ប្រទេសវៀតណាម៖ បន្ទាប់ពីរងឥទ្ធិពលនៃខ្យល់ព្យុះយ៉ាហ្គី តំបន់ជាច្រើននៅក្នុងប្រទេសវៀតណាមបានលិចលង់ក្នុងទឹកជំនន់ បណ្តាលឱ្យទំនិញគ្រប់ប្រភេទខូចខាតយ៉ាងធ្ងន់ធ្ងរ ជាហេតុធ្វើឱ្យតម្លៃកើនឡើងទ្វេដង។
យោងតាមកាសែតអេឡិចត្រូនិក VTC News បានឱ្យដឹងថា តម្លៃបន្លែបៃតងនៅព្រឹកថ្ងៃទី១០ ខែកញ្ញា ឆ្នាំ២០២៤ ថ្មីៗនេះ នៅតាមផ្សាររបស់ប្រជាពលរដ្ឋជាច្រើនបានកើនឡើងយ៉ាងខ្លាំង ហើយមិនសូវមានទំនិញសម្រាប់លក់ដូចមុននោះទេ។ សព្វថ្ងៃបន្លែគឺមានការខ្វះខាតយ៉ាងខ្លាំងនៅក្នុងប្រទេសវៀតណាម ដោយសារតំបន់ជាច្រើនត្រូវបានជន់លិច ហើយបន្លែត្រូវបានខូចខាត ធ្វើឱ្យការផ្គត់ផ្គង់ខ្វះខាត ជំរុញឱ្យតម្លៃកើនឡើងខ្ពស់មិនធ្លាប់មាន។

យោងតាមប្រភពដដែលបានឱ្យដឹងទៀតថា បន្លែដែលថ្លៃបំផុតគឺបន្លែឆៅ និងឱសថ។ មិនត្រឹមតែបន្លែឆៅ និងឱសថឡើងថ្លៃខ្លាំងប៉ុណ្ណោះទេ សូម្បីទំនិញគ្រប់ប្រភេទដូចជា សាច់ អង្ករ ស៊ុត ក៏ឡើងថ្លៃខ្លាំងផងដែរ និយាយរួមទៅ អ្វីៗនៅទីនេះបច្ចុប្បន្នគឺសុទ្ធតែឡើងថ្លៃទាំងអស់។ អាជីវករតូចមួយនៅផ្សារ Nam Du ស្រុក Hoang Mai បាននិយាយថា រយៈពេលពីរថ្ងៃកន្លងមកនេះ គាត់មិនអាចទិញឱសថទៅលក់បានទេ ដោយសារទីផ្សារលក់ដុំខ្វះខាត ហើយតម្លៃក៏ខ្ពស់ផងដែរ។ លើសពីនេះទំនិញផ្សេងៗដែលធ្លាប់តែមានតម្លៃថោកសមរម្យក៏បានកើនឡើងតម្លៃទ្វេដងដែរ។

បច្ចុប្បន្នទីផ្សាររបស់វៀតណាមកំពុងជួបការលំបាកខ្លាំងដោយសារឥទ្ធិពលនៃខ្យល់ព្យុះយ៉ាហ្គី។ ប្រទេសវៀតណាមថ្មីៗនេះក៏បានប្រកាសបិទសាលាមួយរយៈដោយប្តូរមករៀនតាមអនឡាញវិញ ដោយសារហេតុផលភ្លៀង និងទឹកជំនន់កម្រិតខ្ពស់។ ទន្ទឹមនឹងនោះ អាជីវកម្មដូចជាសណ្ឋាគារ ភោជនីយដ្ឋាន ក៏បានបិទទ្វារមិនទទួលភ្ញៀវមួយរយៈ ដោយសារហេតុផលដូចគ្នា។ ខ្យល់ព្យុះយ៉ាហ្គីបានបំផ្លាញព្រៃឈើធម្មជាតិ និងរុក្ខជាតិចំនួន ១ លានហិកតានៅក្នុងប្រទេសវៀតណាម ហើយស្រូវ ១០ ម៉ឺនហិកតាក៏ត្រូវទឹកលិចផងដែរ។ ផ្ទះនីមួយៗរបស់ប្រជាពលរដ្ឋបានរងការខូចខាតយ៉ាងធ្ងន់ធ្ងរ ជាពិសេសមនុស្សជាច្រើនក៏បានបាត់បង់ជីវិត និងរងរបួសទៀតផងក្នុងហេតុការណ៍នេះ។

