ប្រទេសថៃឥឡូវនេះស្ថិតក្នុងចំណោមប្រទេសចំនួន ដែលក្រសួងរតនាគារសហរដ្ឋអាមេរិកបានដាក់ចូលទៅក្នុង “បញ្ជីឃ្លាំមើលពិសេស” លើរូបិយប័ណ្ណរបស់ខ្លួន ដែលជាផ្នែកមួយនៃការពិនិត្យឡើងវិញពាក់កណ្តាលឆ្នាំនៃការអនុវត្តការប្តូរប្រាក់បរទេសក្នុងចំណោមដៃគូពាណិជ្ជកម្មសំខាន់ៗ នេះបើយោងតាមរបាយការណ៍ចុងក្រោយបំផុតដែលបានបង្ហាញនៅចុងខែមករា ឆ្នាំ២០២៦។

យោងតាមការចុះផ្សាយរបស់ Reuters ការបន្ថែមប្រទេសថៃចូលក្នុងបញ្ជីតាមដានរូបិយប័ណ្ណនេះ គឺដោយសារតែពាណិជ្ជកម្មរបស់ថៃដែលនាំចូលអាមេរិកមានចំនួនច្រើនលើស និងទឹកប្រាក់សេសសល់ច្រើន។ ដូចគ្នានេះដែរ សហរដ្ឋមេរិកនឹងត្រួតពិនិត្យកាន់តែខ្លាំងឡើងលើការអនុវត្តរូបិយប័ណ្ណ និងគោលនយោបាយអត្រាប្តូរប្រាក់របស់ប្រទេសថៃ។

គួរជម្រាបថា បញ្ជីតាមដានរូបិយប័ណ្ណ គឺជាបញ្ជីត្រួតពិនិត្យផ្លូវការដែលក្រសួងរតនាគារសហរដ្ឋអាមេរិកប្រើប្រាស់ ដើម្បី តាមដានប្រទេស ដែលអាចអនុវត្តគោលនយោបាយរូបិយវត្ថុ ឬអត្រាប្តូរប្រាក់ ដែលមិនយុត្តិធម៌ ឬអាចប៉ះពាល់ដល់ ពាណិជ្ជកម្មអន្តរជាតិ។ ឯការណ៍ដែលប្រទេសថៃត្រូវបានបញ្ចូលទៅក្នុងបញ្ជីនេះ គឺដោយសារតែកំណើនគណនីចរន្ត (Current Account) និងអតិរេកពាណិជ្ជកម្មទ្វេភាគីជាមួយសហរដ្ឋអាមេរិក។

ការបន្ថែមថៃចូលក្នុងបញ្ជីនេះមានន័យថា ប្រទេសដែលជាប់ក្នុងបញ្ជីតាមដានជាមួយគ្នា នឹងកើនដល់ ១០ ដែលរួមបញ្ចូលទាំងចិន ជប៉ុន កូរ៉េខាងត្បូង តៃវ៉ាន់ សិង្ហបុរី វៀតណាម អាល្លឺម៉ង់ អៀរឡង់ និងស្វីស។ យ៉ាងណាមិញ របាយការណ៍របស់ក្រសួងរតនាគារមិនបានចាត់ថ្នាក់ប្រទេសណាមួយថាជា «ប្រទេសបន្លំភ្នែករូបិយប័ណ្ណ» ទេ ហើយជាធម្មតា ប្រទេសណាដែលរងការចាត់ថ្នាក់បែបនេះ អាចរងទណ្ឌកម្មពីសហរដ្ឋអាមេរិក។

ដោយឡែកចំពោះប្រទេសចិន បើទោះជាមិនត្រូវបានកំណត់ថាជាអ្នករៀបចំរូបិយប័ណ្ណក៏ដោយ ប៉ុន្តែក្រសួងរតនាគារអាមេរិកបានវា.យប្រហា.រចិនម្តងហើយម្ដងទៀត ដោយចាត់ទុកថា «ប្រទេសនេះលេចធ្លោខ្លាំងក្នុងចំណោមដៃគូពាណិជ្ជកម្មសំខាន់ៗរបស់អាមេរិក ដោយសារកង្វះតម្លាភាពជុំវិញគោលនយោបាយ និងការអនុវត្តអត្រាប្តូរប្រាក់»។

របាយការណ៍នេះក៏បានតាមដានលើប្រទេសដែលមានអតិរេកពាណិជ្ជកម្មច្រើនទាក់ទងនឹងសហរដ្ឋអាមេរិក និងអ្នកដែលធ្វើអន្តរាគមន៍យ៉ាងសកម្មនៅក្នុងទីផ្សារប្តូរប្រាក់បរទេស ដើម្បីទទួលបានអត្ថប្រយោជន៍ពីការប្រកួតប្រជែងផងដែរ៕

