សហរដ្ឋអាមេរិក ៖ កាលពីថ្ងៃទី១២ ខែកញ្ញា ឆ្នាំ២០២៤ សារព័ត៌មាន Reuters រាយការណ៍ថា ក្រុមហ៊ុនរបស់លោក Elon Musk ឈ្មោះ SpaceX បានបង្កើតប្រវត្តិសាស្ត្រថ្មីមួយលើពិភពលោក ដោយបញ្ជូនមហាសេដ្ឋី និងវិស្វករអាមេរិកចំនួន៤រូប ទៅលេងអវកាសជាលើកដំបូង តាមរយៈយានអវកាសឈ្មោះ Crew Dragon ។

នេះជាលើកដំបូងដែលមានការបញ្ជូនមនុស្សទៅក្រៅផែនដីក្នុងរយៈពេល៦៥ឆ្នាំ ដែលមនុស្សទាំង៤រូបពុំពាក់ព័ន្ធនឹងការងារ ឬបំពេញភារកិច្ចលើអវកាសរបស់រដ្ឋាភិបាលអាមេរិកទេ ។ ប៉ុន្តែវាជាការបើកទ្វារផ្នែកទេសចរណ៍ថ្មី គឺដំណើរកម្សាន្តលើអវកាស និងអាជីវកម្មលំហអវកាស ។

ជនជាតិអាមេរិកចំនួន៤នាក់នេះ រួមមាន ៖ លោក Jared Isaacman អាយុ៤១ឆ្នាំ, លោក Skogge Poteet អាយុ៥០ឆ្នាំ, អ្នកស្រី Sarah Gillis អាយុ៣០ឆ្នាំ និងអ្នកស្រី Anna Mannon អាយុ៣៨ឆ្នាំ ។ លោក Isaacman បានក្លាយជាមនុស្សដំបូងគេលើពិភពលោក ដែលបានឈានជើងចេញពីយានអវកាសទៅមើលលំហអាកាស ហើយជនជាតិអាមេរិកទាំង៤រូបបានចំណាយពេលលើអាកាសសរុបមិនលើស៣០នាទី ។

ការបើកឱកាសឱ្យភ្ញៀវទេសចរអាមេរិកធ្វើដំណើរទៅអវកាសនេះ គឺជាទស្សនវិស័យរបស់លោក Elon Musk ជាស្ថាបនិកក្រុមហ៊ុន SpaceX និងក្រុមហ៊ុនជាច្រើនទៀត ។ លោកចង់ជំរុញវិស័យទេសចរណ៍អវកាសឱ្យកាន់តែទូលំទូលាយ ហើយគេចាត់ទុកថា ជាការរីកចម្រើនចុងក្រោយបង្អស់ និងការបោះជំហានថ្មីផ្នែកអវកាស ។

ដំណើរកម្សាន្តលើអវកាសនេះពុំមែនគ្មានហានិភ័យទេ ហើយមានតែលោក Isaacman ម្នាក់ប៉ុណ្ណោះក្នុងចំណោមភ្ញៀវទេសចរទាំងអស់ ដែលធ្លាប់ធ្វើដំណើរទៅអវកាស ។ នេះជាការងារដ៏លំបាកមួយនៅអវកាស ប៉ុន្តែក្រុមហ៊ុន SpaceX អាចធ្វើវាបាន បញ្ជាក់ថា ក្រុមហ៊ុនទទួលបានជោគជ័យយ៉ាងខ្លាំងក្នុងប្រវត្តិសាស្ត្រដំណើរកម្សាន្តលើអវកាសរបស់មនុស្ស ៕

ប្រទេសវៀតណាម ៖ សារព័ត៌មានវៀតណាមបានរាយការណ៍ កាលពីថ្ងៃទី១២ ខែកញ្ញា ឆ្នាំ២០២៤ ថា បច្ចុប្បន្ន រដ្ឋាភិបាលវៀតណាមបានជំរុញវិនិយោគិនបរទេសឱ្យចូលមកវិនិយោគនៅខេត្ត Vinh Phuc របស់វៀតណាម ព្រមទាំងលើកទឹកចិត្តភ្ញៀវទេសចរបរទេសមកកម្សាន្តនៅខេត្តនេះផងដែរ ដោយសារមានកត្តាអំណោយផល និងតំបន់ទេសចរណ៍ជាច្រើនកន្លែង ។

