ប្រទេសថៃ ៖ កាលពីថ្ងៃទី២២ ខែកញ្ញា ឆ្នាំ២០២៤ សារព័ត៌មានថៃរាយការណ៍ថា Influencer ដ៏ល្បីល្បាញជនជាតិអ៊ីតាលីម្នាក់ជាម្ចាស់ហ្វេសប៊ុកផេកឈ្មោះ «vinnilimeira» ចូលចិត្តតែងខ្លួនជាមនុស្សស្រី និងតែងតែនិយាយពីអាហាររបស់ប្រទេសនានា ជាពិសេស អាហារនៅអាស៊ី ។ នាពេលថ្មីៗនេះ ជនជាតិអ៊ីតាលីបានបង្ហោះវីដេអូមួយក្នុងបណ្តាញសង្គមនិយាយពីអាហារថៃ ដូចជា ៖ ពស់អាំង ខ្យាដំរី និងក្អែប ដែលធ្វើឱ្យពលរដ្ឋថៃទទួលយកមិនបាន ហើយថាវាជាអាហាររបស់ខ្មែរ ។

នៅក្នុងវីដេអូ គេបានឃើញបុរសអ៊ីតាលីរូបនេះស្លៀកពាក់អៀមមនុស្សស្រី ហើយសរសេរថា ខ្លួនទៅបរិភោគ Fast Food នៅប្រទេសថៃ ។ រីឯអាហារថៃដំបូងដែលបុរសអ៊ីតាលីបង្ហាញនោះ គឺពស់អាំង ព្រមទាំងខ្យាដំរី និងក្អែបដោតចង្កាក់ ។ បន្ទាប់មក បុរសអ៊ីតាលី ក៏បានបង្ហាញអាហារថៃផ្សេងទៀត គឺកំពឹសឆៅ និងចង្រឹតដោតចង្កាក់ ហើយបុរសអ៊ីតាលីនិយាយថា អាហារថៃទាំងនេះពុំគួរឱ្យបរិភោគទាល់តែសោះ ។

ក្រោយឃើញវីដេអូនេះ អ្នកលេងបណ្តាញសង្គមអ៊ីតាលីនិយាយថា ៖ «បើមកប្រទេសថៃ ខ្ញុំមុខជាពិបាករកអាហារបរិភោគមិនខាន ហើយខ្ញុំសុខចិត្តផឹកឈាមខ្លួនឯងវិញ» ។ ជនជាតិអ៊ីតាលីម្នាក់ទៀតថា ៖ «ខ្ញុំមិនរិះគន់ទេ ពីព្រោះច្រើនឆ្នាំកន្លងមកនេះ ដូនតាថៃបានជួបការលំបាកយ៉ាងច្រើន ដូចជា ភាពក្រីក្រ និងខ្វះខាតស្បៀងអាហារ ទើបពួកគេបរិភោគបែបនេះ ។ អាហារខាងលើ គឺថៃបរិភោគតាំងពីដូនតាមកម៉្លេះ ហើយបច្ចុប្បន្ន វាក្លាយជាទម្លាប់របស់ពួកគេទៅហើយ» ។

ប៉ុន្តែជនជាតិអ៊ីតាលីខ្លះទៀតថា នៅប្រទេសថៃមានអាហារឆ្ងាញ់ៗច្រើន ប៉ុន្តែពួកគេយល់ថា Influencer អ៊ីតាលីរូបនេះបានបង្កើតមាតិការម្ហូបថៃប្លែកៗដើម្បីឱ្យមានអ្នកមើលច្រើន និងយល់ថា ប្រទេសថៃសម្បូរអាហារប្រភេទនេះ ។

ចំណែកអ្នកលេងបណ្តាញសង្គមថៃនិយាយថា ការបង្ហោះបែបនេះធ្វើឱ្យខូចកេរ្តិ៍ឈ្មោះប្រទេសថៃយ៉ាងខ្លាំង ជាពិសេស ភ្ញៀវទេសចរបរទេសដែលពុំធ្លាប់មកលេងថៃ គឺពួកគេនឹងគិតពីចំណុចអវិជ្ជមានមិនខាន ។ វីដេអូនេះបង្ហាញថា អាហាររបស់ថៃដែលលក់តាមផ្លូវពុំគួរឱ្យបរិភោគ និងកខ្វក់ផងដែរ ។