តូក្យូ ៖ ក្រុមអ្នកស្រាវជ្រាវនៅសាកលវិទ្យាល័យតូក្យូ ប្រទេសជប៉ុន បានបង្កើតវ៉ាក់សាំងមួយប្រភេទដើម្បីឈានដល់ការប្រយុទ្ធប្រឆាំងនឹងវីរុស Nipah ដែលកំពុងបង្កការភ័យខ្លាចដល់មនុស្សទូទាំងពិភពលោក។ ក្រោយការពិសោធទទួលបានជោគជ័យ គេរំពឹងថាវ៉ាក់សាំងនេះនឹងត្រូវបានដាក់ឲ្យប្រើប្រាស់សាកល្បងនៅខែមេសាខាងមុខនេះ។ នេះបើតាមការចុះផ្សាយរបស់សារព័ត៌មាន Nikkei Asia របស់ជប៉ុនកាលពីចុងសប្ដាហ៍មុន។

តាមរយៈរបាយការណ៍ដែលបានបង្ហាញ វ៉ាក់សាំងនេះមានមូលដ្ឋានព្យាបាលផ្អែកលើវីរុសកញ្ជ្រឹល។ នៅពេលចាក់ចូលទៅក្នុងខ្លួនមនុស្ស វានឹងជំរុញការផលិតប្រូតេអ៊ីនស្រដៀងគ្នាទៅនឹងវីរុស Nipah ដែលនឹងពង្រឹងប្រព័ន្ធភាពស៊ាំ និងអាចការពារការវិវត្តនៃការឆ្លងមេរោគក្នុងករណីរាងកាយរបស់មនុស្សដែលចាក់វ៉ាក់សាំងនោះមានការឆ្លងមេរោគ។

សាកលវិទ្យាល័យតូក្យូបានបញ្ជាក់អំពីប្រសិទ្ធភាព និងសុវត្ថិភាពនៃវ៉ាក់សាំងនេះ តាមរយៈការធ្វើតេស្តទៅលើសត្វ hamster និងសត្វដទៃទៀត ដោយប្រសិនបើដំណាក់កាលសាកល្បងដំបូងប្រទេសបែលហ្ស៊ិក ទទួលបានជោគជ័យ នោះដំណាក់កាលបន្ទាប់នៃការសាកល្បងសុវត្ថិភាព និងប្រសិទ្ធភាពនៃវ៉ាក់សាំងចំពោះមនុស្សពេញវ័យ និងកុមារនឹងត្រូវធ្វើឡើងនៅប្រទេសបង់ក្លាដែសនៅពាក់កណ្តាលឆ្នាំ 2027។

ជាមួយគ្នានេះ សារព័ត៌មាន Nikkei Asia បានរាយការណ៍ថា ការអភិវឌ្ឍវ៉ាក់សាំងនេះគឺជាផ្នែកមួយនៃការជំរុញដ៏ទូលំទូលាយរបស់ប្រទេសជប៉ុនក្នុងការពង្រឹងការត្រៀមខ្លួនសម្រាប់ជំងឺរាតត្បាតនាពេលអនាគត ជាពិសេសជំងឺដែលបណ្តាលមកពីជំងឺ zoonotic ដែលចម្លងពីសត្វទៅមនុស្ស។ អ្នកស្រាវជ្រាវដែលពាក់ព័ន្ធនឹងគម្រោងនេះសង្ឃឹមថាការសាកល្បងនេះនឹងផ្តល់នូវទិន្នន័យសំខាន់ៗដែលផ្នែកវេជ្ជសាស្រ្តត្រូវការដើម្បីឈានទៅរកការសិក្សាធំៗ និងនៅទីបំផុតទទួលបានការអនុម័តពីនិយតករ។

អ្នកជំនាញសុខភាពសាធារណៈបានព្រមានជាយូរមកហើយថា វីរុស Nipah បង្កហានិភ័យធ្ងន់ធ្ងរជាសកលលោកដោយសារតែភាពធ្ងន់ធ្ងរ និងសក្តានុពលរបស់វាសម្រាប់ការចម្លងពីមនុស្សទៅមនុស្ស។ ប្រសិនបើវ៉ាក់សាំងរបស់សាកលវិទ្យាល័យតូក្យូទទួលបានជោគជ័យ វាអាចក្លាយជាឧបករណ៍ដ៏សំខាន់មួយក្នុងការទប់ស្កាត់ការផ្ទុះឡើង និងបង្កើនការត្រៀមខ្លួនជាអន្តរជាតិប្រឆាំងនឹងជំងឺឆ្លងដែលកំពុងលេចចេញជាថ្មី៕

