ប្រទេសថៃ ៖ ម្ចាស់កសិដ្ឋានចិញ្ចឹមក្រពើមួយកន្លែងនៅខេត្តឡាំផូន ប្រទេសថៃ បានសម្រេចចិត្តកម្ចា.ត់ សត្វក្រពើទុកធ្វើពូជទាំងអស់របស់ខ្លួន ដែលបានចិញ្ចឹមអស់រយៈពេល១៧ឆ្នាំមកហើយ ។ ម្ចាស់កសិដ្ឋានបញ្ជាក់ថា នៅឆ្នាំ២០២៤នេះ មានភ្លៀងធ្លាក់ខ្លាំងពេក និងបារម្ភខ្លា.ច មានទឹកជំនន់លិចទ្រុង ហើយក្រពើរួចពីទ្រុងទៅខាំអ្នកស្រុកធ្វើឱ្យកើតរឿងក្តៅក្រហាយ ។

កាលពីថ្ងៃទី២៤ ខែកញ្ញា ឆ្នាំ២០២៤ ហ្វេសប៊ុកមួយឈ្មោះ «Natthapak Khumkad» ជាម្ចាស់កសិដ្ឋានចិញ្ចឹមក្រពើនៅខេត្តឡាំផូន បានបង្ហោះរូបភាពសកម្មភាពចាប់ក្រពើពូជចេញពីទ្រុង និងនិយាយថា ៖ «ខ្ញុំបានសម្រេចចិត្តចាប់ក្រពើទុកធ្វើពូជដែលចិញ្ចឹមអស់រយៈពេល១៧ឆ្នាំ ចេញពីអាងចិញ្ចឹមទាំងអស់ ។ រីឯមូលហេតុ គឺដោយសារភ្លៀងធ្លាក់ខ្លាំងនៅឆ្នាំនេះ ទើបខ្ញុំប្រញាប់សម្រេចចិត្តឱ្យបានលឿនបំផុត» ។

ម្ចាស់កសិកដ្ឋានចិញ្ចឹមក្រពើបន្តថា ៖ «យើងការពារប្រសើរជាងការដោះស្រាយបញ្ហានៅពេលក្រោយ ហើយខ្ញុំបានពិភាក្សាជាមួយក្រុមគ្រួសារ និងសាច់ញាតិរួចអស់ហើយ គឺពួកយើងបានឯកភាពគ្នា ។ តាមពិត ខ្ញុំពុំចង់កម្ចាត់ក្រពើទាំងនេះទេ តែដោយសារខ្ញុំបានពិចារណាពីកត្តាជាច្រើនអស់មួយរយៈធំ ទើបសម្រេចចិត្តបែបនេះ វាជាជម្រើសល្អបំផុតសម្រាប់ពេលនេះ ។ នៅឆ្នាំ២០២៥ ខ្ញុំនឹងពុំរក្សាទុកពងក្រពើ ឬបង្កើតកូនក្រពើទៀតទេ ហើយខ្ញុំជឿថា ក្រោយភ្លៀងមេឃនឹងស្រឡះមិនខាន» ។

លោក Natthapak Khumkad អាយុ៣៧ឆ្នាំ បន្តថា កសិដ្ឋានចិញ្ចឹមក្រពើនេះស្ថិតនៅភូមិសាន់ខាក់យ៉ម ឃុំម៉ាក់ខឿជេ ស្រុកមឿងឡាំផូន ខេត្តឡាំផូន ហើយគ្រួសារលោកបានរកស៊ីលក់សាច់គោ និងសាច់ជ្រូកអាំងជាច្រើនឆ្នាំហើយ ។ ដូច្នេះ គ្រួសារលោកក៏ទិញក្រពើមកចិញ្ចឹមអស់រយៈពេល១៧ឆ្នាំហើយ ដើម្បីឱ្យវាស៊ីគ្រោងឆ្នឹងគោ និងជ្រូក ។ មុនដំបូង លោកចិញ្ចឹមក្រពើត្រឹមតែ១២៥ក្បាលប៉ុណ្ណោះ ហើយពេលនេះ វាបានកើតកូនចៅរហូតដល់ជាង៥០០ក្បាល ។

