នៅលើពិភពលោកនេះ គ្មានអ្វីប្រាកដប្រជាទេ សូម្បីតែការងារ ជាដើម ។ ជួនកាល នៅសុខៗ បុគ្គលិកអាយុច្រើនត្រូវបានក្រុមហ៊ុនបញ្ឈប់ពីការងារក៏មាន ដោយសារបណ្តាលមកពីកត្តាផ្សេងៗ ។ ហេតុនេះ ពេលរាងកាយចាប់ផ្តើមគ្មានកម្លាំងកំហែង ប៉ុន្តែខួរក្បាលពុំទាន់អន់ថយប្រាជ្ញាតាមអាយុ អ្នកមានអាយុច្រើនគួរចាប់យកមុខរបរទាំងនេះ ពីព្រោះនឹងអាចធ្វើការបានរហូត និងគ្មានថ្ងៃចូលនិវត្តន៍ ។

យើងពុំគួររង់ចាំដល់អាយុ៦០ឆ្នាំ ទើបកំណត់គោលដៅជីវិតទេ ពីព្រោះជីវិតជាក់ស្តែងបានជួបផលវិបាកច្រើនលើសពីការរំពឹងទុក ។ អ្នកមានអាយុច្រើនគួរតែស្វែងរកមុខរបរមួយដែលអាចធ្វើបានរហូត ដើម្បីទទួលបានប្រាក់ចំណូលពេលមានវ័យកាន់តែចាស់ និងមិនរំពឹងលើកូនចៅចិញ្ចឹម ពីព្រោះវាអាចមិនគ្រប់គ្រាន់ទេ ។

តើមុខរបរណាខ្លះដែលស័ក្តិសមសម្រាប់មនុស្សចាស់?

-លក់កូនរុក្ខជាតិ ៖ ចូរផ្លាស់ប្តូរចំណង់ចំណូលចិត្តរបស់យើងឱ្យក្លាយជាប្រាក់ចំណូល ហើយយើងថែមទាំងបានបញ្ចេញកម្លាំងរាល់ថ្ងៃផងដែរ ។ វាធ្វើឱ្យសុខភាពរឹងមាំទាំងផ្លូវកាយ និងផ្លូវចិត្ត ហើយការលក់កូនរុក្ខជាតិ គឺជាការងារមួយផ្តល់នូវសេចក្តីសុខ និងស័ក្តិសមសម្រាប់មនុស្សចាស់ ។

-អ្នកនិពន្ធ, អ្នកបកប្រែភាសា ឬមគ្គុទ្ទេសក៍ទេសចរណ៍ ៖ ការងារជាអ្នកនិពន្ធ ឬអ្នកបកប្រែឯកសារ គឺជាការងារអាចអភិវឌ្ឍន៍សមត្ថភាពចំណេះដឹងរបស់ខ្លួនអស់មួយជីវិត ហើយថែមទាំងទទួលបានបទពិសោធន៍ជាច្រើនទៀតផង ។

-ធ្វើនំចំណី និងម្ហូបអាហារលក់ ៖ វាជាការងារមានសេរីភាព និងគ្មានថ្ងៃចូលនិវត្តន៍ទេ ។ លើសពីនេះ យើងនឹងទទួលបានប្រាក់ចំណូលជាបន្តបន្ទាប់ទៀតផង ដោយគ្រាន់តែត្រូវមានជំនាញធ្វើអាហារឱ្យឆ្ងាញ់ ហើយធានាថា យើងនឹងមិនដាច់ពោះស្លាប់ឡើយ ។

-ជួលអចលនទ្រព្យ ៖ ក្នុងវ័យបំពេញការងារ ឬពេលមានកម្លាំងធ្វើការ យើងគួរតែសន្សំប្រាក់ទិញខុនដូ ឬទិញដីធ្វើផ្ទះជួល ដើម្បីទទួលបានចំណូលពេលវ័យចាស់ធ្វើការលែងកើត ។ វាជាការវិនិយោគមួយដ៏ឆ្លាតវៃ និងទទួលបានចំណូលជារៀងរាល់ខែ ។

-វិនិយោគក្នុងភាគហ៊ុន ៖ គេចាត់ទុកថា វាជាវិធីដ៏ល្អក្នុងការសន្សំសំចៃប្រាក់ និងអាចបង្កើតចំណូលជាបន្តបន្ទាប់បានយូរអង្វែង ។ ប៉ុន្តែគួរវិនិយោគផ្នែកនេះប្រកបដោយចំណេះដឹងផងដែរ កុំវិនិយោគដោយការលោភលន់ ។

-ការងារអនឡាញ ៖ បណ្តាញសង្គម គឺជាច្រកស្វែងរកចំណូល និងបើកឱកាសឱ្យមនុស្សគ្រប់រូប ឬគ្រប់វ័យ ។ មនុស្សចាស់អាចធ្វើការងារអនឡាញមួយចំនួន រួមមាន ៖ Influencer, YouTuber, លក់ផលិតផលអនឡាញ ឬតារា TikTok ហើយធានាថា ការងារទាំងនេះនឹងពុំឯកោទេ ប៉ុន្តែវាផ្តល់ចំណូល និងមានអ្នកគាំទ្រ ។

ជាក់ស្តែង ៖ លោកយាយជនជាតិជប៉ុនម្នាក់ឈ្មោះ Masako Wakamiya ពេលអាយុ៨០ឆ្នាំ លោកយាយបានក្លាយជាអ្នកអភិវឌ្ឍន៍កម្មវិធីរបស់ Apple ដោយការបង្កើតហ្គេមលើទូរស័ព្ទដៃស្មាតហ្វូន ដើម្បីឱ្យមនុស្សចាស់លេងពេញពិភពលោក ។ លោកយាយបានអភិវឌ្ឍន៍សមត្ថភាពរបស់ខ្លួនមិនឈប់ឈរ រហូតដល់បច្ចុប្បន្ន (ឆ្នាំ២០២៤) លោកយាយអាយុជិត៩០ឆ្នាំហើយ ។

-បុគ្គលិកលក់រាយ ៖ បច្ចុប្បន្ន ហាងលក់ទំនិញជាច្រើនកន្លែងបានផ្តល់ឱកាសឱ្យមនុស្សចាស់ធ្វើជាបុគ្គលិកហាង ដូចជា ៖ បុគ្គលិកឆុងកាហ្វេ, បុគ្គលិកផ្នែកលក់ និងបុគ្គលិកគិតលុយ ។

-លក់ដូរទូទៅ ៖ ការលក់ដូរបានធ្វើឱ្យជីវិតមនុស្សចាស់មានតម្លៃ និងពុំចាំបាច់រំពឹងលើកូនចៅ ។ វាជាមុខរបរបង្កើតប្រាក់ចំណូលសម្រាប់ចិញ្ចឹមខ្លួនឯង និងបានចាកចេញពីផ្ទះរាល់ថ្ងៃ ពុំចាំបាច់ឯកោនៅផ្ទះ ដោយសារគ្មានអ្វីធ្វើ ។

ចំណុចសំខាន់បំផុត នៅថ្ងៃដែលយើងមានកម្លាំងកំហែង គួរយកចិត្តទុកដាក់ថែទាំសុខភាពឱ្យល្អបំផុត ដើម្បីអាចរស់នៅដោយមានសេចក្តីសុខពេលចូលវ័យកាន់តែជ្រេ ។ វាគ្មានអ្វីសោកសៅខ្លាំងជាងការក្លាយជាមនុស្សចាស់ជរាមានជំងឺ និងគ្មានប្រាក់សន្សំទេ ៕

