ទន្ទឹមនឹងតារារ៉េប វណ្ណដា បានធ្វើឱ្យមានការចាប់អារម្មណ៍ខ្លាំងស្រាប់តែមានអ្នកលេងបណ្តាញសង្គមថៃមួយចំនួនបែរនិយាយថា វណ្ណដា គឺជាជនជាតិថៃ និងធ្លាយដល់ថា វណ្ណដា កូនអ្នកខេត្តសុរិន្ទ និងជាអ្នកខេត្តបុរីរម្យជាដើម។ ឃើញមានការលើកឡើងពីអ្នកលេងបណ្តាញសង្គមថៃ វណ្ណដា ជាជនជាតិថៃបានធ្វើឱ្យអ្នកលេងបណ្តាញសង្គមកម្ពុជាហួសចិត្តយ៉ាងខ្លាំងខណៈស្រីស្អាត ឡូរីន សង្សារ វណ្ណដា ថារាល់ថ្ងៃមិនខ្លាចអ្នកណាដណ្តើម វណ្ណដា ចេញពីនាងនោះទេ ប៉ុន្តែខ្លាចតែផ្ទះលេខ២ប៉ុណ្ណោះ។

ដូចមហាជនជ្រាបមកហើយថាចំណងស្នេហ៍ តារារ៉េប វណ្ណដា និងស្រីស្អាត តែងតែជាទីចាប់អារម្មណ៍របស់មហាជនមិនថាអ្នកទាំងពីរមានសកម្មភាពអ្វីក៏ដោយឱ្យតែធ្លាយនៅលើបណ្តាញសង្គមគឺមានការចែករំលែកបន្តរាប់ពាន់រាប់ម៉ឺននាក់។ ជាក់ស្តែងកាលពីកន្លងមកថ្មីៗនេះមុន វណ្ណដា ចេញទៅប្រទេសបារាំងសម្តែងក្នុងពិធីបិទកីឡាអូឡាំពិកប៉ារីសឆ្នាំ២០២៤ គូស្នេហ៍មួយគូនេះបានអង្គុយក្នុងរថយន្ត លើកៅអីតែមួយបង្ហាញភាពផ្អែមល្អែបថើបគ្នាមិនក្រែងចិត្តអ្នកគាំទ្រសោះឡើយ។

ឡូរីន ក៏មិនភ្លេចបង្ហាញនូវអារម្មណ៍មានមោទនភាពចំពោះគូស្នេហ៍ដូចគ្នាដែលបានលើកតម្កើនកិត្តិយសជាតិនៅលើឆាកអន្តរជាតិមានការសាទរពីប្រជាជនសឹងពេញប្រទេសថ្នាក់ដឹកនាំធំៗ និងអ្នកក្នុងចង្កោមសិល្បៈជាដើម។ ស្របពេលជាមួយនឹងការចាប់អារម្មណ៍ទៅលើតារារ៉េប វណ្ណដា មានមុខមាត់ក្នុងព្រឹត្តិការណ៍កីឡាដ៏ធំលើពិភពលោកអ្នកលេងបណ្តាញសង្គមក្បែរខាងកម្ពុជាគឺប្រទេសថៃបានរកទំនុកលើកឡើងផ្សេងៗចំពោះតារាចម្រៀងរូបនេះរហូតដល់ថ្នាក់អ្នកលេងបណ្តាញសង្គមថៃខ្លះបែរជាលើកឡើងថា វណ្ណដា ជាជនជាតិថៃ និងអ្នកខ្លះថា វណ្ណដា ជាអ្នកខេត្តបុរីរម្យនិងខេត្តសុរិន្ទជាដើម។

ការលើកឡើងដ៏ហួសចិត្តនេះធ្វើឱ្យអ្នកលេងបណ្តាញសង្គមផ្ទុះសំណើចជាខ្លាំងយូរៗទៅសូម្បីតែ វណ្ណដា ក៏ផ្ទះលេខ២ចង់បានដែរ។

