ព្រះរាជាណាចក្រដាណឺម៉ាកមានទីតាំងនៅអឺរ៉ុបខាងជើងតែងតែស្ថិតក្នុងលំដាប់កំពូលនៃប្រទេសដែលមានសុភមង្គលបំផុតក្នុងពិភពលោកអស់រយៈពេលជាច្រើនឆ្នាំមកហើយ។ លោកអ្នកមានដឹងអត់? ថាតើកត្តាអ្វីដែលធ្វើឱ្យប្រទេសមួយនេះនៅតែស្ថិតក្នុងចំណោមប្រទេសដែលមាននិរន្តរភាពបំផុតនៅក្នុងពិភពលោក និងកាន់កាប់តំណែងល្អជារៀងរាល់ឆ្នាំ? ខណៈប្រទេសអភិវឌ្ឍជាច្រើនទៀតមិនអាចកាន់កាប់តំណែងថេរដូចដាណឺម៉ាកនោះទេ។

យោងតាមសាកលវិទ្យាល័យ Yale របស់សហរដ្ឋអាមេរិក ក្រៅពីកត្តាសេដ្ឋកិច្ច សង្គម និងវប្បធម៌ ប្រជាជនដាណាម៉ាកគឺតែងតែមានរបៀបរស់នៅខុសប្លែកពីគេ និងគួរឱ្យចាប់អារម្មណ៍បំផុត ដែលយើងគ្រប់គ្នាគួររៀនសូត្រតាម ដោយភាគច្រើននៃពួកគេតែងតែផ្តោតលើការរស់នៅប្រកបដោយភាពស្និទ្ធស្នាលនឹងបរិស្ថាន ជាហេតុធ្វើឱ្យប្រទេសនេះតែងតែស្ថិតក្នុងលំដាប់កំពូលនៃប្រទេសដែលមានសុភមង្គលបំផុតក្នុងពិភពលោកជានិច្ច។ ដូច្នេះនៅក្នុងអត្ថបទនេះ យើងនឹងនាំលោកអ្នកមកដឹងពីរឿងរ៉ាវដ៏គួរឱ្យចាប់អារម្មណ៍ខ្លះៗនៃប្រទេសដាណាម៉ាក៖

១.ប្រទេសនេះប្រើកង់ច្រើនជាងរថយន្ត៖ ដោយសារការព្រួយបារម្ភអំពីការបំពុលបរិយាកាស និងការប្រែប្រួលអាកាសធាតុបានធ្វើឱ្យ Copenhagen ក្លាយជាទីក្រុងមួយដែលប្រើប្រាស់កង់ច្រើនជាងគេបំផុតក្នុងលោក។ ក្នុងឆ្នាំ ២០១៨ រាជធានី Copenhagen របស់ប្រទេសដាណឺម៉ាកមានកង់ចំនួន ៦៧៥,០០០ និងរថយន្តត្រឹមតែ ១២០,០០០ ប៉ុណ្ណោះ។ ដូច្នេះរាជធានី Copenhagen គឺជាកន្លែងដ៏ល្អមួយដែលមានសុវត្ថិភាពបំផុតក្នុងការជិះកង់។

២.អាហារផុតកំណត់នៅតែមានសុវត្ថិភាពខ្ពស់៖ យោងតាមស្ថិតិមួយភាគបីនៃអាហារដែលផលិតសម្រាប់មនុស្សទាំងអស់ត្រូវបានបោះចោល មានន័យថា មនុស្សនៅទីនោះច្រើនខ្ជះខ្ជាយអាហារ ទោះបីអាហារល្អប៉ុណ្ណាក៏ពួកគេយកបោះចោលដែរ។ ដូច្នេះកាកសំណល់អាហារបានរួមចំណែកដល់ការប្រែប្រួលអាកាសធាតុ ព្រោះផលិតកម្ម និងការចែកចាយអាហារត្រូវការថាមពល និងទឹកច្រើន។ ដើម្បីប្រយុទ្ធប្រឆាំងនឹងកាកសំណល់អាហារ ដាណឺម៉ាកបានបើកផ្សារទំនើបដំបូងរបស់ខ្លួនដែលលក់ផលិតផលផុតកំណត់ជាមួយនឹងការវេចខ្ចប់ត្រឹមត្រូវក្នុងតម្លៃថោកបំផុត។ ទោះជាយ៉ាងណា អាហារផុតកំណត់នៅទីនោះនៅតែមានសុវត្ថិភាពល្អ មិនប៉ះពាល់ដល់សុខភាពឡើយ។

៣.ដាណឺម៉ាកគឺជាប្រទេសដែលមានកោះថាមពលដំបូងគេរបស់ពិភពលោក៖ កោះថាមពលគឺជាផ្នែកមួយនៃគម្រោងដែលមានគោលបំណងការពារការកើនឡើងនៃការឡើងកំដៅផែនដី។ កោះទាំងនេះនឹងទទួលបានថាមពលពីខ្យល់បក់នៅឆ្នេរសមុទ្រ ដែលជាជំហានដ៏ធំមួយឆ្ពោះទៅរកការលុបបំបាត់ថាមពលឥន្ធនៈហ្វូស៊ីល។ កោះថាមពលរបស់ប្រទេសដាណឺម៉ាកនឹងបម្រើជាប្រភពថាមពលបៃតង ហើយត្រូវបានគេរំពឹងថានឹងផលិតថាមពលសម្រាប់ ៥ លានគ្រួសារ។