លោកបន្ថែមថា ពេលមានភ្លៀងធ្លាក់ខ្លាំងជាច្រើនថ្ងៃបណ្តាលឱ្យបរិវេណទ្រុងក្រពើមានទឹកលិច ហើយលោកបារម្ភខ្លាចក្រពើធំៗរួចពីទ្រុងទៅខាំអ្នកស្រុកបង្កការក្តៅក្រហាយដល់លោក ។ ហេតុនេះ លោកក៏សម្រេចចិត្តកម្ចាត់ក្រពើពូជចំនួន៩០ក្បាលដែលមានអាយុច្រើន ហើយនៅសល់តែក្រពើតូចៗប្រមាណ៥០០ក្បាលក្នុងទ្រុង ។ លោកនឹងចាប់ផ្តើមចិញ្ចឹមជាថ្មីពេលផុតរដូវភ្លៀង ហើយពេលនេះ លោកចង់ឱ្យអ្នកស្រុកមានសុវត្ថិភាពបំផុត ៕

ឡាវក៏ជាប្រទេសកាន់សាសនាព្រះពុទ្ធដូចយើងដែរ ក្នុងអំឡុងខែភ្ជុំនេះមនុស្សម្នាភាគច្រើតែងជួបជុំគ្នាធ្វើបុណ្យ ធ្វើទាន និងដើរកម្សាន្តទៅតាមតំបន់នានា។ ក្នុងនោះក៏មានអ្នកខ្លះចង់ដើរលេងទៅក្រៅប្រទេសផងដែរ ដូច្នេះយើងសូមណែនាំឱ្យទៅប្រទេសឡាវ ព្រោះប្រទេសនេះគឺមានទំនៀមទំលាប់ស្រដៀងនឹងខ្មែរយើង។ ឡាវគឺជាប្រទេសដែលសម្បូរទៅដោយធនធានធម្មជាតិជាច្រើន ជាពិសេសគឺតំបន់ទេសចរណ៍ផ្ទាល់តែម្ដង សុទ្ធតែស្អាត និងមានបរិយាសកាសស្ងប់ស្ងាត់ រួមទាំងស្រស់ស្រាយទៀតផង។ លើសពីនេះ ក្រៅពីមានតំបន់ទេសចរណ៍ធម្មជាតិស្អាតបែបបុរាណ ប្រទេសឡាវក៏មានការចំណាយលើការស្នាក់នៅ និងអាហារហូបចុក ក្នុងតម្លៃសមរម្យផងដែរ។ ខាងក្រោមនេះគឺជាកន្លែងទាំង ៥ ដែលស្អាតខ្លាំងបំផុតក្នុងប្រទេសឡាវ៖

១.ឧទ្យានព្រះពុទ្ធ Xieng Khuan៖ ឧទ្យានព្រះពុទ្ធ Xieng Khuan ត្រូវបានសាងសង់ឡើងក្នុងឆ្នាំ ១៩៥៨ មានចម្ងាយប្រហែល ២៥ គីឡូម៉ែត្រពីកណ្តាលនៃរដ្ឋធានីវៀងច័ន្ទ។ ឧទ្យាននេះមានចម្លាក់ និងស្នាដៃសិល្បៈជាង ២០០ ត្រូវបានធ្វើឡើងពីបេតុងពង្រឹងក្នុងទំហំចាប់ពីតូចទៅធំ រួមមានចម្លាក់ព្រះពុទ្ធ ព្រះហិណ្ឌូមួយចំនួន និងរូបចម្លាក់មនុស្ស បិសាច សត្វ និងសត្វទេវកថាមួយចំនួនតូចផងដែរ។

២.ប្រាសាទវត្តភូ៖ ប្រាសាទវត្តភូ (Wat Phu) ជាសម្បត្តិបេតិកភណ្ឌពិភពលោករបស់អង្គការយូណេស្កូ ស្ថិតនៅភាគខាងត្បូងប្រទេសឡាវ។ ប្រាសាទនេះជាកន្លែងគោរពបូជាចំណាស់បំផុតមួយក្នុងប្រទេស ដែលមានទីតាំងនៅជើងភ្នំភូកៅ ដែលត្រូវបានគេចាត់ទុកជាភ្នំពិសិដ្ឋ។ វត្តភូគឺជាប្រាសាទពុទ្ធសាសនា ប៉ុន្តែពេលទៅដល់ទីតាំងនោះអ្នកក៏បានឃើញសារីរិកធាតុនៃប្រវត្តិសាស្រ្តហិណ្ឌូផងដែរ។