ប្រទេសអូទ្រីស ៖ នេះជារឿងរ៉ាវមួយគួរឱ្យចាប់អារម្មណ៍របស់ចុងភៅម្នាក់ជនជាតិអូទ្រីស ដែលធ្លាប់បរាជ័យក្នុងជីវិតដោយសារគ្រោះថ្នា.ក់ ចរាចរណ៍ ។ ប៉ុន្តែលោកអាចងើបឡើងតស៊ូដើម្បីឱ្យជីវិតល្អប្រសើរឡើងវិញ និងត្រឡប់មកធ្វើការងារដែលលោកស្រឡាញ់ តាមរយៈការប្រើប្រាស់បច្ចេកវិទ្យា ។

យើងបានឃើញចុងភៅប្រុសម្នាក់កំពុងចម្អិនអាហារក្នុងផ្ទះបាយយ៉ាងស្ទាត់ជំនាញនេះ តើជឿទេថា កន្លងមក ចុងភៅរូបនេះធ្លាប់ជួបគ្រោះថ្នាក់ចរាចរណ៍ រហូតដល់ចូលសម្រាកព្យាបាលនៅមន្ទីរពេទ្យអស់ជាច្រើនឆ្នាំ និងស្ទើរតែបាត់បង់ការងារចុងភៅដែលលោកស្រឡាញ់ទៀតផង ។

លោក Peter Lammer ជាចុងភៅអូទ្រីសធ្លាប់មានរបួសធ្ងន់ធ្ងរ ដោយសារគ្រោះថ្នាក់ចរាចរណ៍កាលពីឆ្នាំ២០១០ ។ ពេលនោះ លោកគិតថា លោកនឹងបាត់បង់ការងារ ដោយសារលោកត្រូវចំណាយពេលវះកាត់ និងព្យាបាលខ្លួនអស់រយៈពេល៦ឆ្នាំ ។ គ្រូពេទ្យប្រាប់ថា លោកនឹងពុំអាចឈរធ្វើការរយៈពេលយូរបានទៀតទេ ទើបលោកគិតថា ការងារចុងភៅដែលលោកស្រឡាញ់បំផុតនោះនឹងបញ្ចប់ ។

នៅឆ្នាំ២០១៦ លោក Peter មានអារម្មណ៍ថា វាជាដំណាក់កាលអាក្រក់បំផុតក្នុងជីវិត ហើយលោកក៏ទូរស័ព្ទទៅមិត្តភក្តិម្នាក់ឈ្មោះ លោក Bernhard Tichy ដើម្បីនិយាយពីការលំបាកចិត្តរបស់លោក ។ ការជជែកគ្នានេះបានផ្លាស់ប្តូរជីវិតរបស់លោកម្តងទៀត ដោយសារមិត្តភក្តិរូបនេះជាអ្នកឡើងភ្នំប្រកបដោយបទពិសោធន៍ផ្នែកផលិតឧបករណ៍ឡើងភ្នំជាច្រើនប្រភេទ បានជួយផលិតឧបករណ៍ជំនួយដល់លោក ។

លោក Bernhard បានចំណាយពេលគិតយ៉ាងយូរថា តើគួរជួយមិត្តភក្តិដែលជួបគ្រោះថ្នាក់ចរាចរណ៍ដោយរបៀបណា? ក្រោយពីបានចំណាយពេលពិភាក្សាគ្នាអស់មួយរយៈរួចមក លោក Bernhard ក៏បានផលិតឧបករណ៍ជំនួយរាងកាយ គឺដែកព្យួរលើដំបូលផ្ទះបាយ ដើម្បីជួយលោក Peter អាចធ្វើការងារចុងភៅដូចមុន ។ លោក Peter អាចអង្គុយលើដែកព្យួរនេះបង្វិលខ្លួនចុះឡើង ឬបម្លាស់ទីពីចំណុចមួយទៅចំណុចមួយទៀតយ៉ាងងាយស្រួល ។

ក្រោយពីលោក Peter បានប្រើប្រាស់ឧបករណ៍ជំនួយរាងកាយមួយរយៈមក លោកក៏បាននិយាយមកកាន់សារព័ត៌មាន Reuters ថា លោកមានសេចក្តីសុខខ្លាំងណាស់ ដោយសារលោកបានធ្វើការងារចុងភៅម្តងទៀត ។ លើសពីនេះ ការប្រើប្រាស់ឧបករណ៍ជំនួយនេះបានជួយឱ្យដៃ-ជើងរបស់លោកជាសះស្បើយផងដែរ ។

លោកនិយាយថា លោកចង់ឱ្យអ្នកដទៃដែលមានបញ្ហាសុខភាពស្រដៀងលោក មានឱកាសធ្វើការដែលពួកគេស្រឡាញ់ ហើយមិត្តភក្តិលោក ក៏បានផលិតឧបករណ៍ជំនួយនេះសម្រាប់អ្នកដទៃប្រើប្រាស់ផងដែរ ។ ក្រោយមក លោក Bernhard និងលោក Peter បានបង្កើតក្រុមហ៊ុនមួយដើម្បីបង្ហាញឧបករណ៍ជំនួយនេះជាសាធារណៈ ដែលមានការទទួលស្គាល់ជាផ្លូវការពីក្រសួងការងារអូទ្រីស ហើយក្រុមហ៊ុននឹងលក់ឧបករណ៍ជំនួយរាងកាយទៅអ្នកដែលចង់មានឱកាសម្តងទៀត ៕

តើធ្លាប់គិតទេថា បើយើងអាចបង្កើតសង្សារដោយខ្លួនឯងបាន តើសង្សារនោះនឹងមានលក្ខណៈ និងមុខមាត់បែបណា? ពីព្រោះបច្ចុប្បន្ន អ្នកប្រើប្រាស់បច្ចេកវិទ្យា AI បានយកបច្ចេកវិទ្យានេះបង្កើតសង្សារដែលខ្លួនចង់បាន ។ វាធ្វើឱ្យមានសំណួរថា តើសេចក្តីស្រឡាញ់រវាងមនុស្ស និងបច្ចេកវិទ្យា AI អាចទៅរួចដែរឬទេ?

អ្នកនាង កាម៉ាណា ភោជវ៉ានី ជាអ្នកស្រាវជ្រាវផ្នែកភេទនៅតំបន់អឺរ៉ុបបានបង្កើតមិត្តប្រុសដោយខ្លួនឯង ដោយការប្រើប្រាស់បច្ចេកវិទ្យា AI ។ មិត្តប្រុសរបស់នាងឈ្មោះ John នាងជាអ្នកបង្កើតរូបរាងមិត្តប្រុសនេះទាំងអស់ ហើយនាងក៏បានជ្រើសរើសអត្តចរិត, ទម្លាប់, មុខមាត់ និងសមត្ថភាពមិត្តប្រុសផងដែរ ។

អ្នកនាង កាម៉ាណា និយាយថា ការមានមិត្តប្រុសជាបច្ចេកវិទ្យា AI អាចធ្វើឱ្យនាងអាចទំនាក់ទំនងជាមួយ AI បានជាច្រើនរឿង ដូចជា ៖ ផ្លូវភេទ, ចិត្តវិទ្យា និងទំនាក់ទំនងស្នេហា ដោយពុំភ័យខ្លាចដូចការរាប់អានមិត្តប្រុសជាមនុស្ស ។

