់ថ្នាក់លេខ ៤២ តែប្រមូលបានមេដាយច្រើនជាងគេ គឺមេដៃមាស១ ប្រាក់៣ និងសំរឹទ្ធ២។ ម៉ាឡេស៊ីជាប់ចំណាត់ថ្នាក់លេខ ៨០ ទទួលបានសំរឹទ្ធ២ ហើយសិង្ហបុរីជាប់ចំណាត់ថ្នាក់លេខ ៨៤ និងទទួលបានមេដៃសំរឹទ្ធចំនួន ១ផងដែរ។

រីឯប្រទេសអាស៊ានចំនួន ៦ទៀត ដែលរួមមាន ប្រ៊ុយណេ កម្ពុជា ឡាវ មីយ៉ាន់ម៉ា ទីម័រខាងកើត និងវៀតណាម មិនទទួលបានមេដៃត្រឡប់ទៅផ្ទះវិញនោះទេ។ ជាមួយគ្នានេះ ក៏សូមចូលរួមអបអរសាទរដល់ម្ចាស់មេដាយទាំងអស់ និងថ្លែងអំណរគុណយ៉ាងជ្រាលជ្រៅចំពោះអត្តពលិកអាស៊ីអាគ្នេយ៍ទាំងអស់ដែលបានចូលរួមប្រកួតផងដែរ។

គួរបញ្ជាក់ថា អូឡាំពិកទីក្រុងប៉ារីសឆ្នាំ២០២៤ គឺព្រឹត្តិការណ៍លើកទី៣៣ ដែលតាមរយៈការប្រកួតនេះមានអត្តពលិកចំនួន ១០,៧១៤ នាក់តំណាងឱ្យ ២០៦ប្រតិភូចូលរួមប្រកួតប្រជែងក្នុង ៣២ ប្រភេទ ដោយមាន ៣២៩ វិញ្ញាសា។ សហរដ្ឋអាម៉េរិកទទួលបានមេដាយមាសចំនួន ៤០ ដូចគ្នានឹងប្រទេសចិន ប៉ុន្តែបាននាំមុខលើមេដាយប្រាក់ ៤៤ ធៀបនឹង២៧ ដូច្នេះព្រឹត្តិការណ៍អូឡាំពិកឆ្នាំ២០២៨គឺសហរដ្ឋអាម៉េរិក៕