ប្រទេសវៀតណាម ៖ កាលពីថ្ងៃទី១២ ខែកញ្ញា ឆ្នាំ២០២៤ សារព័ត៌មានបរទេសរាយការណ៍ថា ក្រោយពីប្រទេសចិនប្រកាសថា នឹងបង្ហូរទឹកចេញពីទំនប់វារីអគ្គិសនីនៅខេត្តយូណាន ធ្វើឱ្យវៀតណាមប្រញាប់ប្រញាល់សុំចរចាជាមួយចិន ដើម្បីឱ្យចិនបន្ថយការបង្ហាញទឹកពីទំនប់របស់ខ្លួន ។ វៀតណាមបារម្ភថា វានឹងធ្វើឱ្យស្ថានការណ៍ទឹកជំនន់ក្នុងប្រទេសវៀតណាមកាន់តែធ្ងន់ធ្ងរថែមទៀត ។

សារព័ត៌មានវៀតណាមរាយការណ៍ថា អនុរដ្ឋមន្ត្រីក្រសួងកសិកម្ម និងការអភិវឌ្ឍជនបទ ឈ្មោះ ង្វៀន វ៉ាំងហៀប ថ្លែងថា ចិនបានជូនដំណឹងមកវៀតណាមថា ចិនមានគម្រោងបង្ហូរទឹកចេញពីទំនប់វារីអគ្គិសនីនៅភាគខាងជើងទន្លេឡូ ក្នុងខេត្តយូណាន ហើយវានឹងហូរឆ្លងកាត់ខេត្តហាសាង របស់វៀតណាម និងជាដៃទន្លេក្រហម ។

អនុរដ្ឋមន្ត្រីក្រសួងកសិកម្មវៀតណាមបានបង្ហាញក្តីបារម្ភថា ការបង្ហូរទឹករបស់ចិននឹងធ្វើឱ្យស្ថានការណ៍ទឹកជំនន់នៅភាគខាងជើងវៀតណាមកាន់តែធ្ងន់ធ្ងរថែមទៀត ។ អនុរដ្ឋមន្ត្រីក្រសួងកសិកម្មរូបនេះថ្លែងថា ៖ «ចិនជូនដំណឹងមកវៀតណាមជាមុនដើម្បីឱ្យយើងត្រៀមខ្លួនទប់ទល់ទឹកជំនន់ ហើយចិនប្រាប់ថា នឹងបង្ហូរទឹកមិនច្រើនទេ បើទោះវាមានផលប៉ះពាល់ ប៉ុន្តែមិនធ្ងន់ធ្ងរទេសម្រាប់វៀតណាម» ។

ចំណែកក្រសួងការបរទេសវៀតណាមឱ្យដឹងថា ភ្លៀងបានធ្លាក់ខ្លាំងជាប់ៗគ្នាអស់រយៈពេលជាច្រើនថ្ងៃ ទើបធ្វើឱ្យកម្រិតទឹកក្នុងទំនប់នៅចិនកើនឡើងខ្ពស់ ហើយនឹងធ្វើឱ្យបាក់ទំនប់ចិន ។ វានឹងបង្កផលប៉ះពាល់យ៉ាងធ្ងន់ធ្ងរដល់ប្រទេសទាំងពីរ ហើយក្រោយពីពិចារណាពីបញ្ហានេះរួច ចិនក៏ជូនដំណឹងមកកាន់អាជ្ញាធរខេត្តហាសាង ថា ចិននឹងបង្ហូរទឹកចេញពីទំនប់ ចាប់ពីថ្ងៃទី១១ ខែកញ្ញា រហូតដល់ថ្ងៃទី១២ ខែកញ្ញា ឆ្នាំ២០២៤ ។

ប៉ុន្តែបន្ទាប់ពីមន្ត្រីវៀតណាមបានចរចាជាមួយចិនជាផ្លូវការរួចរាល់ ចិនក៏បានយល់ព្រមបង្ហូរទឹកចេញពីទំនប់នៅប្រទេសចិនក្នុងបរិមាណតិចជាងមុន ដើម្បីកុំឱ្យវៀតណាមរងគ្រោះដោយសារទឹកជំនន់ធ្ងន់ធ្ងរជាងនេះ ។