៤.កសិដ្ឋានដែលប្រើថាមពលខ្យល់ទាំងស្រុងផលិតអាហារបាន ១,០០០ តោន៖ ក្រុមហ៊ុនដាណឺម៉ាក Nordic Harvest បានបង្កើតកសិដ្ឋានថាមពលខ្យល់ ១១% ដំបូងបង្អស់របស់ពិភពលោក ដែលគ្រឿងបរិក្ខារទាំងមូលត្រូវបានដាក់ក្នុងអគារតែមួយ និងផលិតអាហារប្រមាណ ១,០០០ តោនក្នុងមួយឆ្នាំ ដែលកាត់បន្ថយការបញ្ចេញកាបូនយ៉ាងសំខាន់។

៥.ដាវទួរប៊ីនខ្យល់ត្រូវបានកែច្នៃជាចំណតកង់៖ ទីក្រុង Aalborg បានរកឃើញការប្រើប្រាស់ថ្មីសម្រាប់ទួរប៊ីនខ្យល់ចាស់។ ដាវទួរប៊ីនខ្យល់ដែលខូចខាត ឬចាស់គឺពិតជាពិបាកក្នុងការកែច្នៃឡើងវិញណាស់ ទោះជាយ៉ាងណា ដាវទួរប៊ីនខ្យល់នៅក្នុងទីក្រុងនេះមិនត្រូវបានគេបោះចោលនោះទេ ប៉ុន្តែបានប្រែទៅជា “ជម្រក” សម្រាប់កង់។ សាកលវិទ្យាល័យ Strathclyde ប៉ាន់ប្រមាណថានៅឆ្នាំ ២០៥០ នឹងមានកាកសំណល់ខ្យល់ ២ លានតោន ដូច្នេះការប្រើប្រាស់ដាវទួរប៊ីនខ្យល់កែច្នៃនេះនឹងជួយកាត់បន្ថយតម្រូវការសម្រាប់ដែកថែបថ្មី ក៏ដូចជាកាត់បន្ថយបរិមាណកាបូនដែលបានបង្កើតកំឡុងពេលផលិតបេតុង៕

ប្រទេសដែលមានកោះគឺជាប្រទេសដែលមានដែនដីជាប់នឹងសមុទ្រ។ កោះអាចជារមណីយដ្ឋានដ៏ពិសេសមួយ ក្នុងការទាក់ទាញភ្ញៀវទេសចរណ៍ឱ្យមកកំសាន្តនៅប្រទេសរបស់ខ្លួន។ សូម្បីកម្ពុជាក៏ជាប្រទេស ដែលមានដែនដីជាប់នឹងសមុទ្រ ព្រមទាំងមានកោះស្អាតៗជាច្រើនកន្លែងផងដែរ។ ទោះជាយ៉ាងណាប្រទេសយើងមិនមែនជាប្រទេសដែលមានកោះច្រើនជាងគេនោះទេ។ ដូច្នេះហើយតើអ្នកដឹងទេថា ប្រទេសណាដែលមានកោះច្រើនជាងគេបំផុតក្នុងលោក?

ជាការពិតណាស់យើងគ្រប់គ្នាធ្លាប់សិក្សារួចមកហើយអំពីកោះដែលធំជាងគេនៅលើពិភពលោក និងប្រទេសដែលសម្បូរកោះច្រើនជាងគេនៅអាស៊ី។ កោះដែលធំបំផុតនោះគឺកោះ Greenland ដែលជាកម្មសិទ្ធិផ្តាច់មុខរបស់ប្រទេសដាណឺម៉ាក (Denmark)។ ហើយឥណ្ឌូនេស៊ី គឺជាប្រទេសដែលមានកោះច្រើនជាងគេនៅអាស៊ី ដូច្នេះប្រទេសដែលមានកោះច្រើនជាងគេបំផុតនៅលើផែនដីយើងនោះ គឺប្រទេសប្រទេសស៊ុយអែត ដែលមានកោះច្រើនជាងគេបំផុតរហូតដល់ ២៦៧,៥៧០ កោះ។

ព្រះរាជាណាចក្រស៊ុយអែតគឺជាប្រទេសស្ថិតនៅអឺរ៉ុបប៉ែកខាងជើង និងជាប្រទេសធំជាងគេទីប្រាំនៅទ្វីបអឺរ៉ុប។ ប្រទេសនេះមានប្រជាជនសរុបចំនួន ១០,៦ លាននាក់ជាមួយផ្ទៃដី ៤៥០,២៩៥ គីឡូម៉ែត្រការ៉េ មានព្រំប្រទល់ជាប់ប្រទេសន័រវែស ហ្វាំងឡង់ និងដាណឺម៉ាក។ អ្វីដែលធ្វើឱ្យប្រទេសស៊ុយអែតកាន់តែលេចធ្លោរនោះគឺប្រទេសនេះមានកោះច្រើនជាងគេបំផុតក្នុងលោករហូតដល់ ២៦៧,៥៧០ កោះ ដែលកោះនីមួយៗសុទ្ធតែមានទេសភាពស្រស់ស្អាតខ្លាំងណាស់ ក៏ដូចជាបានទាក់ទាញភ្ញៀវទេសចរអន្តរជាតិរាប់លាននាក់។