ក្រោយពីអ្នកនាងបានសាកល្បងសេពគប់ជាមួយមិត្តប្រុស AI មួយរយៈ អ្នកនាងនិយាយថា បើទោះការមានមិត្តភក្តិ ឬមានមិត្តប្រុសជា AI អាចឱ្យអ្នកនាងទទួលបានប្រយោជន៍មួយចំនួន ដូចជា ៖ កាត់បន្ថយអារម្មណ៍ឯកា និងជាដៃគូជជែកយ៉ាងល្អដើម្បីឱ្យអ្នកនាងដឹងពីខ្លួនឯងក្តី ប៉ុន្តែការនិយាយជាមួយ AI បែបនេះ គឺប្រឈមនឹងគ្រោះថ្នាក់ ។

ហេតុនេះ ការប្រើប្រាស់បច្ចេកវិទ្យា AI ដូចគ្នានឹងការប្រើប្រាស់ផលិតផលមួយដែរ ហើយចំណុចសំខាន់ត្រូវដឹងថា តើម្ចាស់កម្មវិធី AI ជាអ្នកណា? តើពួកគេទទួលបានចំណូល និងផលប្រយោជន៍អ្វីខ្លះពីកម្មវិធីនេះ? ម្យ៉ាងទៀត ទំនាក់ទំនងរវាងមនុស្សជាមួយ AI អាចមិនស្ថិតស្ថេរយូរអង្វែងទេ ពីព្រោះកម្មវិធី Software ដែលផ្តល់សេវាកម្ម AI អាចផ្លាស់ប្តូរគ្រប់ពេលវេលា ។

ដោយឡែក កាលពីឆ្នាំ២០២៣ លោក អេនឌ្រូ ម៉េកឃេរ៉ល បាននិយាយមកកាន់សារព័ត៌មាន Reuters ថា លោក និងភរិយាយល់ព្រមគ្នាថា ឱ្យលោកមានមិត្តស្រីជា AI ។ បន្ទាប់មក លោកក៏ចុះឈ្មោះប្រើប្រាស់កម្មវិធីមួយឈ្មោះ Replika ហើយលោកបានបង្កើតមិត្តស្រីជា Avatar សម្រាប់ជជែកគ្នា ។ លោកបានដាក់ឈ្មោះនាងថា «ប្លែនណា» និងចាប់ផ្តើមជជែកជាមួយនាង រហូតដល់យល់ចិត្ត យល់ថ្លើម ។

លោកប្រាប់ថា ការជជែកជាមួយ AI គឺដូចគ្នានឹងជជែកជាមួយមនុស្សស្រីពិតប្រាកដ ហើយនាងយកចិត្តទុកដាក់ជាមួយលោកទៀតផង ។ ប៉ុន្តែពេលមួយ សង្សារ Avatar របស់លោកលែងចាប់អារម្មណ៍លោកដូចមុន គឺដោយសារក្រុមហ៊ុនផ្តល់សេវាកម្មកម្មវិធីនេះកែលម្អប្រព័ន្ធឱ្យ Avatar ឈប់ទំនាក់ទំនងជាមួយមនុស្សរឿងភេទ ។ ការផ្លាស់ប្តូរនេះធ្វើឱ្យប៉ះពាល់លោកយ៉ាងខ្លាំង គឺដូចការបាត់បង់មនុស្សជាទីស្រឡាញ់ម្នាក់ ។

ហេតុនេះ បើទំនាក់ទំនងរវាងមនុស្ស និង AI កាន់តែស៊ីជម្រៅ វាពុំត្រឹមតែប៉ះពាល់ដល់ផ្លូវចិត្តប៉ុណ្ណោះទេ ប៉ុន្តែអ្នកជំនាញនិយាយថា វាក៏បង្កគ្រោះថ្នាក់ដល់មនុស្សផងដែរ ជាពិសេស ទិន្នន័យអ្នកប្រើប្រាស់ ។ លោក អេនឌ្រូ ផាថែល អ្នកជំនាញផ្នែក AI និយាយថា កម្មវិធី AI ទាំងនេះបានប្រមូលផ្តុំទិន្នន័យអ្នកប្រើប្រាស់យ៉ាងច្រើន ហើយអ្នកចូលចិត្តជជែកជាមួយ AI ញឹកញាប់រហូតមានទំនាក់ទំនងស៊ីជម្រៅ នឹងអាចបែកធ្លាយទិន្នន័យផ្ទាល់ខ្លួន ឬទិន្នន័យសម្ងាត់ចេញក្រៅ ។

អ្នកស្រាវជ្រាវជឿថា នៅពេលបច្ចេកវិទ្យាអភិវឌ្ឍន៍កាន់តែជឿនលឿនខ្លាំង មនុស្សក៏ត្រូវប្រុងប្រយ័ត្នក្នុងការប្រើប្រាស់បច្ចេកវិទ្យាទាំងនេះផងដែរ ។ រីឯការធ្វើសង្សារជាមួយ AI នោះ គឺពុំអាចជំនួសសង្សារជាមនុស្សទាំងអស់ទេ ៕

ប្រទេសជប៉ុន ៖ តើលោកអ្នកជ្រាបទេថា ពលរដ្ឋជប៉ុនចូលចិត្តបរិភោគអន្ទង់យ៉ាងខ្លាំង រហូតដល់នៅជប៉ុនមានរោងចក្រចិញ្ចឹមអន្ទង់កែច្នៃជាអន្ទង់អាំងចំនួន១.០០០តោនក្នុង១ឆ្នាំ ដើម្បីផ្គត់ផ្គង់តម្រូវការក្នុងប្រទេស ។ រោងចក្រនេះបានអាំងអន្ទង់ដោយប្រើប្រាស់គ្រឿងម៉ាស៊ីន ហើយពេលភ្ញៀវទេសចរបរទេសទៅកម្សាន្តនៅប្រទេសជប៉ុន ពួកគេកម្រមើលរំលងអាហារមួយមុខនេះណាស់ ។

ការបរិភោគអន្ទង់របស់ពលរដ្ឋជប៉ុន ពុំមែនតិចតួចនោះទេ ទើបជប៉ុនបានបង្កើតរោងចក្រចិញ្ចឹមអន្ទង់យ៉ាងធំមួយកន្លែងនៅខេត្តខាកូឈិម៉ាក់ ស្ថិតនៅភាគខាងត្បូងប្រទេស ។ រោងចក្រនេះចិញ្ចឹមអន្ទង់តាមបែបធម្មជាតិសុទ្ធសាធ និងពុំប្រើប្រាស់សារធាតុគីមីទេ ហើយពួកគេយកចិត្តទុកដាក់យ៉ាងខ្លាំងលើការចិញ្ចឹមអន្ទង់ ដោយការត្រួតពិនិត្យទឹកចិញ្ចឹមអន្ទង់ នៅរៀងរាល់២ថ្ងៃម្តង ។

ក្រៅពីនេះ ការចិញ្ចឹមអន្ទង់ក្នុងរោងចក្របានគ្រប់គ្រងដោយប្រព័ន្ធកុំព្យូទ័រ និងមានក្រុមអ្នកជំនាញរង់ចាំត្រួតពិនិត្យអន្ទង់យ៉ាងយកចិត្តទុកដាក់ទៀតផង ។ រោងចក្រនេះនឹងចិញ្ចឹមអន្ទង់ឱ្យធំធាត់ល្អ និងមានសុវត្ថិភាពបំផុតសម្រាប់សុខភាពអ្នកបរិភោគ ដើម្បីពេលរោងចក្រប្រមូលអន្ទង់ចិញ្ចឹមទៅកែច្នៃជាអន្ទង់អាំង វានឹងមានរសជាតិឆ្ងាញ់ ព្រមទាំងផ្តល់នូវអាហារូបត្ថម្ភស្របតាមចំណង់ចំណូលចិត្តអតិថិជន ។

