ថ្មីៗនេះ សេចក្តីរាយការណ៍ពីប្រទេសថៃអំពីការសង្ស័យនៃករណីជំងឺអុតស្វាប្រភេទថ្មីដ៏គ្រោះថ្នាក់ ដែលបានកើតលើបុរសជនជាតិអឺរ៉ុបម្នាក់ មានទីលំនៅក្នុងប្រទេសថៃ ស្របពេលដែលអង្គការសុខភាពពិភពលោកកំពុងព្រមានអំពីជម្ងឺរាតត្បាតប្រភេទនេះ។

កាលពីថ្ងៃទី ២១ ខែសីហា យោងតាមប្រសាសន៍របស់លោក Thongchai Keeratihattayakorn ប្រធាននាយកដ្ឋានគ្រប់គ្រងជំងឺថៃបានឲ្យដឹងថា អ្នកជំងឺអុតស្វារូបនេះគឺជាជនជាតិអឺរ៉ុប ដែលបានធ្វើដំណើរមកពីប្រទេសអាហ្រ្វិកដែលជាប្រភពរីករាលដាលនៃជម្ងឺអុតស្វាដ៏ខ្លាំងក្លានេះ។

បច្ចុប្បន្ន អ្នកជម្ងឺរូបនេះ កំពុងទទួលបាននូវការព្យាបាលដោយដាក់នៅក្នុងបន្ទប់ដាច់ដោយឡែកមួយតែឯង ខណៈដែលខាងមន្ទីរពិសោធន៍ថៃកំពុងតែធ្វើតេស្តសំណាកដើម្បីឲ្យច្បាស់ថា វាជាមេរោគអុតស្វាប្រភេទមួយណា។ ទោះជាយ៉ាងណា តាមលទ្ធផលតេស្តបឋម បានឲ្យដឹងថាវាទំនងជាមេរោគបំប្លែងខ្លួនថ្មី ប្រភេទ Clade 1 ដ៏កាចសាហាវហើយ។ ប៉ុន្តែក្រុមអ្នកជំនាញ នឹងបញ្ជាក់លទ្ធផលជាផ្លូវការ ក្នុងរយៈពេល ២ថ្ងៃខាងមុខទៀត។

ជំងឺអុតស្វា មាន ២ ប្រភេទ គឺប្រភេទ Clade 1 និង Clade 2 ស្របពេលដែល ប្រភេទ Clade 1 ជាមេរោគបំប្លែងខ្លួនថ្មី ត្រូវបានគេសន្និដ្ឋានថា មានការឆ្លងរីករាលដាល បង្កគ្រោះថ្នាក់ធ្ងន់ធ្ងរជាង ក៏ដូចជាមានចំនួនករណីស្លាប់ច្រើនជាងប្រភេទ Clade 2 ។

គួរបញ្ជាក់ថា ជំងឺអុតស្វាគឺផ្ទុះជាសកលអំឡុងឆ្នាំ ២០២២ និងបន្តរីករាលដាលរហូតមកដល់បច្ចុប្ប ជាពិសេសគឺប្រទេសនៅក្នុងទ្វីបអាហ្វ្រិក ដែលរួមមានសាធារណៈរដ្ឋប្រជាធិបតេយ្យកុងហ្គោ ប៊ូរុនឌី កេនយ៉ា រវ៉ាន់ដា និងអ៊ូហ្គង់ដា និងបានរកឃើញករណីស្លាប់ដោយសារជម្ងឺនេះជាបន្តបន្ទាប់ផងដែរ។

យោងតាមអ្នកជំនាញសុខភាពបានឱ្យដឹងថា អ្នកដែលឆ្លងមេរោគអុតស្វា នឹងវិវត្តន៍រោគសញ្ញាក្នុងរយៈពេលពី ២ ទៅ ១៩ ថ្ងៃ ហើយបណ្តាលឱ្យមានកន្ទួល ដំបៅស្បែកធំដូចពងបែក និងរោគសញ្ញាដូចជំងឺផ្តាសាយ រួមមានទាំង ក្តៅខ្លួន ឈឺក្បាល ឈឺសាច់ដុំ និងអស់កម្លាំងជាដើម។ ជម្ងឺនេះនឹងឆ្លងពីមនុស្សទៅមនុស្សម្នាក់ តាមរយៈការប៉ះរាងកាយ ការរួមភេទ និងការប្រើប្រាស់របស់របររួម។ល។៕

ថ្មីៗនេះ កីឡាករបាល់ទាត់ឆ្នើម Cristiano Ronaldo បានធ្វើឲ្យអ្នកគាំទ្រជុំវិញពិភពលោកមានការភ្ញាក់ផ្អើលជាខ្លាំង ព្រោះបានបង្កើត Channel យូធូបផ្លូវការផ្ទាល់ខ្លួន ថែមទាំងបានបំបែកកំណត់ត្រា ទទួលបានប៊ូតុងមាសពីយូធូបមួយរំពេច ត្រឹមតែរយៈពេលតែប៉ុន្មានម៉ោង។ ខណៈពេលនេះ Channel យូធូបគាត់ មានអ្នក Subscribe រហូតដល់ ១១ លាននាក់រួចទៅហើយ។