ក្រៅពីប្រទេសស៊ុយអែត ប្រទេសន័រវែសក៏មានកោះច្រើនជាងគេបំផុតទីពីរក្នុងលោកផងដែរដោយមានចំនួន ២៣៩,០៥៧ កោះ។ ហើយចំណាត់ថ្នាក់ទីបីគឺប្រទេសហ្វាំងឡង់ជាមួយកោះទាំងអស់សរុបចំនួន ១៧៨,៩៤៧ កោះ ដោយចំណាត់ថ្នាក់ទីបួនគឺបានទៅលើប្រទេសកាណាដា គឺជាប្រទេសធំលំដាប់ទី ២ នៅក្នុងពិភពលោក និងមានទីតាំងស្ថិតនៅទ្វីបអាមេរិកខាងជើង ជាប់នឹងសហរដ្ឋអាមេរិក។ ប្រទេសកាណាដាមានកោះសរុបចំនួន ៥២,៤៥៥ កោះ។ ខណៈសហរដ្ឋអាមេរិកជាប់លេខ ៥ លើពិភពលោកមានកោះច្រើនជាងគេបំផុតចំនួន ១៨,៦១៧ កោះ៕

បរទេស៖ ប្រទេសណាមីប៊ីដែលស្ថិតក្នុងទ្វីបអាហ្វ្រិកគ្រោងនឹងបាញ់សម្លាប់សត្វដំរីចំនួន ៨៣ ក្បាល និងសត្វព្រៃជាច្រើនទៀត ក្នុងគោលបំណងមួយនេះ។
កាលពីថ្ងៃទី ២៨ ខែសីហា ឆ្នាំ២០២៤ ក្រសួងបរិស្ថាន រុក្ខាប្រមាញ់ និងទេសចរណ៍របស់ប្រទេសណាមីប៊ីបានប្រកាសថា ខ្លួននឹងបរបាញ់សត្វព្រៃជាង ៧០០ ក្បាល ដែលក្នុងនោះរួមមាន៖ សេះបង្កង់ ក្តាន់ ដំរីទឹក ក្របី ខ្លា និងសត្វដំរីធម្មតា ដើម្បីធ្វើជាអាហារសម្រាប់ចែកចាយដល់ប្រជាជនក្រីក្រដែលកំពុងអត់ឃ្លាន នៅពេលដែលប្រទេសអាហ្វ្រិកភាគនិរតីមួយនេះបានទទួលរងនូវគ្រោះរាំងស្ងួតដ៏អាក្រក់បំផុតរបស់ខ្លួនក្នុងរយៈពេល ១០០ ឆ្នាំ។

ជាមួយនឹងគ្រោះរាំងស្ងួតដ៏ធ្ងន់ធ្ងរបែបនេះ ជម្លោះមនុស្ស និងសត្វព្រៃត្រូវបានគេរំពឹងថានឹងកើនឡើង ប្រសិនបើអាជ្ញាធរមិនធ្វើអន្តរាគមន៍។ ហើយស្ទើរតែពាក់កណ្តាលនៃចំនួនប្រជាជនរបស់ប្រទេសណាមីប៊ី ត្រូវបានគេរំពឹងថានឹងជួបប្រទះនូវកម្រិតអសន្តិសុខស្បៀងខ្ពស់នៅក្នុងប៉ុន្មានខែខាងមុខនេះ ដោយសារប្រទេសណាមីប៊ីបានអស់អាហារបម្រុង ៨៤% របស់ខ្លួនកាលពីខែមុន នេះបើយោងតាមអង្គការសហប្រជាជាតិ។

ដូច្នេះការសម្លាប់សត្វព្រៃធ្វើជាអាហារគឺជាដំណោះស្រាយដ៏ល្អបំផុត ក៏ដូចជាកាត់បន្ថយសម្ពាធលើប្រភពទឹកដែលមានស្រាប់នៅក្នុងតំបន់ដែលមានចំនួនសត្វព្រៃច្រើនលើសលប់ រួមទាំងកាត់បន្ថយហានិភ័យនៃជម្លោះរវាងសត្វព្រៃ និងមនុស្ស នៅពេលដែលសត្វស្វែងរកអាហារ និងទឹកក្នុងអំឡុងពេលគ្រោះរាំងស្ងួត។ បើយោងតាមរបាយការណ៍អ្នកប្រមាញ់អាជីពនឹងត្រូវបានអនុញ្ញាតឱ្យបាញ់សត្វដំរីចំនួន ៨៣ ក្បាល រួមជាមួយនឹងដំរីទឹក ៣០ ក្បាល, ក្របី ៦០ ក្បាល, ក្តាន់ ៥០ ក្បាល, ខ្លា ១០០ ក្បាល និងសត្វសេះបង្កង់ចំនួន ៣០០ ក្បាលនៅក្នុងឧទ្យាន និងតំបន់សហគមន៍។

គួរបញ្ជាក់ដែរថា ណាមីប៊ីបានប្រកាសដាក់ប្រទេសក្នុងគ្រាអាសន្នចាប់តាំងពីខែឧសភា ឆ្នាំ២០២៤ មកដោយសារគ្រោះរាំងស្ងួតធ្ងន់ធ្ងរ។ គេប៉ាន់ប្រមាណថាប្រហែលពាក់កណ្តាលនៃចំនួនប្រជាជនរបស់ប្រទេសដែលស្មើនឹង ១.៤ លាននាក់នឹងប្រឈមមុខនឹងអសន្តិសុខស្បៀងដោយសារតែដំណាំដែលរងផលប៉ះពាល់។ ក្រសួងបរិស្ថានបាននិយាយថា “សមយុទ្ធនេះគឺជាការចាំបាច់បំផុត និងស្របតាមអាណត្តិរដ្ឋធម្មនុញ្ញរបស់យើង ដែលធនធានធម្មជាតិរបស់យើងត្រូវបានប្រើប្រាស់សម្រាប់ជាប្រយោជន៍ដល់ប្រជាពលរដ្ឋណាមីប៊ី”៕