នៅខែកញ្ញា ឆ្នាំ២០២៤ ខ្យល់ព្យុះ Yagi បានបោកបក់មកលើតំបន់ភាគខាងជើងវៀតណាម ដែលបណ្តាលឱ្យពលរដ្ឋវៀតណាមស្លាប់ និងរងរបួសជាច្រើននាក់ដោយសារខ្យល់ព្យុះនេះ ។ ដូច្នេះ ទើបវៀតណាមប្រញាប់សុំចរចាជាមួយចិនរឿងការបង្ហូរទឹកពីទំនប់ ដោយសារបារម្ភថា ស្ថានការណ៍នឹងកាន់តែអាក្រក់ខ្លាំង ៕

ប្រទេសវៀតណាម ៖ ពលរដ្ឋវៀតណាមមានអាយុច្រើនសុទ្ធតែធ្លាប់ឆ្លងកាត់ការលំបាកដោយសារសង្គ្រាម បើទោះជាសង្គ្រាមនៅវៀតណាមបានបញ្ចប់ហើយក្តី ប៉ុន្តែជីវិតក្រោយសង្គ្រាមនៅតែលំបាក ដែលបណ្តាលមកពីការផ្លាស់ប្តូររបបគ្រប់គ្រង ។ មុនពេលវៀតណាមខាងជើងចូលមកគ្រប់គ្រង វៀតណាមខាងត្បូងបានតស៊ូយ៉ាងខ្លាំងក្នុងជីវិត ហើយការគិតរបស់ពួកគេខុសប្លែកពីក្មេងៗក្រោយសង្គ្រាម ។

ចំណែកពលរដ្ឋវៀតណាមានអាយុក្រោម៣០ឆ្នាំ គឺជាកម្លាំងពលកម្មដ៏សំខាន់របស់ជាតិ ហើយពួកគេខិតខំធ្វើការណាស់ និងមានភាពរហ័សរហួនទៀតផង ។ ប៉ុន្តែពួកគេខ្វះខាតភាពផ្ចិតផ្ចង់ក្នុងការងារ ទើបលទ្ធផលការងារចេញមកពុំសូវល្អឥតខ្ចោះ ។

ពលរដ្ឋវៀតណាមនិយមចូលចិត្តអ្វីថ្មីៗជានិច្ច ជាពិសេស ពួកគេចាប់អារម្មណ៍ឧបករណ៍បច្ចេកវិទ្យាថ្មី ។ ប៉ុន្តែប្រាក់ចំណូលរបស់ពលរដ្ឋវៀតណាមតិចជាងប្រទេសផ្សេង ហើយការចំណាយក្នុងជីវភាពរស់នៅខ្ពស់ ដូចជា ៖ ថ្លៃអាហារ និងសម្ភារៈប្រើប្រាស់ ទើបធ្វើឱ្យប្រាក់ចំណូលពួកគេចាយពុំគ្រប់គ្រាន់ ។ លើសពីនេះ មានអំពើពុករលួយគ្រប់វិស័យ ចាប់ពីរដ្ឋរហូតដល់ក្រុមហ៊ុនឯកជន ហើយជនបរទេសគួរតែប្រុងប្រយ័ត្នចំណុចនេះ ។

ពលរដ្ឋវៀតណាមនឹងឆាប់រៀបការមានប្តី-ប្រពន្ធលឿនជាងប្រទេសផ្សេង គឺក្រោយពីបញ្ចប់ការសិក្សាមិនយូរប៉ុន្មាន យុវជនវៀតណាមរៀបការអស់ហើយ ។ ប្តី-ប្រពន្ធវៀតណាមភាគច្រើននឹងមានកូនចាប់ពី២នាក់ ទៅ៣នាក់ ដោយសាររដ្ឋាភិបាលនឹងផ្តល់ប្រាក់ឧបត្ថម្ភឱ្យពលរដ្ឋចិញ្ចឹមកូន ចំនួន៣នាក់ និងរៀនសូត្រពុំគិតថ្លៃ ។ ស្ត្រីវៀតណាមមានសិទ្ធិសម្រាកលំហែរមាតុភាពរហូតដល់៦ខែ ហើយក្រុមហ៊ុនត្រូវបើកប្រាក់ខែពេញឱ្យស្ត្រីសម្រាលកូន ។ បើស្ត្រីទាំងនេះមានបញ្ហាផ្សេងៗ គឺក្រុមហ៊ុនមានតួនាទីទទួលខុសត្រូវ ។