ខេត្ត Vinh Phuc ស្ថិតនៅភាគខាងជើងប្រទេសវៀតណាម និងជាមជ្ឈមណ្ឌលឧស្សាហកម្មដ៏សំខាន់ ដូចជា ៖ យានយន្ត, ឧបករណ៍អេឡិចត្រូនិក, សម្ភារៈអគ្គិសនី, ម្ហូបអាហារ និងសម្លៀកបំពាក់ ។ ប្រសិនបើធ្វើដំណើរតាមរថយន្តចេញពីទីក្រុងហាណូយ និងអាកាសយានដ្ឋានអន្តរជាតិ Noi Bai មកកាន់ខេត្តនេះ គឺចំណាយពេលត្រឹមតែ១ម៉ោងប៉ុណ្ណោះ ។

លោក Nguyen Dinh Bang ប្រធានសមាគមអ្នកសារព័ត៌មានប្រចាំតំបន់និយាយថា ខេត្ត Vinh Phuc របស់វៀតណាម ប្រៀបដូចជាស្ពានសម្រាប់តភ្ជាប់ជាមួយបណ្តាខេត្តផ្សេងៗនៅភាគខាងជើងទីក្រុងហាណូយ និងតំបន់ដីសណ្តទន្លេក្រហម ។ ខេត្តនេះមានពលរដ្ឋរស់នៅជាង១លាន១សែននាក់ ហើយខេត្តមានតួនាទីសំខាន់ក្នុងយុទ្ធសាស្ត្រអភិវឌ្ឍន៍សេដ្ឋកិច្ចតំបន់ និងសេដ្ឋកិច្ចជាតិ ។

នៅឆ្នាំ២០២៤ វិនិយោគិនមកពីប្រទេសចំនួន១៩ បានមកវិនិយោគក្នុងគម្រោងផ្សេងៗនៅខេត្ត Vinh Phuc ។ រីឯប្រទេសដែលមកវិនិយោគនៅខេត្តនេះច្រើនជាងគេ រួមមាន ៖ កូរ៉េខាងត្បូង, ជប៉ុន, តៃវ៉ាន់, ចិន, សិង្ហបុរី, ថៃ, អ៊ីតាលី និងហូឡង់ ។

លោក Dinh Bang ប្រធានសមាគមអ្នកសារព័ត៌មានប្រចាំតំបន់បន្តថា ខេត្ត Vinh Phuc បានក្លាយទៅជាតំបន់ដ៏ពេញនិយមសម្រាប់បណ្តាវិនិយោគិនទាំងក្នុងប្រទេស និងក្រៅប្រទេស ។ រដ្ឋាភិបាលវៀតណាមបានលើកទឹកចិត្តវិនិយោគិនបរទេស និងជំរុញឱ្យខេត្តនេះក្លាយជាតំបន់ឧស្សាហកម្មថ្មីផ្នែកច្នៃប្រឌិតឧស្សាហកម្មបច្ចេកវិទ្យាខ្ពស់ ក៏ដូចជាតំបន់ទេសចរណ៍ ។

ក្រៅពីនេះ លោក Dinh Bang ក៏បានអញ្ជើញភ្ញៀវទេសចរបរទេសមកកម្សាន្តនៅខេត្ត Vinh Phuc ឱ្យបានច្រើនផងដែរ ដើម្បីទទួលបានបទពិសោធន៍ថ្មីជាមួយតំបន់ទេសចរណ៍ធម្មជាតិដ៏សម្បូរបែប ៕

ប្រទេសឥណ្ឌា ៖ សារព័ត៌មានបរទេសបានរាយការណ៍ កាលពីថ្ងៃទី១១ ខែកញ្ញា ឆ្នាំ២០២៤ ថា ប្រទេសឥណ្ឌា និងសិង្ហបុរីបានចុះហត្ថលេខាលើអនុស្សរណៈសម្រាប់កិច្ចសហការលើផ្នែកសំខាន់ៗ ជាពិសេស សហការផ្នែកផលិតបន្ទះឈីប, បច្ចេកវិទ្យាឌីជីថល, ការអភិវឌ្ឍជំនាញ និងសេវាកម្មសុខភាព ។