ជនជាតិថៃម្នាក់និយាយថា ៖ «ការបញ្ចេញមតិរបស់អ៊ីតាលីពុំត្រឹមត្រូវទេ ពីព្រោះការបរិភោគពស់អាំង ព្រមទាំងខ្យាដំរី និងក្អែបដោតចង្កាក់ ពុំមែនជាទម្លាប់ ឬវប្បធម៌របស់ថៃទេ វាគ្រាន់តែជាចំណង់ចំណូលចិត្តរបស់មនុស្សមួយក្រុមតូចប៉ុណ្ណោះ ។ ដូច្នេះ កុំនិយាយបែបនេះ បើអ្នកពុំដឹងច្បាស់លាស់ទេនោះ» ។ រីឯជនជាតិថៃទៀតម្នាក់ថា ៖ «Influencer រូបនេះ ពិតជាកូនកាត់អ៊ីតាលី-ខ្មែរមិនខាន» ។

ជនជាតិថៃផ្សេងទៀតថា ៖ «តើវីដេអូអាហារនេះថតនៅថៃឬយ៉ាងណា? ឬវាជាអាហារលក់នៅខ្មែរ? ខ្ញុំធ្លាប់ឃើញនៅតំបន់ទេសចរណ៍ គឺផ្លូវខៅសានរបស់ថៃ មានអាហារប្រភេទនេះលក់ឱ្យភ្ញៀវទេសចរអឺរ៉ុបដែលចូលចិត្តអ្វីប្លែកៗ ។ ប៉ុន្តែខ្ញុំពុំដឹងថា អ្នកលក់អាហារនៅផ្លូវខៅសាន គឺជាជនជាតិខ្មែរឬក៏អត់ ។ រីឯកំពឹសឆៅ គឺជាអាហារថៃពិតប្រាកដ ដែលមានលក់នៅតាមផ្សារណាត់» ៕

ប្រទេសឥណ្ឌូណេស៊ី ៖ កាលពីថ្ងៃទី២១ ខែកញ្ញា ឆ្នាំ២០២៤ សារព័ត៌មានបរទេសរាយការណ៍ថា គ្រួសារ និងអ្នកស្រុកបានជួយគ្នាតាមរកបុរសចំណាស់ម្នាក់បាត់ខ្លួនពុំឃើញត្រឡប់មកផ្ទះ រហូតឃើញក្រពើយក្ស១ក្បាលពាំរាងកាយមនុស្ស និងចាប់ក្រពើវះពោះ ។ ហេតុការណ៍ដ៏រន្ធ.ត់ នេះបានកើតឡើងក្នុងទីក្រុងរីយ៉ៅ ស្ថិតនៅប្រជុំកោះស៊ូម៉ាត្រា ប្រទេសឥណ្ឌូណេស៊ី ។

បុរសចំណាយដែលក្លាយជាចំណីក្រពើ ឈ្មោះ យ៉ាស់មីន អាយុ៦៨ឆ្នាំ បានប្រាប់គ្រួសារថា ចេញទៅរកត្រីក្នុងទន្លេ កាលពីព្រឹកថ្ងៃទី១៩ ខែកញ្ញា កន្លងមក ។ ប៉ុន្តែរហូតមកដល់យប់ថ្ងៃដដែល លោក យ៉ាស់មីន ពុំបានត្រឡប់មកផ្ទះវិញទេ ដែលធ្វើឱ្យគ្រួសារបារម្ភយ៉ាងខ្លាំងថា លោកមុខជាមានគ្រោះថ្នាក់មិនខាន ។ ហេតុនេះ សាច់ញាតិក៏បានទាក់ទងទៅអាជ្ញាធរមូលដ្ឋាន និងនាំគ្នាតាមរកលោក យ៉ាស់មីន ដល់កន្លែងរកត្រី ។

កូនប្រុសរបស់លោក យ៉ាស់មីន បានប្រទះឃើញសម្លៀកបំពាក់ឪពុកនៅបរិវេណមាត់ទឹក ប៉ុន្តែពុំឃើញឪពុកនៅទីនេះទេ ។ អ្នកស្រុកក៏ជួយគ្នាតាមរកបន្តទៀត រហូតដល់ព្រឹកថ្ងៃទី២០ ខែកញ្ញា ទើបអ្នកស្រុកម្នាក់ឮសូរសំឡេងក្នុងទឹក ដែលស្ថិតនៅឆ្ងាយពីបរិវេណទុកសម្លៀកបំពាក់ និងសម្ភារៈរកត្រីរបស់លោក យ៉ាស់មីន ប្រមាណ២០០ម៉ែត្រ ។