ប្រទេសឥណ្ឌូនេស៊ីបានដាក់ចេញបម្រាមថ្មីស្ដីពីការហាមឃាត់ការនាំចូលទំនិញចំនួន ១២ ប្រភេទចូលក្នុងប្រទេសរបស់ខ្លួន ដែលនាំឲ្យប៉ះពាល់ដល់ការនាំចេញមួយចំនួនរបស់ថៃ ជាពិសេសនៅក្នុងវិស័យកសិកម្ម។ នេះបើតាមការចុះផ្សាយរបស់សារព័ត៌មាន The Nation កាលពីថ្ងៃទី១ ខែកុម្ភៈ ឆ្នាំ២០២៦។

យោងតាមនាយកដ្ឋានជំរុញពាណិជ្ជកម្មអន្តរជាតិ (DITP) របស់ប្រទេសថៃ និងរបាយការណ៍ពី The Nation Thailand ការរឹតបន្តឹង ដែលបានចូលជាធរមានកាលពីពេលថ្មីៗនេះ ក្រោមបទបញ្ជារបស់រដ្ឋមន្ត្រីឥណ្ឌូនេស៊ី គោលនយោបាយនេះគឺជាផ្នែកមួយនៃកិច្ចខិតខំប្រឹងប្រែងដ៏ទូលំទូលាយរបស់ទីក្រុងហ្សាការតា ដើម្បីលើកកម្ពស់អ្នកផលិតក្នុងស្រុក និងពង្រឹងភាពគ្រប់គ្រាន់ដោយខ្លួនឯង។

DITP បានឲ្យដឹងបន្ថែមថា ត្រឹមរយៈពេលខ្លីបន្ទាប់ពីឥណ្ឌូណេស៊ីបានដាក់ចេញបម្រាមនេះ ផលិតផលកសិកម្មរបស់ថៃដែលមានជាពិសេសអង្ករ និងស្ករស បានធ្លាក់ចុះនូវអត្រានាំចេញជាគំហុគ ខណៈកាលពីឆ្នាំ២០២៥ ការនាំចេញស្ករសរបស់ថៃទៅកាន់ឥណ្ឌូណេស៊ីមានតម្លៃប្រហែល ៧២៥លានដុល្លារ ដែលធ្វើឱ្យផលិតផលនេះងាយរងគ្រោះជាពិសេសចំពោះបម្រាមថ្មី។

ក្រៅពីអង្ករ និងស្ករស ផលិតផលផ្សេងទៀតដែលរួមមាន ម៉ាស៊ីនត្រជាក់ និងឧបករណ៍ទូរទឹកកកដែលប្រើប្រាស់សារធាតុត្រជាក់ដែលបង្កគ្រោះថ្នាក់ដល់បរិស្ថាន សម្លៀកបំពាក់ជជុះ កាបូប, វត្ថុធាតុដើមឱសថ, ទំនិញអាហារមួយចំនួន និងឧបករណ៍វេជ្ជសាស្ត្រដែលមានផ្ទុកជាតិបារតមួយចំនួន ក៏ស្ថិតក្រោមការហាមឃាត់របស់ឥណ្ឌូណេស៊ីផងដែរ។

បើទោះជាទំនិញទាំងនេះមិនមែនជាផលិតផលនាំចេញសំខាន់ៗសម្រាប់ប្រទេសថៃ ប៉ុន្តែមន្ត្រីជំនាញថៃបានកត់សម្គាល់ថា ផលប៉ះពាល់ផ្នែកសេដ្ឋកិច្ចទាំងមូលគឺនៅតែមាន ខណៈចលនានេះអាចផ្លាស់ប្តូរលំហូរពាណិជ្ជកម្មក្នុងតំបន់នៅក្នុងត្រឹមរយៈពេលប៉ុន្មានខែខាងមុខទៀត។ បច្ចុប្បន្នអាជ្ញាធរថៃកំពុងតាមដានស្ថានការណ៍ និងរក្សាទំនាក់ទំនងជាមួយឥណ្ឌូនេស៊ីយ៉ាងដិតដល់ ដើម្បីបញ្ជៀសបញ្ហាប្រឈមដែលអាចនឹងកើតមាន៕