សហរដ្ឋអាមេរិក ៖ អ្នកវិទ្យាសាស្ត្រអាមេរិកម្នាក់ពុំព្រមទៅមន្ទីរពេទ្យទេ ក្រោយពីពស់ចឹក ហើយបានព្យាយាមកត់ត្រាពីផលប៉ះពាល់រាងកាយបណ្តាលមកពីពិសពស់ ដើម្បីជាការសាកល្បង និងចង់ឱ្យមនុស្សគ្រប់គ្នាបានដឹង ។ លោកបានចាប់ផ្តើមកត់ត្រាពីការធ្វើទុក្ខផ្សេងៗក្នុងខ្លួន តាំងពីពេលពស់ចឹកដំបូង រហូតដល់ពេលចុងក្រោយនៃជីវិតរបស់លោក ។

កាលពីខែកញ្ញា ឆ្នាំ១៩៥៧ មនុស្សម្នាក់បានយកពស់១ក្បាលពីសួនសត្វ Lincoln Park មកប្រគល់ឱ្យសារមន្ទីរប្រវត្តិសាស្ត្រធម្មជាតិនៅទីក្រុង Chicago សហរដ្ឋអាមេរិក ដើម្បីឱ្យសារមន្ទីរជួយបញ្ជាក់ពីប្រភេទរបស់ពស់នេះ ។ លោក Karl Patterson Schmidt ជាអ្នកវិទ្យាសាស្ត្រខាងសត្វល្មូន ដែលធ្វើការក្នុងសារមន្ទីរ ក៏យល់ព្រមចិញ្ចឹមពស់មួយនេះ ។

លោកជាមនុស្សម្នាក់ក្នុងចំណោមអ្នកជំនាញផ្នែកពស់ដ៏ល្បីល្បាញបំផុត ហើយលោកទទួលបានជោគជ័យយ៉ាងច្រើន រហូតដល់មានពស់ជាង២០០ប្រភេទត្រូវបានដាក់ឈ្មោះតាមលោក ។ លោកនិយាយថា វាជាពស់ពិសមកពីអាហ្វ្រិកខាងត្បូង ដែលមានក្រឡាស្អាត និងភ្លឺ ។ ប៉ុន្តែលោកមិនប្រាកដចិត្តថា វាជាពូជអ្វីទេ ដោយសារអវៈយវៈមួយចំនួនមិនច្បាស់លាស់ ។

នៅថ្ងៃទី២៥ ខែកញ្ញា ឆ្នាំ១៩៥៧ ពេលលោក Schmidt កំពុងព្រួតពិនិត្យពស់នេះ ស្រាប់តែវាចឹកមេដៃឆ្វេងរបស់លោក រហូតកើតជាដំបៅតូចៗ ចំនួន២ ។ ប៉ុន្តែលោកប្រកែកពុំទៅមន្ទីរពេទ្យទេ ហើយយកប្រើប្រាស់ឱកាសនេះកត់ត្រាយ៉ាងលម្អិតពីផលប៉ះពាល់ដោយសារពិសពស់ ។

ក្នុងសៀវភៅកត់ត្រារបស់លោកសរសេរថា ៖ «ខ្ញុំបានទទួលពស់នេះពីមនុស្សម្នាក់ឈ្មោះ Robert Inger ។ ខ្ញុំពុំបានការពារខ្លួនអ្វីទាំងអស់ ហើយវាក៏ចឹកមេដៃឆ្វេងរបស់ខ្ញុំ ។ មាត់ធំរបស់វាបានចឹកខ្ញុំដោយប្រើចង្កូមក្រោយ ហើយចង្កូមខាងស្តាំបានខាំខ្ញុំមានជម្រៅប្រមាណ ៣មីល្លីម៉ែត្រ» ។

លោកមិននឹកស្មានថា វាមានពិសខ្លាំងទេ ហើយលោកក៏បានជិះរថភ្លើងត្រឡប់ទៅផ្ទះវិញ និងកត់ត្រាពីផលប៉ះពាល់ដោយសារពិសពស់បន្តទៀត ។ លោកសរសេរថា លោកពុំបានក្អួតទេ ពេលជិះរថភ្លើងនៅជាយក្រុង ប៉ុន្តែលោកមានអាការៈរងាញាក់ និងក្តៅខ្លួន ។ បន្ទាប់មក លោកក៏ចាប់ផ្តើមហូរឈាមតាមអញ្ចាញធ្មេញ ។

លោកបន្តថា លោកបត់ជើងតូចភាគច្រើនចេញឈាម ហើយលោកក៏បានផឹកទឹក ប៉ុន្តែក្អួតយ៉ាងខ្លាំង ។ ក្រោយមក លោកក៏បានធូរស្រាលវិញ និងសម្រាកលក់រហូតដល់ព្រឹក ។ ពេលភ្ញាក់ឡើង លោកក៏បរិភោគអាហារពេលព្រឹក និងកត់ត្រាពីផលប៉ះពាល់ដោយសារពិសពស់បន្តទៀត ។