Cristiano Ronaldo កីឡាករបាល់ទាត់លំដាប់ទី ១ នៃពិភពកីឡា ដែលត្រូវបានគេចាត់ទុកថាជាកីឡាករស៊ុតបញ្ចូលទីបានច្រើនបំផុតនៅលើលោកផងដែរ។ ម្ចាស់ពានរង្វាន់ Ballon d’Or ប្រាំសម័យកាលរូបនេះ ត្រូវបានគេស្គាល់ថាជាអ្នកដែលមានឈ្មោះបោះសំឡេងនៅលើប្រព័ន្ធអ៊ីនធើណែតរួចទៅហើយ ជាមួយនឹងអ្នកតាមដានជាង ៩០០ លាននាក់ នៅតាមបណ្តាញសង្គមផ្សេងៗ។

កាលពីថ្ងៃទី ២១ ខែសីហា ឆ្នាំ ២០២៤ លោកបានបង្កើត Channel យូធូបផ្លូវការរបស់ខ្លួនជាលើកដំបូង ដែលមានឈ្មោះថា «UR Cristiano» ដែលបានធ្វើឲ្យកក្រើកវិស័យកីឡាបាល់ទាត់ក្នុងចំណោមអ្នកគាំទ្រជុំវិញពិភពលោក។ ជាការកត់សម្គាល់ បន្ទាប់ពីបង្កើតបានរយៈពេលត្រឹមតែ ៩០នាទីប៉ុណ្ណោះ ប៉ុន្តែក៏ទទួលបានសន្ទុះនៃការគាំទ្រយ៉ាងច្រើនលើសលុប ដោយមានអ្នក Subscribe រហូតដល់ទៅ ១លាននាក់ទៅហើយ គាត់ក៏ទទួលបានប៊ូតុងមាសពីយូធូបដែលជាកំណត់ត្រាថ្មីមិនធ្លាប់មាន។

នៅរយៈពេល ៤ ម៉ោងបន្ទាប់ Ronaldo បានកើនអ្នក Subscribe ប្រមាណនឹង ៥លាននាក់។ ខណៈរយៈពេល ១២ម៉ោងចុងក្រោយនេះ គាត់ក៏កើនចំនួនអ្នក Subscribe ទៀតរហូតដល់ទៅ ១១លាននាក់ទៅហើយផងដែរ។ ជាមួយគ្នានោះ អ្នកលេងបណ្តាញសង្គមជាច្រើននិយាយថា នេះទំនងរៀងយឺតបន្តិចសម្រាប់ Ronaldo ក្នុងការទទួលបានប៊ូតុងមាសពីយូធូប ប៉ុន្តែពួកគេជឿជាក់យ៉ាងមុតមាំថា Ronaldo នឹងទទួលបានប៊ូតុងពេជ្រឆាប់ៗផងដែរ។

គួរបញ្ជាក់ថា កាលពីពេលកន្លងទៅនេះ Ronaldo ក៏ធ្លាប់បានសន្យាថានឹងផ្តល់ឱ្យអ្នកគាំទ្របានឃើញនិងស្វែងយល់បន្ថែមពីពីទិដ្ឋភាពផ្សេងៗដែលកើតមានក្នុងជីវិតរបស់គាត់ ដែលមិនមែនត្រឹមតែបាល់ទាត់ប៉ុណ្ណោះ ដោយលោកនឹងចែករំលែកពីសកម្មភាពរស់នៅប្រចាំថ្ងៃផងដែរ ដែលពាក់ព័ន្ធនឹងក្រុមគ្រួសារ សុខុមាលភាព ការអប់រំ និងអាជីវកម្ម របស់លោកជាដើម៕

វៀតណាម៖ អ្នកវិទ្យាសាស្ត្រវៀតណាម Dao Minh So និងសហការីរបស់លោកបានបង្កើតពូជស្រូវបីពណ៌គឺក្រហម ស្វាយ និងខ្មៅយ៉ាងជោគជ័យ ដោយពូជស្រូវពណ៌ក្រហម កំពុងទទួលបានទិន្នផលខ្ពស់បំផុត ៨ តោនក្នុងមួយហិកតា ស្មើនឹងពូជស្រូវពណ៌សធម្មតាដែរ។
នេះបើយោតាមការចុះផ្សាយរបស់ Vnexpress បានឱ្យដឹងថា ការបង្កើតពូជស្រូវបីពណ៌គឺមានអត្ថប្រយោជន៍ច្រើនជាងពូជស្រូវធម្មតាទៅទៀត ដោយសារវាមានសារធាតុចិញ្ចឹមគ្រប់គ្រាន់ដូចជា សារធាតុរ៉ែ វីតាមីន និងសារធាតុប្រឆាំងអុកស៊ីតកម្ម…ដែលល្អបំផុតសម្រាប់សុខភាពរាងកាយរបស់មនុស្ស និងជាប្រភេទអង្ករសំរូបសម្រាប់អ្នកតមអាហារ និងមនុស្សដែលមានជំងឺរ៉ាំរ៉ៃ។