ជាមួយគ្នានេះ ទន្ទឹមនឹងផ្ទះលេខ២ចង់បាន វណ្ណដា ក្លាយជាធនធានសម្រាប់ប្រទេសថៃនេះស្រីស្អាត ឡូរីន សង្សារ វណ្ណដា ក៏បាននិយាយលេងសើចដែរថា រាល់ថ្ងៃនេះនាងមិនខ្លាចនរណាដណ្តើម វណ្ណដា នោះទេ ខ្លាចតែខាងផ្ទះលេខ២ប៉ុណ្ណោះ ប៉ុន្តែសំណេររបស់នាងបានបាត់ចេញពីបណ្តាញសង្គមហើយ។

គួរបញ្ជាក់ថា វណ្ណដា និង ឡូរីន បានបើកចំហចំណងស្នេហ៍ជាសាធារណៈកាលពីថ្ងៃទី២៧ ខែមិថុនា ឆ្នាំ២០២៣។ រយៈពេលជាង១ឆ្នាំមកនេះ ជារឿយៗគូស្នេហ៍នេះបានចំណាយពេលផ្អែមល្អែមជាមួយគ្នានិងបង្ហាញជូនអ្នកគាំទ្រដូចគ្នា។ ជុំវិញទំនាក់ទំនងរបស់ពួកគេក៏ធ្លាប់លេចពាក្យចចាមអារ៉ាមថាបែកគ្នាផងដែរ ប៉ុន្តែត្រូវបាន ឡូរីន ធ្លាប់ចេញមកបញ្ជាក់ថាពុំមានរឿងបែបនេះនោះទេ ខណៈពេលខ្លះពួកគេមិនអាចបង្ហាញអ្វីគ្រប់សព្វជូនអ្នកគាំទ្របានទាំងអស់ឡើយ៕

តារាចម្រៀង ចិត្ត កញ្ចនា បានធ្វើឱ្យប្រជាជនកូរ៉េដែលចូលរួមទស្សនាផ្ទាល់ក្នុងអំឡុងការសម្តែងរបស់នាងតំណាងឱ្យប្រទេសកម្ពុជាក្នុងមហោស្រពអន្តរជាតិ Round Festival ឆ្នាំ២០២៤ មានការភ្ញាក់ផ្អើលយ៉ាងខ្លាំង។ ភាពភ្ញាក់ផ្អើលនេះដោយសារតែ កញ្ចនា បានបកស្រាយបទចម្រៀងរបស់ខ្លួនជាភាសាកូរ៉េ និង បន្ទាប់មកជាភាសាខ្មែរដើម្បីឱ្យអ្នកចូលរួមទស្សនាបានយល់ពីអត្ថន័យចម្រៀងរបស់ខ្លួន។ ការសម្តែងរបស់ កញ្ចនា ដោយទឹកដមសំឡេងពីរោះរណ្តំធ្វើឱ្យមានការសាទរយ៉ាងច្រើនពីសំណាកទស្សនិកជន។

គេចាំបានថាកាលពីខែឧសភា កន្លងមកតារាចម្រៀង ចិត្ត កញ្ចនា បានបង្ហើបប្រាប់ទស្សនិកជនថានាងត្រូវបានជ្រើសរើសជាសិល្បករតំណាងប្រទេសកម្ពុជាដើម្បីចូលរួមសម្តែងនៅមហោស្រពអន្តរជាតិ Round Festival ប្រទេសកូរ៉េ ឆ្នាំ២០២៤។ ការប្រកាសនេះបានធ្វើឱ្យអ្នកក្នុងចង្កោមសិល្បៈនិងអ្នកគាំទ្រផងបានសម្តែងនូវក្តីអបអរចំពោះនាងបន្ទាប់ពីខិតខំលើអាជីពសិល្បៈរាប់ឆ្នាំមានឱកាសតំណាងប្រទេសរបស់ខ្លួននៅលើឆាកអន្តរជាតិ។