ពលរដ្ឋវៀតណាមនឹងប្រើប្រាស់ម៉ូតូសម្រាប់ធ្វើដំណើរជាចម្បង ខណៈរថយន្តសម្រាប់តែអ្នកមានជីវភាពធូរធាប៉ុណ្ណោះ ។ ហេតុនេះ ទើបនៅតាមផ្លូវនានាមានសុទ្ធតែម៉ូតូទាំងអស់ ហើយបើមានពិធីបុណ្យសំខាន់ៗ ដូចជា ៖ ចូលឆ្នាំថ្មី និងបុណ្យសង្សារ វៀតណាមនឹងជិះម៉ូតូច្រើនជាងថ្ងៃធម្មតា ។ ពេលធ្វើដំណើរតាមម៉ូតូ វៀតណាមនឹងពាក់មួកសុវត្ថិភាព ដោយសារខ្លាចសមត្ថកិច្ចចាប់យកម៉ូតូ ប៉ុន្តែមួកសុវត្ថិភាពវៀតណាមស្តើងខ្លាំង និងពុំអាចការពារសុវត្ថិភាពបាន១០០% ទេ ។

រីឯយុវតីវៀតណាមខ្លាចកំដៅថ្ងៃខ្លាំងណាស់ ទើបការធ្វើដំណើរនៅពេលថ្ងៃក្តៅ ពួកគេតែងតែស្លៀកពាក់បិទបាំងខ្លួនប្រាណ, ពាក់ស្រោមដៃ, ស្រោមជើង និងបិទមុខមាត់ជិតទាំងអស់ ។ ប៉ុន្តែពេលល្ងាចមកដល់ យុវតីទាំងនេះនឹងស្លៀកពាក់សប្បាយៗ ។

សរុបមក វៀតណាមអាចរៀនសូត្រចំណេះដឹងផ្សេងៗបានយ៉ាងលឿន ។ រីឯវៀតណាមដែលធ្លាប់រស់នៅក្រៅប្រទេស ហើយត្រឡប់មកធ្វើការនៅប្រទេសខ្លួនវិញ ពួកគេនឹងមានការគិតដូចពលរដ្ឋអឺរ៉ុប ដោយព្យាយាមយកអ្វីថ្មីៗមកវៀតណាម ហើយពួកគេមានតួនាទីសំខាន់ជួយឱ្យអភិវឌ្ឍប្រទេសឱ្យរីកចម្រើន ។ ប៉ុន្តែវៀតណាមមានឧបសគ្គជាមួយមនុស្សជំនាន់មុន ដែលគ្រប់គ្រងប្រទេសមានអំពើពុករលួយ ៕

ប្រទេសឡាវ ៖ នៅពេលភ្ញៀវទេសចរបរទេសទៅកម្សាន្តនៅប្រទេសឡាវ ពួកគេនឹងបានឃើញពលរដ្ឋឡាវបរិភោគអាហារជាច្រើនមុខជាមួយបាយដំណើប ។ តើដឹងទេថា ហេតុអ្វីពលរដ្ឋឡាវនិយមបរិភោគបាយដំណើបច្រើនបែបនេះ? ហើយក្រៅពីការបរិភោគ តើឡាវមានជំនឿអ្វីខ្លះពាក់ព័ន្ធនឹងអង្ករដំណើប?

ប្រទេសឡាវចាត់ទុកថា បាយដំណើប គឺជាអាហារតំណាងជាតិរបស់ខ្លួនរហូតមក ហើយឡាវបរិភោគបាយដំណើបតាំងពីសម័យបុរាណរហូតដល់បច្ចុប្បន្ន គឺដូចគ្នានឹងជនជាតិបារាំងចូលចិត្តបរិភោគនំប៉័ង ឬជប៉ុនបរិភោគ Sushi ដែរ ។ ហេតុនេះ ទម្លាប់បរិភោគបាយដំណើបរបស់ឡាវបានចាក់ឫសយ៉ាងជ្រៅក្នុងគំនិតពលរដ្ឋឡាវ និងពុំអាចហាមឃាត់ពួកគេបានទេ ។

បើតាមឯកសារបញ្ជាក់ថា នៅតំបន់អាស៊ីអាគ្នេយ៍បានដាំស្រូវដំណើបអស់រយៈពេលយ៉ាងហោចណាស់ ៤.០០០ឆ្នាំហើយ ហើយប្រវតិ្តវិទូជជែកគ្នាថា តើកសិករបុរាណដាំស្រូវដំណើបដោយសារអាកាសធាតុក្នុងតំបន់អំណោយផល ឬមកពីរសជាតិ និងលក្ខណៈរបស់ស្រូវដំណើរ? នៅសតវត្សទី១៨ ប្រវត្តិវិទូក៏បានទទួលចម្លើយច្បាស់លាស់អំពីការដាំស្រូវដំណើបនៅតំបន់អាស៊ីអាគ្នេយ៍ ហើយស្រូវដំណើបត្រូវបានគេដាំដុះជំនួសស្រូវខ្សាយស្ទើរគ្រប់តំបន់ ។