វាធ្វើឱ្យគ្រប់គ្នាភ្ញាក់ផ្អើលយ៉ាងខ្លាំង ពីព្រោះសំឡេងក្នុងទឹកនេះ គឺជាសំឡេងរបស់ក្រពើយក្ស១ក្បាល ដែលក្នុងមាត់របស់វាកំពុងទំពារសាច់មនុស្ស ។ ដូច្នេះ អ្នកស្រុកក៏ប្រើប្រាស់អគ្គិសនីឆក់ក្រពើ១នេះរហូតដល់ងាប់ និងលើកខ្លួនវាឡើងលើគោកវះពោះ ហើយពួកគេក៏បានឃើញសាកសពលោក យ៉ាស់មីន ក្នុងនោះ ។

សមត្ថកិច្ចនិយាយថា រាងកាយសាកសពបានដាច់ជាកំណាត់ៗពីគ្នា ហើយគ្រួសារសាកសពមិនត្រូវការឱ្យសមត្ថកិច្ចស៊ើបអង្កេតបន្តទេ ដោយសារពួកគេបានឃើញភស្តុតាងជាក់ស្តែងរួចហើយ ។ កន្លងមក ក៏ធ្លាប់មានហេតុការណ៍ក្រពើស៊ីអ្នករកត្រីនៅតំបន់នេះដែរ គឺយុវជន អេនឌិកា អាយុ២១ឆ្នាំ បានមករើសខ្យងនៅទន្លេ កាលពីថ្ងៃទី១៥ ខែកញ្ញា ហើយត្រូវបានក្រពើចាប់អូសទម្លាក់ទឹក ។ រហូតដល់ថ្ងៃទី១៩ ខែកញ្ញា ទើបអ្នកស្រុករកឃើញសាកសពយុវជននៅមាត់ទឹក ។

តំបន់ប្រជុំកោះនៅប្រទេសឥណ្ឌូណេស៊ី មានក្រពើរស់នៅស្មើជាង១៤ពូជ ហើយក្រពើភាគច្រើនមានទំហំធំ និងកាចសាហាវខ្លាំង ។ អ្នកអភិរក្សសត្វជឿថា តំបន់រស់នៅរបស់ក្រពើកាន់តែខិតជិតលំនៅឋានមនុស្ស ហើយមនុស្សបាននេសាទច្រើនពេក ទើបធ្វើឱ្យអស់ចំណីក្រពើ ។ ក្រៅពីនេះ ឥណ្ឌូណេស៊ីមានតំបន់ឆ្នេរសមុទ្រតិចជាងមុន ដោយសារការធ្វើកសិដ្ឋាន ខណៈអ្នកស្រុកនៅតែងូតទឹក និងរកត្រីក្នុងទន្លេ ដែលកត្តាទាំងនេះធ្វើឱ្យពួកគេងាយនឹងក្លាយជាចំណីក្រពើ ៕

TikTok គឺជាកម្មវិធីដ៏ពេញនិយម និងមានប្រជាប្រិយភាពខ្លាំងបំផុតនាពេលបច្ចុប្បន្ននេះ បន្ទាប់ពី Instagram, facebook, និង X ដោយសព្វថ្ងៃមនុស្សជាច្រើននៅជុំវិញពិភពលោក មិនថាវ័យណានោះទេសុទ្ធតែប្រើប្រាស់នូវកម្មវិធី TikTok ទាំងអស់ ដោយសារកម្មវិធីនេះមានភាពចម្រុះនៃវីដេអូដ៏សម្បូរបែប និងមានសុវត្ថិភាព ក៏ដូចជាអាចរកលុយបានទៀតផង។

យោងតាមគេហទំព័របច្ចេកវិទ្យា OBERLO បានឱ្យដឹងថា ពួកគេបានធ្វើការស្រាវជ្រាវលើកម្រិតនៃការប្រើប្រាស់ទូរស័ព្ទ កុំព្យូទ័រ និងបណ្តាញសង្គមក្នុងបណ្តាប្រទេសទាំងអស់ជុំវិញពិភពលោក ដោយក្នុងចំណោម ១៩៥ ប្រទេសមានប្រទេសចំនួន ១០ ប៉ុណ្ណោះ ដែលមានអ្នកប្រើប្រាស់កម្មវិធី TikTok ច្រើនជាងគេបំផុត។ ដូច្នេះហើយតើក្នុងបញ្ជីនោះមានប្រទេសកម្ពុជាយើងដែរឬទេ? ខាងក្រោមនេះគឺជាប្រទេសចំនួន ១០ ដែលមានប្រជាជនប្រើប្រាស់ TikTok ច្រើនជាងគេនៅលើពិភពលោក៖