បើទោះជាអាស៊ីខាងត្បូងនៅតែជាតំបន់រីកចម្រើនយ៉ាងឆាប់រហ័ស ហើយសេដ្ឋកិច្ចឥណ្ឌាបានរីកចម្រើនលឿនលើពិភពលោកក្តី ប៉ុន្តែពលរដ្ឋរស់នៅក្នុងតំបន់នេះនៅតែមានប្រាក់ចំណូលទាបដដែល ។ ជាក់ស្តែង ប្រាក់ចំណូលរបស់ពលរដ្ឋឥណ្ឌាម្នាក់ស្មើត្រឹមតែ២.៧៣០ដុល្លារអាមេរិកក្នុង១ឆ្នាំ គឺតិចជាងពលរដ្ឋអាមេរិកដែលមានប្រាក់ចំណូលស្មើនឹង៨៥.៣៧០ដុល្លារអាមេរិកក្នុង១ឆ្នាំ និងពលរដ្ឋចិនមានប្រាក់ចំណូលស្មើនឹង១៣.១៤០ដុល្លារអាមេរិកក្នុង១ឆ្នាំ ។

នាយករដ្ឋមន្ត្រីឥណ្ឌា លោក Narendra Modi បានថ្លែងថា សិង្ហបុរីមិនត្រឹមតែជាមិត្តភក្តិដ៏ល្អរបស់ឥណ្ឌាប៉ុណ្ណោះទេ ប៉ុន្តែសិង្ហបុរី គឺជាកម្លាំងចិត្តសម្រាប់ប្រទេសកំពុងអភិវឌ្ឍន៍ទាំងអស់ផងដែរ ហើយឥណ្ឌានឹងសហការជាមួយសិង្ហបុរីក្នុងផ្នែកជាច្រើនទៀត ។

នាយករដ្ឋមន្ត្រីឥណ្ឌា លោក Narendra Modi និងនាយករដ្ឋមន្ត្រីសិង្ហបុរី លោក Lawrence Wong បានធ្វើដំណើរទៅពិនិត្យមើល AEM ជាក្រុមហ៊ុនផលិតបន្ទះឈីប និងគ្រឿងអេឡិចត្រូនិករបស់សិង្ហបុរីជាមួយគ្នា ហើយមេដឹកនាំប្រទេសទាំងពីររូបសន្យាថា នឹងបង្កើនកិច្ចការផ្នែកផលិតបន្ទះឈីប ។

ចំណែកលោក Heng Swee Keat ឧបនាយករដ្ឋមន្ត្រីសិង្ហបុរីបានសង្កត់ធ្ងន់ថា ការបង្កើនកិច្ចសហការនេះនឹងជួយឱ្យប្រទេសទាំងពីរអាចយកឈ្នះឧបសគ្គផ្សេងៗជាមួយគ្នាបាន ដូចជា ៖ បម្រែបម្រួលអាកាសធាតុ, កំណើនពលរដ្ឋអាយុច្រើន និងសុខភាពសាធារណៈ ជាដើម ។

ទោះយ៉ាងណា អ្នកសង្កេតការណ៍នយោបាយជាច្រើននាក់បាននិយាយមកកាន់សារព័ត៌មាន CNBC ថា ឥណ្ឌានឹងអាចរៀនសូត្របទពិសោធន៍ជាច្រើនពីសិង្ហបុរី ខណៈសិង្ហបុរីព្យាយាមប្រែក្លាយប្រទេសឱ្យក្លាយជាមជ្ឈមណ្ឌលរចនាម៉ូដ និងផលិតទំនិញលំដាប់ពិភពលោក ។ សិង្ហបុរីមានឈ្មោះល្បីល្បាញផ្នែករោងចក្រផលិតទំនិញទំនើបជាយូរមកហើយ ទើបសិង្ហបុរីអាចទាក់ទាញការវិនិយោគរបស់ក្រុមហ៊ុនបច្ចេកវិទ្យា និងក្រុមហ៊ុនធំៗជាច្រើនពីជុំវិញពិភពលោក ។

គួរបញ្ជាក់ថា ក្នុងរយៈពេល៧ឆ្នាំកន្លងមក សិង្ហបុរីបានបើកមជ្ឈមណ្ឌលអភិវឌ្ឍន៍ជំនាញក្នុងទីក្រុងជាច្រើនរបស់ប្រទេសឥណ្ឌា ដូចជា ៖ ទីក្រុងញូវដេលី និងទីក្រុងគូវ៉ាហាទី ស្ថិតនៅរដ្ឋអាស់សាំ ៕