បាយដំណើបបានក្លាយជាអាហារដ៏សំខាន់នៅប្រទេសឡាវ បន្ទាប់មក គឺប្រទេសចិន, មីយ៉ាន់ម៉ា, ថៃ, កម្ពុជា និងវៀតណាម ។ ប៉ុន្តែពលរដ្ឋឡាវបានបរិភោគបាយដំណើបច្រើនជាងគេ បើប្រៀបធៀបនឹងប្រទេសជិតខាង ។

បច្ចុប្បន្ន បើទោះមានការអភិវឌ្ឍទីក្រុង និងកត្តាផ្សេងៗបានផ្លាស់ប្តូរទម្លាប់ការបរិភោគបាយដំណើបរបស់ឡាវក្តី ប៉ុន្តែបាយដំណើបនៅតែជាអត្តសញ្ញាណរបស់ពលរដ្ឋឡាវជានិច្ច ។ ជាក់ស្តែង កាលពីឆ្នាំ១៩៩០ ក្រុមតន្ត្រីឡាវទទួលបានប្រជាប្រិយភាពនៅអាមេរិក ហើយក្រុមតន្ត្រីនេះបានដាក់ឈ្មោះថា «ក្រុមតន្ត្រីបាយដំណើប» ។

ការពេញនិយមបរិភោគបាយដំណើបនៅប្រទេសឡាវ គឺដោយសារបាយដំណើបផ្តល់នូវគុណសម្បត្តិអាហារូបត្ថម្ភខ្ពស់ ហើយវាចំណាយពេលរំលាយយូរជាងបាយខ្សាយ ។ ហេតុនេះ ការបរិភោគបាយដំណើប គឺជួយឱ្យឆ្អែតបានយូរ ទើបកសិករឡាវចូលចិត្តបរិភោគបាយដំណើប ដោយសារពួកគេធ្វើការយូរម៉ោង និងមានពេលឈប់សម្រាកតិច ។

រីឯការរាប់បាត្រព្រះសង្ឃ ក៏ពលរដ្ឋឡាវនិយមយកបាយដំណើបមករាប់បាត្រផងដែរ ពីព្រោះនឹងជួយឱ្យព្រះសង្ឃឆ្អែតបានយូរជាងឆាន់បាយខ្សាយ ។ ម្យ៉ាងទៀត ព្រះសង្ឃពុំឆាន់ចង្ហាន់ក្រោយពេលថ្ងៃត្រង់ទេ ។

ក្រៅពីនេះ របៀបរបបរស់នៅ, វប្បធម៌ និងជំនឿផ្សេងៗរបស់ពលរដ្ឋឡាវ គឺពាក់ព័ន្ធនឹងអង្ករដំណើបពុំអាចញែកចេញពីគ្នាឡើយ ។ ការរៀបចំពិធីសំខាន់ៗពាក់ព័ន្ធនឹងការដាំស្រូវ, ការសុំទឹកភ្លៀងតាមរដូវកាល និងការប្រមូលផលដំណាំ គឺឡាវពុំដែលចោលបាយដំណើបទេ ។ ឡាវក៏បានរៀបចំនំអន្សមក្នុងពិធីសំខាន់ៗផងដែរ ដែលធ្វើពីអង្ករដំណើប, ដូង, ចេក និងសណ្តែកបៃតង ។

ពលរដ្ឋឡាវនិយមធ្វើពិធីផ្សេងទៀត ដូចជា ៖ បាចអង្ករដំណើបឡើងទៅលើអាកាស ក្រោយពិធីសូត្រមន្តរួចរាល់ ។ លើសពីនេះ បើមានអ្នកណាម្នាក់ជិតស្លាប់ ចាស់ៗក្នុងភូមិនឹងយកអង្ករដំណើបមកមកត្រដុសលើខ្លួនប្រាណអ្នកនោះ បន្ទាប់មក ប្រមូលវាបោះចោលដើម្បីបណ្តេញខ្មោច ព្រាយបិសាច ៕