នៅថ្ងៃទី២៦ ខែកញ្ញា លោកបានបរិភោគអាហារជាច្រើនមុខ ដូចជា ៖ នំកញ្ចប់, ស៊ុត, នំប៉័ង, ទឹកប៉េងប៉ោះ និងកាហ្វេ ហើយលោកសង្កេតឃើញថា មាត់ និងច្រមុះរបស់លោកហូរឈាមតិចៗឥតឈប់ ។ ប៉ុន្តែនេះជាឃ្លាចុងក្រោយបង្អស់ ដែលលោកបានកត់ត្រាក្នុងសៀវភៅ ។

តាមឯកសារបញ្ជាក់ថា ក្រោយបរិភោគអាហារថ្ងៃត្រង់រួច លោក Schmidt បានក្អួតយ៉ាងខ្លាំង ហើយលោកក៏សម្រេចចិត្តទូរស័ព្ទទៅប្រពន្ធ ។ ប៉ុន្តែមិនយូរប៉ុន្មាន រាងកាយរបស់លោកលែងកម្រើកដូចមុន ។ ហេតុការណ៍នេះបានកើតឡើងលើខ្លួនលោក មិនដល់២៤ម៉ោងទេ ។

សរុបមក ពស់ដែលចឹកលោក គឺជាប្រភេទ Dispholidus typus ស្ថិតក្នុងចំណោមពូជពស់មានពិសខ្លាំងបំផុតលើពិភពលោក ។ លោកត្រូវបានគេណែនាំឱ្យទៅរកគ្រូពេទ្យ ប៉ុន្តែលោកបដិសេធមិនព្រមទៅ ហើយនិយាយថា ៖ «ខ្ញុំមិនទៅទេ ព្រោះវានឹងធ្វើឱ្យរោគសញ្ញារបស់ខ្ញុំកាន់តែធ្ងន់ធ្ងរ» ។

មតិខ្លះនិយាយថា រឿងរ៉ាវរបស់លោក Schmidt គួរឱ្យសោកសៅ ដែលកើតឡើងដោយសារការចឹងដឹង ។ ប៉ុន្តែមតិខ្លះទៀតជឿថា ថ្នាំបន្សាបពិសពស់ប្រភេទនេះមានតែនៅអាហ្វ្រិកប៉ុណ្ណោះ ហើយលោក Schmidt យល់ព្រមទទួលយកជោគវាសនារបស់ខ្លួន និងធ្វើការរហូតដល់ថ្ងៃស្លាប់ ៕

ប្រទេសចិន ៖ កាលពីថ្ងៃទី១៦ ខែសីហា ឆ្នាំ២០២៤ អាជ្ញាធរក្រុងប៉េកាំង ប្រទេសចិន បានដំណើរការ ការដឹកជញ្ជូនអាហារតាមដ្រូនជាលើកដំបូងទៅឱ្យភ្ញៀវទេសចរមកលេងមហាកំផែង ។ អាជ្ញាធរនិយាយថា ការដឹកជញ្ជូនអាហារតាមដ្រូននឹងជួយឱ្យភ្ញៀវទេសចរទទួលបានអាហារ, ភេសជ្ជៈ និងសម្ភារៈចាំបាច់មួយចំនួនយ៉ាងឆាប់រហ័សក្នុងអំឡុងពេលមេឃក្តៅ ។

កន្លងមក ភ្ញៀវទេសចរដែលមកដើរកម្សាន្ត និងស្រាវជ្រាវនៅមហាកំផែងរបស់ចិនចិន ពួកគេជួបការលំបាកយ៉ាងខ្លាំង ដូចជា ៖ ខ្វះខាតអាហារ និងខ្វះទឹកផឹក ពេលដើរផ្លូវឆ្ងាយ ។ ហេតុនេះ អាជ្ញាធរប្រចាំតំបន់ប៉ាតាំលីងរបស់មហាកំផែងបានសហការជាមួយភ្នាក់ងារដឹកជញ្ជូនអាហារអនឡាញ ដោយការប្រើប្រាស់ដ្រូនសម្រាប់បញ្ជូនអាហារ និងភេសជ្ជៈមកឱ្យភ្ញៀវទេសចរដល់កន្លែង ។

ភ្ញៀវទេសចរណាចង់ទិញអាហារ និងភេសជ្ជៈ ពួកគេអាចស្កេន QR Code តាមរយៈទូរស័ព្ទដៃដើម្បីកុម្ម៉ង់ទិញអាហារ បន្ទាប់មក ដ្រូននឹងបញ្ជូនអាហារមកឱ្យភ្ញៀវទេសចរក្នុងរយៈពេលត្រឹមតែ៥នាទី ។ ប៉ុន្តែបើភ្ញៀវទេសចរដើរទៅទិញអាហារដោយខ្លួនឯង ពួកគេនឹងចំណាយពេលរហូតដល់៥០នាទីឯណោះ ។

ភ្នាក់ងារបញ្ជូនអាហារតាមដ្រូនទៅឱ្យភ្ញៀវទេសចរ បញ្ជាក់ថា នៅពេលដ្រូនបញ្ជូនអាហារឱ្យភ្ញៀវទេសចររួចហើយ ដ្រូននឹងនាំយកសំរាមរបស់ភ្ញៀវទេសចរត្រឡប់មកវិញ ។ ហេតុនេះ វាបានជួយកាត់បន្ថយប្រាក់ឈ្នួលយ៉ាងច្រើនសម្រាប់អាជ្ញាធរជួលបុគ្គលិកថែទាំមហាកំផែង ។