៣.ប្រាសាទព្រះធាតុហ្លួង៖ ប្រាសាទព្រះធាតុហ្លួង (he Pha That Luang Temple) ស្ថិតនៅទីក្រុងវៀងច័ន្ទន៍ ប្រទេសឡាវ គឺជាកន្លែងប្រវត្តិសាស្ត្រ និងវប្បធម៌ដ៏សំខាន់មួយរបស់ប្រទេស។ ប្រាសាទព្រះធាតុហ្លួង ឬហ្លួងព្រះធាតុ គឺជាកន្លែងគោរពបូជាព្រះឆ្អឹងទ្រូងរបស់ព្រះសាម្មាសាមពុទ្ធ ហើយនៅជិតប្រាសាទនេះភ្ញៀវទេសចរក៏អាចដើរទស្សនា វិមានប៉ាតស៊ៃ វត្តស៊ីសាកេត វត្តព្រះកែវ និងសួនព្រះពុទ្ធបានទៀតផង។

៤.ច្រកទ្វារជ័យជំនះ Patuxay៖ Patuxay គឺជាកន្លែងសំខាន់នៃរដ្ឋធានីវៀងច័ន្ទ ដោយវាជាការរំឮកដល់ប្រជាជនឡាវដែលបានពលីជីវិត នៅក្នុងសង្រ្គាមមុនបដិវត្តកុម្មុយនិស្ត។ កន្លែងនេះពីមុនត្រូវបានគេស្គាល់ថាជាវិមាន Anousavary ដែលត្រូវបានសាងសង់ពីឆ្នាំ ១៩៦២ ដល់ឆ្នាំ ១៩៦៨ ហើយក៏ជាបេតិកភណ្ឌវប្បធម៌ពិភពលោកផងដែរ។

៥.ទឹកធ្លាក់ Kuang Si៖ ទឹកធ្លាក់ Kuang Si មានចម្ងាយជិត ៣០ គីឡូម៉ែត្រពីភាគខាងត្បូងនៃទីក្រុងហ្លួងព្រះបាង ជាមួយទឹកធ្លាក់ថ្មកំបោរ កម្ពស់ ៤ ជាន់ ឬប្រហែល ៧០ម៉ែត្រ និងហ៊ុព័ទ្ធដោយភ្នំ ព្រៃឈើ បង្កើតបានជារូបភាពធម្មជាតិដ៏ស្រស់ស្អាតបំផុតមិនធ្លាប់មាន៕

ក្រុមហ៊ុនចិន Honor បានប្រកាសចេញស្មាតហ្វូនបត់ Magic V3 ដែលមានទំហំ 4.35 mm ពេលបើក និង 9.2 mm ពេលបត់ ជាមួយទម្ងន់ 226 ក្រាម គឺជាស្មាតហ្វូនដែលមានអេក្រង់បត់បានស្តើងបំផុតនៅលើពិភពលោក។

ស្មាតហ្វូនបត់ Magic V3 របស់ Honor គឺបានយកឈ្នះស្មាតហ្វូនបត់ Galaxy Z Fold 6 របស់ Samsung ក្លាយជាស្មាតហ្វូនដែលមានអេក្រង់បត់បានស្តើងបំផុតនាពេលបច្ចុប្បន្ននេះ។ វាត្រូវបានណែនាំនៅក្នុងប្រទេសចិនកាលពីខែកក្កដា ប៉ុន្តែថ្មីៗនេះវាក៏ត្រូវបានណែនាំទៅកាន់ទីផ្សារអន្តរជាតិតាមរយៈការតាំងពិព័រណ៍បច្ចេកវិទ្យា IFA 2024 ដែលធ្វើឡើងនៅថ្ងៃទី ៦-១០ ខែកញ្ញានៅទីក្រុងប៊ែរឡាំងប្រទេសអាល្លឺម៉ងផងដែរ។

Magic V3 មិនត្រឹមតែជាទូរស័ព្ទដែលអាចបត់បានស្ដើងបំផុតក្នុងពិភពលោកប៉ុណ្ណោះទេ វាក៏ជាស្មាតហ្វូន Android ដ៏ល្បីមួយផងដែរ ជាមួយនឹងលក្ខណៈពិសេសល្អបំផុតមួយចំនួនដែលអ្នកអាចទទួលបាន។ Magic V3 គឺស្តើងជាង Galaxy Z Fold 6 រហូតដល់ ៣០% ឯណោះដូច្នេះដើម្បីសម្រេចបាននូវភាពស្តើងបែបនេះ ក្រុមហ៊ុន Honor បាននិយាយថា ខ្លួនបានប្រើប្រាស់ឧបករណ៍សំខាន់ៗ និងទំនើបៗជាច្រើនដើម្បីផលិតស្មាតហ្វូនដ៏អស្ចារ្យមួយនេះ។

