ថ្មីៗនេះ ព្រះរាជវត្តមានដ៏ខ្ពង់ខ្ពស់របស់ព្រះនាងតូចនរោត្តមជេនណា ដែលបាននាំយកសម្បត្តិវប្បធម៌ខ្មែរទៅកាន់ឆាកអន្តជាតិ ពិតជាបានធ្វើឲ្យប្រជាជនខ្មែរក៏ដូចជាជនបរទេសជុំវិញពិភពលោក កោតស្ញប់ស្ញែងនិងមានមោទនភាពជាខ្លាំង។
កម្មវិធី Beijing Culture Forum របស់ស្ថានីយទូរទស្សន៍ BRTV ដ៏ល្បីរបស់ប្រទេសចិន ដែលបានរៀបចំឡើងយ៉ាងមហាឡារិករយៈពេល ៣ ថ្ងៃ ពោលចាប់ពីថ្ងៃទី ១៩ ដល់ ២១ ខែកញ្ញាកន្លងទៅថ្មីៗនេះ ក៏ដូចជាមានការញ្ជើញចូលរួមពីសំណាក់សិល្បៈករ សិល្បៈការនី មន្រ្តីជាន់ខ្ពស់ និងបុគ្គលសំខាន់ៗ មកពីជាង ៧០ ប្រទេស។
អ្វីដែលធ្វើឲ្យមហាជនមានការចាប់អារម្មណ៍ខ្លាំង នៅក្នុងកម្មវិធីដ៏ធំសម្បើមលើកនេះក៏រួមមានព្រះរាជវត្តមានរបស់ព្រះនាងតូចនរោត្តម ជេនណាផងដែរ។ នៅក្នុងឈុតសម្លៀកបំពាក់ប្រពៃណីខ្មែរយ៉ាងស្រស់ស្អាត អមដោយសំឡេងហ៊ោរកងរំពងពេញឆាកអន្តរជាតិ ព្រះនាងតូចបានបង្ហាញនូវភាពលេចធ្លោយ៉ាងខ្លាំង ដោយបានបកស្រាយបទចម្រៀងជាភាសាចិនយ៉ាងពិរោះរណ្តំ។ 
ជាការកត់សម្គាល់ ទៅកាន់ទីណាកន្លែងណា ព្រះនាងជេនណា តែងលើកយកវប្បធម៌ខ្មែរទៅបង្ហាញទៅកាន់ពិភពលោកបានឃើញពីដែនដីអច្ឆរិយរបស់ខ្មែរយើងជានិច្ច ដែលបានធ្វើឲ្យកូនខ្មែរគ្រប់ៗរូបមានមោទនភាព និងជាតិសាសន៍ដទៃគោរពស្ញប់ស្ញែង។
គួរបញ្ជាក់ថា Beijing Culture Forum វេទិកាទីក្រុងប៉េកាំង គឺជាវេទិកាសកលថ្មីមួយសម្រាប់ការផ្លាស់ប្តូរ និងកិច្ចសហប្រតិបត្តិការរវាងប្រទេសផ្សេងៗ ក្នុងការពិភាក្សាគ្នាឲ្យបានស៊ីជម្រៅទៅលើប្រធានបទជាច្រើន ដែលទាក់ទងទៅនឹងអរិយធម៌នៃប្រទេសផ្សេងៗ ការការពារបេតិកភណ្ឌវប្បធម៌ដែលជាកេរ្តិ៍ដំណែលពីដូនតាមក ក៏ដូចជាឈ្វេងយល់ការធ្វើអាជីវកម្មសម័យទំនើបដែលផ្សារភ្ជាប់ជាមួយនឹងវប្បធម៌ និងបច្ចេកវិទ្យា៕
