ទីក្រុងឌូបៃ៖ វិស្វករ UAE បានកំពុងចាប់ផ្តើមសាងសង់អគារខ្ពស់ស្តើងថ្មីក្នុងទីក្រុងឌូបៃ ដែលមានកម្ពស់ ៣៨០ ម៉ែត្រ ជាមួយទទឹងត្រឹមតែ ២២.៥ ម៉ែត្រប៉ុណ្ណោះ។
នេះបើយោងតាមគេហទំព័របរទេស New Atlas ដែលបានរាយការណ៍កាលពីថ្ងៃទី ១ ខែវិច្ឆិកាថា ទីក្រុងឌូបៃ គ្រោងនឹងសាងសង់អគារស្តើងបំផុតក្នុងលោក ដែលមានទំហំប៉ុនផ្ទះល្វែងមានឈ្មោះថា Muraba Veil។
Muraba Veil នឹងមានកម្ពស់ ៣៨០ ម៉ែត្រ ប៉ុន្តែមានទទឹងត្រឹមតែ ២២.៥ ម៉ែត្រប៉ុណ្ណោះ ដែលអគារនេះអាចមាន ៧៣ ជាន់និងរួមបញ្ចូល ១៣១ អាផាតមិនដែលនីមួយៗមានបន្ទប់គេងពី ២ ទៅ ៥ ។ ក្រុមហ៊ុន Muraba នៅក្នុងប្រទេសអារ៉ាប់រួម (UAE) ដែលជាអ្នកម៉ៅការទទួលបន្ទុកគម្រោងនេះ បាននិយាយថា អគារផ្ទះល្វែងដ៏ប្រណិតនេះនឹងមានកន្លែងកម្សាន្តជាច្រើនដូចជា ស្ប៉ា ភោជនីយដ្ឋាន វិចិត្រសាល ទីលានប៉ាឌែល និងរោងកុនឯកជនជាដើម។
គម្រោងអាគារស្តើងបំផុតលើលោកនេះនឹងត្រូវសាងសង់នៅជាប់ប្រឡាយក្បែរផ្លូវ Sheikh Zayed Road របស់ទីក្រុងឌូបៃ ហើយនឹងត្រូវបានបញ្ចប់នៅខែធ្នូ ឆ្នាំ ២០២៨។ ការសាងសង់អគារ Muraba Veil ត្រូវបានយកគំរូតាមផ្ទះបែបប្រពៃណីអារ៉ាប់ ដែលមានទីធ្លា ម្លប់ និងរុក្ខជាតិបៃតងជាច្រើន។ ការរចនានៃអគារនេះត្រូវបានបង្ហាញនៅពីក្រោយស្រទាប់ជាច្រើន ដោយស្រទាប់ទីមួយគឺជា “វាំងនន” ធ្វើពីដែកអ៊ីណុកប្រហោង និងសំណាញ់ដែលអាចលៃតម្រូវបាន រួមទាំងអាចឆ្លុះបញ្ចាំងពីស្រមោលផ្សេងៗនៃផ្ទៃមេឃបានទៀតផង។ យោងតាមលោក Rafael Aranda ស្ថាបនិក RCR Arquitectes បាននិយាយថា អគារនេះនឹងក្លាយជាផ្នែកមួយនៃទេសភាពក្នុងស្រុក ភ្ជាប់ជាមួយធម្មជាតិ និងមានភាពចោតនៅក្នុងវប្បធម៌ក្នុងស្រុក។
គួរបញ្ជាក់ដែរថា ឌូបៃគឺជាទីក្រុងដែលមានអគារខ្ពស់បំផុតនៅលើពិភពលោកគឺ Burj Khalifa ជាមួយកម្ពស់ ៨២៨ ម៉ែត្រ ហើយនឹងមានអគារខ្ពស់ជាងគេទីពីរក្នុងពេលឆាប់ៗនេះ។ ដោយបច្ចុប្បន្នទីក្រុងឌូបៃក៏មានអគារច្រើនជាង ៣០០ ម៉ែត្រខ្ពស់ជាងទីក្រុងផ្សេងទៀតនៅលើពិភពលោកផងដែរ នេះបើយោងតាមក្រុមប្រឹក្សាអគារខ្ពស់ និងបរិស្ថានទីក្រុង។ លើសពីនេះ ទីក្រុងនេះក៏មានអាងហែលទឹក Infinity ខ្ពស់បំផុត និងសួនផ្កាធម្មជាតិដ៏ធំបំផុតនៅលើពិភពលោកទៀតផង៕