ទោះជាយ៉ាងណាបច្ចុប្បន្នរដ្ឋាភិបាលបានកំពុងរៀបចំផែនការ និងដោះស្រាយបញ្ហាលំបាករបស់ប្រជាជន ក៏ដូចជាផ្តល់ការគាំទ្រ ដើម្បីឱ្យសិស្សានុសិស្សបានទៅសាលារៀនឡើងវិញ រួមទាំងស្តារលំនៅដ្ឋានជូនប្រជាពលរដ្ឋឱ្យបានឆាប់តាមដែលអាចធ្វើទៅបាន។ គួរបញ្ជាក់ដែរថា គិតត្រឹមល្ងាចថ្ងៃទី៩ ខែកញ្ញា ព្យុះនេះបានបណ្តាលឱ្យមនុស្ស ៦៥ នាក់ស្លាប់ និង ៣៩ នាក់បាត់ខ្លួន ហើយមនុស្សប្រហែល ២៥០ នាក់បានរងរបួស រីឯផ្ទះជាង ៨,០០០ ត្រូវបានខូចខាត ទូករាប់សិបបានលិច ហើយប្រព័ន្ធអគ្គិសនីមានបញ្ហាទូទាំង ១៥ រាជធានី-ខេត្ត ក៏ដូចជាគ្មានអគ្គិសនីប្រើប្រាស់ជាដើម៕

ប្រសិនបើគេឱ្យ ១៥,០០០ ដុល្លារសម្រាប់មួយសប្តាហ៍ ហើយ ៦ ម៉ឺនដុល្លារសម្រាប់មួយខែ តើលោកអ្នកហ៊ានធ្វើការងារនេះដែរឬទេ? ដែលការងារនេះត្រូវបានគេចាត់ទុកថាជាការងារគ្រោះ.ថ្នាក់ជាងគេបំផុតមួយក្នុងពិភពលោក។

ការងារគឺមានច្រើនមុខជំនាញណាស់នៅលើពិភពលោកយើងនេះ ហើយក៏ទទួលបានប្រាក់ខែខ្ពស់ ឬទាបតាមមុខជំនាញផងដែរ ជាឧទាហរណ៍ដូចជាការងារផ្នែកវិស្វកម្ម AI អ៊ីចឹងគឺទទួលបានជាង ១ ម៉ឺនដុល្លារអាមេរិកឯណោះក្នុងមួយខែ។ ទោះជាយ៉ាងណាការងារជាជាងផ្សារដែកក្រោមទឹកវិញគឺបានប្រាក់ខ្ពស់ជាងនេះទ្វេដង ដោយក្នុងមួយសប្តាហ៍លោកអ្នកនឹងទទួលបាន ១៥,០០០ ដុល្លារអាមេរិក ហើយមួយខែគឺលោកអ្នកនឹងទទួលបាន ៦ ម៉ឺនដុល្លារអាមេរិក។

បើប្រៀបធៀបទៅនឹងជាងដែកដែលធ្វើការនៅលើដី អ្នកផ្សារក្រោមទឹកប្រឈមនឹងគ្រោះថ្នាក់ជាច្រើនដែលមិននឹកស្មានដល់។ ជារៀងរាល់ឆ្នាំនៅលើពិភពលោកសម្រាប់មនុស្ស ២០០ នាក់ដែលធ្វើការជាជាងផ្សារដែកក្រោមទឹក ៣០ នាក់ហើយដែលបានបាត់បង់ជីវិត ភាគច្រើនមកពីមូលហេតុផ្សេងៗគ្នាដូចជា ឆក់ ឬ ផ្ទុះជាដើម។ ដូច្នេះហើយតើលោកអ្នកហ៊ានប្រថុយជាមួយការងារនេះដែរឬទេ? ការផ្សារក្រោមទឹកត្រូវបានចាត់ទុកថាជាការងារដ៏គ្រោះថ្នាក់បំផុតមួយក្នុងពិភពលោក ប៉ុន្តែនេះគឺចាំបាច់ដើម្បីរក្សាស្ពានឈរ បំពង់បង្ហូរប្រេងពីការលេចធ្លាយ និងកប៉ាល់ធំៗពីការលិច។

នៅប្រទេសឥណ្ឌូណេស៊ី នេះគឺជាការងារដែលមានប្រាក់ខែខ្ពស់បំផុត ដែលជួយឱ្យជាងដែករកបានរហូតដល់រាប់ម៉ឺនដុល្លារអាមេរិកឯណោះសម្រាប់មួយខែៗ ហើយតម្រូវការសម្រាប់ពួកគេគឺខ្ពស់ណាស់ដែលរដ្ឋាភិបាលហ៊ានចំណាយលើការបណ្តុះបណ្តាលអ្នកមុជទឹកឱ្យក្លាយជាអ្នកផ្សារដែក។ ផ្នែកមួយនៃការងាររបស់កម្មករទាំងនេះគឺត្រូវភ្ជាប់ប្រអប់ពណ៌សដែលផ្ទុក anode ទៅបង្គោលដែក។ anode ត្រូវបានផលិតចេញពីលោហៈដែលមានប្រតិកម្មច្រើនជាងស័ង្កសី ឬអាលុយមីញ៉ូមទ្វេដង ដែលវានឹងភ្ជាប់ទៅនឹងជួរឈរការពាររចនាសម្ព័ន្ធសំខាន់ ដូច្នេះ anode ត្រូវតែជួសជុលរៀងរាល់ ៥ ឆ្នាំម្តង។