ប្រទេសកូរ៉េខាងត្បូង ៖ សារព័ត៌មានបរទេសរាយការណ៍ថា ដោយសារឥទ្ធិពលភាពយន្ត និងប្រព័ន្ធផ្សព្វផ្សាយរបស់ខាងត្បូង ដែលផ្សព្វផ្សាយពីអាហារផ្សេងៗបានធ្វើឱ្យភ្ញៀវទេសចរបរទេសចង់បរិភោគអាហារកូរ៉េខាងត្បូង ។ រីឯអាហារដែលភ្ញៀវទេសចរបរទេសពេញនិយមបំផុត គឺសាច់មាន់បំពង ដែលស្ថិតក្នុងចំណោមអាហារប្រចាំតំបន់របស់កូរ៉េខាងត្បូង ចំនួន១៥មុខ ។

BC Card ជាស្ថាប័នទូទាត់ប្រាក់ដ៏ធំបំផុតរបស់កូរ៉េខាងត្បូង បានលើកឡើងកាលពីថ្ងៃទី៨ ខែកញ្ញា ឆ្នាំ២០២៤ ថា សាច់មាន់បំពង គឺជាអាហារប្រចាំទីក្រុង Daegu ស្ថិតនៅភាគអាគ្នេយ៍ប្រទេសកូរ៉េខាងត្បូង បានក្លាយជាអាហារលក់ដាច់បំផុតសម្រាប់ភ្ញៀវទេសចរបរទេស ។ ភ្ញៀវទេសចរបរទេសបានទូទាត់ប្រាក់ថ្លៃសាច់មាន់បំពងយ៉ាងច្រើនក្នុងរយៈពេល៣ឆ្នាំ គឺចាប់ពីឆ្នាំ២០២២ ដល់ឆ្នាំ២០២៤ ។

ចំណែកគុយទាវដាក់ទឹកជ្រលក់ខ្មៅ និងក្តាមទឹកស៊ីអ៊ីវ ដែលជាអាហារប្រចាំតំបន់ភាគខាងលិចនៃទីក្រុងសេអ៊ូល ឬជាអាហាររបស់ខេត្ត Gyeonggi និង Incheon បានក្លាយជាអាហារលក់ដាច់សម្រាប់ភ្ញៀវទេសចរបរទេសបន្ទាប់ពីសាច់មាន់បំពង គឺស្ថិតក្នុងលំដាប់ទី២ និងទី៣ តាមលំដាប់ ។

ស្ថាប័ន BC Card កត់សម្គាល់ថា ក្តាមទឹកស៊ីអ៊ីវមានចំនួនលក់កើនឡើងខ្លាំងនាពេលបច្ចុប្បន្ន ខណៈកាលពីមុន អាហារប្រភេទនេះពុំទទួលបានការពេញនិយមទេ ដោយសាររសជាតិរបស់វា ។ ប៉ុន្តែអាហារនេះបែរជាទទួលបានការពេញនិយមខ្លាំង ពីព្រោះឥទ្ធិពលភាពយន្ត និងបណ្តាញសង្គមកូរ៉េខាងត្បូងបានបង្ហាញពីអាហារជាច្រើនប្រភេទ ទើបធ្វើឱ្យជនបរទេសដែលទស្សនាភាពយន្តចង់សាកល្បងអាហារទាំងនេះ ។

ចំណែកអាហារផ្សេងទៀតរបស់កូរ៉េខាងត្បូងដែលពុំសូវពេញនិយមបរិភោគកាលពីមុន ប៉ុន្តែភ្ញៀវទេសចរបរទេសចាប់អារម្មណ៍យ៉ាងខ្លាំងនាពេលបច្ចុប្បន្ន មានដូចជា ៖ តៅហ៊ូទន់ នៅទីក្រុង Gangneung និងបបរសាច់ជ្រូក នៅទីក្រុង Busan ។

ស្ថាប័ន BC Card បញ្ជាក់ថា ភ្ញៀវទេសចរបរទេសចូលចិត្តបរិភោគអាហារប្រចាំតំបន់របស់កូរ៉េខាងត្បូងកាន់តែច្រើន ហើយពួកគេបានចំណាយប្រាក់ទិញអាហារទាំងនេះច្រើនជាងជនជាតិកូរ៉េខាងត្បូងដែលជាម្ចាស់ប្រទេស រហូតដល់ជាង៤ដងឯណោះ ។