ចំណុចមើលទេសភាពក្នុងតំបន់ប៉ាតាំលីងរបស់មហាកំផែងចិន គឺទទួលបានការពេញនិយមយ៉ាងខ្លាំង ដែលបានទទួលស្វាគមន៍ភ្ញៀវទេសចរលើកដំបូងនៅឆ្នាំ១៩៥៨ ។ នៅតំបន់នេះបានទទួលស្វាគមន៍ភ្ញៀវទេសចរចិន និងភ្ញៀវទេសចរបរទេស រហូតដល់ជាង២០០លាននាក់ឯណោះ ។

គួរបញ្ជាក់ថា មហាកំផែងរបស់ចិនមានប្រវែងសរុបជាង២ម៉ឺនគីឡូម៉ែត្រ ដែលគ្របដណ្តប់ខេត្ត-ក្រុង ចំនួន១៥ រួមមាន ៖ ក្រុងប៉េកាំង, ហឺប៉ី និងម៉ុងហ្គោលីខាងក្នុង ស្ថិតនៅភាគខាងជើងប្រទេសចិន រួមទាំងឆ្លងកាត់ខេត្តហ្គាន់ស៊ូ និងខេត្តស៊ីនជៀង ស្ថិតនៅភាគពាយ័ព្យប្រទេសចិន ។

កន្លងមក អាជ្ញាធរក្រុងប៉េកាំងបានបន្ថែមសេវាកម្មថ្មីៗ ដើម្បីផ្តល់ភាពងាយស្រួលដល់ភ្ញៀវទេសចរ និងជំរុញសេដ្ឋកិច្ច ។ ក្រៅពីសេវាកម្មដឹកជញ្ជូនអាហារតាមដ្រូន ភ្ញៀវទេសចរអាចចូលរួមវគ្គបណ្តុះបណ្តាលសាកល្បងការអប់រំអាកាសយានិក ឬពួកគេអាចជិះឧទ្ធម្ភាគចក្រ ឬជិះយន្តហោះបើកបរដោយស្វ័យប្រវត្តិមើលទេសភាពដ៏ស្រស់ស្អាតនៅមហាកំផែង ៕

ប្រទេសកាណាដា ៖ កាលពីថ្ងៃទី២៧ ខែសីហា ឆ្នាំ២០២៤ សារព័ត៌មានបរទេសរាយការណ៍ថា រដ្ឋាភិបាលកាណាដាប្រកាសដំឡើងពន្ធលើរថយន្តអគ្គិសនីនាំចូលពីប្រទេសចិន រហូតដល់១០០% និងយកពន្ធដែក និងអាលុយមីញ៉ូមចិន ២៥% ។ ការដំឡើងពន្ធនេះ គឺអនុវត្តតាមគោលការណ៍របស់សហរដ្ឋអាមេរិក និងសហភាពអឺរ៉ុប ដែលបានប្រមូលពន្ធទំនិញចិនកន្លងមក ។

កាណាដានឹងប្រមូលពន្ធរថយន្តគ្រប់ប្រភេទដែលនាំចូលពីប្រទេសចិន ព្រមទាំងរថយន្ត Tesla ផងដែរ ។ បរិមាណការនាំចូលរថយន្តពីចិនមកកាន់ Vancouver ជាទីក្រុងធំបំផុតរបស់កាណាដា បានកើនឡើង៤៦០% បើប្រៀបធៀបប្រចាំឆ្នាំ មកស្មើនឹង៤៤.៣៥៦គ្រឿងនៅឆ្នាំ២០២៣ ក្រោយពី Tesla ចាប់ផ្តើមនាំចេញរថយន្តអគ្គិសនីផលិតនៅទីក្រុងសៀងហៃ មកកាណាដា ។

នាយករដ្ឋមន្ត្រីកាណាដា លោក Justin Trudeau បានថ្លែងក្នុងកិច្ចប្រជុំគណៈរដ្ឋមន្ត្រីថា ទីក្រុង Ottawa នឹងឆ្លើយតបទៅរដ្ឋាភិបាលចិន ដែលតាំងចិត្តអនុវត្តគោលនយោបាយផលិតទំនិញលើសលប់ (Over-Capacity) ហើយលោកជឿថា ចិនពុំបានអនុវត្តតាមច្បាប់ទេ ។ ចំណុចសំខាន់ វិធានការរបស់កាណាដាស្របគ្នានឹងការអនុវត្តរបស់ប្រទេសផ្សេងៗ ហើយអត្រាពន្ធថ្មីនឹងអនុវត្តចាប់ពីថ្ងៃទី១ ខែតុលា ឆ្នាំ២០២៤ តទៅ ។

ស្ថានទូតចិននៅកាណាដាបានរិះគន់ការប្រមូលពន្ធថ្មីនេះថា ជាវិធានការរារាំងពាណិជ្ជកម្ម ហើយពាក់ព័ន្ធនឹងរឿងនយោបាយ ។ ស្ថានទូតចិនបញ្ជាក់ថា កាណាដាក៏ពុំអើពើនឹងបទប្បញ្ញត្តិរបស់អង្គការពាណិជ្ជកម្មពិភពលោក (WTO) ផងដែរ ។

មន្ត្រីនាំពាក្យស្ថានទូតចិននិយាយថា ទង្វើរបស់កាណាដានឹងប៉ះពាល់ដល់កិច្ចសហការសេដ្ឋកិច្ច និងពាណិជ្ជកម្មរវាងប្រទេសទាំងពីរ ក៏ដូចជាអតិថិជន និងអាជីវកម្មកាណាដា ។ មន្ត្រីនាំពាក្យស្ថានទូតចិនបញ្ជាក់ក្នុងសេចក្តីថ្លែងការណ៍ កាលពីថ្ងៃទី២៦ ខែសីហា ថា រដ្ឋាភិបាលកាណាដាដំឡើងពន្ធរថយន្តអគ្គិសនីចិន ដោយពុំពិចារណាពីការតវ៉ារបស់ចិនជាច្រើនលើក ។