ហេតុនេះការងារជាជាងផ្សារដែកក្រោមទឹកគឺមានហានិភ័យជាច្រើនដូចជា៖
ការលង់ទឹក – អ្នកផ្សារក្រោមទឹកប្រឈមនឹងហានិភ័យនៃការលង់ទឹក ប្រសិនបើឧបករណ៍របស់ពួកគេបរាជ័យ ឬពួកគេបាត់បង់ស្មារតី។ សម្ពាធទឹកនៅជម្រៅអាចធ្វើឱ្យពួកគេពិបាកទៅដល់ផ្ទៃខាងលើដោយសុវត្ថិភាពក្នុងគ្រាអាសន្ន។ លើសពីនេះជាងក៏នឹងប្រឈមជាមួយការផ្ទុះផងដែរ ដោយសារការរួមបញ្ចូលគ្នានៃឧស្ម័នផ្សារដែលអាចឆេះបាន សម្ពាធខ្ពស់ និងការមើលឃើញមានកម្រិតនៅក្រោមទឹក បង្កើតឱ្យមានហានិភ័យនៃការផ្ទុះយ៉ាងខ្លាំង។ ដូច្នេះការផ្ទុះអាចសម្លាប់ ឬបង្កឱ្យមានរបួសយ៉ាងធ្ងន់ធ្ងរដល់អ្នកផ្សារភ្លាមៗ។

ទន្ទឹមនឹងនោះ ជាងក៏ប្រឈមនឹងការឆក់អគ្គិសនីធ្ងន់ធ្ងរផងដែរ ដោយសារអគ្គីសនីនិងទឹកគឺជាការរួមបញ្ចូលគ្នាដ៏សាហាវ។ ប្រសិនបើពួកគេប៉ះចុងកាំភ្លើងដោយចៃដន្យ ពួកគេនឹងស្លាប់ភ្លាមៗ។ ហេតុនេះដើម្បីការពារសុវត្ថិភាព ជាងដែកត្រូវតែពាក់ស្រោមដៃពីរឈុត និងឈុតមុជទឹកស្តង់ដារ។ ទោះជាយ៉ាងណាការងារនេះទំនងជាធ្វើឱ្យមនុស្សស្លាប់ប្រហែល ៤០ ដងច្រើនជាងកម្មករធម្មតា ដែលធ្វើឱ្យវាក្លាយជាការងារដ៏គ្រោះថ្នាក់បំផុតមួយក្នុងលោក៕

ការចេញលក់ iPhone ជំនាន់ថ្មីតែងតែជាការបង្ហាញផលិតផលបច្ចេកវិទ្យាទំនើបៗដែលគេទន្ទឹងរង់ចាំពីមួយឆ្នាំទៅមួយឆ្នាំ។ ទោះជាយ៉ាងណាក៏ដោយ ព្រឹត្តិការណ៍ It’s Glowtime របស់ Apple នៅរោងមហោស្រព Steve Jobs កាលពីថ្ងៃទី ៩ ខែកញ្ញា ថ្មីៗនេះត្រូវបានគេនិយាយថា មិនគួរឱ្យចាប់អារម្មណ៍សោះ។

យោងតាម Business Insider មូលហេតុដែលការចេញលក់ iPhone 16 របស់ Apple គ្មានភាពទាក់ទាញដូចមុនគឺដោយសារ iPhone 16 និង 16 Pro Max គឺមិនសូវមានកម្មវិធីថ្មីៗ និងបច្ចេកវិទ្យាទំនើបៗដូចមុននោះទេ មានន័យថាស្មាតហ្វូននេះមិនខុសប្លែកពី iPhone 15 ឬ 15 Pro Max ប៉ុន្មានទេ។

លើសពីនេះហេតុផលមួយទៀតគឺថា កម្មវិធីបានថតវីដេអូទុកជាមុន ហើយបន្ទាប់មកចាក់វាឡើងវិញនៅលើអេក្រង់ ធ្វើឱ្យព្រឹត្តិការណ៍នេះមើលទៅធម្មតា និងសាមញ្ញបំផុត។ ទន្ទឹមនឹងនេះ អ្នកកាសែតជាច្រើនបានខកចិត្តនៅពេលដែលមិនមានភ្ញៀវល្បីៗចូលរួម បើប្រៀបធៀបទៅនឹង Samsung គឺព្រឹត្តិការណ៍ Samsung ល្អជាង ដោយសារមានបុគ្គលល្បីៗជាច្រើនបានលេចមុខនៅលើឆាក។ ខណៈព្រឹត្តិការណ៍ Unpacked របស់ Samsung កាលពីខែកក្កដា ឯកអគ្គរដ្ឋទូតម៉ាក Sydney Sweeney ស្រាប់តែលេចមុខនៅក្នុងការណែនាំអំពីឧបករណ៍កែរូបថត AI ។ ហើយវិចិត្រករ Keke Palmer ក៏មានវត្តមាននៅពេលដែល Google បានណែនាំខ្សែ Pixel ថ្មីផងដែរ។