ទោះបីជាការរចនា និងការកំណត់រចនាសម្ព័ន្ធដ៏ល្អឥតខ្ចោះរបស់វាក៏ដោយ ក៏ Honor ដាក់តម្លៃ Magic V3 ទាបជាង Galaxy Z Fold6 របស់ Samsung ដែរ។ ដូច្នេះសម្រាប់តម្លៃស្មាតហ្វូនបត់ Honor Magic V3 គឺ ១,៩៩៩ អឺរ៉ូ (ប្រហែលជាង ២២០០ ដុល្លារអាមេរិក) ខណៈ Samsung Galaxy Z Fold6 វិញគឺមានតម្លៃ ២,៩៩៩ អឺរ៉ូ (ប្រហែលជាង ២៤០០ ដុល្លារអាមេរិក) ទោះជាយ៉ាងណាដើម្បីប្រកួតប្រជែងជាមួយក្រុមហ៊ុនចិន Honor ក្រុមហ៊ុន Samsung បច្ចុប្បន្នក៏បានកែសម្រួលតម្លៃទូរស័ព្ទរបស់ខ្លួនមកស្មើនឹងដៃគូប្រកួតប្រជែងខ្លួនផងដែរគឺ ១,៩៩៩ អឺរ៉ូ (ប្រហែលជាង ២២០០ ដុល្លារអាមេរិក) ដូចគ្នា៕

ជាទូទៅសត្វផេនឃ្វីនច្រើនតែមានពណ៌ខ្មៅលាយស ហើយតែងតែរកឃើញពួកវានៅតំបន់ទឹកកក ទោះជាយ៉ាងណាកាលពីអំឡុងឆ្នាំ ២០២១ គេបានប្រទះឃើញសត្វផេនឃ្វីនមួយក្បាលមានពណ៌លឿងខុសប្លែកពីគេ ជាសត្វដ៏កម្របំផុតនៅតំបន់អង់តាក់ទិក ដែលព្រឹត្តិការណ៍ដ៏អស្ចារ្យមួយនេះបានទាក់ទាញការអារម្មណ៍យ៉ាងខ្លាំងពីអ្នកវិទ្យាសាស្ត្រ និងអ្នកស្រឡាញ់សត្វព្រៃជុំវិញពិភពលោក។ កាលពីឆ្នាំ ២០២១ អ្នកថតរូបសត្វព្រៃ Yves Adams ម្នាក់បានធ្វើដំណើរទៅកាន់រដ្ឋ Georgia ភាគខាងត្បូងនៃមហាសមុទ្រប៉ាស៊ីហ្វិក មានឱកាសចាប់យកសត្វភេនឃ្វីនដ៏កម្រមួយក្បាលពណ៌លឿងភ្លឺ។

Adams បាននិយាយថា នៅពេលដែលសត្វភេនឃ្វីនចម្លែកហែលទៅជិតក្រុម មនុស្សគ្រប់គ្នានៅក្នុងបេសកកម្មនោះគឺមានការស្រឡាំងកាំងយ៉ាងខ្លាំង ហើយក៏បាននាំគ្នាចាប់ផ្តើមថតរូបភ្លាមៗ។ ទោះជាយ៉ាងណាក៏ដោយ រូបរាងរបស់សត្វនេះមានរយៈពេលតិចជាងមួយនាទី មុនពេលវាបាត់ចូលទៅក្នុងហ្វូងសត្វភេនឃ្វីនរាប់ពាន់ក្បាលផ្សេងទៀត។ មូលហេតុចម្បងដែលសត្វភេនឃ្វីនមួយក្បាលនេះមានពណ៌លឿងខុសប្លែកពីសត្វភេនឃ្វីនដ៏ទៃ គឺដោយសារតែការផ្លាស់ប្តូរហ្សែនដ៏កម្រមួយ។