យោងតាមអ្នកវិទ្យាសាស្ត្រ ការបង្កើតពូជស្រូវបីពណ៌ដោយជោគជ័យនេះគឺបានចំណាយពេលជិត ១០ ឆ្នាំហើយ ដែលសុទ្ធតែជាពូជស្រូវសមស្របតាមលក្ខណៈវិនិច្ឆ័យនៃភាពបរិសុទ្ធ ទិន្នផល ធន់នឹងជំងឺ និងជាផ្នែកមួយនៃអាហារូបត្ថម្ភ។ បច្ចុប្បន្នពូជស្រូវពណ៌ក្រហម និងស្វាយកំពុងដាក់ឱ្យចរាចរក្នុងស្រុក ខណៈពូជស្រូវពណ៌ខ្មៅនៅតែស្ថិតក្នុងការស្រាវជ្រាវនៅឡើយទេ។ ទោះជាយ៉ាងណាក៏ដោយ គុណវិបត្តិនៃទិន្នផលស្រូវបីពណ៌គឺមានកម្រិតទាប ដោយសារសារធាតុក្លរ៉ូហ្វីលទាបរបស់វា ដែលកាត់បន្ថយសមត្ថភាពធ្វើរស្មីសំយោគ។ លើសពីនេះពេលចម្អិនជាបាយក៏មិនសូវឆ្ងាញ់ដែរ ព្រោះមិនស្អិតដូចបាយសធម្មតាយើងទេ។

ទោះបីជាយ៉ាងនេះក្តីអ្នកស្រាវជ្រាវបានផ្តោតលើការយកឈ្នះលើចំណុចខ្វះខាតទាំងនេះ ដោយលក់ត្រឹមតែ ២ ទៅ ៤ ដុល្លារប៉ុណ្ណោះក្នុងមួយគីឡូក្រាមដើម្បីបម្រើទីផ្សារអ្នកហូប ដូច្នេះវាមានសក្តានុពលខ្លាំងណាស់។ ពូជស្រូវពណ៌ចំនួន ៣ គឺមានលក្ខណៈវិនិច្ឆ័យនៃផលិតភាព បរិមាណសារធាតុចិញ្ចឹម និងធន់នឹងជំងឺ។ នេះបើយោងតាមអ្នកវិទ្យាសាស្ត្រ So ពូជស្រូវក្រហមមានរយៈពេលប្រមូលផលគឺ ៩០ – ៩៥ ថ្ងៃ ទិន្នផលគឺ ៥ – ៨ តោនក្នុងមួយហិកតា ស្មើនឹងស្រូវធម្មតាដែរ។ ទាក់ទងនឹងភាពបត់បែនពូជស្រូវក្រហមមានមាតិកាអាមីឡូសពី ១៧ ទៅ ១៨% ដែលសមរម្យសម្រាប់អ្នកតមអាហារ និងអ្នកដែលស្រកទម្ងន់។

លើសពីនេះពូជស្រូវពណ៌ស្វាយផ្តល់ទិន្នផលទាបជាងពូជស្រូវក្រហម ដែលមានប្រហែល ៤ – ៦ តោនក្នុង ១ ហិកតា រយៈពេលប្រមូលផលគឺ ១០០ – ១០៥ ថ្ងៃ។ យោងតាមក្រុមស្រាវជ្រាវ ចំណុចខ្លាំងរបស់វាគឺក្លិនក្រអូប ស័ក្តិសមសម្រាប់ជំនួសការប្រើប្រាស់អង្ករនាពេលបច្ចុប្បន្ន។ រីឯពូជស្រូវពណ៌ខ្មៅវិញទទួលបានទិន្នផលប្រហែល ៤-៦ តោន និងរយៈពេលប្រមូលផល ៩៥ ថ្ងៃ។ ភាពខ្លាំងនៃពូជស្រូវពណ៌ខ្មៅគឺថាវាមានសារធាតុ anthocyanin ខ្ពស់បំផុតក្នុងចំណោមពូជទាំងបី ដែលសារធាតុនេះហើយជួយរាងកាយប្រឆាំងនឹងកោសិកាអុកស៊ីតកម្ម ក៏ដូចជាជួយការពារជំងឺមហារីក។

ទោះជាយ៉ាងណាពូជស្រូវពណ៌ខ្មៅនៅកំពុងស្ថិតក្នុងការស្រាវជ្រាវ ខណៈពូជពណ៌ក្រហម និងស្វាយបានកំពុងដាក់លក់លើទីផ្សារក្នុងស្រុក។ ហើយមិនទាន់អាចនាំចេញទៅក្រៅប្រទេសបានទេ ព្រោះអង្ករពណ៌គឺសមរម្យសម្រាប់តែប្រជាជនលើរបបអាហារ មនុស្សដែលទទួលការព្យាបាល… ដូច្នេះចំណែកទីផ្សារអង្ករពណ៌នៅវៀតណាមមិនទាន់មានកម្រិតខ្ពស់នៅឡើយទេ៕