នៅលើបណ្តាញសង្គម អ្នកជំនាញផ្នែកបច្ចេកវិទ្យាជាច្រើនបាននិយាយថា ពួកគេពិតជាងងុយគេងពេលកំពុងទស្សនាព្រឹត្តិការណ៍របស់ Apple។ ព័ត៌មានគឺស្ទើរតែមិនខុសពីការលេចធ្លាយមុនៗនោះទេ ហើយ iPhone 16 មិនមានការផ្លាស់ប្តូររូបរាងច្រើនឡើយ។ មុខងារដែលគួរឱ្យចាប់អារម្មណ៍បំផុតរបស់ iPhone 16 និង 16 Pro Max គឺ Apple Intelligence។ Apple Intelligence គឺឧបករណ៍សរសេរ AI បង្កើត emojis និងសមត្ថភាពបញ្ញាដែលមើលឃើញរបស់កាមេរ៉ា។ ទោះជាយ៉ាងណាកម្មវិធីនេះគឺមិនទាន់រួចរាល់សម្រាប់ប្រើប្រាស់នោះទេ ដោយអ្នកប្រើប្រាស់ត្រូវរង់ចាំរហូតដល់ខែធ្នូ។

ហេតុនេះហើយអ្នកប្រើប្រាស់ជាច្រើនបានសម្តែងការខកចិត្ត នៅពេលដែលពួកគេត្រូវរង់ចាំរហូតដល់ ២០២.៥ សម្រាប់ Apple Intelligence ដើម្បីគាំទ្រភាសាផ្សេងក្រៅពីភាសាអង់គ្លេស។ ទោះជាយ៉ាងណាក៏ដោយ Business Insider ជឿជាក់ថាជាមួយនឹងទូរស័ព្ទ iPhone ចំនួន ១.៥ ពាន់លានគ្រឿងដែលកំពុងដំណើរការនៅទូទាំងពិភពលោក Apple នៅតែអាចទទួលបានជោគជ័យទោះបីជាមិនមានព្រឹត្តិការណ៍គួរឱ្យចាប់អារម្មណ៍ខ្លាំងក៏ដោយ៕

យោងតាមរបាយការណ៍ប្រចាំឆ្នាំឈ្មោះ «Southeast Asia Electric Vehicle Outlook (EVO) 2024» របស់ស្ថាប័ន BloombergNEF បានបង្ហាញថា ប្រទេសមួយចំនួននៅតំបន់អាស៊ីអាគ្នេយ៍នឹងក្លាយទៅជាមជ្ឈមណ្ឌលផលិតរថយន្តអគ្គិសនីលើពិភពលោក នាពេលដ៏ខ្លីខាងមុខនេះ ។

បើតាមការស្រាវជ្រាវបញ្ជាក់ថា ទីផ្សាររថយន្តអគ្គិសនីរបស់ប្រទេសចំនួន៦ នៅតំបន់អាស៊ីអាគ្នេយ៍បានអភិវឌ្ឍន៍ និងរីកចម្រើនយ៉ាងឆាប់រហ័ស រួមមាន ៖ ប្រទេសឥណ្ឌូណេស៊ី, វៀតណាម, ម៉ាឡេស៊ី, សិង្ហបុរី, ថៃ និងហ្វីលីពីន ។ លើសពីនេះ ការប្រើប្រាស់រថយន្តអគ្គិសនីក្នុងតំបន់អាស៊ីអាគ្នេយ៍បានកើនឡើងខ្លាំង ព្រមទាំងមានការព្យាយាមបង្កើនការផលិតរថយន្តអគ្គិសនីក្នុងតំបន់បន្ថែមទៀត ។

នេះបង្ហាញឱ្យឃើញថា ចំនួនការលក់រថយន្តអគ្គិសនីទៅឱ្យអតិថិជនបានកើនឡើងរហូតដល់៣ដង នៅឆ្នាំ២០២៣ គឺស្មើចំនួន១៥៣.៥០០គ្រឿង ។ ការលក់រថយន្តអគ្គិសនីកើនឡើងខ្លាំងបែបនេះ គឺបណ្តាលមកពីគោលនយោបាយគាំទ្ររបស់រដ្ឋាភិបាលប្រទេសនីមួយៗ ហើយរថយន្តអគ្គិសនីចិនមានការទទួលស្គាល់កាន់តែច្រើនក្នុងតំបន់អាស៊ីអាគ្នេយ៍ ។

ហេតុនេះ បណ្តាប្រទេសនៅតំបន់អាស៊ីអាគ្នេយ៍ដែលនឹងក្លាយជាមជ្ឈមណ្ឌលផលិតរថយន្តអគ្គិសនីលើពិភពលោក រួមមាន ៖ ប្រទេសឥណ្ឌូណេស៊ី, វៀតណាម, ម៉ាឡេស៊ី, សិង្ហបុរី, ថៃ និងហ្វីលីពីន ។