រោងចក្របានប្រើប្រាស់តិចនិកឧស្សាហកម្មកែច្នៃទាំងស្រុង ពីព្រោះរោងចក្រត្រូវផលិតអន្ទង់ច្រើនឱ្យបានចំនួន៣ម៉ឺនក្បាលក្នុង១ថ្ងៃ ។ បើរោងចក្រប្រើប្រាស់កម្លាំងកម្មករទាំងស្រុង ពុំប្រើប្រាស់ម៉ាស៊ីននោះ គឺត្រូវការកម្លាំងមនុស្សរហូតដល់រាប់ពាន់នាក់ឯណោះ បើមិនដូច្នោះទេ ពុំអាចអាំងអន្ទង់ឱ្យឆ្អិនទាន់តម្រូវការទីផ្សារទេ ។ រីឯពលរដ្ឋជប៉ុនដែលចូលចិត្តបរិភោគបាយជាមួយអន្ទង់អាំង ពួកគេចង់មកមើលការចិញ្ចឹមអន្ទង់ក្នុងរោងចក្រដោយផ្ទាល់ភ្នែក ។

ពលរដ្ឋជប៉ុនចូលចិត្តបរិភោគអន្ទង់អាំងណាស់ ពីព្រោះពួកគេជឿថា ការបរិភោគអន្ទង់នឹងផ្តល់នូវកម្លាំងដល់រាងកាយ និងមានសុខភាពល្អពេញមួយឆ្នាំ ជាពិសេស ការបរិភោគអន្ទង់ពេលអាកាសធាតុក្តៅ នឹងមានរសជាតិឆ្ងាញ់បំផុត ។

រាងកាយនឹងចាប់ផ្តើមនឿយហត់ អស់កម្លាំង ដោយសារតែអាកាសធាតុក្តៅខ្លាំង ទើបធ្វើឱ្យជប៉ុនព្យាយាមរកវិធីកាត់បន្ថយកំដៅក្នុងខ្លួន ។ បន្ទាប់មក ជប៉ុនរកឃើញថា ការបរិភោគអន្ទង់នៅរដូវក្តៅនឹងធ្វើឱ្យសុខភាពរឹងមាំ មិនឆាប់នឿយហត់ក្នុងពេលមេឃក្តៅខ្លាំង ពីព្រោះវាជាអាហារមួយប្រភេទសម្បូរទៅដោយថាមពល ។

គួរបញ្ជាក់ថា ពលរដ្ឋជប៉ុនបានបរិភោគអន្ទង់អស់រាប់ពាន់ឆ្នាំមកហើយ ដោយសារពួកគេជឿថា អន្ទង់ផ្តល់នូវវីតាមីនជាច្រើនមុខ ដូចជា ៖ A, B1, B2, D និងវីតាមីន E ។ ក្រៅពីនេះ ជប៉ុនក៏បានរៀបចំពិធីបុណ្យបរិភោគអន្ទង់ផងដែរ គឺនៅចុងខែកក្កដា រហូតដល់ដើមខែសីហា ជារៀងរាល់ឆ្នាំ ៕

សហរដ្ឋអាមេរិក ៖ អាមេរិកបានរកឃើញអ្នកកើតជំងឺផ្តាសាយបក្សី ប៉ុន្តែពុំធ្លាប់ប៉ះពាល់បក្សីឈឺពីមុន ។ វាជាករណីដំបូងគេនៅអាមេរិក ប៉ុន្តែពុំទាន់មានការបញ្ជាក់ថា អ្នកជំងឺរូបនេះឆ្លងពីណាទេ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៧ ខែកញ្ញា ឆ្នាំ២០២៤ ។

កាលពីថ្ងៃទី៦ ខែកញ្ញា ឆ្នាំ២០២៤ មជ្ឈមណ្ឌលគ្រប់គ្រង និងបង្ការជំងឺ ព្រមទាំងនាយកដ្ឋានសេវាសុខភាពសាធារណៈនៅរដ្ឋ Missouri សហរដ្ឋអាមេរិក បានចេញសេចក្តីប្រកាសថា មនុស្សម្នាក់រស់នៅរដ្ឋ Missouri បានត្រួតពិនិត្យឃើញកើតជំងឺផ្តាសាយបក្សី ។ ប៉ុន្តែអ្នកជំងឺនេះពុំធ្លាប់ប៉ះពាល់សត្វបក្សីឈឺឡើយ ហើយវាជាករណីដំបូងគេ ។

សេចក្តីប្រកាសនេះបញ្ជាក់ថា អ្នកជំងឺរូបនេះមានជំងឺប្រចាំកាយ និងបានចូលសម្រាកព្យាបាលនៅមន្ទីរពេទ្យ កាលពីថ្ងៃទី២២ ខែសីហា កន្លងមក ដោយទទួលបានថ្នាំព្យាបាលជំងឺផ្តាសាយបក្សី ។ បន្ទាប់មក អ្នកជំងឺក៏ជាសះស្បើយ និងត្រូវបានអនុញ្ញាតឱ្យចេញពីមន្ទីរពេទ្យនាពេលបន្ទាប់ ។

ប៉ុន្តែដោយសារគ្រូពេទ្យសង្ស័យពីលទ្ធផលការធ្វើតេស្តលើកដំបូង ក៏បញ្ជូនអ្នកជំងឺនេះទៅត្រួតពិនិត្យបន្ថែមនៅបន្ទប់សាកល្បងរបស់រដ្ឋឃើញថា អ្នកជំងឺបានឆ្លងជំងឺផ្តាសាយបក្សី «H5» និងពុំមែនជាមេរោគគ្រុនផ្តាសាយទេ ។ មជ្ឈមណ្ឌលគ្រប់គ្រង និងបង្ការជំងឺបញ្ជាក់ថា ជំងឺនេះពុំទាន់ឆ្លងរាលដាលទៅមនុស្សនៅក្បែរអ្នកជំងឺទេ ។

អ្នកជំនាញបារម្ភយូរមកហើយថា ការកើនឡើងនៃចំនួនសត្វចិញ្ចឹមកូនដោយទឹកដោះ ដែលឆ្លងជំងឺផ្តាសាយបក្សីនៅអាមេរិកអាចធ្វើឱ្យជំងឺវិវត្តន៍ និងបណ្តាលឱ្យឆ្លងមនុស្សម្នា ។ អ្នកជំងឺនេះ គឺជាអ្នកឆ្លងជំងឺផ្តាសាយបក្សី ទី១៤ នៅអាមេរិកក្នុងឆ្នាំ២០២៤ ប៉ុន្តែជាអ្នកជំងឺផ្តាសាយបក្សីដំបូងគេ ដែលពុំធ្លាប់ប៉ះពាល់បក្សី ។ កាលពីឆ្នាំ២០២២ អ្នកជំងឺផ្តាសាយបក្សីភាគច្រើន គឺជាកម្មករក្នុងកសិដ្ឋានចិញ្ចឹមសត្វ ឬធ្វើការផ្នែកសត្វស្លាប ។