ការផ្លាស់ប្តូរនេះប៉ះពាល់ដល់ការផលិតសារធាតុ melanin ដែលបង្កើតជាពណ៌ខ្មៅ និងពណ៌សនៅក្នុងរោមបក្សី។ ទោះជាយ៉ាងណាការផ្លាស់ប្តូរនេះគឺកម្រមានណាស់ លុះត្រាឪពុកម្តាយទាំងពីរមានហ្សែន recessive ដូចគ្នា ហើយវាក៏មិនមែនជារឿងថ្មីទាំងស្រុងនៅក្នុងពិភពសត្វដែរ។ អ្នកវិទ្យាសាស្ត្រ Allison Schulz បាននិយាយថា បាតុភូតដែលសត្វភេនឃ្វីននេះជួបប្រទះគឺ vitiligo ដែលជាជំងឺម្យ៉ាងធ្វើឱ្យរាងកាយមិនអាចសំយោគសារធាតុពណ៌មេឡានីនបានពេញលេញ។ តាមរបៀបនេះ បក្សីត្រូវរក្សានូវសារធាតុពណ៌លឿងមួយចំនួននៅក្នុងរោមរបស់វា។ vitiligo ក៏អនុញ្ញាតឱ្យសារធាតុពណ៌មួយចំនួននៅដដែលផងដែរ នេះមានន័យថាសត្វភេនឃ្វីននៅតែរក្សារោមពណ៌សរបស់វាដូចធម្មតា ប៉ុន្តែមិនមានពណ៌សទាំងស្រុងនោះទេ។

ទោះជាយ៉ាងណាជំងឺនេះមិនរីករាលដាលដល់សត្វភេនឃ្វីនដទៃទៀតឡើយ។ ថ្វីត្បិតតែសត្វភេនឃ្វីនពណ៌លឿងនេះបង្កើតការចាប់អារម្មណ៍ និងគួរឱ្យភ្ញាក់ផ្អើលយ៉ាងខ្លាំងក៏ដោយ ការមានពណ៌រោមផ្សេងគ្នាប្រហែលជាមិនផ្តល់អត្ថប្រយោជន៍ដល់វានោះទេ។ ភាពខុសគ្នានៃពណ៌នេះអាចនាំមកនូវគុណសម្បត្តិ និងគុណវិបត្តិដល់សត្វនីមួយៗ នៅក្នុងធម្មជាតិ ពណ៌របស់សត្វភេនឃ្វីនគឺជាកត្តាសំខាន់ដែលជួយពួកគេលាក់បាំងពីសត្រូវ។ រោមខ្មៅរបស់ពួកវាជួយឱ្យពួកវាលាយឡំជាមួយសមុទ្រនៅពេលមើលពីខាងលើ ខណៈក្បាលពោះពណ៌សជួយឱ្យពួកវាលាក់ខ្លួនពីសត្រូវដែលហែលទឹកនៅក្រោមទឹក។ ដូច្នេះហើយ ពណ៌លឿងដ៏ភ្លឺបែបនេះនឹងជួយឱ្យសត្រូវរកឃើញពួកវាបានយ៉ាងងាយស្រួល។

លើសពីនេះ ការមានពណ៌រោមខុសៗគ្នា ក៏អាចបណ្តាលឱ្យសត្វភេនឃ្វីននេះ ត្រូវបានគ្នីគ្នាវាចៀសវាងផងដែរ។ សរុបសេចក្តីមក របកគំហើញនេះមិនត្រឹមតែគួរឱ្យភ្ញាក់ផ្អើលប៉ុណ្ណោះទេ ប៉ុន្តែថែមទាំងបើកសំណួរជាច្រើនអំពីការអភិវឌ្ឍន៍ និងសារៈសំខាន់នៃការផ្លាស់ប្តូរហ្សែនជាក់លាក់នៅក្នុងពិភពសត្វផងដែរ។ ដូច្នេះការរកឃើញសត្វភេនឃ្វីនពណ៌លឿងនៅក្នុងទ្វីបអង់តាក់ទិក គឺជាបាតុភូតដ៏គួរឱ្យកត់សម្គាល់មួយ មានតែពេលវេលា និងការសិក្សាបន្ថែមទៀតទេដែលអាចផ្តល់ចម្លើយត្រឹមត្រូវអំពីការអភិវឌ្ឍន៍អនាគតរបស់សត្វភេនឃ្វីនមួយក្បាលនេះ៕

ក្រដាសមួយសន្លឹកដែលមានរូបថតនិងប្រវត្តិរូបសង្ខេបរបស់ Steve Jobs និង Bill Gates កាលពីពួកគេនៅអាយុ ១៨ ឆ្នាំ បានកំពុងរីករាលដាលខ្លាំងពេញបណ្តាញសង្គម នៅពេលដែលបុគ្គលល្បីៗជាច្រើនបានសម្រុកដេញថ្លៃក្រដាសនីមួយៗក្នុងតម្លៃខ្ពស់កប់ពពក។