ស្របពេលការលក់រថយន្តអគ្គិសនីកើនឡើងនៅតំបន់អាស៊ីអាគ្នេយ៍ ប៉ុន្តែការលក់កង់អាគុយបែរជាធ្លាក់ចុះនៅតំបន់នេះទៅវិញ និងកើនឡើងត្រឹមតែ៣,៨% ប៉ុណ្ណោះកាលពីឆ្នាំ២០២៣ ។ វៀតណាមនៅតែកាន់កាប់តំណែងជាប្រទេសលក់កង់អាគុយបានច្រើនជាងគេ គឺស្មើជាង៨០% នៃបរិមាណការលក់កង់អាគុយសរុបក្នុងតំបន់អាស៊ីអាគ្នេយ៍ ។

ចំណែករថយន្តអគ្គិសនី រដ្ឋាភិបាលវៀតណាមបានកំណត់គោលនយោបាយគាំទ្រឧស្សាហកម្មផលិតរថយន្តអគ្គិសនីក្នុងប្រទេសរបស់ខ្លួនជាបន្តបន្ទាប់ និងចាប់ផ្តើមកំណត់ស្តង់ដារ និងបទប្បញ្ញតិពាក់ព័ន្ធ ។ ក្រៅពីនេះ វៀតណាមបានបង្កើតមជ្ឈមណ្ឌលសាកល្បងរថយន្ត និងម៉ូតូ នៅឆ្នាំ២០០៤ ។

របាយការណ៍របស់ស្ថាប័ន BloombergNEF បានព្យាករថា ចំនួនការលក់រថយន្តអគ្គិសនីនឹងកើនឡើងរហូតដល់២លាន៧សែនគ្រឿង នៅឆ្នាំ២០៤០ គឺស្មើនឹង៥៦% នៃចំនួនការលក់រថយន្តសរុប ។ របាយការណ៍នេះក៏បានសង្កត់ធ្ងន់លើតម្រូវការវិនិយោគស្ថានីយសាកថ្មរថយន្តអគ្គិសនី នៅឆ្នាំ២០៤០ ផងដែរ ។

នៅតំបន់អាស៊ីអាគ្នេយ៍ រដ្ឋាភិបាលប្រទេសមួយចំនួនបានទទួលស្គាល់ពីសារៈសំខាន់របស់រថយន្តអគ្គិសនី ពីព្រោះវាមិនត្រឹមតែផ្តល់ផលល្អដល់បរិស្ថានប៉ុណ្ណោះទេ ប៉ុន្តែវាជាឱកាសយុទ្ធសាស្ត្រក្នុងកំណើនឧស្សាហកម្ម និងនិរន្តរភាព ។ នេះជាមូលហេតុធ្វើឱ្យប្រទេសមួយចំនួននៅអាស៊ានក្លាយជាមជ្ឈមណ្ឌលផលិតរថយន្តអគ្គិសនីលើពិភពលោក រួមមាន ៖

-ថៃ ៖ ចំនួនការលក់រថយន្តអគ្គិសនីបានកើនឡើងពី២ម៉ឺនគ្រឿង នៅឆ្នាំ២០២២ មកស្មើជិត៩ម៉ឺនគ្រឿង នៅឆ្នាំ២០២៣ ដែលស្មើនឹង២០% នៃការលក់រថយន្តសរុប ។ ការលក់រថយន្តអគ្គិសនីកើនឡើងនេះ ដោយសារវិធានការកាត់បន្ថយពន្ធ និងការផ្តល់ប្រាក់ឧបត្ថម្ភសម្រាប់អ្នកទិញរថយន្តអគ្គិសនី ។

-ឥណ្ឌូណេស៊ី ៖ ការលក់រថយន្តអគ្គិសនីនៅឥណ្ឌូណេស៊ីបានកើនឡើងខ្លាំង គឺពីចំនួនក្រោម១០០គ្រឿង នៅឆ្នាំ២០២១ មកស្មើនឹង១៧.០០០គ្រឿង នៅឆ្នាំ២០២៣ ។ ចំនួនការលក់រថយន្តអគ្គិសនីកើនឡើង ដោយសារវិធានការលើកទឹកចិត្តទិញរថយន្តអគ្គិសនីពីរដ្ឋាភិបាល ព្រមទាំងក្រុមហ៊ុនផលិតរថយន្តរបស់បរទេស ជាពិសេស ចិនបានកាន់កាប់ចំណែកទីផ្សារ៤៥% និងនាំចេញរថយន្តអគ្គិសនីផលិតនៅឥណ្ឌូណេស៊ីទៅកាន់ទីផ្សារពិភពលោក កាន់តែច្រើន ។

-វៀតណាម ៖ កាលពីឆ្នាំ២០២៣ បើទោះជាចំនួនការលក់រថយន្តសរុបធ្លាក់ចុះ ប៉ុន្តែការលក់រថយន្តអគ្គិសនីនៅវៀតណាមបានកើនឡើងដល់៣ម៉ឺនគ្រឿង ស្មើជិត១០% នៃចំណែកទីផ្សារ ។ រីឯក្រុមហ៊ុននាំមុខក្នុងទីផ្សារនេះ គឺ VinFast បានកាន់កាប់ចំណែកទីផ្សារក្នុងស្រុកស្ទើរទាំងអស់ ហើយក្រុមហ៊ុននេះកំពុងសម្លឹងមើលឱកាសផលិតរថយន្តអគ្គិសនីនៅក្រៅប្រទេសផងដែរ ដូចជា ៖ ឥណ្ឌា និងហ្វីលីពីន ៕