១.ប្រទេសឥណ្ឌូនេស៊ី (Indonesia) មានអ្នកប្រើប្រាស់ចំនួន ១៥៧.៦ លាននាក់
២.ប្រទេសអាមេរិក (United States) មានអ្នកប្រើប្រាស់ចំនួន ១២០.៥ លាននាក់
៣.ប្រទេសប្រេស៊ីល (Brazil) មានអ្នកប្រើប្រាស់ចំនួន ១០៥.៣ លាននាក់
៤.ប្រទេសម៉ិកស៊ិក (Mexico) មានអ្នកប្រើប្រាស់ចំនួន ៧៧.៥ លាននាក់
៥.ប្រទេសវៀតណាម (Vietnam) មានអ្នកប្រើប្រាស់ចំនួន ៦៥.៦ លាននាក់
៦.ប្រទេសប៉ាគីស្ថាន (Pakistan) មានអ្នកប្រើប្រាស់ចំនួន ៦២.១ លាននាក់
៧.ប្រទេសហ្វីលីពីន (Philippines) មានអ្នកប្រើប្រាស់ចំនួន ៥៦.១ លាននាក់
៨.ប្រទេសរុស្ស៊ី (Russia) មានអ្នកប្រើប្រាស់ចំនួន ៥៦ លាននាក់
៩.ប្រទេសថៃ (Thailand) មានអ្នកប្រើប្រាស់ចំនួន ៥០.៨ លាននាក់
១០.ប្រទេសបង់ក្លាដែស (Bangladesh) មានអ្នកប្រើប្រាស់ចំនួន ៤១.១ លាននាក់៕

នៅអាស៊ីអាគ្នេយ៍យើងនេះមានប្រទេសទាំងអស់ចំនួន ១១ ទោះជាយ៉ាងណាបើយោងតាមការចេញផ្សាយរបស់សារព័ត៌មាន New Trader U បានឱ្យដឹងថា ក្នុងចំណោមប្រទេសទាំង ១១ មានប្រទេសអាស៊ីអាគ្នេយ៍ចំនួន ៥ ប៉ុណ្ណោះដែលត្រូវបានគេវាយតម្លៃថា គឺជាកន្លែងមានតម្លៃសមរម្យ សុវត្ថិភាព និងមានភាពសម្បូរបែបនៃវប្បធម៌សម្រាប់ភ្ញៀវទេសចរដែលចូលនិវត្តន៍ អាចឱ្យពួកគេរស់នៅដោយចំណាយត្រឹមតែក្រោម ២ ពាន់ដុល្លារប៉ុណ្ណោះក្នុង ១ ខែ ហើយពួកគេនឹងទទួលបានមកវិញនូវជីវិតប្រកបដោយគុណភាពខ្ពស់បំផុត។

១.ប្រទេសម៉ាឡេស៊ី៖ ការរស់នៅដែលមានតម្លៃសមរម្យ និងការថែទាំសុខភាពដ៏ល្អឥតខ្ចោះ ម៉ាឡេស៊ីជាប់ចំណាត់ថ្នាក់លេខមួយនៅអាស៊ី។ ជាមួយនឹងតម្លៃទាបនៃការរស់នៅ និងជម្រើសលំនៅដ្ឋានដែលមានតម្លៃសមរម្យ អ្នកចូលនិវត្តន៍អាចពង្រីកថវិការបស់ពួកគេបន្ថែមទៀតនៅក្នុងកន្លែងពេញនិយមដូចជា George Town និង Kuala Lumpur ។ លើសពីនេះប្រព័ន្ធថែទាំសុខភាពដ៏ល្អឥតខ្ចោះរបស់ប្រទេសម៉ាឡេស៊ីក៏ជាការទាក់ទាញដ៏សំខាន់មួយទៀតផងដែរ ដោយផ្តល់ជូននូវការថែទាំប្រកបដោយគុណភាពក្នុងតម្លៃសមរម្យបំផុត បើធៀបនឹងបណ្តាប្រទេសលោកខាងលិច។