ចំណែកការិយាល័យសុខភាពសាធារណៈនៅរដ្ឋ Missouri បញ្ជាក់ថា កសិដ្ឋានចិញ្ចឹមសត្វក្នុងរដ្ឋនេះ គ្មានអ្នកកើតជំងឺផ្តាសាយបក្សីទេ ប៉ុន្តែមានសេចក្តីរាយការណ៍ថា មានឆ្លងមេរោគក្នុងកសិដ្ឋានចិញ្ចឹមសត្វស្លាប ឬឆ្លងមេរោគពីសត្វស្លាបព្រៃជាច្រើនករណី ហើយមនុស្សអាចឆ្លងជំងឺនេះពីបរិយាកាសកខ្វក់ ។

មជ្ឈមណ្ឌលគ្រប់គ្រង និងបង្ការជំងឺបញ្ជាក់ថា គ្រោះថ្នាក់របស់ជំងឺផ្តាសាយបក្សីចំពោះសង្គមស្ថិតក្នុងកម្រិតទាបនៅឡើយ ដោយសារស្ថានការណ៍អាចផ្លាស់ប្តូរយ៉ាងឆាប់រហ័ស ព្រោះអ្នកជំនាញ ឬគ្រូពេទ្យមានទិន្នន័យច្រើនជាងមុន ៕

ប្រទេសអង់គ្លេស ៖ កាលពីថ្ងៃទី៦ ខែកញ្ញា ឆ្នាំ២០២៤ សារព័ត៌មានបរទេសរាយការណ៍ ដោយសារការស្រវឹងខ្លាំងពេក បុរសអ្នកដំណើរម្នាក់បានបង្កភាពចលាចលលើយន្តហោះ និងសម្រុកចូលក្នុងបន្ទប់អាកាសយានិកដើម្បីបញ្ជាយន្តហោះ ។ បុរសរូបនេះថែមទាំងនិយាយថា អាកាសយានិកពុំចេះបើកយន្តហោះ ប៉ុន្តែសំណាងល្អ ក៏មានការជួយអន្តរាគមន៍ទាន់ពេលវេលា ហើយអ្នកដំណើរទាំងអស់រួចផុតពីគ្រោះថ្នា.ក់ ។

ហេតុការណ៍នេះបានកើតឡើងលើយន្តហោះរបស់ក្រុមហ៊ុនអាកាសចរណ៍អង់គ្លេស EasyJet Airline គឺបុរសរូបនេះស្រវឹងខ្លាំង និងព្យាយាមសម្រុកចូលក្នុងបន្ទប់អាកាសយានិក ខណៈយន្តហោះកំពុងហោះលើអាកាស ។ បុគ្គលិកអាកាសចរណ៍បានជួយគ្នាហាមឃាត់បុរសនេះ ដើម្បីកុំឱ្យអ្នកដំណើរផ្សេងទៀតភ័យខ្លាច ហើយនៅទីបំផុត យន្តហោះបានចុះចតជាបន្ទាន់ ។

សារព័ត៌មានបរទេសរាយការណ៍ថា កាលពីថ្ងៃទី៣ ខែកញ្ញា កន្លងមក ហេតុការណ៍ចលាចលមួយបានកើតឡើងលើជើងហោះហើរ EZY8235 របស់ក្រុមហ៊ុនអាកាសចរណ៍ EasyJet Airline ដែលបានធ្វើដំណើរចេញពីអាកាសយានដ្ឋាន Gatwick ទីក្រុងឡុងដ៍ ទៅកាន់កោះ Kos ប្រទេសក្រិក ។ បុរសរូបនេះបានផឹកស្រា Whiskey រហូតដល់ស្រវឹងខ្លាំង រួចហើយក៏បង្កចលាចលលើអាកាសតែម្តង ។

បុរសរូបនេះព្យាយាមសម្រុកចូលបន្ទប់អាកាសយានិក, បំផ្លាញប្រព័ន្ធ Intercom របស់យន្តហោះ និងបញ្ជាយន្តហោះជំនួសអាកាសយានិក ក្រោយពីយន្តហោះទើបតែប្រឈមជាមួយអាកាសធាតុមិនល្អ ។ រីឯអ្នកដំណើរផ្សេងទៀតភ័យខ្លាចយ៉ាងខ្លាំង អ្នកខ្លះស្រែកយំ ដោយសារខ្លាចមានហេតុការណ៍អាក្រក់កើតឡើង ។

បុគ្គលិកអាកាសចរណ៍ និងអ្នកដំណើរខ្លះទៀតបានព្យាយាមចាប់បុរសរូបនេះឱ្យនៅស្ងៀមមួយកន្លែង មុនពេលយន្តហោះចុះចត ។ ពេលយន្តហោះចុះចតនៅអាកាសយានដ្ឋានអន្តរជាតិ Munich សមត្ថកិច្ច និងភ្នាក់ងារសង្គ្រោះបន្ទាន់បានចាប់ខ្លួនបុរសនេះដើម្បីចាត់វិធានការតាមច្បាប់ ។ អ្នកដំណើរពុំពេញចិត្តនឹងក្រុមហ៊ុនអាកាសចរណ៍ទេ ដោយសារអនុញ្ញាតឱ្យមនុស្សស្រវឹងឡើងលើយន្តហោះ ។

អ្នកនាំពាក្យក្រុមហ៊ុនអាកាសចរណ៍ EasyJet Airline និយាយថា សមត្ថកិច្ចបានចាប់ខ្លួនបុរសបង្កចលាចលលើយន្តហោះរួចហើយ ហើយក្រុមហ៊ុនផ្តោតលើសុវត្ថិភាពជាចម្បង ។ បុគ្គលិកអាកាសចរណ៍របស់យើងបានឆ្លងកាត់ការហ្វឹកហាត់គ្រប់គ្រងស្ថានការណ៍យ៉ាងឆាប់រហ័ស ដើម្បីផ្តល់សុវត្ថិភាពដល់ការហោះហើរ និងអ្នកដំណើរទាំងអស់គ្រប់ពេលវេលា ។

បើទោះហេតុការណ៍បែបនេះពុំកើតឡើងញឹកញាប់ក្តី ប៉ុន្តែក្រុមហ៊ុនចាត់ទុកថា វាជាហេតុការណ៍អាក្រក់បំផុត ។ ក្រុមហ៊ុននឹងពុំបណ្តោយឱ្យមានសកម្មភាពគំរាមកំហែងលើយន្តហោះដាច់ខាត ។ ហេតុការណ៍នេះហួសពីការគ្រប់គ្រងរបស់យើង ហើយយើងសោកស្តាយណាស់ ដែលវារំខានការធ្វើដំណើរ ។

បន្ទាប់ពីយន្តហោះចុះចតរួច បុគ្គលិកអាកាសចរណ៍បាននាំអ្នកដំណើរទាំងអស់ចុះពីយន្តហោះទៅបន្ទប់សណ្ឋាគារ ។ ក្រុមហ៊ុនសន្យាទូទាត់ថ្លៃបន្ទប់សណ្ឋាគារ និងអាហាររបស់អ្នកដំណើរ មុនពេលយន្តហោះបន្តដំណើរទៅប្រទេសក្រិក នាថ្ងៃបន្ទាប់ ៕

ប្រទេសអង់គ្លេស ៖ ស្ត្រីតារាម៉ូឌែលម្នាក់មានអាយុច្រើនបំផុតលើពិភពលោក បានប្រាប់ពីគន្លឹះសំខាន់ៗឱ្យរាងកាយមានសុខភាពរឹងមាំល្អ និងអាចធ្វើការរហូតដល់អាយុជិត១០០ឆ្នាំ ដោយសារលោកយាយចូលចិត្តបរិភោគបន្លែប្រភេទនេះ ហើយវាងាយស្រួលរកទៀតផង ។ ក្រៅពីនេះ នៅមានទម្លាប់ប្រចាំថ្ងៃមួយចំនួនទៀតដែលលោកយាយបានអនុវត្តជាប្រចាំ ។