ប្រទេសថៃ ៖ កាលពីថ្ងៃទី១០ ខែកញ្ញា ឆ្នាំ២០២៤ សារព័ត៌មានថៃរាយការណ៍ថា ឥទ្ធិពលខ្យល់ព្យុះទីហ្វុង Yagi បានបណ្តាលឱ្យភ្លៀងធ្លាក់ខ្លាំងកាលពីថ្ងៃទី៨ ខែកញ្ញា កន្លងមក ដែលធ្វើឱ្យកម្រិតទឹកក្នុងទន្លេសាយ ខេត្តឈៀងរ៉ាយ កើនឡើងយ៉ាងឆាប់រហ័ស ។ លើសពីនេះ ទឹកបានហក់ឡើងខ្ពស់រហូតដល់លិចទំនប់ទឹក និងមានទឹកជំនន់នៅតំបន់ជាយដែនថៃ និងមីយ៉ាន់ម៉ា ។

ភ្លៀងនៅតែធ្លាក់ខ្លាំងជាបន្តបន្ទាប់រហូតដល់ថ្ងៃទី១០ ខែកញ្ញា ដែលធ្វើឱ្យមានទឹកជំនន់លិចផ្ទះសម្បែងពលរដ្ឋ និងតំបន់ក្បែរទន្លេសាយ ។ អាជ្ញាធរក្នុងតំបន់បានបង្កើនកម្លាំងជួយជម្លៀសមនុស្សចាស់, កុមារ និងអ្នកជំងឺចេញពីតំបន់ទឹកលិចទៅកាន់កន្លែងមានសុវត្ថិភាព ។

សារព័ត៌មានថៃរាយការណ៍ថា ភ្លៀងបានធ្លាក់ខ្លាំងនៅតំបន់ជាច្រើនក្នុងបណ្តាខេត្តភាគខាងជើងប្រទេសថៃ ជាពិសេស ខេត្តឈៀងរ៉ាយ ដោយសារខេត្តនេះមានភ្លៀងធ្លាក់ខ្លាំងអស់រយៈពេល២ថ្ងៃជាប់ៗគ្នា និងបណ្តាលឱ្យមានទឹកជំនន់លិចតំបន់ជាច្រើនក្នុងស្រុកមេសាយ ។ អាជ្ញាធរសន្និដ្ឋានថា កម្រិតទឹកជំនន់នឹងកើនឡើងខ្ពស់បន្ថែមទៀត ដោយសារភ្លៀងនៅតែបន្តធ្លាក់ឥតឈប់ឈរ ។

អាជ្ញាធរបានប្រកាសឱ្យពលរដ្ឋជញ្ជូនសម្ភារៈប្រើប្រាស់ និងស្បៀងអាហារទៅកាន់កន្លែងសុវត្ថិភាពយ៉ាងឆាប់រហ័ស ហើយអាជ្ញាធរបានបំបែកកម្លាំងជួយសង្គ្រោះពលរដ្ឋនៅតាមតំបន់នានា ដោយប្រើប្រាស់រថយន្តធំៗសម្រាប់ដឹកមនុស្សចាស់, កុមារ និងអ្នកជំងឺចេញពីតំបន់ទំនាបទៅកាន់កន្លែងមានសុវត្ថិភាពបណ្តោះអាសន្ន ។

ក្រៅពីនេះ ពលរដ្ឋបានជួយគ្នាយកការ៉ុងខ្សាច់មកតម្រៀបជាជួរដើម្បីកុំឱ្យទឹកហូរចូលផ្ទះ ខណៈកម្រិតទឹកបានកើនឡើងជាបន្តបន្ទាប់នៅស្រុកមេសាយ ខេត្តឈៀងរ៉ាយ ដោយសារមានភ្លៀងធ្លាក់គ្រប់ពេលវេលា ។ ប៉ុន្តែពុំមានសេចក្តីរាយការណ៍ថា មានមនុស្សស្លាប់ ឬរងរបួសទេ ។

អាជ្ញាធរនិយាយថា បើទោះកម្រិតទឹកនៅបណ្តាខេត្តផ្សេងទៀតបានស្រកចុះបន្តិចក្តី ប៉ុន្តែសូមពលរដ្ឋរស់នៅតំបន់ទំនាបប្រុងប្រយ័ត្ន ដោយសារកម្រិតទឹកផ្លាស់ប្តូរ និងតាមដានការប្រកាសស្ថានភាពទឹកជំនន់យ៉ាងដិតដល់ ។ ពលរដ្ឋប្រាប់ថា ទោះជាកម្រិតទឹកស្រកចុះខ្លះៗក្តី ប៉ុន្តែពួកគេពុំទុកចិត្តទេ និងបារម្ភថា ទឹកនឹងកើនឡើងខ្លាំងលើសមុន ដោយសារភ្លៀងនៅតែបន្តធ្លាក់ក្នុងខេត្តភាគខាងជើង ៕