ហេតុនេះ ចិនសូមអំពាវនាវឱ្យកាណាដាទទួលស្គាល់ការពិត និងអនុវត្តតាមច្បាប់របស់ WTO ។ កាណាដាគួរតែដោះស្រាយសកម្មភាពខុសឆ្គង ព្រមទាំងឈប់យករឿងនយោបាយមកពាក់ព័ន្ធជាមួយសេដ្ឋកិច្ច និងពាណិជ្ជកម្ម ពីព្រោះចិនជាដៃគូពាណិជ្ជកម្មលំដាប់ទី២ របស់កាណាដា បន្ទាប់ពីអាមេរិក ។

ចំណែក Tesla ពុំបានបង្ហាញពីបរិមាណរថយន្តអគ្គិសនីនាំចេញពីចិនមកកាណាដាទេ ប៉ុន្តែតាមការពិនិត្យលេខកូដរថយន្ត (Vehicle Identification Codes) បង្ហាញថា មានការនាំចេញរថយន្តម៉ាក Model 3 និង Model Y ពីសៀងហៃ មកកាណាដា ។

មន្ត្រីរដ្ឋាភិបាលកាណាដាទទួលស្គាល់ថា កាណាដានឹងដំឡើងពន្ធ១០០% ពីរថយន្តអគ្គិសនីផលិតនៅចិន ។ បើក្រុមហ៊ុននានាដែលមានរោងចក្រនៅចិន ផ្លាស់ប្តូរទៅផលិតរថយន្តអគ្គិសនីនៅប្រទេសផ្សេង ពួកគេនឹងរួចផុតពីអត្រាពន្ធនេះ ។

លោក Seth Goldstein អ្នកយុទ្ធសាស្ត្រដើមទុនមកពី Morningstar បញ្ជាក់ថា ៖ «ការឆ្លើយតបនឹងវិធានការពន្ធទាំងនេះ ខ្ញុំគិតថា Tesla នឹងផ្លាស់ប្តូរទីតាំងផលិត ឬនាំចេញរថយន្តពីអាមេរិកមកកាណាដាជំនួស» ។

សហភាពអឺរ៉ុបបានបន្ធូរបន្ថយអត្រាពន្ធចំពោះ Tesla នៅខែសីហា ឆ្នាំ២០២៤ ដោយប្រមូលពន្ធរថយន្ត Tesla នាំចូលពីចិន ត្រឹមតែ៩% ប៉ុណ្ណោះ ។ រីឯក្រុមហ៊ុនរថយន្តខ្លះត្រូវបានសហភាពអឺរ៉ុបយកពន្ធរហូតដល់៣៦,៣% ៕

សហរដ្ឋអាមេរិក ៖ អ្នកស្រី Hetty Green គឺជាអ្នកជំនួញម្នាក់ត្រូវបានគេស្គាល់ឈ្មោះថា «ស្ត្រីមានទ្រព្យសម្បត្តិច្រើនបំផុតនៅអាមេរិក» ដោយសារការប្រកបមុខជំនួញរីកចម្រើន និងអាចរកប្រាក់ចំណូលបានច្រើនពុំគួរឱ្យជឿ ។ អ្នកស្រីបានកើតនៅថ្ងៃទី២១ ខែវិច្ឆិកា ឆ្នាំ១៨៣៤ និងស្លាប់នៅថ្ងៃទី៣ ខែកក្កដា ឆ្នាំ១៩១៦ ។

អ្នកស្រី Hetty Green បានចាប់ផ្តើមលេងភាគហ៊ុនផ្តោតទៅលើតម្លៃ (Value Investing) ។ ជារៀងរាល់ថ្ងៃ អ្នកស្រីតែងតែស្លៀកពាក់ខោអាវពណ៌ខ្មៅជានិច្ច និងធុំក្លិនខ្លួនយ៉ាងខ្លាំង រហូតដល់គេដាក់ឈ្មោះថា «មេធ្មប់ Wall Street» ប៉ុន្តែវាពុំមែនជាឈ្មោះដែលធ្វើឱ្យមនុស្សម្នាស្គាល់អ្នកស្រីច្រើនបំផុតទេ ។

ប៉ុន្តែអ្វីដែលធ្វើឱ្យអ្នកស្រីល្បីល្បាញខ្លាំងក្នុងសង្គម គឺដោយសារមនុស្សទូទៅបានដាក់ឈ្មោះអ្នកស្រីថា «បុគ្គលកំណាញ់បំផុតលើពិភពលោក» ហើយឈ្មោះនេះក៏បានកត់ត្រាក្នុង Guinness World Records ទៀតផង ។

បើទោះជាអ្នកស្រីមានទ្រព្យសម្បត្តិច្រើនមហាសាលយ៉ាងណាក្តី ប៉ុន្តែការរស់នៅប្រចាំថ្ងៃរបស់អ្នកស្រី គឺពុំខុសគ្នានឹងមនុស្សគ្មានផ្ទះសម្បែងឡើយ ។ អ្នកស្រីបានរើសនំខេកដែលគេបោះបង់ចោលយកមកបរិភោគ និងទិញនំ Biscuit តូចៗមានតម្លៃថោកពីហាងលក់គ្រឿងទេស ។