ក្រសួងវប្បធម៌ កីឡា និងទេសចរណ៍ ព្រមទាំងអង្គការទេសចរណ៍កូរ៉េខាងត្បូងបានប្រកាសធ្វើយុទ្ធនាការទេសចរណ៍ម្ហូបអាហារឈ្មោះ «Taste your Korea» កាលពីថ្ងៃទី១០ ខែកក្កដា ឆ្នាំ២០២៤ ព្រមទាំងរៀបចំកម្មវិធីម្ហូបអាហារ, នំចំណី, គ្រឿងផ្សំ និងស្រាបៀរប្រចាំតំបន់នីមួយៗ ចំនួន៣៣មុខ ។ ការរៀបចំកម្មវិធីនេះក្នុងគោលបំណងទាក់ទាញភ្ញៀវទេសចរបរទេស និងលើកកម្ពស់កូរ៉េខាងត្បូងឱ្យក្លាយជាគោលដៅទេសចរណ៍ម្ហូបអាហារឈានមុខគេ ៕

ប្រទេសឥណ្ឌា ៖ ទំនាក់ទំនងរវាងប្រទេសដែលមានចំនួនពលរដ្ឋច្រើនបំផុតលើពិភពលោក គឺឥណ្ឌា និងចិន កាន់តែតា.នតឹង ខ្លាំងឡើង ក្រោយពីកងទ័ពប្រទេសទាំងពីរមានជ.ម្លោះ ជាមួយគ្នាកាលពីឆ្នាំ២០២០ ។ វាធ្វើឱ្យរដ្ឋាភិបាលឥណ្ឌាត្រួតពិនិត្យគោលនយោបាយការបរទេសរបស់ខ្លួនឡើងវិញ ជាពិសេស ទំនាក់ទំនងជាមួយចិន ។

នៅថ្ងៃទី១២ ខែកញ្ញា ឆ្នាំ២០២៤ សារព័ត៌មាន Nikkei Asia រាយការណ៍ថា ប្រទេសឥណ្ឌាមានគម្រោងដំឡើងពន្ធបំពង់ដែកនាំចូលពីប្រទេសចិន និងវៀតណាម រហូតដល់៣០% សម្រាប់រយៈពេល៥ឆ្នាំ ។ កាលពីខែសីហា ឆ្នាំ២០២៤ រដ្ឋាភិបាលឥណ្ឌាក៏បានស៊ើបអង្កេតដែកមួយចំនួនដែលនាំចូលពីវៀតណាមផងដែរ ដើម្បីការពារឧស្សាហកម្មដែកឥណ្ឌា ។

ក្រសួងការបរទេសឥណ្ឌានឹងដំឡើងពន្ធដែកមួយចំនួនដែលនាំចូលពីប្រទេសចិន និងវៀតណាម គឺចាប់ពី១២% ដល់៣០% ដើម្បីការពារ និងលើកកម្ពស់ឧស្សាហកម្មដែកក្នុងស្រុក ។ រដ្ឋាភិបាលឥណ្ឌាបានចេញបទបញ្ជាកាលពីថ្ងៃទី១០ ខែកញ្ញា កន្លងមក គឺកំណត់ឱ្យបំពង់ដែកផលិតនៅចិន និងវៀតណាម ដែលជាប្រទេសផលិតដែកដ៏ធំលើពិភពលោក ត្រូវបង់ពន្ធនាំចូលខ្ពស់ក្នុងរយៈពេល៥ឆ្នាំ គិតចាប់ពីឆ្នាំ២០២៤ តទៅ ។

គេសង្កេតឃើញថា ទំនាក់ទំនងរវាងប្រទេសឥណ្ឌា និងចិន គឺកាន់តែមានភាពតានតឹងខ្លាំងឡើង តាំងពីមានការប៉ះទង្គិចគ្នារវាងកងទ័ពប្រទេសទាំងពីរនៅបរិវេណជាយដែនហិម៉ាល័យ កាលពីឆ្នាំ២០២០ ។ ហេតុការណ៍នេះធ្វើឱ្យរដ្ឋាភិបាលឥណ្ឌាត្រួតពិនិត្យគោលនយោបាយការបរទេសឡើងវិញ ជាពិសេស ទំនាក់ទំនងជាមួយចិន ។

ក្រៅពីនេះ រដ្ឋាភិបាលឥណ្ឌាក៏បានរឹតបន្តឹង និងត្រួតពិនិត្យការវិនិយោគរបស់ចិន ព្រមទាំងប្រកាសផ្អាកគម្រោងសាងសង់សំខាន់ៗរបស់ចិន ។ លោក សុរ៉ាម៉ាន់យាប់ ចៃឆាំងកា រដ្ឋមន្ត្រីក្រសួងការបរទេសឥណ្ឌា បាននិយាយពីទំនាក់ទំនងសេដ្ឋកិច្ចរវាងឥណ្ឌា និងចិន ថា ឥណ្ឌាពុំបានហាមឃាត់ការធ្វើអាជីវកម្មជាមួយចិនទេ ប៉ុន្តែឥណ្ឌានឹងពិចារណាយ៉ាងលម្អិតថា តើចិននឹងវិនិយោគផ្នែកណា និងស្ថិតក្រោមលក្ខខណ្ឌអ្វីខ្លះ ៕