សហរដ្ឋអាមេរិក៖ ស្តាប់ទៅដូចជារឿងគួរឱ្យអស់សំណើច ប៉ុន្តែនេះជាការពិត ខណៈបុរសជនជាតិអាមេរិកម្នាក់ឈ្មោះ David Cline បានណែនាំខ្លួននៅលើផ្ទាំងប៉ាណូ ដោយដាក់រូបលោក ជាមួយអក្សរធំៗដោយសរសេរថា Dave is Single។
នេះបើយោងតាមសារព័ត៌មានបរទេស បុរសម្នាក់នេះគឺធុញទ្រាន់នឹងការពឹងផ្អែកលើបណ្តាញសង្គមពេក ទើបសម្រេចចិត្តណែនាំខ្លួននៅលើផ្ទាំងប៉ាណូដ៏ធំមួយ ហើយបិទគ្រប់ទីកន្លែងតែម្តង។ David Cline អាយុ ២៨ ឆ្នាំគឺជាបុរសនៅលីវមួយក្នុងចំនោមអ្នកនៅលីវជាច្រើនជុំវិញពិភពលោកដែលកំពុងសាកល្បងវិធីស្វែងរកគូស្នេហ៍ថ្មី ក្រៅពីកម្មវិធីអនឡាញ។

សម្រាប់ David បាននិយាយថា កម្មវិធីណាត់ជួបនៅក្នុងបណ្តាញសង្គមធ្វើឱ្យមនុស្សជាច្រើនឆាប់ធុញទ្រាន់ ដោយលោកបានបន្តទៀតថា កម្មវិធីទាំងអស់នេះមិនបានធ្វើឱ្យលោកជួបស្នេហ៍ពិតនោះទេ។ ដូច្នេះលោកក៏មានគំនិតថ្មីដោយចង់ស្វែងរកគូស្នេហ៍តាមរយៈផ្ទាំងប៉ាណូ ហើយប្រសិនមាននរណាម្នាក់ចាប់អារម្មណ៍លោក នោះពួកគេអាចទាក់ទង ឬខលជួបលោកភ្លាមៗតែម្តងតាមរយៈ Instagram។ David ក៏បានបន្ថែមដែរថា ការជួលផ្ទាំងប៉ាណូបិទគ្រប់ទីកន្លែងដើម្បីស្វែងរកគូស្នេហ៍នេះ គឺជាការណែនាំប្រកបដោយភាពច្នៃប្រឌិត ដែលបានធ្វើឱ្យមនុស្សជាច្រើនចាប់អារម្មណ៍។

បន្ទាប់ពីផ្ទាំងប៉ាណូនេះល្បីបុរសវ័យ ២៨ ឆ្នាំរូបនេះក៏បានទទួលសារជាច្រើនពីមនុស្សជុំវិញពិភពលោក ហើយក៏មានមនុស្សមួយចំនួនដែលរស់នៅក្នុងប្រទេសហ្វីលីពីនចាប់អារម្មណ៍លោកផងដែរ ដោយសារការផ្សព្វផ្សាយព័ត៌មាន។ ទោះជាយ៉ាងណាលោកក៏គ្រោងនឹងដកផ្ទាំងប៉ាណូចេញនៅចុងសប្តាហ៍ក្រោយនេះ ដោយសារ David Cline បានជួបស្នេហ៍ពិតហើយ។

គួរបញ្ជាក់ដែរថា ការដាក់ផ្ទាំងប៉ាណូបិទគ្រប់ទីកន្លែងដើម្បីស្វែងរកគូស្នេហ៍នៅសហរដ្ឋអាមេរិកមិនមែនជាលើកទីមួយទេ។ កាលពីដើមឆ្នាំ ២០២៤ នេះមនុស្សចាស់នៅលីវជាច្រើនដែលរស់នៅក្នុងរដ្ឋតិចសាស់ សហរដ្ឋអាមេរិកក៏បានជួលផ្ទាំងប៉ាណូផ្សាយពាណិជ្ជកម្មក្នុងគោលបំណងដូចគ្នានេះផងដែរ។ រីឯកាលពីសប្តាហ៍មុននៅសាន់ហ្វ្រាន់ស៊ីស្កូ អ្នកនៅលីវដែលចង់បានគូស្នេហ៍ក៏បានចែកខិតប័ណ្ណអំពីខ្លួនគេជុំវិញទីក្រុងផងដែរ៕