ការចូលរួមរបស់ ចិត្ត កញ្ចនា ដែលតំណាងប្រទេសកម្ពុជា រួមជាមួយសិល្បករដែលតំណាងប្រទេសក្នុងតំបន់អាស៊ាននិងកូរ៉េ គឺបានចាក់ផ្សាយជាផ្លូវការហើយកាលពីពេលថ្មីៗនេះហើយបានបង្ហាញឱ្យឃើញថាសិល្បការិនីកម្ពុជាពិតជាធ្វើបានល្អនិងធ្វើឱ្យប្រជាជនកូរ៉េមានការភ្ញាក់ផ្អើលចំពោះនាងជាខ្លាំង។ ឆាកការប្រគំតន្រ្តីមហោស្រពអន្តរជាតិ Round Festival ឆ្នាំ២០២៤ គឺធ្វើឡើងនៅ KBS Busan Hall ដែលមានសភាពធំនិងស្រស់ស្អាតផងដែរ។

នៅវគ្គដំបូងរបស់ខ្លួន ចិត្ត កញ្ចនា បានបកស្រាយបទចម្រៀងផ្ទាល់ខ្លួនមានចំណងជើងថា «Missing You» រួមជាមួយការស្វាគមន៍ និងទទួលបានសំឡេងហ៊ោពេញស្ទូឌីយូ ខណៈតារាចម្រៀងស្រីរូបនេះបានបញ្ចេញទឹកដមសំឡេងដ៏ពីរោះរបស់ខ្លួនហើយមួយបទនេះក៏មានឧបករណ៍ខ្មែរផងដែរ។ ក្នុងវគ្គទី២ កញ្ចនា បានធ្វើឱ្យប្រជាជនកូរ៉េកាន់តែមានភាពភ្ញាក់ផ្អើលទ្វេដងបន្ទាប់ពីនាងបានបង្ហើរសំឡេងចម្រៀងរបស់ខ្លួនជាភាសាកូរ៉េដើម្បីឱ្យប្រជាជនកូរ៉េបានយល់ពីអត្ថន័យបទចម្រៀងរបស់ខ្លួន។

ការបកស្រាយចម្រៀងលើកទី២ កញ្ចនា បានជ្រើសបទ «កម្លាំងចិត្ត» ដោយដំបូងច្រៀងជាភាសាកូរ៉េ ហើយបានធ្វើឱ្យមានការភ្ញាក់ផ្អើលពេញhall និងបន្ទាប់មក កញ្ចនា បានបកស្រាយជាភាសាខ្មែរវិញ។ វត្តមានរបស់តារាចម្រៀងស្រីរូបនេះដែលតំណាងឱ្យប្រទេសកម្ពុជាគឺពិតជាធ្វើឱ្យអន្តរជាតិមានការចាប់អារម្មណ៍គួរឱ្យកត់សម្គាល់ផងដែរ។ ការសម្តែងលើកនេះ ចិត្ត កញ្ចនា គឺបានបង្ហាញអារម្មណ៍រំភើបរីករាយខ្លាំងមែនទែន។

គួរបញ្ជាក់ថានៅឆ្នាំ ២០២៣ មហោស្រពតន្ត្រីអាស៊ាននិងកូរ៉េខាងត្បូងបានប្រព្រឹត្តទៅ នៅទីក្រុងហ្សាកាតា ប្រទេសឥណ្ឌូនេស៊ី ដែលមានសិល្បករចំនួន ១៨នាក់មកពីប្រទេសចំនួន ១១ រួមទាំងប្រទេសកូរ៉េផងដែរ។ ឆ្នាំមុននេះតារាចម្រៀង មាស សុខសោភា និង ចេន បានតំណាងឱ្យកម្ពុជាដោយបានបង្ហើរសំនៀងដ៏ពីរណ្តំក្រោមបទចម្រៀងមានចំណងជើងថា «គូគ្រង»៕