ប្រទេសអាល្លឺម៉ង់ ៖ ក្រុមហ៊ុនផ្នែកបច្ចេកវិទ្យាការដឹកជញ្ជូនទំនិញរបស់ប្រទេសអាល្លឺម៉ង់មួយឈ្មោះ Ecoro បានបង្ហាញពីការអភិវឌ្ឍប្រព័ន្ធដឹកជញ្ជូនទំនិញដោយស្វ័យប្រវត្តិ គឺការដឹកទំនិញតាមច្រកក្រោមដី ។ វាជាការបង្កើនសក្តានុពលនៃឧស្សាហកម្មដឹកជញ្ជូន, កាត់បន្ថយការកកស្ទះចរាចរណ៍តាមដងផ្លូវ ហើយវានឹងពុំបញ្ចេញជាតិពុលប៉ះពាល់បរិយាកាស ។

ក្រុមហ៊ុនអាល្លឺម៉ង់នឹងបង្កើតប្រព័ន្ធដឹកជញ្ជូនទំនិញបែប end-to-end ទាំងស្រុង (ឬជាប្រព័ន្ធដឹកជញ្ជូនដែលគ្រប់គ្រងចាប់ពីចំណុចបញ្ជូនទំនិញ រហូតដល់ចំណុចគោលដៅ) ។ ក្រុមហ៊ុនអះអាងថា វាជាប្រព័ន្ធដឹកជញ្ជូនទំនិញទំនើបមួយដែលអាចជឿទុកចិត្តបាន, ចំណេញពេលវេលា និងមាននិរន្តរភាព ។

ក្រុមហ៊ុន Ecoro នឹងបែងចែកប្រព័ន្ធដឹកជញ្ជូននេះជា៤ផ្នែក រួមមាន ៖ រថយន្តអគ្គិសនីដឹកជញ្ជូនទំនិញ, បណ្តាញដឹកជញ្ជូនជាក់លាក់, កម្មវិធី Software គ្រប់គ្រងប្រព័ន្ធ និងអគារផ្ទេរទំនិញដោយស្វ័យប្រវត្តិ ។

រថយន្តអគ្គិសនីមានទំហំតូចសម្រាប់ដឹកជញ្ជូនទំនិញ (ឬ Ecoro Shuttle) នឹងបើកបរដោយស្វ័យប្រវត្តិ ហើយវាអាចដឹកទំនិញរហូតដល់ជាង២តោន ។ រថយន្តនឹងបើកបរក្នុងល្បឿន៦០គីឡូម៉ែត្រក្នុង១ម៉ោង និងគ្រប់គ្រងដោយកម្មវិធី Software របស់មជ្ឈមណ្ឌលគ្រប់គ្រង (ឬ Ecoro control center) ។ កម្មវិធីនេះនឹងគ្រប់គ្រងរថយន្តដឹកជញ្ជូនទំនិញរយៈពេល២៤ម៉ោងលើ២៤ម៉ោង ព្រមទាំងគ្រប់គ្រងការផ្ទេរទំនិញ ។

ក្រុមហ៊ុនបញ្ជាក់ថា រថយន្តអគ្គិសនីនឹងមកទទួលទំនិញនៅអគារផ្ទេរទំនិញដោយស្វ័យប្រវត្តិ ហើយពេលរថយន្តទទួលបានទំនិញរួចហើយ រថយន្តនឹងបើកបរតាមបណ្តាញដឹកជញ្ជូនជាក់លាក់ ដើម្បីទៅកាន់ចំណុចគោលដៅ ។

ចំណែកគោលបំណងរបស់ក្រុមហ៊ុន គឺដើម្បីផ្លាស់ប្តូរឧស្សាហកម្មការដឹកជញ្ជូនទំនិញទៅរកការដឹកជញ្ជូនបែបទំនើបទាំងស្រុង និងគ្មានការអន្តរាគមន៍ពីមនុស្ស ។ ក្រុមហ៊ុនឱ្យដឹងថា ប្រព័ន្ធដឹកជញ្ជូននេះនឹងជួយបង្កើនប្រសិទ្ធភាពការងារ និងសន្សំសំចៃថ្លៃដឹកជញ្ជូនច្រើនរហូតដល់៥០% បើធៀបនឹងការដឹកជញ្ជូនតាមដងផ្លូវ ។