សត្វឆ្កែត្រូវបានគេចាត់ទុកថាជាមិត្តដ៏ល្អបំផុតរបស់មនុស្ស ព្រោះពួកវាច្រើនតែមានភាពស្មោះត្រង់ជាមួយម្ចាស់ រហ័សរហួន វាងវៃ ស្តាប់បង្គាប់ និងគួរឱ្យស្រឡាញ់ ប៉ុន្តែឆ្កែក៏ត្រូវការឱ្យអ្នកយកចិត្តទុកដាក់ ក៏ដូចជាមើលថែវាឱ្យបានច្រើនផងដែរ ជាហេតុធ្វើឱ្យអ្នកឆាប់ធុញទ្រាន់នឹងហត់នឿយក្នុងការថែទាំពួកវា។ ទោះជាយ៉ាងណាពូជឆ្កែទាំង ៦ ប្រភេទនេះគឺងាយស្រួលចិញ្ចឹមបំផុត ដោយអ្នកមិនចាំបាច់ថែទាំពួកវាច្រើននោះទេ ហើយសម្រាប់អ្នកដែលស្រឡាញ់សត្វ និងមានគម្រោងចង់ទិញឆ្កែមកចិញ្ចឹមអាចជ្រើសរើសពូជឆ្កែដូចខាងក្រោម៖

១.Basenji៖ ពូជឆ្កែ Basenji គឺមានដើមកំណើតនៅអាហ្វ្រិកកណ្តាល ជាឆ្កែដែលចូលចិត្តភាពស្ងប់ស្ងាត់ មិនងាយខឹង ចិត្តធ្ងន់ មិនចូលចិត្តរំខានអ្នកណានោះទេ ប៉ុន្តែពេលខ្លះក៏ទៅញ៉ោះម្ចាស់វាម្តងម្កាលដែរ។ Basenji គឺជាពូជឆ្កែដែលងាយស្រួលចិញ្ចឹមបំផុត និងមិនចាំបាច់ហត់នឿយក្នុងការមើលថែវានោះទេ។

២. Basset Hound៖ Basset Hounds គឺជាសត្វឆ្កែដែលងាយស្រួលចិញ្ចឹម ពូកែអត់ធ្មត់ ស្ងប់ស្ងាត់ និងចូលចិត្តដេក ហើយតែងតែរត់លេងម្នាក់ឯង ដោយមិនរំខានដល់អ្នកណាឡើយ។

៣. Boston Terrier៖ ជាពូជឆ្កែតូចៗស៊ីតិច មិនសូវមានក្លិន គឺជាឆ្កែមួយក្នុងចំណោមសត្វឆ្កែដែលងាយស្រួលបំផុតក្នុងការថែរក្សា។ ប៉ុន្តែអាចពិបាកក្នុងការហ្វឹកហាត់បន្តិចដោយសារពួកវាមានមាឌតូចពេក ទោះជាយ៉ាងណាពួកវាជាប្រភេទឆ្កែដែលមានអាកប្បកិរិយាល្អ។

៤. Cavalier King Charles Spaniel៖ គឺជាឆ្កែរួសរាយរាក់ទាក់ងាយចុះសម្រុងជាមួយមនុស្សគ្រប់គ្នា ស្លូតបូត រហ័សរហួន ឆ្លាតវៃ និងងាយសម្របខ្លួនបានយ៉ាងល្អទៅនឹងបរិយាកាសជុំវិញខ្លួន។ ពួកវាអាចរស់នៅបានគ្រប់ទីកន្លែងពីផ្ទះធំទៅផ្ទះតូច ងាយស្រួលហ្វឹកហាត់ និងមិនចាំបាច់មើលថែច្រើនពេកនោះទេ។

៥. Dachshund៖ គឺជាពូជឆ្កែដែលចូលចិត្តធម្មជាតិ មានទំនាក់ទំនងល្អជាមួយសត្វដទៃ ជាឆ្កែចរិតល្អរួសរាយរាក់ទាក់ មិនចេះព្រុសផ្តេសផ្តាសឡើយ និងតែងតែស្វាគមន៍មនុស្សគ្រប់គ្នា ប៉ុន្តែជាឆ្កែឯករាជ្យអាចពិបាកក្នុងការហ្វឹកហាត់បន្តិច។

៦. Labrador៖ សម្រាប់អ្នកស្រឡាញ់សត្វឆ្កែពូជធំ Labrador គឺជាសត្វឆ្កែមួយក្នុងចំណោមសត្វឆ្កែដែលងាយស្រួលបំផុតក្នុងការចិញ្ចឹម។ ពួកវាមានចរិតលក្ខណៈស្លូតបូត ស្មោះត្រង់ ពូកែលេងសើច រហ័សរហួន វាងវៃ ងាយស្រួលក្នុងការហ្វឹកហាត់ និងតែងតែស្តាប់បង្គាប់ម្ចាស់របស់វាជានិច្ច គឺជាសត្វចិញ្ចឹមដែលពេញនិយមបំផុតនៅសហរដ្ឋអាមេរិក៕

ហុងកុង ៖ ជាងថតរូបម្នាក់បានបង្ហោះរូបភាពបន្ទប់ស្នាក់នៅចំនួន១០០បន្ទប់ របស់ពលរដ្ឋនៅទីក្រុងហុងកុងក្នុងបណ្តាញសង្គម ដែលបង្ហាញឱ្យឃើញថា វាមានទំហំតូចបំផុតដូចគ្នានឹងក្តារ មឈូ.ស ឬរន្ធកណ្តុរ ដោយសារទីនេះ គ្មានទីធ្លាទូលាយគ្រប់គ្រាន់សម្រាប់ការរស់នៅទេ ។ ចុះលោកអ្នកវិញ ប្រសិនបើឱ្យទៅស្នាក់នៅក្នុងបន្ទប់តូចចង្អៀតបែបនេះ យល់ព្រមអត់?