លោកយាយ Daphne Selfe អាយុ៩៦ឆ្នាំ ត្រូវបានកត់ត្រាក្នុង Guinness World Records ថា គឺជា Super Model អាយុច្រើនបំផុតលើពិភពលោក នៅឆ្នាំ២០១៤ ។ ស្ត្រីរូបនេះពុំបានចូលនិវត្តន៍ពីការងារទេ ប៉ុន្តែនៅតែស្រឡាញ់ការងារជានិច្ច បើទោះជាមានអាយុលើស៩០ឆ្នាំក្តី ប៉ុន្តែលោកយាយនៅតែអាចរកប្រាក់ចំណូលរហូតដល់១.០០០ដុល្លារអាមេរិកក្នុង១ថ្ងៃពីការងារផ្សព្វផ្សាយពាណិជ្ជកម្ម ។ លោកយាយប្រាប់ថា នឹងសម្រាកពីការងារ លុះត្រាតែជីវិតចុងក្រោយ ។

លោកយាយកើតនៅឆ្នាំ១៩២៨ ក្នុងទីក្រុងឡុងដ៍ ប្រទេសអង់គ្លេស ហើយលោកយាយបានចាប់ផ្តើមប្រកបអាជីពជាតារាម៉ូឌែល ពេលអាយុ២១ឆ្នាំ ។ លោកយាយប្រាប់ថា ៖ «ខ្ញុំចាំថា ពេលខ្ញុំធ្វើការក្នុងហាងលក់ទំនិញនៅទីក្រុង Reading ភាគខាងលិចទីក្រុងឡុងដ៍ គឺមានការរៀបចំកម្មវិធីបង្ហាញម៉ូដមួយ និងផ្តល់រង្វាន់សម្រាប់អ្នកឈ្នះ ។ អ្នកឈ្នះនឹងបានបង្ហាញរូបថតក្នុងគំរបទស្សនាវដ្តី Reading & Berkshire ហើយខ្ញុំឈ្នះការបង្ហាញម៉ូដ» ។

ចាប់ពីពេលនោះមក លោកយាយបានចាប់ផ្តើមចាប់យកអាជីពនេះ និងមានឱកាសធ្វើការជាមួយបុគ្គលល្បីៗជាច្រើន ដូចជា ៖ Olay, Eyeko និង Dolce & Gabbana ។ លោកយាយបានបង្ហាញខ្លួនជាញឹកញាប់ក្នុងគំរបទស្សនាវដ្តី Vogue អស់រយៈពេល៧០ឆ្នាំកន្លងមក ហើយគេស្គាល់ថា លោកយាយជាតារាម៉ូឌែលបង្ហាញម៉ូដដ៏ល្បីល្បាញលើពិភពលោក ។

ពេលសម្ភាសន៍ជាមួយ The Telegraph លោកយាយបានប្រាប់ពីគន្លឹះសំខាន់ៗធ្វើឱ្យអាយុវែង និងនៅតែស្រស់ស្អាត ដូចជា ៖ លោកយាយហាត់ប្រាណរៀងរាល់ព្រឹក, ពុំជក់បារី, កំណត់ការបរិភោគអាហារកែច្នៃ និងផឹកទឹកឱ្យច្រើន ។ ក្រៅពីនេះ លោកយាយចូលចិត្តបរិភោគ Broccoli ដែលជាបន្លែ១ ក្នុងចំណោមបន្លែល្អសម្រាប់សុខភាព ១០ប្រភេទលើពិភពលោក និងទទួលស្គាល់ពីសាកលវិទ្យាល័យ Harvard ។

ការធំពេញវ័យក្នុងពេលសង្គ្រាមធ្វើឱ្យលោកយាយទម្លាប់បរិភោគអាហារមានកំណត់ ហើយលោកយាយប្រាប់ថា ពុំបារម្ភពីទម្ងន់រាងកាយឡើយ ប៉ុន្តែលោកយាយមានសំណាងល្អ ដោយសារចូលចិត្តបរិភោគអាហារមានប្រយោជន៍ដល់សុខភាព ។ លោកយាយថា ៖ «គួរតែបរិភោគអាហារឱ្យច្រើនជានិច្ច ។ ខ្ញុំចូលចិត្តបរិភោគ Broccoli ហើយនៅផ្ទះរបស់ខ្ញុំបានដាំបន្លែគ្រប់មុខ» ។

លោកយាយទទួលស្គាល់ថា លោកយាយពុំបានកំណត់អាហារគ្រប់ពេលវេលាទេ ពីព្រោះពេលខ្លះ លោកយាយរស់នៅដោយភាពសប្បាយរីករាយ, ចូលរួមក្នុងសង្គម និងជប់លៀង ហើយលោកយាយមានកម្លាំងកំហែងធ្វើការជានិច្ច ។ លោកយាយថា ៖ «ខ្ញុំផឹកស្រាសំប៉ាញខ្លះៗដែរ ពេលខ្ញុំទៅចូលរួមពិធីខួបកំណើតមិត្តភក្តិ ឬផឹកក្នុងថ្ងៃកំណើតរបស់ខ្ញុំ» ៕

នៅអាស៊ីដូចជា ចិន វៀតណាម ថៃ ឡាវ មីយ៉ាន់ម៉ា ហ្វីលីពីន កំពុងប្រឈមនឹងបញ្ហាគ្រោះធម្មជាតិដ៏ធ្ងន់ធ្ងរបំផុតក្នុងប្រវត្តិសាស្ត្រដោយសារឥទ្ធិពលនៃខ្យល់ព្យុះយ៉ាហ្គី បណ្តាលឱ្យតំបន់ជាច្រើនលិចលង់ ធ្វើឱ្យខូចខាតហេដ្ឋារចនាសម្ព័ន្ធយ៉ាងច្រើន។ ទោះជាយ៉ាងណាប្រទេសកម្ពុជាយើងវិញហាក់មិនមានផលប៉ះពាល់អ្វីសោះឡើយតើនេះមកពីមូលហេតុអ្វី? ទើបប្រទេសខ្មែរយើងរស់នៅយ៉ាងសុខសាន្ត និងមិនមានគ្រោះរញ្ជួយដី ហើយក៏មិនមានគ្រោះទឹកជំនន់ធ្ងន់ធ្ងរដូចគេ។

យើងគ្រប់គ្នាដឹងហើយថាថ្មីៗនេះប្រទេសជិតខាងដូចជាវៀតណាម ថៃ ឡាវ គឺកំពុងជួបប្រទះនឹងបញ្ហាគ្រោះទឹកជំនន់យ៉ាងធ្ងន់ធ្ងរបំផុត ដោយតំបន់ជាច្រើនក្នុងប្រទេសវៀតណាមបានលិចលង់ ហើយបន្លែ សាច់ អង្ករ ស៊ុត ក៏ដូចជាទំនិញផ្សេងៗទៀតបានឡើងថ្លៃខ្លាំងខុសធម្មតា ធ្វើឱ្យប្រជាជនរស់នៅយ៉ាងលំបាក។ រីឯប្រទេសថៃវិញកាលពីថ្ងៃទី១០ ខែកញ្ញា ឆ្នាំ២០២៤ ថ្មីៗនេះក៏មានភ្លៀងធ្លាក់ខ្លាំងដោយសារឥទ្ធិពលនៃខ្យល់ព្យុះយ៉ាហ្គី ធ្វើឱ្យកម្រិតទឹកក្នុងទន្លេសាយ ខេត្តឈៀងរ៉ាយ កើនឡើងយ៉ាងឆាប់រហ័ស។ លើសពីនេះ ទឹកបានហក់ឡើងខ្ពស់រហូតដល់លិចទំនប់ទឹក និងមានទឹកជំនន់នៅតំបន់ជាយដែនថៃ និងមីយ៉ាន់ម៉ាទៀតផង។