ក្រៅពីនេះ ប្រព័ន្ធដឹកជញ្ជូនទំនិញតាមច្រកក្រោមដី គឺប្រកបដោយនិរន្តរភាព, កាត់បន្ថយបរិមាណការប្រើប្រាស់រថយន្តដឹកជញ្ជូន និងការបំភាយកាបូនឌីអុកស៊ីតទៅបរិយាកាស ។ វាជាការដឹកជញ្ជូនដែលប្រើប្រាស់ថាមពលអគ្គិសនី, គ្មានការបំពុលបរិយាកាស, មិនបង្កសំឡេងរំខាន, មិនបង្កើតធូលី និងចៀសវាងបញ្ហាការស្ទះចរាចរណ៍នៅតាមដងផ្លូវ ៕

ប្រទេសថៃ ៖ កាលពីថ្ងៃទី១០ ខែកញ្ញា ឆ្នាំ២០២៤ សារព័ត៌មានថៃរាយការណ៍ថា ប្រទេសថៃមានគម្រោងចាក់ដីក្នុងសមុទ្របង្កើតកោះចំនួន៩ ដើម្បីការពារទឹកជំនន់លិចទីក្រុងបាងកក ។ គម្រោងនេះនឹងស្នើឱ្យក្រុមហ៊ុនឯកជនវិនិយោគដោយផ្តល់សម្បទានរយៈពេល៩៩ឆ្នាំ ដោយសារថៃតែងតែរងគ្រោះដោយសារទឹកជំនន់ញឹកញាប់ ។

បញ្ហាទឹកជំនន់បានកើតឡើងម្តងហើយម្តងទៀតនៅទីក្រុងបាងកក និងតំបន់ជុំវិញ ធ្វើឱ្យរដ្ឋាភិបាលថ្មីស្ថិតក្រោមការដឹកនាំរបស់លោកស្រីនាយករដ្ឋមន្ត្រី ផេថងថាន ស៊ីណាវ៉ាត់ ពិចារណាបង្កើតកោះចំនួន៩ ដើម្បីការពារទឹកជំនន់ ។ ជំហ៊ានដំបូង រដ្ឋាភិបាលថៃនឹងចាប់ផ្តើមអនុវត្តគម្រោងបង្កើតកោះនៅសមុទ្របាងខុនធៀន មុនគេ ។

ពេលទឹកកកនៅតំបន់ប៉ូលរលាយយ៉ាងឆាប់រហ័ស នឹងធ្វើឱ្យកម្រិតទឹកសមុទ្រនៅឈូងសមុទ្រថៃកើនឡើងខ្ពស់ ចាប់ពី៥ម៉ែត្រ ទៅ៦ម៉ែត្រ ហើយវាបណ្តាលឱ្យមានទឹកជំនន់នៅតំបន់មួយចំនួនរបស់ថៃកាន់តែខ្លាំង ។ តំបន់នឹងរងផលប៉ះពាល់ខ្លាំងជាងគេ គឺទីក្រុងបាងកក, ខេត្តនុនថាក់បុរី, អាងថង, អយុធ្យា, ប្រាជីនបុរី, សមុទ្រសាខន, សមុទ្រសុងក្រាម, ផេតបុរី និងតំបន់មួយចំនួនរបស់ខេត្តឈុនបុរី ។

បើនិយាយពីវិធានការទប់ស្កាត់រយៈពេលខ្លី ដូចជា ៖ ការសាងសង់ទំនប់ទឹក និងបិទចំណុចធ្លាយរបស់ទំនប់ទឹក គឺថៃនឹងអាចទប់ស្កាត់ទឹកជំនន់ ចាប់ពី២ឆ្នាំ ទៅ៥ឆ្នាំទៀតប៉ុណ្ណោះ ។ ប៉ុន្តែថ្ងៃអនាគត ពេលបរិមាណទឹកកើនឡើងខ្ពស់ជាងនេះ ថៃនឹងពុំអាចប្រើប្រាស់វិធានការទប់ស្កាត់ទៀតទេ ។ ហេតុនេះ រដ្ឋាភិបាលថៃចាប់ផ្តើមពិចារណាពីគម្រោងបង្កើតកោះចំនួន៩ ក្នុងសមុទ្រ ដើម្បីការពារទឹកជំនន់រយៈពេលយូរ ។