ហុងកុង គឺជាទីក្រុងមួយមានមនុស្សរស់នៅច្រើនបំផុតក្នុងចំណោមទីក្រុងធំៗលើពិភពលោក ហើយបច្ចុប្បន្ន ចំនួនមនុស្សរស់នៅទីក្រុងហុងកុង គឺស្មើរហូតដល់៧លាន៣សែននាក់ ទើបមនុស្សទាំងអស់នៅទីនេះ គ្មានទីធ្លាធំលាយស្រួលសម្រាប់រស់នៅឡើយ ។ ហេតុនេះ អ្នកមានជីវភាពក្រីក្រជាច្រើននាក់ត្រូវតែរស់នៅក្នុងបន្ទប់មានទំហំស្មើនឹងក្តារមឈូស ឬរន្ធកណ្តុរ ។

ផ្ទៃដីនៅទីក្រុងហុងកុងមានកំណត់ និងពុំអាចកសាងអគារបន្ថែមទៀតឡើយ ទើបធ្វើឱ្យតម្លៃបន្ទប់ក្នុងទីក្រុងកើនឡើងខ្ពស់ ហើយធ្វើឱ្យបន្ទប់ជួលក្នុងទីក្រុងមានតម្លៃខ្ពស់បំផុតលើពិភពលោក ។ ពលរដ្ឋហុងកុងរាប់ម៉ឺននាក់គ្មានជម្រើសផ្សេងទេ ហើយពួកគេត្រូវតែរស់នៅក្នុងបន្ទប់តូច ក្នុងនោះមានបន្ទប់ទឹក និងផ្ទះបាយនៅជាមួយគ្នា ។

លោក បិននី ឡែម ជាជាងថតរូបបានចំណាយពេលអស់៤ឆ្នាំ ដើម្បីដើរមើលបន្ទប់ចំនួន១០០បន្ទប់ក្នុងទីក្រុងហុងកុង និយាយថា បន្ទប់តូចៗសុទ្ធតែក្រាលកម្រាលឈើយ៉ាងស្អាត ប៉ុន្តែលោកបែរជាយំ ដោយសារការរស់នៅក្នុងសភាពបែបនេះ ។ ពួកគេត្រូវធ្វើអ្វីគ្រប់យ៉ាងក្នុងបន្ទប់ចង្អៀត ចាប់ពីការចម្អិនម្ហូបអាហារ, ងូតទឹក, អានសៀវភៅ, ផឹកកាហ្វេ រហូតដល់សម្រាក ។

បន្ទប់តូចចង្អៀតនៅទីក្រុងហុងកុងមានឈ្មោះថា «Trapped» ហើយអ្នកស្នាក់នៅគ្មានទីធ្លាធំទូលាយសម្រាប់ដើរទេ ។ ពួកគេអាចធ្វើបានត្រឹមតែសម្រាកនៅលើគ្រែប៉ុណ្ណោះ ដោយដាក់ជើងឱ្យត្រង់ ដើម្បីកុំឱ្យធាក់ជញ្ជាំងដែលគ្មានបង្អួច ។ រីឯដំបូលបន្ទប់វិញទាបខ្លាំង ដល់ថ្នាក់ពុំអាចឱ្យអ្នកស្នាក់នៅងើបឈរបាន ។

បុរសអាយុ៦៣ឆ្នាំម្នាក់ រស់នៅក្នុងបន្ទប់ដ៏តូចចង្អៀតមួយបាននិយាយប្រាប់លោក បិននី ឡែម ថា លោកបានចំណាយប្រាក់បង់ថ្លៃបន្ទប់ជួលចំនួន២.៤០០ដុល្លារហុងកុង (ឬស្មើ៣១៤ដុល្លារអាមេរិក) ក្នុង១ខែ ។

លោក បិននី ឡែម និយាយថា អ្នករស់នៅបន្ទប់តូចៗបានបើកទ្វារស្វាគមន៍ភ្ញៀវ និងរីករាយរៀបរាប់ពីការរស់នៅរបស់ពួកគេប្រាប់លោកដែលជាមនុស្សប្លែកមុខ ខណៈពលរដ្ឋហុងកុងខ្លះទៀតមានអារម្មណ៍ខ្មាស់អៀន ដែលត្រូវរស់នៅបន្ទប់បែបនេះ ។ ប៉ុន្តែលោក បិននី ឡែម សង្ឃឹមថា នៅពេលមនុស្សលើពិភពលោក បានឃើញការរស់នៅរបស់ពលរដ្ឋហុងកុង នឹងមានអ្នកណាមកជួយមិនខាន ៕