សហរដ្ឋអាមេរិក ៖ អ្នកចូលចិត្តជិះកង់នឹងយល់ច្បាស់ថា ពួកគេប្រឈមនឹងយានជំនិះនៅខាងក្រោយបុក ហើយពិបាកការពារខ្លួនណាស់ ដោយសារកង់គ្មានឧបករណ៍គ្រប់គ្រាន់ដូចយានជំនិះផ្សេង ។ ហេតុនេះ ក្រុមហ៊ុនមួយរបស់អាមេរិកបានផលិតអំពូលភ្លើងកង់ក្រោយឆ្លាតវៃឈ្មោះ «Survue» ដែលបំពាក់បច្ចេកវិទ្យា AI ដើម្បីពិនិត្យមើលយានជំនិះខាងក្រោយ និងជូនដំណឹងទៅអ្នកជិះកង់ឱ្យប្រយ័ត្នខ្លួន ។

អំពូលភ្លើងឆ្លាតវៃ «Survue» បានបំពាក់កាមេរ៉ា និងបច្ចេកវិទ្យា AI ដើម្បីពិនិត្យមើល និងបញ្ជាក់ពីប្រភេទយានជំនិះដែលបើកបរនៅខាងក្រោយ ឬក្បែរកង់ ។ លើសពីនេះ វានឹងអាចវាស់កម្រិតល្បឿន និងប្រាប់ទីតាំងយានជំនិះទាំងអស់ដើម្បីប្រមូលទិន្នន័យមកវិភាគពីគ្រោះថ្នាក់ ដោយសារយានជំនិះតែងតែបើកបុកអ្នកជិះកង់តាមផ្លូវ ។

អំពូលភ្លើងឆ្លាតវៃនេះមានទម្ងន់១២៥ក្រាម និងអាចប្រើប្រាស់បានរយៈពេល៦ម៉ោងសម្រាប់ការសាកថ្មម្តង ។ វានឹងជូនដំណឹងពីគ្រោះថ្នាក់ទៅកាន់អ្នកជិះកង់ ព្រមទាំងផ្ញើសារដាស់តឿនតាមទូរស័ព្ទស្មាតហ្វូនផងដែរ ដែលអាចដំណើរការជាមួយប្រព័ន្ធ iOS និង Android ។ វានឹងបញ្ជាក់ពីកម្រិតល្បឿនបើកបរ និងទីតាំងយានជំនិះនៅក្បែរកង់ ។

លើសពីនេះ អំពូលភ្លើងឆ្លាតវៃនឹងថតវីដេអូយានជំនិះផ្សេងៗដោយស្វ័យប្រវត្តិ ពេលយានជំនិះទាំងនេះបើកបរមកក្បែរអ្នកជិះកង់សម្រាប់ប្រើប្រាស់ជាប្រយោជន៍ថ្ងៃក្រោយ ករណីមានរឿងក្តីដល់តុលាការ ។ អំពូលភ្លើងនឹងលោតភ្លើងបង្ហាញទៅអ្នកជិះកង់ខាងក្រោយផងដែរ ឱ្យប្រុងប្រយ័ត្នជាមួយអ្នកជិះកង់ខាងមុខ ហើយវាអាចថតយានជំនិះនៅឆ្ងាយពីកង់ រហូតដល់១១០ម៉ែត្រ ។

អ្នកបង្កើតអំពូលភ្លើងឆ្លាតវៃរបស់ក្រុមហ៊ុនអាមេរិកនិយាយថា លោកបង្កើតអំពូលភ្លើងនេះឡើង ដោយសារលោកបារម្ភពីសុវត្ថិភាព ពេលឃើញកូនៗរបស់លោកជិះកង់នៅតាមផ្លូវ ។ ហេតុនេះ លោកក៏ចាប់ផ្តើមផលិតវាដើម្បីឱ្យការជិះកង់មានសុវត្ថិភាព ហើយក្រុមហ៊ុនគ្រោងលក់ក្នុងតម្លៃ៣២៩ដុល្លារអាមេរិក ។

លោកបញ្ជាក់ថា សុវត្ថិភាពនៃការធ្វើដំណើរនៅតាមផ្លូវពិតជាសំខាន់ខ្លាំងណាស់ ហើយអំពូលភ្លើង AI នេះនឹងអាចជួយកាត់បន្ថយគ្រោះថ្នាក់ចរាចរណ៍បានមួយកម្រិត ខណៈយានជំនិះធំៗពុំសូវចាប់អារម្មណ៍ជាមួយអ្នកជិះកង់ទេ ៕