កោះនីមួយៗនឹងមានទំនប់ការពារទឹកជំនន់ និងមានទ្វារទំនប់ទឹកសម្រាប់បើក-បិទ ។ កោះទី១ នឹងសាងសង់ក្នុងសមុទ្របាងខុនធៀន បន្ទាប់មក ថៃនឹងបង្កើតកោះផ្សេងទៀត រហូតដល់ខេត្តឈុនបុរី ។ កោះទាំងអស់នឹងលាតសន្ធឹងក្នុងប្រវែងសរុប១០០គីឡូម៉ែត្រ ហើយកោះនីមួយៗនឹងស្ថិតនៅឆ្ងាយពីឆ្នេរសមុទ្រ១គីឡូម៉ែត្រ និងមានផ្លូវភ្ជាប់ជាមួយតំបន់ឆ្នេរដើម្បីងាយស្រួលធ្វើដំណើរ ។

ចំណែកការវិនិយោគ គឺរដ្ឋាភិបាលថៃនឹងស្នើឱ្យក្រុមហ៊ុនឯកជនវិនិយោគ ព្រមទាំងផ្តល់សម្បទានប្រើប្រាស់ដីធ្លីរយៈពេល៩៩ឆ្នាំ ។ ហេតុនេះ ក្រុមហ៊ុនឯកជននឹងអាចអភិវឌ្ឍន៍កោះ និងប្រើប្រាស់ជាប្រយោជន៍ផ្សេងៗ ដូចជា ៖ បង្កើតទីក្រុងបៃតង ។

លោក ផ្លតប្រាសប់ សុរ៉ាស់សាវ៉ាឌី អតីតឧបនាយករដ្ឋមន្ត្រី និងប្រធានគណៈកម្មការបរិស្ថានគណបក្សភឿថៃ និយាយថា វាជាគម្រោងថ្មី ហើយបើមានការវិនិយោគមែននោះ នឹងត្រូវការថវិកាច្រើនបំផុត ។ គម្រោងនេះចាំបាច់សម្រាប់រដ្ឋាភិបាលសម្រេចចិត្តថា នឹងចាប់ផ្តើមដំណើរការដែរឬទេ ពីព្រោះត្រូវចំណាយពេលរហូតដល់ជាង២០ឆ្នាំ ហើយថៃនឹងយកគំរូតាមគម្រោងបង្កើតកោះរបស់ឌូបៃ, ហុងកុង, សិង្ហបុរី និងហូឡង់ ។ វាជាឱកាសអាចប្រើប្រាស់ចំណេះដឹងផ្នែកវិស្វកម្មសមុទ្រ និងក្លាយជាប្រយោជន៍សម្រាប់អភិវឌ្ឍន៍ប្រទេសថៃ នាថ្ងៃអនាគត ។

រីឯលោក ភូមិថាំ វេជឆាយ៉ាឆៃ ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃនិយាយថា គម្រោងបង្កើតកោះចំនួន៩នេះ គឺជាគំនិតថ្មី ហើយរដ្ឋាភិបាលត្រូវតែពិភាក្សាជាមួយគ្រប់ភាគីពាក់ព័ន្ធដើម្បីជំរុញការអនុវត្តគម្រោង ។ ទឹកជំនន់ គឺជាបញ្ហាធំមួយរបស់រដ្ឋាភិបាល លោកស្រី ផេថងថាន ស៊ីណាវ៉ាត់ ដែលត្រូវប្រញាប់ដោះស្រាយទាំងរយៈពេលខ្លី និងវែង ។ វាស្របពេលកម្រិតទឹកសមុទ្រកើនឡើងខ្ពស់ដោយសារអាកាសធាតុក្តៅលើពិភពលោក ហើយថៃគួររកវិធានការដោះស្រាយជាមួយបម្រែបម្រួលអាកាសធាតុយ៉ាងឆាប់រហ័ស ។

បើតាមការចាត់ចំណាត់ថ្នាក់របស់ Global Climate Risk Index 2021 បញ្ជាក់ថា ថៃស្ថិតក្នុងចំណាត់ថ្នាក់ទី៩ ក្នុងចំណោម១៨០ប្រទេស ដែលប្រឈមនឹងគ្រោះធម្មជាតិដោយសារអាកាសធាតុក្តៅ ៕