ហាវ៉ាណា ៖ ប្រទេសគុយបាកំពុងប្រឈមមុខនឹងវិបត្តិសេដ្ឋកិច្ចកាន់តែធ្ងន់ធ្ងរឡើង ជាមួយនឹងភាពខ្វះខាតប្រេងឥន្ធនៈធ្ងន់ធ្ងរ និងជាពិសេសគឺតម្លៃមានការកើនឡើងយ៉ាងឆាប់រហ័ស ដែលធ្វើឲ្យប៉ះពាល់ដល់ជីវិតប្រចាំថ្ងៃរបស់ប្រជាជននៅទូទាំងកោះ។ បញ្ហាទាំងនេះកើតឡើងបន្ទាប់ពីការដាក់សម្ពាធរបស់សហរដ្ឋអាមេរិក ដើម្បីទប់ស្កាត់ការដឹកជញ្ជូនប្រេងពីវេណេស៊ុយអេឡាទៅឲ្យប្រទេសនេះ។

យោងតាមការចុះផ្សាយរបស់សារព័ត៌មាន BBC បានបង្ហាញថា ជីវិតប្រចាំថ្ងៃសម្រាប់ប្រជាជនគុយបានៅពេលនេះកាន់តែពិបាក។ ឡានក្រុង និងតាក់ស៊ីសាធារណៈជាច្រើនបានកាត់បន្ថយសេវាកម្មរបស់ពួកគេ និងពលរដ្ឋខ្លះទៀតទុកយានជំនិះចោលដោយសារតែកង្វះប្រេងឥន្ធនៈ ខណៈពេលដែលតម្លៃអាហារ ប្រេងឥន្ធនៈ និងរបស់ចាំបាច់ផ្សេងទៀតនៅតែបន្តកើនឡើងលើសតម្លៃដើម៤-៥ដង។ ហើយទំនិញមួយចំនួនឥឡូវនេះ គិតតម្លៃតែជាប្រាក់ដុល្លារអាមេរិកប៉ុណ្ណោះ ដែលបង្កើតការលំបាកបន្ថែមសម្រាប់ពលរដ្ឋដែលរកប្រាក់ឈ្នួលជារូបិយប័ណ្ណក្នុងស្រុក។

រដ្ឋាភិបាលគុយបាបានស្តីបន្ទោសសហរដ្ឋអាមេរិកចំពោះការប៉ុនប៉ង «ខ្ទប់ដង្ហើម» សេដ្ឋកិច្ចរបស់ប្រទេសខ្លួន ខណៈដែលទីក្រុងវ៉ាស៊ីនតោននិយាយថា វិធានការរបស់ខ្លួនមានគោលបំណងទប់ស្កាត់ការគាំទ្រពីគុយបាចំពោះក្រុមបរទេសប៉ុណ្ណោះ។

គួរជម្រាបថា កន្លងមកប្រទេសគុយបា បានផ្ដល់ការគាំទ្រយ៉ាងច្រើនសន្ធឹកសន្ធាប់ដល់វេណេស៊ុយអេឡា តាមរយៈការទទួលទិញប្រេងឥន្ធនៈ ដែលក្រោយមកធ្វើឲ្យប្រទេសនេះក្លាយជាសត្រូវដោយប្រយោលជាមួយសហរដ្ឋអាមេរិក។

កាលពីថ្ងៃព្រហស្បត្តិ៍សប្ដាហ៍មុន ប្រធានាធិបតីអាមេរិក លោក ដូណាល់ ត្រាំ បានចេញបទបញ្ជាប្រតិបត្តិមួយ ដែលគំរាមដំឡើងពន្ធគយបន្ថែមទៅលើបណ្តាប្រទេសឡាយណា ដែលលក់ប្រេងឱ្យគុយបា។ ហើយត្រឹមតែមួយថ្ងៃក្រោយមក ប្រជាជនគុយបាត្រូវគេមើលឃើញនាំគ្នាទៅតម្រង់ជួរ នៅតាមស្ថានីយប្រេងឥន្ធនៈក្នុងរដ្ឋធានីឡាហាវ៉ាន់ដើម្បីដណ្ដើមទិញប្រេង, សាំងដែលនៅសេសសល់។

ដូចគ្នានេះដែរ ភ្លាមៗក្រោយការចាប់ខ្លួន លោក Maduro លោក ត្រាំ ក៏បានព្រមា.នផងដែរក្នុងការដាក់សម្ពាធគុយបា ឲ្យព្រមទទួលយកកិច្ចចរចារកជាមួយសហរដ្ឋអាមេរិកឲ្យបានឆាប់រហ័ស បើមិនចង់ប្រឈមមុខជាមួយផលវិបាកធ្ងន់ធ្ងរ។ ជាការឆ្លើយតប មន្ត្រីគុយបាបានប្រកាន់ជំហរថា ប្រទេសខ្លួនមានសិទ្ធិពេញលេញក្នុងការនាំចូលប្រេងឥន្ធនៈដោយគ្មានការជ្រៀតជ្រែក ហើយបានទាត់ចោលវិធានការរបស់អាមេរិកថាជាការបង្ខិតបង្ខំឯកតោភាគី និងគ្មានសីលធម៌៕