ប្រទេសវៀតណាម ៖ ខ្យល់ព្យុះទីហ្វុង Yagi បានបោកបក់មកលើប្រទេសវៀតណាមបណ្តាលឱ្យពលរដ្ឋវៀតណាមស្លា.ប់ រហូតដល់ជិត១៣០នាក់, រងរបួ.ស, បាត់ខ្លួនជាច្រើននាក់ និងមនុស្សមួយចំនួនទៀតជាប់នៅលើដំបូលផ្ទះដោយសារទឹកជំនន់ ។ លើសពីនេះ សម្ភារៈក្នុងផ្ទះពលរដ្ឋជាច្រើនលិចទឹក ខណៈដើមឈើនៅតាមផ្លូវបាក់ និងដាច់ចរន្តអគ្គិសនី ។

កាលពីថ្ងៃទី១០ ខែកញ្ញា សារព័ត៌មាន BBC រាយការណ៍ថា ប្រទេសវៀតណាមបានជួបគ្រោះធម្មជាតិដ៏ធ្ងន់ធ្ងរ ក្រោយពីខ្យល់ព្យុះទីហ្វុង Yagi បោកបក់មកតំបន់ភាគខាងជើងប្រទេស ហើយបណ្តាលឱ្យពលរដ្ឋវៀតណាមស្លាប់យ៉ាងហោចណាស់ ចំនួន១២៧នាក់ និងបាត់ខ្លួន៥៤នាក់ទៀត ។

សារព័ត៌មានបរទេសរាយការណ៍បន្តថា ជនរងគ្រោះដោយសារទឹកជំនន់រាប់ពាន់នាក់នៅវៀតណាមបានជាប់នៅលើដំបូលផ្ទះពួកគេ ដែលស្ថិតនៅតាមបណ្តាខេត្តភាគខាងជើង ។ ជាមួយគ្នានេះ មនុស្សមួយចំនួនបានអំពាវនាវសុំឱ្យមានការជួយសង្គ្រោះជីវិតពួកគេក្នុងបណ្តាញសង្គម ។

អាជ្ញាធរវៀតណាមបារម្ភថា ចំនួនជនរងគ្រោះនឹងកើនឡើងបន្ថែមទៀត ដោយសារកម្រិតទឹកជំនន់កើនឡើងយ៉ាងខ្លាំង ។ រីឯអគារ និងផ្ទះសម្បែងត្រូវបានដីបាក់សង្កត់អស់ជាច្រើនកន្លែង និងបណ្តាលឱ្យមនុស្សមួយចំនួនជាប់នៅក្រោមគំនរបាក់បែក ។

Yagi គឺជាខ្យល់ព្យុះមានកម្លាំងខ្លាំងក្លាបំផុត ដែលបានបោកបក់មកលើប្រទេសវៀតណាម ក្នុងរយៈពេល៣០ឆ្នាំ កន្លងមក ។ ក្រៅពីខ្យល់ព្យុះនេះបានបំផ្លាញអគារ, លំនៅឋាន និងសម្លាប់ជីវិតមនុស្សជាច្រើននាក់នៅភាគខាងជើងវៀតណាម វាធ្វើឱ្យមនុស្សជាង១លាន៥សែននាក់ គ្មានអគ្គិសនីប្រើប្រាស់ ។

កន្លងមក មានសេចក្តីរាយការណ៍ថា តំបន់ជាច្រើននៅភាគខាងជើងប្រទេសវៀតណាម ក៏បានប្រឈមនឹងទឹកជំនន់ដែរ ព្រមទាំងតំបន់ខ្លះទៀតនៅខេត្តថាយវៀន និងខេត្តអៀនប៉ាយ បានលិចទឹកទាំងអស់ ។ រីឯនៅទីក្រុងហាណូយវិញ តំបន់ស្ថិតនៅតាមដងទន្លេក្រហម ក៏មានទឹកជំនន់ដែរ ។

អ្នកស្រី Phan Thi Thuyet អាយុ៥០ឆ្នាំ រស់នៅក្បែរទន្លេក្រហម និយាយថា អ្នកស្រីពុំធ្លាប់ឃើញទឹកជំនន់លិចខ្លាំងដល់ថ្នាក់នេះទេ ។ អ្នកស្រីប្រាប់ថា ៖ «ខ្ញុំបាត់បង់អ្វីគ្រប់យ៉ាងអស់ហើយ ។ ខ្ញុំត្រូវជម្លៀសកូនចៅទៅកាន់ទីទួលខ្ពស់ដើម្បីឱ្យមានជីវិតរស់ ប៉ុន្តែយើងពុំអាចយកសម្ភារៈផ្សេងៗទៅជាមួយបានទេ ព្រោះវាលិចទឹកទាំងអស់» ។