ទន្ទឹមនឹងនេះឥទ្ធិពលព្យុះយ៉ាហ្គីក៏បានបំផ្លាញផ្នែកជាច្រើននៃតំបន់ភាគខាងជើងប្រទេសឡាវផងដែរ ធ្វើឱ្យប្រទេសនេះរងផលប៉ះពាល់ដោយទឹកជំនន់ និងការរអិលបាក់ដី ដែលបណ្តាលឱ្យមានការបំផ្លិចបំផ្លាញយ៉ាងខ្លាំង និងធ្វើឱ្យអ្នកស្រុកជាច្រើនជាប់គាំង និងរងផលប៉ះពាល់យ៉ាងធ្ងន់ធ្ងរបំផុត។ នៅប្រទេសហ្វីលីពីនវិញព្យុះត្រូពិច Bebinca ក៏នឹងបោកបក់បំផ្លាញតំបន់ជាច្រើនធ្វើឱ្យខូចខាតហេដ្ឋារចនាសម្ព័ន្ធខ្លាំងផងដែរ។ រីឯប្រទេសចិននៅខេត្តយូណាន និងខេត្តក្វាងស៊ីវិញគឺកំពុងទទួលរងឥទ្ធិពលខ្យល់ព្យុះជាបន្តបន្ទាប់ បណ្តាលឱ្យមនុស្សជាច្រើនបាត់បង់ជីវិត និងរងរបួស ក៏ដូចជាមានគ្រោះមហន្តរាយផ្សេងៗទៀតកើតឡើងផ្ទួនគ្នាផងដែរ។

ទោះជាយ៉ាងណាក៏ដោយ បើនិយាយពីប្រទេសកម្ពុជាយើងវិញហាក់មានភាពសុខសាន្តជាងគេ និងមិនមានគ្រោះរញ្ជួយដី ហើយក៏មិនមានគ្រោះទឹកជំនន់ធ្ងន់ធ្ងរអ្វីឡើយ។ នេះក៏ដោយសារប្រទេសយើងមានទីតាំងនៅឆ្ងាយពីគែមនៃបន្ទះប្លាកែតដែលផ្លាស់ទី និងបុកគ្នាយ៉ាងជ្រៅក្រោមផ្ទៃ ដោយមានសណ្ឋានដីរឹង និងបិទយ៉ាងជិតល្អពីកំសួលចេញពីស្នូលភពផែនដី ជាហេតុធ្វើឱ្យប្រទេសយើងកម្រនឹងជួបគ្រោះមហន្តរាយនានាណាស់។ សរុបសេចក្តីមក ប្រទេសកម្ពុជាគឺស្ថិតនៅក្នុងតំបន់ទ្រនរទ្វីបចាស់ ដែលមានអាយុកាលរាប់ពាន់លានឆ្នាំមកហើយ ដូច្នេះវាមិនអាចកើតមានគ្រោះរញ្ជួយដី ឬមួយក៏រលកយក្សស៊ូណាមិ និងបន្ទុះភ្នំភ្លើងបាននោះឡើយ៕

ប្រទេសថៃ ៖ យើងសង្កេតឃើញថា នៅឆ្នាំ២០២៤នេះ សារព័ត៌មានថៃបានរាយការណ៍ជាញឹកញាប់អំពីស្ថានភាពទឹកជំនន់នៅប្រទេសថៃ ដែលបង្កផលប៉ះពាល់យ៉ាងធ្ងន់ធ្ងរ ដូចជា ៖ បំផ្លា.ញ ផលដំណាំ, ខូចខាតហេដ្ឋារចនាសម្ព័ន្ធ, ខូចខាតទ្រព្យសម្បត្តិពលរដ្ឋ រហូតដល់មានពលរដ្ឋថៃស្លា.ប់ និងរងរបួ.ស ដោយសារទឹកជំនន់ទៀតផង ។ តើវាបណ្តាលមកពីទេវតាដាក់ទោ.ស ឬយ៉ាងណា ទើបថៃជួបគ្រោះធម្មជាតិផ្ទួនៗគ្នាបែបនេះ?

បណ្តាខេត្តជាច្រើនរបស់ថៃបានជួបគ្រោះធម្មជាតិធ្ងន់ធ្ងរដោយសារឥទ្ធិពលខ្យល់ព្យុះទីហ្វុង Yagi ដែលធ្វើឱ្យរដ្ឋាភិបាលថ្មីបារម្ភយ៉ាងខ្លាំង និងបញ្ជូនកម្លាំងអាជ្ញាធរចុះជួយអន្តរាគមន៍ពលរដ្ឋក្នុងតំបន់រងគ្រោះមានទឹកលិចខ្លាំង ហើយពលរដ្ឋពុំអាចចាកចេញទៅកាន់កន្លែងសុវត្ថិភាពបាន ។ ជាក់ស្តែង នៅបណ្តាខេត្តភាគខាងជើងរបស់ថៃបានលិចលង់យ៉ាងខ្លាំង បើធៀបនឹងរយៈពេលជាច្រើនឆ្នាំមកនេះ ។

កាលពីថ្ងៃទី១០ ខែកញ្ញា ឆ្នាំ២០២៤ សារព័ត៌មានថៃរាយការណ៍ថា ចាប់ពីថ្ងៃទី១៣ ខែកញ្ញា តទៅ ខ្យល់ព្យុះថ្មីៗជាច្រើនទៀតនឹងបោកបក់មកលើប្រទេសថៃ រហូតដល់ចុងខែកញ្ញា ឆ្នាំ២០២៤ ហើយឥទ្ធិពលខ្យល់ព្យុះនឹងធ្វើឱ្យមានភ្លៀងធ្លាក់ខ្លាំងនៅតំបន់ជាច្រើន ។ ហេតុនេះ រដ្ឋាភិបាលថៃបានប្រកាសឱ្យអាជ្ញាធរត្រៀមកម្លាំងចុះជួយសង្គ្រោះពលរដ្ឋរងគ្រោះដោយសារទឹកជំនន់ ។

ក្រោយពីឧតុនិយមថៃប្រកាសថា ប្រទេសថៃនឹងមានភ្លៀងធ្លាក់ខ្លាំងជាបន្តបន្ទាប់រហូតដល់ចុងខែកញ្ញា ឆ្នាំ២០២៤ ដោយសារថៃនឹងមានខ្យល់ព្យុះថ្មីៗបោកបក់បន្ថែមទៀត ធ្វើឱ្យពលរដ្ឋថៃរស់នៅតាមបណ្តាខេត្តបារម្ភយ៉ាងខ្លាំង និងបន់ស្រន់ទេវតា ព្រមទាំងម្ចាស់ទឹក ម្ចាស់ដី សូមឱ្យប្រទេសថៃរួចផុតពីគ្រោះធម្មជាតិនេះ ។