តារារ៉េប 4T5 បានធ្វើអ្នកគាំទ្រមានការចាប់អារម្មណ៍មិនតិចនោះទេព្រោះតែមានរូបភាពចែករំលែកពេញបណ្តាញសង្គមគឺរូបលោកនិងអ្នកផ្សេងទៀតត្រូវបានសមត្ថកិច្ចចាប់វាស់កម្ពស់បើតាមប្រភពខ្លះបង្ហាញថាជាករណីហិង្សាដែលបង្កឡើងនៅប៉ោយប៉ែត។ ទោះយ៉ាងណា តារារ៉េប4T5 មិនបានបកស្រាយពីរូបភាពវាស់កម្ពស់របស់ខ្លួនឡើយបែរជាយករូបភាពវាស់កម្ពស់នោះមកតាំងជារូបប្រូហ្វាល់ថ្មីនិងប្រកាសលក់អាល់ប៊ុមខ្លួនទៅវិញ។

កាលពីព្រឹកថ្ងៃទី១២ សីហា ទស្សនិកជនអ្នកតាមដានវិស័យរ៉េបមានការភ្ញាក់មិនតិចនោះទេព្រោះរូបភាពរបស់តារារ៉េប 4T5 ត្រូវបានសមត្ថកិច្ចចាប់វាស់កម្ពស់និងចូលប៉ុស្តិ៍ប៉ូលិសបានល្បីខ្ទរខ្ទារចែករំលែកបន្តបន្ទាប់ពីមួយទៅមួយដោយមិនដឹងពីមូលហេតុនៃការចាប់វាស់កម្ពស់នោះទេ។ លើសពីនេះទៅទៀត តាមការចែករំលែកបន្តគ្នាបានបញ្ជាក់ថាការវាស់កម្ពស់នេះមិនមែនជាការថត MV ឡើយ។

តាមប្រភពបឋម បានឱ្យដឹងថាការវាស់កម្ពស់របស់ 4T5 និងគ្នីគ្នាគឺជាករណីប្រើប្រាស់អំពើហិង្សានៅតាមទីសាធារណៈកើតឡើងនៅទីក្រុងប៉ោយប៉ែត ខេត្តបន្ទាយមានជ័យហើយសមត្ថកិច្ចអាវុធហត្ថបានបញ្ជូលមកក្រុងសិរីសោភ័ណ្ឌដើម្បីបន្តនីតិវិធីដើម្បីដោះស្រាយបន្ត ប៉ុន្តែការដោះស្រាយយ៉ាងណាមិនមានការបញ្ជាក់នោះទេ។

បន្ទាប់ពីមានការភ្ញាក់ផ្អើលចំពោះដំណឹងដែរតារារ៉េប 4T5 ត្រូវសមត្ថកិច្ចចាប់វាស់កម្ពស់បានធ្វើឱ្យអ្នកគាំទ្រភ្ញាក់ផ្អើលយ៉ាងខ្លាំងនិងចង់ឱ្យសាមីខ្លួនបញ្ជាក់ពីដើមហេតុនេះផងដែរថាមានរឿងអ្វីឱ្យពិតប្រាកដ។ ទោះយ៉ាងណា អ្នកគាំទ្រមានការភ្ញាក់ផ្អើលប៉ុន្តែងាកទៅកាន់ 4T5 មិនបានបកស្រាយរូបភាពដែលត្រូវបានចែករំលែកពាសពេញបណ្តាញសង្គមឡើយ។

តារារ៉េបរូបនេះបានធ្វើឱ្យអ្នកគាំទ្រហួសចិត្តវិញព្រោះ 4T5 បែរជាយករូបភាពវាស់កម្ពស់របស់ខ្លួនមកតាំងជាប្រូហ្វាល់ថ្មី ថែមទាំងប្រកាសលក់អាល់ប៊ុមរបស់ខ្លួនវិញដែលទំនងករណីហិង្សាត្រូវបានដោះស្រាយរួចរាល់ហើយដែរ។