គួរបញ្ជាក់ថា កាលពីដើមខែកញ្ញា ឆ្នាំ២០២៤ ខ្យល់ព្យុះទីហ្វុង Yagi បានបោកបក់មកលើឆ្នេរសមុទ្រខេត្តក្វាងទុង ប្រទេសចិន ដែលបណ្តាលឱ្យស្ថានីយរថភ្លើង, នាវា, យន្តហោះដឹកអ្នកដំណើរ និងសាលារៀនផ្អាកដំណើរការជាបណ្តោះអាសន្ន ហើយអាជ្ញាធរចិនជួយគ្នាជម្លៀសពលរដ្ឋទៅកាន់ជម្រកបណ្តោះអាសន្ន ៕

ប្រទេសឥណ្ឌា ៖ យើងតែងតែឃើញដំណាំស្រូវត្រូវបានគេដាំដុះនៅតាមស្រែដ៏ធំល្វឹងល្វើយ ប៉ុន្តែបុរសឥណ្ឌាម្នាក់បានយកស្រូវមកដាំនៅលើក្បាលរបស់ខ្លួនទៅវិញ ហើយថែមទាំងនិយាយថា លោកមកទីឋានខ្ពស់ ទើបអាចដាំស្រូវឱ្យដុះលូតលាស់ល្អនៅលើក្បាលបាន ។

បុរសឥណ្ឌារូបនេះនិយាយថា លោកបានហាត់រៀនពីវិធីសាស្ត្រដាំស្រូវលើក្បាលអស់រយៈពេល៤០ឆ្នាំហើយ ។ អ្វីដែលមនុស្សគ្រប់គ្នាគិតថា ពួកគេពុំអាចធ្វើបាន ប៉ុន្តែលោកអាចធ្វើវាបានដោយជោគជ័យ ។

ចំនួនដើមស្រូវដុះពាសពេញក្បាលរបស់លោកបង្ហាញថា លោកអាចធ្វើវាបានសម្រេច ដោយសារដើមស្រូវនីមួយៗបានដុះឡើងទៅលើត្រង់ព្រមៗគ្នា ។ ប៉ុន្តែលោកពុំអាចសម្រាកបានទេ ហើយលោកតែងតែអង្គុយភាគច្រើន ដើម្បីកុំឱ្យបាក់ដើមស្រូវលើក្បាល ។

លោកប្រាប់ថា ពេលលើក្បាលលោកមានសភាពស្ងួត លោកតែងតែយកទឹកមកស្រោចក្បាលជានិច្ច និងផ្តល់ទឹកដល់ដំណាំស្រូវផងដែរ ។ ពេលស្រូវលើក្បាលរបស់លោកទុំអស់ លោកក៏ចាប់ផ្តើមប្រមូលផលវាទុកបរិភោគ បន្ទាប់មក លោកក៏ដាំស្រូវលើក្បាលជាថ្មី ហើយលោកបានធ្វើបែបនេះរហូតមក ។

ចំណែកអ្នកស្រុកដែលបានឃើញលោកដាំស្រូវលើក្បាលបែបនេះ ពួកគេនិយាយថា លោកជាមនុស្សឆ្កួត និងឆោតល្ងង់ ។ ប៉ុន្តែសម្រាប់លោកវិញគិតថា ការធ្វើបែបនេះជួយឱ្យផ្លូវចិត្តរឹងមាំល្អ ហើយវាក៏ជាជំនឿមួយពាក់ព័ន្ធនឹងអាទិទេពផងដែរ ដែលមនុស្សធម្មតាគ្មានថ្ងៃយល់នោះទេ ។

បើទោះជាលើក្បាលលោកមានដើមស្រូវជាច្រើនក្តី ប៉ុន្តែលោកគ្មានអារម្មណ៍ធុញថប់ឡើយ ពីព្រោះលោកគិតថា លោកធ្វើដំណើរមកទីឋានខ្ពស់ ។ ដើមស្រូវលើក្បាលពិតជាសំខាន់សម្រាប់ជីវិតលោកខ្លាំងណាស់ ហើយលោកពុំពេញចិត្តឱ្យអ្នកណាម្នាក់មកលេងសើចជាមួយដើមស្រូវទាំងនេះឡើយ ខណៈមនុស្សម្នាសុំទិញស្រូវលើក្បាលលោក ។ លោកគិតថា វាជាលទ្ធផលដ៏ល្អប្រសើរបំផុតដែលទទួលបាននាពេលនេះ ។

ជារៀងរាល់ថ្ងៃ លោកមានតួនាទីថែទាំដំណាំស្រូវទាំងអស់ឱ្យដុះលូតលាស់បានល្អ ដូចជា ៖ ការស្រោចទឹកស្រូវ ដូចគ្នានឹងការស្រោចទឹកដំណាំផ្សេងដែរ នៅពេលលោកមានអារម្មណ៍ថា ស្ងួតក្បាលខ្លាំង ។ ចុះលោកអ្នកវិញយល់ឃើញយ៉ាងណាដែរ ចំពោះការដាំស្រូវលើក្បាលបែបនេះ?