២.ប្រទេសថៃ៖ តម្លៃទាបនៃការរស់នៅ បូករួមនឹងវប្បធម៌រស់រវើក ប្រទេសថៃ អនុញ្ញាតឱ្យអ្នកចូលនិវត្តន៍អាចរីករាយនឹងជីវិតប្រកបដោយគុណភាពខ្ពស់ ដោយពួកគេអាចរស់នៅទីក្រុងដូចជាឈៀងម៉ៃ ហួហ៊ីន និងបាងកកផ្តល់នូវបទពិសោធន៍ និងការទាក់ទាញវប្បធម៌ផ្សេងៗ ចាប់ពីប្រាសាទបុរាណ រហូតដល់ផ្សារទំនើបៗ។ នៅទីនេះមានអ្នកស្រុកដែលរួសរាយរាក់ទាក់ ម្ហូបឆ្ងាញ់ៗ និងសហគមន៍ជនបរទេសដែលកំពុងរីកចម្រើន ធ្វើឱ្យវាមានភាពងាយស្រួលសម្រាប់អ្នកចូលនិវត្តន៍ក្នុងការបង្កើតមិត្តថ្មី និងស្វែងរកភាពជាម្ចាស់។

៣.ប្រទេសវៀតណាម៖ ទេសភាពដ៏ស្រស់ស្អាត និងបេតិកភណ្ឌដ៏សម្បូរបែប ប្រទេសវៀតណាមមានទេសភាពធម្មជាតិដ៏គួរឱ្យភ្ញាក់ផ្អើលបំផុតមួយចំនួននៅអាស៊ី ចាប់ពីផ្ទៃដីស្រូវដ៏ខៀវស្រងាត់នៃភាគខាងជើងដល់ឆ្នេរដ៏ស្រស់ស្អាតនៅភាគខាងត្បូង។ ទីក្រុងដូចជា Da Nang និង Nha Trang គឺជាកន្លែងដ៏ល្អបំផុតសម្រាបជនបរទេសដែលចង់រស់នៅ ដោយសារវាជាទីតាំងបេតិកភណ្ឌវប្បធម៌ដ៏សម្បូរបែប ជាមួយនឹងទីតាំងប្រវត្តិសាស្ត្រជាច្រើន និងភូមិប្រពៃណីដើម្បីរុករក។

៤.ប្រទេសឥណ្ឌូនេស៊ី៖ កោះបាលីនៅក្នុងប្រទេសឥណ្ឌូនេស៊ី គឺជាឋានសួគ៌ត្រូពិចដែលផ្តល់ឱ្យអ្នកចូលនិវត្តន៍នូវការរួមបញ្ចូលគ្នាដ៏ល្អឥតខ្ចោះនៃសម្រស់ធម្មជាតិ ភាពសម្បូរបែបនៃវប្បធម៌ និងតម្លៃសមរម្យ។ ជាមួយនឹងឆ្នេរដ៏គួរឱ្យភ្ញាក់ផ្អើល ទេសភាពខៀវស្រងាត់ និងវាលស្រែដ៏ស្រស់បំព្រង កោះបាលីគឺជាកន្លែងមានពិធីបុណ្យជាច្រើនសម្រាប់លំហែអារម្មណ៍។ តម្លៃសមរម្យនៃការរស់នៅរបស់កោះនេះ និងជម្រើសលំនៅឋានដ៏ធំទូលាយអនុញ្ញាតឱ្យអ្នកចូលនិវត្តន៍រីករាយនឹងគុណភាពជីវិតខ្ពស់បំផុត។

៥.ប្រទេសកម្ពុជា៖ ប្រទេសកម្ពុជារបស់យើងកំពុងក្លាយជាគោលដៅចូលនិវត្តន៍ដ៏ពេញនិយមមួយយ៉ាងឆាប់រហ័ស ដោយសារតម្លៃរស់នៅទាប និងដំណើរការទិដ្ឋាការងាយស្រួល។ ទីក្រុងដូចជាភ្នំពេញ និងសៀមរាប គឺជាកន្លែងរស់នៅល្អបំផុតសម្រាប់ជនបរទេស ដោយសារវាបានផ្តល់នូវភាពចម្រុះនៃបរិក្ខារទំនើបៗ និងបទពិសោធន៍វប្បធម៌ ចាប់ពីទីផ្សារដ៏មមាញឹក រហូតដល់ប្រាសាទបុរាណ។
គួរបញ្ជាក់ដែរថា ប្រទេសសិង្ហបុរីក៏ជាប្រទេសមានសុវត្ថិភាពខ្ពស់បំផុតផងដែរ ប៉ុន្តែគ្រាន់តែមានការចំណាយខ្ពស់ ដូច្នេះមិនស្ថិតក្នុងបញ្ជីនេះទេ៕