ក្រោយកន្លងផុតទៅជាង ១ខែ! ទីបំផុតអាថ៌កំបាំងខ្មៅងងឹតនៅក្នុងអំឡុងពេលព្រឹត្តិការណ៍ស៊ីហ្គេម លើកទី៣៣ នៅប្រទេសថៃត្រូវបានលាតត្រដាង ថាយ៉ាងហោចណាស់មានករណីបៀ.តបៀ.នផ្លូ.វភេ.ទលើអត្តពលិក និងបុគ្គលិកស្ត្រីចំនួន ១០ ករណីត្រូវបានរាយការណ៍ ដោយបង្កឲ្យមានការភ្ញាក់ផ្អើលនិងខកចិត្តជាខ្លាំងចំពោះរបៀបគ្រប់គ្រងសន្តិសុខនិងសុវត្ថិភាពរបស់ម្ចាស់ផ្ទះថៃ។

គណៈកម្មាធិការរៀបចំព្រឹត្តិការណ៍ស៊ីហ្គេម លើកទី៣៣ មិនបានរាយការណ៍អំពីពាក្យបណ្ដឹងណាមួយឡើយក្នុងអំឡុងពេលនៃការប្រកួត ហើយបញ្ហានេះត្រូវបានអូសបន្លាយរហូតដល់ថ្ងៃអង្គារសប្ដាហ៍មុន ទើបអនុប្រធានគណៈកម្មាធិការអូឡាំពិកថៃ លោកស្រី Suwanna Silpa-archa បានបើកបង្ហាញព័ត៌មាននេះជាសាធារណៈថា មានករណីបំពា.នផ្លូវភេ.ទចំនួន ១០ ករណីលើបុគ្គលិកស្រីជនជាតិថៃ និងអត្តពលិកស្រ្តីដែលជាជនបរទេស។

តាមការលើកឡើងរបស់លោកស្រី “ឧប្បត្តិហេតុទាំងនោះមានចាប់ពីការយាយីដោយប្រើពាក្យសំដី បណ្ដាលឲ្យប៉ះទង្គិចផ្លូវចិត្ត រហូតដល់ការប៉ុនប៉ងរំលោ.ភបំពា.នលើរាងកាយតែម្ដង”។ បន្ថែមលើនោះលោកស្រី Suwanna បានគូសបញ្ជាក់ថា ពាក្យបណ្តឹងទាំង ១០ ត្រូវបានដោះស្រាយជាលក្ខណៈផ្ទៃក្នុងក្រៅប្រព័ន្ធរួចរាល់ហើយ និងពុំមានពាក្យបណ្តឹងណាមួយត្រូវបានរាយការណ៍ទៅប៉ូលីសឡើយ ដោយសារមិនចង់ឲ្យរឿងកាន់តែវែងឆ្ងាយ ហើយថែមទាំងបដិសេធមិនបើកបង្ហាញអត្តសញ្ញាណរបស់ជនបង្កផងដែរ ។

ជុំវិញបញ្ហាចម្រូងចម្រាស់ខាងលើ បានឆ្លុះបញ្ចាំងឲ្យយើងឃើញកាន់តែច្បាស់ពីភាពគ្មានទំនួលខុសត្រូវក្នុងការរៀបចំព្រឹត្តិការណ៍ដ៏ធំមួយ ហើយបណ្ដោយឲ្យរឿងអាម៉ាសប្រភេទនេះកើតឡើងរហូតដល់ ១០ករណី។

យ៉ាងណាមិញ អាចថាជាសំណាងមួយរបស់កម្ពុជាផងដែរ ដែលសម្រេចឲ្យប្រតិភូនិងអត្តពលិកតំណាងកម្ពុជាបោះចោលការប្រកួតស៊ីហ្គេមនៅប្រទេសថៃ ហើយត្រឡប់មកប្រទេសវិញភ្លាមៗ ព្រោះប្រសិនជានៅប្រកួតរហូតដល់ចប់នោះមិនដឹងថានរណាជាអ្នកធានាសុវត្ថិភាពឲ្យបានឡើយ បើសូម្បីតែបុគ្គលិក និងអត្តពលិកក្រុមម្ចាស់ផ្ទះក៏ត្រូវបានគេបំពា.នផ្លូវចិត្ត និងរាងកាយដូច្នេះដែរនោះ៕