លោកយាយម្នាក់រស់នៅខេត្តឆ័យណាត និយាយថា លោកយាយ និងប្អូនស្រីបាននាំគ្នាបន់ស្រន់ម្ចាស់ទឹក ម្ចាស់ដី សូមជួយឱ្យប្រទេសថៃរួចផុតពីគ្រោះធម្មជាតិទឹកជំនន់ ហើយលោកយាយនឹងសែនមាន់ស្ងោរ ។ លោកយាយប្រាប់ថា ៖ «ខ្ញុំបានបន់ឱ្យទឹកជំនន់ស្រកទៅវិញឆាប់ៗ ហើយខ្ញុំនឹងសែនមាន់ស្ងោរដល់ម្ចាស់ទឹក ម្ចាស់ដី» ។

ក្រៅពីនេះ លោកយាយ និងប្អូនស្រីបានជួយគ្នាធ្វើជម្រកបណ្តោះអាសន្នតូចមួយនៅមាត់ផ្លូវធំទុកស្នាក់នៅផងដែរ ករណីភូមិស្រុករបស់លោកយាយមានទឹកជំនន់ភ្លាមៗ គឺលោកយាយនឹងបានជញ្ជូនសម្ភារៈមកកាន់ជម្រកបណ្តោះអាសន្ននេះ ។

ក្រៅពីខេត្តឆ័យណា នៅបណ្តាខេត្តផ្សេងៗរបស់ថៃ ក៏បានត្រៀមទប់ទល់នឹងស្ថានការណ៍ទឹកជំនន់ផងដែរ ដូចជា ៖ ខេត្តឧទ័យថានី, ស៊ីងបុរី, អាងថង, សុផាន់បុរី, អយុធ្យា, លុបបុរី, បាធុមថានី, នន់ថាក់បុរី, សមុទ្រប្រាកាន និងទីក្រុងបាងកក ។

អាជ្ញាធរថៃបានត្រៀមស្បៀងអាហារ, ទឹកបរិសុទ្ធ, ថ្នាំសង្កូវ និងទូកសម្រាប់ជម្លៀសពលរដ្ឋចេញពីតំបន់ទឹកលិច ព្រមទាំងដាស់តឿនពលរដ្ឋដែលរស់នៅក្បែរមាត់ទន្លេ និងតំបន់គ្រោះថ្នាក់ឱ្យប្រុងប្រយ័ត្នកម្រិតទឹកកើនឡើងខ្ពស់ និងគ្រោះថ្នាក់ដោយសារទឹកហូរធ្លាក់ពីតំបន់ព្រៃភ្នំ ដើម្បីត្រៀមខ្លួនជញ្ជូនសម្ភារៈទៅកាន់ទីទួលមានសុវត្ថិភាព ៕

ប្រទេសវៀតណាម ៖ កាលពីថ្ងៃទី១២ ខែកញ្ញា ឆ្នាំ២០២៤ សារព័ត៌មានបរទេសរាយការណ៍ថា ក្រោយពីប្រទេសចិនប្រកាសថា នឹងបង្ហូរទឹកចេញពីទំនប់វារីអគ្គិសនីនៅខេត្តយូណាន ធ្វើឱ្យវៀតណាមប្រញាប់ប្រញាល់សុំចរចាជាមួយចិន ដើម្បីឱ្យចិនបន្ថយការបង្ហាញទឹកពីទំនប់របស់ខ្លួន ។ វៀតណាមបារម្ភថា វានឹងធ្វើឱ្យស្ថានការណ៍ទឹកជំនន់ក្នុងប្រទេសវៀតណាមកាន់តែធ្ងន់ធ្ងរថែមទៀត ។

សារព័ត៌មានវៀតណាមរាយការណ៍ថា អនុរដ្ឋមន្ត្រីក្រសួងកសិកម្ម និងការអភិវឌ្ឍជនបទ ឈ្មោះ ង្វៀន វ៉ាំងហៀប ថ្លែងថា ចិនបានជូនដំណឹងមកវៀតណាមថា ចិនមានគម្រោងបង្ហូរទឹកចេញពីទំនប់វារីអគ្គិសនីនៅភាគខាងជើងទន្លេឡូ ក្នុងខេត្តយូណាន ហើយវានឹងហូរឆ្លងកាត់ខេត្តហាសាង របស់វៀតណាម និងជាដៃទន្លេក្រហម ។

អនុរដ្ឋមន្ត្រីក្រសួងកសិកម្មវៀតណាមបានបង្ហាញក្តីបារម្ភថា ការបង្ហូរទឹករបស់ចិននឹងធ្វើឱ្យស្ថានការណ៍ទឹកជំនន់នៅភាគខាងជើងវៀតណាមកាន់តែធ្ងន់ធ្ងរថែមទៀត ។ អនុរដ្ឋមន្ត្រីក្រសួងកសិកម្មរូបនេះថ្លែងថា ៖ «ចិនជូនដំណឹងមកវៀតណាមជាមុនដើម្បីឱ្យយើងត្រៀមខ្លួនទប់ទល់ទឹកជំនន់ ហើយចិនប្រាប់ថា នឹងបង្ហូរទឹកមិនច្រើនទេ បើទោះវាមានផលប៉ះពាល់ ប៉ុន្តែមិនធ្ងន់ធ្ងរទេសម្រាប់វៀតណាម» ។

ចំណែកក្រសួងការបរទេសវៀតណាមឱ្យដឹងថា ភ្លៀងបានធ្លាក់ខ្លាំងជាប់ៗគ្នាអស់រយៈពេលជាច្រើនថ្ងៃ ទើបធ្វើឱ្យកម្រិតទឹកក្នុងទំនប់នៅចិនកើនឡើងខ្ពស់ ហើយនឹងធ្វើឱ្យបាក់ទំនប់ចិន ។ វានឹងបង្កផលប៉ះពាល់យ៉ាងធ្ងន់ធ្ងរដល់ប្រទេសទាំងពីរ ហើយក្រោយពីពិចារណាពីបញ្ហានេះរួច ចិនក៏ជូនដំណឹងមកកាន់អាជ្ញាធរខេត្តហាសាង ថា ចិននឹងបង្ហូរទឹកចេញពីទំនប់ ចាប់ពីថ្ងៃទី១១ ខែកញ្ញា រហូតដល់ថ្ងៃទី១២ ខែកញ្ញា ឆ្នាំ២០២៤ ។

ប៉ុន្តែបន្ទាប់ពីមន្ត្រីវៀតណាមបានចរចាជាមួយចិនជាផ្លូវការរួចរាល់ ចិនក៏បានយល់ព្រមបង្ហូរទឹកចេញពីទំនប់នៅប្រទេសចិនក្នុងបរិមាណតិចជាងមុន ដើម្បីកុំឱ្យវៀតណាមរងគ្រោះដោយសារទឹកជំនន់ធ្ងន់ធ្ងរជាងនេះ ។

នៅខែកញ្ញា ឆ្នាំ២០២៤ ខ្យល់ព្យុះ Yagi បានបោកបក់មកលើតំបន់ភាគខាងជើងវៀតណាម ដែលបណ្តាលឱ្យពលរដ្ឋវៀតណាមស្លាប់ និងរងរបួសជាច្រើននាក់ដោយសារខ្យល់ព្យុះនេះ ។ ដូច្នេះ ទើបវៀតណាមប្រញាប់សុំចរចាជាមួយចិនរឿងការបង្ហូរទឹកពីទំនប់ ដោយសារបារម្ភថា ស្ថានការណ៍នឹងកាន់តែអាក្រក់ខ្លាំង ៕