គួរបញ្ជាក់ថា 4T5 គឺជាតារារ៉េបមួយរូបដែលជាអតីតសិល្បករក្នុងផលិតកម្ម CG ។ បទរបស់លោកនៅលើឆាណែលយូធូបផ្ទាល់ដែលមានការចូលស្តាប់ច្រើនជាងគេមានចំណងជើងថា «ជីវិតវាគ្រាន់ជារឿងព្រេង» មានការទស្សនាជាង៧លានដង។ នៅក្នុងផលិតកម្ម CG មានបទដូចជា «នាងកុហក» មានការស្តាប់ជាង២១លានដង និងបទ «កូនជ្រូកទាំងបី» Feat ជាមួយ Kingchi មានការស្តាប់ជាង២៥លានដង៕

តារាសម្តែងប្រុសជួរមុខប្រចាំប្រទេសកម្ពុជា លោក ខាត់ វៃហាំង បានពោលស្ងប់ស្ងែងទៅកាន់តារារ៉េប វណ្ណដា បន្ទាប់ពីបង្ហាញវត្តមានលើឆាកក្នុងព្រឹត្តិការណ៍បិទកីឡាអូឡាំពិកទីក្រុងប៉ារីស ដែលឱកាសនេះជាក្ដីស្រមៃសម្រាប់តារាចម្រៀងទូទាំងពភពលោក។ ក្នុងនោះលោកបានលើកឡើងដែរថា វណ្ណដា បានសាងភាពល្បីល្បាញដោយដាក់សមត្ថភាព ជាដើមទន់ ឈរលើចក្ខុវិស័យស្រលាញ់បង្កើតថ្មីមិនរើសអើងបង្កើតឆន្ទៈទើបឈរដល់ចំណុចមួយដែលខ្ពស់បែបនេះ។

នៅល្ងាចថ្ងៃទី១២ សីហា នេះ តារាសម្តែង ខាត់ វៃហាំង បានពោលពាក្យពេចន៍ចេញពីបេះដូងក្នុងនាមជាកូនខ្មែរមួយរូបទៅកាន់តារារ៉េប វណ្ណដា ក្នុងការធ្វើឱ្យមហាជនគ្រប់ស្រទាប់វណ្ណៈ និងនៅទូទាំងពិភពលោកចាប់អារម្មណ៍មកកាន់កម្ពុជាបន្ថែមទៀតតាមរយៈវិស័យតន្រ្តី។ លោកបានរៀបរាប់យ៉ាងដូច្នេះថា «ថ្ងៃនេះមានមោទភាពណាស់ ចំពោះកូនខ្មែរ លោក វណ្ណដា តារារ៉េប កម្ពុជាដ៏ល្បីផ្ដល់ព្រឹត្តការណ៍មួយនេះសំរាប់កម្ពុជា។ព្រឹត្តិការណ៍អស្ចារ្យៗ បែបនេះ មិនមែនចេះតែកើតឡើងដោយចៃដន្យ ហើយចេះតែកើតឡើងដោយងាយៗនោះទេ»។ មិនមែនចូលរួមទស្សនាទេ តែគាត់ឈរច្រៀងចម្រៀងខ្មែរ លើកឆាកកម្មវិធីពិភពលោក ដែលមនុស្សទូទាំងពិភពលោកកំពុងទស្សនា) ជឿថាវាក៏ ជាក្ដីស្រមៃសំរាប់តារាចម្រៀងទូទាំងពភពលោក»។