អ្នកស្រីពុំប្រើប្រាស់ម៉ាស៊ីនកំដៅ ឬបង់ថ្លៃទឹកក្តៅក្នុងផ្ទះទេ ហើយអ្នកស្រីក៏ពុំព្រមទៅព្យាបាលជំងឺនៅមន្ទីរពេទ្យដែរ ។ ប៉ុន្តែអ្នកស្រីបានយកឈើមកសង្កត់ស្នាមហើមលើរាងកាយជំនួសវិញ ។ លើសពីនេះ អ្នកស្រីពុំបានចំណាយប្រាក់ទិញខោអាវថ្មីៗទេ គឺអ្នកស្រីស្លៀកតែខោអាវពណ៌ខ្មៅ១កំប្លេប៉ុណ្ណោះ អស់រយៈពេល៦៥ឆ្នាំ ។ អ្នកស្រីស្លៀកពាក់ខោអាវដដែលនេះរៀងរាល់ថ្ងៃ រហូតដល់វាផុយដាច់រហែក ។

អ្នកស្រីប្រាប់ទៅអ្នកបោកខោអាវរបស់ខ្លួនថា ឱ្យសម្អាតនៅត្រង់ចំណុចណាដែលប្រឡាក់ ឬកខ្វក់ប៉ុណ្ណោះ ដើម្បីសន្សំសំចៃថ្លៃសាប៊ូ ។ គេនិយាយថា អ្នកស្រីស្លៀកខោតែ១ប៉ុណ្ណោះ តាំងពីអាយុ១៦ឆ្នាំ រហូតដល់ពេលអ្នកស្រីស្លាប់អាយុ៨១ឆ្នាំ គឺអ្នកស្រីពុំបានស្លៀកខោផ្សេងឡើយ ។

ក្រោយមក គេក៏បានប៉ាន់ស្មានពីទ្រព្យសម្បត្តិទាំងអស់របស់អ្នកស្រី គឺស្មើពី១០០លានដុល្លារ ទៅ២០០លានដុល្លារអាមេរិកឯណោះ ។ បើប្រៀបធៀបចំនួនប្រាក់នេះជាមួយពេលបច្ចុប្បន្ន គឺស្មើពី២.៧០០លានដុល្លារ ទៅ៥.៤០០លានដុល្លារអាមេរិក ហើយគេកំណត់ថា អ្នកស្រីជាបុគ្គលមានទ្រព្យសម្បត្តិច្រើនបំផុតលើពិភពលោក នាសម័យនោះ ៕

ថ្មីៗនេះ មហាជនជាច្រើនហាក់មានការចាប់អារម្មណ៍យ៉ាងខ្លាំងចំពោះវត្តមាន Miss Universe និង Mister Universe ឡាវឆ្នាំ២០២៤ ចំនួន២រូប ដែលបានបង្ហាញខ្លួននៅមុខព្រះបរមរាជរាំងខ្មែរ ក្នុងឈុតសម្លៀកបំពាក់ប្រពៃណីខ្មែរយ៉ាងស្រស់ស្អាត។

កាលពីថ្ងៃទី ២៩ ខែសីហា យោងតាមការបង្ហោះនៅលើគេទំព័រ Miss Universe Lao បានបង្ហាញវត្តមានបវរកញ្ញាចក្រឡាវប្រចាំឆ្នាំ ២០២៤ ដែលនាងមានឈ្មោះថា Phiranya Thipphomvong នៅក្នុងឈុតប្រពៃណីខ្មែរ ដោយគ្រងស្បៃធំពណ៌មាស ស្លៀកសំពត់ចំបាប់ ព្រមជាមួយនឹងគ្រឿងលង្ការការមាស។ តាមរយៈវីដេអូ នាងគឺស្ថិតនៅមុខព្រះបរមរាជវាំងខ្មែរ ព្រមជាមួយនឹងហ្វូងសត្វព្រាបទីនោះ បានធ្វើការដើរបោះជំហានទៅមុខដោយទឹកមុខញញឹមប្រិមប្រិយ។

ជាមួយនេះ គេហទំព័រ Mister Universe Lao ក៏បានដាក់បង្ហោះកំឡោះរូបសង្ហារឡាវមួយរូបទៀត ដែលនឹងចូលរួមប្រកួត Mister Universe លើឆាកអន្តរជាតិនាពេលខាងមុខ ក៏បានស្ថិតនៅមុខព្រះបរមរាជវំាងខ្មែរ ក្នុងឈុតសម្លៀកបំពាក់ខ្មែរដូចគ្នាដែរ។ គាត់គឺមានឈ្មោះថា Kevin Chamonty បានគ្រងអាវប្រពៃណី និងស្លៀកសំពត់ចងក្បិន ដើរបោះជំហានទៅមុខ ដោយទឹកមុខមាំ អង់អាច និងស្រស់សង្ហារ។

គួរបញ្ជាក់ថា វត្តមានរបស់អ្នកទាំង២ មកកាន់ទឹកដីនៃប្រទេសកម្ពុជា ដោយពួកគេបានអញ្ជើញឲ្យចូលរួមធ្វើជាភ្ញៀវកិត្តិយសនៅក្នុងកម្មវិធី Miss Universe Cambodia 2024 ដែលប្រព្រឹត្តិទៅនារាត្រីវគ្គផ្តាច់ព្រ័តថ្ងៃទី ២៩ ខែសីហានេះផងដែរ៕