ប្រទេសចិន ៖ រូបភាពព្រះអាទិត្យចំនួន៧ តម្រៀបគ្នានៅលើផ្ទៃមេឃក្នុងទីក្រុង Chengdu ប្រទេសចិន បានក្លាយជាប្រធានបទមួយធ្វើឱ្យអ្នកប្រើប្រាស់បណ្តាញសង្គមជាច្រើនជជែកគ្នាថា តើវាជាព្រះអាទិត្យពិតប្រាកដ ឬក៏អត់? ប៉ុន្តែអ្នកជំនាញបានបកស្រាយថា វាគ្រាន់តែជារូបភាពបំភាន់ភ្នែកប៉ុណ្ណោះ ។

សារព័ត៌មានចិនជាច្រើនរាយការណ៍ថា រូបភាពនេះបានថតចេញពីបង្អួចរបស់អគារមន្ទីរពេទ្យ West China ។ រីឯសាក្សីដែលបានឃើញព្រះអាទិត្យចំនួន៧ នៅលើមេឃ និយាយថា ព្រះអាទិត្យបានបង្ហាញរូបរាងប្រមាណ១នាទីប៉ុណ្ណោះ បន្ទាប់មក វាក៏បាត់ស្រមោលទៅវិញ ។ ក្រៅពីនេះ មានពលរដ្ឋចិនជាច្រើននាក់ទៀត ក៏បានឃើញព្រះអាទិត្យដូចគ្នាដែរនៅចំណុចផ្សេងៗ ហើយពួកគេមានអារម្មណ៍ថា មានសំណាងខ្លាំងណាស់ ពីព្រោះមិនធ្លាប់ឃើញព្រះអាទិត្យច្រើនបែបនេះ ។

សារព័ត៌មានចិនរាយការណ៍ថា កាលពីថ្ងៃទី១៨ ខែសីហា ឆ្នាំ២០២៤ ព្រះអាទិត្យចំនួន៧ បានបង្ហាញរូបរាងឡើងក្នុងពេលជាមួយគ្នានៅទីក្រុង Chengdu ហើយអ្នកគ្រូពេទ្យម្នាក់ធ្វើការនៅមន្ទីរពេទ្យក្នុងទីក្រុង Chengdu ក៏បានថតរូបភាពនេះបង្ហោះក្នុងបណ្តាញសង្គម ។ ហេតុការណ៍នេះធ្វើឱ្យពលរដ្ឋចិនភ្ញាក់ផ្អើលគ្រប់ៗគ្នា និងឆ្ងល់ថា ហេតុអ្វីទើបមានព្រះអាទិត្យរហូតដល់៧ បែបនេះ?

អ្នកគ្រូពេទ្យនិយាយថា ៖ «ខ្ញុំបានឃើញព្រះអាទិត្យ៧ តម្រៀបលើគ្នានៅលើមេឃ ហើយដោយសារវាចម្លែកខ្លាំងពេក ទើបខ្ញុំថតរូបភាពយកមកចែកចាយក្នុងបណ្តាញសង្គម» ។ រីឯអ្នកប្រើប្រាស់បណ្តាញសង្គមឃើញរូបភាពព្រះអាទិត្យនេះនិយាយថា នាងមានសំណាងខ្លាំងណាស់ ដែលបានឃើញបាតុភូតធម្មជាតិបែបនេះ ខណៈអ្នកខ្លះទៀតជឿថា នេះជាសញ្ញាបង្ហាញថា ទេវតាកំពុងតែយាងចុះមកផែនដី ។

ប៉ុន្តែអ្នកជំនាញនិយាយថា បាតុភូតនេះហៅថា «Sun Dog» កើតឡើងដោយសារពន្លឺនៅស្រទាប់បរិយាកាស ហើយចំណុចដែលមានព្រះអាទិត្យ៧ គឺមានសំណើមត្រជាក់ខ្លាំងដូចទឹកកកអណ្តែតលើបរិយាកាស ។ ហេតុនេះ ពេលព្រះអាទិត្យបញ្ចេញពន្លឺឆ្លងកាត់តាមសំណើមត្រជាក់ វាធ្វើឱ្យពន្លឺងាក២២អង្សារ ឬ៤៦អង្សារ ហើយសំណើមនេះក៏តម្រៀបគ្នាក្លាយជាព្រះអាទិត្យជាច្រើនបំភាន់ភ្នែក ៕

ប្រទេសន័រវេស ៖ ពេលពលរដ្ឋនៅបណ្តាប្រទេសអាស៊ានចង់ឱ្យព្រះអាទិត្យបន្ថយពន្លឺបន្តិច ឬកុំឱ្យថ្ងៃក្តៅខ្លាំងពេក ប៉ុន្តែពលរដ្ឋនៅប្រទេសមួយចំនួនដែលមានអាកាសធាតុត្រជាក់ខ្លាំង ពួកគេបែរជាត្រូវការកំដៅថ្ងៃយ៉ាងខ្លាំង ។ បើយើងរស់នៅទីក្រុងដែលគ្មានពន្លឺថ្ងៃសោះ តើវានឹងល្អសម្រាប់ការរស់នៅដែរឬទេ?

