ឱ្យតែនិយាយដល់ត្រកូល ភូថង គេតែងនឹកទៅដល់លោកព្រឺទ្ធាចារ្យម្នាក់ដែលជាអ្នកសេ្នហាជាតិ និងបានជម្រុញចលនាជួយរំដោះកម្ពុជាពីរបរខ្មៅងងឹតគឺលោកព្រឺទ្ធាចារ្យ សាយ ភូថង។
លោកព្រឹទ្ធាចារ្យ សាយ ភូថង មានកេរ្តិ៍ឈ្មោះល្បីរន្ទឺខ្លាំង ដោយសារលោកជាមនុស្សម្នាក់នៅក្នុងចំណោមសមាជិកគណៈអចិន្ត្រៃយ៍គណបក្សប្រជាជនបដិវត្តខ្មែរ (គណបក្សប្រជាជនកម្ពុជាបច្ចុប្បន្ន) ដែលជួយរំដោះកម្ពុជាចេញពីរបបប៉ុល ពត និងជាចលនាក្រោកឈរប្រឆាំងនិងអណានិគមបារាំង។
លោកព្រឹទ្ធាចារ្យ ធ្លាប់ត្រូវបានតែងតាំងជាប្រធានគណៈចាត់តាំងមជ្ឈឹមបក្ស និងជាប្រធានគណៈត្រួតពិនិត្របក្ស។
លើសពីនេះទៅទៀត លោកព្រឹទ្ធាចារ្យ ក៏បានកាន់តំណែង ជាអនុប្រធានក្រុមប្រឹក្សារដ្ឋ សមាជិកសភាខេត្តកណ្តាល និងចុងក្រោយ ជាឧត្តមទីប្រឹក្សា ព្រះមហាក្សត្រ មុននឹងទទួលមរណភាពកាលពីឆ្នាំ២០១៦។
ក្រោយពីលោកបាត់បង់ជីវិត សែស្រឡាយរបស់លោកក៏បានឡើងកាន់តំណែងធំៗជាបន្តបន្ទាប់នៅក្នុងខេត្តកោះកុង។
ជាក់ស្តែងលោក យុទ្ធ ភូថង បានឡើងកាន់តំណែងជាអភិបាលខេត្តកោះកុងពីឆ្នាំ១៩៩៨ ដល់ឆ្នាំ២០០៩ មុននឹងផ្លាស់តំណាងទៅជារដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។
បន្ទាប់មកកូនស្រីលោក យុទ្ធ ភូថង ដែលត្រូវជាចៅស្រីលោក សាយ ភូថង គឺលោកជំទាវ មិថុនា ភូថងក៏បានឡើងកាន់តំណាងជាអភិបាលខេត្តកោះកុង ពីឆ្នាំ២០១៧ ដល់បច្ចប្បន្ន ជំនួសឯកឧត្តម ប៊ុន លើត។
ថ្មីៗនេះ សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ក៏បានចេញអនុក្រឹត្យ តែងតាំង លោក ភូថង សេរីវុឌ្ឍី ឱ្យកាន់មុខតំណែងជាអភិបាល នៃគណៈអភិបាលក្រុងខេមរភូមិន្ទ ខេត្តកោះកុង ផងដែរ៕