យោងតាម Business Insider នៅពេលដែលអ្នកយកព័ត៌មានជនជាតិអាមេរិកម្នាក់ឈ្មោះ Jon Erlichman បានបង្ហោះក្រដាសពីរសន្លឹកនៅក្នុងបណ្តាញសង្គម ដោយក្រដាសទាំងនោះគឺជា CV របស់ Steve Jobs ដែលជាសហស្ថាបនិក Apple ក្នុងឆ្នាំ ១៩៧៣ និងចៅហ្វាយនាយ Microsoft លោក Bill Gates ក្នុងឆ្នាំ ១៩៧៤ នៅពេលដែលពួកគេទាំងពីរមានអាយុ ១៨ ឆ្នាំ បានកំពុងផ្ទុះការចាប់អារម្មណ៍ខ្លាំងនៅលើអ៊ីនធឺណិត ហើយក៏មានគេសុំដេញថ្លៃផងដែរ។

ទោះជាយ៉ាងណានៅក្នុង CV របស់អ្នកទាំងពីរ គេបានកត់សម្គាល់ឃើញថា ស្ថាបនិកក្រុមហ៊ុន Apple លោក Steve Jobs បានសរសេរឈ្មោះខុស ដោយលោកបានសរសេរឈ្មោះ Steve Jobs តាមពិតទៅឈ្មោះពិតរបស់លោកគឺ «Steven Jobs» ទេ ប៉ុន្តែនៅពេលដែលលោកសរសេរខុសបែបនេះ ឈ្មោះ Steve Jobs ក៏ត្រូវបានគេយកទៅប្រើប្រាស់ជាផ្លូវការតែម្តង។ ដូច្នេះពាក្យសុំការងារដំបូងបង្អស់របស់ Steve Jobs ត្រូវបានគេដេញថ្លៃដោយជោគជ័យក្នុងតម្លៃ ២២២,៤០០ ដុល្លារអាមេរិក ខណៈប្រវត្តិរូបសង្ខេបរបស់លោក Bill Gates វិញបច្ចុប្បន្នត្រូវបានដាក់តាំងបង្ហាញនៅសារមន្ទីរកុំព្យូទ័រមួយក្នុងទីក្រុង Seattle ប្រទេសសហរដ្ឋអាមេរិក។

ប្រវត្តិរូបសង្ខេបរបស់អ្នកទាំងពីរគឺគួរឱ្យចាប់អារម្មណ៍ខ្លាំងមែនទែន ដោយលោក Bill Gates បានសរសេរក្នុង CV ថាលោកជានិស្សិតនៅសាកលវិទ្យាល័យ Harvard អាយុ ១៨ ឆ្នាំមានជំនាញអក្សរសាស្រ្តអង់គ្លេស ក៏ដូចជាមានកម្ពស់ ១៧៨ សង់ទីម៉ែត្រ និងទម្ងន់ ៥៩ គីឡូក្រាម នៅលីវនិងជាពលរដ្ឋអាមេរិក ដោយអាចធ្វើការជាមួយប្រព័ន្ធម៉ាស៊ីនមេ និងភាសាសរសេរកម្មវិធីផ្សេងៗគ្នាជាច្រើន។ ខណៈលោក Steve Jobs វិញបានសរសេរក្នុង CV ថាលោកមានជំនាញកុំព្យូទ័រ ជាពិសេសបច្ចេកវិទ្យា និងការរចនា រួមជាមួយសមត្ថភាពពិសេសផ្នែកអេឡិចត្រូនិច ហើយនៅក្នុង CV នោះលោកបានដាក់ពាក្យទៅផ្នែក “បច្ចេកទេសរចនាឌីជីថល” ៕

អ្នកដំណើរតាមយន្តហោះទាំងអស់ចាំបាច់ត្រូវប្រើប្រាស់វ៉ាលិសធ្វើដំណើរសម្រាប់ដាក់អីវ៉ាន់ មិនថាការហោះហើរក្នុងប្រទេស ឬក្រៅប្រទេស ហើយពួកគេពុំបានចាប់អារម្មណ៍លើពណ៌វ៉ាលិសទេ ។ ប៉ុន្តែក្រុមហ៊ុនអាកាសចរណ៍ Ryanair បានណែនាំឱ្យអ្នកដំណើរចៀសវាងប្រើប្រាស់វ៉ាលិសមានពណ៌ទាំងនេះ ដើម្បីកុំឱ្យមានការយល់ច្រឡំ ឬបាត់បង់ ។