វៃហាំង បានបន្ថែមទៀតថា «វណ្ណដា គាត់បានសាងភាពល្បីល្បាញ ដោយដាក់សមត្ថភាព ជាដើមទន់ ឈរលើចក្ខុវិស័យ ស្រលាញ់បង្កើតថ្មី មិនរើសអើង តូចទាប ក្រីក្រ ផ្ដល់កម្លាំងចិត្ត បំពេញក្ដីស្រមៃ ដុតបំផ្លាញភាពទន់ខ្សោយ បង្កើនបង្កើតឆន្ទៈ ដល់កូនខ្មែរនូវក្ដីសង្ឃឹម ដែលនឹងអាចធ្វើបានហើយបង្ហាញឱ្យឃើញថា ឱកាសនឹងមានសំរាប់អ្នកមិនថាពិភពលោកធំប៉ុណ្ណា ហ៊ានប្រើចំណេះចំណាញខ្លួនឱ្យចំគោលដៅ ដូចគាត់ជាតារាចម្រៀងរ៉េបម្នាក់ដែល សាង Credit ពីមួយជំហ៊ានទៅមួយជំហ៊ាន ដូចគ្រប់គ្នាបានឃើញកន្លងមក ហើយ ឈ្ពោះជំហ៊ានបានយ៉ាងល្អ ដែលគ្រប់គ្នាស្មានមិនដល់និយាយថា (មោទនភាព)។

តួឯកប្រុសរូបនេះលើកឡើងទៀតថា «ថ្ងៃនេះគាត់ទៅដល់ហើយហើយធ្វើវា ឈរច្រៀងលើឆាក កម្មវិធីលំដាប់ពិភពលោក ក្នុងនាម តារារ៉េបដ៏ល្បីក្នុងតំបន់ Asia សញ្ជាតិខ្មែរ មកពីប្រទេកម្ពុជា បង្ហាញខ្លួនក្នុងព្រឹត្តការណ៍បិទការប្រកួតកីឡាអូឡាំពិករដូវក្តៅ ក្រុងប៉ារីស ប្រទេសបារាំង ឆ្នាំ២០២៤ យ៉ាងអស្ចារ្យ ។ ពាក្យថា (ល្បី) ល្បីបែបណាក៏មាន តែ(ល្បីដោយការសាង និង សន្សំ credit ល្អៗ ហើយចេញពីមាត់អ្នកគាំទ្រ ) បង្កើតព្រឹត្តការណ៍ អស្ចារ្យសំរាប់ជាតិ ហើយ ទទួលបានការគាំទ្រ មិនចេះរីងស្ងួត ទាំងនេះជារូបមន្ត សំរាប់ទំពាំងស្នងឫស្សីគួរតែទុកជាគំរូ គឺ វាមានតំលៃណាស់ ដូចគាត់ចឹង មិនចំបាច់បង្ខំ ឱ្យនរណាសរសើរ ស្ញប់ស្ញែង ជួយផ្សព្វផ្សាយទេ តែឥទ្ធិពល និងអ្វីគាត់កំពុងធ្វើ គាត់បានឆក់យកបេះដូងអ្នកគាំទ្រ និង ជនជាតិកម្ពុជា ដែលចូលរួម បានស្ម័គ្រចិត្តធ្វើវា ដោយចេញពីចិត្ត បេះដូង និង ដោយមានមោទភាព ចំពោះគាត់ និងក្រុមការងារគាត់ផងដែរ។ជូនពរ លោក វណ្ណដា និង ក្រុមការងារ មានសុខភាពល្អ សំណាងល្អ និង កាន់តែជោគជ័យ ..
« ខ្ញុំសូមទោសទុកជាមុន បើសិនសំណេរខ្ញុំ មានត្រង់ណាមិនសមរម្យ នេះគ្រាន់ជាការមើលឃើញរបស់ខ្ញុំប៉ុណ្ណោះ ហើយ ក៏ចង់អបអរសាទ និង អគុណ លោក វណ្ណដា »។

មិនត្រឹមតែតារាសម្តែង ខាត់ វៃហាំង ប៉ុណ្ណោះទេដែលបង្ហាញការអបអរមានមោទនភាពចំពោះ វណ្ណដា ថ្នាក់ដឹកនាំជាន់ខ្ពស់ ក្រសួងនានា មហាជន អ្នកក្នុងចង្កោមសិល្បៈគឺបានចូលរួមអបអរសាទរកក្រើកពេញស្រុកខ្មែរនិងអន្តរជាតិ៕