ពលរដ្ឋរស់នៅទីក្រុង Rjukan ដែលជាទីក្រុងងងឹតបំផុតរបស់ប្រទេសន័រវេស បានសម្រេចចិត្តទិញកញ្ចក់មានតម្លៃជាង៥២ម៉ឺន៥ពាន់ដុល្លារអាមេរិក ដើម្បីជួយបំភ្លឺទីក្រុង ។ កញ្ចក់នេះមានតួនាទីបញ្ជូនពន្លឺថ្ងៃមកកាន់ទីក្រុងទាំងមូល សម្រាប់ឱ្យពលរដ្ឋក្នុងទីក្រុងងាយស្រួលរស់នៅ ។ រីឯការធ្វើដំណើរទៅទីក្រុង Rjukan ដែលស្ថិតនៅភាគពាយ័ព្យទីក្រុងធំ Oslo របស់ន័រវែស គឺត្រូវចំណាយពេលប្រមាណ ៣ម៉ោង ។

គេស្គាល់ថា Rjukan ជាទីក្រុងងងឹតបំផុតលើពិភពលោក និងមានពលរដ្ឋរស់នៅប្រមាណ ៣.៣០០នាក់ ។ ការដាក់ឈ្មោះទីក្រុងនេះ គឺដាក់តាមឈ្មោះរបស់ទឹកជ្រោះ «Rjukan Falls» ដែលមានកម្ពស់១០០៤ម៉ែត្រ ហើយទឹកជ្រោះនេះជាកន្លែងផលិតថាមពលអគ្គិសនីដ៏ធំបំផុតក្នុងទីក្រុងផងដែរ ។

ចំណែកមូលហេតុធ្វើឱ្យទីក្រុងនេះងងឹតខ្លាំង គឺចាប់ពីខែកញ្ញា ដល់ខែមីនា ជារៀងរាល់ឆ្នាំ ពន្លឺព្រះអាទិត្យនៅលើមេឃពុំអាចបំភ្លឺមកកាន់ទីក្រុងដោយផ្ទាល់បានទេ ដោយសារមានភ្នំព័ទ្ធជុំវិញទាំងអស់ ។ ទីក្រុង Rjukan និងទីក្រុងភាគច្រើនរបស់ន័រវេស គឺមានពេលថ្ងៃស្មើរហូតដល់២៤ម៉ោង លើកលែងតែចាប់ពីខែធ្នូ ដល់ខែមករា ដោយសារបាតុភូត «Midnight Sun» ។

ប៉ុន្តែទីក្រុង Rjukan មានភាពខុសប្លែកពីទីក្រុងផ្សេងទៀតនៅន័រវេស គឺទីក្រុងនេះស្ថិតនៅចន្លោះភ្នំ ហើយភ្នំបានបាំងពន្លឺថ្ងៃជិត ។ ពលរដ្ឋក្នុងទីក្រុងត្រូវការពន្លឺថ្ងៃយ៉ាងខ្លាំង ហើយពួកគេគិតថា ពន្លឺថ្ងៃផ្តល់ភាពកក់ក្តៅ និងផ្តល់វីតាមីន D ដល់រាងកាយ ។ ហេតុនេះ នៅឆ្នាំ២០១៣ ពួកគេក៏សម្រេចចិត្តចំណាយប្រាក់ជាង៥២ម៉ឺន៥ពាន់ដុល្លារអាមេរិក ដើម្បីដំឡើងកញ្ចក់បញ្ជូនពន្លឺថ្ងៃមកទីក្រុង ។

កញ្ចក់ទាំងអស់បានដំឡើងលើទីទួលខ្ពស់ជាងទីក្រុង ចំនួន៤៥០ម៉ែត្រ ហើយវាជាកញ្ចក់ស្រូបថាមពលព្រះអាទិត្យ ដែលអាចចាប់ចលនាព្រះអាទិត្យបាន ។ ចាប់ពីពេលនោះមក កញ្ចក់បានក្លាយជាព្រះអាទិត្យសិប្បនិម្មិតជួយបំភ្លឺទីក្រុងងងឹត ។ ពលរដ្ឋម្នាក់បានរស់នៅទីក្រុង Rjukan តាំងពីពុំទាន់ដំឡើងកញ្ចក់បំភ្លឺទីក្រុង និយាយថា លោកពុំធ្លាប់ឃើញពន្លឺថ្ងៃទេ ពន្លឺថ្ងៃជួយឱ្យទីក្រុងយើងកក់ក្តៅទាំងរាងកាយ និងផ្លូវចិត្ត ។

កន្លងមក មតិមួយចំនួនរិះគន់ថា ការដំឡើងកញ្ចក់បំភ្លឺក្នុងទីក្រុង គឺជាការខ្ជះខ្ជាយប្រាក់ឥតប្រយោជន៍ ។ ប៉ុន្តែមតិខ្លះទៀតជឿថា វាបានជួយឱ្យពលរដ្ឋក្នុងទីក្រុងកក់ក្តៅ និងទាក់ទាញភ្ញៀវទេសចរមកលេងផងដែរ ៕