ក្រុមហ៊ុនអាកាសចរណ៍ Ryanair របស់ប្រទេសអៀរឡង់ បញ្ជាក់ថា អ្នកដំណើររហូតដល់ជាង៩៩.៩% បានជ្រើសរើសវ៉ាលិសធ្វើដំណើរ ចំនួន៣ពណ៌ រួមមាន ៖ ពណ៌ខ្មៅ, ពណ៌ប្រផេះ និងពណ៌ទឹកសមុទ្រ ។ ពណ៌វ៉ាលិសទាំង៣នេះ ពេញនិយមបំផុតនៅលើពិភពលោក ទើបអ្នកដំណើរត្រូវចំណាយពេលយូរក្នុងការស្វែងរកវ៉ាលិសរបស់ខ្លួន ហើយពេលខ្លះ ក៏មានករណីច្រឡំវ៉ាលិសទៀតផង ។

ហេតុនេះ អ្នកដំណើរគួរតែចៀសវាងប្រើប្រាស់វ៉ាលិសពណ៌ខ្មៅ, ពណ៌ប្រផេះ និងពណ៌ទឹកសមុទ្រ ប៉ុន្តែបើចាំបាច់ត្រូវប្រើប្រាស់វ៉ាលិសមានពណ៌ទាំង៣ នេះ គួរតែធ្វើសញ្ញាចំណាំអ្វីមួយ ដើម្បីងាយស្រួលស្វែងរក និងគ្មានការយល់ច្រឡំយកខុសវ៉ាលិសពេលយន្តហោះចុះចត ។

ក្រុមហ៊ុនអាកាសចរណ៍ Ryanair ក៏បានណែនាំឱ្យអ្នកដំណើរថតចម្លងឯកសារផ្សេងៗដាក់ជាប់ខ្លួនផងដែរ ដូចជា ៖ លិខិតឆ្លងដែន, ប័ណ្ណបើកបរ និងអត្តសញ្ញាណប័ណ្ណ ។ ក្រៅពីនេះ អ្នកដំណើរគួរតែថតរូបរបស់ខ្លួនរក្សាទុកក្នុងទូរស័ព្ទដៃសម្រាប់មានហេតុការណ៍គ្រោះថ្នាក់កើតឡើង ។

ចំណែកលោក Stefan Schulte នាយកគ្រប់គ្រងអាកាសយានដ្ឋាន Frankfurt នៅប្រទេសអាល្លឺម៉ង់ ក៏បានដាស់តឿនអ្នកដំណើរឱ្យចៀសវាងប្រើប្រាស់វ៉ាលិសពណ៌ខ្មៅដូចគ្នាដែរ ដោយសារអាកាសយានដ្ឋានមានបញ្ហាបញ្ជូនវ៉ាលិសយឺតយ៉ាវ ។

លោក Stefan បញ្ជាក់ថា ៖ «អ្នកដំណើរភាគច្រើននិយមប្រើប្រាស់វ៉ាលិសពណ៌ខ្មៅមានកង់អូស ទើបធ្វើឱ្យភ្នាក់ងារអាកាសយានដ្ឋានចំណាយពេលយូរក្នុងការបែងចែកប្រភេទវ៉ាលិស» ៕

ប្រទេសថៃ ៖ មហាជនថៃខកចិត្តយ៉ាងខ្លាំងក្រោយពីសារព័ត៌មានជប៉ុនផ្សាយថា ប្រទេសថៃបានប្រើប្រាស់មធ្យោបាយទូទាត់ប្រាក់តាមរយៈ QR Code តិចតួច បើធៀបនឹងប្រទេសនានាក្នុងតំបន់អាស៊ាន ។

លើសពីនេះ សារព័ត៌មានជប៉ុនថែមទាំងសរសើរម៉ាឡេស៊ី និងកម្ពុជាថា គឺជាប្រទេសទូទាត់ប្រាក់តាម QR Code ច្រើនជាងគេ ដោយមហាជនថៃនិយាយថា ថៃគួរតែស្ថិតនៅលំដាប់ទី១ ក្នុងអាស៊ាន ដោយសារថៃធ្លាប់ជាប់ចំណាត់ថ្នាក់លើពិភពលោក ។

កាលពីថ្ងៃទី២០ ខែកញ្ញា ឆ្នាំ២០២៤ សារព័ត៌មានជប៉ុនឈ្មោះ Nikkei Asia បានផ្សាយថា ម៉ាឡេស៊ី និងកម្ពុជា គឺជាប្រទេសនាំមុខក្នុងតំបន់អាស៊ាន ដែលបានទូទាត់ប្រាក់តាម QR Code ច្រើនជាងគេ ។ សារព័ត៌មាននេះបញ្ជាក់ថា សេវាកម្មឆ្លងកាត់ព្រំដែន និងសេវាកម្មផ្នែកទេសចរណ៍បានធ្វើឱ្យការទូទាត់ប្រាក់ឌីជីថលក្នុងតំបន់នេះកើនឡើង ។

សារព័ត៌មាន Nikkei Asia បញ្ជាក់ទៀតថា ការទូទាត់ប្រាក់តាមរយៈ QR Code នៅតំបន់អាស៊ាន ក្នុងឆ្នាំ២០២៣ កន្លងមក រួមមាន ៖ ម៉ាឡេស៊ី បានប្រើប្រាស់ QR Code ស្មើ ២ពាន់លានលើក, ឥណ្ឌូណេស៊ី ១.៦០០លានលើក, កម្ពុជា ៧០០លានលើក, សិង្ហបុរី ៤០០លានលើក និងវៀតណាម ២០០លានលើក ។ ប៉ុន្តែគ្មានឈ្មោះប្រទេសថៃទេ ។

សារព័ត៌មាន និងអ្នកលេងបណ្តាញសង្គមថៃសួរថា ហេតុអ្វីគ្មានឈ្មោះប្រទេសថៃបែបនេះ? ខណៈប្រទេសថៃក៏មានការទូទាត់ប្រាក់ឌីជីថលដែរ គឺតាមរយៈប្រព័ន្ធ PromptPay ។ វាធ្វើឱ្យអ្នកលេងបណ្តាញសង្គមថៃចូលតវ៉ាក្នុងគេហទំព័ររបស់សារព័ត៌មាន Nikkei Asia យ៉ាងច្រើន ។

ជនជាតិថៃម្នាក់បានបញ្ជាក់ទៅសារព័ត៌មាន Nikkei Asia ថា ៖ «គ្រាន់តែខែសីហា ឆ្នាំ២០២៤ (ត្រឹមតែ១ខែ) ប្រទេសថៃបានប្រើប្រាស់ QR Code ខ្ពស់រហូតដល់ ២.១០៩លានលើកឯណោះ ឬស្មើទឹកប្រាក់ ៤.២០០លានបាត ។ ដូច្នេះ ការប្រើប្រាស់ QR Code របស់ថៃរយៈពេល១ខែ គឺខ្ពស់ជាងម៉ាឡេស៊ីរយៈពេល១ឆ្នាំ» ។

ជនជាតិថៃម្នាក់ទៀតថា ៖ «សារព័ត៌មានជប៉ុន Nikkei Asia ពុំដែលចុះផ្សាយពីចំណុចល្អរបស់ប្រទេសថៃទេតាំងពីយូរមកហើយ គឺចុះផ្សាយតែចំណុចអវិជ្ជមានប៉ុណ្ណោះ» ។

ពីដំបូង សារព័ត៌មាន Nikkei Asia បានផ្សាយថា ប្រទេសថៃស្ថិតក្នុងចំណាត់ថ្នាក់ទី៥ នៃការប្រើប្រាស់ QR Code ក្នុងតំបន់អាស៊ាន ។ ប៉ុន្តែដោយសារថៃតវ៉ាច្រើនពេក ក្រោយមក សារព័ត៌មាននេះក៏បានលុបឈ្មោះប្រទេសថៃចេញពីចំណាត់ថ្នាក់ប្រទេសប្រើប្រាស់ QR Code ។

រីឯហ្វេសប៊ុកផេកហិរញ្ញវត្ថុថៃបញ្ជាក់ថា ប្រទេសថៃបានប្រើប្រាស់ QR Code ច្រើនជាងគេក្នុងតំបន់អាស៊ាន ហើយថៃក៏ស្ថិតក្នុងចំណាត់ថ្នាក់៤ លើពិភពលោកផងដែរ ដែលពលរដ្ឋពុំទូទាត់ជាប្រាក់សុទ្ធ កាលពីឆ្នាំ២០២៣ រួមមាន ៖ ឥណ្ឌា ជាប់ចំណាត់ថ្នាក់ទី១, ចិន ទី២, កូរ៉េខាងត្បូង ទី៣, ថៃ ទី៤, អង់គ្លេស ទី៥, នីហ្សេរីយ៉ា ទី៦, ជប៉ុន ទី៧ និងប្រេស៊ីល ទី៨ ៕